ကြီးမားသော အကျိုးအမြတ်များ

~ဓားသူတော်စင် ဆိုသည်မှာ... ဓားသိုင်းလမ်းစဉ်၌ 'သိုင်းသူတော်စင်' အဆင့်သို့ တက်လှမ်းရောက်ရှိသွားသော... ပြိုင်ဘက်ကင်း ပုဂ္ဂိုလ်ကြီးတစ်ဦးကို ခေါ်ဆိုခြင်း ဖြစ်သည်။

သို့သော်... လက်ရှိခေတ်ကာလတွင်... ဤသို့သော အဆင့်ရှိ ဓားသူတော်စင်တစ်ပါး ပေါ်ထွက်မလာသည်မှာ ကြာမြင့်လှပြီ ဖြစ်၏။ မဟာယန်၏ သိုင်းသူတော်စင်များမှာ ဓားသိုင်းပညာဖြင့် ကျော်ကြားသူများ မဟုတ်ကြပါ။ နင်ချီ တွေးထင်မိသည်မှာ... 'နတ်ဘုရားဓားသခင် အဘိုးကြီး' ရရှိခဲ့သော မပြည့်စုံသည့် ဓားသူတော်စင် အမွေအနှစ်ဆိုသည်မှာ... လွန်လေပြီးသော ကာလမှ ဓားသူတော်စင်တစ်ပါးထံမှ... ကျန်ရစ်ခဲ့သော အမွေအနှစ်တစ်ခုသာ ဖြစ်ရမည်...။

ကျွမ်းချန်က 'နတ်ဘုရားဓားသခင် အဘိုးကြီး' သူ့ကို သင်ကြားပေးခဲ့သည်များကို... ပြန်လည် စဉ်းစားနေမိသည်။ သူ 'အတွင်းစွမ်းအားနယ်ပယ်' သို့ ခြေချနိုင်ခဲ့သည့် အချိန်မှစ၍... 'နတ်ဘုရားဓားသခင် အဘိုးကြီး' က သူ ရရှိထားသော ဓားသူတော်စင် အမွေအနှစ်များကို တဖြည်းဖြည်းချင်း သင်ကြားပေးခဲ့ခြင်း ဖြစ်သည်။ ထွက်ပြေး တိမ်းရှောင်

နေစဉ်အတွင်းမှာပင်... ကျန်ရှိနေသေးသော အနှစ်သာရများကို သူ့ထံသို့ လွှဲပြောင်းပေးအပ်ခဲ့သေး၏။

ကံကောင်းသည်မှာ... ကျွမ်းချန်ထံတွင် 'မူလဓားအရိုး' ရှိနေသောကြောင့်... ဓားသိုင်းလမ်းစဉ်အပေါ်၌... ထူးခြားသော နားလည်နိုင်စွမ်း ရှိနေပြီး... အရာအားလုံးကို မှတ်မိနေခဲ့ခြင်း ဖြစ်သည်။

ထိုအခိုက်အတန့်...

သူက သူ၏ အတွေးများကို စုစည်းလိုက်ပြီး... ဖြည်းညင်းစွာ စကားစလိုက်သည်။

"ဆရာဦးလေး ရခဲ့တဲ့ ဓားသူတော်စင် အမွေအနှစ်က... 'စိမ်းပြာဓား သူတော်စင်' လို့ ခေါ်တဲ့ ရှေ့ပုဂ္ဂိုလ်ကြီးတစ်ပါးဆီက လက်ဆင့်ကမ်းခဲ့တာဗျ။ အဲ့ဒီထဲမှာ... 'စိမ်းပြာ ခွန်အား'၊ 'စိမ်းပြာ ချီစွမ်းအင်' နဲ့ 'စိမ်းပြာ လျှို့ဝှက်မှတ်တမ်း' လိုမျိုး ကျင့်ကြံခြင်း လျှို့ဝှက်သိုင်းတွေ အများကြီး ပါပါတယ်။ ဒါတွေအပြင်... တိုက်ခိုက်ဖို့ သုံးတဲ့ ဓားလမ်းစဉ် လျှို့ဝှက်သိုင်းတချို့လည်း ရှိသေးတယ်။"

ကျွမ်းချန်က အရင်ဆုံး ဓားသူတော်စင် အမွေအနှစ်၏ ခြုံငုံပါဝင်မှုများကို ရှင်းပြလိုက်ပြီး... 'စိမ်းပြာ ခွန်အား' မှ စတင်ကာ... အသေးစိတ် ရှင်းပြပါတော့သည်။

နင်ချီက အာရုံစိုက် နားထောင်နေလိုက်သည်။

သူ... ဓားသိုင်းပညာအပေါ်... ပို၍ နက်နက်ရှိုင်းရှိုင်း နားလည်လာသလို ခံစားလိုက်ရ၏။

အစစ်အမှန်သိုင်းဂိုဏ်းတွင်လည်း ဓားသိုင်းလမ်းစဉ်နှင့် ပတ်သက်သော အဆုံးစွန် ပညာရပ်များ ရှိပါသည်။ သို့သော်... ရှင်းရှင်းလင်းလင်း ဆိုရလျှင်... ဤမျှ အသေးစိတ် မကျလှ...။ ဤအရာက... နင်ချီ၏ အသိပညာ ကွက်လပ်များကို အကောင်းဆုံး ဖြည့်ဆည်းပေးလိုက်သလိုပင်...။

လွန်ခဲ့သော အချိန်များကတည်းက... နင်ချီ နားလည်ထားသည့် အချက်တစ်ခု ရှိသည်။ ဓားကိုင်တိုင်း... ဓားသမားဟု ခေါ်ဆို၍ မရ...။ အမှန်တကယ်တွင်... သိုင်းလောကသား အများစုမှာ... အရည်အချင်းပြည့်မီသော ဓားသမားများ မဟုတ်ကြ...။ အဓိက သော့ချက်မှာ... 'ဓားခွန်အား' နှင့် 'ဓားချီစွမ်းအင်' အပေါ်၌သာ မူတည်နေသည်။

တိတိကျကျ ပြောရလျှင်... 'အတွင်းစွမ်းအားနယ်ပယ်' တွင် 'အထွတ်အထိပ်' အဆင့်သို့ ရောက်ရှိပြီး... 'ဓားခွန်အား' ကို ကျွမ်းကျင်ပိုင်နိုင်စွာ ကျင့်သုံးနိုင်သူကိုသာ... ဓားသမားဟု သတ်မှတ်နိုင်ပေသည်။

'အတွင်းစွမ်းအားနယ်ပယ်' တွင် 'အထွတ်အထိပ်' အဆင့်သို့ ရောက်ပြီးနောက်... ခွန်အားကို လွှဲပြောင်းအသုံးပြုနိုင်လာ၏။ 'ဓားခွန်အား' ကို ကျင့်ကြံသူများမှာ... တိုက်ခိုက်သည့်အခါ ပြိုင်ဘက်ကင်းသော ထက်ရှမှုကို ပြသနိုင်ပြီး... သာမန် ဓားအသုံးပြုသူများထက် အဆပေါင်းများစွာ သာလွန်သည်။

ဓားခွန်အား ဆိုသည်မှာ... အတွင်းခွန်အား၏ အလွန်အမင်း အစွမ်းထက်သော ဂုဏ်သတ္တိတစ်မျိုး ဖြစ်၏။ ဤ 'စိမ်းပြာ ခွန်အား' မှာ... ထို ထက်ရှခြင်း နယ်ပယ်တွင် အထူးတလည်ပင်... ထူးချွန် ထက်မြက်လှသည်။

*'သုံးပေရှည် စိမ်းပြာဓားသွားရဲ့ အနှစ်သာရကို ဖမ်းဆုပ်ပြီး... ဓားရဲ့ ထက်ရှခြင်း အစွမ်းကို တိုက်ရိုက် ထိုးထွင်းနိုင်တာပဲ... ဓားသူတော်စင် အမွေအနှစ်နဲ့ ထိုက်တန်ပါပေတယ်။'*

နားထောင်ရုံ သက်သက်မျှဖြင့်... နင်ချီတစ်ယောက် ထိုးထွင်းဉာဏ် အချို့ ရရှိလိုက်သည်။

သူ၏ အတွင်း ချီစွမ်းအင်များ ပြောင်းလဲသွားပြီး... ယှဉ်နိုင်ဖွယ်မရှိသော ထက်ရှမှုတို့ကို သယ်ဆောင်သွားခဲ့လေပြီ။ နင်ချီ့အတွက်တော့... အဆင်သင့် လုပ်ထားပြီးသား ပညာရပ်များကို သင်ယူရသည်မှာ... အလွန်တရာ ရိုးရှင်းလှသည်။ အကြောင်းမှာ... သူက တခြား 'ဓားခွန်အား' နှင့် 'ဓားချီစွမ်းအင်' နည်းလမ်းများကို သိရှိပြီးသား မဟုတ်ပါလား...။ ယခု... 'စိမ်းပြာ ချီစွမ်းအင်' ၏ အနှစ်သာရကို စုပ်ယူပြီးနောက်... ထိုသို့ ပြောင်းလဲခြင်းမှာ... အားစိုက်ထုတ်စရာပင် မလိုဘဲ... သူ၏ စွမ်းအားမှာလည်း... ပို၍ပင် အစွမ်းထက်လာခဲ့သည်။

ငြင်းဆန်၍ မရသောအချက်မှာ...

နောက်တစ်ကြိမ်... နင်ချီသာ 'ကောင်းကင်ဘုံဓားသိုင်း' နှင့် အခြား လျှို့ဝှက်သိုင်းများကို အသုံးပြုမည်ဆိုလျှင်... ၎င်းတို့၏ စွမ်းအားမှာ... ပိုမို မြင့်တက်လာလိမ့်မည် ဆိုသည့်အချက်ပင်...။

သူ၏ မျက်နှာပေါ်တွင် အပြုံးတစ်ခု အလိုလို ပေါ်လာခဲ့သည်။

ကျွမ်းချန်က 'စိမ်းပြာ လျှို့ဝှက်မှတ်တမ်း' အကြောင်း ပြော၍ ပြီးဆုံးသွားသည့်တိုင်... နင်ချီတစ်ယောက် အားမရသေးသလို ခံစားနေရဆဲ ဖြစ်ပြီး... မနေနိုင်ဘဲ မေးလိုက်မိသည်။

"စိမ်းပြာဓား သူတော်စင်က... သိုင်းသူတော်စင် အဆင့် ကျင့်ကြံတဲ့ နည်းလမ်း တစ်ခုခုရော... မချန်ထားခဲ့ဘူးလား။"

ဤအမွေအနှစ်ကို ထပ်ပေါင်းလိုက်လျှင်... နင်ချီ့ထံတွင် 'ကောင်းကင်ဘုံလူသား' အဆင့် အမွေအနှစ် သုံးခုအထိ ရှိသွားပြီ ဖြစ်သော်လည်း... 'သိုင်းသူတော်စင်' အဆင့် နည်းလမ်းများမှာမူ... မျက်နှာဖုံး အဖွင့်သဘော ရှင်းလင်းချက် အဆင့်တွင်သာ... ရှိနေသေးသည်။

ကျွမ်းချန်က အားနာသလိုပုံစံဖြင့် ခေါင်းကို ကုတ်လိုက်သည်။

"အဲ..အရင်က... ဆရာဦးလေး ကျွန်တော့်ကို ပြောဖူးတယ်... သူရခဲ့တဲ့ ဓားသူတော်စင် အမွေအနှစ်ထဲမှာ... ဒီလောက်ပဲ ပါတယ်တဲ့...။ အရေးအကြီးဆုံး အပိုင်းကို... တစ်ယောက်ယောက်က ဖျက်ပစ်ခဲ့ပုံပဲ..."

နင်ချီ၏ မျက်ခုံးများ အနည်းငယ် တွန့်သွားသည်။

သို့သော်... သူ ချက်ချင်းပင် နားလည်လိုက်သည်။ ဒါက... သဘာဝကျပါသည်။

သို့မဟုတ်ဘဲ... ပြီးပြည့်စုံသော 'သိုင်းသူတော်စင်' ကျင့်ကြံခြင်း နည်းလမ်းသာ တကယ် ရှိနေခဲ့လျှင်... ကောလာဟလ သတင်းတစ်ခုတည်းမျှဖြင့်... နတ်ဘုရားဓားဂိုဏ်းကို အကြိမ်ပေါင်းများစွာ ဖျက်ဆီးပစ်ရန် လုံလောက်နေပြီ မဟုတ်ပါလား...။

"ဒါပေမဲ့... ဆရာဦးလေး ပြောခဲ့သေးတယ်... 'စိမ်းပြာ လျှို့ဝှက်မှတ်တမ်း' ရဲ့ အဆုံးမှာ... မှတ်ချက်တစ်ခု ရှိတယ်တဲ့... 'သိုင်းသူတော်စင်' အဆင့်ကို ရောက်ဖို့ဆိုရင်... ကောင်းကင်နဲ့မြေကြီး စွမ်းအားကို... ကိုယ်ပိုင် အသုံးချနိုင်တဲ့အထိ... စုပ်ယူနိုင်ရမယ်... တဲ့။"

နင်ချီ၏ မျက်လုံးများ အရောင်တောက်သွားသည်။

ဒါက... သူ ဖော်ထုတ် တွက်ချက်နေခဲ့သော လမ်းကြောင်းနှင့်... တိုက်ဆိုင်နေပါ၏။

'ကောင်းကင်ဘုံလူသားနယ်ပယ်' ဆိုသည်မှာ... အနှစ်သာရ၊ ချီစွမ်းအင်၊ စိတ်ဝိညာဉ် ဆိုသည့်... ပန်းသုံးပွင့်ကို ကျင့်ကြံရခြင်း ဖြစ်သည်။

ပန်းသုံးပွင့် ထိပ်တွင် စုဝေးနိုင်လျှင်... 'ကောင်းကင်ဘုံလူသား အပြည့်အဝ' အဆင့်သို့ ရောက်ရှိသည်။ အကယ်၍... ဤအဆင့်ထက် ပို၍ ရှေ့ဆက်တက်လှမ်းလိုပါက... ဖြစ်နိုင်သည်မှာ... ကောင်းကင်နှင့်မြေကြီး စွမ်းအားကို ခန္ဓာကိုယ်ထဲသို့ စုပ်ယူရန်... လိုအပ်လာခြင်းပင် ဖြစ်ရမည်။

ဒါက သူ စဉ်းစားထားသော လမ်းကြောင်းတစ်ခု ဖြစ်သော်ငြား'ကောင်းကင်ဘုံ

လူသားနယ်ပယ်' သို့ ခြေချပြီး... နောက်ထပ် ဆက်လက် ဖော်ထုတ် တွက်ချက်မှုများ မလုပ်မချင်း... အတည်ပြုရန် နည်းလမ်း မရှိသေးပါ။

*'ဒါပေမဲ့... ဘာလို့ သိုင်းသူတော်စင် ကျင့်စဉ်ကို ဖျက်ပစ်ပြီးမှ... ဒီလို မှတ်ချက်မျိုးကို ထပ်ထည့်ထားခဲ့ရတာလဲ...'*

*'သိုင်းသူတော်စင် နည်းလမ်းကို လောကကြီးထဲ မပြန့်ပွားစေချင်ဘူးဆိုရင်... ဒီမှတ်ချက်က အပိုကြီး ဖြစ်နေပြီ...။ သိုင်းသူတော်စင် နည်းလမ်းကို ချန်ထားခဲ့ချင်တယ် ဆိုရင်ရော... ဘာလို့ ပြန်ဖျက်ပစ်ခဲ့ရတာလဲ...။ ဒါက... တစ်မျိုးမျိုးသော... အတွင်းစိတ် ရှုပ်ထွေးမှု၊ ဒါမှမဟုတ်... ပဋိပက္ခတစ်ခုခု ရှိနေသလိုပဲ...'*

*'သိုင်းသူတော်စင် အဆင့်ကို တက်လှမ်းတာက... ဘယ်သူမှ မသိသေးတဲ့ အန္တရာယ်တစ်မျိုးမျိုးနဲ့... ပတ်သက်နေလို့လား...။ ဒါကြောင့်... အရင်က သိုင်းသူတော်စင်တွေက... သူတို့ရဲ့ ကျင့်စဉ်တွေကို လက်ဆင့်ကမ်း မပေးချင်တာ... ဒါမှမဟုတ်... မပေးနိုင်တာ... ဖြစ်နေမလား...'*

နင်ချီက ထင်ကြေးများ ပေးနေမိသော်လည်း... ဤကိစ္စအပေါ်တွင်... သူ အလွန်အမင်း စွဲလန်းမနေခဲ့ပါ..။

အချိန်တန်၍... သူ တဖြည်းဖြည်း ထိုနယ်ပယ်သို့ ရောက်ရှိသွားသောအခါ... သဘာဝအတိုင်း နားလည်လာမည်သာ ဖြစ်သည်။

ကျွမ်းချန်က “ကိုးလေး... ကျွန်တော် တခြား လျှို့ဝှက်သိုင်းတွေအကြောင်း ဆက်ပြောရမလား”ဟု မေးလိုက်သည်။

နင်ချီက အသိပြန်ဝင်လာပြီး... ပြုံးလျက် ခေါင်းညိတ်ပြလိုက်၏။

ကျွမ်းချန်က ဆက်ပြောသည်။

"အရင်က မှတ်တမ်းတင်ထားတဲ့ ကျင့်ကြံခြင်း လျှို့ဝှက်သိုင်းတွေအပြင်... တိုက်ခိုက်ဖို့အတွက် သုံးတဲ့... အဆုံးစွန် အစွမ်းထက် လျှို့ဝှက်သိုင်းတွေလည်း ရှိသေးတယ်ဗျ။"

"ဥပမာ... 'နတ်ဘုရားဓား ခြေလှမ်း' ပေါ့။ ဒီခြေလှမ်းက... ခန္ဓာကိုယ်ကို ဓားတစ်လက်လို သဘောထားပြီး... ခြေလှမ်းလိုက်တာနဲ့ ဓားချက် ထုတ်လိုက်သလိုပဲ... ဘယ်သူမှ တားဆီးလို့ မရဘူး..."

ထိုအထဲမှ လျှို့ဝှက်သိုင်း အချို့မှာ... နင်ချီ၏ မျက်လုံးများကိုပင် အရောင်တောက်သွားစေပြီး... သူ၏ အခြေခံအုတ်မြစ်ကို သိသိသာသာ ကြွယ်ဝသွားစေသည်။

သို့သော်... သူ့ကို... အလှုပ်ရှားနိုင်ဆုံး ဖြစ်သွားစေခဲ့သည်မှာ... ကျွမ်းချန် ပြောပြခဲ့သော... နောက်ဆုံး လျှို့ဝှက်သိုင်းပင် ဖြစ်၏။

ကျွမ်းချန်၏ မျက်နှာအမူအရာက အနည်းငယ် မှိုင်ကျသွားပြီး... သူက ဆိုသည်။

"နောက်ဆုံး လျှို့ဝှက်သိုင်းက... 'ဓားအမြုတေ အရည်ဖျော် နည်းစနစ်' တဲ့...။ မူလအမြုတေကို... နေ့စဉ် ဓားချီစွမ်းအင်နဲ့ ပျိုးထောင်ပြီး... ဓားအမြုတေတစ်ခု ဖြစ်လာအောင် လုပ်ရတာ။ အရေးကြီးတဲ့ အခိုက်အတန့်တွေမှာ... ပုံမှန်ထက် အဆပေါင်းများစွာ ပိုပြင်းတဲ့ တိုက်ခိုက်စွမ်းအားကို ပေါက်ကွဲ ထုတ်ဖော်နိုင်တယ်။ ဒါပေမဲ့... ဒါက... ရှင်သန်ဖို့ လမ်းမရှိဘဲ... သေဖို့ပဲ ရှိတဲ့... အသေခံ တိုက်ခိုက်နည်းတစ်ခုပဲ...။ ဆရာဦးလေးက... ဒီနည်းစနစ်ကို သုံးပြီးတော့ပဲ... ကျွန်တော့်ကို ဘေးကင်းရာဆီ... ခေါ်ထုတ် လွတ်မြောက်လာခဲ့တာ..."

နင်ချီက ညင်သာစွာ သက်ပြင်းချလိုက်ပြီး... သူ၏ ပခုံးကိုသာ ပုတ်ပေးလိုက်မိသည်။

အချိန်ကား... ညပင် စောင်းနေခဲ့လေပြီ။

ဓားသူတော်စင် အမွေအနှစ်တွင်... အသိပညာ ဗဟုသုတများစွာ ပါဝင်နေသည်။ ကျွမ်းချန်က... ယခု... အနှစ်သာရများကိုသာ ရွေးထုတ်ပြီး နင်ချီ့ကို ပြောပြခဲ့ခြင်း ဖြစ်သည်။

ကျွမ်းချန် တစ်ယောက် အားလပ်သွားသည့်အခါ... ထိုအမွေအနှစ်များကို... စာလိပ်များအဖြစ် ကူးယူပြီး... 'သိုင်းကျမ်းတိုက်' တွင် ထားရှိမည် ဖြစ်သည်။

ထို့နောက် ကျွမ်းချန်က... သူ၏ အခန်းသို့ ပြန်သွားပြီး အနားယူလေ၏။

နင်ချီကတော့... သူ ယခုလေးတင်မှ ရရှိလိုက်သော... 'စိမ်းပြာဓား သူတော်စင်' အမွေအနှစ်အကြောင်းကို... ပြန်လည် တွေးတော သုံးသပ်နေမိသည်။

*'ဒါက... မပြည့်စုံတဲ့ အမွေအနှစ်တစ်ခုလို့ ဆိုပေမဲ့... ဓားသူတော်စင် ဆိုတာက ဓားသူတော်စင်ပါပဲ...။ ကျင့်ကြံခြင်း လမ်းစဉ်အပေါ်မှာ... သူများနဲ့မတူတဲ့ ထိုးထွင်းဉာဏ်တွေ ရှိနေတာပဲ။ ဒါက... ငါ့ကို အများကြီး အထောက်အကူ ပေးနိုင်တယ်။ အရင်က... သံမဏိ တောင်ကြော ၊ လူကြမ်း သုံးယောက်ဆီက ရခဲ့တဲ့... နဂါး၊ ကျား၊ လင်းယုန် အမွေအနှစ်တွေထက်... အများကြီး ပိုကောင်းတာပဲ...'*