ဓမ္မရုပ်သွင်ထင်ဟပ်ခြင်းနယ်ပယ်

ဤကာလအတွင်း ကျန်းရွှမ်သည် မမောမပန်း ငွေရှာဖွေခြင်း နည်းစနစ်များစုဆောင်းခြင်း နှင့် ကျင့်ကြံခြင်းတို့ကို လုပ်ဆောင်ခဲ့သည်။ ဤကြိုးပမ်းမှုများအားလုံးသည် သူ ခုန်းရှီကို ကယ်တင်နိုင်ရန် သူ၏ကျင့်ကြံမှုနှင့်ခွန်အားကို လျင်မြန်စွာ မြှင့်တင်နိုင်ရန်တို့အတွက် ရည်ရွယ်သည်။

သူသည် နောက်တစ်ဆင့်သို့ ချိုးဖျက်နိုင်ခြင်း မရှိသေးသော်လည်း သူ ရရှိထားသော ကောင်းကင်ဘုံကံကြမ္မာ စွမ်းအားသစ်သည် သူ၏ကြိုတင်စီစဥ်မှုနှင့် ပေါင်းစပ်လိုက်သည့်အချိန်တွင် စွမ်းအားရှိသယောင် ထင်ယောင်ထင်မှားဖြစ်စေရန် လုံလောက်ခဲ့ပေ၏။ ဤအရာဖြင့် သူသည် ကျိုးယီအင်ပါယာသို့ ယုံကြည်ချက်ရှိရှိ ဝင်ရောက်နိုင်ပြီး သူ၏ကိုယ်ပိုင်ဘေးကင်းလုံခြုံမှုကို အာမခံနိုင်လေပြီ။

ယခင်က "ဖရိုဖရဲကံကြမ္မာကျင့်ကြံသူ" ဟူသော ဂုဏ်ပုဒ်ဖြင့် သူ ဝန်ပိနေခဲ့ကာ ခြေတစ်လှမ်း မှားယွင်းပါက ခုန်းရှီ၏ ဘေးကပ်ဆိုးလမ်းစဥ်အတိုင်း မရေမတွက်နိုင်သော ကံကြမ္မာဆရာသခင်များက သူ့အား ဝိုင်းရံတိုက်ခိုက်ခြင်းကို ဦးတည်သွားစေနိုင်သည်။

ကမ္ဘာတစ်ခု၏ အရှင်သခင်တစ်ယောက်အနေဖြင့်ပင် သူ၏ကမ္ဘာသစ်ကို လောင်ကျွမ်းခြင်းမှ ရရှိသော ကြီးမားသည့်စွမ်းအားသည် ကံကြမ္မာခန်းမတစ်ခုလုံး၏ ပူးပေါင်းလိုက်လံမှုမှ သူ လွတ်မြောက်စေရန် အာမခံချက်ပေးနိုင်လောက်သည်အထိ မလုံလောက်ခဲ့ချေ။ သူ၏ကမ္ဘာသစ်သည် ခိုလှုံရာတစ်ခုကို ပေးစွမ်းသော်လည်းအကယ်၍ သူ၏ကံကြမ္မာကို ခြေရာခံမိသွားပါက ကံကြမ္မာစွမ်းအင်အစအနသည်ပင် ကပ်ဘေးတစ်ခုကို ဖြစ်စေနိုင်သည်။ ထိုဘေးကပ်ဆိုးသည် သူကိုယ်တိုင်အတွက်သာမက ကမ္ဘာသစ်အတွက်လည်းဖြစ်ပြီး နောက်ဆုံးတွင် ကြီးမားကျယ်ပြန့်သော ပျက်စီးခြင်းနှင့် စကြဝဠာတစ်ခုလုံး ပြိုလဲခြင်းတို့ထံသို့ ဦးတည်သွားပေမည်။

ဤသည်မှာ အဆိုးမြင်ဝါဒ သို့မဟုတ် အခြေအမြစ်မရှိသော ထင်ကြေးပေးမှု မဟုတ်ဘဲ မငြင်းပယ်နိုင်သည့် အမှန်တရားပင်။

ကောင်းကင်ဘုံနယ်မြေ၏ ပျက်စီးခြင်းသည် ဆိုးရွားသောဥပမာတစ်ခု ဖြစ်ခဲ့ပေ၏။ လက်ဝါးတစ်ချက်တည်းဖြင့် ကောင်းကင်လမ်းကို ကြေမွှပျက်သွားစေခဲ့ပြီး ကောင်းကင်ဘုံနယ်မြေကို အပိုင်းသုံးပိုင်းအဖြစ် ပိုင်းခြားသွားစေခဲ့သည်။ ဤှသည်မှာ နယ်ယွင်၏ကံကြမ္မာကို ခြေရာခံမိသော ကြောက်မက်ဖွယ် ကံကြမ္မာဆရာသခင်တစ်ဦးကြောင့် ဖြစ်နိုင်ခြေများသည်။ ထိုလက်ဝါးတွင် ကံကြမ္မာစွမ်းအင်များ မပါဝင်ဘဲ သာမန် ရင်းမြစ်စွမ်းအင်များသာ ပါဝင်ပေ၏။ သို့ရာတွင် ထိုအရာသည် ကောင်းကင်ဘုံနယ်မြေ၏ ကောင်းကင်ဘုံစိတ်ဝိညာဥ်အရင်းအမြစ်ကို ချေမှုန်းခဲ့ပြီး သေခြင်းမဲ့ဧကရာဇ်ကြက်ပေါက်လေးကို နေရာတွင်ပင် သေဆုံးစေခဲ့သည်။ မရေမတွက်နိုင်သော နတ်ဘုရားများသည် သူတို့၏နတ်ဘုရားဖြစ်တည်မှုကို ဆုံးရှုံးခဲ့ရပြီး မူမမှန်သော စိတ်ဝိညာဥ်များ ဖြစ်လာခဲ့ကြသည်။

ကောင်းကင်ဘုံနယ်မြေတစ်ခုလုံး၏ စိတ်ဝိညာဥ်စွမ်းအားများ ပျောက်ကွယ်သွားခဲ့ပြီး ရှင်သန်နိုင်ရေးအတွက် စိတ်ဝိညာဥ်စွမ်းအင်ဒီရေများအပေါ်တွင်သာ မှီခိုအားထားခဲ့ရသည်။ အကယ်၍ ကျန်းရွှမ်သာ နောက်ပိုင်းတွင် ကောင်းကင်လမ်းကို ကျော်လွန်ပြီး ဖာထေးပြုပြင်ခဲ့ခြင်းမရှိကာ နယ်ယွင်ကို ပြန်လည်၍အသက်မသွင်းခဲ့ပါက ကောင်းကင်ဘုံနယ်မြေသည် နောက်ဆုံးတွင် ပြိုလဲသွားပေမည်။ ဤပြိုလဲမှုသည် အထက်ကောင်းကင်ဘုံများနှင့် ပါမောက္ခကုန်းမြေကိုလည်း ဖရိုဖရဲအခြေအနေသို့ ရောက်ရှိသွားစေပြီး အရာအားလုံးကို အချည်းနှီး ဖြစ်သွားစေပေမည်။

ထို့ကြောင့် အန္တရာယ်နှင့် ရင်ဆိုင်ရသည့်အချိန်တွင် သူသည် ပုန်းအောင်းရန် ကမ္ဘာသစ်ကို အသုံးပြုနိုင်သော်လည်း တစ်ဖက်လူများ ရှာဖွေတွေ့ရှိသွားပါက ကမ္ဘာသစ်ကို ကြေမွှပျက်စီးသွားစေနိုင်ပြီး သူ၏သေဆုံးခြင်းသို့ ဦးတည်သွားစေနိုင်သည်။

သူသည် ထိုဖြစ်နိုင်ခြေအပေါ် လောင်းကြေးမထပ်နိုင်ခဲ့ချေ။

သူ၏ရည်မှန်းချက်ပန်းတိုင်သည် ခုန်းရှီကို ကယ်တင်ရန် ဖြစ်လျှင်ပင် သူသည် ပထမဦးဆုံး သူ၏ကိုယ်ပိုင်ဘေးကင်းလုံခြုံမှုကို သေချာစေရန် လိုအပ်သည်။

သူသည် ဇွဲလုံလရှိရှိ ကြိုးပမ်းခဲ့ပြီးနောက်နောက်ဆုံးတွင် ယုံကြည်မှုတချို့ ရရှိလာခဲ့လေပြီ။

"ဒီစွမ်းအင်မြစ်ရဲ့ အရှိန်အဟုန်က အပြည့်အဝမဟုတ်သေးဘူး... ဒါပေမဲ့ အခုချိန်မှာ ဆဋ္ဌမတန်းစား ကောင်းကင်ကံကြမ္မာရဲ့ စွမ်းအားကို ပိုင်ဆိုင်ထားသင့်ပြီ..."

ကျန်းရွှမ်သည် သူ၏လေလွင့်နေသော အတွေးများကို ဖယ်ရှားရင်း တွေးတောလိုက်၏။

ဤ "အရှိန်အဟုန်ကံကြမ္မာ" ကို ထူးခြားသော နည်းလမ်းတစ်ခုအား အသုံးပြု၍ ကျင့်ကြံသူတစ်ဦးထံမှ ထုတ်ယူခဲ့ခြင်းဖြစ်သည်။ ထိုအရာတွင် ပဉ္စမတန်းစားကံကြမ္မာ၏ အလားအလာ ရှိသော်လည်း အထွတ်အထိပ်အဆင့်သို့ မရောက်ရှိသေးချေ။

ဤသည်မှာ တစ်စုံတစ်ယောက်သည် ကြက်တောင်ရိုက်ခြင်း၌ လင်တန်၏ပါရမီကို ပိုင်ဆိုင်ထားသော်လည်း ယခုမှ စတင်လေ့ကျင့်နေဆဲ ဖြစ်နေသည့်အလားပင်။ သူသည် ကမ္ဘာ့ချန်ပီယံများကို ချက်ချင်းအနိုင်ယူရန်မှာ မဖြစ်နိုင်ချေ။

ပဉ္စမတန်းစားကံကြမ္မာ အလားအလာသည် အတားအဆီးမရှိသော သဘောတရားဆိုင်ရာ အကန့်အသတ်တစ်ခု ဖြစ်ပြီး လက်ရှိတွင် လက်တွေ့အခြေအနေ မဟုတ်ချေ။ ကျန်းရွှမ်သည် ထိုအရာကို သန့်စင်ခဲ့သည့်အချိန်တွင် ထိုကံကြမ္မာသည် အဋ္ဌမတန်းစားဝန်းကျင်၌သာ ရှိခဲ့သည်။ ထိုကံကြမ္မာ၏ ရှေ့အလားအလာနှင့် မြင့်မားသောစွမ်းအားများကြောင့်သာ မင်ကျန်းထောင်ကို လွှမ်းမိုးချုပ်ကိုင်နိုင်ခဲ့ခြင်း ဖြစ်သည်။

ဤကံကြမ္မာကို ကောင်းကင်ကံကြမ္မာစွမ်းအင်တန်း သန်းနှစ်ဆယ်ဖြင့် ဖြည့်တင်းပြီးနောက် ထိုအရာ၏စွမ်းအားသည် ဆဋ္ဌမတန်းစားသို့ ရောက်ရှိသွားခဲ့သည်။ ထိုကံကြမ္မာက စွန်းချန်နှင့် သောက်လီတို့ကိုပင် ထိတ်လန့်ကြောက်ရွံ့မှုကို ဖြစ်စေသော ခန့်ညားထည်ဝါသည့် အရှိန်အဝါတစ်ခုကို ထုတ်လွှတ်နေခဲ့သည်။

ဆဋ္ဌမတန်းစား ကောင်းကင်ကံကြမ္မာ စွမ်းအားသည် ကြယ်လေးပွင့် ကံကြမ္မာဆရာသခင်တစ်ဦး၏နယ်ပယ်နှင့် တူညီပေ၏။ ဤသည်မှာ ကံကြမ္မာအပေါ် ကျန်းရွှမ်၏ နားလည်သဘောပေါက်မှုသည် ယခုအချိန်၌ ကြယ်လေးပွင့် ကံကြမ္မာဆရာသခင်တစ်ဦးနှင့် ယှဥ်ပြိုင်နိုင်ပြီဟု ဆိုလိုခြင်းပင်။ သူ၏နားလည်သဘောပေါက်မှုသည် ကြယ်သုံးပွင့်ကံကြမ္မာဆရာသခင်သာ ဖြစ်သော မိုပိုင်ယဲ့ကဲ့သို့ ကျင့်ကြံသူတစ်ဦးထက် များစွာပို၍ ကျော်လွန်သွားလေပြီ။

ကံမကောင်းစွာဖြင့် အရှိန်အဟုန်စွမ်းအင်မြစ်သည် အရှိန်အဝါကိုသာ မြှင့်တင်ပေးပြီး ကျင့်ကြံမှု သို့မဟုတ် ခွန်အားကို မမြှင့်တင်ပေးနိုင်ခဲ့ချေ။ ထို့ကြောင့် သူ၏ကျင့်ကြံမှုသည် ရင်းမြစ်ရေအိုင်နယ်ပယ် နဝမအဆင့်တွင် ရပ်တန့်နေဆဲပင်။

သာမန်လူများ၏စကားဖြင့် ပြောဆိုရလျှင် သူ၏အရှိန်အဝါသည် ယခုအချိန်၌ ကြယ်စင်မြစ်နယ်ပယ် ဆဌမ သို့မဟုတ် သတ္တမအဆင့် ကျင့်ကြံသူတစ်ဦးနှင့် နှိုင်းယှဥ်နိုင်သော်လည်း သူ၏ကျင့်ကြံမှုမှာမူ ရင်းမြစ်ရေအိုင်နယ်ပယ်တွင် ခိုင်ခိုင်မာမာ အမြစ်တွယ်နေဆဲပင်။

ဤသည်မှာ စိတ်ပျက်ဖွယ်ကောင်းသော ကိစ္စတစ်ရပ်ပင်။

ကျန်းရွှမ် ဤသို့ တွေးတောနေစဥ်တွင် စွန်းချန်၏အသံက သူ၏အတွေးများကို ဖြတ်တောက်လိုက်သည်။

"သခင်လေး... ခုဏအရှိန်အဝါက ကောင်းကင်ကံကြမ္မာတစ်မျိုးလား... ကျွန်တော် ဒါကို သင်ချင်တယ်..."

"မင်း...."

ကျန်းရွှမ် အံ့အားသင့်သွားသည်။

စွန်းချန်၏မျက်လုံးများသည် စိတ်လှုပ်ရှားမှုများဖြင့် တောက်ပနေကာ သူသည် စိတ်အားထက်သန်စွာ ခေါင်းညိတ်လိုက်၏။ ဤသည်မှာ အစစ်အမှန်ခွန်အားမရှိဘဲ လွှမ်းမိုးနိုင်သောအရှိန်အဝါကို ထုတ်လွှတ်ခွင့်ပြုသည့် ကံကြမ္မာတစ်ခုပင်။ ထိုအရာသည် သူ ကြွားဝါရန်အတွက် အကောင်းဆုံးဖြစ်သည်။

"ကောင်းပြီလေ... မင်းအတွက် အဲ့ဒီကောင်းကင်ကံကြမ္မာကို ငါ သရုပ်ပြပေးမယ်... မင်း ဒါကို နားလည်နိုင်မနိုင် ဆိုတာကတော့ မင်းရဲ့အရည်အချင်းအပေါ် မူတည်တယ်"

ကျန်းရွှမ်သည် အချိန်တခဏကြာမျှ စဉ်းစားပြီးနောက် သဘောတူလိုက်သည်။

ကျယ်လောင်သော မြည်ဟီးသံနှင့်အတူ အရှိန်အဟုန်စွမ်းအင်မြစ်သည် တဖန်ပြန်၍တိုးထွက်လာသည်။ ဤသည်မှာ တစ်စုံတစ်ယောက်၏စိတ်ဝိညာဥ်ကို ဆုတ်ဖြဲပစ်လိုက်သည့်အလား စွမ်းအင်လှိုင်းလုံးများက တစ်လှိုင်းပြီးတစ်လှိုင်း ပြင်ပသို့ လှုပ်ခတ်သွားသည်။

ကျန်းရွှမ်နှင့် မျက်နှာချင်းဆိုင်တွင်ရှိနေသော စွန်းချန်သည် အံ့တင်းတင်းကြိတ်ပြီး ခံနိုင်ရည်ရှိအောင် ကြိုးစားနေသည်။ မည်မျှကြာသည်မသိရသော အချိန်တစ်ခုကြာမြင့်ပြီးနောက် ယခင်က သူ၏ရှုံမဲ့နေသော မျက်အမူအယာသည် သိသိသာသာ ပြေလျော့သွားပေ၏။

"သခင်လေး... ကျွန်တော် ရသွားပြီ"

စွန်းချန်က စိတ်လှုပ်ရှားမှုဖြင့် အော်ဟစ်လိုက်ကာ သူ၏မျက်နှာပေါ်မှအဆီများ တုန်ခါနေသည်။

"ငါ့ကို ပြစမ်း..."

ကျန်းရွှမ်က သိချင်စိတ်ပြင်းပြစွာဖြင့် ပြောဆိုသည်။

စွန်းချန်သည် သူ၏မျက်ခုံးများကို ပင့်လိုက်ပြီး သူ၏လက်များကို နောက်ပစ်ကာ သူ၏အရှိန်အဝါကို ထုတ်လွှတ်လိုက်၏။

ရုတ်ချည်းဆိုသလိုပင် အစွမ်းထက်သော အရှိန်အဝါတစ်ရပ်သည် သူ့ထံမှ ထွက်ပေါ်လာပြီး ငြင်းဆန်၍မရနိုင်သော လွှမ်းမိုးချုပ်ကိုင်နိုင်မှုတစ်ရပ်ကို ထုတ်လွှတ်ထားသည်။ ထိုအရှိန်အဝါသည် ကြယ်စင်မြစ်နယ်ပယ် ပထမအဆင့် ကျင့်ကြံသူတစ်ဦး၏အရှိန်အဝါနှင့်ပင် ခွဲခြားမရနိုင်ချေ။ ကျန်းရွှမ်ပင်လျှင် တစ်ချက် ကြည့်ရုံဖြင့် ထိုအရှိန်အဝါ၏စစ်မှန်မှုကို ခွဲခြားသိမြင်နိုင်ရန် ခက်ခဲနေသည်အား တွေ့ရှိရသည်။

"ဒါက..."

ကျန်းရွှမ် အံ့အားသင့်သွားသည်။

စွန်းချန် ပုံတူကူးနိုင်ခဲ့သော အရှိန်အဝါသည် ကောင်းကင်ကံကြမ္မာ၏ ဒုတိယအဆင့်နှင့်ပင် နှိုင်းယှဥ်နိုင်သည်။ သူသည် ဤကံကြမ္မာကို အချိန်တခဏကြာအောင် လေ့လာကြည့်ရှုပြီးနောက် အောင်မြင်ခဲ့သလော။

ကျန်းရွှမ်သည် ကောင်းကင်ဘုံစာကြည့်တိုက်သို့ လှမ်းကြည့်လိုက်သည့်အချိန်တွင် သူ၏စိတ်ထဲမှ အရှိန်အဟုန်စွမ်းအင်မြစ်၏ကမ်းပါး အနည်းငယ် ကျယ်ပြန့်သွားသည်။ ဤကြီးထွားလာမှုသည် သိသာထင်ရှားခြင်း မရှိသော်လည်း နောင်အနာဂတ်တွင် ဖြစ်ပွားလာနိုင်သည့် မှတ်သားလောက်ဖွယ် တိုးတက်မှုတစ်ခုကို ညွှန်ပြနေသည်။

ကျန်းရွှမ်သည် စိတ်ကျေနပ်သွားပြီးနောက် ခေါင်းညိတ်လိုက်၏။

စွန်းချန်သည် ဓားမကြီး သို့မဟုတ် ဓားရှည်နည်းစနစ်များတွင် ထူးချွန်မည် မဟုတ်သော်လည်း ကြွားဝါသော လှုပ်ရှားမှုများနှင့် ပတ်သက်လာလျှင် သူသည် မွေးရာပါ ပါရမီရှင်တစ်ဦးပင်။ သူ့ကို ဤကဲ့သို့ နည်းစနစ်များကို ပြီးပြည့်စုံအောင် လေ့ကျင့်စေခြင်းသည် ကျန်းရွှမ်၏တိုးတက်မှုအတွက် လွယ်ကူသော လမ်းကြောင်းတစ်ခုကို ပေးစွမ်းနိုင်ပေ၏။

စွန်းချန်ကို လေ့ကျင့်ရန် နည်းလမ်းတချို့ကို ပေးအပ်ပြီးနောက် ကျန်းရွှမ်သည် တံခါးပိတ်ကျင့်ကြံမှု ပြုလုပ်ခဲ့သည်။ သူသည် သူ၏ဓားနည်းစနစ်ကို ကောင်းကင်ဘုံသောက ကံကြမ္မာအဖြစ် ပြောင်းလဲပြီးပြီ ဖြစ်သောကြောင့် ဓမ္မရုပ်သွင်ထင်ဟပ်ခြင်းနယ်ပယ်သို့ ချိုးဖျက်ဝင်ရောက်ရန် ကြိုးစားရမည့် အချိန်တန်လေပြီ။

ကျန်းရွှမ်သည် သူ၏ကျင့်ကြံမှုအပေါ် အာရုံစိုက်နေစဥ်၌ ဟန်ယွမ်မြို့တော်သည် ဖရိုဖရဲအခြေအနေ၌ ကျရောက်နေသည်။

ပထမဦးစွာ ကံကြမ္မာခန်းမ၏ ခန်းမသခင်ဟန်ရှောင် အသတ်ခံခဲ့ရပြီးနောက် ဟန်ချန်ချောင် သေဆုံးသွားခဲ့သည်။ ဤဩဇာအာဏာလွှမ်းမိုးမှုရှိသော ပုဂ္ဂိုလ်နှစ်ဦးကို ဆုံးရှုံးလိုက်ရခြင်းသည် အာဏာလစ်ဟာမှုများကို ချန်ထားခဲ့ပြီး ကြီးမားကျယ်ပြန့်သော မငြိမ်သက်မှုများကို ဖြစ်စေခဲ့သည်။

အင်အားစုအမြောက်အများသည် သူတို့၏ နယ်မြေများကို ချဲ့ထွင်ရန် အခွင့်အရေးကို အရယူခဲ့ကြပြီး သိသာထင်ရှားသော အကျိုးအမြတ်များ ရရှိခဲ့ကြသည်။

ဥပမာအားဖြင့် ဟန်ယွမ်တော်ဝင်မိသားစု၏ ဒုတိယမင်းသားသည် အာဏာသိမ်းမှုတစ်ခုကို ပြုလုပ်ခဲ့ပြီး အိမ်ရှေ့စံကို ထောင်သွင်းအကျဥ်းချကာ ရာဇပလ္လင်ကို သိမ်းပိုက်ခဲ့သည်။

ကံကြမ္မာခန်းမအတွင်း၌ ဒုတိယခန်းမသခင်လျိုယွင်ရှန့်သည် အကြီးအကဲများအစည်းအဝေးတစ်ခုကို ခေါ်ယူခဲ့ပြီး ခန်းမသခင်သစ်အဖြစ် တညီတညွတ်တည်း ရွေးကောက်တင်မြှောက်ခြင်း ခံခဲ့ရသည်။

ဤအာဏာ အပြောင်းအလဲများကြားတွင် သေးငယ်သောခန်းမဆောင်များနှင့် အင်အားစုများသည်လည်း ချမ်းသာခွင့် မရခဲ့ကြပေ။ တစ်ချိန်က လွှမ်းမိုးချုပ်ကိုင်နိုင်ခဲ့သော ပိုင်ယွင်ခန်းမဆောင်နှင့် ဟန်ယဲ့ခန်းမဆောင်ကဲ့သို့သော အဖွဲ့အစည်းများ ပျက်စီးသွားခဲ့ပြီး မော့ယိုခန်းမဆောင်ကဲ့သို့သော တခြားအင်အားစုများ ထင်ရှားကျော်ကြားလာခဲ့သည်။

သို့ရာတွင် ဤအရာများအနက်မှ တစ်ခုမျှ ကျန်းရွှမ်နှင့် မသက်ဆိုင်ခဲ့ချေ။

သူသည် လင်းပုယန်၏သရုပ်ကို ခိုင်မာစေရန်အတွက်သာ ဒုတိယခန်းမသခင်ရာထူးအတွက် ကြိုးပမ်းခဲ့ခြင်း ဖြစ်သည်။ ယခုအချိန်၌ ဤအယောင်ဆောင်မှုကို မလိုအပ်တော့သဖြင့် သူ ဆက်လက်၍ကြိုးပမ်းရန် အကြောင်းအရင်း မရှိတော့ပေ။

ဟန်ယွမ်မြို့တော်၏ အထက်တန်းလွှာ အသိုင်းအဝိုင်းသည် ဟန်ရှောင်နှင့်ဟန်ချန်ချောင်တို့၏ သေဆုံးမှုများသည် လင်းပုယန်နှင့် ဆက်စပ်နေနိုင်ခြေရှိကြောင်း ကောင်းစွာသိရှိထားကြသည်။ ထိုသို့ဆိုသည့်တိုင် သူ၏ ကြောက်မက်ဖွယ် ဂုဏ်သတင်းကြောင့် မည်သူမျှ သူ့ကို ပြဿနာမရှာဝံ့ကြချေ။

ကျန်းရွှမ်သည် ရှားပါးသော ငြိမ်းချမ်းမှုကို ခံစားနေခဲ့ရသည်။

သုံးရက်ကြာ ပြင်းပြင်းထန်ထန်ကျင့်ကြံမှုသည် ကျန်းရွှမ်၏စွမ်းအားကို အရေးပါသော အဆင့်တစ်ခုသို့ ရောက်ရှိစေခဲ့သည်။ သူ၏အရှိန်အဝါသည် ပိုမိုကြောက်မက်ဖွယ် ကောင်းလာခဲ့ပြီး မကြာမီမှာပင် ကျင့်ကြံဆင့်ချိုးဖျက်တော့မည်ကို နိမိတ်ပြနေသည်။

နောက်ဆုံးတွင် နားကွဲမတတ် ကျယ်လောင်သော မြည်ဟီးသံကြီးနှင့်အတူ သူ၏ရင်းမြစ်ရေအိုင်သည် ပဲ့တင်ထပ်သွားပြီး ကြီးမားသော စွမ်းအင်လှိုင်းလုံးကြီးတစ်ခုကို ထုတ်လွှတ်လိုက်သည်။

သူသည် ဓမ္မရုပ်သွင်ထင်ဟပ်ခြင်းနယ်ပယ်၏ အတားအဆီးကို ချိုးဖျက်ခဲ့ပြီး သူ၏နောက်ကွယ်တွင် ကြီးမားသော ဓမ္မရုပ်သွင်တစ်ခု ထွက်ပေါ်လာခဲ့သည်။

ရင်းမြစ်ရေအိုင်နယ်ပယ် နဝမအဆင့်...ဓမ္မရုပ်သွင်ထင်ဟပ်ခြင်းနယ်ပယ်၏ အထွတ်အထိပ်အဆင့်...

ဤကျင့်ကြံဆင့်ချိုးဖျက်မှုနှင့်အတူ ကျန်းရွှမ်၏ခွန်အားသည် တဖန်ထပ်၍တိုးတက်လာခဲ့ပြီး အံ့ဩဖွယ်ကောင်းအောင်ပင် မြင်းကောင်ရေ ၂၅၀၀ခွန်အားသို့ ရောက်ရှိသွားသည်။

မလှမ်းမကမ်းတွင် မင်ကျန်းထောင်သည်လည်း သူ၏ကျင့်ကြံမှုတွင် အရေးကြီးသော အချိန်အခိုက်အတန့်တစ်ခုသို့ ရောက်ရှိနေခဲ့သည်။ လွန်ခဲ့သော နှစ်ရက်အတွင်း သူသည် ကျန်းရွှမ်း အကြံပြုခဲ့သော မေ့လျော့မြက်ပင်ကို ရရှိခဲ့ပြီး စားသုံးခဲ့သည်။

ထိုဆေးပင်သည် သူ၏လည်ချောင်းမှတစ်ဆင့် လျှောကျသွားသည့်အချိန်၌ ကြည်နူးဖွယ် စိတ်ခံစားမှုတစ်ခုက သူ့ကို လွှမ်းမိုးသွားပြီး သူ၏စိတ်ကို ဝေဝါးသွားစေကာ သူ၏ စိတ်ဓာတ်ကို မြှင့်တင်ပေးလိုက်သည်။

"ကျင့်ကြံမယ်...."

သူ၏ဝေဝါးနေမှုကို ဖိနှိပ်ကာ မင်ကျန်းထောင်သည် သူ၏မိုတောက်ဓားကို တင်းတင်းကြပ်ကြပ် ဆုပ်ကိုင်လိုက်ပြီး သူ၏ကျင့်ကြံမှုကို စတင်လိုက်၏။

သူ၏ဓား လွှဲယမ်းလိုက်တိုင်း ကောင်းကင်ကံကြမ္မာစွမ်းအင်သည် သူ၏နံဘေးပတ်လည်၌ စုဝေးလာသည်။ ဤစိတ်ကြည်နူးဖွယ် ဥာဏ်အလင်းပွင့်မှုအခြေအနေတွင် သူသည် သူ၏ ရုပ်ပိုင်းဆိုင်ရာ ကန့်သတ်ချက်များကို ကျော်လွှားနိုင်ခဲ့ပြီး အပြစ်အနာအဆာကင်းသော ဓားချက်ဆယ်ချက်ကျော်ကို လုပ်ဆောင်နိုင်ခဲ့သည်။

ရုတ်တရက် နွေးထွေးသော စွမ်းအင်တစ်ရပ် သူ၏ရင်းမြစ်ရေအိုင်မှ တိုးထွက်လာပြီး သူ၏စိတ်ကို အလွန်အမင်းကြည်လင်စေကာ ရှင်းလင်းသွားစေသည်။

ဤအလွန်အမင်း စိတ်ကြည်နူးမှုအခြေအနေသည် သူ့ကို ငြိမ်သက်အေးချမ်းပြီး လုံးလုံးလျားလျား တည်ငြိမ်သွားစေပေ၏။

"ငါ... ငါ တကယ်ကို အဆင့်ချိုးဖျက်နိုင်ခဲ့ပြီ"

သူ အသစ်တွေ့ရှိသော စွမ်းအားကို ခံစားမိချိန်၌ မင်ကျန်းထောင်က သူ၏လက်သီးများကို တင်းတင်းကြပ်ကြပ် ဆုပ်လိုက်သည်။

ကြယ်စင်မြစ်နယ်ပယ် ဒုတိယအဆင့်၏ အထွတ်အထိပ်တွင် နှစ်ပေါင်းများစွာ ရပ်တန့်နေခဲ့ပြီးနောက် သူသည် နောက်ဆုံးတွင် အဆင့်ချိုးဖျက်နိုင်ခဲ့လေပြီ။

ငြိမ်သက်ခြင်းနယ်ပယ်ဟုလည်း ခေါ်သော သူ၏ ကြယ်စင်မြစ်နယ်ပယ် တတိယအဆင့်ဖြင့် သူသည် အနှောင့်အယှက်များမှ လွတ်ကင်းသောလွတ်လပ်မှုတစ်ခုကို ခံစားလိုက်ရသည်။ ဤသည်မှာ ပြင်ပစိုးရိမ်ပူပန်မှုများကြောင့် အနှောင့်အယှက်မရှိသော ပြီးပြည့်စုံသည့် အာရုံစူးစိုက်မှုအခြေအနေပင်။

မင်ကျန်းထောင်၏ပျော်ရွှင်မှုသည် မကြာမီမှာပင် ကျန်းရွှမ်၏ လားရာမှ ထုတ်လွှတ်လာသော အစွမ်းထက်အရှိန်အဝါတစ်ရပ်ကြောင့် နှောင့်ယှက်ခြင်း ခံလိုက်ရပြီး သူ့ကို ကြောက်ရွံ့မှုနှင့်ခြိမ်းခြောက်ခံရမှု နှစ်မျိုးလုံးကို ခံစားရစေခဲ့သည်။

ကျန်းရွှမ်ထံမှ ထုတ်လွှတ်ထားသော စွမ်းအင်လှိုင်းလုံးများသည် ယခုအချိန်၌ ဒီရေလှိုင်းတစ်ခုကဲ့သို့ မြင့်မားနေပြီး အထင်ကြီးဖွယ်ကောင်းသော ပေတစ်ရာ့ငါးဆယ်အမြင့်သို့ ရောက်ရှိကာ သူ့ကို မျှော်လင့်ချက်ကင်းမဲ့မှုများဖြင့် ပြည့်နှက်သွားစေသည်။

"ဒီအရှိန်အဝါ... ဒါက ဘာလို့ ဓမ္မရုပ်သွင်ထင်ဟပ်ခြင်းနယ်ပယ်ရဲ့ စွမ်းအားမျိုး ရှိနေတာလဲ"

မင်ကျန်းထောင်က ထိတ်လန့်တုန်လှုပ်စွာဖြင့် ရေရွတ်လိုက်သည်။