သိုင်းသူတော်စင်၏ မသေချာသော နှောင်းပိုင်းကာလ၊ သွေးကျောက်စိမ်း ဆေးလုံး အောင်မြင်ခြင်း ( ၄)..

~နောက်တစ်နေ့။

နင်ချီ အသံတိတ် ထွက်ခွာသွားခဲ့သည်။

ပုံပြော သစ်သားတဲလေးမှာ ရှိနေဆဲ ဖြစ်ပြီး ရက်အနည်းငယ်ကြာ နင်ချီ့ကို မတွေ့ရမှ အချို့လူများက သူ ထွက်ခွာသွားပြီ ဖြစ်ကြောင်း သဘောပေါက် သွားကြသည်။ သူတို့၏ ရင်ထဲတွင် နှမြောတသ ဖြစ်မှုနှင့် ဆုံးရှုံးမှု ခံစားချက်ကို မလွဲမသွေ ခံစား လိုက်ရသည်။ ယခုအခါ အတူတကွ နားထောင်မည့် အဖော်တစ်ယောက် လျော့နည်း သွားခဲ့ပြီ။ မျက်မမြင် အဘိုးအိုက ညင်သာစွာ သက်ပြင်းချရင်း 'ကောင်းကင်ဘုံကို ခုတ်သတ်ခြင်း သိုင်းသူတော်စင်' ၏ ပုံပြင်များကို ဆက်လက် ပြောကြား နေခဲ့သည်။

'အစစ်အမှန်သိုင်းတောင်' နှင့် နီးသော မြို့တစ်မြို့သို့ နင်ချီ ရောက်ရှိ လာခဲ့သည်။

သူ 'သွေးကျောက်စိမ်း ဆေးလုံး' သန့်စင်ရန်အတွက် အရန် ပစ္စည်းများကို ပြင်ဆင်၍ ဤနေရာသို့ ပို့ဆောင် ပေးရန် လော့ဝမ်ထျန်းထံ ယခင်ကတည်းက သတင်း ပေးပို့ ထားခဲ့သည်။

နင်ချီ ရောက်ရှိ လာသော အခါ အရန် ပစ္စည်းများမှာ ရောက်ရှိ နေခဲ့ပြီး ဖြစ်သည်။

ခြံဝင်းငယ်လေး တစ်ခု အတွင်း…

နင်ချီက အဖိုးတန် ဆေးပင် တစ်ပင်ချင်းစီကို ချထား လိုက်ပြီး ဆေးဖော်စပ်သည့် မီးဖို တစ်လုံးကို ဖြစ်သလို ကောက်ယူ လိုက်သည်။ သူ့အတွက်မူ ဆေးဖော်စပ်ခြင်းသည် ပြင်ပ အကူအညီ မလိုအပ်ပါ။

အဓိက ပါဝင်ပစ္စည်းသာ ကျန်တော့သည်။

သူ သူ၏ ရင်ဘတ်ထဲမှ 'ခရမ်းရောင် ကျောက်စိမ်း ဝါးပြွန်' နှစ်ခုကို ထုတ်ယူ လိုက်ပြီး တစ်ခုကို အရင် ဖွင့်လိုက်သည်။ 'သွေးဘုရင် ကူ' ပေါ်ထွက် လာပြီး နင်ချီ၏ ပတ်လည်တွင် ဝဲပျံ နေတော့သည်။ နင်ချီက ၎င်းကို အထူး အသံလှိုင်းဖြင့် ထိန်းချုပ် ထားသော်လည်း 'သွေးဘုရင် ကူ' မှာ အနည်းငယ် ရူးသွပ် နေသည့် အရိပ်အယောင်များ ပြနေသည်။

ဤ ကာလ အတွင်း နင်ချီ သတိထား မိသည်မှာ 'သွေးဘုရင် ကူ' သည် ကြီးပြင်း လာပြီးနောက် ပိုမို ကြမ်းတမ်း လာခဲ့သည်။

အကယ်၍သာ သူ 'သွေးဘုရင် ကူ' နှစ်ကောင်ကို အတူတကွ ရှိနေစေမည် ဆိုလျှင် ၎င်းတို့ လုံးဝ ထိန်းချုပ် မရနိုင်ဘဲ ဖြစ်သွားနိုင်ဖွယ် ရှိသည်။

သို့ဖြစ်သည့်တိုင် လက်ရှိ 'သွေးဘုရင် ကူ' မှာ အခြား 'သွေးဘုရင် ကူ' ပါရှိသော 'ခရမ်းရောင် ကျောက်စိမ်း ဝါးပြွန်' ၏ ပတ်လည်တွင် အဆက်မပြတ် ဝဲပျံ နေခဲ့သည်။

အတွေးတစ်ခု ဖြင့် နင်ချီ ၎င်းကို 'ချီစွမ်းအင်' ဖြင့် လေထဲတွင် ခဲသွား စေလိုက်သည်။

ဤ ကာလ အတွင်း သူ 'သွေးဘုရင် ကူ' ကို အသုံးပြုပုံ နည်းလမ်းအား သုတေသန ပြုလုပ် ထားခဲ့သည်။

၎င်း၏ အနှစ်သာရမှာ တောင်ပံ သုံးစုံတွင် တည်ရှိပြီး ၎င်း၏ သန်စွမ်းသော ခန္ဓာကိုယ်မှာ ဒုတိယ နေရာတွင်သာ ရှိသည်။ သာမန်လူများမှာ 'သွေးဘုရင် ကူ' ကို ရရှိခဲ့လျှင်ပင် မည်သို့ အသုံးပြု ရမည်ကို သိကြမည် မဟုတ်။

ကံကောင်းသည်မှာ ဤသည်မှာ နင်ချီ့ အတွက် မခက်ခဲ။

ပြီးခဲ့သော တစ်လ အတွင်း သူ 'သွေးဘုရင် ကူ' ကို ရံဖန်ရံခါ လေ့လာခဲ့ပြီး 'အကြီးအကဲ ဝတုတ်' နှင့် 'အကြီးအကဲ ပိန်ခြောက်' တို့ထံမှ သင်ယူခဲ့သော အထူး အသံလှိုင်းများကို နားလည် သဘောပေါက် ခဲ့သည်။ ဤသို့ဖြင့် 'သွေးဘုရင် ကူ' အတွင်းမှ အနှစ်သာရ သွေးများကို ထုတ်ယူမည့် နည်းလမ်း တစ်ခုကို ဖန်တီး နိုင်ခဲ့သည်။

ထိုအခိုက်အတန့်၌..

သူ၏ 'ချီစွမ်းအင်' မှာ အထူး ကြိမ်နှုန်း တစ်ခုဖြင့် တုန်ခါ သွားပြီး 'သွေးဘုရင် ကူ' သာ ကြားနိုင်သော အထူး အသံလှိုင်း တစ်ခုကို ၎င်း၏ စိတ်ထဲသို့ ထုတ်လွှင့် ပေးပို့ လိုက်သည်။

နောက်တစ်ခဏ တွင်၊

'သွေးဘုရင် ကူ' ၏ မျက်နှာပြင်ပေါ်တွင် ပိုမို သိပ်သည်းသော သွေးရောင် အကွက်အဆင်များ ပေါ်ထွက် လာပြီး တောင်ပံ သုံးစုံ ဆီသို့ စုစည်း သွားတော့သည်။

အချိန်များ ကုန်ဆုံး သွားသည်နှင့် အမျှ

တောင်ပံ သုံးစုံမှာ အနုပညာ လက်ရာ တစ်ခုကဲ့သို့ ဖြစ်လာခဲ့သည်။ ၎င်းတို့၏ သွေးကျောက်စိမ်း တောင်ပံများမှာ ရင်သပ်ရှုမောဖွယ် လှပ နေပြီး အစွဲဆောင်နိုင်ဆုံး အရာမှာ မယုံနိုင်လောက်အောင် သိပ်သည်းသော စွမ်းအင် အနှစ်သာရများပင် ဖြစ်သည်။

ထို 'သွေးဘုရင် ကူ' ၏ မျက်လုံးများမှာမူ အသက်စွမ်းအား လုံးဝ ပျောက်ဆုံး သွားခဲ့ပြီ။

နင်ချီ တောင်ပံ သုံးစုံကို ဖြစ်သလို ဆွဲဖြုတ် လိုက်ပြီး 'ချီစွမ်းအင်' တုန်ခါမှု တစ်ချက်ဖြင့် 'သွေးဘုရင် ကူ' ၏ ကျန်ရှိသော ခန္ဓာကိုယ်မှာ ပြာများ အဖြစ်သို့ ပြောင်းလဲ သွားကာ ကောင်းကင်နှင့် မြေကြီး ကြားတွင် လွင့်ပျယ် သွားတော့သည်။

နင်ချီ၏ မျက်လုံးများထဲတွင် မျှော်လင့်ချက် အနည်းငယ် ရှိနေသည်။

သူ တွန့်ဆုတ် မနေခဲ့။

ဆေးလုံးများ စတင် သန့်စင်တော့သည်။

'ချီစွမ်းအင်' မှာ အလွန်အမင်း ပြင်းထန်သော မီးတောက် တစ်ခု အဖြစ်သို့ ပြောင်းလဲ သွားသည်။ သို့သော် ၎င်းမှာ နင်ချီ၏ စိတ်ဆန္ဒ အတိုင်း ပြောင်းလဲ နေခဲ့သည်။

ဆေးပင် တစ်ပင်ချင်းစီကို သန့်စင် ခဲ့ပြီး ဆေးဖော်စပ်ခြင်း လုပ်ငန်းစဉ် တစ်ခုလုံးမှာ ပန်းချီကား တစ်ချပ်ကဲ့သို့ လှပ နေခဲ့သည်။

သို့သော် ကံမကောင်းစွာပင် ဤ မြင်ကွင်းကို မည်သူမျှ မျက်မြင် ကိုယ်တွေ့ မြင်တွေ့ နိုင်ခွင့် မရှိခဲ့ပေ။

နှစ်နာရီ ကြာမြင့်ပြီးနောက်..

ဆေးလုံးများ ဖွဲ့တည်လာခဲ့သည်။

နင်ချီ၏ မျက်နှာ အမူအရာ ပြောင်းလဲ သွားပြီး 'ချီစွမ်းအင်' များဖြင့် ခြံဝင်း တစ်ခုလုံးကို ဖုံးလွှမ်းစေလိုက်သည်။ မည်သည့် လှုပ်ရှား တုန်ခါမှုမှ အပြင်သို့ မပေါက်ကြား စေရန် ဖြစ်သည်။

သူ ဆေးဖော်စပ်သည့် မီးဖိုကို ဖွင့်လိုက်ရာ သွေးရောင် တောက်ပမှု တစ်ခု ပေါက်ကွဲ ထွက်လာပြီး သန်စွမ်း လှသော သက်စောင့်စွမ်းအင်များဖြင့် ပြည့်နှက် သွားသည်။

"သွေးကျောက်စိမ်း ဆေးလုံး ခြောက်လုံး။"

အနည်းငယ်မျှပင် တွန့်ဆုတ် မနေဘဲ နင်ချီ တစ်လုံးကို မျိုချ လိုက်သည်။ ထို့နောက် 'ကောင်းကင်နဲ့မြေကြီး ကြိတ်စက်ဝန်း ချီစွမ်းအင်သန့်စင်ခြင်း နည်းစနစ်' ကို လည်ပတ် စေကာ 'ချီစွမ်းအင်' သန့်စင်ခြင်းနှင့် ကျင့်ကြံခြင်းကို စတင် လိုက်သည်။

“ဂျိန်း”

နင်ချီ တစ်ယောက်တည်းသာ ကြားနိုင်သော မြည်ဟည်းသံကြီး ပဲ့တင် ထွက်လာပြီး 'ကျောက်စိမ်းအရည် ပင်လယ်' တုန်ခါ သွားသည်။

ပင်လယ်ရေ စီးကြောင်းများ ကြိတ်စက်ဝန်း အတွင်းသို့ သွန်ချ လိုက်ပြီး သန့်စင် စေသည်။ သို့သော် 'သွေးကျောက်စိမ်း ဆေးလုံး' ကို သောက်သုံး ပြီးနောက် ကြိတ်စက်ဝန်းမှာ သွေးရောင် တောက်ပမှု တစ်ခုကို ဆောင်သွားပြီး သန့်စင်မှု စွမ်းဆောင်ရည်မှာ အလွန် မြင့်တက် သွားသည်။

နင်ချီ သန့်စင်ခြင်း လုပ်ငန်းစဉ်၏ စွမ်းဆောင်ရည်မှာ ယခင်ကထက် များစွာ ပိုမို မြန်ဆန် လာသည်ကို ခံစား မိလိုက်ရပြီး ပျော်ရွှင် သွားမိ၏။

'ရွှေကျောက်စိမ်း ဆေးလုံးနဲ့ အလားတူပဲ။ သွေးကျောက်စိမ်း ဆေးလုံး တစ်လုံးက ငါ့ရဲ့ ကျင့်ကြံခြင်းကို တစ်လစာ အရှိန် မြှင့်တင် ပေးနိုင်တယ်။ ဒါပေမဲ့ အာနိသင်က ပိုကောင်းတယ်။'

'ဒီနှုန်း အတိုင်းဆိုရင် သွေးကျောက်စိမ်း ဆေးလုံး ဆယ်လုံး ဆိုတာနဲ့ ငါ့ကို 'မူလအမြုတေ နယ်ပယ်' ကို သဘာဝအတိုင်း ရောက်ရှိ သွားစေဖို့ လုံလောက်ပြီ။'

နင်ချီ ကျေနပ်စွာ ခေါင်းညိတ် လိုက်သည်။

'သွေးဘုရင် ကူ' တစ်ကောင်ကို သန့်စင် လိုက်ရာ 'သွေးကျောက်စိမ်း ဆေးလုံး' ခြောက်လုံး ရရှိခဲ့ပြီး နှစ်လုံး ပိုလျှံ နေခဲ့၏။

ထို အချိန်ကျမှ ၎င်းတို့ကို 'အစစ်အမှန်သိုင်းဂိုဏ်း' အတွက် အမွေအနှစ် အဖြစ် ထိန်းသိမ်း ထားမည် သို့မဟုတ် အခြား အသုံးများ အတွက် သုံးမည် ဆိုသည်မှာ သူ့ အပေါ်တွင် မူတည် သွားမည် ဖြစ်သည်။

သို့သော် သူ အနည်းငယ် စိတ်လှုပ်ရှား သွားမိသည်။

အမှန်တကယ်ပင် သူသည် နယ်ပယ် တူညီသော အခြားသူများထက် များစွာ သာလွန် နေခဲ့သည်။ 'သွေးဘုရင် ကူ' တစ်ကောင်သည် သာမန် 'မူလအမြုတေ နယ်ပယ်' ကျင့်ကြံသူ တစ်ဦးကို 'ကောင်းကင်ဘုံလူသားနယ်ပယ်' သို့ တက်လှမ်း နိုင်ရန် လုံလောက် စေသည်။ သို့သော် သူ့ အတွက်မူ နှစ်ကောင် ပေါင်းမှသာ 'မူလအမြုတေ နယ်ပယ်' သို့ ထိုးဖောက် နိုင်ရန် မနည်း လုံလောက် ပေမည်။ ၎င်းမှာလည်း တိုက်ရိုက် ထိုးဖောက်ခြင်း မဟုတ်ဘဲ လုပ်ငန်းစဉ်ကို အရှိန် မြှင့်တင် ပေးခြင်းမျှသာ ဖြစ်သည်။

ဤသည်မှာ သဘာဝကျပါသည်။

ဘာပဲဖြစ်ဖြစ် နင်ချီ 'ကျောက်စိမ်းအရည် နယ်ပယ်' တွင် ရှိနေစဉ် ကတည်းက သာမန် 'ကောင်းကင်ဘုံလူသား' တစ်ဦးထက် များစွာ သာလွန်သော စွမ်းအား ရှိနေခဲ့ပြီ ဖြစ်သည်။ ထို့ကြောင့် ထိုးဖောက် တက်လှမ်းရန် ခက်ခဲ နေခြင်းမှာ သဘာဝကျပါသည်။

ထိုသို့ ဆိုသော်ငြား တိုက်ရိုက် ထိုးဖောက် တက်လှမ်း နိုင်ရန် ကူညီ ပေးနိုင်သော ဆေးလုံးများ ရှိခဲ့လျှင်ပင် နင်ချီ ၎င်းတို့ကို သောက်သုံးမည် မဟုတ်။ သူ သူ၏ အခြေခံ အုတ်မြစ်များတွင် အပြစ်အနာအဆာ မရှိစေရန် သေချာစေရန် လိုအပ်သည်။ ထို့ကြောင့် 'ရွှေကျောက်စိမ်း ဆေးလုံး' ဖြစ်စေ၊ 'သွေးကျောက်စိမ်း ဆေးလုံး' ဖြစ်စေ နင်ချီက တိုက်ရိုက် နယ်ပယ် ထိုးဖောက်ခြင်းထက် ကျင့်ကြံခြင်းကို အရှိန် မြှင့်တင် ပေးနိုင်သော လမ်းကြောင်း တစ်ခုကိုသာ တွန်းအား ပေးခဲ့ခြင်း ဖြစ်သည်။

နင်ချီ စိတ်သက်သာရာ ရသွားသည်။

တူညီသော ပုံစံ အတိုင်းပင်။

သူ အခြား 'သွေးဘုရင် ကူ' ကိုလည်း 'သွေးကျောက်စိမ်း ဆေးလုံး' ခြောက်လုံး အဖြစ် အောင်မြင်စွာ သန့်စင် နိုင်ခဲ့သည်။

ဤသို့ဖြင့်။

'တောင်ပိုင်းနယ်စပ် မဟာမိတ်' ထံတွင် ကောင်းကင်ဘုံသို့ ထိစပ် နိုင်သော နည်းလမ်းများ ရှိနေသည့်တိုင် သူတို့ 'သွေးဘုရင် ကူ' ၏ သွားလာရာ နေရာကို ခြေရာခံ နိုင်တော့မည် မဟုတ်။

လက်ရှိ၌၊

'တောင်ပိုင်းနယ်စပ် မဟာမိတ်' မှာ မည်သည့် လှုပ်ရှားမှု အရိပ်အယောင်မျှ မပြ သေး။ 'အကြီးအကဲ ဝတုတ်' နှင့် 'အကြီးအကဲ ပိန်ခြောက်' တို့ အဆက်အသွယ် ပြတ်တောက် သွားသည်ကို သူတို့ မသိရှိ သေးသောကြောင့် ဖြစ်မည်ဟု ယူဆရသည်။

သို့သော် သူတို့ တုံ့ပြန် လာသည့်တိုင် သူတို့ နောက်ဆုံးတွင် 'မိစ္ဆာဂိုဏ်း' ကိုသာ သံသယ ဝင်ကြပေလိမ့်မည်။

ထို ထူးခြားသော အဆိပ် သိုင်းပညာကို အနည်းငယ် စစ်ဆေး ကြည့်ရုံဖြင့် ခြေရာခံ နိုင်ပေလိမ့်မည်။ ဘာပဲဖြစ်ဖြစ် 'အကြီးအကဲ ဝမ်' ထိုသိုင်းကို 'အစစ်အမှန်သိုင်းတောင်' တွင် အသုံး ပြုခဲ့ဖူးသည် မဟုတ်ပါလား။ နင်ချီ သူ၏ သဲလွန်စများကို တမင် ဖျောက်ဖျက် ခဲ့သော်လည်း 'တောင်ပိုင်းနယ်စပ် မဟာမိတ်' ၏ နည်းလမ်းများမှာ အမှန်တရားကို ဖော်ထုတ် နိုင်သင့်သည်ဟု သူ တွေးလိုက်မိသည်။ သို့မဟုတ်လျှင် သူတို့ 'မိစ္ဆာဂိုဏ်း' နှင့် နှိုင်းယှဉ် ခံရရန်ပင် ထိုက်တန်တော့မည် မဟုတ်ပေ။

'နတ်ဘုရားဓားဂိုဏ်း' ဖျက်ဆီး ခံရပြီးနောက် 'ကျွမ်းချန်' 'အစစ်အမှန်သိုင်းဂိုဏ်း' သို့ ထွက်ပြေး လာခဲ့သည့် အတွက် ဒါက 'အစစ်အမှန်သိုင်းဂိုဏ်း' အပေါ် သံသယ ဝင်စေ နိုင်ပါသည်။

သို့သော် ထိုအရာက 'တောင်ပိုင်းနယ်စပ် မဟာမိတ်' ကို 'မိစ္ဆာဂိုဏ်း' က အခြားသူ တစ်စုံတစ်ယောက်၏ စွမ်းအားကို အသုံးပြု၍ သတ်ဖြတ် ခဲ့သည်ဟုလည်း တွေးထင် စေနိုင်ပါသည်။

ဘာပဲဖြစ်ဖြစ် မျက်နှာပြင်ပေါ်တွင် 'အစစ်အမှန်သိုင်းဂိုဏ်း' ၏ စွမ်းအားမှာ 'တောင်ပိုင်းနယ်စပ် မဟာမိတ်' ၏ အမာခံ စခန်းများကို မျိုးဖြုတ် သုတ်သင် နိုင်ရန် လုံလောက်မှု မရှိ။ 'စစ်မှန်သူ ကောင်းကင်ဘုံဓားသခင်' ပါဝင်သည့်တိုင် ၎င်းမှာ စိန်ခေါ်မှု တစ်ခု ဖြစ်နေဆဲပင်။

'အကြီးအကဲ ဝတုတ်' နှင့် 'အကြီးအကဲ ပိန်ခြောက်' တို့ ပြသခဲ့သော နည်းလမ်းများနှင့် စွမ်းအားများမှာ 'တာအိုဆရာလုံရှန်း' နှင့် 'စစ်မှန်သူ ကောင်းကင်ဘုံဓားသခင်' တို့ထက် မနိမ့်ကျ သွားနိုင်ပေ။

နင်ချီ နက်နက်ရှိုင်းရှိုင်း တွေးတော လိုက်သည်။

မည်သည့် ချန်လှပ် ထားခဲ့မှုမှ မရှိကြောင်း သေချာ သွားပြီးနောက် သူ 'အစစ်အမှန်သိုင်းတောင်' ရှိရာ အရပ်သို့ ဦးတည်လိုက်တော့၏။

ပထမဆုံး အကြိမ် အိမ်နှင့် ဤမျှ အကြာကြီး ခွဲခွာ နေခဲ့ရသဖြင့် နင်ချီသည် အနည်းငယ် အိမ်ကို လွမ်းနေမိပါသည်။