ရင်းမြစ်ကံကြမ္မာ၏ အထွတ်အထိပ်လျှို့ဝှက်ဆန်းကြယ်မှု

ရှစ်ယွင်ကျင်းသည် ကျိုးယီအင်ပါယာ ကံကြမ္မာခန်းမ၏ခန်းမသခင်ပင်။ သူ၏ ကျင့်ကြံမှုသည် ကြယ်စင်မြစ်နယ်ပယ်၏ ဆဋ္ဌမအဆင့် အထွတ်အထိပ်သို့ ရောက်ရှိနေကာ သူ့ကို အင်ပါယာတစ်ခုလုံးတွင် အားအကောင်းဆုံး ပုဂ္ဂိုလ်များအနက်မှတစ်ဦး ဖြစ်စေသည်။

လွန်ခဲ့သောအချိန်အနည်းငယ်က ဖရိုဖရဲကံကြမ္မာကျင့်ကြံသူ ထွက်ပေါ်လာပြီးနောက် ရှစ်ယွင်ကျင်းသည် သူတို့ကို လိုက်လံရှာဖွေရန် အမိန့်ပေးခြင်းခံခဲ့ရသည်။ သူသည် ထိုအချိန်မှစ၍ ကျီးလန်တောင်ကြားတွင် စခန်းချနေထိုင်ခဲ့သည်။ သူသည် မူလက သူ၏ပစ်မှတ်သည် ဖိအားအောက်တွင် အချိန်ကြာမြင့်စွာ တောင့်ခံနိုင်မည်မဟုတ်ဘဲ မကြာမီ ထွက်ပြေးလိမ့်မည်ဟု တွေးထင်ခဲ့သည်။ သို့ရာတွင် မမျှော်လင့်ဘဲ တစ်လနီးပါးကြာမြင့်ခဲ့သည့်တိုင် ထိုလူ၏အရိပ်အယောင်ကို မမြင်တွေ့ရချေ။ ထိုမျှသာမက တစ်ချိန်က ပရမ်းပတာဖြစ်နေသော ကောင်းကင်ကံကြမ္မာ နတ်ဘုရားနယ်မြေသည် သိသိသာသာ တည်ငြိမ်သွားခဲ့ပေ၏။

သူ၏ပစ်မှတ်သည် မကြာမီအတောအတွင်း၌ ပြင်ပသို့ ထွက်ပေါ်လာမည်မဟုတ်ကြောင်း နားလည်သဘောပေါက်သဖြင့် ရှစ်ယွင်ကျင်းသည် လက်အောက်ငယ်သားများကို စောင့်ကြည့်ရန် စီစဉ်ခဲ့သည်။ ထို့နောက် သူသည် ရင်းမြစ်သားရဲပျံတစ်ကောင်ပေါ်သို့တက်ပြီး ကံကြမ္မာခန်းမသို့ ပြန်လာခဲ့သည်။ သူ အချိန်ကြာမြင့်စွာ လစ်ဟာနေမှုသည် ဖြေရှင်းရန်ကိစ္စများစွာကို စုပုံစေခဲ့ပြီး သူ ချက်ချင်းအာရုံစိုက်ရန် လိုအပ်နေသည်။

သူသည် ကံကြမ္မာခန်းမရှိ သူ၏လျှို့ဝှက်ခန်းအကြောင်း ပြန်လည်အမှတ်ရမိစဉ်တွင် သူ၏မျက်နှာပေါ်၌ ခပ်ဖျော့ဖျော့အပြုံးတစ်ခု ထင်ဟပ်လာသည်။ သူသည် သူ၏ဘဝတလျှောက်လုံး အိမ်ထောင်မပြုဘဲ နေထိုင်ခဲ့ပြီး ဇနီး သို့မဟုတ် ကလေးများ မရှိဘဲ ပိုင်ဆိုင်မှုတစ်ခုကိုလည်း မဝယ်ယူခဲ့ချေ။ ထိုအစား သူသည် ကံကြမ္မာခန်းမအတွင်းရှိခအခန်းတစ်ခန်းတွင် နေထိုင်ခဲ့သည်။ ထိုအခန်းသည် ကြီးမားခြင်းမရှိသော်လည်း အမျိုးမျိုးသော ဝင်္ကပါများဖြင့် စေ့စပ်သေချာစွာ ပြင်ဆင်ထားသည်။ ကာကွယ်ရေးဝင်္ကပါများ စွမ်းအင်စုစည်းခြင်းဝင်္ကပါများနှင့် ဖုံးကွယ်ခြင်းဝင်္ကပါများစသဖြင့် စုစုပေါင်း ဝင်္ကပါဆယ်ခုကျော်ရှိသည်။

ဤသည်မှာ လုပ်ကြံသတ်ဖြတ်ခြင်းကို ကြောက်ရွံ့ခြင်း သို့မဟုတ် သူရဲဘောကြောင်ခြင်းကြောင့် မဟုတ်ဘဲ သူ၏ ကျင့်ကြံမှုလမ်းကြောင်းနှင့် ချိတ်ဆက်နေသည်။ သူသည် ရတနာကံကြမ္မာကို ကျင့်ကြံခဲ့ပြီး ရှားပါးသော ရှေးဟောင်းပစ္စည်းများနှင့် တန်ဖိုးကြီး ရတနာများကို စုဆောင်းခြင်းဖြင့် သူ၏ကျင့်ကြံဆင့်အတားအဆီးများကို ချိုးဖျက်စေနိုင်သော နည်းစနစ်တစ်ခုပင်။ ကျိုးယီအင်ပါယာရှိ ကံကြမ္မာခန်းမ၏ လေးစားခံရသော ခန်းမသခင်အနေဖြင့် သူ၏ မြင့်မားသောအဆင့်အတန်းသည် ရတနာစုဆောင်းခြင်းကို အလွန်လွယ်ကူစေသည်။ အကျိုးဆက်အနေဖြင့် သူ၏လျှို့ဝှက်ခန်းအတွင်းတွင် အဖိုးတန် ကျောက်စိမ်းများ မဟူရာကျောက်များ ရှေးဟောင်းပန်းချီကားများ လက်ရေးလှစာလိပ်များနှင့် အလှဆင်ပန်းအိုးအမျိုးမျိုးတို့ဖြင့် ပြည့်နှက်နေသည်။

ဤရတနာများသည် သူ၏အသက်သွေးကြောပင်။ သူသည် အိမ်ပြန်ရောက်တိုင်း ထိုအရာများကို စေ့စပ်သေချာစွာ သန့်ရှင်းရေးလုပ်လေ့ရှိပြီး သူ့ကိုယ်သူ ဆေးကြောသန့်စင်ခြင်းထက်ပင် ပို၍ဂရုစိုက်သည်။

"ငါ့ရဲ့ရတနာလေးတွေကို မတွေ့ရတာ ရက်အတော်ကြာနေပြီ...ငါ ပြန်ရောက်တာနဲ့ ဒါတွေကို သေသေချာချာ သန့်ရှင်းရေးလုပ်ရမယ်"

ရှစ်ယွင်ကျင်းက အပြုံးဖြင့် စဥ်းစားတွေးတောလိုက်၏။ သူ၏စုဆောင်းမှုကို တွေးတောမိချိန်၌ လွန်ခဲ့သော ရက်အနည်းငယ်က သူ၏ပင်ပန်းနွမ်းနယ်မှုနှင့်မောပန်းမှုတို့ ပျောက်ကွယ်သွားပုံရသည်။

"မြန်မြန်လုပ်...ပိုပြီးမြန်မြန် ပျံသန်းစမ်း....ငါက မင်းကို နောက်မှ အရသာရှိတဲ့တစ်ခုခု ဆုချမယ်"

သူသည် သားရဲ၏ကျောပေါ်တွင် မတ်တတ်ရပ်ရင်း သူ၏လက်များကို နောက်သို့ပစ်ကာ ရှေ့သို့ စူးစိုက်ကြည့်ရင်း တိုက်တွန်းလိုက်သည်။

မကြာမီမှာပင် ကြီးမားကျယ်ပြန့်သော ကျိုးယီမြို့သည် သူ၏အမြင်အာရုံထဲတွင် ထွက်ပေါ်လာသည်။ ခမ်းနားထည်ဝါသော ကျောက်တံတိုင်းများနှင့် လူများဖြင့် ပြည့်နှက်နေသော စည်ကားသည့် လမ်းများသည် မြို့၏ သာယာဝပြောမှုကို ပြသနေပေ၏။

"ကျီ....ကျီ..."

အမိန့်ကိုကြားချိန်တွင် ရင်းမြစ်သားရဲသည် ခေါင်းညိတ်လိုက်ပြီး သူ၏အတောင်ပံများကို ကောင်းကင်ကို ဖြတ်သန်းသွားသော ကြယ်ပျံတစ်စင်းကဲ့သို့ ခတ်လိုက်သည်။ အသက်ဆယ်ရှိုက်ကျော်စာ အချိန်အတွင်းမှာပင် ကံကြမ္မာခန်းမ၏ ခမ်းနားထည်ဝါသော အဆောက်အဦးများသည် သူ၏အမြင်အာရုံထဲသို့ ဝင်ရောက်လာသည်။

"နောက်ဆုံးတော့...ငါ အိမ်ပြန်ရောက်ပြီ..."

သူ၏ရတနာများကို မကြာမီ တွေ့ရတော့မည်ဟု တွေးတောရင်း စိတ်လှုပ်ရှားမှုကြောင့် ရှစ်ယွင်ကျင်း၏မျက်နှာ နီမြန်းသွားသည်။ သူသည် သားရဲ၏ကျောပေါ်မှ ခုန်ချရန် ပြင်ဆင်နေစဉ်မှာပင် အကြီးအကဲကျူးရွှင်သည် လူတစ်စုနှင့်အတူ ထိတ်ထိတ်ပျာပျာဖြင့် အခန်းတစ်ခန်းအတွင်းမှ ပြေးထွက်လာသည်ကို သူ သတိပြုလိုက်မိသည်။

ရှစ်ယွင်ကျင်းက မျက်မှောင်ကြုတ်လိုက်သည်။ အကြီးအကဲကျူးသည် များသောအားဖြင့် တည်ငြိမ်အေးဆေးစွာ လုပ်ဆောင်တတ်သူပင်။ မည်သည်ကြောင့် သူသည် ယနေ့တွင် ဤမျှထိ လှုပ်လှုပ်ရှားရှား ဖြစ်နေရသနည်း။

သူ အံ့အားသင့်နေစဉ်မှာပင် အကြီးအကဲများ ပို၍များပြားလာကာ သူတို့အားလုံး ထပ်တူထပ်မျှ ထိတ်လန့်နေကြသည်။ ရှစ်ယွင်ကျင်းသည် ပို၍ပင် စိတ်မကျေမနပ် ဖြစ်လာပေ၏။ သူ ရှိမနေခြင်းကြောင့် လူများအားလုံးကို ဂဏာမငြိမ်ဖြစ်စေပြီး မတည်မငြိမ်ဖြစ်စေပုံရသည်။

သူသည် သူတို့ကို ဆူပူကြိမ်းမောင်းရန် ဟန်ပြင်နေစဉ်မှာပင် သူ၏ရှေ့ရှိ ခမ်းနားထည်ဝါပြီး ခိုင်ခံ့သော ကံကြမ္မာခန်းမမှ ကျယ်လောင်သော "ဘုန်း"ခနဲအသံကြီး ထွက်ပေါ်လာသည်။ အဆောက်အဦးတစ်ခုလုံးသည် အချိန်တခဏအတွင်းမှာပင် ပြိုကျသွားပေ၏။ အခန်းများ ပြိုကျသွားပြီး မျက်စိတမှိတ်အတွင်းမှာပင် ထိုအရာသည် အပျက်အစီးများအဖြစ်သို့ ရောက်ရှိသွားသည်။

“....”

ရှစ်ယွင်ကျင်း၏ခန္ဓာကိုယ် တောင့်တင်းသွားပြီး အမှောင်ထုသည် သူ၏အမြင်အာရုံကို ဖုံးလွှမ်းသွားသည်။ သူသည် မယုံကြည်နိုင်မှုဖြင့် ရင်းမြစ်သားရဲပေါ်မှ ပြုတ်ကျလုနီးပါး ဖြစ်သွားလေ၏။

"ငါ ခဏလေး ထွက်သွားတာ... ငါ့ရဲ့အိမ် ပျောက်သွားတာလား"

"ငါ့ရဲ့ကျောက်စိမ်းတွေ....ငါ့ရဲ့ရတနာတွေ... ငါ့ရဲ့စုဆောင်းထားမှုတွေ..."

သူသည် စိတ်မထိန်းနိုင်တော့ဘဲ သူ၏ရင်ဘတ် မွန်းကြပ်လာသည်ကို ခံစားလိုက်ရပြီး သွေးတစ်လုတ် အန်ထုတ်လိုက်သည်။ ဤပစ္စည်းများသည် သူ၏ဘဝတလျှောက်လုံး ရှာဖွေစုဆောင်းခဲ့သမျှ အကုန်အစင်ပင်။ ထိုအရာများအားလုံးသည် ကံကြမ္မာခန်းမပြိုကျမှုတွင် ဖျက်ဆီးခြင်း ခံလိုက်ရနိုင်သလော....။

လွန်ခဲ့သော အချိန်အနည်းငယ်အကြာက....

ကျန်းရွှမ်သည် ကောင်းကင်ကံကြမ္မာစွမ်းအင်များကို အံ့အားသင့်ဖွယ်အရှိန်နှုန်းဖြင့် စုပ်ယူနေသည်။ ကံကြမ္မာမြစ်တစ်ခုလုံးသည် နောက်ပြန်စီးဆင်းနေပုံရပြီး မရေမတွက်နိုင်သော ရွှေရောင်ကံကြမ္မာငါးများသည် သူ၏ခန္ဓာကိုယ်ထဲသို့ အရူးအမူး တိုးဝင်လာကြသည်။ ဤအချက်က တခြားလူများအားလုံးကို မယုံနိုင်လောက်အောင် စိုးရိမ်ပူပန်စေသည်။

"ဆရာနဲ့ ယှဉ်ပြိုင်ဖို့က တကယ့်ကို မဖြစ်နိုင်ဘူး... သူက အရမ်းလွန်လွန်းတယ်"

"ငါတို့က ငါတို့ရဲ့ ကိုယ်ပိုင်ကောင်းကင်ကံကြမ္မာကို ရှာဖွေဖို့နဲ့ တတ်နိုင်သလောက် များများနားလည်သဘောပေါက်ဖို့ကို အာရုံစိုက်ရမယ်"

လော့ယိုရှင်းက အရေးတကြီး အော်ဟစ်သတိပေးလေသည်။

"နားလည်ပါပြီ...."

လူတိုင်းသည် ကန့်သတ်ချိန်ကုန်ဆုံးနေပြီဖြစ်ကြောင်း သိရှိထားကြသည်။ မည်သည့်ကြိုတင်မှာကြားမှုကိုမျှ ဂရုမစိုက်တော့ဘဲ သူတို့သည် သူတို့၏သက်ဆိုင်ရာ ကံကြမ္မာများမှတဆင့် ကောင်းကင်ကံကြမ္မာစွမ်းအင်များကို အရူးအမူး စတင်၍စုပ်ယူလိုက်ကြသည်။

ဘုန်း...

ဧကရာဇ်အဆင့်ကို ကျော်လွန်သော ပါရမီရှင်ဆယ်ယောက်ကျော်သည် ကောင်းကင်ကံကြမ္မာစွမ်းအင်များကို တစ်ပြိုင်နက်တည်း စုပ်ယူလိုက်ကြ၏။ ဤသည်မှာ ကံကြမ္မာမြစ်ထဲတွင် ဝဲဂယက်များ ဖွဲ့စည်းသွားသကဲ့သို့ဖြစ်ပြီး ပျံ့လွင့်သွားသော စီးဆင်းမှုများကြောင့် မရေမတွက်နိုင်သော မြစ်လက်တက်များအဖြစ်သို့ ကွဲထွက်သွားသည်။ ကံကြမ္မာမြစ်သည် ယခုအချိန်၌ အက်ကွဲကြောင်းများဖြင့် ပြည့်နှက်နေပြီး ပြိုလဲပျက်စီးလုနီးပါး ယိမ်းယိုင်နေသည်။

မတည်ငြိမ်မှုကို ခံစားမိသဖြင့် ကျန်းရွှမ်သည် သူ၏မျက်လုံးများကို ဖွင့်ပြီး သူ၏စုပ်ယူမှုအရှိန်နှုန်းကို နှေးကွေးသွားစေသည်။ သူသည် ကံကြမ္မာစွမ်းအင်များကို လိုအပ်သော်လည်း အကယ်၍ ဤသည်မှာ တခြားလူများအတွက် သိသာထင်ရှားသော တိုးတက်မှုကို ဖြစ်စေပါက သူ အလျှော့ပေးလိုက်လျောရန် ဆန္ဒရှိသည်။

သို့ရာတွင် တခြားလူများကမူ မည်သည့် ထိန်းချုပ်မှုကိုမျှ မပြသခဲ့ချေ။ အထူးသဖြင့် လော့ယိုရှီးနှင့်လော့ချီးချီးတို့၏ စွမ်းအင်ဝါးမျိုခြင်းအရှိန်နှုန်းသည် ကျန်းရွှမ်နှင့်ပင် ယှဉ်ပြိုင်နိုင်ပေ၏။

ဘုန်း...

သူတို့၏ တပြိုင်နက်တည်း စုပ်ယူမှုနှင့်အတူ မြစ်၏ပုံရိပ်ယောင်ပုံစံသည် ထပ်မံ၍ တောင့်ခံမထားနိုင်တော့ချေ။ အခန်းအတွင်းတွင် မန္တန်စာလုံးထွင်းထုထားသော ကျောက်တိုင်များ ထွက်ပေါ်လာပြီး တုန်ခါမှုများသည် ကြမ်းပြင်တလျှောက် ဖြတ်သန်းသွားသည်။

ဤကံကြမ္မာမြစ်သည် အစစ်အမှန်မဟုတ်ဘဲ ပင်မမြစ်မှ ထုတ်ယူထားသော ပုံရိပ်ယောင်တစ်ခုမျှသာ ဖြစ်သည်။ ထိုအရာကိုထိန်းသိမ်းရန်အတွက် ကံကြမ္မာခန်းမ၏ဝင်္ကပါများကို စွမ်းအင်စီးဆင်းမှု ဟန်ချက်ညီစေရန်အတွက် အသုံးပြုခဲ့သည်။ မြစ်၏ပြိုလဲမှုနှင့်အတူ ထိုဟန်ချက်ညီမှုသည် ပျက်ပြားသွားပြီး ထိန်းချုပ်၍မရနိုင်သော ဆက်တိုက်တုံ့ပြန်မှုတစ်ခုကို ဖြစ်ပေါ်စေသည်။ ဤသည်မှာ အဆောက်အဦးတစ်ခု၏နံရံကို ဖြိုချလိုက်သည့်အလားပင်။

"ဒီအရူးတစ်စုကတော့..."

ကျန်းရွှမ်က ကူကယ်ရာမဲ့စွာဖြင့် သက်ပြင်းချလိုက်သည်။

သူ၏စုပ်ယူမှုသည် လွန်ကဲသော်လည်း သူသည် ဟန်ချက်ညီမှုအတွက် အနည်းငယ် ထည့်သွင်းစဉ်းစားခဲ့သည်။ ဤလူများကမူ သူတို့၏ အရူးအမူးစုပ်ယူမှုတွင် ကံကြမ္မာခန်းမ၏အခြေခံအုတ်မြစ်ကို ခြေမွှဖျက်ဆီးခဲ့သည်။

"သူတို့ကို ကြည့်လိုက်အုံး... ငါက ဘယ်လိုလုပ်ပြီး ဒီလို အဆင်အခြင်မဲ့တဲ့ တပည့်တွေကို ရလာတာလဲ"

ယခုအချိန်၌ သူတို့ကို ဟန့်တားရန် နောက်ကျသွားလေပြီ။

ပြိုလဲမှု ဆက်လက်ဖြစ်ပွားနေသည်နှင့်အမျှ အစွမ်းထက်ဆုံး ကျင့်ကြံသူပင်လျှင် ဖျက်ဆီးခြင်းကို မဟန့်တားနိုင်ချေ။ ထို့ပြင် ကျန်းရွှမ်၏ လက်ရှိစွမ်းအားဖြင့် ဤအခြေအနေကို တည်ငြိမ်အောင် လုပ်ဆောင်ရန် နည်းလမ်းမရှိပေ။

"ထားလိုက်တော့....ဝင်္ကပါကျိုးပေါက်သွားတာနဲ့ ကောင်းကင်ကံကြမ္မာစွမ်းအင်တွေက အပြင်ကို ပြန့်ကျဲသွားလိမ့်မယ်....ဖြုန်းတီးမယ့်အစား ငါတို့က အရာအားလုံးကို စုပ်ယူလိုက်တာ ပိုကောင်းတယ်"

အချိန်တခဏကြာမျှ စဉ်းစားပြီးနောက် ကျန်းရွှမ်သည် ဖြုန်းတီးခြင်းကို ရှောင်ရှားခြင်းဟူသော သူ၏စည်းမျဥ်းကို လိုက်နာရန် ဆုံးဖြတ်ပြီး တခြားလူများနှင့်အတူ ကြွင်းကျန်နေသော စွမ်းအင်များကို ဆက်လက်၍စုပ်ယူလိုက်၏။

အသက်ဆယ်ရှိုက်ကျော်စာ အချိန်အတွင်းမှာပင် ကောင်းကင်ကံကြမ္မာစွမ်းအင်မတန်း သန်းခုနစ်ဆယ် ရှစ်ဆယ်နီးပါး ရှိခဲ့သော အခန်းသည် နောက်ဆုံးတစ်စက်ကျန်သည်အထိ ခြောက်သွေ့သွားသည်။ ကျန်းရွှမ်သည် စွမ်းအင်တန်းစုစုပေါင်း၏ ထက်ဝက်မပြည့်သော သန်းသုံးဆယ်ခန့်သာ စုပ်ယူခဲ့ပြီး ကြွင်းကျန်သည့်အရာများကို တခြားလူများက ခွဲဝေ၍စုပ်ယူခဲ့ကြသည်။

ကောင်းကင်ဘုံစာကြည့်တိုက်တွင် အာရုံစိုက်ရင်း ကျန်းရွှမ်သည် စိတ်ပျက်အားငယ်မှုကိုခံစားလိုက်ရသည်။ ဤမျှထိ များပြားသော စွမ်းအင်များကို စုပ်ယူခဲ့သော်လည်း သူသည် ကောင်းကင်ဘုံသောကကံကြမ္မာ၏ ဒုတိယအဆင့်သို့ ချိုးဖျက်ဝင်ရောက်နိုင်မှု မရှိသေးချေ။ ဤကံကြမ္မာစွမ်းအင်မြစ်၏ စွမ်းအင်တောင်းဆိုမှုသည် အမှန်တကယ်ကို ကြီးမားပေ၏။

ထို့နောက် သူသည် တခြားလူများကို လှမ်းကြည့်လိုက်သည်။ လော့ယိုရှင်း လော့ချီးချီး ယွမ်ထောင် လျိုယန်နှင့် တခြားသူများအားလုံးသည် သူတို့၏ကိုယ်ပိုင် ကောင်းကင်ကံကြမ္မာ၌ ထိုးထွင်းသိမြင်မှုများ ရရှိနေကာ တောက်ပသော အလင်းတန်းများကို ထုတ်လွှတ်ထားကြသည်။ သူတို့၏အရှိန်အဝါများသည် လျင်မြန်စွာ မြင့်တက်လာပြီး သိသာထင်ရှားသော တိုးတက်မှုကို ပြသနေပေ၏။

ဘုန်း....

လော့ယိုရှင်းက ပထမဆုံး အဆင့်ချိုးဖျက်ခဲ့သည်။ သူမ၏နောက်တွင် ဓမ္မရုပ်သွင်တစ်ခု ထွက်ပေါ်လာပြီး လေဟာနယ်အတွင်းတွင် ပျံဝဲနေသော သူတော်စင်ပုံရိပ်တစ်ခုအဖြစ် ပေါ်လာကာ မနှိုင်းယှဉ်နိုင်အောင် သန့်စင်ပြီး နူးညံသိမ်မွေ့သည်။

သူမ၏ဦးဆောင်မှုနောက်သို့ လိုက်ပါကာ လော့ချီးချီး ယွမ်ထောင် လျိုယန် လုချုံးနှင့် ဝေ့ရူရန်တို့သည်လည်း တစ်ယောက်ပြီးတစ်ယောက် အဆင့်ချိုးဖျက်ခဲ့ကြသည်။ အသက်ရှူချိန်အနည်းငယ်အတွင်းမှာပင် လူများအားလုံးသည် ရင်းမြစ်ရေအိုင်နယ်ပယ်၏ နဝမအဆင့်ဖြစ်သော ဓမ္မရုပ်သွင်နယ်ပယ်သို့ ရောက်ရှိသွားကြသည်။

ကောင်းကင်ကံကြမ္မာကို နားလည်သဘောပေါက်ခြင်းသည် သူတို့၏ ကျင့်ကြံမှုကို သိသိသာသာ မြှင့်တင်ပေးခဲ့ပြီး သူတို့ကို လျင်မြန်စွာ အဆင့်တက်လှမ်းနိုင်စေခဲ့သည်။

"မဆိုးဘူး...."

ကျန်းရွှမ်က စိတ်ကျေနပ်စွာဖြင့် ခေါင်းညိတ်ပြီး ပြောဆိုလိုက်၏။

ကောင်းကင်ကံကြမ္မာကို ရရှိပြီးနောက် လုံလောက်သော စွမ်းအားကို ရရှိပြီးဖြစ်သောကြောင့် ဤလူတစ်စုသည် သူ၏ ကာကွယ်မှုကို ထပ်မံ၍ မလိုအပ်တော့ချေ။ သူတို့သည် ယခုချိန်၌ ရင်းမြစ်ကမ္ဘာအတွင်း၌ စူးစမ်းလေ့လာပြီး သူတို့၏ကိုယ်ပိုင်လမ်းကြောင်းကို ရှာဖွေနိုင်လေပြီ။

ဘုန်း...

သူတို့၏ကျင့်ကြံဆင့်ချိုးဖျက်မှုများနှင့် ကောင်းကင်ကံကြမ္မာစွမ်းအင်များကို အကုန်အစင်စုပ်ယူမှုတို့နှင့်အတူ စမ်းသပ်ခန်းမသည် ထပ်မံ၍ ထိန်းမထားနိုင်တော့ချေ။ ထိုခန်းမသည် လုံးလုံးလျားလျား ကြေမွှပျက်စီးသွားပြီး ပြိုလဲမှုမှတုန်ခါသံသည် ပတ်ဝန်းကျင်ကို ဖြတ်သန်း၍ ပဲ့တင်ထပ်သွားသည်။

"သတိထား..."

ကျန်းရွှမ်သည် သူ၏လက်ကို ဝှေ့ယမ်းပြီး လူများအားလုံး၏ နံဘေးပတ်လည်တွင် ကာကွယ်ရေးအတားအဆီးတစ်ခုကို ဖွဲ့စည်းလိုက်သည်။ သူတို့ ဘေးကင်းသွားသည်နှင့် သူသည် နောက်ဆုံးတွင် သက်ပြင်းတစ်ချက်ချလိုက်၏။

ထိုအချိန်တွင် အဝေးတစ်နေရာရှိ လျှို့ဝှက်ဆန်းကြယ်သော ကံကြမ္မာခန်းမ ဌာနချုပ်၌...

ရာစုနှစ်တစ်ကြိမ် ကောင်းကင်ကံကြမ္မာ ဆရာသခင်ရွေးချယ်ရေးပြိုင်ပွဲသည် ကျင်းပနေဆဲပင်။

"မင်းတို့အားလုံး အစွမ်းကုန် ကြိုးစားကြမယ်လို့ ငါ မျှော်လင့်တယ်... ထိပ်သီးသုံးယောက်က သော့ချက်ကံကြမ္မာရဲ့ လျှို့ဝှက်ချက်တွေကို အမွေဆက်ခံခွင့် ရရှိလိမ့်မယ်"

စင်မြင့်အထက်တွင် ပျံဝဲနေရင်း သူ၏ခေါင်းနံဘေးပတ်လည်တွင် အလင်းစက်ဝန်းတစ်ခု ရှိသော အကြီးအကဲတစ်ဦးက ပြောဆိုသည်။ သူ၏ တည်ငြိမ်သောအသံသည် နူးညံ့သော နွေဦးမိုးစက်များကဲ့သို့ ပျံ့နှံ့သွားပြီး လက်ရှိနေရာတွင် ရှိနေသူများအားလုံး၏ စိတ်နှလုံးသားထဲသို့ ထိုးဖောက်ဝင်ရောက်သွားသည်။

"သော့ချက်ကံကြမ္မာရဲ့ လျှို့ဝှက်ချက်လား..."

"ဒါက ကံကြမ္မာသော့ခလောက်ကို ချိုးဖျက်နိုင်တဲ့ စွမ်းအားပဲ....ဒါကို အမွေဆက်ခံပြီးတာနဲ့ ကောင်းကင်နဲ့မြေပြင်အကြားမှာရှိတဲ့ ကျင့်ကြံမှု ဥပဒေသတွေကို ထိန်းချုပ်နိုင်ပြီးတော့ ခေတ်ကာလရဲ့ အစွမ်းထက်ဆုံးပုဂ္ဂိုလ်တွေထဲက တစ်ယောက် ဖြစ်လာနိုင်တယ်... ငါ ဒါကိုအောင်မြင်ရမယ်"

"ဒါက ငါ ဟောင်ထျန်းရီ ပိုင်ဆိုင်တာ...ငါက ဒီလောကကြီးထဲမှာ အထူးချွန်ဆုံး ပါရမီရှင်ပဲ"

"မဟုတ်တာ...ဒါက ငါ မုရုန်ဖုန်း ပိုင်ဆိုင်တာ...ငါ့ရဲ့ဘိုးဘေးက တစ်ချိန်က ကံကြမ္မာခန်းမဆောင်ရဲ့ ခန်းမသခင်တစ်ယောက် ဖြစ်ခဲ့တယ်... ငါက သူ့ရဲ့သွေးမျိုးဆက်ကို အမွေဆက်ခံခဲ့ပြီးတော့ ဒီအမွေအနှစ်ကို တောင်းဆိုဖို့အတွက် မွေးဖွားလာခဲ့တာပဲ"

"သွေးမျိုးဆက်က ဘာမှ အဓိပ္ပါယ်မရှိဘူး... ငါ ရွှမ်းယွမ်မုက ကောင်းကင်ကံကြမ္မာရဲ့ စစ်မှန်တဲ့ ရွေးချယ်ခံပဲ..မင်းတို့ ကျန်တဲ့လူတွေအားလုံး အိပ်မက်မက်နေတာကို ရပ်လိုက်တာ ပိုကောင်းတယ်"

လူအုပ်ကြီးထံမှ အုတ်အော်သောင်းတင်းနိုင်မှုကြီး ပွင့်အံ့ထွက်လာသည်။

ကံကြမ္မာခန်းမသည် မရေမတွက်နိုင်သော ကောင်းကင်ဘုံကံကြမ္မာဆရာသခင်များကို အမိန့်ပေးနိုင်ပြီး မရေမတွက်နိုင်သော ကံကြမ္မာများကို ထိန်းချုပ်သော်လည်း ကံကြမ္မာတစ်ခုတည်းကသာ အထွတ်အထိပ်တွင် ရပ်တည်သည်။

ရင်းမြစ်ကံကြမ္မာ...

သော့ချက်ကံကြမ္မာသည် ရင်းမြစ်ကံကြမ္မာ၏ အားအကောင်းဆုံး အတက်အလက်ကို ကိုယ်စားပြုသည်။ ဤသည်မှာ ရင်းမြစ်ကံကြမ္မာမဟုတ်သော်လည်း ထိုအရာသည် ကောင်းကင်နှင့်မြေပြင်ကို အကျဉ်းချထားသော ကံကြမ္မာသော့ခလောက်ကို ဖွင့်နိုင်သည်။ ဤသည်မှာ မရေမတွက်နိုင်သော ကျင့်ကြံသူများ အိပ်မက်မက်နေသော်လည်း မည်သို့မျှ မရရှိနိုင်သော စွမ်းအားတစ်ရပ်ပင်။

"ပြိုင်ပွဲ အခု စတင်ပြီ...."

မိုးကောင်းကင်ယံအတွင်းမှ အကြီးအကဲသည် လူအများ၏ စိတ်အားထက်သန်မှုအပေါ် စိတ်ကျေနပ်နေကာ ခေါင်းညိတ်ပြီး သူ၏လက်ကို ဝှေ့ယမ်းလိုက်သည်။ စင်မြင့်တစ်ခုသည် လေဟာနယ်အတွင်းတွင် ရုတ်တရက် ထွက်ပေါ်လာပြီး အထူးအတားအဆီးတစ်ခုအတွင်း၌ ထည့်သွင်းထားသည်။

"မင်းတို့ရဲ့ ကျင့်ကြံမှုက အရမ်းအားကောင်းတယ်...အတားအဆီးမရှိဘဲ မင်းတို့ တိုက်ခတ်မယ်ဆိုရင် လေဟာနယ်ထဲမှာ အနှောက်အယှက်တွေ ဖြစ်စေနိုင်ပြီးတော့ ရင်းမြစ်ကမ္ဘာကို အန္တရာယ်ဖြစ်စေနိုင်တယ်....ဒီအတားအဆီးအတွင်းမှာ မင်းတို့ရဲ့စွမ်းအား အပြည့်အဝကို ထုတ်ဖော်အသုံးပြုနိုင်တယ်"

"ဟုတ်ကဲ့...."

လူများအားလုံး တညီတညွတ်တည်း တုံ့ပြန်လိုက်သည်။ အကြီးအကဲ၏စကား အဆုံးသတ်သည်နှင့် လူငယ်နှစ်ဦးက ရှေ့သို့ခြေတစ်လှမ်းတိုးလိုက်ကြသည်။

"ငါက ရွှမ်းယွမ်မု..."

"မုရုန်ဖုန်း..."

ပါရမီရှင်နှစ်ဦးသည် ခမ်းနားထည်ဝါပြီး မာန်မာနကြီးစွာ မတ်မတ်ရပ်ကာ ယှဥ်ပြိုင်ရန် ဟန်ပြင်နေကြသည်။ သို့ရာတွင် သူတို့သည် တိုက်ခိုက်မှုဖလှယ်ခြင်း မပြုနိုင်သေးမီမှာပင် သူတို့အထက်မှ အမိုးခုံးသည် လင်းလက်သွားပြီး ပါးလွှာပြီး နဂါးတစ်ကောင်ကဲ့သို့ ရှည်လျားသော စွမ်းအားလှိုင်းတစ်ခု ဖြတ်သန်းသွားသည်။

ထိုစွမ်းအားလှိုင်းသည် လျှပ်စီးကဲ့သို့ တောက်ပနေပြီး မြောက်မှ တောင်သို့ ဆန့်တန်းသွားကာ လေဟာနယ်ကို ဖြတ်ပိုင်းနေသည့်အလားပင်။ တစ်ချိန်တည်းမှာပင် သူတို့၏ခြေထောက်အောက်မှ မြေပြင်သည် ခမ်းနားထည်ဝါစွာ ထွန်းလင်းတောက်ပလာသည်။ ခန့်ညားထည်ဝါသော ကံကြမ္မာမြစ်တစ်ခုသည် လေထုအတွင်းတွင် ရုတ်တရက် သရုပ်သကန်ထင်ဟပ်လာပြီး မရေမတွက်နိုင်သော ကြယ်များ၏တောက်ပမှုကို ထုတ်လွှတ်ထားသည်။

ထိတ်လန့်တုန်လှုပ်သွားသော ယှဥ်ပြိုင်သူနှစ်ဦးလုံးသည် ကြက်သေသေသွားပြီး ထိုမြင်ကွင်းမှ သူတို့၏မျက်လုံးအကြည့်များကို မခွာနိုင်တော့ပေ။

"ဘာ... တစ်ယောက်ယောက် ရင်းမြစ်ကံကြမ္မာရဲ့ အထွတ်အထိပ် လျှို့ဝှက်ဆန်းကြယ်မှုကို နားလည်သဘောပေါက်သွားတာလာ... ဒါ... ဒါက မဖြစ်နိုင်ဘူး"

လေထုအတွင်းတွင် ပျံဝဲနေသော အကြီးအကဲ၏ မျက်ဆံများ ကျုံ့ဝင်သွားပြီး သူ၏မျက်နှာပေါ်တွင် လုံးလုံးလျားလျား မယုံကြည်နိုင်မှုများဖြင့် ပြည့်နှက်နေသည်။