အခန်း (၄၁၈+၄၁၉)
Vol. 28 Ch. 418+419
Chapter 418
အမှောင်နှင်းညတွင် အဆင့်မြှင့်တင်ခြင်း ၃
မထင်မှတ်ထားဘဲ သူ၏ စကားများသည် ထောက်ခံမှုကို ရရှိခဲ့သည်။ သူ့ပတ်ဝန်းကျင်မှ လူများက ခေါင်းညိတ်လိုက်ကြသည်။
“ကျွန်မတို့အားလုံး စွမ်းအားရှင်တွေ ဖြစ်လာရင် အဲဒီသတ္တဝါတွေက ကျွန်မတို့နဲ့ ယှဉ်နိုင်တော့မှာ မဟုတ်ဘူး” ရှားရှားက ပြောသည်။
“အစ်မ ရှောင်ယွမ်၊ အစ်မမြောင်လုနဲ့ အစ်မချန်ဆီရွှမ်တို့ ဘယ်လောက်မြန်မြန် တိုးတက်ပြောင်းလဲလာလဲ ကြည့်လိုက်လေ… သူတို့က ဖုတ်ကောင်တွေကို တိုက်ခိုက်ဖို့ ရုန်းကန်ခဲ့ရပေမဲ့ အခုကျတော့ သူတို့ လက်ဗလာနဲ့တောင် ဖုတ်ကောင်ရဲ့ ဦးခေါင်းခွံကို ချေမွနိုင်မယ်လို့ ငါထင်တယ်”
“ကျွန်မ.. ကျွန်မက ဖုတ်ကောင်ရဲ့ ခေါင်းကို မချေမွနိုင်ပါဘူး” ဟု ရှောင်ယွမ်သည် လင်းရှန်ကို ကြည့်ကာ အနည်းငယ် ကြောက်ရွံ့စွာဖြင့် အမြန်ပြောလိုက်သည်။
သို့သော် ရှုချင်းက ခေါင်းညိတ်လိုက်သည်။
“တကယ်တော့ ရှားရှားပြောတာ မှန်တယ်၊၊ ကမ္ဘာပျက်ကပ်နေ့ကနေ ရက်တစ်ရာတောင် မပြည့်သေးဘူး၊ လူသားတွေက နှစ်သန်းပေါင်းများစွာ တိုးတက်ပြောင်းလဲခဲ့တာထက် ဒီအချိန်တိုအတွင်းမှာ သူတို့ရဲ့ ကန့်သတ်ချက်တွေကို ကျော်လွန်သွားခဲ့ပြီ အမြင့်ဆုံး ကန့်သတ်ချက်က ဘယ်လောက်လဲဆိုတာ ဘယ်သူသိနိုင်မလဲ… အချိန်အလုံအလောက်ရရင် ဘာမဆို ဖြစ်နိုင်တယ်”
“အင်း”
ကီကီသည် သူမ၏ပါးစပ်ထဲတွင် သကြားလုံးကို ထည့်ကာ ရှည်လျားစွား ညည်းလိုက်သည်။
“ဘယ်လိုပဲဖြစ်ဖြစ် ကျွန်မတို့လူသားတွေက အဲဒီသတ္တဝါတွေထက် ပိုပြီးလိုက်လျောညီထွေရှိတယ်… ကျွန်မတို့အားလုံး အတူတူ တိုးတက်ပြောင်းလဲမယ်ဆိုရင် သူတို့က ကျွန်မတို့နဲ့ ယှဉ်နိုင်မှာ မဟုတ်ဘူး၊ အဲဒီပိုးကောင်တွေလိုပဲ… သူတို့ကို ကိုင်တွယ်ရတာ ပိုလွယ်နေပြီ”
“အကောင်းမြင်တာ ကောင်းပါတယ်… ဒါပေမဲ့ သတိကို မလျော့ချကြပါနဲ့”
ချန်ဆီရွှမ်က ပြောသည်။
“အခုထိ ဝင်ရိုးစွန်းညနဲ့ တွင်းနက်ဇုန်တွေက လူသားတွေအတွက် တားမြစ်နယ်မြေတွေပဲ… နင်မကြားဖူးဘူးလား၊ တွင်းနက်တွေကို စုံစမ်းရေးတာဝန်ယူတဲ့ ညလမ်းလျှောက်သူအဖွဲ ၂ က အဖွဲ့အစည်းတစ်ခုလုံးမှာ အထိအခိုက်အများဆုံး နှုန်းထားမှာရှိတယ်၊ ဒါကြောင့် တကယ့်အန္တရာယ်က ရှိသေးတယ်… တွင်းနက်တွေထဲမှာပေါ့”
လင်းရှန်က ပြန်ဖြေသည်။
“ငါတို့ အဲဒီအရာအားလုံးကို အခုချိန်မှာ စိတ်ပူစရာမလိုသေးဘူး၊ ဖီးနစ်ရဲ့ အာရုဏ်ဦး စီမံကိန်းကို လိုက်နာကြမယ်၊ ငါတို့ရဲ့ တိုးတက်ပြောင်းလဲမှုက အရှိန်ရလာမယ်၊ အမှောင်ဒီရေတွေရဲ့ လျှို့ဝှက်ချက်တွေက ပိုပြီး ရှင်းလင်းလာမယ်”
လူတိုင်း သဘောတူညီစွာ ခေါင်းညိတ်လိုက်ကြသည်။
“ကပ္ပတိန်လင်း”
လုချန်သည် ရုတ်တရက် စိတ်အားထက်သန်စွာ ရှေ့သို့ တိုးလာသည်။
“ဒီည ကျနော်တို့အားလုံး အတူတူ ရထားကို အဆင့်မြှင့်ကြမယ်၊ အစ်ကိုတစ်ယောက်တည်း အားလုံးလုပ်စရာ မလိုဘူး”
“ဟုတ်တယ်” မြောင်လုက အလျင်အမြန် ထပ်ပြောသည်။
“ကျွန်မတို့အားလုံး ကူညီနိုင်တယ်”
“ကပ္ပတိန်လင်း… ဒီနှစ်ရက်အတွင်း လူတိုင်း ကောင်းကောင်းအနားယူခဲ့ကြပြီ… ရှင်တစ်ယောက်ထဲ ပင်ပန်းနေတာ ကျွန်မတို့ စိတ်မကောင်းဘူး”
ရှုချင်း၏ အသံမှာ ရိုးသားနေသည်။
ချန်ဆီရွှမ်နှင့် ကီကီတို့နှစ်ဦးစလုံးသည် လင်းရှန်ကို ကြည့်လိုက်ကြသည်။ ယာဉ်တန်းတစ်ခုလုံး၏ ဝန်ထုပ်ဝန်ပိုးသည် သူ့ပခုံးပေါ်တွင် တင်ထားသည်ကို သူတို့သိကြလေသည်။ သူသည် ပြီးခဲ့သည့်ညကတည်းက တစ်ချက်မှ အနားမယူရသေးပေ။
လင်းရှန်သည် စိတ်သက်သာရာရမှုလှိုင်းကို ခံစားလိုက်ရသည်။ ဟင်းချိုပူပူကို တစ်ငုံသောက်ပြီးနောက် သူပြောလိုက်သည်။ “မင်းတို့ ဘာတွေပြောနေတာလဲ… မင်းတို့ကို ကူညီခိုင်းမှာပေါ့၊ ဒါပေမဲ့ ပြီးခဲ့တဲ့ညက ငါ သံချပ်ကာပြားတွေကို လုပ်နေခဲ့တာမို့ မင်းတို့က သိပ်မကူညီနိုင်ဘူး… ဒါပေမဲ့ ဒီညကတော့ မတူဘူး၊ ပျင်းနေလို့ မရဘူး”
“ရတယ်လေ”
လုချန်သည် ပြုံးပြုံးရွှင်ရွှင်ဖြင့် လက်မထောင်ပြလိုက်သည်။
“စိတ်မပူပါနဲ့”
“ကျွန်မတို့ လုပ်နိုင်တယ်”
“အစ်ကိုရှန်… ကျွန်တော့်ကို ထည့်လိုက်ပါ”
“ကျွန်မလည်း ပါမယ်”
“ကျနော်တို့ အကုန်ပါမယ်”
“ကောင်းပြီ” လင်းရှန်သည် သူ၏ဟင်းချိုပန်းကန်ကို ချလိုက်ပြီး ချက်ချင်းပင် စတင်လိုက်သည်။ သူသည် ညွှန်ကြားချက်များ ထုတ်လိုက်သည်၊၊
“တာလို့… မင်းက အဖွဲ့တစ်ဖွဲ့ကို ခေါ်ပြီး ဘယ်ဘက်ခြမ်း သံချပ်ကာပြားတွေကို ဖြုတ်ထုတ်တာကို ကိုင်တွယ်ပါ… ငါ အသစ်တွေ ထုတ်လုပ်ပြီးတာနဲ့ ထောက်ကန်ဘောင်ကို ဂဟေဆော်ပြီး သတ္တုစပ် သံချပ်ကာအသစ်တွေကို တပ်ဆင်ပါ၊၊ ဒါ့အပြင် ငါတို့ Arc ကြိမ်နှုန်းမြင့်စက်အသစ်တွေကို ထပ်ထည့်မယ်”
“ကောင်းပါပြီ အစ်ကိုရှန်” တာလို့က ချက်ချင်းတုံ့ပြန်သည်။
“လုချန်… မင်း ပိုက်လုံးတွေကို တာဝန်ယူပါ၊၊ ငါ ပေါင်းစပ်ထားတဲ့ ဆားကစ်စနစ်အသစ်ကို ပြုလုပ်ပြီးပြီ၊၊ ဒါ့အပြင် ဝေလုံယူနစ်ကို ပြင်ဆင်ထား… နောက်မှာ လူအများကြီးလိုမယ်”
“နားလည်ပါတယ်”
“ရှုချင်း၊ ကီကီ… မင်းတို့နှစ်ယောက်က အကြီးစားတာဝန်ကို ယူရမယ်၊၊ လေယာဉ်ပစ်အမြောက်နဲ့ အာရုံခံစနစ်ကို တပ်ဆင်ရမယ်၊ ငါ မင်းတို့ကို လမ်းညွှန်ပေးမယ်၊ ငါတို့ အမိန့်ပေးမော်ဂျုးအသစ်တစ်ခုကိုလည်း ထည့်သွင်းမယ်”
“ရေဒါရော… အဲဒါကိုလည်း အဆင့်မြှင့်မှာလား”
ကီကီက မေးသည်။
လင်းရှန်က ခေါင်းညိတ်သည်။
“ဟုတ်တယ်... ငါတို့ ရှာဖွေရေးရေဒါထည့်မယ်၊၊ ပြီးတော့ အဲဒါကို 1130 နဲ့ သံလိုက်အမြောက်နဲ့ ချိတ်ဆက်မယ်၊၊ အဲဒါဆိုရင် လက်နက်စနစ်တစ်ခုလုံးက တစ်ခုတည်းအဖြစ် တုံ့ပြန်နိုင်မယ်”
“အကောင်းဆုံးပဲ… ရှင်တည်ဆောက်… ကျန်တာကို ကျွန်မ တာဝန်ထား” ကီကီက ယုံကြည်မှုရှိစွာ ပြောသည်။
“ကောင်းပြီ… ကျွန်မက ကီကီကို ကူညီမယ်” ရှုချင်းက ထပ်ပြောသည်။
“ကျွန်မရော” ချန်ဆီရွှမ်သည် လင်းရှန်ကို ကြည့်လိုက်သည်။
“အတွင်းပိုင်း” သူက သူမဘက်သို့ လှည့်ကာ ပြန်ဖြေသည်။
“လုံခြုံရေးအရ ငါ တွဲနံပတ် ၁၁ အထဲကို ရှင်းလင်းဖို့ စီစဉ်ထားတယ်”
“ရှားရှားက ဆယ်လီကို အဆင်သင့်လုပ်ပြီး အပြင်ထုတ်ထားပါ… ငါ တွဲ ၁၁ မှာ ဝင်ရိုးခြောက်ခုစက်ယန္တရားလက်တံကို တပ်ဆင်ဖို့ စီစဉ်ထားတယ်… အဲဒါက ယူနစ်တွေ တင်ဆောင်ဖို့နဲ့ ဖြန့်ကျက်ဖို့အတွက် စက်ရုပ်တွဲအဖြစ် ပြောင်းလဲတာ ပိုပြီး အဆင်ပြေစေမယ်”
“ဒါဆို တွဲ ၁၁ နဲ့ ၁၂ နှစ်ခုစလုံးက အကြီးစားပြုပြင်ပြောင်းလဲမှုတွေ လိုအပ်မယ်၊ ငါတို့ လက်နက်စခန်းတစ်ခု ထပ်ထည့်မယ်၊၊ အချိန်ရမယ်ဆိုရင် တွဲ ၁၂ မှာ ကျည်ဆန်ထုတ်လုပ်ဖို့ အလိုအလျောက် ကျည်ခွံဖိစက် ထပ်ထည့်မယ်… ပြီးတော့ နောက်ထပ် 1130 တစ်ခုပေါ့”
“နားလည်ပါပြီ” ချန်ဆီရွှမ် ခေါင်းညိတ်လိုက်သည်။
ရှောင်ယွမ်က စိုးရိမ်တကြီးဖြင့် လင်းရှန်ကို ကြည့်လိုက်သော်လည်း သူမ မပြောနိုင်မီ သူက သူမဘက်သို့ လှည့်ကာ
“ရှောင်ယွမ်… မင်းက တွဲတွေအတွင်းပိုင်း သန့်ရှင်းရေးနဲ့ ထောက်ပံ့ပို့ဆောင်ရေးကို တာဝန်ယူပါ၊၊ လူအနည်းငယ်ကို ကူညီဖို့ ခေါ်သွားပါ”
“ကောင်းပြီ”
သူမ၏ မျက်လုံးများက စိတ်လှုပ်ရှားမှုဖြင့် တောက်ပနေပြီး သူမ လိုလိုလားလား ခေါင်းညိတ်လိုက်သည်။
“အမ်… အစ်ကိုလင်း”
ပုံမှန်အားဖြင့် သူ့ဘာသာသူ နေတတ်သော လုရှင်းချန်ပင်လျှင် မမေးပဲ မနေနိုင်တော့ပေ။ အခြားသူတိုင်း ပါဝင်နေသောကြောင့် သူ အနည်းငယ် စိတ်မသက်မသာ ခံစားနေရသည်။
“ဒီကြီးမြတ်သူက ကူညီနိုင်တဲ့ တာဝန်မျိုး ရှိပါလား”
လင်းရှန်က သူ့ကို ကြည့်ပြီး အဓိပ္ပာယ်ရှိစွာ ပြုံးလိုက်သည်။
“အိုး…ရှိတာပေါ့”
လုရှင်းချန်သည် ပြန်ဖြေရန် ပါးစပ်ဖွင့်လိုက်သော်လည်း ရုတ်တရက် မကောင်းသော ခံစားချက်တစ်ခုကို ခံစားမိနေသည်။
မိနစ် ၂၀ အကြာ။
“မီးလက်သီးကွ”
ဘန်း
မီးတောက်များ ဟုန်းခနဲ ထွက်လာပြီး အပူရှိန်သည် ပတ်ဝန်းကျင်ကို လွှမ်းခြုံသွားသည်။ အနန္တရထား၏ ပြုပြင်ရေးနေရာတွင် လုရှင်းချန်သည် ယာယီ “ဘွိုင်လာ” ဘေးတွင် ထိုင်နေပြီး ရေနွေးငွေ့ပေးစက်ကို ဆက်လက် လည်ပတ်နေရသဖြင့် လုံးဝ အားပြတ်နေပုံရသည်။
ထုတ်လုပ်မှု အများစုကို တွဲများအပြင်ဘက်တွင် ပြုလုပ်ရပြီး အမိုးနှင့် ပြတင်းပေါက်များကို ဖွင့်ထားရန် လိုအပ်သောကြောင့် အအေးဒဏ်သည် အတွင်းနှင့် အပြင် နှစ်ခုစလုံးတွင် ပြင်းထန်နေသည်။ ညအချိန်အလုပ်ကို ခံနိုင်ရည်ရှိစေရန် လင်းရှန်သည် ပြုပြင်ရေးနေရာတွင် သတ္တုပိုက်များကို အသုံးပြု၍ “အပူပေးစက်များ” စက်ဝိုင်းပုံစံ တည်ဆောက်ခဲ့သည်။ ဤစနစ်သည် ဘွိုင်လာမှ ရေနွေးငွေ့လည်ပတ်မှုကို အသုံးပြုပြီး ဧရိယာကို ပိတ်ထားသောကြောင့် လျင်မြန်စွာ နွေးထွေးလာသည်။
ထို့အပြင် ဘွိုင်လာမှူးဖြစ်ရသည့် ကြီးမားသောဂုဏ်ပုဒ်သည် မီးတောက် — လုရှင်းချန်ထံသို့ ရောက်ရှိသွားသည်။
လင်းရှန်က ဤအကောင်သည် လက်ဖက်ရည်ကျိုခြင်းနှင့် ရေနွေးတည်ခြင်းကို နှစ်သက်သည်ဟု တွေးလိုက်ပြီး ၎င်းသည် သူ့အတွက် လွယ်ကူသော အလုပ်တစ်ခုဖြစ်သင့်သည်ဟု တွက်ဆလိုက်သည်။
စောင်ခြုံထားသော လုရှင်းချန်သည် နောက်မှီကုလားထိုင်ပေါ်တွင် ထိုင်နေပြီး ဘွိုင်လာ၏ ဖိအားတိုင်းတာစက်နှင့် အပူချိန်ကို စောင့်ကြည့်နေသည်။ တစ်ခါတစ်ရံတွင် သူသည် လက်ချောင်းတစ်ချောင်းကို ဆန့်ထုတ်ပြီး မီးကို ထုတ်လွှတ်နေသည်။
သူသည် “မီးလက်သီး” ဟု အော်ဟစ်ရန် ပါးစပ်ဖွင့်လိုက်သော်လည်း ၎င်းသည် မည်မျှ ဆိုးရွားကြောင်း တွေးမိသောအခါ သူသည် သူ၏နှုတ်ခမ်းများကို ပိတ်လိုက်ပြီး စကားလုံးများကို မြိုချလိုက်သည်။
ဘယ်သူမှလည်း နားထောင်နေတာ မဟုတ်ပါဘူးလေ… ဘွိုင်လာကို ဆက်ပြီး လည်ပတ်နေတာပဲ ကောင်းပါတယ်…
ဟူး…ငါ ပင်ပန်းနေပြီ…
Chapter 419
အမှောင်နှင်းညတွင် အဆင့်မြှင့်တင်ခြင်း ၄
အခြားနေရာများတွင် မီတာရာပေါင်းများစွာ ရှည်လျားသော ကြီးမားသော ပြုပြင်ရေးနေရာသည် တောက်ပသော မီးလုံးများဖြင့် လင်းထိန်နေပြီး စွမ်းအင်များဖြင့် ဆူညံနေသည်။ ရှီတိယွမ်နှင့် နန်ကျင်းပင် လာရောက်ကြည့်ရှုကြသည်။
လင်းရှန်သည် အပူပေးစနစ်နှင့်အတူ ဤမျှကြီးမားသော နေရာကို တည်ဆောက်ထားသည်ကို မြင်သောအခါ သူတို့နှစ်ဦးစလုံး အံ့သြခဲ့ကြသည်။ လုယောင်သည် အင်ဂျင်နီယာအဖွဲ့တစ်ဖွဲ့ကို မိုဘိုင်းကိရိယာများဖြင့် ချက်ချင်းခေါ်ကာ အဆင့်မြင့် ပြုပြင်မွမ်းမံမှုများမှ သင်ယူလေ့လာစေခဲ့သည်။
လုယောင်သည် လင်းရှန်၏ နည်းပညာမြှင့်တင်ထားသော စွမ်းရည်များအောက်တွင် အနန္တရထားပေါ်မှ ဘဝသည် ပြန်လည်အသက်ဝင်လာကြောင်း တွေ့ရှိလိုက်ရသည်၊၊ အလုပ်ပတ်ဝန်းကျင်နှင့် အသင်းစိတ်ဓာတ်သည် အမြင့်ဆုံးအဆင့်တွင် ရှိသည်။ အသစ်စက်စက် ပြန်လည်ပြုပြင်မွမ်းမံရေးစနစ်သည် ရထားအဆင့်မြှင့်တင်မှုများကို ပိုမိုထိရောက်စေပြီး ချောမွေ့စေသည်။ ပတ်ဝန်းကျင်ထိခိုက်မှုနည်းသော ဖွံ့ဖြိုးတိုးတက်ရေး အတွေးအခေါ်များသည် အမြစ်တွယ်နေပြီဖြစ်ပြီး ဂေဟစနစ်သည် တည်ငြိမ်စွာ တိုးတက်ကောင်းမွန်လာကာ ရလဒ်များမှာ ရှင်းလင်းနေသည်။ နဂါးတောင် ၁ သည် အနန္တရထားထံမှ သင်ယူရန် လိုအပ်နေသည် — ဆန်းသစ်တီထွင်မှုကို လက်ခံပြီး တိုးတက်မှု၏ အခန်းသစ်ကို ဖော်ဆောင်ရပေမည်၊၊
ည ၇ နာရီ၊၊
ကလန် ကလန် ကလန်—
ငွေရောင်-အနက်ရောင် သတ္တုစပ် သံချပ်ကာပြားများကို တစ်ပြားပြီးတစ်ပြား ထုတ်လုပ်နေသည်။ အဖွဲ့သည် ၎င်းတို့ကို နေရာတကျ ချိတ်ဆွဲရန် မောင်းတံများကို အသုံးပြုသည်။ တာလို့သည် သူ၏အကျီလက်မောင်းများကို လိပ်တင်ကာ ဂရုတစိုက်ဖြင့် တပ်ဆင်ခြင်းလုပ်ငန်းကို ဦးဆောင်နေသည်။
ည ၁၀ နာရီ၊၊
အတွဲ ၁၁ ၏ အမိုးတစ်ခုလုံးကို ဖယ်ရှားပြီး နှစ်ဖက်လှန်ဖွင့်နိုင်သော ထွက်ပေါက်အဖြစ် ပြောင်းလဲထားသည်။ ပထမဆုံး ဝင်ရိုးခြောက်ခုပါ စက်ယန္တရားလက်တံကို ယခု တပ်ဆင်နေပြီဖြစ်သည်။
ဆယ်လီကို ကီကီ၏ စွမ်းရည်ဖြင့် အောက်သို့ ရွှေ့လိုက်ပြီး တွဲအတွင်းရှိ ယာဉ်များနှင့် ကိရိယာများကို လုံးဝ ရှင်းလင်းလိုက်သည်။ ဆယ်လီအတွက် ဒီဇိုင်းထုတ်ထားသော စက်ရုပ်ဂိုဒေါင်တွဲသည် ပုံစပေါ်လာပြီဖြစ်သည်။
ည ၁ နာရီ၊၊
YJ-03 ယာဉ်တင် လေယာဉ်ပစ်အမြောက်ငါးခုကို အတွဲ ၁၂၊ ၁၀၊ ၇၊ ၅ နှင့် ၁ တို့၏ အမိုးများပေါ်တွင် တပ်ဆင်ထားသည်။ အားလုံးသည် အသုံးမပြုသည့်အခါ တွဲများထဲသို့ ခေါက်ထည့်နိုင်သော ရုပ်သိမ်းနိုင်သည့် စနစ်များဖြင့် တည်ဆောက်ထားသည်။ ရေယိုစိမ့်မှုမှ ကာကွယ်ရန် ထွက်ပေါက်တံခါးများကို အထူး အလုံပိတ်ထားသည်။
ည ၃ နာရီ၊၊
လျှပ်စစ်ဓားသွားကာကွယ်ရေးစနစ်နှင့် ပေါင်းစပ်ထားသော Arc ကြိမ်နှုန်းမြှင့်စနစ်အသစ်ကို ရထား၏ ဘေးနှစ်ဖက်တစ်လျှောက်တွင် တပ်ဆင်ထားသည်။
တွဲများအတွင်းပိုင်းတွင် သန့်ရှင်းရေးနှင့် ပြုပြင်မှုများက ဆက်လက်လုပ်ဆောင်နေသည်။ လူတိုင်းသည် ကြိုးကြိုးစားစား အလုပ်လုပ်နေကြသည် — ဂဟေဆော်စက်များနှင့် ဖြတ်တောက်စက် ဒါဇင်ပေါင်းများစွာသည် တစ်စက္ကန့်မျှပင် အနားမယူရပေ။
အမျိုးသမီးများသည် အံ့အားသင့်စရာကောင်းလောက်အောင် ခွန်အားများ ရရှိခဲ့ကြသည်။ ရှောင်ယွမ်ပင်လျှင် ကီလိုဂရမ် ရာချီရှိသော လေယာဉ်ပစ် ကျည်ဆန်သေတ္တာများကို သိုလှောင်ခန်းတွဲသို့ အလွယ်တကူ သယ်ဆောင်နိုင်ခဲ့သည်။
ကီကီနှင့် လုချန်တို့သည် ပုံကြမ်းများမှ ကွန်ယက်များကို ပြန်လည်တပ်ဆင်ခြင်းနှင့် ရထား၏ လေလည်ပတ်မှုစနစ်ကိုပင် ပြန်လည်ပြင်ဆင်ခြင်းတို့ကို အတူတကွ လုပ်ဆောင်နေကြသည်။ ချန်ဆီရွှမ်သည် ရေတိုင်ကီများအားလုံးကို သန့်ရှင်းရေးလုပ်ရန်နှင့် အမှောင်ကျုးကျော်ခြင်းမှ ကာကွယ်ရန် လင်းရှန်ထံမှ အသစ်ထုတ်လုပ်ထားသော ရေလည်ပတ်မှု စစ်ထုတ်စက်များစွာကို တပ်ဆင်ရန် အဖွဲ့တစ်ဖွဲ့ကို ဦးဆောင်သည်။
မနက် ၆ နာရီ၊၊
လင်းရှန်သည် အပြည့်အဝနိုးကြားနေသည်။ သူ၏ ယန္တရားနှလုံးသားသည် အရှိန်အပြည့်ဖြင့် လည်ပတ်နေပြီး ဖြုတ်ချစင်တာနှင့် ထုတ်လုပ်ရေးစက်ရုံတို့သည် တစ်ခဏမျှပင် မရပ်တန့်ခဲ့ပေ။
သတ္တုစပ် သံချပ်ကာပြားများ၊ အလိုအလျောက် ဓာတ်လှေကားများ၊ အမိုးဖွင့်ထွက်ပေါက်များ၊ ရှာဖွေရေးရေဒါများ၊ လေယာဉ်ပစ်အမြောက် တပ်ဆင်သည့် ကွင်းဆက်များ၊ ဆားကစ်ပေါင်းစည်းရေးစနစ်များ၊ Arc ကြိမ်နှုန်းမြင့်စက်များ၊ အာရုံခံအနီအောက်ရောင်ခြည် စောင့်ကြည့်ကိရိယာများ၊ လျှပ်စစ်-ပစ်မှတ်ရှာစနစ်၊ ဝင်ရိုးခြောက်ခု စက်ယန္တရားလက်တံများ၊ ရေစစ်ထုတ်စနစ်များ...
ထုတ်လုပ်ခြင်းသည် တစ်စိတ်တစ်ပိုင်းမျှသာ ဖြစ်သည် — သူသည် နည်းပညာဆိုင်ရာ အသေးစိတ်အချက်အလက်ပေါင်းများစွာကို ကိုင်တွယ်ဖြေရှင်းရသည်- အပူပေးစနစ် ပြုပြင်ထိန်းသိမ်းခြင်း၊ မော်ဂျုးကွန်ပေါင်းများ စုစည်းခြင်း၊ စက်ရုပ်ဂိုဒေါင်တွဲတစ်ခုစီအတွက် ကျည်ဆန်ထည့်စင် ဒီဇိုင်းများ...
တိုးတက်မှု အများစုသည် ဘုရင်မ မိုနီကာမှ ဒီဇိုင်းပုံကြမ်းများကြောင့် ဖြစ်သည်။ ၎င်းတို့သည် လင်းရှန်အား ပြဿနာများစွာကို ဖြေရှင်းရာတွင် အထောက်အကူပြုသည်။
ဥပမာအားဖြင့် ရထား၏ လျှပ်စစ်စနစ်… လင်းရှန်သည် အစပိုင်းတွင် ဘာမှ မသိခဲ့ပေ။ သူသည် ယခင်က Gemini နူကလီးယားစက်ခေါင်းနှင့် ဝေးလ် 03E ရေနွေးငွေ့ တာဘိုင်စက်ခေါင်းကြီးကို ယူနစ်တစ်ခုတည်းအဖြစ် ပေါင်းစပ်ထားခဲ့သည်။
ရလဒ်အနေဖြင့် G3 လျှပ်စစ်သံလိုက်အမြောက် ပစ်ခတ်တိုင်း ရထား၏ ဗို့အားသည် အလွန်အမင်း အတက်အကျရှိမှုကို ထိန်းနိုင်သွားပြီး အရေးပေါ် အစီအစဉ်လည်း မရှိခဲ့ပေ။ တစ်ခုခုမှားယွင်းသွားပါက လင်းရှန်သည် အရာအားလုံးကို ပြန်လည်ပြုပြင်ရမည်။
ထို့ကြောင့် ဤတစ်ကြိမ်တွင် သူသည် အပြည့်အဝ အဆင့်မြှင့်တင်ရန် အခွင့်အရေးယူနေသည်။
မနက် ၈ နာရီ၊၊
လင်းရှန်သည် ယခုကဲ့သို့ ပြင်းထန်စွာ မထုတ်လုပ်ခဲ့ဖူးသေးပေ၊၊ လက်နှစ်ဖက်စလုံးသည် သူ၏ ထုတ်လုပ်ရေးမီးမြင်ကွင်းများကို မရပ်မနား ထုတ်လွှင့်နေပြီး ပစ္စည်းများ၊ အစိတ်အပိုင်းများ၊ အပိုပစ္စည်းများ၊ စက်ကိရိယာများနှင့် ဝက်အူများကို အဆုံးမရှိ ထောက်ပံ့ပေးနေသည်။
သူသည် တစ်ကိုယ်တော် ယန္တရားစက်ကြီးအလား ဖြစ်နေသည်။ လိုအပ်နေသော ဝက်အူ၊ ထောက်ကန်ကွင်းဆက်၊ သို့မဟုတ် ရိုးရှင်းသော Bearings Frame ကဲ့သို့သော ယာဉ်တန်းတစ်ခုလုံးကို အခက်တွေ့စေမည့် ပြဿနာများကို ဖြေရှင်းပေးနေသည်။
ထိရောက်မှုကို ပိုမိုတိုးတက်စေရန်အတွက် လင်းရှန်သည် PX-05 စက်ရုပ်ကို စတင်ထုတ်လုပ်ခဲ့ပြီး ကီကီသည် ၎င်းကို ဆားကစ်စနစ်နှင့် Arc ကြိမ်နှုန်းမြှင့်စက်ကဲ့သို့သော ရှုပ်ထွေးသော စနစ်များတွင် အလုပ်လုပ်နေသော အဖွဲ့သို့ ထည့်သွင်းပေးခဲ့သည်။
အခြားသူအားလုံးသည်လည်း အပြင်းအထန် အလုပ်လုပ်နေကြသည်။ မီတာ ၃၀၀ ကျော် ရှည်လျားသော အလွန်ကြီးမားသော ရထားကို အဆင့်မြှင့်တင်ရန် လူ ၃၀ ခန့်သာ ကြိုးစားနေခြင်းသည် လွယ်ကူသော အလုပ်မဟုတ်ပေ။
အပြင်ဘက်တွင် အပူချိန် -50°C ရှိသော်လည်း ပြုပြင်ထိန်းသိမ်းရေးနေရာအတွင်းတွင် တာလို့သည် လက်ပြတ်အင်္ကျီကိုသာ ဝတ်ဆင်ထားကာ ပြင်းထန်စွာ လှုပ်ရှားနေရသည်။ သတ္တုစပ် သံချပ်ကာပြား တန်ပေါင်းများစွာကို ရထား၏ ဘေးတစ်ဖက်တစ်လျှောက် အခိုင်အမာတပ်ဆင်ထားသည်။ ၎င်းတို့ကို အာရုံခံကိရိယာများနှင့် ချိတ်ဆက်သောအခါ ၎င်းတို့သည် အချိန်နှင့်တပြေးညီ ထိခိုက်မှုဒေတာကို အစီရင်ခံနိုင်ပြီး အာရုံခံစနစ်သို့ မြင်ကွင်းများကို ပေးပို့နိုင်သည်။
ဝေလုံ-အဆင့် လျှပ်စစ်ရထားခေါင်းကို Gemini နူကလီးယားစက်ခေါင်းနှင့် အထူးတွဲဆက်ကိရိယာကို အသုံးပြု၍ ချိတ်ဆက်ထားသည်။ ၎င်းတို့ကြားမှ စင်္ကြံပိတ်ဆို့ထားသောကြောင့် ၎င်းကို PX-05 စက်ရုပ်များဖြင့် ထိန်းသိမ်းထားသော ပါဝါယူနစ်အဖြစ်သာ အသုံးပြုနိုင်သည်။ ၎င်းကိုလည်း သံချပ်ကာတပ်ဆင်ထားပြီး သန့်ရှင်းရေးလုပ်ထားသည်။ အတွင်းပိုင်းနှင့် အပြင်ဘက် စောင့်ကြည့်ရေးစနစ်များ၊ နောက်ဘက်ရေဒါနှင့် ပစ်မှတ်ထားသည့် စနစ်တို့ တပ်ဆင်ထားသည်။
ဤပြင်းထန်သော စက်ပိုင်းဆိုင်ရာ အလုပ်များအောက်တွင် လင်းရှန်၏ ယန္တရားထုတ်လုပ်မှု ကျွမ်းကျင်မှုသည် အရင်ကထက် ပိုမိုမြန်ဆန်စွာ တိုးတက်လာသည်။
[ထုတ်လုပ်ပြီးစီးသည် သတ္တုစပ် သံချပ်ကာပြား – ယန္တရားထုတ်လုပ်မှု +20]
[ထုတ်လုပ်ပြီးစီးသည် PX-05 စက်ရုပ် – ယန္တရားထုတ်လုပ်မှု +100]
[ထုတ်လုပ်ပြီးစီးသည် ရှာဖွေရေးရေဒါ – ယန္တရားထုတ်လုပ်မှု +35]
[ထုတ်လုပ်ပြီးစီးသည် Kor-ဝင်ရိုးခြောက်ခုပါ စက်ယန္တရားလက်တံ – ယန္တရားထုတ်လုပ်မှု +200]
[ထုတ်လုပ်ပြီးစီးသည် အမည်မသိ ချိတ်ဆက်ကိရိယာ – ယန္တရားထုတ်လုပ်မှု +5]
[ထုတ်လုပ်ပြီးစီးသည်…]
ယန္တရားထုတ်လုပ်မှု: 4 (666/2000)
ယန္တရားထုတ်လုပ်မှု: 4 (880/2000)
ယန္တရားထုတ်လုပ်မှု: 4 (1245/2000)
ယန္တရားထုတ်လုပ်မှု: 4 (1796/2000)
[ဂုဏ်ယူပါတယ်… ယန္တရားထုတ်လုပ်မှု အဆင့် 5 သို့ အဆင့်မြှင့်တင်ပြီးပါပြီ။ ထိရောက်မှု တိုးလာသည်]
သူ၏ ထုတ်လုပ်မှုက အလွန်အားကောင်းနေသည်။ လင်းရှန်သည် အာရုံစူးစိုက်မှု အလွန်မြင့်မားသည့် အခြေအနေသို့ ရောက်ရှိသွားပြီး သူ၏ ထုတ်လုပ်မှုနှုန်းနှင့် စွမ်းအင်ထုတ်လုပ်မှုသည် အဆမတန် မြင့်မားလာသည်။ သူ၏ စွမ်းရည်အဆင့်သည် သူ၏ ယန္တရားနှလုံးသားကို ပထမဆုံးအကြိမ်အဖြစ် ကျော်လွန်သွားကြောင်း အသိပေးချက်ပေါ်လာမှသာ သူ သဘောပေါက်သွားသည်။
သူ၏ စွမ်းအင်သည် တစ်ညလုံး 1%၏ အစွန်းတွင် ရှိနေသော်လည်း စိတ်လှုပ်ရှားမှုကြောင့် သူသည် မည်သည့် ပင်ပန်းနွမ်းနယ်မှုကိုမှ မခံစားရပေ။ ဖြုတ်ချစင်တာတွင် ကုန်ကြမ်းအားလုံးနီးပါး ကုန်ဆုံးမသွားပါက သူ ဆက်လက်လုပ်ဆောင်နေဦးမည်။
၎င်းသည် “ငါ့ကို တွန်းအားပေးပါ၊ ငါ နောက်ထပ် အချီသုံးရာ တိုက်မယ်” ဟု ပြောနေသည့်အလားပင်။