မဒမ်ပိုင် လက်စားချေလိုခြင်း

"မင်း ဘာပြောလိုက်တယ်။"

ပိုင်မိသားစုမှ ပိုင်ရှီရှင်းသည် လက်အောက်ငယ်သား၏ သတင်းပို့စကားကို ကြားသောအခါ သူ၏မျက်နှာအမူအရာသည် အလွန်ပင် တုန်လှုပ်ခြောက်ခြားသွား၏။

"ကုန်းကျန့်နဲ့ ကုန်းထျန်းဟောက်က ကျင်းချန်ကို ပြန်လာတယ်။ မနက်ဖြန်မှာ အဲ့ဒီ ရှောင်လင်းယွီကို အိမ်တော်တံခါးဝကနေ ကြိုဆိုဦးမယ် ဟုတ်လား။"

"ဟုတ်ကဲ့ပါ သခင်ကြီး။ ဒီသတင်းက ကျင်းချန်တစ်မြို့လုံး ပျံ့နှံ့သွားပါပြီ။"

လက်အောက်ငယ်သားက သတင်းပို့လာသည်။

ပိုင်ရှီရှင်းကြားပြီးနောက် မျက်နှာသည် ညိုမည်းသွားပြီး အံကြိတ်ကာ ပြောလိုက်သည်။

"သူတို့ ဘယ်လို သတ္တိရှိလို့လဲ။ သူတို့ ဘယ်လိုများလုပ်ရဲရတာလဲ။"

သူ့သမီးကို သေစေခဲ့ပြီးနောက် ဤသို့ဖြင့် အခြားအမျိုးသမီးတစ်ဦးကို အိမ်သို့ ကြိုဆိုခေါ်ဆောင်လာလေသည်။

ဤအချိန်တွင် မဒမ်ပိုင်သည် အလျင်အမြန် ပြေးဝင်လာပြီး မျက်နှာပေါ်တွင် ဒေါသကို မဖုံးကွယ်နိုင်ဘဲ သူမက အလျင်စလို မေးလိုက်သည်။

"သခင်ကြီး၊ ကုန်းထျန်းဟောက်က ရှောင်လင်းယွီကို အိမ်ပြန်ခေါ်တော့မလို့လား။"

သမီးဖြစ်သူ အသတ်ခံရပြီးနောက်ပိုင်း၊ လျှို့ဝှက်ဆန်းကြယ်သော စာတစ်စောင်မှတစ်ဆင့် သူတို့သည် ကုန်းထျန်းဟောက် အိမ်ထောင်ပြုပြီးဖြစ်ကြောင်း၊ အိမ်ထောင်ပြုသည့်သူမှာ ရှောင်လင်းယွီ ဖြစ်ကြောင်း သိရှိခဲ့ကြသည်။ ထိုအချိန်က သူတို့သည် မုန်းတီးမှုဒေါသများဖြင့် ပတ်ပတ်လည် ရစ်ဝိုင်းခံနေရပြီး ဤကိစ္စကို အပြင်သို့ ထုတ်ဖော်ပြောကြားခြင်း မရှိခဲ့ဘဲ၊ အခွင့်အရေးကို စောင့်ဆိုင်းကာ ထိုရှောင်လင်းယွီကို ဖမ်းခေါ်လာပြီး ပြင်းထန်စွာ နှိပ်စက်ရန်သာ ကြံစည်နေခဲ့သည်။

သို့သော် သူတို့ မျှော်လင့်မထားခဲ့သည်မှာ အကြိမ်များစွာ လူလွှတ်ခဲ့သော်လည်း သတင်းတစ်စွန်းတစ်စမျှ ပြန်လည် ရောက်ရှိမလာခဲ့ဘဲ၊ ထို့နောက် မကြာမီမှာပင် ကုန်းထျန်းဟောက်နှင့် ရှောင်လင်းယွီတို့ မိသားစုလေးယောက်၏ ဓာတ်ပုံများ ကောင်းကင်အနှံ့ ပျံဝဲလာခဲ့ခြင်း ဖြစ်သည်။

သခင်ကြီးပိုင်၏ မျက်နှာအမူအရာကို မြင်သော် မဒမ်ပိုင် နားမလည်စရာ အဘယ်အရာ ရှိတော့မည်နည်း၊ သူမသည်လည်း အလားတူ အံကြိတ်ကာ ပြောလိုက်သည်။

"သူတို့ ဘယ်လို သတ္တိရှိလို့လဲ၊ ကျုပ်တို့ ပိုင်မိသားစုကို ဒီလိုမျိုး ဆက်ဆံရဲတဲ့ သတ္တိ သူတို့မှာ ဘယ်လို ရှိနေရတာလဲ။ ကုန်းထျန်းဟောက်နဲ့ အဲ့ဒီ ရှောင်လင်းယွီက ကျုပ်တို့ရဲ့ ရှန်းအာကို အခုလေးတင် သတ်ပစ်ခဲ့တာ၊ သူတို့ ဘယ်လိုလုပ် စိတ်အေးလက်အေး အတူတူ နေနိုင်ရတာလဲ။"

ဤသို့ ပြောပြီးနောက် မဒမ်ပိုင်သည် ဒေါသထွက်နေသော မျက်ဝန်းများဖြင့် သခင်ကြီးပိုင်အား စိုက်ကြည့်ကာ၊ သူမက ပြင်းထန်စွာ အပြစ်တင် မေးမြန်းလိုက်သည်။

"ကျွန်မ ရှန်းအာအတွက် လက်စားချေမယ်လို့ ပြောခဲ့တယ် မဟုတ်လား။ ဘာဖြစ်လို့ အခုထိ ဘာလှုပ်ရှားမှုမှ မရှိသေးတာလဲ။ ပိုင်ရှီရှင်း၊ ရှင် ကျွန်မကို ပြောစမ်းပါ၊ ရှင် မလုပ်ရဲတာ မဟုတ်လား။ ကျွန်မ ရှင့်ကို ပြောထားမယ်၊ ကိုယ့်သမီးရဲ့ ရန်ငြိုးကိုတောင် လက်စားမချေနိုင်ဘူးဆိုရင် အဲ့ဒါ သူရဲဘောကြောင်တာပဲ။ ကျွန်မ ရှင့်ကို အရမ်း အထင်သေးတယ်။"

သခင်ကြီးပိုင် ကြားသော် မျက်နှာသည် ချက်ချင်း ပြောင်းလဲသွားပြီး၊ ဖြူရာမှ နီ၊ နီရာမှ ပြာ၊ ပြာရာမှ မည်း၊ မည်းရာမှ ခရမ်းရောင် သို့ ပြောင်းလဲသွားကာ၊ ထို့နောက် နီလိုက် ဖြူလိုက် ဖြစ်နေသည်။ သူသည် မဒမ်ပိုင်အား ဒေါသကို ချုပ်တည်းကာ ကြည့်လိုက်ပြီး အော်ဟစ်လိုက်၏။

"ပါးစပ်ပိတ်ထား။ မင်းက ငါ လက်စားမချေချင်ဘူး ထင်နေလား။ မင်းက လက်စားချေတယ်ဆိုတာ ပြောလိုက်ရုံနဲ့ ပြီးသွားတယ် ထင်နေလား။ ငါတို့ လက်စားချေရမယ့် ပြိုင်ဘက်က ဘယ်သူလဲဆိုတာ မင်း မသိဘူးလား။ အစွမ်းရှိရင်၊ မင်း သွားပြီး သမီးအတွက် လက်စားချေလေ။ အစွမ်းမရှိရင်၊ မင်း ပါးစပ်ပိတ်ထား။ ငါ့ရှေ့မှာ လာပြီး အသံကျယ်ကြီးနဲ့ အော်မနေနဲ့။"

မဒမ်ပိုင် ကြားသော် ဒေါသကထွက်၊ အံ့ဩပြီး ထိတ်လန့်သွားသော်လည်း၊ ချက်ချင်းပင် သူမက အကျယ်ကြီးပြန်အော်လိုက်ပြန်သည်။

"ကောင်းပြီ၊ ကျွန်မ ရှင့်ကို ပြောမယ်၊ ရှင် အစွမ်းအစမရှိတာနဲ့ ကျွန်မပါ အစွမ်းအစမရှိဘူးလို့ မပြောဘူး။ ရှင် စောင့်နေလိုက်၊ ကျွန်မ အခုပဲ ကျွန်မတို့သမီးအတွက် လက်စားသွားချေမယ်။"

ဤသို့ ပြောပြီးနောက် သူမသည် ပြေးထွက်သွားလေသည်။

.......

သိပ်မကြာခင်မှာပဲ မဒမ်ပိုင်သည် ကုန်းမိသားစု ဒုတိယသခင်ကြီး ကုန်းချီထံသို့ ရောက်ရှိသွားသည်။ သူမသည် ပိုင်လျန်ဟွာအား ငိုကြွေးရင်ဖွင့်လိုက်သည်။

"ညီမလေး၊ ငါတို့ တကယ်ပဲ ကံဆိုးလိုက်တာ။ ပိုင်မိသားစုရဲ့ မိန်းကလေးတစ်ယောက် ဒီအတိုင်း အသတ်ခံလိုက်ရပြီးတော့ လက်စားချေလို့လည်း မရဘူး။ ရန်သူတွေ ပျော်ပျော်ကြီး လွတ်မြောက်နေတာကို မျက်စိရှေ့မှာတင် ကြည့်နေရတယ်။ ငါ ဘယ်လိုလုပ် စိတ်အေးနိုင်မှာလဲ။"

ပိုင်ရှန်းရှန်း အသတ်ခံရသည့်ကိစ္စကို ကုန်းချီသည် ဧကန်မလွဲ သတင်းရရှိထားပြီး ဖြစ်သည်။ ပိုင်မိသားစု အကြီးအကဲသည်လည်း ညီမဖြစ်သူ ပိုင်လျန်ဟွာအား ပိုင်ရှန်းရှန်းကို သတ်ဖြတ်သူများမှာ ကုန်းထျန်းဟောက်နှင့် ရှောင်လင်းယွီတို့ ဖြစ်ကြောင်း ပြောပြထားခဲ့သည်။ သို့သော် ကုန်းချီသည် ကုန်းထျန်းဟောက် သတိမေ့မြောရာမှ နိုးထလာသည်ကို သိရှိရပြီး၊ ကုန်းမိသားစုကို မှီခိုအားထားရန် လိုအပ်နေသေးသဖြင့် ပိုင်လျန်ဟွာသည် အစ်ကိုနှင့် မရီးဖြစ်သူအား ခေတ္တမျှ သည်းခံရန် သူတို့မိသားစု ကုန်းမိသားစုကို သိမ်းပိုက်ပြီးနောက် သူတို့ လက်စားချေလိုလျှင် လက်စားချေနိုင်ကြောင်း ဖျောင်းဖျခဲ့သည်။

ဤသည်မှာ ပိုင်ရှီရှင်းနှင့် မဒမ်ပိုင်တို့အား အလွန် ဒေါသထွက်စေခဲ့ပြီး သူတို့သည် ဆင်ခြေများ ရှာဖွေကာ ကူညီရန် မလိုလားခြင်းသာ ဖြစ်သည်ဟု ယူဆလျက် ဒေါသတကြီးဖြင့် ထွက်ခွာသွားခဲ့သည်။

ထို့နောက်တွင် ပိုင်ရှီရှင်း လွှတ်လိုက်သော လူများ ထောင်ယွမ်ရွာသို့ လူဖမ်းရန် သွားရာတွင် သတင်းအစအန ပျောက်ဆုံးသွားခဲ့ပြီး၊ ဆက်လက်၍ ကုန်းထျန်းဟောက် မိသားစုလေးယောက် ရဟက်ယာဉ်ပေါ်တက်ခြင်း၊ လက်ထပ် ကလေးမွေးဖွားခြင်း သတင်းများကြောင့် ကြောင်အသွားစေခဲ့သည်။

ပိုင်မိသားစုနှင့် နှိုင်းယှဉ်ပါက ကုန်းမိသားစုသည် ဧကန်မလွဲ ဧရာမအင်အားကြီးဖြစ်ပြီး သူတို့သည် ကုန်းမိသားစုကို မှီခို၍သာ တည်ရှိနေရခြင်း ဖြစ်သည်။ ထိုစဉ်က ပိုင်လျန်ဟွာနှင့် ကုန်းကျန့်ကျွင်းတို့ တံခါးဝသို့ လာရောက်ကာ ကုန်းထျန်းဟောက်၏ အိမ်ထောင်ရေးကိစ္စကို အနည်းငယ်မျှ အဆိုပြုလိုက်သည်နှင့် ကုန်းထျန်းဟောက်၏ လက်စားချေခြင်းကို ခံရပြီး ပိုင်လုပ်ငန်းစု၏ စတော့များအားလုံး ထိုးကျသွားစေကာ ဒေဝါလီခံရလုနီးပါး ဖြစ်သွားစေခဲ့သည်။

ပိုင်ရှီရှင်းသည် ဤနှစ်များအတွင်း ကျင်းချန်တွင် ခြေကုပ်အချို့ကို ခိုင်မာစွာ ရယူနိုင်ခဲ့ပြီး သူ့အမြင်နှင့် အခြေအနေကို သုံးသပ်နိုင်စွမ်းမှာ အနည်းငယ် ပို၍ ကျယ်ပြန့်လာခဲ့သည်။ ထို့ကြောင့် ကုန်းထျန်းဟောက်က သူ့သမီးငယ်ကို သတ်ပစ်ခဲ့သည်ဟု သိနေလျှင်ပင်၊ သူ သည်းခံထားရပေမည်။ မဟုတ်ပါက ခြေတစ်လှမ်း မှားလိုက်သည်နှင့် တစ်ပွဲလုံး ရှုံးနိမ့်သွားရမည့် ဆိုးရွားသော မြင်ကွင်း ဖြစ်သွားပေမည်။ သူတော်ကောင်းတစ်ယောက် လက်စားချေရန် ဆယ်နှစ် ကြာလျှင်ပင် နောက်မကျသေးပေ။

နှမြောစရာကောင်းသည်မှာ မဒမ်ပိုင်တွင်မူ သူကဲ့သို့ အခြေအနေကို သုံးသပ်နိုင်စွမ်း မရှိခဲ့ခြင်း ဖြစ်သည်။ သူမသည် မိမိ အချစ်ဆုံး သမီးလေး အသတ်ခံရသည်ကို တွေးမိလိုက်တိုင်း သူမ နာကျင်ခံစားရပြီး၊ သူမ ဒေါသထွက်ကာ၊ ဓားတစ်ချောင်းကိုင်လျက် ရန်သူအား ထိုးစိုက်ပစ်လိုက်ချင်စိတ်များ ပေါ်ပေါက်လာသည်။ သို့သော် သူမသည် ယခုအခါ စွမ်းရည် အကန့်အသတ် ရှိနေပြီး ခင်ပွန်းဖြစ်သူကလည်း တစ်စုံတစ်ရာ မလုပ်ဆောင်သော အခြေအနေတွင် အပြင်လူ၏ အကူအညီကိုသာ တောင်းခံနိုင်တော့သည်။

ယောက်မကြီး၏ ငိုကြွေးရင်ဖွင့်သံကို ကြားသော် ပိုင်လျန်ဟွာသည် မျက်လုံးလှန်ပစ်လိုက်ချင်သော်လည်း သို့တိုင် နှစ်သိမ့်စကား ဆိုလိုက်ရသည်။

"အစ်မ၊ စိတ်မကောင်းဖြစ်မနေနဲ့တော့နော်။"

ပိုင်လျန်ဟွာသည်လည်း မိုက်မဲသူတစ်ဦး မဟုတ်ပေရာ ဧကန်မလွဲ ယောက်မကြီး သူမထံ လာရှာရသည့် အကြောင်းရင်းကို သိရှိသဖြင့်၊ နားမကြားဟန်၊ ဆွံ့အဟန် ဆောင်နေလိုက်သည်။ ပိုင်ရှန်းရှန်း သေဆုံးမှုအတွက် မုန်းတီးမှုနှင့် နှိုင်းယှဉ်ပါက သေချောပေါက် သူတို့၏ အထောက်အထား အဆင့်အတန်းက ပို၍ အရေးကြီးလေသည်။

လွန်ခဲ့သော လေးနှစ်က၊ အိမ်ထောင်ရေးကိစ္စကြောင့် ကုန်းထျန်းဟောက်ကို အမျက်ထွက်စေခဲ့ပြီး ရလဒ်အနေဖြင့် ကုန်းထျန်းဟောက်သည် သူမ၏ မိဘမျိုးရိုးအပေါ် လက်စားချေခဲ့သည်။ ထိုအချိန်က ယောက်မကြီးသည် သူမအား တိတ်တဆိတ် အကြိမ်ပေါင်း မည်မျှ ဆဲဆိုခဲ့သည်ကို မသိနိုင်ပေ။ ကံကောင်းသည်မှာ သူတို့ ကုန်းမိသားစု(၂) ဘာမျှ မဖြစ်ခဲ့ခြင်း ဖြစ်သည်။ သို့မဟုတ်လျှင် နိမ့်ကျသူကို နင်းချပြီး ပိုမြင့်သူကို မြှောက်ပင့်တတ်သော သူမ၏ယောက်မကြီးသည် ဧကန်မလွဲ သူမအား အိမ်မှ တံမြက်စည်းဖြင့် လှည်းထုတ်ပေလိမ့်မည်။

ပိုင်လျန်ဟွာသည်လည်း နားလည်ပါသည်။ မိဘမျိုးရိုးကို သူမ မစော်ကား၍ မဖြစ်ပေ။ အကြောင်းမှာ မိဘမျိုးရိုး ကျင်းချန်တွင် ရှိနေသောကြောင့် သူမ ပို၍ အားရှိပြီး၊ အနည်းဆုံးတော့ အခြားသူများ၏ အလွယ်တကူ အနိုင်ကျင့်ခြင်းကို မခံရနိုင်ပေ။ သို့သော် မိဘမျိုးရိုးသည် သူမ၏ပတ်သက်ဆက်နွှယ်မှုကြောင့်သာ တစ်ဆင့်ပြီးတစ်ဆင့် ယခုလို အဆင့်အတန်းကို ရရှိလာခဲ့ခြင်းဖြစ်ရာ သဘာဝအတိုင်း ခင်ပွန်းဘက်မိသားစု၏ ဆက်ဆံရေးကိုလည်း သူမ ပို၍ ထိန်းသိမ်းရန် လိုအပ်ပြီး၊ ယခင်ကတည်းက ခင်ပွန်းဘက်မိသားစု၏ အကျိုးစီးပွားကို ဦးစားပေးကာ၊ ဒုတိယမှသာ မိဘမျိုးရိုးကို ထားရှိခဲ့သည်။

ခင်ပွန်းဘက် မိသားစု အဆင့်အတန်း ရှိလာသည်နှင့် သူမသည် မိဘမျိုးရိုးတွင် ပို၍ အဆင့်အတန်း ရှိလာသည်။ အလားတူပင်၊ မိဘမျိုးရိုး၏ အဆင့်အတန်း မြင့်တက်လာပါက သူမသည် ခင်ပွန်းဘက်မိသားစုတွင်လည်း အဆင့်အတန်း ရှိလာပေမည်။ ထို့ကြောင့် မိဘမျိုးရိုးတွင် ဖြစ်စေ၊ ခင်ပွန်းဘက် မိသားစုတွင် ဖြစ်စေ၊ ပိုင်လျန်ဟွာသည် နေရာတစ်နေရာကို ရရှိထားလေသည်။ ပိုင်လျန်ဟွာသည် ခင်ပွန်းဘက် မိသားစုနှင့် မိဘမျိုးရိုး၏ ဆက်ဆံရေးကို ကိုင်တွယ်ဖြေရှင်းရာတွင် အလွန် ဉာဏ်ရည်မြင့်မားသည်ဟု ဆိုရပေမည်။

မဒမ်ပိုင်သည် ဤမျှ အချိန်ကြာမြင့်စွာ ငိုကြွေးရင်ဖွင့်ခဲ့သော်လည်း၊ ခင်ပွန်း၏ညီမထံမှ ဤသို့ နှစ်သိမ့်စကားတစ်ခွန်းတည်းသာ ရရှိခဲ့ရာ၊ စိတ်ထဲတွင် ဒေါသထွက်၊ အမျက်ထွက်မိသော်လည်း၊ အနည်းဆုံးတော့ အသိတရားကို ထိန်းသိမ်းထားနိုင်ခဲ့ပြီး၊ ဩဇာအာဏာရှိသော ခင်ပွန်း၏ ညီမအား စော်ကားမိခြင်း မရှိခဲ့ပေ။

မဒမ်ပိုင်သည် အလွန် နာကျင်ခံစားရပြီး ဝမ်းနည်းစွာဖြင့် မေးလိုက်သည်။

"ညီမလေး၊ ဒါဆို ငါတို့ရဲ့ ရှန်းအာ အသတ်ခံရတဲ့ ရန်ငြိုးကို ဒီအတိုင်းပဲ ထားလိုက်ရတော့မှာလား။ လူသတ်သမားနှစ်ယောက် ထင်ထင်ပေါ်ပေါ်နဲ့ ကုန်းမိသားစုကို ပြန်လာတာကို မျက်စိရှေ့မှာတင် ကြည့်နေရတော့မှာလား။ ငါ မကျေနပ်ဘူး။"

ယောက်မကြီး၏ စကားကို ကြားပြီးနောက်၊ ပိုင်လျန်ဟွာ၏ မျက်နှာသည် ချက်ချင်း ပြောင်းလဲသွားပြီး၊ ထို့နောက် သူမက လောလျင်စွာ ပြောလိုက်သည်။

"အစ်မရယ်၊ ဒီစကားတွေကို အစ်မ လျှောက်ပြောလို့ မဖြစ်ဘူးနော်။"

"ငါ မ..."

မဒမ်ပိုင်က တစ်စုံတစ်ခု ဖြေရှင်းချက်ပေးရန် ကြံရွယ်လိုက်သည်။

သို့သော် ပိုင်လျန်ဟွာ၏ မျက်နှာသည် ချက်ချင်း ပြောင်းလဲသွားပြီး အလွန်ခက်ထန်စွာ ပြောလိုက်သည်။

"ဘာမှ မရှိဘူး ဟုတ်လား။ လျှောက်မပြောဘူး ဟုတ်လား။ ဒါဆို ကျွန်မကို ပြောစမ်း၊ ဘယ်လိုလုပ် လျှောက်မပြောတာ ဖြစ်ရမှာလဲ။ အစ်မက ပါးစပ်ကနေ အမြဲတမ်း ကုန်းထျန်းဟောက်နဲ့ အဲ့ဒီ ရှောင်လင်းယွီက အစ်မရဲ့ သမီးကို သတ်တယ်လို့ ပြောနေတာ၊ ဒါဆို အစ်မတို့မှာ သက်သေ ရှိလို့လား။ အစ်မတို့ ရဲစခန်းမှာ အမှုဖွင့်ထားလို့လား။... သက်သေလည်း မရှိဘူး၊ ရဲစခန်းမှာ အမှုဖွင့် စုံစမ်းစစ်ဆေးတာလည်း မရှိဘဲနဲ့ အစ်မတို့ လက်ထဲက ဘယ်ကမှန်းမသိတဲ့ စာတစ်စောင်တည်းကို အားကိုးပြီး၊ ကုန်းထျန်းဟောက်နဲ့ ရှောင်လင်းယွီက ပိုင်ရှန်းရှန်းကို သတ်တယ်လို့ ဆုံးဖြတ်လိုက်တာလား။ ကျွန်မကတောင် အဲ့ဒီ စာပို့တဲ့လူက ပိုင်ရှန်းရှန်းကို သတ်တာလို့ ပြောလိုက်ဦးမယ်။ မဟုတ်ရင်၊ သူက ဘယ်လိုလုပ်ပြီး ပိုင်ရှန်းရှန်းကို ကုန်းထျန်းဟောက်နဲ့ ရှောင်လင်းယွီက သတ်တယ်ဆိုတာ သိနေရတာလဲ။ သူ ကိုယ်တိုင် မျက်မြင်တွေ့ခဲ့တာလား။ တကယ်လို့ သူ ကိုယ်တိုင် မျက်မြင်တွေ့ခဲ့တယ်ဆိုရင် သူ့ကို ရှေ့ထွက်ပြီး သက်သေခံခိုင်းလိုက်လေ။"

ပိုင်လျန်ဟွာ ပြောဆိုလိုက်သော စကားများကို မဒမ်ပိုင် တစ်ခွန်းမျှပင် မချေပနိုင်ခဲ့ကြောင်း ဝန်ခံရပေမည်။ သို့သော် မဒမ်ပိုင်၏စွဲလမ်းမှုသည် အလွန်နက်ရှိုင်းလှပြီး၊ လူသတ်မှု၏ တရားခံကို ရှာမတွေ့နိုင်သော အခြေအနေတွင် သူမ၏ သမီးဆုံးရှုံးရခြင်းနာကျင်မှုကို ထုတ်ဖော်နိုင်ခြင်း မရှိသည့်အခါ သူမသည် အရာအားလုံးကို ထိုစာထဲတွင် ဖော်ပြထားသော လူသတ်သမားများ ဖြစ်သည့် ကုန်းထျန်းဟောက်နှင့် ရှောင်လင်းယွီတို့ အပေါ်သို့ ပုံချလိုက်လေသည်။ သူမသည် ယခုအခါ အချိန်တိုင်း၊ စက္ကန့်တိုင်း လက်စားချေရန်သာ တွေးတောနေသည်။

"ပြီးတော့၊ ကျွန်မ သိသလောက်တော့ ပိုင်ရှန်းရှန်း သေဆုံးမှုအတွက် အမှုဖွင့်ထားပြီးပြီ။ ဒီအမှုကိုကိုင်တာ ကျင်းချန်ရဲစခန်းဌာနချုပ်က၊ ကျန်းမိသားစုရဲ့ ကျန်းထောင်က ဝင်ရောက် စုံစမ်းစစ်ဆေးနေတယ်။"

ပိုင်လျန်ဟွာက ဆက်လက် ပြောသည်။

"အစ်မ၊ သခင်လေးကျန်းက ဒီအမှုကို ဝင်ရောက်စွက်ဖက်နေမှတော့ ရှန်းအာကို သတ်တဲ့ တရားခံက လွတ်မြောက်နိုင်ဦးမယ်လို့ထင်နေသေးတာလား။"

သို့သော် မဒမ်ပိုင်သည် လုံးဝ နားမဝင်ဘဲ၊ သူမက ဒေါသတကြီး ပြန်လည်ချေပလိုက်သည်။

"တကယ်လို့ တရားခံက ကုန်းထျန်းဟောက်နဲ့ ရှောင်လင်းယွီ အမှန်တကယ် ဖြစ်နေမှန်း စစ်ဆေးတွေ့ခဲ့ရင် ကျန်းထောင်နဲ့ ကုန်းထျန်းဟောက်ရဲ့ ပတ်သက်မှုအရ၊ ညီမ ပြောစမ်းပါ၊ ကုန်းထျန်းဟောက်က လွတ်မြောက်နိုင်မလား၊ မလွတ်မြောက်နိုင်ဘူးလား။"

ပိုင်လျန်ဟွာ: "..."

သူမသည် ညင်သာစွာ သက်ပြင်းတစ်ချက် ချလိုက်ပြီး၊ ခေတ္တ စဉ်းစားကာ မေးလိုက်သည်။

"ဒါဆို အစ်မ၊ ကျွန်မအိမ်ကို လာရှာတာ၊ ကျွန်မကို ဘယ်လို လုပ်စေချင်တာလဲ။"

......

ထိပ်တန်းမိသားစုဖြစ်သော ကုန်းမိသားစုသည် ယနေ့တွင် ဤ အနှစ်နှစ်ဆယ်၊ သုံးဆယ်အတွင်း ပထမဆုံးအကြိမ်အဖြစ် ကုန်းမိသားစု အိမ်ရှင်မအား ကြိုဆိုမည် ဖြစ်ပြီး၊ ကုန်းမိသားစု မင်းသားငယ်လေး.... ကုန်းမိသားစု အမွေဆက်ခံသူ တစ်ဦးလည်း ပါရှိသေးကြောင်း သိရှိရပြီးနောက်၊ အရပ်ရပ်မှ မီဒီယာ သတင်းထောက်များအားလုံးသည် ကုန်းမိသားစု တံခါးမကြီးဝသို့ အသီးသီး ပြေးလွှား စောင့်ဆိုင်းနေကြသည်။ သက်တော်စောင့်များ၏ နှင်ထုတ်ခြင်းကို ခံရသော်လည်း၊ ဘေးတစ်နေရာတွင် ပုန်းကွယ်လျက် ပထမဆုံး သတင်းအချက်အလက်ကို ရရှိကာ အကြီးအကျယ် အမြတ်ထုတ်နိုင်ရန် စောင့်ဆိုင်းနေကြသည်။

မည်သို့ပင်ဆိုစေ၊ ယခင်ကတည်းက ကုန်းမိသားစုနှင့် ပတ်သက်သော သတင်းများအားလုံးသည် အလွန်ရောင်းကောင်းခဲ့သည် မဟုတ်ပါလား။

ဟူး... ဟူး...

ခေါင်းထက်မှ ရဟက်ယာဉ် ပျံဝဲနေသော တဝီဝီအသံကြီး ထွက်ပေါ်လာသည်။

"လာပြီ၊ လာပြီ..."

တစ်စုံတစ်ယောက်က လျင်မြန်စွာ အော်ဟစ်လိုက်ပြီးနောက်၊ အကောင်းဆုံး နေရာကို ရှာဖွေကာ၊ အကောင်းဆုံး ထောင့်ကို ရွေးချယ်လိုက်လေသည်...

**