ဗုဒ္ဓဝါဒကို ဖျက်ဆီးပစ်မည်။

တမလွန်မြစ်၏ အနက်ပိုင်း၊ သွေးပင်လယ်၏ အလယ်ဗဟို၊ အပျက်အစီးနယ်မြေ၏ ထောင့်တစ်နေရာမှာ…

သိုင်းတာအိုပင်မခန္ဓာသည် ကြေမွပျက်စီးနေသော ချပ်ဝတ်တန်ဆာများနှင့် အလောင်းပုံတစ်ပုံပေါ်မှာ လှဲလျောင်းနေ၏။ သူ၏ မျက်လုံးနှစ်ဖက်ကို ဖွင့်ထားပြီး သူ၏ ဦးခေါင်းထက် မီးခိုးရောင်ကောင်းကင်ကို မလှုပ်မယှက်ကြည့်နေ၏။

သူ၏ ခန္ဓာကိုယ်ကို ပြန်လည်တည်ဆောက်၍ သူ၏ အသက်ဓာတ်အားကို ပြန်လည်ရယူပြီး နိုးထလာစေဖို့အတွက် နှစ်တစ်ထောင်အချိန်ယူခဲ့ရ၏။

ဤတစ်ခေါက်ရရှိသော ထိခိုက်ဒဏ်ရာများက အရမ်းကိုပြင်းထန်ခဲ့သည်။

တကယ်ဆို သူ့ကိုယ်သူသေပြီဟုပင် တွေးထင်ခဲ့၏။

သိုင်းတာအိုပင်မခန္ဓာ၏ နောက်ဆုံးမှတ်ဉာဏ်မှာ သူက သွေးပင်လယ်ထဲသို့ ထွက်ပြေးလာပြီး သူ၏ အသိစိတ်က အမှောင်ထုထဲသို့ နစ်မြုပ်သွားစဉ် သူ၏ ဝိညာဉ်ကို နွေးထွေးမှုတစ်စွန်းတစ်စ ခံစားရစေသည့် မီးတောက်တစ်ခုကို သူက တွေ့မြင်ခဲ့ရခြင်းပင်။

လွန်ခဲ့သည့်ရက်အနည်းငယ်ကမှသာ သူက တဖြည်းဖြည်းနိုးထလာခဲ့ခြင်းဖြစ်သည်။

ပြန်လည်တည်ဆောက်ပြီးနောက် သူ၏ ခန္ဓာကိုယ်နှင့် မျိုးဆက်သွေးသည် ယခင်ကနှင့် သိသိသာသာ ကွဲပြားသွားသည်။

သူသည် ငရဲဖိနှိမ်မီးဖိုကို သူ၏ မျိုးဆက်သွေးထဲသို့ ထည့်သွင်းပေါင်းစည်းထားခဲ့ပြီကို သိုင်းတာအိုပင်မခန္ဓာက အာရုံခံမိနိုင်သည်။

ငရဲဖိနှိမ်မီးဖိုသည် မဟာဧကရာဇ်လက်နက်တစ်ခုဖြစ်ရုံသာမက ၎င်းမှာ အထွတ်အမြတ်တောကောင်လေးကောင်၏ မျိုးဆက်သွေးနှင့် ဝိညာဉ်များလည်း ပါဝင်နေ၏။ ဤအရာသည် သူ၏ ကိုယ်ကာယ၊ မျိုးဆက်သွေးနှင့် သူ၏ ဝိညာဉ်အားအင်ဖြည့်တင်းမှုအတွက် ကြီးမားစွာ အထောက်အကူဖြစ်စေခဲ့၏။

သို့သော်လည်း မဟာကပ်ဘေးက အရမ်းကို ကြောက်စရာကောင်းခဲ့သည်။ သူ၏ သိုင်းကြဝဠာနှင့် အမြုတေသိုင်းလောကက ဖုန်မှုန့်များအဖြစ် ပြောင်းလဲသွားခဲ့ပြီဖြစ်သည်။

သူ့အနေဖြင့် မူလအခြေအနေကို ပြန်လည်ရောက်ရှိဖို့ အလွန်တရာကြာမြင့်သော အချိန်တစ်ခု ယူရပေလိမ့်မည်။

သူ့ကို အံ့အားသင့်စွာဖြင့် ကျေနပ်မိစေသည့်အရာမှာ အပျက်အစီးနယ်မြေ၏ ဘေးပတ်လည်တွင် အလွန်တရာကြွယ်ဝသော ရင်းမြစ်ချီကို ဖုံးကွယ်ထားခြင်း ဖြစ်လေသည်။

ပုံမှန်အခြေအနေမှာဆိုလျှင် ရင်းမြစ်ချီကို မဟာကမ္ဘာတစ်ထောင်လောကမှာသာ တွေ့မြင်နိုင်သည်။

ဤကဲ့သို့ ကြွယ်ဝသော ရင်းမြစ်ချီက ဤအပျက်အစီးနယ်မြေမှာ ဘယ်လိုလုပ်ပြီး ရှိနေနိုင်တာလဲ။

သို့မဟုတ် ဤအပျက်အစီးနယ်မြေသည် မဟာကမ္ဘာတစ်ထောင်လောကနှင့် ပတ်သက်ဆက်စပ်နေနိုင်မလား။

ယခုအချိန်ထိကို သူ၏ ခန္ဓာကိုယ်က အလွန်တရာ အားနည်းနေဆဲဖြစ်ပြီး မည်သည့်ခွန်အားကိုမှ မထုတ်ဖော်နိုင်သလောက်နီးပါးပင်။ သူသည် တစ်ဖက်ကိုလှည့်ဖို့ပင် အင်မတန်ခက်ခဲနေ၏။

သိုင်းတာအိုပင်မခန္ဓာက အလောတကြီး ရှိမနေပေ။

သူက နိုးထလာပြီဖြစ်ပြီး ဤကဲ့သို့ ကြွယ်ဝသော ရင်းမြစ်ချီက ဘေးပတ်ဝန်းကျင်မှာ ရှိနေသည်ဆိုမှတော့ သူသည် သေချာပေါက် အားအင်ဖြည့်တင်းနိုင်မည်ဖြစ်ကာ ရှေ့ကို ပို၍ပင် ရောက်ရှိလာနိုင်သည်။

သူသည် သူ၏ မျက်ဝန်းထောင့်ကနေ တစ်ချက်ဝေ့ကြည့်လိုက်ပြီး မလှမ်းမကမ်း သွေးပင်လယ်၏ အစပ်မှာ ထိုင်နေသော အနက်ရောင်ဝတ်အမျိုးသားကို တွေ့မြင်သွား၏။

သူထင်တာ မမှားလျှင် သူပြန်လည်ရှင်သန်ပြီး ဤနေရာသို့ ရောက်ရှိလာနိုင်ခဲ့သည်မှာ အနက်ရောင်ဝတ်အမျိုးသားကြောင့် ဖြစ်ပေမည်။

သိုင်းတာအိုပင်မခန္ဓာသည် သွေးပင်လယ်၏ အနက်ပိုင်းထဲမှာ တစ်ယောက်ယောက်ရှိနေသည်ကို ထူးဆန်းသည်ဟု မခံစားရပေ။

သူ သွေးပင်လယ်ထဲသို့ ကျဆင်းပြီး သူ၏ အသိစိတ် မပျောက်ဆုံးခင်က သူက ထိုအချက်ကို တွေးမိခဲ့သည်။

တမလွန်မြစ်ကို သူ ပထမဆုံးဖြတ်ကျော်ခဲ့စဉ်က သူသည် မီးတောက်လုံး၏ ဘေးမှာ ယိုယွင်းပျက်စီးနေသော ရှေးဟောင်းသင်္ဘောတစ်စင်းကို တွေ့မြင်ခဲ့သည်။

သူသည် မဟာကမ္ဘာတစ်ထောင်လောကမှ မဟာကပ်ဘေးဖြင့် လိုက်လံတိုက်ခိုက်ခံရသည့် ဒုတိယအကြိမ်မှာ သူသည် သွေးပင်လယ်၏ အထက်သို့ ရောက်ရှိလာသောအခါ မီးတောက်လုံး၏ ဘေးမှာ ရှိနေခဲ့သော ယိုယွင်းပျက်စီးနေသည့် ရှေးဟောင်းသင်္ဘောက ပျောက်ကွယ်သွားခဲ့ပြီဖြစ်သည်။

သွေးပင်လယ်တစ်ခုလုံးက မည်သည့်ဝဲဂယက်မှမရှိဘဲ သေလောက်အောင် တိတ်ဆိတ်ငြိမ်သက်နေခဲ့၏။

ဤနေရာမှာ တစ်ယောက်ယောက်မရှိနေဘူးဆိုလျှင် ယိုယွင်းပျက်စီးနေသော ရှေးဟောင်းသင်္ဘောက ရွှေ့ပြောင်းခံထားရလိမ့်မည် မဟုတ်ပေ။

သူ နိုးထလာပြီးနောက် မကြာခင် သိုင်းတာအိုပင်မခန္ဓာသည် အနက်ရောင်ဝတ်အမျိုးသား၏ သရုပ်သကန်ကို မေးကြည့်လိုက်၏။

သို့သော်လည်း အနက်ရောင်ဝတ်အမျိုးသားက ပြန်ဖြေခြင်းမရှိဘဲ သွေးပင်လယ်၏ ဘေးမှာသာ ထိုင်နေ၏။ သူက သူ့ကို စိတ်အာရုံမစိုက်လိုခြင်း သို့မဟုတ် သူပြောသည်ကို မကြားရသည့်အလားပင်။

အကြိမ်ရေအနည်းငယ် မေးမြန်းပြီး မည်သည့်တုံ့ပြန်မှုကိုမှ မရရှိသည့်အခါ သိုင်းတာအိုပင်မခန္ဓာက ဆက်လက်၍ မရမကမေးမြန်းမနေတော့ပေ။

အနက်ရောင်ဝတ်အမျိုးသားက တစ်စုံတစ်ရာ မပြောဆိုလျှင်တောင် သူက ကိစ္စတချို့ကို အကြမ်းဖျင်း ခန့်မှန်းမိနိုင်သည်။

တမလွန်မြစ်ကို တမလွန်ဘုံနှင့် လမ်းလေးသွယ်နှင့် ချိတ်ဆက်ထားလေသည်။ တမလွန်မြစ်၏ အလယ်ဗဟိုမှာ ရေသေသွေးပင်လယ်တစ်စင်း ရှိနေ၏။

ထို့အပြင် သွေးပင်လယ်၏ အနက်ပိုင်းထဲမှာ ဤကဲ့သို့ အပျက်အစီးနယ်မြေတစ်ခုပင် ရှိနေသည်။

အပျက်အစီးနယ်မြေမှာရှိသော အနက်ရောင်ဝတ်အမျိုးသားသည် မိစ္ဆာအရှင်၊ ဧကရီဆိုးယုတ်နှင့် ဗြဟ္မာတစ္ဆေမိခင်တို့နှင့် ပတ်သက်ဆက်စပ်နေနိုင်သည်။

သူသည် ကောင်းကင်ဘုံတာအို သို့မဟုတ် လူသားတာအို သို့မဟုတ် တခြားတစ်ခုခု၏ အရှင်ပင် ဖြစ်နေနိုင်သည်။

သို့သော်လည်း သိုင်းတာအိုပင်မခန္ဓာကို တွေဝေရှုပ်ထွေးစေသည်မှာ အနက်ရောင်ဝတ်အမျိုးသားသည် ခေတ်အဆက်ဆက် ကောင်းကင်ဘုံဆန့်ကျင်တိုက်ပွဲများမှာ ဘယ်တုန်းကမှ ပေါ်ထွက်မလာခဲ့ပေ။

မိစ္ဆာအရှင်ဖြစ်စေ၊ ဧကရီဆိုးယုတ်ဖြစ်စေ၊ ဤလူ့အကြောင်းကို ဘယ်တုန်းကမှ ထုတ်ဖော်မပြောဆိုခဲ့ဖူးပေ။

သွေးပင်လယ်ထဲရှိ သွေးတစ်စက်သည် တမလွန်ဘုံရတနာကြေးမုံကဲ့သို့ လက်နက်တစ်ခုကို ဖန်တီးနိုင်ပြီး သူ့အပေါ်ကျဆင်းလာသည့် မဟာကပ်ဘေးကိုပင် ခုခံပေးနိုင်ခဲ့သည်။

ပတ်ဝန်းကျင်မှာရှိသော တိတ်ဆိတ်ခြောက်ကပ်နေသည့် သွေးပင်လယ်က မည်သို့ဖြစ်ပေါ်လာတာလဲ။

အလောင်းများက နေရာတစ်ဝှမ်းမှာ ပြန့်ကျဲနေ၏။ ကျိုးပဲ့နေသော လက်နက်များ ပုံထပ်နေသည့် ဤအပျက်အစီးနယ်မြေက ဘယ်နေရာကနေ ရောက်လာခဲ့တာလဲ။

အနက်ရောင်ဝတ်အမျိုးသား၏ ခွန်အားက ထူးခြားအံ့မခန်းဖြစ်ပြီး သူသည် မိစ္ဆာအရှင်နှင့် ဧကရီဆိုးယုတ်တို့ထက် မနိမ့်ကျလောက်ပေ။

လွန်ခဲ့သည့်နှစ်တစ်ထောင်က သုံးဘုံလောက၏ အဟန့်အတား ကြေမွပျက်စီးသွားစဉ် အနက်ရောင်ဝတ်အမျိုးသားသည် ဘာကြောင့် မဟာကမ္ဘာတစ်ထောင်လောကကို တက်လှမ်းမသွားတာလဲ။

အနက်ရောင်ဝတ်အမျိုးသားက သူ့ကို ဘာကြောင့်ကယ်တင်ပေးခဲ့တာလဲ။

မေးခွန်းအမျိုးမျိုးက သိုင်းတာအိုပင်မခန္ဓာ၏ စိတ်ထဲမှာ ရစ်ဝဲနေ၏။

ထိုသို့ စဉ်းစားရင်း သူ၏ ခန္ဓာကိုယ်ကို ဖြည်းဖြည်းချင်းကုသရန် ဘေးပတ်ဝန်းကျင်မှာရှိသော အမြုတေချီကို စုပ်ယူကာ သူက စိတ်ရှည်လက်ရှည် စောင့်ဆိုင်းနေ၏။

. . . . . .

ငရဲကမ္ဘာမှာ…

မူလငရဲကမ္ဘာသည် ယိုယွင်းပျက်စီးနေပြီး ပြီးပြည့်စုံမှုမရှိတော့ဘဲ ငရဲသက်ရှိများကို ဧကရာဇ်နယ်ပယ်သို့ မတက်လှမ်းနိုင်အောင် ဖြစ်စေခဲ့၏။

သို့သော်လည်း လွန်ခဲ့သည့်နှစ်တစ်ထောင်က ငရဲအရှင် ပြန်လည်ရောက်ရှိလာသောအခါ ငရဲကမ္ဘာသည် သူ့ဘာသာသူ လျင်မြန်စွာ ပြန်လည်ပြုပြင်ပြီး ပုံမှန်အခြေအနေကို ရောက်ရှိလာခဲ့ပြီဖြစ်သည်။

ငရဲကမ္ဘာ၏ ခွန်အားက မကြုံစဖူး စွမ်းအားကြီးမားလာသည်။

ဤနှစ်မှာ မှောင်မည်းနေသော အရိပ်တစ်ခုက ငရဲကမ္ဘာ၏ အစပ်ကို ဆင်းသက်ရောက်ရှိလာ၏။

ငရဲကမ္ဘာမှ ပညာရှင်များစွာက ၎င်းကို သတိမထားမိကြပေ။

ငရဲစိမ့်စမ်းကိုးခု၏ အနက်ပိုင်းထဲမှာ လှဲလျောင်းနေသော လူတစ်ယောက်ကသာ သူ၏ မျက်လုံးနှစ်ဖက်ကိုဖွင့်လိုက်ပြီး သူ့၏ ခန္ဓာကိုယ်က တဖျပ်ဖျပ်ဖြစ်လာ၏။

နောက်ခဏ၌ သူက ငရဲကမ္ဘာ၏ အထက်ကို ရောက်ရှိသွားခဲ့ပြီဖြစ်သည်။

“ဖုန့်တူ… ဘာကိစ္စရှိလို့လဲ”

ငရဲအရှင်က လေထဲရှိ မှောင်မည်းနေသော ပုံရိပ်ကိုကြည့်ပြီး မျက်ခုံးပင့်ကာ မေးလိုက်၏။

“ကျွတ်… မင်းရဲ့ခွန်အားက ဒီလောက်ထိ မြန်မြန်ဆန်ဆန် ပြန်တိုးလာခဲ့ပြီပဲ”

ဖုန့်တူက ချီးကျူးလိုက်၏။

ထိုအခိုက်အတန့်မှာ ငရဲအရှင်သည် ဧကရာဇ်နယ်ပယ်ကို ဝင်ရောက်နေပြီဖြစ်သည်။

ပုံမှန်အခြေအနေမှာ သူက ပြန်လည်ရှင်သန်မည်ဆိုလျှင်တောင် ငရဲအရှင်၏ ကျင့်ကြံမှုက ဤမျှအထိ မြန်မြန်ဆန်ဆန် တိုးတက်လာနိုင်မည်မဟုတ်ပေ။

အကြောင်းမှာ သုံးဘုံလောက အဟန့်အတားက ကြေမွပျက်စီးသွားခဲ့၏။ ၎င်းသည် တိုတောင်းသောအချိန်တစ်ခုသာ ဖြစ်ခဲ့သော်လည်း ငရဲအရှင်၏ ကျင့်ကြံမှုနယ်ပယ်က ဆပွားမြင့်တက်လာပြီး သူ၏ အထွတ်အထိပ်အခြေအနေကို ပြန်လည်ရောက်ရှိမည့်အချိန်ကလည်း ကြီးမားစွာ လျော့ကျသွားခဲ့၏။

ဖုန့်တူက ပြောလိုက်၏။

“ဒီပုံစံအတိုင်းဆို မင်းက နောက်ထပ်နှစ်တစ်ထောင်လောက်ဆို မင်းရဲ့အထွတ်အထိပ်ကို ပြန်ပြီးရောက်သွားလောက်ပြီ”

“အဲ့လောက်ပါပဲ”

ငရဲအရှင်က ခေါင်းညိတ်ပြလိုက်၏။

အခြားသူများနှင့်မတူဘဲ…

ဥပမာအားဖြင့် အလယ်အလတ်ကမ္ဘာတစ်ထောင်လောကမှ သက်ရှိများအနေဖြင့် မဟာဧကရာဇ်များဖြစ်လာဖို့ အင်မတန်ခဲယဉ်းလေသည်။ ကြားမှာ မရေမတွက်နိုင်သော အဟန့်အတားများရှိနေ၏။

သို့သော်လည်း ငရဲအရှင်အနေဖြင့် သူ၏ တာအိုကို ထပ်မံအတည်ပြုစရာ မလိုအပ်ပေ။

သူက ပြန်လည်အားဖြည့်နေသည်နှင့် သူ၏ တိုက်ခိုက်ရည်ခွန်အားက တဖြည်းဖြည်းတိုးလာပြီး သူက အလယ်အလတ်ကမ္ဘာတစ်ထောင်လောက၏ အထက်စည်းကို ရောက်ရှိလာလိမ့်မည်ဖြစ်ကာ မဟာဧကရာဇ်တစ်ပါး၏ အဆင့်ကို တက်လှမ်းလာပေလိမ့်မည်။

“မင်းက ဒီတစ်ခေါက် ငရဲကမ္ဘာမှာ ပြန်လည်မွေးဖွားဖို့ ရွေးချယ်ခဲ့တယ်… လက်စားချေဖို့အတွက်မလား”

ဖုန့်တူက မေးလိုက်၏။

ထိုအကြောင်းကို ပြောဆိုချိန်မှာ ငရဲအရှင်၏ မျက်လုံးထဲတွင် သုန်မှုန်နေသော အကြည့်တစ်ခု ဖျတ်ခနဲပေါ်ထွက်လာပြီး သူက ဖြည်းဖြည်းချင်းပြောလိုက်၏။

“ငါ့ကို အနန္တက ဒီလောက်အကြာကြီး ချုပ်နှောင်ထားခဲ့တယ်… ငါ တုံ့ပြန်မှုတစ်ခု ပေးရမှာပေါ့”

“မင်းမှာ ဘာအစီအစဉ်ရှိလဲ”

ဖုန့်တူက မေးလိုက်သည်။

“ငါ ဗုဒ္ဓဝါဒကို ဖျက်ဆီးပစ်ချင်တယ်”

“ငါ အလယ်အလတ်ကမ္ဘာတစ်ထောင်လောကမှာရှိတဲ့ ဗုဒ္ဓဝါဒနဲ့ သက်ဆိုင်တဲ့ ရှေးဟောင်းစာအုပ်တွေအားလုံးကို မီးရှို့ပြာချချင်တယ်… ဗုဒ္ဓဝါဒကို ကျင့်ကြံတဲ့ ဘယ်သက်ရှိမဆို သေရမယ်”

ထိုအကြောင်းကို ပြောဆိုချိန်မှာ ငရဲအရှင်၏ မျက်လုံးများက နီညိုရောင်အလင်းနှင့်အတူ တောက်ပလာပြီး သူက ကြမ်းကြုတ်ခက်ထန်လာပြီဖြစ်၏။

ရူးသွပ်စွာ လက်စားချေခြင်းနှင့် သွေးသံရဲရဲ အစုလိုက်အပြုံလိုက် သတ်ဖြတ်မှုများကသာ ပြီးခဲ့သည့်နှစ်များအတွင်း သူ၏ ရင်ထဲရှိ မကျေမချမ်းမှုများကို ဖွင့်ထုတ်ပေးနိုင်မည်ဖြစ်သည်။

မဟာကမ္ဘာတစ်ထောင်လောကမှာပင် သူသည် ဤကဲ့သို့သော ညှဉ်းပန်းနှိပ်စက်မှုနှင့် ဘယ်တုန်းကမှ မကြုံတွေ့ခဲ့ရပေ။

မဟာဧကရာဇ် အနန္တနှင့် ဗုဒ္ဓဝါဒနှင့် ပတ်သက်ဆက်စပ်နေသော အရာရာတိုင်းနှင့် သက်ရှိတိုင်းက ဤလောကကနေ ပျောက်ကွယ်သွားရပေမည်။

“ဟဲဟဲ”

ဖုန့်တူက ငရဲအရှင်၏ ရူးသွပ်မှုမှာ အံ့အားသင့်သွားခြင်းမရှိပေ။ သူက ရယ်ရုံသာရယ်ပြီး မေးလိုက်၏။

“မင်းက ဒီလောက်အကြာကြီး အကျဉ်းချခံထားရတယ်… ဗုဒ္ဓဝါဒကို ဖျက်ဆီးရုံနဲ့ လုံလောက်မှာလား”

“ဟမ်…”

ငရဲအရှင်က တစ်ချက်ဝေ့ကြည့်ပြီး မျက်ခုံးအနည်းငယ်ပင့်လိုက်၏။

ဖုန့်တူက ပြောလိုက်သည်။

“အရင် ကောင်းကင်ဘုံဆန့်ကျင်တိုက်ပွဲမတိုင်ခင် အလယ်အလတ်ကမ္ဘာတစ်ထောင်လောကက ကျင့်ကြံသူတစ်ယောက်က ငါ့ကိုလာရှာပြီး ငါနဲ့ပူးပေါင်းဆောင်ရွက်လိုခဲ့တယ်”

“ဟမ်… အလယ်အလတ်ကမ္ဘာတစ်ထောင်လောကက ပုရွက်ဆိတ်တစ်ကောင်ကများ… မင်းက သူ့လိုလူမျိုးနဲ့ ပူးပေါင်းဆောင်ရွက်ချင်လို့လား”

ငရဲအရှင်က အထင်အမြင်သေးစွာဖြင့် ပြုံးလိုက်၏။

“အဲ့ဒီလူရဲ့ အဆိုပြုချက်က စိတ်ဝင်စားဖို့ကောင်းတယ်”

ဖုန့်တူက ပြောလိုက်၏။

“သူ အဲ့ဒါကို အကြံပြုတဲ့အချိန်တုန်းက အဲ့ဒါက မျှော်လင့်ချက်သိပ်မရှိတဲ့ ဖြစ်နိုင်ခြေတစ်ခုပဲ… ဒါပေမယ့် လွန်ခဲ့တဲ့နှစ်တစ်ထောင်က ကောင်းကင်ဘုံဆန့်ကျင်တိုက်ပွဲရဲ့ ရလဒ်က လူတိုင်းရဲ့ ထင်မြင်ချက်ကို ကျော်လွန်သွားခဲ့တယ်”

“ကောင်းကင်ဘုံခုံရုံးက ပျက်စီးသွားရုံတင်မကဘူး… ကောင်းကင်ဘုံခုံရုံးက အရှင်တချို့က မဟာကမ္ဘာတစ်ထောင်လောကကို ပြန်သွားကြတယ်… မဟာဧကရာဇ် အထီးကျန်သိုင်းသခင်နဲ့ မဟာဧကရီ သွေးလိပ်ပြာကတောင် သေခဲ့ရတယ်… အဲ့ဒါတွေအားလုံးက သူခန့်မှန်းထားတာထက်တောင် ပိုပြီးတော့ ပြီးပြည့်စုံလာခဲ့တာပဲ”

ဖုန့်တူ၏ မျက်လုံးက ဝင်းလက်တောက်ပလာပြီး သူက သိသိသာသာ စိတ်လှုပ်ရှားတက်ကြွနေ၏။

“အဲ့ဒီလူက ဘာလိုချင်တာလဲ”

ငရဲအရှင်က မျက်မှောင်ကြုတ်ကာ မေးလိုက်သည်။

“သူက ငါနဲ့ပူးပေါင်းပြီး ကောင်းကင်ဘုံခုံရုံးကို ပြန်တည်ဆောက်ချင်တာပဲ”

ဖုန့်တူက စကားကို တစ်လုံးချင်း ပြောလိုက်သည်။