မဟာတိုက်ပွဲ

ကောင်းကင်ဘုံခုံရုံးမှာလည်း အပြောင်းအလဲတချို့ ရှိလာပုံရသည်။

အင်မော်တယ်ဧကရီလင်းလုံက အသက်ပြင်းပြင်းတစ်ချက်ရှိုက်ပြီး ဓားကမ္ဘာ၊ မဟာအရိုင်းကမ္ဘာ၊ နဂါးကမ္ဘာ၊ နီညိုရောင်မျောက်ဝံကမ္ဘာနှင့် အခြားသောကမ္ဘာများသို့ သတင်းပို့အဆောင်တချို့ကို ပို့လွှတ်လိုက်၏။

ကောင်းကင်ဘုံဆန့်ကျင်တိုက်ပွဲပြီးနောက် ဤကမ္ဘာများသည် အချိန်မရွေး ကျရောက်လာနိုင်သည့် ကပ်ဘေးများကို အတူတကွ ပူးပေါင်းကိုင်တွယ်ဖို့အတွက် ပြင်ဆင်ထားကြသည်။

အင်မော်တယ်ဧကရီလင်းလုံသည် အာကာသဥမင်ထဲသို့ ဧကရာဇ်များနှင့် ဘုရင်များပါဝင်သည့် စစ်တပ်တစ်တပ်ကို ဦးဆောင်ပြီး ကောင်းကင်ဘုံကမ္ဘာရှိရာသို့ အလောတကြီးချီတက်သွား၏။

လူအိုကြီးရွှမ်နှင့် အခြားသူများက ထျန်ဟွမ်ကမ္ဘာမှာ နေရစ်ခဲ့၏။

သူတို့သည် အခြေအနေမကောင်းတော့သည်ကို တွေ့မြင်မည်ဆိုလျှင် သူတို့၏ အမွေအနှစ်များကို ထိန်းသိမ်းစောင့်ရှောက်ရန် မဟာဧကရီတမလွန်ကိုးဘုံ ချန်ထားခဲ့သော အမွေအနှစ်ကုန်းမြေရှိရာသို့ ထျန်ဟွမ်ကမ္ဘာမှ မျိုးနွယ်စုတစ်သောင်းသက်ရှိများကို ခေါ်ဆောင်သွားရမည်ဖြစ်သည်။

တကယ်တော့ ထိုသို့ဖြစ်လာမည်ဆိုလျှင် အလယ်အလတ်ကမ္ဘာတစ်ထောင်လောကတစ်ခုလုံးက သေရေးရှင်ရေးအခြေအနေမှာ ကျရောက်နေပြီဟု ဆိုလိုလေသည်။

ထိုသည်ကား ထျန်ဟွမ်ကမ္ဘာ၏ နောက်ဆုံးထွက်ပေါက်ဖြစ်သည်။

အာကာသဥမင်ထဲမှာ…

ထျန်ဟွမ်ကမ္ဘာမှ လူတိုင်း၏ အမူအရာက သုန်မှုန်တည်တံ့နေကြ၏။

သူတို့ထဲ လူအတော်များများက ဤခရီးစဉ်ကနေ ဘယ်တော့မှ ပြန်လာနိုင်တော့မည်မဟုတ်သည်ကို လူတိုင်းက နားလည်သဘောပေါက်ထားကြပြီဖြစ်သည်။

“ဇီမို့ဆီက သတင်းတစ်ခုခု ရသေးလား”

ဖုန့်စန်းထျန်က မေးလိုက်၏။

လူတိုင်းက အကြည့်ချင်းဖလှယ်ပြီး ခေါင်းခါလိုက်ကြ၏။

ဤနှစ်များမှာ ဆူဇီမိုသည် အလယ်အလတ်ကမ္ဘာတစ်ထောင်လောကမှာ တစ်စွန်းတစ်စမကျန် အငွေ့ပျံသွားသည့်အလား ပျောက်ကွယ်သွားခဲ့သည်။

အင်မော်တယ်ဘုရင်မ လင်းလုံနှင့် လင်းရွှမ်ကျီက အတူပူးပေါင်းပြီး တွက်ချက်ခဲ့လျှင်တောင် သူတို့သည် မည်သည့်သတင်းအချက်အလက်ကိုမှ တွက်မထုတ်နိုင်ခဲ့ပေ။

မိုချင်က ညင်သာစွာ ပြောလိုက်၏။

“တကယ်ဆို သူ ပေါ်ထွက်မလာပါစေနဲ့လို့ ငါမျှော်လင့်တယ်”

မိုချင်ဆိုလိုသည့်အရာကို လူတိုင်းက နားလည်သဘောပေါက်ကြသည်။

ကောင်းကင်ဘုံဆန့်ကျင်တိုက်ပွဲသည် လွန်ခဲ့သည့် နှစ် ၂၀၀၀က ဖြစ်ပွားခဲ့သည်။ ကောင်းကင်လိုဏ်ဂူနယ်ပယ်ဘုရင်များအနေဖြင့် အချိန်ကာလက အရမ်းကို တိုတောင်းလွန်းလေသည်။

ဆူဇီမိုက ဘယ်လောက်ပင် ပါရမီအရည်အချင်းရှိသည်ဖြစ်စေ သို့မဟုတ် သူက ဘယ်လောက်ပင် ကံကောင်းသည်ဖြစ်စေ သူ့အနေဖြင့် ဧကရာဇ်နယ်ပယ်ကို တက်လှမ်းဖို့က မဖြစ်နိုင်ပေ။

ကောင်းကင်ဘုံကမ္ဘာမှာ…

တစ်ရက်မပြည့်ခင် စစ်ပွဲမီးတောက်များက ကောင်းကင်ဘုံကမ္ဘာတစ်ဝှမ်း လောင်ကျွမ်းလာခဲ့ပြီဖြစ်ပြီး သွေးမြစ်စီးကြောင်းများနှင့် အလောင်းများကို နေရာတိုင်းမှာ တွေ့မြင်နေရ၏။

ငရဲမှ အတောမသတ်နိုင်သော သက်ရှိများက ချောက်နက်ထဲကနေ ကျိုင်းကောင်အုပ်များကဲ့သို့ ထွက်ပေါ်လာပြီး သူတို့ဖြတ်သွားရာ နေရာတိုင်းမှာ ဘာမှမကျန်ရစ်ခဲ့ပေ။

သုခဘုံသန့်စင်ကုန်းမြေက အရင်ဆုံး ကျရှုံးသွားသည်။

ငရဲသက်ရှိများသည် သုခဘုံသန့်စင်ကုန်းမြေကို တိုက်ခိုက်ရာမှာ အကြမ်းကြုတ်အခက်ထန်ဆုံးဖြစ်ကြ၏။ ဗုဒ္ဓကျောင်းတော်များမှ ပညာရှင်များစွာက အတူစုစည်းမိသော်လည်း သူတို့သည် ဒီရေလှိုင်းလုံးများကဲ့သို့ တလိပ်လိပ်တိုးဝင်လာသော ကြောက်စရာကောင်းသည့် တိုက်ခိုက်မှုများကို မခုခံနိုင်ခဲ့ကြပေ။

ဗုဒ္ဓကျောင်းတော်များမှ ဧကရာဇ်တချို့ သေဆုံးသွားပြီးနောက် ဗုဒ္ဓကျောင်းတော်များ၏ ခံစစ်စည်းက အဆက်မပြတ်လဲပြိုကျပြီး မရေမတွက်နိုင်သော ဗုဒ္ဓကိုယ်တော်များက သေဆုံးသွားကြ၏။

သုခဘုံသန့်စင်ကုန်းမြေ၏ နေရာဒေသအများစုကလည်း အပျက်အစီးပုံများအဖြစ် ပြောင်းလဲသွားခဲ့သည်။

မိစ္ဆာမဟာနယ်မြေနှင့် မိုးကောင်းကင်ကိုးလွှာအင်မော်တယ်မဟာနယ်မြေကလည်း သိပ်ကြာကြာ တောင့်ခံနိုင်မည်မဟုတ်ပေ။

ထျန်ဟွမ်ကမ္ဘာမှ လူတိုင်းက ကောင်းကင်ဘုံကမ္ဘာ၏ အနီးအနားသို့ ရောက်ရှိလာသောအခါ သူတို့က အာကာသဥမင်ထဲက ထွက်လိုက်သည့်ခဏမှာပင် သာမန်အားကောင်းသော သွေးနံ့က သူတို့၏ မျက်နှာကို လာရိုက်ပြီး သူတို့ကို မွန်းကျပ်စေလုနီးပါးဖြစ်သွား၏။

ကြည့်ကြည့်သမျှနေရာတိုင်းမှာ ကျယ်ပြောသော ကြယ်တာရာကောင်းကင်ထဲတွင် ကြီးမားသော သွေးမြူခိုးများက လွင့်မျောနေ၏။ ပြတ်တောက်သွားသော ခြေလက်များနှင့် ကြေမွပျက်စီးနေသော အလောင်းပေါင်းများစွာက သွေးမြူများကြားမှာ တုန်လှုပ်စရာကောင်းသော ပုံစံဖြင့် လွင့်မျောနေ၏။

ကျင့်ကြံသူအချို့သည် သူတို့၏ မျက်နှာပေါ်မှ နက်ရှိုင်းသော အကြောက်တရားနှင့်အတူ သူတို့၏ မျက်လုံးများက ပြူးကျယ်နေကြ၏။ သူတို့က မချင့်မရဲဖြင့် သေဆုံးသွားခဲ့ကြ၏။

သူတို့၏ ကျိုးပဲ့ပျက်စီးနေသော အလောင်းများကနေ ပူနွေးသောသွေးများ စီးကျနေသည့် ကျင့်ကြံသူတချို့လည်း ရှိနေကြသည်။ သူတို့က မကြာသေးခင်ကမှ သေဆုံးထားကြသည်။

ထျန်ဟွမ်ကမ္ဘာမှ လူတိုင်းသည် ကောင်းကင်ဘုံဆန့်ကျင်တိုက်ပွဲကို တွေ့ကြုံဆင်နွှဲခဲ့ပြီး သေဆုံးခြင်းများနှင့် အသားကျနေခဲ့လျှင်တောင် သူတို့သည် တွေ့မြင်ရသော မြင်ကွင်းမှာ တုန်လှုပ်သွားကြဆဲဖြစ်သည်။

လူတိုင်းက သွေးမြူခိုးများကို ဖြတ်ကျော်ပြီး ရှေ့သို့တက်လှမ်းလာကြ၏။

သိပ်မကြာခင် သူတို့သည် ကောင်းကင်ဘုံကမ္ဘာ၏ ကြီးမားသော ကုန်းမြေတိုက်ကို တွေ့မြင်လိုက်ရ၏။

အစက အသက်ဓာတ်အားများဖြင့် ပြည့်နှက်နေခဲ့သော ထိုကမ္ဘာက ငရဲခန်းတစ်ခုအဖြစ် ပြောင်းလဲသွားခဲ့ပြီဖြစ်သည်။

ကြီးမားသော ကောင်းကင်ဘုံကမ္ဘာကို ငရဲသက်ရှိများက ဝင်ရောက်သိမ်းပိုက်ထားကြပြီဖြစ်၏။ သတ်ဖြတ်မှုများက နေရာအနှံ့ဖြစ်ပွားနေပြီး သက်ရှိများအားလုံး၏ အော်ဟစ်သံများက ကောင်းကင်ဘုံကမ္ဘာမှာ ဆူညံပွက်လောရိုက်နေ၏။

တည်ဆောက်သူသစ်ပင်ကပင် ညှိုးခြောက်သွားခဲ့သည်။

ကောင်းကင်ဘုံကမ္ဘာက ကျရှုံးသွားပြီဖြစ်သည်။

ထျန်ဟွမ်ကမ္ဘာမှ လူတိုင်း၏ အမူအရာက ပျက်ယွင်းသွားကြ၏။

ငရဲကမ္ဘာ၏ တိုက်ခိုက်မှုများသည် ကြမ်းကြုတ်ခက်ထန်လွန်းလေသည်။ တစ်ရက်မပြည့်ခင်မှာပင် သူတို့သည် ကောင်းကင်ဘုံကမ္ဘာကို သိမ်းပိုက်နိုင်ခဲ့ပြီဖြစ်ပြီး မည်သူ့ကိုမှ အသက်ရှင်ခွင့်မပေးပေ။

“အောမီတောဖော”

မင်းကျန်က သူ၏ လက်ဖဝါးနှစ်ဖက်ကို ပူးကပ်ပြီး မျက်လွှာချကာ သနားကရုဏာသက်နေသော အမူအရာဖြင့် တီးတိုးရေရွတ်လိုက်၏။

အင်မော်တယ်ဘုရင်ကျိရွှမ်က ထိုသည်ကို တွေ့မြင်သောအခါ သူက ကြောက်ရွံ့မှုကို ခံစားနေရ၏။

ကောင်းကင်ဘုံဆန့်ကျင်တိုက်ပွဲအပြီးမှာ ယွင်ကျူး၏ ဖျောင်းဖျမှုဖြင့် သူသည် ကျိရွှမ်အင်မော်တယ်နိုင်ငံကို ထျန်ဟွမ်ကမ္ဘာသို့ ရွှေ့ပြောင်းခဲ့ပြီး သူ့လက်အောက်မှ ကျင့်ကြံသူထက်ဝက်ကျော်က သူ့နောက်ကိုလိုက်ဖို့ ရွေးချယ်ခဲ့ကြသည်။

သို့သော်လည်း သူတို့၏ ဇာတိမြေကို မစွန့်ခွာလိုဘဲ ဂမ္ဘီရမိုးကောင်းကင်အင်မော်တယ်မဟာနယ်မြေမှာ နေထိုင်ဖို့ ရွေးချယ်ခဲ့သည့် လူများလည်း ရှိနေခဲ့၏။

ယခုအချိန်မှာ ဤလူများသည် ဂမ္ဘီရမိုးကောင်းကင်အင်မော်တယ်မဟာနယ်မြေမှာ အမည်မဲ့အလောင်းများအဖြစ် ပြောင်းလဲသွားခဲ့ကြပြီဖြစ်သည်။

သူသည် ယွင်ကျူး၏ အကြံပြုချက်ကို နားမထောင်ခဲ့လျှင် သူသည်လည်းပဲ သူ၏ ကျိရွှမ်အင်မော်တယ်နိုင်ငံနှင့်အတူ ဂမ္ဘီရမိုးကောင်းကင်အင်မော်တယ်မဟာနယ်မြေမှာ မြှုပ်နှံခံထားရလောက်ပြီဖြစ်သည်။

အင်မော်တယ်ဧကရီ လင်းလုံ၊ မိုချင်၊ ယွင်ကျူးနှင့် အခြားသူများမှာ တွေဝေရှုပ်ထွေးသော အမူအရာများ ရှိနေပြီး လက်ရှိကောင်းကင်ဘုံကမ္ဘာကို ကြည့်နေကြ၏။

မည်သို့ပင်ဆိုစေ သူတို့သည် ကောင်းကင်ဘုံကမ္ဘာကနေ လာခဲ့ကြ၏။ ကောင်းကင်ဘုံကမ္ဘာက ဤကဲ့သို့သောအခြေအနေမှာ ကျဆင်းသွားသည်ကို တွေ့ရသောအခါ သူတို့သည် စိတ်ထိခိုက်ခံစားနေရပြီး သနားကရုဏာသက်နေကြ၏။

အင်မော်တယ်ဧကရီလင်းလုံ၏ မျက်လုံးထဲရှိ ဝမ်းနည်းမှုက ပိုမိုနက်ရှိုင်းလာ၏။

သူမ၏ အတိတ်ကာလက လူက မရှိတော့ဘဲ ယခု သူတို့နေထိုင်ခဲ့ဖူးသည့်နေရာကပင် ပျောက်ဆုံးသွားပြီဖြစ်သည်။

“သူတို့ကို ကယ်ကြ”

ဖုန့်စန်းထျန်က ဟိန်းဟောက်လိုက်ပြီး အောက်ဘက်ရှိ ငရဲစစ်တပ်ရှိရာသို့ ချက်ချင်းပြေးဝင်သွား၏။

“သတ်”

ထျန်ဟွမ်ကမ္ဘာမှ လူတိုင်းကလည်း ထပ်ကြပ်မကွာ လိုက်ပါလာကြ၏။

ဘုန်း…

ကြီးမားတုတ်ခိုင်သော တဖျတ်ဖျတ်တလက်လက် မိုးကြိုးလျှပ်စီးကြောင်းတစ်ခုက ကောင်းကင်ထက်ကနေ ဆင်းသက်ပြီး ငရဲသက်ရှိကြီးများစွာကြားထဲသို့ ဆင်းသက်ကာ နေရာတစ်ခုကို ဘာမှမကျန်အောင် ဖောက်ခွဲပစ်လိုက်၏။

ချက်ချင်းပင် အနည်းဆုံး ငရဲသက်ရှိရာချီကာ နေရာမှာတင် သေဆုံးသွားကြ၏။

ဧရာမမိုးကြိုးလျှပ်စီးများဖြင့် တဖျပ်ဖျပ်လက်နေသော ဧရာမလှံတစ်လက်က မြေကြီးထဲသို့ နက်ရှိုင်းစွာ နစ်ဝင်သွား၏။ သိပ်သည်းပြင်းထန်သော စွမ်းအားက ဖြန့်ကြက်သွားပြီး လှံဖျားက အဆက်မပြတ် တုန်ခါနေဆဲဖြစ်သည်။

“နတ်ဆိုးနှိမ်နင်းလှံ”

“မိစ္ဆာဘုရင် ကောင်းကင်ဘုံအမျက်ဒေါသ ဒီကိုရောက်လာပြီ”

မိစ္ဆာမဟာနယ်မြေမှလူများက အော်ဟစ်လိုက်ကြပြီး သူတို့၏ စိတ်အားညှိုးငယ်နေသော မျက်လုံးများထဲမှာ မျှော်လင့်ချက်တစ်စွန်းတစ်စကို ပြန်လည်ရရှိလိုက်၏။

ဖုန့်စန်းထျန်က ကောင်းကင်ထက်ကနေ ဆင်းသက်လာသည်။

စောစောက တိုက်ခိုက်မှုသည် ငရဲမှ အခြားသောသက်ရှိများကို ကြောက်ရွံ့မသွားစေပေ။

ထိုအစား ၎င်းသည် ငရဲမှ ပိုမိုများပြားသော ပညာရှင်များ၏ စိတ်အာရုံကို ဆွဲဆောင်မိသွား၏။ ဧကရာဇ်တစ်ပိုင်းနှစ်ဦးက ချက်ချင်းပင် ဆင်းသက်လာပြီး တမလွန်ဘုရင်ရှစ်ဦးက ဖုန့်စန်းထျန်ကို ဝိုင်းပတ်လိုက်၏။

“ဟမ့်…”

ဖုန့်စန်းထျန်၏ အကြည့်က မိုးကြိုးလျှပ်စီးကဲ့သို့ ဝင်းဝင်းလက်နေ၏။ ငရဲဧကရာဇ်တစ်ပိုင်းတစ်ဦးက သူ့နှင့်အကြည့်ချင်းဖလှယ်ပြီးနောက် သူ၏ မျက်လုံးထဲမှာ စူးရှသော နာကျင်မှုတစ်ခုကို ခံစားရကာ ညည်းတွားအော်ဟစ်လိုက်ရ၏။

ကံကောင်းထောက်မစွာဖြင့် သူ၏ နှာရောင်ပေါ်မှ တမလွန်မှော်စာလုံးသည် ညိုမှောင်နေသော အလင်းရောင်တစ်ခုနှင့်အတူ တောက်ပလာပြီး သူ၏ အသိစိတ်ကို ချက်ချင်းပြန်လည်ရရှိလာစေ၏။

သို့သော်လည်း တဒင်္ဂငေးငိုင်မှုက သူ့အသက်ကို ဆုံးရှုံးသွားရစေဖို့ လုံလောက်သည်။

သူ တုံ့ပြန်လိုက်သည့်အချိန်မှာ လျှပ်စီးရောင်ဖြင့် ကျိန်းစပ်စွာ တောက်ပနေသော လှံဖျားက သူ၏ မြင်ကွင်းထဲမှာ လျင်မြန်စွာ ကြီးမားလာပြီး ချဉ်းကပ်လာခဲ့ပြီဖြစ်သည်။

သူက သူ၏ ကောင်းကင်လိုဏ်ဂူကို မမြှောက်တင်နိုင်ခင် ငရဲဧကရာဇ်တစ်ပိုင်း၏ နှာရောင်က ဖုန့်စန်းထျန်၏ လှံဖြင့် ထိုးဖောက်ခံလိုက်ရပြီး နေရာမှာတင် သေဆုံးသွားသည်။ အခြားသော ငရဲဧကရာဇ်တစ်ပိုင်းနှင့် တမလွန်ဘုရင်ရှစ်ဦးက သူ့ကို ဝိုင်းပတ်ထားပြီဖြစ်သည်။ သူတို့သည် သူတို့၏ ကောင်းကင်လိုဏ်ဂူများကို မြှောက်တင်ပြီး သူတို့၏ မျိုးဆက်သွေးကို ထုတ်ဖော်ကာ ဖုန့်စန်းထျန်နှင့် အသေအကြေတိုက်ခိုက်ဖို့ ပြင်းထန်ကြမ်းတမ်းသော တိုက်ခိုက်မှုများကို ထုတ်ဖော်လိုက်ကြ၏။

မင်းကျန် ပေါ်ထွက်လာသည့်ခဏမှာပင် သူ မတိုက်ခိုက်ရသေးခင် ငရဲမှသက်ရှိများစွာက သူ့ကိုမြင်သောအခါ အလွန်တရာ စိတ်လှုပ်ရှားတက်ကြွလာပြီး သူ့ရှိရာသို့ ပြေးဝင်လာကြ၏။

ဗုဒ္ဓဝါဒကို ဖျက်ဆီးပစ်ရမည်။

ဗုဒ္ဓဝါဒဓမ္မတာအိုကို ကျင့်ကြံသော သက်ရှိများအပါအဝင် ဗုဒ္ဓကျောင်းတော်များ၏ အငွေ့အသက်များအားလုံးကို ဖျောက်ဖျက်ပစ်ရပေမည်။

ဤသည်ကား ငရဲအရှင်ထံမှ အမိန့်ဖြစ်၏။

ရှေ့သို့ပြေးဝင်လာသော ငရဲသက်ရှိများကို မင်းကျန်က တားဆီးလိုက်၏။

သူသည် ကောင်းကင်လိုဏ်ဂူနယ်ပယ်သို့ ဝင်ရောက်ခါစဖြစ်သော်လည်း သူသည် ဗုဒ္ဓကျောင်းတော်များမှ ထိပ်သီးပညာရှင်နှစ်ဦး.. ကမ္ဘာ့ကွန်ခြာနှင့် အာနန္ဒာ၏ ဓမ္မတာအိုအမွေအနှစ်များကို ဆက်ခံရရှိထား၏။ သူ၏ ဓမ္မတာအိုက လေးနက်သိမ်မွေ့ပြီး သူ၏ တိုက်ခိုက်ရည်ခွန်အားက အဆင့်တူများကြားမှာ များစွာသာလွန်နေ၏။

အန္တိမဘုရင်များနှင့် ရင်ဆိုင်ရလျှင်ပင် သူက တိုက်ခိုက်နိုင်သည်။

သို့သော်လည်း မင်းကျန်ထံသို့ ပြေးဝင်လာသော ငရဲသက်ရှိများက ပို၍ပို၍ များပြားလာနေ၏။ မင်းကျန်၏ ဗုဒ္ဓဓမ္မတာအိုက ဘယ်လောက်ပင် အဆင့်မြင့်သည်ဖြစ်စေ သို့မဟုတ် သူ၏ တိုက်ခိုက်ရည်ခွန်အားက ဘယ်လောက်ပင် သန်မာသည်ဖြစ်စေ သူက တစ်ယောက်တည်း တောင့်ခံမထားနိုင်ပေ။

မင်းကျန်ဘက်မှ အန္တရာယ်ကို သတိထားမိသွားပြီး ယန်ပေးချန်၊ နတ်ဆိုးမကျိ၊ ဒုံမင်းမိစ္ဆာနှင့် ပုလွေမိစ္ဆာတို့က ပြေးဝင်လာပြီး မင်းကျန်ကို ကာကွယ်ပေးလိုက်ကြ၏။

ယွင်ကျူး၊ မိုချင်နှင့် အခြားသူများက မိုးကောင်းကင်ကိုးလွှာအင်မော်တယ်မဟာနယ်မြေ၏ တိုက်ပွဲနယ်မြေသို့ ဆင်းသက်ပြီး အင်မော်တယ်မဟာနယ်မြေကျင့်ကြံသူများနှင့် အပြစ်မဲ့သက်ရှိများကို ကယ်တင်ရန် အတတ်နိုင်ဆုံး ကြိုးစားလိုက်ကြ၏။

မျောက်၊ ညဝိညာဉ်၊ ကျား၊ ချင်ချင်၊ မြေခွေးလေးနှင့် ရွှေခြင်္သေ့တို့က အတူပူးပေါင်းပြီး ငရဲစစ်တပ်ကြားထဲ ဝင်ရောက်ကာ တိုက်ခိုက်သတ်ဖြတ်နေ၏။

ယက္ခဘုရင်အကြောက်တရားနှင့် အင်မော်တယ်ဧကရီလင်းလုံကဲ့သို့ ထျန်ဟွမ်ကမ္ဘာမှ ဧကရာဇ်များကတော့ ငရဲကမ္ဘာမှ ဧကရာဇ်ပညာရှင်များနှင့် တိုက်ခိုက်နေကြသည်။