ရည်မှန်းချက်

နောက်ဆုံးအဖွဲ့မှာ ဂျာမနီဖြစ်ပြီး သူတို့၏ ခွန်အားကလည်း အနည်းဆုံး ဖြစ်သည်။ မူလ စိတ်ဝိညာဉ် အလယ်အလတ်အဆင့် သုံးယောက် ပါပြီး နှစ်ယောက်က မူလ စိတ်ဝိညာဉ် စဦးအဆင့်သာ ရှိသည်။

“ပြိုင်ပွဲဝင် အယောက် လေးဆယ် ရှိပြီးတော့ သူတို့ တစ်ယောက်ချင်းစီက ထူးချွန်တဲ့ ပါရမီကို ပိုင်ဆိုင်ထားကြသည်။ မဝေးတော့တဲ့ အနာဂတ်မှာ သူတို့က ကမ္ဘာကြီးရဲ့ အရေးပါတဲ့လူတွေ သေချာပေါက် ဖြစ်လာလိမ့်မယ်လို့ ကျုပ် ယုံကြည်ပါတယ်”

ဝူထျန်းပေါင်က သူတို့ကို ချီးကျူးလိုက်သည်။ ယင်းက သူ၏ စိတ်ရင်းအမှန်အတိုင်း ပြောလိုက်ခြင်း ဖြစ်သည်။

နိုင်ငံတကာ သိုင်းပညာ တံခွန်စိုက် ပြိုင်ပွဲတွင် ပါဝင်နိုင်သည့် သူများသည် အနာဂတ်၌ အနည်းဆုံး မူလ စိတ်ဝိညာဉ် အထွတ်အထိပ်အဆင့် ဖြစ်နိုင်ပေသည်။ သူတို့ ဘုရင်အဆင့်သို့ ရောက်နိုင်သည့် အခွင့်အရေးက သုံးဆယ် ရာခိုင်နှုန်း ရှိပြီး တစ်ယောက် သို့မဟုတ် နှစ်ယောက်လောက်က အထွတ်အထိပ် ဘုရင်အဆင့်သို့ပင် ရောက်နိုင်လောက်သည်။

သူတော်စင်အဆင့်အောက်၌ အသန်မာဆုံး ဖြစ်သော အထွတ်အထိပ် ဘုရင်အဆင့် သိုင်းပညာရှင်များကလည်း အလွန်အမင်း ရှားပါးသည်။

ရှစ်နိုင်ငံထဲ၌ စင်ပေါ်တွင် အထွတ်အထိပ် ဘုရင်အဆင့် ပညာရှင်က ငါးယောက်သာ ရှိသည်။ ယင်းက ငါးနိုင်ငံတွင်သာ အထွတ်အထိပ် ဘုရင်အဆင့် ပညာရှင်များ ရှိကြောင်း သက်သေ ပြနေ၏။ ၎င်းက ထိုအဆင့် မည်မျှ ရှားပါးကြောင်း သက်သေ ပြနေ၏။

“နောက်တစ်ခုကတော့ နိုင်ငံ ရှစ်နိုင်ငံစီတိုင်းက ကိုယ်စားလှယ်တစ်ဦးစီကို စေလွှတ်ဖို့ ဖိတ်ခေါ်ပါတယ်”

ဝူထျန်းပေါင်က ပြုံးပြီး ပြောသည်။

“မနက်ဖြန်က ပထမဆုံးပွဲ ဖြစ်ပါတယ်၊ အဲဒီနေ့မှာ ပြိုင်ပွဲ လေးပွဲ ကျင်းပမှာဖြစ်ပြီး အဖွဲ့တွေကို အနိုင်ရသူနဲ့ ရှုံးနိမ့်သူအဖြစ် ခွဲခြားပါမယ်။ အခု နိုင်ငံတိုင်းရဲ့ ပြိုင်ဘက်ကို ရွေးချယ်ဖို့ မဲနှိုက်မယ့် အချိန်ရောက်ပါပြီ”

လူတိုင်း၏ မျက်နှာအမူအရာများ တင်းမာသွားသည်။ ဤအပိုင်းကို အရေးအကြီးဆုံးအပိုင်းဟု သတ်မှတ်နိုင်သည်။

ရဲ့လင်းချန်၏ အဖွဲ့မှ မည်သူမှ စကားမပြောပေ။ မဲနှိုက်ခြင်းသာ ဖြစ်သော်လည်း သူတို့ ခံရမည့် ဖိအားသည်လည်း ကြီးမားသည်။ ပြိုင်ဘက်သည် အနိုင်ရခြင်း သို့မဟုတ် ရှုံးနိမ့်ခြင်းအတွက် အရေးအကြီးဆုံး အချက်ဖြစ်သည်။

“ရဲ့လင်းချန်၊ မင်း အငယ်ဆုံးပဲ။ မင်း တက်ပြီး မဲနှိုက်လိုက်”

စွန်းဟုန်ထောင်က ပြောလိုက်သည်။ ရဲ့လင်းချန်က ခေါင်းညိတ်ပြီး စင်မြင့်ပေါ်သို့ လျှောက်သွားသည်။ လူတိုင်း ငြိမ်သက်စွာ ရပ်နေကြသည်။

ဝူထျန်းပေါင်က ကျယ်လောင်စွာ ပြောသည်။

“ကဲ၊ အခု စင်မြင့်ပေါ်က ဒိုင်လူကြီး ငါးဦးကို လူတိုင်းအတွက် မဲနှိုက်ခြင်းကို ဦးဆောင်ပေးဖို့ ဖိတ်ခေါ်ပါတယ်”

အထွတ်အထိပ် ဘုရင်အဆင့် ဒိုင်လူကြီး ငါးဦးသည် အပြည့်အဝ တရားမျှတမှုကို ကိုယ်စားပြုသည်။ အထွတ်အထိပ် ဘုရင်အဆင့် သိုင်းပညာရှင်များ၏ ရှေ့တွင် မည်သူမှ ဘာမှလုပ်၍ မရနိုင်ပေ။

စင်မြင့်အောက်တွင် ပြိုင်ပွဲဝင်များဖြစ်စေ၊ အဖွဲ့ခေါင်းဆောင်များ ဖြစ်စေ၊ သူတို့၏ စိတ်ခံစားမှု မြင့်တက် လာကြသည်။

“ငါတို့ ဂျာမနီကို ရဖို့ လိုအပ်တယ်”

ကျင့်ရှန်က မနေနိုင်ဘဲ ဆုတောင်းမိလိုက်သည်။

ဂျာမနီသည် ယခင် ပြိုင်ပွဲတွင် နောက်ဆုံးအဆင့်နေရာတွင် ရှိခဲ့ပြီး သူတို့တွင် ထူးခြားသော နည်းစနစ်များ မရှိပေ။ သူတို့သည် မြင်ကွင်းပေါ်တွင် အပျော့ဆုံး ပစ်မှတ် ဖြစ်ပြီး အခက်အခဲကလည်း အနိမ့်ဆုံး ဖြစ်သည်။

ပထမပွဲမှာတင် ခွန်အားကြီးသော ပြိုင်ဘက်ကို မဲပေါက်ခဲ့ပါက အလွန် ဆိုးရွားသော ကိစ္စ ဖြစ်ပေလိမ့်မည်။ အကြောင်းမှာ ပြိုင်ပွဲသည် အလှည့်ကျ စနစ် ဖြစ်နေ၍ပင်။ ပထမပွဲတွင် အလွန် ပင်ပန်းနွမ်းနယ်ခဲ့လျှင် သို့မဟုတ် ဒဏ်ရာရခဲ့လျှင် ဒုတိယပွဲ၌ ချက်ချင်း အားနည်းချက် ဖြစ်သွားလိမ့်မည်။ ထိုသို့ ဆက်ဖြစ်နေခဲ့ပါက အဆင့်ကောင်းကို ရရှိရန် ခက်ခဲပေလိမ့်မည်။

ကျင့်ရှန်သာမက တခြားနိုင်ငံက လူများကလည်း ဆုတောင်းနေကြသည်။

ပထမပွဲတွင် မည်သို့သော ပြိုင်ဘက်နှင့် ကြုံတွေ့ပါစေ၊ ၎င်းက ကျန်ပြိုင်ပွဲများအပေါ် ကြီးမားသော သက်ရောက်မှု ရှိလာမည် ဖြစ်သည်။

ခွန်အားကြီးသူ နှစ်ဦး တိုက်ခိုက်ခြင်းတွင် ဖြစ်နိုင်ခြေ အများဆုံးမှာ နှစ်ဖက်စလုံး ဒဏ်ရာရခြင်းဖြစ်ပြီး ယင်းက သူတို့နောက်မှ လူများကို အကျိုးပြုစေမည် ဖြစ်သည်။

ရဲ့လင်းချန်နှင့် ကျန်ပြိုင်ပွဲဝင် ခုနစ်ဦးသည် စင်မြင့်ပေါ်တွင် ရပ်နေကြသည်။ သူတို့ရှေ့တွင် မဲရှစ်ခု ပါဝင်သော ကြည်လင်သည့် သေတ္တာတစ်ခု ရှိသည်။

တစ်စုံတစ်ဦးက ရယ်မောပြီး ပြောသည်။

“ဒီရှည်လျားတဲ့ မဲရှစ်ခုမှာ တစ်ကနေ‌ လေးအထိ နံပါတ်မှတ်ထားတယ်၊ နံပါတ်တူသူတွေက ပြိုင်ဘက်တွေ ဖြစ်ပြီး ထွက်ပေါ်လာမယ့် အစီအစဉ်လည်း ဖြစ်တယ်။ မင်းတို့ ကိုယ့်ဘာသာ ရွေးချယ်နိုင်ပါတယ်”

ရဲ့လင်းချန် ပေါ့ပေါ့ပါးပါး လျှောက်သွားပြီး မဲတစ်မဲကို တည်ငြိမ်စွာ ယူလိုက်သည်။

ကျန်လူ ခုနစ်ဦးကလည်း မဆိုင်းမတွဘဲ တစ်ယောက်ချင်းစီက တစ်မဲစီ နှိုက်ယူလိုက်ကြသည်။

ပရိသတ်များ ချက်ချင်း တိတ်ဆိတ်သွားပြီး လူတိုင်း ပထမအကြိမ် တိုက်ပွဲကို မျှော်လင့်နေကြသည်။

...

“ကိုရီးယားနိုင်ငံ၊ ကိုရီးယားနိုင်ငံ”

လူတိုင်း တိတ်တဆိတ် မဲဖွင့်နေချိန်တွင် ရဲ့လင်းချန် ရေရွတ်နေသည်ကို ကြားလိုက်ရသည်။

ထိုအပြုအမူက ကိုရီးယားနိုင်ငံက လူတွေ၏ မျက်နှာကို မည်းမှောင်သွားစေသည်။ သူတို့က ရဲ့လင်းချန်ကို ပို၍ပင် မုန်းတီးစွာ စိုက်ကြည့်နေကြသည်။

ရဲ့လင်းချန်၏ လုပ်ရပ်က အလွန် မောက်မာလွန်းလှသည်။

*အောင်ပွဲက သူ့လက်ထဲမှာမို့လို့ သူက ငါတို့ကို အထင်သေးနေတာလား*

ခပ်ပါးပါး ရယ်သံတစ်ခုကို ကြားလိုက်ရသည်။ ကျွမ်းကျင်သော အင်္ဂလိပ်ဘာသာစကားဖြင့် ပြောလာသံကိုပါ ကြားလိုက်ရလေသည်။

“တရုတ်က ရဲ့လင်းချန်၊ ပထမပွဲမှာ မင်းနဲ့ တိုက်ခိုက်ချင်တယ်”

သူသည် ရဲ့လင်းချန်မှလွဲ၍ အငယ်ဆုံး ပါဝင်ယှဉ်ပြိုင်သူ ဖြစ်သည့် အသက်နှစ်ဆယ့်တစ်နှစ်အရွယ် ကယ်လ်ဗင် ဖြစ်သည်။

“ကိစ္စမရှိပါဘူး။ မင်း မျက်နှာပျက်ရမှာကို မကြောက်ဘူးဆိုရင် ပြီးခဲ့တဲ့နှစ်က ချန်ပီယံက ဒီနှစ် ပထမပွဲမှာတင် ရှုံးလိမ့်မယ်”

ရဲ့လင်းချန်က ပခုံးတွန့်ပြီး ပေါ့ပေါ့ပါးပါး ပြောလိုက်သည်။

ကယ်လင်ဗင်က စိတ်မဆိုးပေ။ သူက ဆက်ပြောလာသည်။

“နိုင်ငံတကာ သိုင်းပညာ တံခွန်စိုက် ပြိုင်ပွဲမှာ ငါတို့က အမြဲတမ်း နံပါတ်တစ် ဖြစ်ခဲ့ပြီး တစ်ခါမှ မရှုံးခဲ့ဘူး။ မင်းက အရမ်း မာနကြီးတယ်။ ငါ မကြိုက်ဘူး”

ရဲ့လင်းချန်က ရယ်သည်။

“ငါရောပဲ”

သူ ပြောနေချိန်မှာပင် ဝူထျန်းပေါင်က ပါးစပ်ဟလာပြီး သူ၏ အသံကို လူတိုင်း ကြားလိုက်ရသည်။

“ပထမပွဲ၊ အိန္ဒိယနဲ့ အင်္ဂလန်”

“ဒုတိယပွဲ၊ ရှေးဟောင်း ဂရိနဲ့ ဂျပန်နိုင်ငံ”

“တတိယပွဲ၊ တရုတ်နိုင်ငံနဲ့ ကိုရီးယားနိုင်ငံ”

“စတုတ္ထပွဲ၊ အမေရိကန်နဲ့ ဂျာမနီနိုင်ငံ”

“မနက်ဖြန် မနက် ၈ နာရီတိတိမှာ နိုင်ငံတကာ သိုင်းပညာ တံခွန်စိုက်ပြိုင်ပွဲကို တရားဝင် စတင်ပါမယ်”

သိုင်းပညာရှင်များသည် လုပ်ထုံးလုပ်နည်းများကို လိုက်နာလိုခြင်းမရှိပေ။ ဖွင့်ပွဲအခမ်းအနား၏ လုပ်ငန်းစဉ်သည် အလွန် ရိုးရှင်းသော်လည်း စုစုပေါင်း တစ်နာရီခွဲကြာခဲ့သည်။ နောက်ဆုံးတွင် နိဂုံးချုပ် စကားအနည်းငယ် ပြောကြားပြီးနောက် ပြီးဆုံးသွားသည်။

...

“ဟဲဟဲ၊ ရဲ့လင်းချန်၊ မင်းရဲ့ ဆန္ဒ ပြည့်ဝသွားပြီ”

ကင်ဂျယ်ဆော့က ရဲ့လင်းချန်ကို အေးစက်စွာ ပြုံးသည်။

“မင်း သေချာပေါက် နောင်တရလိမ့်မယ်”

“ဟားဟားဟား၊ အောက်ဆုံးကနေရေမှ ဒုတိယပဲ ရှိတာကို ဘယ်လိုများ ဒီလို သိက္ခာမဲ့တဲ့ စကားတွေ ပြောရဲတာလဲ၊ ငါ ရယ်ရလွန်းလို့ သေတော့မယ်”

ကျင့်ရှန်က အလွန်အမင်း သရော်ဟန်ဖြင့် ရယ်သည်။

ကိုရီးယားနိုင်ငံက လူများက အေးစက်စွာ နှာမှုတ်ပြီး ထွက်ခွာသွားကြသည်။

ထို့နောက် လူတိုင်း၏ အာရုံစိုက်မှုသည် သဘာဝအတိုင်း သူတို့၏ ပြိုင်ဘက်များထံ ရောက်ရှိသွားပြီး မဲနှိုက်ခြင်းနှင့် ပတ်သက်၍ ဆွေးနွေးမှုများစွာ ရှိခဲ့သည်။

အမေရိကန်သည် ဂျာမနီနှင့် တကယ်တမ်း မဲပေါက်သွားခြင်းက လူတိုင်းကို စိတ်ထဲမှာ ကျိန်ဆဲစေပြီး တစ်ချိန်တည်းမှာပင် မနာလိုမှု၊ ဝန်တိုမှုနှင့် မကျေနပ်မှုများ ဖြစ်ပေါ်စေသည်။

ပထမနေရာနှင့် နောက်ဆုံးနေရာ ထိပ်တိုက်တွေ့ဆုံခြင်း၊ ရလဒ်ကို သံသယဖြစ်စရာမရှိပေ။ ထို့အပြင် အမေရိကန်သည် သူတို့၏ ခွန်အားကို အပြည့်အဝ ထိန်းသိမ်းထားနိုင်မည် ဖြစ်သည်။

ရဲ့လင်းချန်၏ဘက်မှ လူတိုင်းသည်လည်း သက်ပြင်း အနည်းငယ် ချလိုက်ကြသည်။

ကိုရီးယားနိုင်ငံသည် အောက်ဆုံးမှ ဒုတိယသာ ရှိသည်။ သူတို့သည် အင်အားကြီးနိုင်ခြေ မရှိပေ။ ထို့အပြင် သူတို့သည် အစကတည်းက ရန်ငြိုး ရှိခဲ့သောကြောင့် သူတို့ကို သင်ခန်းစာပေးမည့် အခွင့်အရေးကို ကြိုဆိုကြသည်။

လင်းရှီက ခွဲခြမ်းစိတ်ဖြာသည်။

“ကိုရီးယားနိုင်ငံမှာ အစွမ်းထက်ဆုံး လူသုံးယောက်က ဘုရင်အဆင့် သိုင်းပညာရှင်သုံးဦးရဲ့ နောက်ဆုံးတပည့်တွေ ဖြစ်ကြတယ်။ သူတို့အားလုံး ကင်ဂျယ်ဆော့ရဲ့ အဆင့်အတန်းမှာ ရှိတယ်။ ဒါပေမဲ့ သူတို့ရဲ့ အရင်းအမြစ်တွေနဲ့ဆိုရင် မူလစိတ်ဝိညာဉ် အလယ်အလတ်အဆင့် သိုင်းပညာရှင် နှစ်ဦးကို လေ့ကျင့်ပေးဖို့ ခက်ခဲလိမ့်မယ်။ ငါတို့ မူလစိတ်ဝိညာဉ် အလယ်အလတ်အဆင့် သိုင်းပညာရှင် ငါးဦးက ခွန်အားမှာ သိသိသာသာ သာလွန်နေတယ်။ ငါတို့ တည်ငြိမ်ပြီး မယုတ်မလွန်ကျတဲ့ တိုက်ခိုက်မှုနဲ့ အနိုင်ရနိုင်တယ်”

“ဟိုလူတွေက သိပ် အင်အားမကြီးဘူး။ သူတို့က တော်တော် မာနကြီးတယ်။ မသိတဲ့လူတွေဆိုရင် သူတို့ကို တကယ် အစွမ်းထက်တယ်လို့ ထင်လိမ့်မယ်”

ကျင့်ရှန်က ရယ်မောပြီး ပြောသည်။

ထိုအချိန်မှာပင် စွန်းဟုန်ထောင်က အသံတိုးတိုးနှင့် ပြောသည်။

“ပေါ့ဆမနေကြနဲ့! ဒီနှစ် ကိုရီးယားနိုင်ငံက နည်းနည်း ထူးခြားတယ်။ သူတို့ ယုံကြည်မှု လွန်ကဲနေတယ်။ သူတို့မှာ လျှို့ဝှက်ချက်တချို့ ရှိနေတာ ထင်ရှားတယ်”

“သူတို့အားလုံး မူလစိတ်ဝိညာဉ် အလယ်အလတ်အဆင့်မှာ ရှိနေကြတယ်”

ရဲ့လင်းချန်က ရုတ်တရက် ပြောလိုက်သည်။

“ဘာ”

လူတိုင်း ထိတ်လန့်သွားကြသည်။

စွန်းဟုန်ထောင်လည်း မယုံနိုင်သော မျက်လုံးများနှင့် ရဲ့လင်းချန်ကို မေးလိုက်သည်။

“မင်း ဘယ်လို သိတာလဲ”

ရဲ့လင်းချန်၏ အမူအရာက မပြောင်းလဲဘဲ ပြောင်းလိုက်သည်။

“ကျွန်တော့်ရဲ့ အာရုံခံစားမှုက တော်တော် ထက်တယ်။ လူတစ်ယောက်ရဲ့ ခွန်အားကို အကြမ်းဖျင်းလောက် ခန့်မှန်းနိုင်တယ်၊ သူတို့ တကယ်ကို မူလစိတ်ဝိညာဉ် အလယ်အလတ်အဆင့်မှာ ရှိနေကြတယ်”

ကိုရီးယားနိုင်ငံ၏ ခွန်အားကို သူ မမြင်နိုင်ခဲ့ပါက လူတိုင်း ပေါ့ဆမှုကြောင့် ကြီးမားသော ဆုံးရှုံးမှုကို ခံစားရမှာ ဖြစ်သည်။

“ဒါဆိုရင် ခက်သွားပြီ”

စွန်းဟုန်ထောင် အလွန်အမင်း မျက်မှောင်ကြုတ်သွားပြီး သူ၏ မျက်လုံးများတွင် စိုးရိမ်ပူပန်သော အရိပ်အယောင်တစ်ခု ရှိနေသည်။

“သူတို့ ဒီတစ်ခါ ကြိုတင်ပြင်ဆင်လာခဲ့ကြတာ၊ ကမ္ဘာကို အံ့အားသင့်အောင် လုပ်ဖို့ အသင့်ဖြစ်နေပြီ”

“ပြီးခဲ့တဲ့နှစ်က သူတို့ရဲ့ နောက်ဆုံးတပည့်က ခွန်အား မပြည့်စုံလို့ မပါခဲ့ဘူး၊ ဒီနှစ်မှာတော့ သူ ပါဝင်လာရုံမကဘဲ ကုန်ကျစရိတ် ဘယ်လောက်ပဲ ရှိရှိ မူလစိတ်ဝိညာဉ် အလယ်အလတ်အဆင့် သိုင်းပညာရှင် နှစ်ယောက်ကို ပြိုင်ပွဲမှာ ပါဝင်ဖို့ ရွေးချယ်ခဲ့တယ်။ သူတို့ရဲ့ ခွန်အားက ပြီးခဲ့တဲ့နှစ်နဲ့ လုံးဝ မတူတော့ဘူး။ သူက သေချာပေါက် အစွမ်းထက်တဲ့ ပြိုင်ဘက်ပဲ”

ကိုရီးယားနိုင်ငံသည် အချိန်ကြာမြင့်စွာ သည်းခံထားခဲ့ပြီး အခွင့်ကောင်းကို စောင့်ဆိုင်းနေခဲ့သည်။

ယခုအကြိမ်၌ သူတို့သည် လီဆောင်းယွန်း၏ အရှက်ရမှုကို လက်စားချေချင်ရုံသာမက သူတို့၏ အဓိက ရည်မှန်းချက်မှာ နိုင်ငံတကာ သိုင်းပညာ တံခွန်စိုက်ပြိုင်ပွဲ၏ ချန်ပီယံ ဖြစ်လာရန် ဖြစ်သည်။ သူတို့ ချန်ပီယံ ဖြစ်သွားသည်နှင့် အရင်းအမြစ်များ၏ အကူအညီဖြင့် သူတို့နိုင်ငံမှ သိုင်းပညာရှင်များ၏ ခွန်အားသည် အလိုလို မြင့်တက်သွားလိမ့်မည်။

သူတို့သည် သူတို့ လှုပ်ရှားချိန်၌ လူတိုင်းကို ထိတ်လန့်သွားစေရန် နှိမ့်နှိမ့်ချချ နေနေခဲ့ခြင်း ဖြစ်သည်။