ကိုယ့်ကိုယ်ကိုယ် နှိပ်စက်ခြင်း
Vol. 52 Ch. 766
လင်းရှီသည် စင်မြင့်ကို စိုက်ကြည့်ပြီး ပြောလိုက်သည်။
“အန်တိုနီက ဒီလိုမျိုး ကြာကြာ တောင့်ခံနိုင်မှာ မဟုတ်ဘူး။ သူက ဆာသီနဲ့ ပထမတိုက်ပွဲမှာကိုက ဒဏ်ရာ ရထားပြီးသား”
“အန်တိုနီက အနိုင်ရချင်တာ မဟုတ်ဘူး။ သူက သူ့ပြိုင်ဘက်ရဲ့ အားအင်ကို ကုန်ခန်းအောင် လုပ်ဖို့ ကြိုးစားနေတာ”
အစောပိုင်းကတည်းက မယုံနိုင်လောက်အောင် တိတ်ဆိတ်နေခဲ့သော ထျဲကျွင်းက ရုတ်တရက် မှတ်ချက်ချသည်။
“သူက ဒဏ်ရာ ရထားတာပဲ။ ဂျာကူကို ပင်ပန်းအောင် လုပ်ရုံနဲ့ သူ အနိုင်ရမှာ မဟုတ်ဘူး”
ချန်ရှောင်ရှောင်က သံသယဖြစ်စွာ ပြောလာသည်။
“ဂျာကူကို ပင်ပန်းအောင် လုပ်တာဟာ ကိုယ့်ကိုယ်ကိုယ် အနိုင်ရဖို့ မဟုတ်ဘူး၊ သူ့အသင်းဖော်တွေ အနိုင်ရဖို့ အခွင့်အရေး ပေးဖို့ပဲ”
ထျဲကျွင်းက အေးစက်စက် အသံဖြင့် ရှင်းပြသည်။
“ဒီမတိုင်ခင်မှာ ဆာသီဟာ အန်တိုနီကို ဒဏ်ရာရစေဖို့ဆိုရင် လက်တစ်ဖက် ဆုံးရှုံးရတာထက်တောင် ပိုပြီး ဆန္ဒရှိခဲ့တယ်။ အန်တိုနီကလည်း အခု သူ သေချာပေါက် ရှုံးမယ်ဆိုတာ သိပေမဲ့ ဂျာကူကို ပင်ပန်းအောင် လုပ်ရမယ်ဆိုတာ သိတယ်။ သူတို့က သူတို့ရဲ့ အသင်းဖော်တွေအတွက် လုပ်နေကြတာ၊ သူတို့က တစ်ဖွဲ့တည်း ဖြစ်တဲ့အတွက် သူတို့ မနိုင်ဘူးဆိုတာ ကောင်းကောင်းသိနေပေမဲ့ အားလုံးကို စွန့်လွှတ်ရမယ်ဆိုတာ သိကြတယ်။ အဲဒီနည်းနဲ့ သူတို့ အသင်းဖော်တွေ အနိုင်ရဖို့အတွက် အခွင့်အရေးမှန်သမျှကို ဖန်တီးဖို့ ကြိုးစားနေကြတာ”
လူတိုင်း တိတ်ဆိတ်သွားကြသည်။ ထိုလူများသည် ထိုသို့သော အခွင့်အရေးအတွက် သူတို့၏ အသက်ကိုပင် စွန့်လွှတ်ရန် ဆန္ဒရှိကြသည်မှာ ထင်ရှားပေသည်။
အနိုင်ရခြင်း၏ ရည်ရွယ်ချက်မှာ သူတို့၏ နိုင်ငံက အရင်းအမြစ်များ ပိုမိုရရှိပြီး ပိုမို အစွမ်းထက်သော ပညာရှင်များကို ပျိုးထောင်နိုင်ရန် ဖြစ်သည်။
ထိုအချိန်တွင် ဂျာကူသည် စိတ်မရှည်တော့သဖြင့် လေကို ထိုးမိသည်။ ထိုအခါ အန်တိုနီ၏ လျှပ်စီးဓား သည် ရုတ်တရက် လင်းလက်လာပြီး ဂျာကူ၏ ခါးကို ထိုးလိုက်သည်။
ဂျာကူက အားနည်းချက်ကို တမင် ဖော်ပြနေသလားဆိုတာ မသိရသော်လည်း သူသည် ဓားကို လုံးဝ ဂရုမစိုက်ဘဲ လျှပ်စီး လာရာသို့ နောက်ထပ် လက်သီးတစ်ချက် ထပ်ထိုးလိုက်သည်။
“ရှဲ”
လျှပ်စီးက သူ၏ ခါးတွင် အပေါက်တစ်ခု ဖြစ်သွားစေသည်။ သို့သော် တစ်ချိန်တည်းမှာပင် သူ၏ လက်သီးထိုးချက်သည် အမြောက်ဆံကဲ့သို့ ပစ်ခတ်ထွက်လာပြီး အန်တိုနီ၏ ညာဘက်ပခုံးကို တိုက်ရိုက် ထိမှန် သွားသည်။
အန်တိုနီ ဓား ဝှေ့ယမ်းသော အရှိန်သည် ရုတ်တရက် အပြင်းအထန် ကျဆင်းသွားသည်။
...
“အိန္ဒိယက ဘုန်းကြီးတွေက နာကျင်မှုကို လုံးဝ မခံစားရဘူး။ ဒီလို စိတ်ဓာတ်ခွန်အားက ရှားတယ်”
ဝူထျန်းပေါင်က စိတ်လှုပ်ရှားစွာပြောသည်။
“သူတို့ နှစ်ယောက်စလုံးမှာ ရသေ့တွေရဲ့ စိတ်ဓာတ်ခွန်အား ရှိတယ်။ သူတို့ရဲ့ နာကျင်မှုကို သူတို့ရဲ့ ကိုယ်ခန္ဓာ ပြင်ပကို ထုတ်လွှတ်နိုင်ကြတယ်။ သူတို့ရဲ့ ခွန်အားကို ထိန်းသိမ်းဖို့အတွက် ဂျာကူက အန်တိုနီကို ဖြားယောင်းပြီး ဟာကွက်ကို ဖော်လာနိုင်ဖို့အတွက်နဲ့ သူ့ကိုယ်သူ ဒဏ်ရာရခံလိုစိတ် ရှိနေတယ်”
သို့သော် သူ၏ စကားမဆုံးမီ ဒဏ်ရာရနေသော အန်တိုနီသည် ရုတ်တရက် သူ့ကိုယ်သူ ဖုံးကွယ်ထားခြင်းမှ ရပ်လိုက်သည်။ လျှပ်စီး၏ စွမ်းအားသည် သူ၏ ကိုယ်ခန္ဓာ တစ်လျှောက်လုံးမှ ထုတ်လွှတ်လာပြီး သူ၏ ဓားမြှောင်ပေါ်ရှိ လျှပ်စီးသည် ဒေါသထွက်နေသော နဂါးကဲ့သို့ ထောင်မတ်လာကာ ဂျာကူဆီသို့ ပိုင်းဖြတ် သွားသည်။
ဂျာကူ၏ မျက်နှာက လေးနက်နေသည်။ သူသည် လက်သီးဆုပ်လိုက်ပြီး လက်သီးများက ကျားဟိန်းသံ ထွက်ပေါ်လာကာ သူ၏ လက်သီးကို ပစ်သွင်းလိုက်သည်။
ပြိုင်ကွင်းသည် နောက်ဆုံးတွင် စစ်မှန်သော စိတ်ဝိညာဉ်စွမ်းအားကို အသုံးပြု၍ ပထမဆုံး မျက်နှာချင်းဆိုင် တိုက်ခိုက်မှုကို မြင်တွေ့လိုက်ရသည်။
“ဝုန်း”
ဗုဒ္ဓအလင်းနှင့် လျှပ်စီးနှစ်ခုစလုံးသည် အလွန်တောက်ပသော ပုံစံဖြင့် ရောင်ခြည်ဖြာထွက်နေသည်။ သူတို့နှစ်ဦး၏ တိုက်ခိုက်မှုသည် သဲသဲကွဲကွဲ မိုးခြိမ်းသံကဲ့သို့ ဖြစ်ပြီး အဆုံးမရှိ ပဲ့တင်ထွက်နေသည်။
အန်တိုနီ၏ ဒဏ်ရာရနေသော ညာဘက်ပခုံးသည် ထပ်မံ တုန်ယင်သွားသည်။ သူ၏ လက်မောင်းတစ်ခုလုံး နေရာလွဲသွားပြီး လေထဲတွင် သွေးအန်ကာ ခန္ဓာကိုယ်က နောက်ပြန်လွင့်သွားသည်။
“အရှုံးပေးတယ်”
အင်္ဂလန်၏ ခေါင်းဆောင်က ချက်ချင်း ကြေညာလိုက်သည်။
အန်တိုနီသည် မြေကြီးပေါ် ပြုတ်ကျလာပြီးနောက် ထရပ်နိုင်ခြင်းပင် မရှိပေ။ တစ်ယောက်ယောက်က သူ့ကို ကွင်းထဲမှ ထွက်ခွာရန် ကူညီပေးခဲ့ရသည်။
ဂျာကူသည် သူ၏ လက်များကို ယှက်ထားလျက် တည်ငြိမ်သော မျက်နှာဖြင့် ကွင်းထဲတွင် ဆက်လက် ရပ်နေသည်။ သူ၏ မျက်လုံးများသည် အနည်းငယ် ကျဉ်းမြောင်းနေသော်လည်း သူ၏ ကိုယ်ပေါ်ရှိ ဝတ်ရုံများမှာ ကြီးမားသော ပျက်စီးမှုဒဏ် ခံထားရသည်။ လျှပ်စီး ထိမှန်မှုကြောင့် ဖြစ်ပေါ်လာသော မည်းနက်နေသော အမာရွတ် များလည်း ရှိနေပြီး သူ၏ ခါးမှ သွေးလည်း စီးကျနေသည်။
အန်တိုနီ၏ နောက်ဆုံးတိုက်ခိုက်မှုသည် ဂျာကူကို ပို၍ ပင်ပန်းစေရန်အတွက် နောက်ဆုံး အားထုတ်မှုသာ ဖြစ်သည်။
ဒိုင်လူကြီးသည် ဂျာကူအား အနားယူရန် အခွင့်အရေး မပေးဘဲ ချက်ချင်း မေးလိုက်သည်။
“ဂျာကူ၊ မင်း ဆက်တိုက်မှာလား”
“ဆက်တိုက်ပါမယ်”
ဂျာကူသည် သူ၏ မျက်ခုံးများကို ကျေနပ်စွာ နိမ့်ချလိုက်ပြီး ညင်သာစွာ ပြောသည်။
ပွဲသုံးပွဲစလုံးတွင် လူနှစ်ဦးစလုံးသည် ပြင်းထန်စွာ ဒဏ်ရာရခဲ့ကြပြီး ဆက်တိုက်ရန် ခွန်အား မရှိတော့ကြောင်း သိမှသာ နောက်ဆုတ်ခဲ့ကြသည်။
ဂျာကူသည် မနိုင်ရင်တောင်မှ သူ့ပြိုင်ဘက်၏ ခွန်အားကို တတ်နိုင်သမျှ ကုန်ခန်းအောင် လုပ်မည်ကို ခန့်မှန်း နိုင်ပေသည်။
၎င်းသည် သူတို့ ရပ်တည်ထားသော အနေအထားဖြစ်ပြီး သူတို့၏ ရပ်တည်ချက်များ ကွဲပြားနိုင်သော်လည်း ယင်းတွင် ဇွဲမလျှော့ခြင်းအတွက် အကြောင်းပြချက်များ ရှိနေသေးသည်။ ပြိုင်ဘက်များ ဖြစ်သော်လည်း သူတို့သည် လေးစားထိုက်သူများ ဖြစ်ကြသည်။
နောက်ထပ် တက်လာသူမှာ အင်္ဂလန်အဖွဲ့မှ မိန်းကလေးတစ်ဦး ဖြစ်သည်။ သူမသည် သူတို့အဖွဲ့တွင် အင်အား အနည်းဆုံး ရှိသူလည်း ဖြစ်သည်။
မူလစိတ်ဝိညာဉ် အဆင့်နိမ့်အဆင့်။
ရဲ့လင်းချန်သည် အံ့ဩသွားသော်လည်း အင်္ဂလန်၏ စီစဉ်မှုနောက်ကွယ်မှ အကြောင်းရင်းကို မကြာမီ တွက်ဆ နိုင်ခဲ့သည်။
အန်တိုနီသည် အင်္ဂလန်အဖွဲ့တွင် အစွမ်းအထက်ဆုံး ပြိုင်ပွဲဝင် ဖြစ်နိုင်သည်။ သူတို့၏ အကြီးမားဆုံး မျှော်လင့်ချက်မှာ အန်တိုနီ တစ်ဦးတည်းဖြင့် မူလစိတ်ဝိညာဉ် အလယ်အလတ်အဆင့် သိုင်းပညာရှင် နှစ်ဦးကို ဖယ်ရှားနိုင်ခြင်း ဖြစ်သည်။ အကယ်၍ ထိုအစီအစဉ် မအောင်မြင်ပါက တစ်ဦးကို သေချာပေါက် ဖယ်ရှားပြီး ကျန်တစ်ဦးကို ပြင်းထန်စွာ ဒဏ်ရာရစေမည်။
ထိုသို့သော အခြေအနေအောက်တွင် သူတို့၏ မူလစိတ်ဝိညာဉ် အဆင့်နိမ့်အဆင့် အဖွဲ့ဝင်သည် တက်လာပြီး ပြင်းထန်စွာ ဒဏ်ရာရသူကို အစားထိုးနိုင်သည်။ ရလဒ်အနေဖြင့် မူလစိတ်ဝိညာဉ် အလယ်အလတ်အဆင့် ပြိုင်ပွဲဝင် သုံးဦးသည် အခြား မူလစိတ်ဝိညာဉ် အလယ်အလတ်အဆင့် ပြိုင်ပွဲဝင် သုံးဦးနှင့် ထိပ်တိုက်တွေ့မည်ဖြစ်ရာ နှစ်ဖက်စလုံး တူညီသွားမည်ဖြစ်သည်။
သူတို့ မှန်းချက်နှင့် မကိုက်ညီခဲ့ပါက ဒုတိယပွဲတွင် မည်သူ တက်တက် အရေးမကြီးပေ။ အဘယ်ကြောင့်ဆိုသော် ... ၎င်းသည် သေချာပေါက် ရှုံးနိမ့်ခြင်း ဖြစ်လိမ့်မည်။
ထိုသို့ဖြစ်ခဲ့ပါက အင်အားအနည်းဆုံး အဖွဲ့ဝင်ကို အရင်ဆုံး အခြေအနေ စမ်းသပ်စေခြင်းက ပိုကောင်းသည်။ အကယ်၍ မအောင်မြင်ပါက သူတို့၏ ခွန်အားကို ချွေတာနိုင်ပြီး ကျန်သုံးပွဲကို လက်လျှော့နိုင်သည်။ အဘယ်ကြောင့် ဆိုသော် ထိုအချိန်တွင် ပြင်းထန်စွာ ဒဏ်ရာရပါက နောက်လာမည့် ရှုံးထွက်အဆင့် ပြိုင်ပွဲတွင် သူတို့ ကြီးမားသော အားနည်းချက် ရှိနေမည် ဖြစ်သည်။
၎င်းသည် အလွန် ခိုင်မာသော လှုပ်ရှားမှု ဖြစ်သည်။
“အင်္ဂလန်က ဖရန်”
ဖရန်က ပြောပြီးသည်နှင့် သူမ၏ လက်ထဲမှ ဓားရှည်က ထိုးထွက်လာသည်။ ၎င်းနှင့်အတူ ရှည်လျားသော မီးတောက်က ပြင်းထန်စွာ ပေါ်ထွက်လာပြီး ဂျာကူကို ဖုံးလွှမ်းလာလေသည်။
အနီရောင် မီးတောက်က လူတိုင်း၏ မျက်နှာတွင် ရောင်ပြန်ဟပ် နေသော်လည်း ဂျာကူ၏ ဗုဒ္ဓအလင်းဖြင့် ပိတ်ဆို့ ခံထားရသည်။
နောက်တိုက်ပွဲသည် အလွန် ဝမ်းနည်းဖွယ်ရာ ဖြစ်ခဲ့သည်။ ဖရန်သည် မိန်းကလေးနှင့် လုံးဝ မတူပေ။ သူမသည် ယောက်ျားလေး တစ်ဦးထက် များစွာ ပို၍ အစွမ်းကုန် ပေးဆပ်ခဲ့ပြီး လှုပ်ရှားမှုတိုင်းသည် အသက် ဆုံးရှုံးစေနိုင် သကဲ့သို့ ထင်ရသည်။ အဘယ်ကြောင့်ဆိုသော် သူမသည် ဒဏ်ရာအတွက် ဒဏ်ရာ ဟူသော တိုက်ခိုက်ရေးပုံစံကို အသုံးပြုခဲ့သောကြောင့် ဖြစ်သည်။
ထိုသို့သော ခိုင်မာသော တိုက်ခိုက်ရေးပုံစံသည် လူတိုင်းကို တုန်လှုပ်စေခဲ့သည်။ သူမ၏ ခန္ဓာကိုယ်သည် သူမနှင့် မဆိုင်သကဲ့သို့ ဖြစ်နေပြီး ၎င်းကို လုံးဝ တန်ဖိုးမထားသကဲ့သို့ပင် ဖြစ်သည်။
နောက်ဆုံးတွင် ဂျာကူသည် ဆက်လက် တိုက်ခိုက်ရန် ခွန်အား ဆုံးရှုံးသွားသည်။ သို့သော် သူမ ခန္ဓာကိုယ်ရှိ အရိုး ၈၀% ကျော် ကျိုးပဲ့သွားအောင် လုပ်နိုင်ခဲ့သည်။ အင်္ဂလန်နှင့် အိန္ဒိယတို့သည် နောက်ဆုံးတွင် တူညီသော အဆင့်တွင် ရပ်တည်နိုင်ခဲ့သည်။
ရဲ့လင်းချန်သည် အလွန် ရှုပ်ထွေးသော အမူအရာဖြင့် ပွဲစဉ်ကို အာရုံစိုက် ကြည့်ရှုနေသည်။
စတုတ္ထပွဲသည် ဂျာလစ်နှင့် ဂျူလီယန်တို့ ဖြစ်သည်။
ဂျူလီယန်၏ မျက်လုံးများသည် နီရဲနေပြီး ပြီးခဲ့သည့်ပွဲမှ ဖရန်က သူ၏ စိတ်ခံစားမှုများအပေါ် ထင်ရှားစွာ သက်ရောက်မှု ရှိနေသည်။ သူသည် ပြင်းထန်သော ဝမ်းနည်းမှုကို ခံစားနေရပြီး အနိုင်ရလိုသော စိတ်ဓာတ်ဖြင့် စင်ပေါ်သို့ တက်လာသည်။
မီးတောက်များကိုလည်း အသုံးပြုကာ သူ၏ တိုက်ခိုက်ရေး ပုံစံသည် အလွန် ကြမ်းတမ်းသည်။ ဖြစ်နိုင်သည်မှာ သူသည် ဖရန်အတွက် လက်စားချေလိုသောကြောင့် ဖြစ်သည်။ သူသည် လက်နက် မကိုင်ဆောင်ဘဲ လက်အိတ် တစ်စုံသာ ဝတ်ဆင်ထားပြီး သူ၏ လက်ဖဝါးတွင် မီးတောက်များ လောင်ကျွမ်းနေကာ မီးများသည် မြင်းစီး လာသကဲ့သို့ ကောင်းကင်သို့ ပစ်ခတ်နေသည်။
မီးတောက်များ၏ ဟိန်းသံများကို ရှင်းရှင်းလင်းလင်း ကြားနိုင်နေသည်။
“ဟူး … မင်းတို့ကို ရှေ့မှာ မထားသင့်ဘူးလို့ ပြောခဲ့သားပဲ”
ရဲ့လင်းချန်က သက်ပြင်းရှည်ကြီး ချလိုက်သည်။ ထို့နောက် လင်းရှီနှင့် ချန်ရှောင်ရှောင်တို့ကို ကြည့်ပြီး ထိုသို့ ဝေဖန်လိုက်သည်။
အမျိုးသမီးများက အမြဲတမ်း သူတို့ကိုယ်သူတို့ အလွန် ကြိုးစားကြသည်။
ကျန်းတလီနှင့် ကျင့်ရှန်တို့က ပြိုင်တူ ခေါင်းညိတ်ပြီး သဘောတူကြသည်။ သူတို့အဖွဲ့ရှိ မိန်းကလေးများကို ထိုကဲ့သို့ ရိုက်နှက်ခဲ့ပါက သူတို့သည် သေချာပေါက် ဒေါသထွက်ပြီး ဂျူလီယန်ထက်ပင် ပိုမို ရက်စက်သော ပုံစံဖြင့် တိုက်ခိုက် ကြလိမ့်မည်။
အမျိုးသားများသည် အခြားမည်သူ့အတွက်မှ သို့ ပြုမူကြမည် မဟုတ်ပေ။
ထိုတိုက်ပွဲအတွက် ဂျူလီယန်သည် ဒေါသထွက်နေပြီး ဂျာလစ်ကို ဖယ်ရှားနိုင်ခဲ့သော်လည်း သူသည် နံရိုးအချို့ ကျိုးပဲ့သည့် တန်ကြေးကိုလည်း ပေးဆပ်ခဲ့ရသည်။ သူ၏ ကိုယ်တွင်းအင်္ဂါများလည်း ပြင်းထန်စွာ ဒဏ်ရာရခဲ့ပြီး သူ အန်ထုတ်သော သွေးတွင် အမှုန်အမွှားအချို့ ပါဝင်နေသည်။
ပဉ္စမပွဲအတွင်းတွင် ဂျူလီယန်သည် ဇွဲမလျှော့သော်လည်း ရှရီယာ၏ အနိုင်ယူခြင်းကို ခံလိုက်ရသည်။
နောက်ဆုံးတွင် အင်္ဂလန်နှင့် အိန္ဒိယတို့တွင် နှစ်ဦးစီသာ ကျန်ရှိတော့သည်။
ဝူထျန်းပေါင်က သိချင်စိတ်ဖြင့် မှတ်ချက်ချသည်။
“ရှရီယာက ဂျူလီယန်ကို အနိုင်ယူပြီး ဒဏ်ရာ နည်းနည်း ရခဲ့တယ်။ အခု နှစ်ဖက်စလုံးမှာ မူလစိတ်ဝိညာဉ် အလယ်အလတ်အဆင့် သိုင်းပညာရှင် နှစ်ယောက်ပဲ ကျန်တော့တယ်။ ဘယ်သူ အနိုင်ရမလဲဆိုတာကို ဆုံးဖြတ်ဖို့ ခက်နေတယ်”
နိုင်ငံအသီးသီးမှ ပြိုင်ပွဲဝင်များ၏ အချက်အလက်များကို ဘယ်သူမှ မသိသဖြင့် လူတိုင်း ခန့်မှန်းရုံအပြင် မတတ်နိုင် ကြသော်လည်း နောက်ဆုံး ပြိုင်ပွဲ နှစ်ခုက စိတ်လှုပ်ရှားဖို့ ကောင်းမည်မှာ သေချာကြောင်း သူတို့ အတပ် သိနေသည်။ နောက်ဆုံးမှ နေရာချထားသည့် သူများသည် များသောအားဖြင့် ခွန်အား၌ မနိမ့်ကျသည့် အဓိက အခရာများ ဖြစ်တတ်ကြသည်။
ပထမအဆင့်မှာပင် ရေတွက်မရသော မတော်တဆမှုများ ပေါ်ပေါက်ပြီးနောက် ပြိုင်ပွဲဝင်များစွာသည် ဖိအားကို ခံစားလာကြရသည်။ နိုင်ငံတိုင်းက မည်သို့သော ဝှက်ဖဲများ ဖုံးကွယ်ထားမလဲ ဆိုသည်ကို မည်သူမျှ မသိကြပေ။