နှစ်ပတ်လည်ပွဲ - အံ့သြမှင်တက်ဖွယ် ပွဲထွက်ခြင်း

Imperial Palaceအုပ်စု၏ နှစ်ပတ်လည်ပွဲကို Imperial Palaceအုပ်စုပိုင် ကြယ်ခုနစ်ပွင့်အဆင့်ရှိသော ချိုင်ကုန်းဟိုတယ်တွင် ကျင်းပသည်။

နှစ်ပတ်လည်ပွဲအတွက် လွန်ခဲ့သော နှစ်လခန့်ကတည်းက ပြင်ဆင်ခဲ့ကြသည်။ သို့သော် သူဌေးကတော် တက်ရောက်မည်ဆိုသော သတင်းသည် ဝန်ထမ်းအားလုံးအတွက် အံ့သြစရာဖြစ်ခဲ့သည်။

နှစ်ပတ်လည်ပွဲ၏ ဆောင်ပုဒ်မှာ "အနာဂတ်ကို အတူတည်ဆောက်၊ ပိုမိုကောင်းမွန်သော မနက်ဖြန်" ဖြစ်သည်။

နေ့လည်ပိုင်းတွင် အစီရင်ခံစာများ တင်ပြခြင်းနှင့် သုံးသပ်ခြင်းများ ပြုလုပ်ကြသည်။

ညစာစားပွဲကို ညနေ ၆ နာရီတွင် စတင်သည်။

……

"ဝါး... သူဌေးကတော်က တကယ် လှတာပဲ"

"မိတ်ကပ်မလိမ်းဘဲနဲ့ ဒီလောက်လှတဲ့သူမျိုး တစ်ခါမှ မမြင်ဖူးဘူး"

"ဒါ... ဒါ မိတ်ကပ်လိမ်းစရာတောင် မလိုပါဘူး။ မိတ်ကပ်လိမ်းလိုက်ရင် သူဌေးကတော်ရဲ့ အလှတရား မှေးမှိန်သွားလိမ့်မယ်"

ဤကဲ့သို့ သဘာဝအလှပိုင်ရှင်အတွက် မိတ်ကပ်လိမ်းခြယ်ခြင်းသည် စော်ကားရာ ရောက်ပေသည်။

နောက်ဆုံးတွင် မိတ်ကပ်ပညာရှင်များသည် ညနေခင်းဝတ်စုံနှင့် လိုက်ဖက်အောင် ဆံပင်ပုံသွင်းပေးပြီး ပါးပါးကြည်ကြည် မိတ်ကပ်အနည်းငယ်သာ လိမ်းခြယ်ပေးလိုက်သည်။ အိုင်းရှဲဒိုးနှင့် နှုတ်ခမ်းနီကိုလည်း လိုက်ဖက်အောင် ဆိုးပေးလိုက်သည်။

သို့သော် ထိုမျှနှင့်ပင် ရှောင်လင်းယွီသည် နတ်သမီးတမျှ လှပနေလေသည်။

ရှောင်လင်းယွီသည် ကုန်းထျန်းဟောက် ပြင်ဆင်ပေးထားသော ညနေခင်းဝတ်စုံကို ဝတ်ဆင်ပြီး လှည့်ကြည့်လိုက်သောအခါ ခင်ပွန်းသည်၏ ကြောင်ငေးနေသော မျက်လုံးများကို တွေ့လိုက်ရသည်။ သူမ မျက်ခုံးပင့်လိုက်ပြီး သူ့မျက်နှာရှေ့တွင် လက်ယမ်းပြလိုက်သော်လည်း ခင်ပွန်းသည်မှာ ကြောင်ငေးနေဆဲပင်။

"ဟားဟား..." ကုန်းထျန်းဟောက်၏ ဤကဲ့သို့သော ပုံစံမျိုး တစ်ခါမှ မမြင်ဖူးသဖြင့် ရှောင်လင်းယွီ ရယ်မောလိုက်သည်။

ရှောင်လင်းယွီ ရယ်မောလိုက်သောအခါ ကုန်းထျန်းဟောက် ပို၍ ရင်ခုန်သွားလေသည်။

ကုန်းထျန်းဟောက်သည် လေးနက်ပြီး ချစ်ခင်စုံမက်စွာဖြင့် ပြောလိုက်သည်။ "ယွီအာ... မင်း တကယ် လှတာပဲ။ ကိုယ့်ရဲ့ နှစ်ပတ်လည်ပွဲကို မင်းကို ခေါ်သွားဖို့ ဆုံးဖြတ်လိုက်တာ မှားပြီထင်တယ်။ အခု မင်းရဲ့အလှကို တခြားလူတွေ မြင်ကုန်ကြတော့မယ်။ ကိုယ် မနာလိုဖြစ်တယ်"

ရှောင်လင်းယွီက ရယ်မောကာ ပြောလိုက်သည်။ "ဒါဆို မသွားတော့ရင် ကောင်းမလား"

"......"

ကုန်းထျန်းဟောက် သက်ပြင်းချလိုက်သည်။ "အင်း... ကိုယ်လည်း မင်းကို မသွားစေချင်ဘူး။ ဒါပေမဲ့ ကိုယ့်မိန်းမကို လူတိုင်းသိအောင် ကြေညာချင်တယ်။ ဖုံးကွယ်မထားချင်ဘူး"

ရှောင်လင်းယွီနှင့် စတွေ့ကတည်းက သူမသည် ယောကျ်ားကို မှီခိုအားထားတတ်သော အမျိုးသမီးမဟုတ်ဘဲ ကိုယ့်အားကိုယ်ကိုး၊ ယုံကြည်မှုရှိပြီး လွတ်လပ်သော အမျိုးသမီးတစ်ဦးဖြစ်ကြောင်း သူ သိခဲ့သည်။

ယခု သူမသည် သူ့ဇနီးဖြစ်လာပြီဖြစ်ရာ သူနှင့်အတူ လက်တွဲလျှောက်လှမ်းမည့် လက်တွဲဖော် ဖြစ်သည်။

သူသည် ရှောင်လင်းယွီကို အလှပြပန်းအိုးအဖြစ် သဘောမထားပေ။

ယခု မြို့တော်တစ်ခုလုံးက ကုန်းထျန်းဟောက် အိမ်ထောင်ကျပြီဆိုတာ သိနေကြပြီ။ သူ့ကုမ္ပဏီနဲ့ လက်အောက်ငယ်သားတွေလည်း သိကြမှာ သေချာတယ်။ ဒါကြောင့် ကိုယ့်မိန်းမကို လူတိုင်းသိအောင် မိတ်ဆက်ပေးရမယ်။ မဟုတ်ရင် သူတို့သူဌေးက သူဌေးကတော်ကို မချစ်လို့ ကုမ္ပဏီပွဲတောင် မခေါ်လာဘူးဆိုတဲ့ ကောလာဟလတွေ ထွက်လာရင် မကောင်းဘူးလေ။

သူက ရှောင်လင်းယွီကို ဘယ်တော့မှ စိတ်ဆင်းရဲခံမှာ မဟုတ်ဘူး။

……

ချိုင်ကုန်းဟိုတယ်၏ တတိယထပ် ခန်းမတွင် Imperial Palaceအုပ်စု၏ ပွဲကျင်းပနေသည်။

ခန်းမကို လှပစွာ ပြင်ဆင်ထားသည်။ ပန်းများ၊ မိုးပျံပူဖောင်းများ၊ ဖဲကြိုးများဖြင့် အလှဆင်ထားသည်။ ရှေ့တွင် စင်မြင့်ကြီးတစ်ခု ရှိသည်။ အစားအသောက်များကို ဘူဖေးစနစ်ဖြင့် စီစဉ်ထားပြီး သစ်သီးများ၊ မုန့်များ၊ အချိုရည်များနှင့် ဝိုင်များကို စားပွဲပေါ်တွင် ခင်းကျင်းထားသည်။

နှစ်စဉ် ကုမ္ပဏီ နှစ်ပတ်လည်ပွဲသည် အမျိုးသမီးများ အလှပြိုင်ကြသော နေရာဖြစ်သည်။

အမျိုးသမီးတိုင်းသည် အလှဆုံး ပြင်ဆင်ထားကြပြီး အမျိုးသားအဖော်များနှင့်အတူ ပြုံးရွှင်စွာ ဝင်ရောက်လာကြသည်။

"မစ္စတာလီ... သူဌေးကတော်က ဆက်ဆံရ လွယ်ကူရဲ့လား"

ညနေ ၅ နာရီတွင် လူများ ခန်းမထဲသို့ ဝင်ရောက်လာကြသည်။ ခန်းမထဲတွင် ရှိနေသော လီယွမ်ဟန်ကို တွေ့သောအခါ မနေနိုင်ဘဲ မေးမြန်းကြသည်။

"ဟုတ်တယ် မစ္စတာလီ... ခင်ဗျားက သူဌေးကတော်နဲ့ တွေ့ဖူး၊ ထိတွေ့ဖူးတဲ့ တစ်ဦးတည်းသောသူလေ။ ပြောပြပါဦး... သူဌေးကတော်က ဘယ်လိုလူမျိုးလဲ"

လီယွမ်ဟန် နှုတ်ခမ်းထောင့်စွန်း ကွေးတက်သွားပြီး လျှို့ဝှက်စွာ ပြောလိုက်သည်။ "သူဌေးကတော်က ဘယ်လိုလူမျိုးလဲ ဟုတ်လား။ အဲဒါ ခင်ဗျားတို့ ကိုယ်တိုင် တွေ့လိုက်ရင် သိရမှာပါ"

အားလုံး - "......" ဒါက ပြောစရာ လိုသေးလို့လား။

အရေးကြီးပုဂ္ဂိုလ်များသည် နောက်ဆုံးမှ ပွဲထွက်လေ့ရှိကြသည်။

ဟိုတယ်ပေါက်ဝသို့ ကုန်းထျန်းဟောက်နှင့် ရှောင်လင်းယွီတို့ ရောက်ရှိလာကြသည်။

"ဖူရန်... ဆင်းခဲ့ပါ" အဆင့်မြင့် အဖြူရောင်ဝတ်စုံ ဝတ်ဆင်ထားသော ကုန်းထျန်းဟောက်သည် ကားတံခါးကို ဖွင့်ပေးပြီး လက်တစ်ဖက်ကို နောက်ပစ်ကာ ခါးကိုင်း၍ ယဉ်ကျေးစွာ ဖိတ်ခေါ်လိုက်သည်။

ခဏအကြာတွင် အနက်ရောင် ဒေါက်ဖိနပ်တစ်ရန်နှင့် သွယ်လျလှပသော ခြေသလုံးတစ်စုံ ထွက်ပေါ်လာသည်။

ကားပေါ်မှ ဆင်းလာသော အမျိုးသမီးသည် အလွန်ဆွဲဆောင်မှုရှိပြီး လှပကြောင်း ပြောကြသည်မှာ မမှားပေ။ အထူးသဖြင့် လှပသော ခြေထောက်ပိုင်ရှင် ဖြစ်ပါက ပို၍ ဆွဲဆောင်မှု ရှိသည်။

ရှောင်လင်းယွီ ကားပေါ်မှ ဆင်းလာသောအခါ အဖြူရောင် အမွေးပွအင်္ကျီတစ်ထည် ဝတ်ဆင်ထားသည်။

ရာသီဥတု အေးချမ်းပြီး အပြင်ဘက်ဖြစ်သောကြောင့် ပါးလွှာသော ညနေခင်းဝတ်စုံပေါ်တွင် အနွေးထည် ထပ်ဝတ်ထားရသည်။

သို့သော် ကုန်းထျန်းဟောက်သည် ရှောင်လင်းယွီ အေးခဲသွားမည်ကို စိုးရိမ်သဖြင့် သူမ ကားပေါ်မှ ဆင်းလာသည်နှင့် မျက်လှည့်ပြလိုက်သကဲ့သို့ အဖြူရောင် သိုးမွှေးလည်စည်းတစ်ခုကို ထုတ်ယူကာ ပတ်ပေးလိုက်သည်။

ရှောင်လင်းယွီသည် တောင်ပိုင်းသူဖြစ်သဖြင့် မြောက်ပိုင်း၏ အေးချမ်းသောဆောင်းရာသီနှင့် အသားမကျနိုင်ပေ။

ကုန်းထျန်းဟောက်၏ ဂရုစိုက်မှုနှင့် နူးညံ့မှုများကို မြင်လိုက်ရသော ဟိုတယ်ဝန်ထမ်းများသည် ပါးစပ်အဟောင်းသား ဖြစ်သွားကြသည်။

ဘုရားရေ... ဒါ တကယ်ပဲ အေးစက်ပြီး ရက်စက်တဲ့ ဘော့စ်ကြီး ဟုတ်ရဲ့လား။

လူမှားနေတာများလား။ မဟုတ်ရင် သူ့မျက်နှာပေါ်မှာ နူးညံ့တဲ့ အမူအရာတွေ ဘယ်လိုလုပ် ပေါ်လာနိုင်မှာလဲ။

ဩော်... သူ့ရင်ခွင်ထဲက အမျိုးသမီးက ကောလာဟလထဲက သူဌေးကတော် ဖြစ်မှာပေါ့။

တကယ် လှတာပဲ။

မကြာမီ ခန်းမထဲရှိ လူများသည် ဘော့စ်နှင့် သူဌေးကတော် ရောက်ရှိလာကြောင်း သတင်းရရှိလိုက်ကြသည်။

ဝန်ထမ်းအားလုံး စိတ်လှုပ်ရှားစွာဖြင့် ဘော့စ်နှင့်... သူဌေးကတော်ကို မျှော်လင့်စောင့်စားနေကြသည်။

"မြန်မြန်... မြန်မြန်... ဘော့စ်နဲ့ သူဌေးကတော် ရောက်နေပြီ။ စားမနေကြနဲ့တော့" တစ်စုံတစ်ယောက်က အော်ပြောလိုက်သည်။

"ဟေ... ဘော့စ်နဲ့ သူဌေးကတော် ရောက်ပြီလား။ မြန်လိုက်တာ"

"မြန်တယ် ဟုတ်လား။ ဘော့စ်က အချိန်တိကျတဲ့သူလေ"

"ဟုတ်သားပဲ။ ပွဲစတော့မယ်ဆိုတော့ ဘော့စ်က အချိန်မှန် ရောက်လာမှာပေါ့"

"ငါ သိချင်တာတစ်ခုက သူဌေးကတော်က ဘယ်လိုလူမျိုးမို့လို့ ဒီလောက် အေးစက်တဲ့ ဘော့စ်ကို ဖမ်းစားနိုင်တာလဲ ဆိုတာပဲ"

ခန်းမအဝင်ဝတွင် ကော်ဇောနီ ခင်းထားသည်။ အမျိုးသား၊ အမျိုးသမီးများသည် ဝိုင်ခွက်များ၊ မုန့်များကို ကိုင်ဆောင်ပြီး လမ်းဘေးတစ်ဖက်တစ်ချက်တွင် ရပ်ကာ တံခါးဝကို စိုက်ကြည့်နေကြသည်။

ကုန်းထျန်းဟောက်သည် ရှောင်လင်းယွီကိုဖက်လျက် ခန်းမသို့ ရောက်ရှိလာသည်။ ခန်းမအဝင်ဝသို့ ရောက်သောအခါ ကုန်းထျန်းဟောက်သည် ရှောင်လင်းယွီ၏ အမွေးပွအင်္ကျီနှင့် လည်စည်းကို ချွတ်ပေးပြီး ဘေးနားရှိ ဝန်ထမ်းထံ ကမ်းပေးလိုက်သည်။

ဝန်ထမ်းသည် ခန္ဓာကိုယ်အချိုးအစားကို ပေါ်လွင်စေသော အနီရောင် ညနေခင်းဝတ်စုံ၊ ဆံပင်ထုံးဖွဲ့မှုနှင့် ပြိုင်ဘက်ကင်းသော အလှတရားကို မြင်လိုက်ရသောအခါ မှင်တက်သွားလေသည်။

တကယ် လှပလွန်းလှသည်။

ကုန်းထျန်းဟောက်သည် ဝန်ထမ်းက သူ့မိန်းမကို ငေးကြည့်နေသည်ကို တွေ့လိုက်ရသောအခါ မနာလိုဝန်တို ဖြစ်သွားသည်။ ဝန်ထမ်းက အမျိုးသမီးဖြစ်သော်လည်း မည်သူကမျှ သူ့မိန်းမကို ထိုသို့ငေးကြည့်ခြင်းကို သူ မကြိုက်ပေ။

"ကဲ... သွားလုပ်စရာရှိတာ လုပ်တော့" ကုန်းထျန်းဟောက်က မနာလိုစွာဖြင့် ပြောလိုက်သည်။

ဝန်ထမ်းသည် ရှောင်လင်းယွီကို ငေးကြည့်နေရာမှ ကုန်းထျန်းဟောက်၏အသံကို ကြားပြီး သတိဝင်လာသည်။ သူမသည် အမျိုးသမီးချင်း ငေးကြည့်မိသည့်အတွက် ရှက်သွေးဖြာသွားပြီး "ဟုတ်ကဲ့ပါ" ဟု ပြောကာ ထွက်ခွာသွားသည်။

ဝန်ထမ်းထွက်သွားပြီးနောက် ကုန်းထျန်းဟောက်က မနာလိုစွာ ပြောလိုက်သည်။ "ယွီအာ... မင်းကို ခေါ်မလာသင့်ဘူး။ ကြည့်ပါလား... မိန်းမတွေတောင် မင်းအလှကို ကြွေနေကြပြီ"

ရှောင်လင်းယွီ မျက်ခုံးပင့်လိုက်ပြီး ပြုံးလျက် မေးလိုက်သည်။ "ဒါဆို ပြန်ကြမလား"

"......"

ကုန်းထျန်းဟောက် ပခုံးတွန့်လိုက်ပြီး ပြုံးလျက် ပြောလိုက်သည်။ "နေပါစေတော့။ ရောက်မှရောက်နေပြီပဲ။ ပြန်ဖို့ အကြောင်းမရှိပါဘူး။ ပြီးတော့ ကုမ္ပဏီကလူတွေကို သူတို့ သူဌေးကတော်နဲ့ မိတ်ဆက်ပေးရဦးမယ်။ မဟုတ်ရင် နောက်ကျ မင်းကုမ္ပဏီလာတဲ့အခါ မျက်စိမရှိတဲ့ကောင်တွေက မင်းကို စော်ကားမိနေဦးမယ်"

ရှောင်လင်းယွီ ခေါင်းညိတ်လိုက်သည်။ "အင်း... ကောင်းပြီလေ"

ထို့နောက် ရှောင်လင်းယွီသည် ကုန်းထျန်းဟောက်၏ လက်မောင်းကို ချိတ်လိုက်ပြီး ပြုံးလျက် ပြောလိုက်သည်။ "လောင်ကုန်း... အခု ဝင်လို့ရပြီလား"

ကုန်းထျန်းဟောက်က ချစ်ခင်မှုအပြည့်ဖြင့် ပြုံးလျက် ပြောလိုက်သည်။ "သွားကြစို့... ကိုယ့်ရဲ့ဇနီးလေး"

...

"လာပြီ... လာပြီ... သူတို့အသံတွေ ကြားနေရပြီ" ခန်းမထဲမှ နားပါးသူတစ်ဦးက ပြောလိုက်သည်။

တည်ငြိမ်သော ခြေသံတစ်စုံနှင့် ဒေါက်ဖိနပ်သံတစ်စုံ နီးကပ်လာသည်နှင့်အမျှ လူတိုင်းသည် အသက်အောင့်ကာ တံခါးဝကို စိုက်ကြည့်နေကြသည်။

ခဏအကြာတွင် အဖြူရောင်ဝတ်စုံနှင့် အမျိုးသားတစ်ဦး၊ အနီရောင် ညနေခင်းဝတ်စုံနှင့် အမျိုးသမီးတစ်ဦး ခန်းမထဲသို့ ဝင်ရောက်လာကြသည်။

အမျိုးသမီး၏ရုပ်ရည်ကို မြင်လိုက်ရသောအခါ ခန်းမတစ်ခုလုံး တိတ်ဆိတ်သွားလေသည်။

အမျိုးသမီးသည် ဆံပင်ကို သပ်ရပ်စွာ ထုံးဖွဲ့ထားပြီး ခန္ဓာကိုယ်အချိုးအစား ပေါ်လွင်စေသော အနီရောင် ရေသူမြီးပုံ ညနေခင်းဝတ်စုံကို ဝတ်ဆင်ထားသည်။

သူမ၏အသားအရေသည် ဖြူဖွေးနူးညံ့ပြီး မျက်နှာသွင်ပြင်သည် ပြီးပြည့်စုံသည်။

မြောက်ပိုင်းသူ အလှမယ်၊ ပြိုင်ဘက်ကင်း အလှ၊ တစ်ချက်ပြုံးလျှင် မြို့ပျက်၊ နှစ်ချက်ပြုံးလျှင် တိုင်းပြည်ပျက်။

နူးညံ့သော လက်ချောင်းများ၊ ကြည်လင်သော အသားအရေ၊ သွယ်လျသော လည်တိုင်၊ ညီညာသော သွားတန်း၊ လှပသော မျက်ခုံး၊ ချိုမြိန်သော အပြုံး၊ ဆွဲဆောင်မှုရှိသော မျက်ဝန်း။

နောက်လှည့်ကြည့်လိုက်ရုံဖြင့် အလှပဆုံး မိန်းမပျိုများပင် အရောင်မှိန်သွားစေနိုင်သည်။

ယခုမြင်တွေ့နေရသော အမျိုးသမီး၏ အလှတရားကို ဖော်ပြရန် စကားလုံး ရှာမရအောင် ဖြစ်နေကြသည်။ အတိုချုပ်ပြောရလျှင် "လှတယ်"၊ "ပြိုင်ဘက်ကင်းတယ်"၊ "တိုင်းပြည်ကို လှုပ်ခတ်စေတယ်"။

ရောက်ရှိနေသော အမျိုးသား၊ အမျိုးသမီးများ၏မျက်လုံးများတွင် အံ့သြမှုများပြည့်နှက်နေသည်။ အထူးသဖြင့် အမျိုးသားများ၏အကြည့်များသည် ပို၍ပေါ်လွင်သည်။ အကယ်၍ ဤအမျိုးသမီး၏ အထောက်အထားကို မသိပါက သူတို့ ရှေ့တိုးလာကြမည်မှာ သေချာသည်။

အမျိုးသမီးများသည် သတိပြန်ဝင်လာပြီးနောက် ကိုယ့်ကိုယ်ကိုယ် အခြားအမျိုးသမီးတစ်ဦးကို ငေးကြည့်နေမိသည်ကို သတိပြုမိကာ မျက်နှာပျက်သွားကြသည်။

သူတို့၏သူဌေးကတော်သည် ဤမျှ လှပလိမ့်မည်ဟု မည်သူမျှ ထင်မထားခဲ့ကြပေ။ ကုမ္ပဏီတွင် ကိုယ့်ကိုယ်ကိုယ် မင်းသမီးလေးများဟု ထင်မှတ်နေကြသော အမျိုးသမီးများသည်ပင် ရှက်ရွံ့သွားကြသည်။

ယခင်က အွန်လိုင်းတွင် သူဌေးကတော်၏ ဓာတ်ပုံများကို မြင်ဖူးကြသော်လည်း အများစုက ပြုပြင်ဖန်တီးထားသည်ဟု ထင်မှတ်ခဲ့ကြသည်။

သူတို့၏အမြင်တွင် တောသူမဆိုသည်မှာ ရိုးအီပြီး မြေနံ့ထွက်နေသူများသာဖြစ်သည်။

သို့သော် ဤသူဌေးကတော်သည် ပွဲထွက်လာသည်နှင့် အံ့သြဖွယ်ကောင်းလောက်အောင် လှပပြီး အရှိန်အဝါ ပြင်းထန်လှသည်။ လူအားလုံး၏ အရှိန်အဝါကို ဖိနှိပ်ထားနိုင်သည်။

ယခင်က သံသယဝင်ခဲ့ကြသမျှ အားလုံး ပျောက်ကွယ်သွားလေသည်။

လီယွမ်ဟန်သည် မိုက်ကိုကိုင်ကာ ကျယ်လောင်စွာ ကြေညာလိုက်သည်။ "ကျွန်တော်တို့ရဲ့ သူဌေးနဲ့သူဌေးကတော်ကို လက်ခုပ်တီးပြီး ကြိုဆိုလိုက်ကြရအောင်"

သူ၏ စကားဆုံးသည်နှင့် လူများ သတိပြန်ဝင်လာပြီး လက်ခုပ်သံများ ဆူညံစွာ ထွက်ပေါ်လာသည်။

ရှောင်လင်းယွီသည် ကုန်းထျန်းဟောက်၏ လက်မောင်းကို ချိတ်လျက် ခန်းမထဲသို့ ဝင်ရောက်လာလေသည်။

***