နှစ်ပတ်လည်ပွဲ - အချစ်ကိုထုတ်ပြခြင်းနှင့် ခွေးစာကျွေးခြင်း

ကုန်းထျန်းဟောက်နှင့် ရှောင်လင်းယွီတို့၏ ပွဲထွက်လာပုံမှာ အလွန်အံ့သြစရာ ကောင်းလွန်းသဖြင့် လူအများသည် အချိန်အတော်ကြာအောင် သတိပြန်မဝင်နိုင် ဖြစ်နေခဲ့ကြသည်။

ညစာစားပွဲ အစီအစဉ်များတွင် လှုပ်ရှားမှုအမျိုးမျိုး ပါဝင်သည်။

ကုန်းထျန်းဟောက်နှင့် ရှောင်လင်းယွီတို့ ရောက်ရှိလာပြီးနောက် သူတို့အတွက် သတ်မှတ်ထားသော နေရာတွင် ဝင်ထိုင်လိုက်ကြသည်။

ညစာစားပွဲ အခမ်းအနားမှူးများမှာ လီယွမ်ဟန်နှင့် အခြား အမျိုးသမီးအရာရှိတစ်ဦးတို့ ဖြစ်ကြသည်။ သူတို့နှစ်ဦး၏တင်ဆက်မှုမှာ အတော်ပင် ကောင်းမွန်သည်။

"အခု ကျွန်တော်တို့ရဲ့ ဘော့စ်ကို စင်ပေါ်တက်ပြီး စကားပြောကြားပေးဖို့ ဖိတ်ခေါ်ပါတယ်"

ကုန်းထျန်းဟောက် စင်ပေါ်တက်လာပြီး တိုတိုတုတ်တုတ် ပြောကြားလိုက်သည်။ "မင်္ဂလာပါ... ကျွန်တော် ကုန်းထျန်းဟောက်ပါ။ တစ်နှစ်တာလုံး ကြိုးကြိုးစားစား အလုပ်လုပ်ခဲ့ကြတဲ့အတွက် အားလုံးကို ကျေးဇူးတင်ပါတယ်။ အားလုံး ပင်ပန်းခဲ့ကြပါပြီ။ နောင်အနာဂတ်မှာလည်း အားလုံး ဆက်လက်ကြိုးစားပြီး Imperial Palaceအုပ်စုရဲ့ တောက်ပတဲ့ အနာဂတ်ကို အတူတကွ တည်ဆောက်သွားကြမယ်လို့ မျှော်လင့်ပါတယ်။ ကျွန်တော့်ရဲ့မူဝါဒကတော့ အမြဲတမ်း တစ်သမတ်တည်းပါပဲ။ ကြိုးစားအားထုတ်မှုတိုင်းမှာ အကျိုးရလဒ် ရှိရမယ်။ ခင်ဗျားတို့အားလုံးဟာ ကုမ္ပဏီရဲ့ အမာခံပုဂ္ဂိုလ်တွေပါ။ ကုမ္ပဏီရဲ့ဝန်ထမ်းတိုင်းကို ကောင်းမွန်စွာ ဆက်ဆံပါ့မယ်..."

ပုံမှန်ပွဲများတွင် ကုန်းထျန်းဟောက် တက်ရောက်လေ့ မရှိသော်လည်း နှစ်ပတ်လည်ပွဲကိုမူ နှစ်တိုင်း တက်ရောက်လေ့ရှိသည်။

နှစ်တိုင်း ကုန်းထျန်းဟောက်သည် အပိုစကားများ မပြောဘဲ ဝန်ထမ်းများကို ကြိုးစားကြရန်နှင့် Imperial Palaceအုပ်စု ဖွံ့ဖြိုးတိုးတက်ရေးအတွက် ဝိုင်းဝန်းဆောင်ရွက်ကြရန်သာ တိုက်တွန်းလေ့ရှိသည်။

ဒီနှစ်လည်း ထိုအတိုင်းပင်။

မဟုတ်သေးဘူး... ဒီနှစ် နည်းနည်း ထူးခြားတယ်။

ကုန်းထျန်းဟောက်က ဆက်ပြောလိုက်သည်။ "အခု ကျွန်တော့်ဇနီး ရှောင်လင်းယွီကို မိတ်ဆက်ပေးပါရစေ"

သူသည် လက်ညှိုးထိုးပြရုံသာမက ကိုယ်တိုင်ဆင်းသွားပြီး ရှောင်လင်းယွီကို သွားခေါ်ကာ လက်ချင်းချိတ်လျက် စင်ပေါ်သို့ တက်လာခဲ့သည်။

ကုန်းထျန်းဟောက်က ဆက်ပြောသည်။ "ဒါက ကျွန်တော့်ဇနီး ရှောင်လင်းယွီပါ။ ကျွန်တော့်ရဲ့ ချစ်ရသူလည်း ဖြစ်ပါတယ်။ ကုမ္ပဏီကလူတိုင်း သူ့ကိုတွေ့ရင် ကျွန်တော့်ကို တွေ့သလိုမျိုး လေးစားကြဖို့ မျှော်လင့်ပါတယ်"

ကုန်းထျန်းဟောက်သည် ရှောင်လင်းယွီကို သူ့ချစ်ရသူဖြစ်ကြောင်း လူတိုင်းသိအောင် ကြေညာလိုက်ခြင်းဖြစ်သည်။ ထို့အပြင် မည်သူမဆို မျက်စိမရှိ နားမရှိဘဲ သူမကို စော်ကားမိပါက သူ့ကို ရန်စသလို ဖြစ်သွားမည်ဖြစ်ကြောင်း သတိပေးလိုက်ခြင်းလည်း ဖြစ်သည်။

"မင်္ဂလာပါ... ကျွန်မက ရှောင်လင်းယွီပါ" ရှောင်လင်းယွီသည် ယဉ်ကျေးစွာ ပြုံးပြပြီး နှုတ်ဆက်လိုက်သည်။ "ရှင်တို့ဘော့စ်က ရှင်တို့ကို အနိုင်ကျင့်ရင် ကျွန်မဆီ လာတိုင်လို့ရပါတယ်။ ကျွန်မ သူ့ကို ပညာပေးလိုက်ပါ့မယ်"

"ဟားဟား..."

ရှောင်လင်းယွီ၏ စကားဆုံးသည်နှင့် ခန်းမတစ်ခုလုံး ရယ်မောသံများ ဆူညံသွားသည်။

နောက်ပြောင်ပြောဆိုခြင်း သို့မဟုတ် အမှန်တစ်ဝက်အမှားတစ်ဝက် ပြောဆိုခြင်း ဖြစ်သော်လည်း ဘော့စ်နှင့် သူဌေးကတော်၏ ချစ်ခင်ရင်းနှီးမှုကို ပေါ်လွင်စေသည်။ ဘော့စ်က သူဌေးကတော်ကို တကယ်ချစ်ကြောင်း သိသာသည်။

ထို့ကြောင့် "မယားကြောက်" ဟူသော အသံ ထွက်ပေါ်လာခြင်း ဖြစ်သည်။

ကုန်းထျန်းဟောက်သည် အမူအရာမှာနူးညံ့နေပြီး မျက်လုံးများတွင် ချစ်ရည်ရွှန်းနေသည်။ ဘေးနားရှိ ဇနီးသည်က သူ့ကို မယားကြောက်ဟု ပြောဆိုနေသည်ကိုပင် ကျေနပ်နေပုံရသည်။

နောက်ဆုံးတွင် ကုန်းထျန်းဟောက်က ထပ်ဖြည့်ပြောလိုက်သည်။ "ခင်ဗျားတို့ သူဌေးကတော်က ကျွန်တော့်ကို ကီးဘုတ်ပေါ် ဒူးထောက်ခိုင်းနိုင်ပါတယ်။ ဒါကြောင့် ကျွန်တော်တို့ လင်မယား သဟဇာတဖြစ်ဖို့အတွက် ခင်ဗျားတို့ သူဌေးကတော်ကို သွားမရှုပ်ကြပါနဲ့"

ကုန်းထျန်းဟောက်၏ စကားဆုံးသည်နှင့် ခန်းမတစ်ခုလုံး တိတ်ဆိတ်သွားသည်။ လူတိုင်း၏မျက်နှာပေါ်တွင် သရဲတွေ့လိုက်ရသကဲ့သို့ အံ့သြထိတ်လန့်သော အမူအရာများ ပေါ်လာကြသည်။

ဘော့စ်က... ဘော့စ်က သူတို့အားလုံးကို နောက်ပြောင်နေတာလား။

ဘုရားရေ... ရုံးခန်းထဲမှာ အေးစက်ပြီး ရက်စက်တဲ့ ဘော့စ်ကြီးက နောက်ပြောင်တတ်တယ်တဲ့လား။

သူတို့ နားကြားမှားတာ မဟုတ်ပါဘူးနော်။

ထို့နောက် ခန်းမထဲတွင် တီးတိုးပြောဆိုသံများ ထွက်ပေါ်လာသည်။

"နင်တို့ သတိထားမိလိုက်လား။ ဘော့စ်က သူဌေးကတော်ကို ကြည့်တဲ့အကြည့်တွေက အရည်ပျော်ကျမတတ် နူးညံ့နေတာလေ"

"အေးလေ... ဘော့စ်က သူဌေးကတော်ကို ကြည့်နေတာ ငါတို့တောင် သွားကိုက်ချင်လာပြီ။ တကယ် ချိုမြိန်လွန်းတယ်။ သူရဲကောင်းတွေလည်း အလှတရားအောက်မှာ ဒူးထောက်ရတယ်ဆိုတာ ဒါမျိုးကို ပြောတာနေမှာ။ ငါတို့ရဲ့ ဉာဏ်ကြီးရှင်၊ ချောမောခန့်ညားတဲ့၊ အေးစက်တဲ့ ဘော့စ်ကြီးလည်း အလှတရားအောက်မှာ ဒူးထောက်သွားရပြီ"

"ဟီးဟီး... ဘော့စ်က သူဌေးကတော်ကို ကြည့်တဲ့အကြည့်တွေက တကယ် ချိုမြိန်လွန်းတယ်။ ဒါပေမဲ့ နင်တို့ တစ်ခုခု ခံစားမိလား"

"ဘာခံစားမိလို့လဲ" ဘေးနားရှိ လုပ်ဖော်ကိုင်ဖက်က သံသယဖြင့် မေးလိုက်သည်။

ထိုသူက မျက်လုံးလှန်ကြည့်လိုက်ပြီး ပါးစပ်အုပ်ရယ်မောကာ ပြောလိုက်သည်။ "ဘော့စ်နဲ့ သူဌေးကတော်က ငါတို့ကို ခွေးစာကျွေးနေတယ်လို့ မထင်ဘူးလား။ ဘော့စ်က အခု အချစ်ပြနေတာလေ"

"ဟာ... မင်းပြောမှပဲ ငါလည်း ခံစားမိတော့တယ်။ ဘော့စ်က ငါတို့ကို တကယ် ခွေးစာကျွေးနေတာပဲ။ သနားစရာကောင်းတဲ့ လူပျိုကြီးဖြစ်တဲ့ငါတော့ သူတို့ရဲ့ အချစ်ဒဏ်ကို အလူးအလဲ ခံနေရပြီ"

"ပြောရရင် သူဌေးကတော်က အရမ်းလှတာကိုး။ ဘော့စ် သူ့ကို ချစ်မိသွားတာ မဆန်းပါဘူး"

သူမ၏ စကားဆုံးသည်နှင့် ဘေးနားရှိ လုပ်ဖော်ကိုင်ဖက်က မျက်မှောင်ကြုတ်ကာ သဘောမတူသည့်လေသံဖြင့် မေးလိုက်သည်။ "နင်ပြောချင်တာက ဘော့စ်က သူဌေးကတော်ရဲ့ရုပ်ရည်ကိုပဲ ကြိုက်တာပေါ့"

"ဒါက ပြောရခက်တယ်။ ဘာပဲဖြစ်ဖြစ် သူဌေးကတော်က ပြိုင်ဘက်ကင်းအောင် လှတာတော့ အမှန်ပဲလေ" ထိုသူက ပခုံးတွန့်ပြလိုက်သည်။

ဘေးနားရှိ လုပ်ဖော်ကိုင်ဖက်က ဆက်ပြောရန် ပြင်လိုက်စဉ် အာမေဋိတ်သံများ ထွက်ပေါ်လာသည်။

ကံစမ်းမဲအစီအစဉ် စတင်နေပြီဖြစ်သည်။

ကံစမ်းမဲအစီအစဉ်သည် နှစ်စဉ်နှစ်တိုင်း နှစ်ပတ်လည်ပွဲတွင် မပါမဖြစ် အစီအစဉ်ဖြစ်သည်။

Imperial Palaceအုပ်စုသည် ကြီးကျယ်ခမ်းနားပြီး ငွေကြေးကြွယ်ဝသည်။

နှစ်စဉ်နှစ်တိုင်း ကံစမ်းမဲ ဆုမဲများသည် အလွန်ကြီးမားသည်။

ဥပမာ အထူးဆုဆိုလျှင် နောက်ဆုံးပေါ် Lamborghini ပြိုင်ကားတစ်စီး ပေးသည်။

ယွမ်သန်းချီတန်သော Lamborghini ပြိုင်ကားဖြစ်သည်။

ကုမ္ပဏီအရာရှိကြီးများနှင့် ရုံးခွဲမန်နေဂျာများသည် တစ်နှစ်လျှင် ယွမ်ဆယ်သန်းကျော် ဝင်ငွေရှိကြသော်လည်း နောက်ဆုံးပေါ် Lamborghini ပြိုင်ကားတစ်စီး ဝယ်ရန်အတွက်မူ နှမြောနေကြသည်။

ထို့ကြောင့် ပြိုင်ကားလိုချင်သူများသည် နှစ်ကုန်ကံစမ်းမဲတွင် ကံကောင်းမလား စောင့်မျှော်နေကြသည်။

အထူးဆု - Lamborghini ပြိုင်ကား ၁ စီး (၁ ဦး)

ပထမဆု - လစာအပြည့်ဖြင့် ၃ လ ခွင့် (၅ ဦး)

ဒုတိယဆု - ယွမ်တစ်သန်းတန် ဘဏ်ကတ် (၁၀ ဦး)

တတိယဆု - ငွေသား ၃ သိန်း (၂၀ ဦး)

နှစ်သိမ့်ဆု - ငွေသား ၁ သိန်း (ပါဝင်သူတိုင်း ရရှိမည်)

ထို့ကြောင့် တက်ရောက်လာသူတိုင်းသည် ဆုတစ်ခုခု ရရှိပြီး ပြန်သွားကြမည်ဖြစ်သည်။

နှစ်ပတ်လည်ပွဲ တက်ရောက်နိုင်သူများသည် အရည်အချင်းရှိပြီး ပိုက်ဆံမရှားသူများ ဖြစ်ကြသည်။

ထို့ကြောင့် အများစု မျှော်လင့်နေသော ဆုများမှာ ပြိုင်ကားနှင့် လစာအပြည့် ခွင့်ရက်များ ဖြစ်ကြသည်။

ပြိုင်ကားနှင့်ယှဉ်လျှင် လစာအပြည့် ခွင့်ရက်ကို ပိုမိုလိုလားကြသည်။

သူတို့သည် ပိုက်ဆံမရှားပါးသော်လည်း အနားယူရန်နှင့် အပန်းဖြေရန် အချိန်ရှားပါးကြသည်။

နှစ်စဉ် ကံစမ်းမဲအစီအစဉ်တွင် ဆန်းသစ်သော နည်းလမ်းများကို စဉ်းစားကြသည်။

ဒီနှစ် ကံစမ်းမဲအစီအစဉ်သည် ပုံမှန်အတိုင်းပင် ဖြစ်သည်။

စက္ကူပုံးတစ်ပုံးထဲတွင် ကတ်ပြားများ ထည့်ထားသည်။ လူတစ်ယောက်လျှင် ကတ်ပြားတစ်ကတ် နှိုက်ရမည်။ ကတ်ပြားကို ခြစ်လိုက်လျှင် မည်သည့်ဆုရရှိသည်ကို သိရမည်ဖြစ်သည်။

တကယ်တော့ ကံစမ်းမဲကတ် ခြစ်ခြင်းသာ ဖြစ်သည်။

"ဟေး... ကံစမ်းမဲ စပြီဟေ့။ ငါ လစာအပြည့် ၃ လ ခွင့်ရချင်လိုက်တာ။ နိုင်ငံခြားသွားပြီး ကောင်းကောင်း အပန်းဖြေချင်တယ်"

"တော်စမ်းပါ... နှစ်တိုင်း နိုင်ငံခြားသွားနေတာပဲ။ မဝသေးဘူးလား"

"ဟင်း... နှစ်တိုင်း နိုင်ငံခြားသွားတာ အလုပ်ကိစ္စနဲ့လေ။ အလုပ်တွေများလွန်းလို့ အပန်းဖြေဖို့ အချိန်မှ မရတာ"

"ငါလည်း ၃ လ ခွင့်ရချင်တယ်။ ပထမဆု ပေါက်ပါစေ"

လူအများစုသည် ပထမဆု ရချင်နေကြသည်။

"ကဲ... ကံစမ်းမဲ စနှိုက်မယ်"

လူ့စွမ်းအားအရင်းအမြစ် မန်နေဂျာသည် စက္ကူပုံးကို ပိုက်ပြီး တစ်ဝိုင်းပြီးတစ်ဝိုင်း လိုက်နှိုက်ခိုင်းသည်။

ပထမဆုံးဝိုင်းမှာ ကုန်းထျန်းဟောက်နှင့် အစုရှယ်ယာရှင်များ ထိုင်နေသော ဝိုင်းဖြစ်သည်။

စက္ကူပုံး ရှောင်လင်းယွီရှေ့ ရောက်လာသောအခါ ရှောင်လင်းယွီ ကြောင်အသွားပြီးနောက် ပြုံးကာ ပြောလိုက်သည်။ "ကျွန်မလည်း နှိုက်လို့ရလား"

ကုန်းထျန်းဟောက်က ပြုံးကာ ပြောလိုက်သည်။ "ရတာပေါ့"

ရှောင်လင်းယွီက သံသယဖြင့် မေးလိုက်သည်။ "တကယ်လို့ ကျွန်မ လစာအပြည့် ၃ လ ခွင့်ပေါက်သွားရင် ဘယ်လိုလုပ်မလဲ"

အားလုံး - "......"

ထို့နောက် ရှောင်လင်းယွီက ငြင်းပယ်လိုက်သည်။ "ကဲပါ... ကျွန်မ မနှိုက်တော့ပါဘူး။ ကျွန်မကို နှစ်သိမ့်ဆုပဲ ပေးလိုက်ပါ"

ကုန်းထျန်းဟောက် ခေါင်းညိတ်လိုက်ပြီး မန်နေဂျာကို ပြောလိုက်သည်။ "အင်း... ငါတို့ ကံစမ်းမဲ မနှိုက်တော့ဘူး။ တခြားဝိုင်းတွေကို သွားလိုက်တော့"

အစုရှယ်ယာရှင်များသည်လည်း ရုံးတက်စရာမလိုသူများ၊ ပိုက်ဆံမရှားသူများ ဖြစ်ကြသဖြင့် ကံစမ်းမဲနှိုက်ရန် မလိုအပ်ပေ။

"ဟာ... ငါ ပထမဆု ပေါက်တယ်ဟေ့" မကြာမီ တစ်စုံတစ်ယောက်က စိတ်လှုပ်ရှားစွာ အော်ဟစ်လိုက်သည်။

"ဝါး... မင်း ကံကောင်းလိုက်တာ" လူအများက အားကျစွာ ကြည့်လိုက်ကြသည်။

"ဟူး... ငါက တတိယဆုပဲ"

"ငါက နှစ်သိမ့်ဆုပဲ"

ကံစမ်းမဲအစီအစဉ်သည် ပါဝင်ဆင်နွှဲခြင်းသာ အဓိကဖြစ်ပြီး ကုမ္ပဏီက ပိုက်ဆံဝေပေးခြင်းလည်း ဖြစ်သည်။

တစ်ပတ်လည်သွားပြီးနောက် ကံစမ်းမဲရလဒ်များ ထွက်ပေါ်လာသည်။

အထူးဆု၊ ပထမဆုနှင့် ဒုတိယဆုများကို ကုန်းထျန်းဟောက် ကိုယ်တိုင်ချီးမြှင့်ပြီး ကျန်ဆုများကို လီယွမ်ဟန်က ချီးမြှင့်သည်။

ကံစမ်းမဲအစီအစဉ် ပြီးဆုံးပြီးနောက် ကပွဲ စတင်သည်။

အဖွင့်ကပွဲကို ဘော့စ်နှင့် ဘော့စ်ကတော်က ဦးဆောင်ကပြရမည် ဖြစ်သည်။

ရှောင်လင်းယွီသည် တောသူမဖြစ်ကြောင်း လူအများ သိထားကြသည်။ သူမ နိုင်ငံတကာ စုံတွဲအကကို ကတတ်မကတတ် မသိကြပေ။

မကတတ်လျှင် အရှက်ကွဲရပေလိမ့်မည်။ အချို့က မျှော်လင့်နေကြသလို အချို့က အထင်သေးနေကြသည်။

ဒီမိန်းမက ရုပ်ရည်လေးနဲ့ ဘော့စ်ကို ဖမ်းစားထားတာပဲ။ မိန်းမတစ်ယောက်က လှရုံနဲ့မပြီးဘူး။ အရည်အချင်းရှိဖို့ လိုတယ်။ အထူးသဖြင့် ယောကျ်ားကို အရှက်ခွဲမယ့် မိန်းမမျိုးဆိုရင် မြန်မြန် အပစ်ပယ်ခံရမှာပဲ။

အချို့က ထိုသို့သော အဖြစ်အပျက်မျိုးကို မျှော်လင့်နေကြသည်။

သို့သော် ရှောင်လင်းယွီသည် စီးပွားရေးလောကတွင် နှစ်ပေါင်းများစွာ ကျင်လည်ခဲ့သူဖြစ်ပြီး လူပေါင်းစုံ၊ ပွဲပေါင်းစုံ ကြုံတွေ့ခဲ့ဖူးသည်ကို သူတို့ မသိကြပေ။

ညစာစားပွဲများတွင် နိုင်ငံတကာ စုံတွဲအက ကတတ်ခြင်းသည် အခြေခံကျွမ်းကျင်မှုတစ်ခုသာ ဖြစ်သည်။

တန်ဂိုဂီတသံ ထွက်ပေါ်လာသောအခါ ရောင်စုံမီးရောင်များ လင်းလက်လာသည်။

လီယွမ်ဟန်သည် မိုက်ကိုကိုင်ကာ ကျယ်လောင်စွာ ပြောလိုက်သည်။ "အခု ကျွန်တော်တို့ရဲ့ ဘော့စ်နဲ့ ဘော့စ်ကတော်ကို အဖွင့်ကပွဲ ကပြဖို့ ဖိတ်ခေါ်လိုက်ပါတယ်။ အားလုံး ဘယ်လိုသဘောရလဲ"

"ကောင်းတယ်" အားလုံးက ဟစ်အော်လိုက်ကြသည်။

ထို့နောက် လက်ခုပ်သံများ ဆူညံစွာ ထွက်ပေါ်လာသည်။

ကုန်းထျန်းဟောက် မတ်တတ်ရပ်လိုက်ပြီး ရှောင်လင်းယွီကို လက်ကမ်းပေးကာ ယဉ်ကျေးစွာ ပြောလိုက်သည်။ "ချစ်ရတဲ့အလှလေး... ကိုယ်နဲ့အတူ ကပေးနိုင်မလား"

ဘော့စ်၏ ယနေ့အပြုအမူများသည် ဝန်ထမ်းများကို အံ့သြစေခဲ့သည်။ ပုံမှန်နှင့်မတူဘဲ တစ်ခြားလူတစ်ယောက် ဖြစ်နေသကဲ့သို့ပင်။ ဝန်ထမ်းများသည် စိတ်ထဲတွင်ကျိတ်ပြီး ဝေဖန်နေကြသည်။ ဘော့စ်က ဒီည သူတို့ကို ခွေးစာကျွေးနေတာပဲ။ ရိုးနေပါပြီ။

သို့သော် ဘော့စ်ရွေးချယ်ထားသော သူဌေးကတော် ကတတ်မကတတ်၊ ဘယ်လောက်ကျွမ်းကျင်လဲ ဆိုတာကိုတော့ လူအများက သိချင်နေကြသည်။

ရှောင်လင်းယွီ ပြုံးလိုက်ပြီး ကုန်းထျန်းဟောက်၏ လက်ပေါ်သို့ သူမလက်ကို တင်လိုက်ကာ ပြုံးလျက် ပြောလိုက်သည်။ "ရတာပေါ့"

ထို့နောက် သူတို့နှစ်ဦး လက်ချင်းချိတ်ကာ ကပွဲစင်မြင့်အလယ်သို့ လျှောက်သွားကြသည်။

ဂီတသံ ပြန်လည် ထွက်ပေါ်လာသည်။

***