တူညီသော ကံကြမ္မာ

ခုန်းရှီ၏မနာလိုမှုကို ဂရုမစိုက်ဘဲ ဤအချိန်တွင် ကျန်းရွှမ်၏စိတ်အာရုံသည် ရွှမ်ကမ္ဘာအတွင်း၌ နစ်မြုပ်နေပြီး သူ၏ရှေ့မှ ဆန်းကြယ်သော မြင်ကွင်းကို မယုံကြည်နိုင်စွာဖြင့် ကြည့်နေသည်။

ရွှမ်ကမ္ဘာနှင့်ရင်းမြစ်ကမ္ဘာကို ချိတ်ဆက်ထားသော နေရာသည် ဖရိုဖရဲဖြစ်နေသော နေရာတစ်နေရာနှင့် တူညီပေ၏။ ရွှမ်ကမ္ဘာ၏အရပ်ရှစ်မျက်နှာတွင် ရှည်လျားသော စွမ်းအင်မြစ်ကြီးရှစ်စင်း တည်ရှိနေပြီး မိုးကောင်းကင်မှ ဆင်းသက်လာသော ငွေရောင်ကြယ်စင်မြစ်များ အလားပင်။

ကောင်းကင်ဘုံသောကကံကြမ္မာသည် ထိုအရာများ၏အလယ်ဗဟိုတည့်တည့်တွင် ဧကရာဇ်တစ်ပါးကဲ့သို့ အခိုင်အမာ ရပ်တည်နေသည်။ မရေမတွက်နိုင်သော ကံကြမ္မာကြိုးမျှင်များသည် မြစ်ရှစ်စင်းထဲသို့ ပင့်ကူအိမ်အလား ရှုပ်ထွေးစွာ ဖြန့်ကျက်ထားသည်။

"ဒါက ဘာကြီးလဲ"

ကျန်းရွှမ်၏စိတ်ထဲတွင် ထိတ်လန့်တုန်လှုပ်သွားပြီး သူ၏မျက်စိရှေ့မှမြင်ကွင်း ပျောက်ကွယ်သွားသည်။ သူ ပြန်မော့ကြည့်လိုက်ချိန်တွင် မြစ်များ ထွက်ပေါ်လာခဲ့သော နေရာသည် ဗလာဟင်းလင်းဖြစ်နေပြီး အမှောင်ထုကြီးမှလွဲ၍ တခြားမည်သည့်အရာမျှ မရှိတော့ပေ။

"ဒါက... ငါ့ရဲ့ ကံကြမ္မာစွမ်းအင်မြစ်လား..."

ကျန်းရွှမ် စိတ်ဝင်စားသွားသည်။

တစ်စုံတစ်ယောက်၏ ကျင့်ကြံဆင့်သည် အသက်ပင်လယ်နယ်ပယ်သို့ ရောက်ရှိသွားသည်နှင့် ပုံရိပ်ယောင်နယ်ပယ်ထဲမှ ကံကြမ္မာစွမ်းအင်မြစ်ကို ဆွဲထုတ်နိုင်ပြီး တချို့အရာများကို ကံကြမ္မာပုံစံအဖြစ် ပြောင်းလဲနိုင်သည်။ ဤသည်ကို "ကံကြမ္မာနှင့် ပေါင်းစည်းခြင်း" ဟု ခေါ်ဆိုပေ၏။

ဥပမာအားဖြင့် ကျန်းလီသည် ဆေးဖော်စပ်ရာတွင် သူ၏ကိုယ်ပိုင်ကံကြမ္မာကို ပုံရိပ်ယောင်နယ်ပယ်မှ ဆွဲထုတ်ပြီး ဆေးဖက်ဝင်ပစ္စည်းများကို သန့်စင်လိုက်ရာ မျက်စိတစ်မှိတ်အတွင်းမှာပင် ဆေးလုံးများ ဖြစ်ပေါ်လာစေသည်။ အများဆုံးအနေဖြင့် သူသည် ကောင်းကင်ကံကြမ္မာစွမ်းအား အနည်းငယ်သာ ကုန်ဆုံးသည်။

မိုတောက်ကံကြမ္မာသာ ဤအဆင့်သို့ ရောက်ရှိပါက မြစ်ကို ထုတ်လွှတ်လိုက်သည်နှင့် မရေမတွက်နိုင်သော ဓားချီစွမ်းအားများအဖြစ် ပြောင်းလဲသွားမည်ဖြစ်ပြီး အဆင့်တူများထဲတွင် ခုခံနိုင်သူ ရှားပါးပေလိမ့်မည်။

သေချာသည်မှာ စွမ်းအင်မြစ်ထဲရှိ ဓားစိတ်ဆန္ဒ တစ်ခုစီ ဆေးဖော်စပ်နည်းတစ်ခုစီသည် နေ့စဉ်နေ့တိုင်း စုဆောင်းထားသော ကြိုးစားအားထုတ်မှု၏ရလဒ်ဖြစ်ပြီး တစ်ညတည်းဖြင့် ရရှိနိုင်သည့်အရာ မဟုတ်ချေ။

ပုံမှန်အားဖြင့် တစ်စုံတစ်ယောက်သည် အသက်ပင်လယ်နယ်ပယ်သို့ မရောက်မချင်း ကံကြမ္မာစွမ်းအင်မြစ်ကို ဆွဲထုတ်ရန် မဆိုထားနှင့် မြင်တွေ့ရန်ပင် မဖြစ်နိုင်ပေ။ သို့ရာတွင် ယခုအချိန်၌ စိတ်ဝိညာဉ် လေဟာနယ်ဖြိုခွင်းခြင်း အဆိပ်ဆေးလုံးနှင့် တခြားဆေးဝါးများ၏ အကူအညီဖြင့် ကံကြမ္မာစွမ်းအင်မြစ်ကို သူ မြင်တွေ့နိုင်ခဲ့လေပြီ။

သို့ရာတွင် ဤဆေးစွမ်းအာနိသင်များသည် အသက်သုံးရှိုက်စာခန့်သာ ကြာမြင့်ပြီး သူ အဆင့်တက်တော့မည့် စွမ်းအားများနှင့်အတူ လျင်မြန်စွာ ပျောက်ကွယ်သွားသည်။

ဆိုလိုသည်မှာ သူသာ ဤကံကြမ္မာစွမ်းအင်မြစ်ကို တဒင်္ဂကြာမျှ မမြင်တွေ့လိုက်ရလျှင် သူ ကြယ်စင်မြစ်နယ်ပယ် သတ္တမအဆင့်သို့ အမှန်တကယ် ရောက်ရှိသွားနိုင်ခြင်းပင်။

"ကံကြမ္မာစွမ်းအင်မြစ်ကို မြင်ရပြီဆိုတော့... တိုက်ပွဲတွေမှာ ဆွဲထုတ်သုံးလို့ ရပြီလို့ ဆိုလိုတာလား"

ကျန်းရွှမ်ထံ၌ အတွေးတစ်ခု ပေါက်ဖွားလာသည်။

စွမ်းအင်မြစ်ကို တိုက်ပွဲထဲသို့ ဆွဲသွင်းခြင်းသည် အသက်ပင်လယ်နယ်ပယ် ထိပ်သီးကျင့်ကြံသူများသာ လုပ်ဆောင်နိုင်သော စွမ်းရည်ပင်။ အကယ်၍ သူသာ ထိုကိစ္စကို လုပ်ဆောင်နိုင်လျှင် အသက်ပင်လယ်နယ်ပယ် ကျွမ်းကျင်သူများကိုပင် ကြောက်ရွံရန်မလိုဟု ဆိုလိုခြင်း မဟုတ်လော။

သူ၏စွမ်းအင်မြစ်သည် အားနည်းပုံရသော်လည်း အဆင့်အတန်းသည် အလွန်မြင့်မားပြီး ထုံးတမ်းစဥ်လာ ကောင်းကင်ကံကြမ္မာကိုပင် ကျော်လွန်ကာ ပထမတန်းစားအဆင့်၌ ရှိနေပေ၏။

ထိုအဆင့်အတန်းမျိုးကြောင့် အကယ်၍ စွမ်းအားပမာဏ နည်းပါးလျှင်ပင် အရည်အသွေးကို ဖာထေးအသုံးပြုပါက အားနည်းချက် သိပ်ရှိမည် မဟုတ်ပေ။

"ဒါပေမဲ့... ဒီအရာကို သုံးရင် ကုန်ဆုံးမယ့် စွမ်းအားက အရမ်းများလွန်းတယ်... ငါ အသက်အန္တရာယ် မကျရောက်မချင်း မသုံးတာက ပိုကောင်းလိမ့်မယ်"

သူသည် ဆေးလုံးအမြောက်အများကို စမ်းသပ်ပြီးနောက် စိတ်ဝိညာဉ် လေဟာနယ်ဖြိုခွင်းခြင်း အဆိပ်ဆေးလုံး နှင့် အောင်မြင်စွာဖော်စပ်ထားသော မြေကမ္ဘာငရဲအဝါရောင်ဆေးလုံး နှစ်ပုလင်းကို စားသုံးပြီးမှသာ ထိုစွမ်းအင်မြစ်ကို အသက်သုံးရှိုက်စာမျှ မြင်တွေ့ခဲ့ရခြင်း ဖြစ်သည်။ ထိုစွမ်းအင်မြစ်ကို ဆွဲထုတ်ပြီး တိုက်ပွဲဝင်ရန်အတွက် မည်မျှထိများပြားသော စွမ်းအားများ ကုန်ဆုံးမည်ကို မည်သူ သိနိုင်မည်နည်း။

သို့ရာတွင် ဤသည်မှာ သူ၏ လက်ရှိစွမ်းအား နိမ့်ကျနေခြင်းကြောင့်လည်း ဖြစ်သည်။ သူသည် ကြယ်စင်မြစ်နယ်ပယ် သတ္တမအဆင့်သို့ ရောက်ရှိပြီး ကောင်းကင်ဘုံသောကကံကြမ္မာကို စတုတ္ထအဆင့်အထိ နားလည်သဘောပေါက်နိုင်ပါက ထိုကိစ္စသည် ပို၍လွယ်ကူလာပေလိမ့်မည်။

"ငါ အမြန်ဆုံး အဆင့်တက်မှ ဖြစ်မယ်..."

အတွေးတစ်ချက်ဖြင့် သူ၏အသိစိတ်အာရုံသည် ကောင်းကင်ဘုံစာကြည့်တိုက် သို့ ပြန်ရောက်သွားပြီး အတွင်း၌ ပျံဝဲနေသော စွမ်းအင်မြစ်ပေါ်သို့ ကျရောက်သွားသည်။

စာကြည့်တိုက်အတွင်းရှိ ဤမြစ်သည် ရင်းမြစ်ကမ္ဘာတွင် သူ မြင်တွေ့ခဲ့ရသောမြစ်နှင့် တထပ်တည်းတူညီသော်လည်း အဆပေါင်းများစွာ သေးငယ်နေပေ၏။

"စာကြည့်တိုက်ထဲက ကံကြမ္မာစွမ်းအင်မြစ်က ရင်းမြစ်ကမ္ဘာမှာရှိတဲ့ဟာရဲ့ ပုံတူဖြစ်လောက်တယ်... ဒါကို နားလည်သဘောပေါက်ရင် ရင်းမြစ်ကမ္ဘာရဲ့ ကောင်းကင်ဘုံသောကကံကြမ္မာကိုလည်း ငါ နားလည်နိုင်မှာပဲ..."

ကျန်းရွှမ် ဉာဏ်အလင်းပွင့်သွားသည်။

ကမ္ဘာသစ်သည် ကမ္ဘာတစ်ခုဖြစ်ပြီး ရင်းမြစ်ကမ္ဘာသည်လည်း ကမ္ဘာတစ်ခုပင်။

ဤအရာနှစ်ခုသည် အရွယ်အစားနှင့်စွမ်းအား ကွာခြားသော်လည်း အမျိုးအစားချင်း တူညီကြသည်။ ထို့ကြောင့် ကောင်းကင်ဘုံစာကြည့်တိုက် ထဲတွင် ထွက်ပေါ်လာသော ကံကြမ္မာစွမ်းအင်မြစ်သည် ရင်းမြစ်ကမ္ဘာရှိ ကံကြမ္မာစွမ်းအင်မြစ်နှင့် တူညီသောစည်းမျဥ်းများအတိုင်း လိုက်နာသင့်သည်။

သူ၏ရှေ့မှ စွမ်းအင်မြစ်ကို သူ ပို၍နားလည်သဘောပေါက်နိုင်ပါက တနေ့တွင် သူ အစောပိုင်းက မြင်တွေ့လိုက်ရသည့် ဧကရာဇ်တစ်ပါးကဲ့သို့ ခမ်းနားထည်ဝါသော မြစ်ကြီးကို ထိန်းချုပ်နိုင်ပေလိမ့်မည်။

စာကြည့်တိုက်ဆိုသည်မှာ သူ၏ကိုယ်ပိုင်ကမ္ဘာသစ်အတွင်း၌ ရှိနေခြင်းနှင့် ထပ်တူထပ်မျှပင်။ ကမ္ဘာတစ်ခု၏အရှင်သခင်အနေဖြင့် ထိုကိစ္စကို သူ နားလည်သဘောပေါက်ရန်မှာ သာမန်လူများထက် သေချာပေါက် ပို၍လွယ်ကူပေမည်။

ဤကဲ့သို့ တွေးတောကြည့်ချိန်တွင် သူ့ထံ၌ ကြီးမားသော ဖြတ်လမ်းနည်းကြီး ရှိနေသည် မဟုတ်လော....

သူသည် ဤနေရာက ကံကြမ္မာကို ပုံမှန်လေ့လာနေသရွေ့ ရင်းမြစ်ကမ္ဘာ၏ကံကြမ္မာကို နားလည်သဘောပေါက်သည်နှင့် တူညီသည် မဟုတ်လော...

သူ၏စွမ်းအားများ အလျှင်အမြန် မြင့်တက်လာသည်မှာ အံ့အားသင့်ဖွယ်ရာ မဟုတ်တော့ချေ။ သူသည် ရင်းမြစ်ကမ္ဘာသို့ ရောက်လာသည်မှာ နှစ်လကျော်ရုံသာ ရှိသေးသော်လည်း ကောင်းကင်ဘုံသောကကံကြမ္မာကို တတိယအဆင့် အထွတ်အထိပ်ထိ နားလည်သဘောပေါက်ထားသည်။ ထို့ပြင် မိုတောက်နှင့်မြေခွေးညှို့ငင်ကံကြမ္မာများအပေါ် နားလည်သဘောပေါက်မှုသည်လည်း စတုတ္ထအဆင့်ထိ ရောက်ရှိထားပေ၏။

ဤကိစ္စများ၏ အဓိကအကြောင်းအရင်းသည် အမှန်အားဖြင့် ဤနေရာ၌ ရှိနေခြင်းပင်။

ကျန်းရွှမ်ထံ၌ စိတ်လှုပ်ရှားမှုများဖြင့် ပြည့်နှက်နေပြီး ကံကြမ္မာ စတုတ္ထအဆင့်သို့ ရောက်ရှိရန်နှင့် ကြယ်စင်မြစ်နယ်ပယ် သတ္တမအဆင့်သို့ တက်လှမ်းရန် ကြိုးစားမည်ဟု တွေးတောလိုက်သည်။ ထိုအချိန်မှာပင် သူ၏အကြည့် ရွေ့လျားသွားပြီး နေရာတွင်ပင် တောင့်တင်းသွားသည်။

ကောင်းကင်ဘုံသောကကံကြမ္မာ၏ နံဘေးတွင် ရှေးဟောင်းသင်္ကေတများစွာဖြင့် ဖွဲ့စည်းထားသော စွမ်းအင်မြစ်အသစ်တစ်စင်းသည် မည်သည့်အချိန်က ထွက်ပေါ်လာသည်ကို သူ မသိခဲ့ချေ။ ထိုစွမ်းအင်မြစ်သည် မြွေငယ်လေးတစ်ကောင်အလား ပုံရိပ်ယောင်လေဟာနယ်ကို ဖြတ်သန်းစီးဆင်းနေသည်။

"ဒါက... လေဟာနယ်ကံကြမ္မာ လား... ဒါကိုတောင် ပုံတူကူးနိုင်တာလား"

ကျန်းရွှမ် မယုံကြည်နိုင် ဖြစ်သွားသည်။

လေဟာနယ်ကံကြမ္မာသည် သူ ကူးပြောင်းရေးဝင်္ကပါကို အသုံးပြုစဉ်က ထွက်ပေါ်လာခဲ့ခြင်းပင်။ နောက်ဆက်တွဲ ဖြစ်ရပ်များကြောင့် သူသည် ထိုကိစ္စကို မမြင်တွေ့လိုက်ရသော်လည်း ယခုအချိန်၌ ဒုတိယတန်းစား ကောင်းကင်ကံကြမ္မာတစ်ခုသည် စာကြည့်တိုက်ထဲတွင် ထွက်ပေါ်လာကြောင်း သူ သိလိုက်ရပေ၏။

ဤကံကြမ္မာသည် ပထမအဆင့်တွင်သာ ရှိနေသဖြင့် အားနည်းပုံရသော်လည်း ထိုအရာထံတွင် ဒုတိယတန်းစား အဆင့်အတန်း ရှိသည်။ ထိုကံကြမ္မာကို ပြုစုပျိုးထောင်ရန် လုံလောက်သော ကောင်းကင်ကံကြမ္မာစွမ်းအားရှိပါက အလွန်အမင်း တိုးတက်လာမည်မှာ သေချာပေါက်ပင်။

သို့ရာတွင် ဤအံ့အားသင့်ဖွယ်ရာ ကိစ္စရပ်များအားလုံးထက် ပို၍အရေးကြီးသည်မှာ စာကြည့်တိုက်သည် ဤအရာကိုပင် ပုံတူကူးနိုင်လျှင် ပို၍မြင့်မားသော အဆင့်တွင်ရှိသည့် ကံကြမ္မာများကိုလည်း ပုံတူကူးနိုင်သည်ဟု ဆိုလိုခြင်း မဟုတ်လော....

ကမ္ဘာပေါ်တွင် ပထမတန်းစား ကံကြမ္မာ စုစုပေါင်းရှစ်မျိုးရှိပြီး ထိုအရာများ၏အမည်များကို လက်ရှိတွင် သူ မသိရှိသေးချေ။ သူသည် ထိုအရာများအားလုံးကို ပုံတူကူးနိုင်ပါက ရင်းမြစ်ကမ္ဘာ၏ ထိပ်ဆုံးနေရာတွင် ရပ်တည်နိုင်မည့် အစစ်အမှန် ထိပ်သီးတည်ရှိမှုကြီးတစ်ဦး ဖြစ်လာနိုင်သည် မဟုတ်လော။

"မိတ်ဆွေလေး..."

ထိုအချိန်မှာပင် အသံတစ်သံ ထွက်ပေါ်လာသည်။

ကျန်းရွှမ်က မော့ကြည့်လိုက်ရာ ကျန်းလီ ယောင်ယွင်နှင့် တခြားလူများသည် သူ့ကို စူးစိုက်၍ကြည့်နေကြပြီး သူတို့၏မျက်လုံးများတွင် ဇဝေဇဝါအရိပ်အယောင်များ ထင်ဟပ်နေသည်ကို မြင်တွေ့လိုက်ရသည်။

"ကျွန်တော် အဆင်ပြေပါတယ်..."

ကျန်းရွှမ်က သက်ပြင်းတစ်ချက်ချပြီး ခပ်ဖျော့ဖျော့ပြုံးလိုက်သည်။

"စမ်းသပ်မှုကို ဆက်လုပ်ကြတာပေါ့"

ယခုအချိန်၌ သူသည် ကံကြမ္မာကို လျင်မြန်စွာ နားလည်သဘောပေါက်နိုင်သည့် နည်းလမ်းကို ရှာတွေ့သွားလေပြီ။ ထို့ကြောင့် အရေးကြီးဆုံးအချက်မှာ ဆေးစွမ်းအားနှင့်ကောင်းကင်ကံကြမ္မာစွမ်းအားများကို စုဆောင်းရန်ပင်။

သူ့ထံ၌ စွမ်းအားများ အလုံအလောက် ရှိနေပါက သူ၏ကျင့်ကြံမှုသည် မီးကျည်တစ်ခုကဲ့သို့အရှိန်နှုန်းဖြင့် တိုးတက်လာနိုင်သည်။

သူသည် နှစ်အနည်းငယ် သို့မဟုတ် လအနည်းငယ်အတွင်းတွင် အသက်ပင်လယ်နယ်ပယ်သို့ အောင်မြင်စွာ တက်လှမ်းနိုင်ပေမည်။

"ခုဏက မင်း ဆေးသောက်ပြီးတော့ ဘာခံစားရလဲ"

ကျန်းလီက မနေနိုင်တော့ဘဲ မေးမြန်းလိုက်သည်။

"ဟုတ်ကဲ့... ခံစားချက်က..."

တစ်ဖက်လူသည် ဆေးဖော်စပ်မှု အောင်မြင်ရန်မှာ ဤအရာအပေါ် မှီခိုနေရကြောင်း သိထားသဖြင့် ကျန်းရွှမ်က စုတ်တံကိုကိုင်ပြီး စဉ်းစားတွေးတောလိုက်၏။

ယခုလက်ရှိ ဖော်စပ်ထားသော စိတ်ဝိညာဉ်လေဟာနယ်ဖြိုခွင်းခြင်း အဆိပ်ဆေးလုံးတွင် အဆိပ်ဖြေနိုင်စွမ်းတချို့ ရှိသော်လည်း လေနတ်ဆိုးဝံပုလွေ၏ ရင်းမြစ်သလင်းကျောက်ကို အသုံးပြုထားသဖြင့် လူကို အလွယ်တကူ ရူးသွပ်စေနိုင်သည်။

ဤဆေးလုံးအတွင်းတွင် ရေခဲနွယ်ချိုကဲ့သို့သော ရေခဲဂုဏ်သတ္တိရှိသည့် ပါဝင်ပစ္စည်းများကို ထည့်သွင်းပါက ဤစွမ်းအားကို မျှတစေပြီး အရေးကြီးသော အချိန်များတွင် သောက်သုံးသူ၏စိတ်ကို ကြည်လင်စေနိုင်သည်။

ထိုကြောင့် အစောပိုင်းက သူသည် မြေကမ္ဘာငရဲအဝါရောင်ဆေးလုံးကို တောင်းဆိုခဲ့ခြင်းပင်။

အကြောင်းအရင်းမှာ လောလောလတ်လတ် ပြင်ဆင်၍ဖော်စပ်ထားသော မြေကမ္ဘာငရဲအဝါရောင်ဆေးလုံး တွင် ထိုကဲ့သို့ ဆေးဖက်ဝင်ပစ္စည်းများ ပါဝင်သောကြောင့်ပင်။

သို့ရာတွင် သူ ထိုကိစ္စကို တိုက်ရိုက်ပြောဆိုလိုက်လျှင် မကောင်းသည့်အပြင် သူ၏အစွမ်းအစများ အလွန်သိသာထင်ရှားနေပေသည်။

ထို့ကြောင့် သူ၏ချဉ်းကပ်မှုသည် ပို၍လိမ္မာပါးနပ်ပြီး ပညာသားပါရန် လိုအပ်ပေ၏။

အတွေးတစ်ချက်နှင့်အတူ ကျန်းရွှမ်ထံ၌ စိတ်ကူးတစ်ခု ပေါ်လာပြီး သူက စာရွက်ပေါ်၌ ပေါ့ပေါ့ပါးပါး ရေးသားလိုက်သည်။

ယောင်ယွင်သည် မနေနိုင်တော့ဘဲ အနားကပ်ကြည့်လိုက်ရာ စာမဆုံးခင်မှာပင် သူ နေရာ၌ ကြက်သေသေသွားသည်။

"ဒီဆေးက အများကြီးစားပြီးရင် ရေငတ်စေတယ်... မီးစွမ်းအင်က တော်တော်ပြင်းထန်တယ်... ရေခဲအရသာ ဟင်းခတ်အမွှေးအကြိုင် လေး နည်းနည်းလောက် ထည့်လိုက်ရင် ပိုကောင်းသွားလိမ့်မယ်..."

'ဒါက... ဆေးစမ်းသပ်နေတာလား... အစားအသောက် သုံးသပ်ချက်ကို ရေးနေတာလား...'