ပြောင်းလဲမှုများ

~ကျွမ်းကျင်မှု မျက်နှာပြင်ပေါ်တွင် စာတန်းအသစ် တစ်ကြောင်း တိတ်တဆိတ် ပေါ်ထွက်လာလေသည်။

[ ကျင့်စဉ် - အစိမ်းရောင် သစ်သား နှစ်ပတ်လည် ကွင်း ကျင့်စဉ် (ပထမအဆင့် တစ်ပတ်၊ ကျွမ်းကျင်မှု ၀.၀၁%) ]

စုယွီ သည် "ဝူထုံ နှလုံးသားသိုင်းကျမ်း" မှ ဝိဉာဉ် စွမ်းအင် အားလုံးကို "နှစ်ပတ်လည် ကွင်း ကျင့်စဉ်" သို့ ပြောင်းလဲလိုက်သောအခါ၊ စာတန်းများ ထပ်မံ ပြောင်းလဲသွားပြန်သည်။

[ ကျင့်စဉ် - အစိမ်းရောင် သစ်သား နှစ်ပတ်လည် ကွင်း ကျင့်စဉ် (ပထမအဆင့် သုံးပတ်၊ ကျွမ်းကျင်မှု ၄.၄%) ]

"ဝူထုံ နှလုံးသားသိုင်းကျမ်း" ဆိုသော စာတန်းသည် လုံးဝ ပျောက်ကွယ်သွားပြီး၊ "နှစ်ပတ်လည် ကွင်း ကျင့်စဉ်" သာ ကျန်ရှိတော့၏။

စုယွီ၏ ခန္ဓာကိုယ်မှ ရှေးကျပြီး ဆန်းကြယ်သော၊ နှစ်ကာလများ၏ အရှိန်အဝါ တစ်ခု ထွက်ပေါ်လာလေသည်။ တစ်ချိန်တည်းမှာပင်... "ပထမအဆင့် တစ်ပတ်" ဆိုသည့် အဓိပ္ပာယ်ကို သူ နားလည် သဘောပေါက်သွားသည်။

သစ်ပင် တစ်ပင်၏ နှစ်ပတ်လည် ကွင်းများ ကဲ့သို့ပင်... ဤကျင့်စဉ်ကို လေ့ကျင့်ခြင်းသည် ခန္ဓာကိုယ်ပေါ်တွင် နှစ်ကာလများ၏ အမှတ်အသားကို ရေးထွင်းလိုက်ခြင်းပင်။

ရာစုနှစ် တစ်ခုလျှင် အဆင့်တစ်ဆင့်၊ အဆင့်တစ်ဆင့်လျှင် တစ်ပတ်။

တစ်ပတ် လည်တိုင်း... အရေခွံ လဲလှယ်လိုက်သကဲ့သို့ အဆင့်အတန်း တစ်ခု မြင့်တက်သွားခြင်း ဖြစ်၏။

ပထမအဆင့် သုံးပတ် ဆိုသည်မှာ... "ချီစွမ်းအင် စုစည်းခြင်း တတိယအဆင့်" နှင့် ညီမျှလေသည်။

မူလက "နှစ်ပတ်လည် ကွင်း ကျင့်စဉ်" ၏ ဝိဉာဉ် စွမ်းအင်သည် မပြင်းထန်လှသော်လည်း၊ တစ်ပတ်ပြီး တစ်ပတ် လည်ပတ်လာသည်နှင့်အမျှ... ဝိဉာဉ် စွမ်းအင်များသည် အသွင်ပြောင်းလဲပြီး ပိုမို စွမ်းအားကြီးလာမည် ဖြစ်၏။

ထို့အပြင်... "နှစ်ပတ်လည် ကွင်း ကျင့်စဉ်" သည် "ဝူထုံ ကျင့်စဉ်" ထက် သက်တမ်းကို ပိုရှည်စေနိုင်သော အာနိသင် ရှိလေသည်။

"ဝူထုံ ကျင့်စဉ်" ဖြင့် ချီစွမ်းအင် တတိယအဆင့် ရောက်ချိန်တွင် သက်တမ်းက (၁၀၀) သာ ရှိသည်။

သို့သော်၊ ယခုတော့...

စုယွီ ကျွမ်းကျင်မှု မျက်နှာပြင်ကို ကြည့်လိုက်သည်။

[ သက်တမ်း - ၁၈ / ၁၀၄ ]

ကျင့်စဉ် ပြောင်းလိုက်ရုံနှင့်တင်... သက်တမ်းက (၄) နှစ် တိုးလာခဲ့ပြီ ဖြစ်သတည်း။

“တကယ်လို့ ချီစွမ်းအင် ကိုးဆင့်မြောက် အထိ ရောက်သွားရင်... အနည်းဆုံး သက်တမ်း (၃၀)၊ (၄၀) လောက်တော့ ပိုရှည်လာနိုင်လောက်တယ်။ ဒုတိယ အဆင့် ရောက်ရင် ပိုတောင် ရှည်ဦးမယ်... (၇၀)၊ (၈၀) လောက် အထိ ရှည်နိုင်တယ်"

စုယွီ အသက်ပြင်းပြင်း ရှူလိုက်မိသည်။

ဒီကျင့်စဉ်က တကယ်ကို စွမ်းအားကြီးတာပဲ။

တခြား အချက်တွေ ထားလိုက်ဦး... သက်တမ်း ရှည်စေသည့် အာနိသင် တစ်ခုတည်းနှင့်တင် ကျင့်ကြံသူ တော်တော်များများ မနာလို ဖြစ်သွားစေနိုင်၏။

တခြား ကျင့်ကြံသူတွေထက် သက်တမ်း ပိုရှည်တယ် ဆိုတာက... အင်မော်တယ် (သို့မဟုတ်) သူတော်စင် ဖြစ်လာဖို့ အခွင့်အရေး ပိုများသည် ဆိုသော သဘောပင် ဖြစ်ပါ၏။

ခန္ဓာကိုယ်ပေါ်မှ သိမ်မွေ့သော အချိန်ကာလ အရှိန်အဝါကို ခံစားရင်း၊ စုယွီ မျက်မှောင်ကြုတ်လိုက်မိသည်။

ဒီအရှိန်အဝါက... သက်တမ်း ရှည်စေတာထက် ပိုသော တစ်စုံတစ်ခု ရှိနေသလိုပင်။

ရိုးရိုးရှင်းရှင်း သက်တမ်း ရှည်စေတာ သက်သက် မဟုတ်လောက်ပါ။

နှမြောစရာ ကောင်းတာက... ဒီအရှိန်အဝါက အားနည်းလွန်းနေသေးခြင်းပါပဲ။

"နှစ်ပတ်လည် ကွင်း ကျင့်စဉ်" ကို အောင်မြင်စွာ ပြောင်းလဲ ကျင့်ကြံနိုင်လိုက်ခြင်းက စုယွီကို စိတ်အားတက်ကြွစေသည်။ ဒီကျင့်စဉ် တစ်ခုတည်းနဲ့တင် ယွင်ရှန်း ဈေးမြို့တော်ကို လူကိုယ်တိုင် သွားခဲ့ရကျိုး နပ်ပါပြီ။

"နောက်တစ်ဆင့် အနေနဲ့... 'သွေးဝေလငါး လမင်းမျိုသိုင်းကျမ်း' ကို စမ်းသပ် ကျင့်ကြံကြည့်ရမယ်"

စုယွီ တွေးလိုက်၏။

"နှစ်ပတ်လည် ကွင်း ကျင့်စဉ်" က "ဝူထုံ ကျင့်စဉ်" ထက် လေ့ကျင့်ရတာ ပိုခက်ခဲသော်လည်း၊ စုယွီ တွေ့ရှိလိုက်သည်က... သူ့ခန္ဓာကိုယ်ပေါ်က အချိန်ကာလ အရှိန်အဝါက သဘာဝတရားထဲက သစ်ပင်ပန်းမန်တွေ၏ ဝိညာဉ်စွမ်းအင်ကို စုစည်းပေးနိုင်စွမ်း ရှိနေခြင်းပါပဲ။

ထို့ကြောင့်... "နှစ်ပတ်လည် ကွင်း ကျင့်စဉ်" ၏ တိုးတက်နှုန်းက "ဝူထုံ ကျင့်စဉ်" ထက် မနှေးပါ။

နောက်ထပ် (၂) နှစ်လောက် နေလျှင် "ချီစွမ်းအင် စတုတ္ထအဆင့်" ကို ရောက်ဖို့ ပြဿနာ မရှိနိုင်ပေ။

ထို့အပြင်...

စုယွီ သည် "မိကျောင်းသားရဲ (၁၀၈) ကွက် ကိုယ်ခန္ဓာ ကျင့်စဉ်" ကိုလည်း ဆက်လက် လေ့ကျင့်နေ၏။ "ပထမအဆင့် (နှောင်းပိုင်း) သားရဲ သွေးအဆီအနှစ်" ၏ အစွမ်းကြောင့်၊ ကိုယ်ခန္ဓာ ကျင့်စဉ် တိုးတက်နှုန်းကလည်း လျင်မြန်လာသည်။

ယွင်ရှန်း ဈေးမြို့တော်မှ ပြန်ရောက်ပြီး (၂) လ မပြည့်ခင်မှာပင်... ဝယ်လာသော သားရဲသွေး တစ်ဝက်ကျော်ကို သုံးစွဲပြီးနောက်၊ စုယွီ သည် "ကိုယ်ခန္ဓာ ကျင့်စဉ် ပဉ္စမ အလွှာ" သို့ အောင်မြင်စွာ အဆင့်တက်နိုင်ခဲ့လေသည်။

ပဉ္စမ အလွှာ ရောက်ပြီး မကြာခင်မှာပဲ... အခုထိ တိုးတက်မှု မရှိဘဲ ငြိမ်သက်နေသော "သွေးဝေလငါး လမင်းမျိုသိုင်းကျမ်း" သည်လည်း တစ်ညတာ အတွင်း ရုတ်တရက် အဆင့်တက်သွားခဲ့လေသည်။

[ ကျင့်စဉ် - မိကျောင်းသားရဲ (၁၀၈) ကွက် ကိုယ်ခန္ဓာ ကျင့်စဉ် (ပဉ္စမအလွှာ၊ ကျွမ်းကျင်မှု ၀.၂၈%)၊ သွေးဝေလငါး လမင်းမျိုသိုင်းကျမ်း (ပထမအဆင့်၊ ကျွမ်းကျင်မှု ၀.၀၁%) ]

"ဝုန်း..."

ထူထဲသော ညဉ့်မှောင်မိုက် အတွင်း... ကြယ်ရောင် ဖျော့ဖျော့လေးသာ ပြတင်းပေါက်မှ တဆင့် အခန်းထဲသို့ ဝင်ရောက်နေ၏။

ရုတ်တရက်... စုယွီ၏ ခန္ဓာကိုယ် တစ်ခုလုံး ပြင်းထန်သော သွေးရောင် အလင်းတန်းများဖြင့် တောက်ပလာသည်။ ခန္ဓာကိုယ် အတွင်းရှိ သွေးစွမ်းအင် အားလုံးသည် နှလုံးသား ဆီသို့ စုဝေးသွားကြပြီး၊ မိုးခြိမ်းသံကဲ့သို့ ကျယ်လောင်သော အသံ တစ်ခု စိတ်ထဲတွင် ပဲ့တင်ထပ်သွားသည်။

တစ်ခဏတာမျှ... စုယွီ မူးဝေသွားသည်။

အဆုံးမဲ့သော သွေးစွမ်းအင်များ နှလုံးသားထဲသို့ စုဝေးသွားပြီးနောက်... "ရွှေရောင် သွေးတစ်စက်" စတင် ဖွဲ့စည်းလာသည်။

ထို ရွှေရောင် သွေးစက်လေးသည် အမြုတေ တစ်ခု ကဲ့သို့ တောက်ပနေပြီး၊ ပြိုင်ဘက်ကင်းသော သားရဲဘုရင် တစ်ပါး အလား... ဖော်ပြ၍ မရနိုင်သော ရက်စက်ကြမ်းကြုတ်သည့် အရှိန်အဝါကို ထုတ်လွှတ်နေလေသည်။

"ဒိန်း... ဒိန်း... ဒိန်း..."

သွေးစက် ဖွဲ့စည်းပြီးသည်နှင့် တစ်ပြိုင်နက်... စုယွီ၏ နှလုံးခုန်သံသည် စစ်မြေပြင်မှ စည်တော်သံများကဲ့သို့ ကျယ်လောင်စွာ ထွက်ပေါ်လာသည်။ သူ့နှလုံးသားသည် ပြောင်းလဲသွားသကဲ့သို့... ခုန်နှုန်း နှေးကွေးသွားသော်လည်း၊ ညှစ်ထုတ်လိုက်သော သွေးစီးကြောင်း တိုင်းသည် အလွန်အမင်း အားပါပြင်းထန်နေလေသည်။

အချိန်ကာလများ ကုန်ဆုံးသွားပြီးနောက်...

နေမင်းကြီး ထွက်ပေါ်လာချိန်တွင်... ရွှေရောင် အလင်းတန်းများ စုယွီ အပေါ်သို့ ကျရောက်လာသည်။ သူ မျက်လုံးဖွင့်လိုက်သောအခါ၊ မျက်ဝန်းထဲတွင် သွေးဆာနေသော အရိပ်အယောင်များ လက်ခနဲ ဖြတ်ပြေးသွားသည်။

ထိုအခိုက်အတန့်တွင်... သားရဲမျိုးနွယ်ကို အုပ်စိုးသူ ဘုရင်တစ်ပါး၏ အာဏာစက် အရှိန်အဝါမျိုး သူ့ခန္ဓာကိုယ်မှ ထွက်ပေါ်လာသည်။

သို့သော် ထိုအရှိန်အဝါသည် ခဏတာမျှသာ ဖြစ်ပေါ်ပြီး ချက်ချင်း ပြန်လည် ပျောက်ကွယ်သွားသည်။

ကျင့်ကြံရာမှ သတိပြန်ဝင်လာသောအခါ၊ စုယွီ သည် သူ့ခန္ဓာကိုယ်ကို သေချာစွာ စစ်ဆေးကြည့်လိုက်သည်။ မျက်နှာထားကတော့ အနည်းငယ် ကြောင်ငေးနေဆဲ။

ပြောင်းလဲမှုတွေက ကြီးမားလွန်း၏။

နှလုံးသား ပြောင်းလဲသွားတာ အပြင်... သွေးအရောင်ပါ အနည်းငယ် ပြောင်းသွားသည်။

နှလုံးသားထဲက အမြုတေနှင့် တူသည့် ရွှေရောင် သွေးစက်နှင့်တော့ မတူပေ။

သို့သော်၊ တစ်ညတာ ပြောင်းလဲမှု ဖြစ်စဉ် ပြီးသွားသည့် နောက်မှာ... သူ့သွေးတွေ၏ အရောင်က ရွှေညိုရောင် သန်းနေလေပြီ။

ထို့အပြင်... ဒီပြောင်းလဲမှု ဖြစ်ပြီးနောက်၊ သူ့ရဲ့ ကိုယ်ခန္ဓာ ကျင့်စဉ် စွမ်းအားလည်း သိသိသာသာ တိုးတက်လာခဲ့၏။

"ရိုးရိုး 'မိကျောင်းသားရဲ ကျင့်စဉ်' သက်သက်နဲ့ ယှဉ်လိုက်ရင်... ရုပ်ပိုင်းဆိုင်ရာ စွမ်းအားက အနည်းဆုံး (၃၀%) လောက် ပိုတိုးလာတယ်"

စုယွီ တိကျစွာ တွက်ချက်လိုက်သည်။

သို့သော်၊...

"ဂွီ... ဂွီ..."

ဗိုက်ဆာလိုက်တာ...

စုယွီ့ ခန္ဓာကိုယ်ထဲက ဆဲလ်တိုင်းက အော်ဟစ် တောင်းဆိုနေသလို ခံစားနေရသည်။ ဟာတာတာကြီး ဖြစ်ပြီး အားအင်ကုန်ခမ်းနေသလိုပင်။ မနေ့ညက ဖွဲ့စည်းလိုက်သော "တုပ နတ်ဘုရား စွမ်းရည် အရင်းအမြစ်" က သူ့ခန္ဓာကိုယ်ထဲက စွမ်းအင် အကုန်လုံးကို စုပ်ယူပစ်လိုက်သလိုပင်‌လော။

ဆာလောင်မှုကို အောင့်အီးသည်းခံရင်း... စုယွီ သည် အသင့် ပြင်ဆင်ထားသော "သားရဲ အသားခြောက်" များနှင့် "ဝိညာဉ်ဆန်" များကို ထုတ်ယူပြီး ချက်ပြုတ် စားသောက်လေတော့၏။

သည်တစ်နပ်တည်းနှင့်တင်... အဆင့်နိမ့် ဝိညာဉ်ဆန် ပေါင် (၃၀) နှင့် သားရဲ အသားခြောက် ပေါင် (၅၀) လောက် ကုန်သွားမှ ဗိုက်ဝသွားတော့၏။

အစားတစ်လုပ် မျိုချလိုက်တိုင်း...

နွေးထွေးသော စွမ်းအင်များသည် မျက်တောင် တစ်ခတ် အတွင်းမှာပင် တစ်ကိုယ်လုံးသို့ ပျံ့နှံ့သွားပြီး၊ ဆဲလ်များက အလုအယက် စုပ်ယူကြလေသည်။

ဗိုက်ဝသွားတော့မှ...

"ငါ့ရဲ့ အစာစားနိုင်စွမ်းက အများကြီး တိုးလာပါလား... ပြီးတော့ ခန္ဓာကိုယ်ကလည်း အစာချေဖျက်နှုန်း ပိုမြန်လာသလိုပဲ"

စုယွီ သတိထားမိလိုက်သည်။

ဒီလောက် အများကြီး စားလိုက်တာတောင်... ခန္ဓာကိုယ်က ချက်ချင်း ချေဖျက်ပစ်လိုက်နိုင်သည်။

ရင်ပြည့်တာ၊ အီတာ လုံးဝ မရှိပေ။

အစာချေဖျက်ပြီးနောက်... ရရှိလာသော စွမ်းအား အများစုကို နှလုံးသားထဲရှိ "သွေးဝေလငါး လမင်းမျို အမြုတေ" က စုပ်ယူသွားကြောင်း စုယွီ သတိထားမိလိုက်သည်။

"ဒီအမြုတေ ပြည့်သွားဖို့ ဆိုရင်... အနည်းဆုံး နှစ်ဝက်လောက်တော့ ကြာဦးမယ် ထင်တယ်"

စုယွီ တွက်ဆလိုက်သည်။

"သွေးဝေလငါး လမင်းမျိုသိုင်းကျမ်း" ပထမအဆင့်မှာ... အမြုတေ စွမ်းအား ပြည့်ဝသွားပြီ ဆိုရင်၊ "တုပ နတ်ဘုရား စွမ်းရည်" ကို ထုတ်သုံးလိုက်တာနဲ့ ရုပ်ပိုင်းဆိုင်ရာ စွမ်းအား "နှစ်ဆ" တိုးလာမှာ။

ဒါက သူ၏ ဝှက်ဖဲပင် ဖြစ်၏။

အရေးကြီးသည့် အချိန်ကျလျှင် အသက်ဘေးက လွတ်မြောက်စေနိုင်ရုံသာမက... ရန်သူကိုပါ တစ်ချက်တည်း သတ်ပစ်နိုင်မည့် လက်နက်ပင်။

အစာစားနိုင်စွမ်း တိုးလာသည်နှင့် အမျှ... ဆေးခင်းအောက်က "မြေကျောက် ကြွက်သားရဲ" အုပ်စုကို မြင်လိုက်တိုင်း၊ စုယွီ့ မျက်စိထဲမှာ "ဟင်းအိုးကြီးတွေ" လိုပင် မြင်လာမိတော့၏။

သို့နှင့် စုယွီက... အမဲလိုက်သော အကြိမ်ရေကို တိုးမြှင့်လိုက်တော့၏။

အသားစားရင်း... ကျင့်ကြံဖို့ ဝိညာဉ်ကျောက်တုံးလေးပါ ထပ်စုလို့ ရသည်‌လေ။

ထူးဆန်းတာ တစ်ခုက... နောက်ပိုင်း ရက်တွေမှာ လင်းမိသားစု ဘက်က တော်တော်လေး ငြိမ်ကျသွား၏။ စုမိသားစုနှင့် ပဋိပက္ခ ဖြစ်တာလည်း တဖြည်းဖြည်း နည်းလာသည်။

သူတို့ ဘာတွေ ကြံစည်နေသည်လဲ ဘယ်သူမှ မသိနိုင်ကြပါပေ။

နှစ်ဝက် ကြာပြီးနောက်...

စုမိသားစုက ငွေအမြောက်အမြား သုံးစွဲပြီး ပထမအဆင့် မြေဆရာ တစ်ယောက်ကို ငှားရမ်း ခေါ်ဆောင်လာလေ၏။

ရည်ရွယ်ချက်ကတော့... "နဂါးရှာဖွေခြင်း နည်းပညာ" ကို သုံးပြီး ဝိညာဉ် သွေးကြော၏ အရင်းအမြစ်ကို ရှာဖွေကာ၊ စုမိသားစု အတွက် ကောင်းချီးပေးခံရသော မြေ တစ်ခု တည်ဆောက်ပေးဖို့အတွက်ပင်။

တိတိကျကျ ပြောရရင်... "မြေဆရာ" ဆိုတာ အခင်းအကျင်း ပညာရှင် တစ်မျိုးပင် ဖြစ်ပါ၏။

သို့ရာတွင်၊ သာမန် အခင်းအကျင်း ပညာရှင်တွေထက် ပိုပြီး ဂုဏ်ရှိသလို၊ ပိုပြီး လျှို့ဝှက်ဆန်းကြယ်ကြ၏။

သာမန် စုမိသားစုဝင်တွေက မြေဆရာ ဆိုတာ ဘာလဲ သေချာ မသိကြသော်ငြား၊ ... အတိတ်ဘဝ ဂိမ်းထဲမှာ "မြေဆရာ" အလုပ်သင် လုပ်ဖူးသော စုယွီ ကတော့ ကောင်းကောင်းကြီး နားလည်သည်လေ။

ဂိမ်းထဲမှာတုန်းကတော့... ဒီအလုပ်ကို သင်ယူပြီး "နဂါးရှာဖွေခြင်း" လုပ်တိုင်း၊ မိမိ၏ သက်တမ်း လျော့နည်းသွားလေ့ ရှိ၏။

ဂိမ်းမိတ်ဆက်မှာ ရေးထားသည်ကတော့... "မြေဆရာ ဆိုတာ ကောင်းကင်နှင့် မြေကြီးက ရွေးချယ်ထားသူတွေ... နဂါးရှာဖွေခြင်း ပညာနှင့် ကောင်းကင်ဘုံ (၉) ထပ် အထိ လှမ်းနိုင်သလို၊ မြေအောက် နဂါးတွေကိုလည်း ထိန်းချုပ်နိုင်၏... အရာအားလုံးကို လုပ်ဆောင်နိုင်စွမ်း ရှိသူတွေ"ဟူ၍…။

မြေဆရာ ဆိုတာ ရတနာ ရှာဖွေဖို့ အလွယ်ကူဆုံး အလုပ်ပင်။ ဝိညာဉ် သွေးကြော ရှာချင်ရင် သူတို့အတွက် ဘာမှ မခက်ခဲပါချေ။

သို့သော်၊... ရတာ ရှိရင် ပေးရတာ ရှိစမြဲလေ။

မြေဆရာတွေ၏ ကောင်းကင်ဘုံ စွမ်းရည်ကို "အသက်" နှင့် ပြန်ပေးဆပ်ရသည်။

ရတနာ ၏ မြှူဆွယ်မှုကို ခံနိုင်ရည် ရှိပြီး နဂါးရှာဖွေခြင်း လုံးဝ မလုပ်ဘဲ နေနိုင်သူကလွဲလျှင်... ကျန်သော မြေဆရာ အားလုံးက လျှို့ဝှက် ပညာရပ်ကို သုံးလိုက်တိုင်း သက်တမ်း လျော့သွားကြရတာချည်းသာ။

ထို့ကြောင့်... မြေဆရာ တစ်ယောက်ကို အကူအညီ တောင်းဖို့ ဆိုတာ မလွယ်ကူလှပါ။

အခု လာသည့် သူက "အစပျိုး ပထမအဆင့်" ပဲ ရှိသေးတာတောင်မှ... စုမိသားစု ဘက်က သွေးထွက်သံယို ဖြစ်လောက်သည့် အထိ ငွေကုန်ကြေးကျ ခံလိုက်ရခြင်း ဖြစ်လေမည်။