ရိတ်သိမ်းခြင်း

မျိုးနွယ်စုတစ်သောင်းမှာ အဓိပတိသာလွန်သူများက ထိုသည်ကို တွေ့မြင်သောအခါ သူတို့က ရုတ်ရုတ်သဲသဲဖြစ်ပြီး သူတို့၏ တိုက်ခိုက်မှုများက ရပ်တန့်သွားကြသည်။

သူတော်စင်မင်းသားသုံးပါး၏ သေဆုံးမှုသည် မျိုးနွယ်စုတစ်သောင်းမှ အဓိပတိသာလွန်သူများအပေါ် ကြီးမားသည့် ရိုက်ခတ်မှုတစ်ခု ဖြစ်လေသည်။

မျိုးနွယ်စုတစ်သောင်းမှာ အဓိပတိသာလွန်သူများ၏ ရင်ထဲမှာ သူတော်စင်မင်းသား မင်းသမီးများသည် သူတို့နှင့် အဆင့်တူများကြားမှာ မရှုံးနိမ့်နိုင်သော စွမ်းအားကြီးမားသည့် တည်ရှိမှုများ ဖြစ်ကြသည်။ သို့သော်ယခု သူတို့၏ သေဆုံးနေသော ရုပ်အလောင်းများက မြေပြင်ပေါ်မှာ လဲကျနေ၏။

“ညဝိညာဉ်... မင်းဘယ်လိုတောင် လုပ်ရဲတာလဲ”

သူတော်စင်မင်းသားကျိုးယင်က ဒေါသချောင်းချောင်းထွက်ပြီး အော်ငေါက်လိုက်၏။

ညဝိညာဉ်၏ ရုတ်တရက်တိုက်ခိုက်မှုနှင့် ယင်ယန်အထွတ်အမြတ်ခိုလှုံရာ၊ လေဟာနယ်အချိန် အထွတ်အမြတ်ခိုလှုံရာနှင့် နတ်ဘုရားအပြစ်ဒဏ် အထွတ်အမြတ်ခိုလှုံရာတို့မှ သူတော်စင်မင်းသားသုံးပါး သေဆုံးခြင်းသည် အထွတ်အမြတ်ခိုလှုံရာသုံးခုကို စစ်ကြေညာလိုက်ခြင်းနှင့် တူညီနေ၏။

ဒါ့အပြင် ညဝိညာဉ်သည် ထွက်ရပ်လမ်း အထွတ်အမြတ်ခိုလှုံရာ၏ သူတော်စင်မျိုးနွယ်မှ ဖြစ်သည်။

ဤကိစ္စအတွက် ဖြေရှင်းချက်မရှိလျှင် ထွက်ရပ်လမ်း အထွတ်အမြတ်ခိုလှုံရာနှင့် အခြားသော အထွတ်အမြတ်ခိုလှုံရာ သုံးခုကြားမှာ ပဋိပက္ခတစ်ခု သေချာပေါက် ဖြစ်လာပေလိမ့်မည်။

“ကျိုးယင်... မင်းတို့ ထွက်ရပ်လမ်း အထွတ်အမြတ်ခိုလှုံရာက ဘာလုပ်ဖို့ ကြိုးစားနေတာလဲ”

တကယ်ပင် ကျန်ရှိနေသော သူတော်စင်မင်းသားမင်းသမီးများက တင်းမာခက်ထန်စွာဖြင့် မေးလိုက်ကြ၏။ သူတော်စင်မင်းသားကျိုးယင်နှင့် ညဝိညာဉ်ကို သူတို့ကြည့်ရှုပုံကလည်း အေးစက်နေသော သတ်ဖြတ်ခြင်း စိတ်ဆန္ဒနှင့်အတူ ပြောင်းလဲသွားကြသည်။

ညဝိညာဉ်သည် သူတော်စင်မင်းသားသုံးပါးကို သတ်ဖြတ်လိုက်ရုံသာမကဘဲ ပို၍အရေးပါသည်မှာ ကျန်ရှိနေသော သူတော်စင်မင်းသားမင်းသမီးများသည် တစ်ယောက်ကိုတစ်ယောက် စိုးရိမ်ပူပန်လာပြီး စည်းလုံးမှု မရှိကြတော့ပေ။

သူတော်စင်မင်းသားသုံးပါး မရှိတော့ဘဲ သူတော်စင်သွေးဝိညာဉ် အောင်လံတံခွန်၏ သွေးရောင်က မှိန်ဖျော့ပြီး သူတော်စင်လက်နက်သည် စတင်၍ တုန်ခါလာလေသည်။

မကောင်းတော့ဘူး…

ဓားနှစ်လက်က ရုန်းထွက်ချင်နေပြီဖြစ်၏။

သူတော်စင်မင်းသားမင်းသမီးကိုးဦး၏ အမူအရာများက ပြောင်းလဲသွားကြ၏။

ပုံမှန်အခြေအနေအောက်မှာ သူတော်စင်သွေးဝိညာဉ် အောင်လံတံခွန်ကနေ ဝါးမျိုထားသော လက်နက်များသည် သိပ်မကြာခင် ချို့ယွင်းပျက်စီးပြီး သွေးရည်အိုင်တစ်အိုင်အဖြစ် ပြောင်းလဲသွားပေလိမ့်မည်။

သူတော်စင်လက်နက်တစ်ခုက ဝါးမျိုခံရပြီဆိုလျှင်ပင် ၎င်းသည် အထဲမှာရှိသော သွေးဖြင့် စွန်းထင်းခံရပြီး ၎င်း၏ စွမ်းအားက ကြီးမားစွာ လျော့ကျသွားပေလိမ့်မည်။

သို့သော်လည်း အဝီစိဓားနှင့် တမလွန်ဓားသည် သူတော်စင်သွေးဝိညာဉ် အောင်လံတံခွန်ဖြင့် ဝါးမျိုခြင်းခံရပြီးနောက် သူတို့သည် ချို့ယွင်းပျက်စီးသွားခြင်း မရှိရုံသာမက တစ်ချိန်လုံး သွေးပင်လယ်ထဲကနေ ရုန်းထွက်ချင်နေကြ၏။

ယခု သူတော်စင်မင်းသား မင်းသမီး ကိုးဦးသည် ဆက်လက်၍ စည်းလုံးမှုမရှိတော့ဘဲ သူတို့ဘက်မှာ သူတော်စင်မင်းသားသုံးပါး လျော့ကျသွားလေသည်။ သူတို့သည် သူတော်စင်သွေးဝိညာဉ် အောင်လံတံခွန်ထဲမှာရှိသော အဝီစိဓားနှင့် တမလွန်ဓားကို ဆက်လက်၍ မဖိနှိမ်နိုင်ကြတော့ပေ။

ဇီ…

ဓားတေးသံက ထွက်ပေါ်လာ၏။

နောက်ခဏ၌ ဓားအလင်းနှစ်ခုသည် သူတော်စင်သွေးဝိညာဉ် အောင်လံတံခွန်ထဲကနေ ပစ်လွင့်ထွက်ပေါ်ပြီး ကောင်းကင်ထက်ကို ထိုးတက်သွား၏။

သူတော်စင်သွေးကနေ ဖြစ်ပေါ်လာသော သွေးမြစ်ကပင်လျှင် အဝီစိဓားနှင့် တမလွန်ဓား၏ ထက်ရှမှုနှင့် သတ်ဖြတ်ခြင်း စိတ်ဆန္ဒတို့ကို မဖိနှိမ်နိုင်တော့ပေ။

ရွှစ်...

ထို့နောက် ချက်ချင်းပင် စူးရှသော အသံတစ်သံ ထွက်ပေါ်လာ၏။

မရေမတွက်နိုင်သော အကြည့်များ ရှေ့မှောက်မှာ အဝီစိဓားနှင့် တမလွန်ဓားသည် သူတော်စင်သွေးဝိညာဉ် အောင်လံတံခွန်ကို အပိုင်းပိုင်းထိုးခွဲပြီး လုံးလုံးလျားလျား လွတ်မြောက်ကာ လောကမှာ ပြန်လည်ပေါ်ထွက်လာ၏။

သူတော်စင်သွေးဝိညာဉ် အောင်လံတံခွန်တွင် ကျန်ရှိခဲ့သည့် တစ်ခုတည်းသောအရာမှာ လေထဲကနေ ကျဆင်းလာသည့် သစ်သားတိုင်တစ်ချောင်းသာဖြစ်ပြီး ၎င်းက လုံးလုံးလျားလျား ပျက်စီးလုနီးပါး ဖြစ်နေလေပြီ။

ဟာ…

သူတော်စင်မင်းသား မင်းသမီးများ၏ အမူအရာများက ရုတ်ချည်းပြောင်းလဲသွားပြီး သူတို့က ပင့်သက်ကို ရှိုက်လိုက်ကြ၏။

ဤမြင်ကွင်းက ဘာကိုဆိုလိုသည်ကို အခြားသော အဓိပတိသာလွန်သူပညာရှင်များက နားလည်ချင်မှ နားလည်ကြပေလိမ့်မည်။

သို့သော်လည်း သူတော်စင်သွေးဝိညာဉ် အောင်လံတံခွန်က သူတော်စင်လက်နက်တစ်ခုဖြစ်သည်ကို သူတို့တချို့က သိရှိထားကြ၏။ ၎င်းသည် သူတို့၏ လက်ထဲမှာ သူတော်စင်လက်နက်၏ အစစ်အမှန်စွမ်းအားကို မထုတ်ဖော်နိုင်ဘူးဆိုလျှင်တောင် ၎င်းသည် သာမန်ကာလျှံကာ ချို့ယွင်းပျက်စီးသွားမည် မဟုတ်ပေ။

ထိုဓားနှစ်လက်သည် သူတို့တွေးထင်ထားသည်ထက်ပင် များစွာပိုမိုကြောက်စရာကောင်းနေလေသည်။

သူတို့သည် သူတော်စင်လက်နက်တစ်ခုကိုပင် ချို့ယွင်းဖျက်ဆီးပစ်နိုင်သည့် ဓားနှစ်လက်ဖြစ်နေသည်။

ရွှစ်... ရွှစ်...

အဝီစိဓားနှင့် တမလွန်ဓား လွတ်မြောက်လာပြီးနောက် ဆူဇီမို၏ မျက်လုံးက ဝင်းလက်တောက်ပလာပြီး သူ၏စိတ်ဝိညာဉ်အသိစိတ်က လှုပ်ရှားသွား၏။ ချက်ချင်းပင် ဓားနှစ်လက်သည် လူအုပ်ကြီးကို ထိုးခွဲဆုတ်ဖြဲပြီး လေထဲမှာ သွေးများ ပျံ့နှံ့သွားလေသည်။

အနီးအနားဝန်းကျင်မှာ အဓိပတိသာလွန်သူ ပညာရှင် သုံးသိန်းကျော်ကျော်က စုရုံးရောက်ရှိနေကြ၏။ သူတို့က သိပ်သည်းများပြားလွန်းလေသည်။ အဝီစိဓားနှင့် တမလွန်ဓား ဖြတ်သွားရာနေရာတိုင်းမှာ သူတို့၏ သတ်ဖြတ်ခြင်းစိတ်ဆန္ဒက ပြိုင်ဘက်ကင်းပြီး မည်သူကမှ သူတို့၏ တိုက်ခိုက်မှုကို မခုခံနိုင်ကြပေ။

ချက်ချင်းပင် မရေမတွက်နိုင်သော အဓိပတိသာလွန်သူ ပညာရှင်များက သေဆုံးကုန်ကြ၏။

ထက်ရှမှုမှာ နံပါတ်တစ်ဖြစ်သော အဝီစိဓားဖြစ်စေ၊ သတ်ဖြတ်ခြင်းမှာ နံပါတ်တစ်ဖြစ်သော တမလွန်ဓားဖြစ်စေ၊ သူတို့နှင့် ထိတွေ့မိသော မည်သူမဆို သေချာပေါက် သေရပေလိမ့်မည်။

အဲ့ဒါသည် သေးငယ်သော ဒဏ်ရာတစ်ခုမျှသာ ဖြစ်သည်ဆိုလျှင်ပင် လက်ရှိ အဓိပတိသာလွန်သူပညာရှင်များထဲ မည်သူကမှ ရှင်သန်နိုင်မည် မဟုတ်ပေ။

အဝီစိဓားနှင့် တမလွန်ဓား၏ နောက်မှာ အဓိပတိသာလွန်သူပညာရှင်များ၏ ခန္ဓာကိုယ်များက လေထဲကနေ တစ်ယောက်ပြီးတစ်ယောက် လဲကျသွား၏။ သူတို့က မြေပြင်ပေါ်ကို ကျဆင်းသည့်အချိန်မှာ သူတို့သည် အေးစက်နေသော ရုပ်အလောင်းများအဖြစ် ပြောင်းလဲသွားကြလေသည်။

ထိုမြင်ကွင်းက အလွန်တရာ တုန်လှုပ်စရာကောင်းနေ၏။

အဓိပတိသာလွန်သူများ၏ အသက်များသည် မြက်ပင်များကဲ့သို့ဖြစ်ပြီး သူတို့သည် ဤကဲ့သို့ အမြောက်အမြား သေဆုံးကာ လူသားမိုးပေါက်များအဖြစ် ကျဆင်းလာသည်နှင့် တူနေ၏။

အဝီစိဓားနှင့် တမလွန်ဓားကတော့ သူတို့သည် ထက်ရှသော တံစဉ်နှစ်လက်ကဲ့သို့ ဖြစ်နေ၏။ ဓားသွား ဖြတ်သွားသည်နှင့် ညှိုးခြောက်နေသော မြက်ပင်များက ရိတ်သိမ်းခံရသလို လူသေအလောင်းများက မြေပြင်ပေါ်သို့ ပြန့်ကျဲကျဆင်းသွားပေလိမ့်မည်။

အဝီစိဓားနှင့် တမလွန်ဓား၏ ကြောက်စရာကောင်းသော သတ်ဖြတ်ခြင်းစွမ်းအားအောက်မှာ မျိုးနွယ်စုတစ်သောင်းမှာ အဓိပတိသာလွန်သူများ၏ တိုက်ခိုက်မှုများကလည်း လဲပြိုကျသွားပြီဖြစ်သည်။

ဤသည်မှာ သေခြင်းတရားကနေ တိုက်ရိုက်လာသော ခြိမ်းခြောက်မှုတစ်ခု ဖြစ်လေသည်။

မျိုးနွယ်စုတစ်သောင်းမှ အဓိပတိသာလွန်သူများက ဤနေရာမှာ ဘယ်လောက်ပင် များပြားသည်ဖြစ်စေ၊ သူတို့သည် တမလွန်ဓားနှင့် အဝီစိဓား၏ သတ်ဖြတ်ခြင်းစွမ်းအားကို ခံနိုင်ရည်မရှိကြတော့ပေ။

အဓိပတိသာလွန်သူများစွာသည် အဝီစိဓားနှင့် တမလွန်ဓား၏ အစုလိုက်အပြုံလိုက် သတ်ဖြတ်မှုကို ရှောင်လွှဲရန် ဘေးလွတ်ရာသို့ စတင်၍ ထွက်ပြေးကုန်ကြပြီဖြစ်၏။ ဆူဇီမို၊ မျောက်၊ တျဲယွဲ့နှင့် အခြားလူသားအဓိပတိသာလွန်သူများကတော့ သူတို့သည် နောက်ဆုံးမှာ အသက်ရှူခွင့်ရရှိလာကြ၏။

ဆူဇီမိုက ဖြူဖပ်ဖြူရော် အမူအရာနှင့် သူ၏ ခန္ဓာကိုယ်က အနည်းငယ် ယိမ်းထိုးသွား၏။

မျိုးနွယ်စုတစ်သောင်းမှ အဓိပတိသာလွန်သူများ၏ တိုက်ခိုက်မှုများကို တောင့်ခံပြီးနောက် သူ့မှာ သက်လုံအားများစွာ မကျန်ရှိတော့ပေ။

ဆူဇီမို၏ မျက်လုံးထဲရှိ ခရမ်းရောင်မီးတောက်များကတော့ ပြင်းထန်ကြမ်းတမ်းစွာ လောင်ကျွမ်းနေဆဲဖြစ်၏။ သူ၏ အကြည့်က ရွေ့လျားသွားပြီး တိုက်ပွဲနယ်မြေမှာ လူရိပ်တချို့အပေါ် ရွေ့လျားရောက်ရှိသွားလေသည်။

ထိုအခိုက်အတန့်မှာ ထွက်ရပ်လမ်း အထွတ်အမြတ်ခိုလှုံရာ၏ အပြစ်ကင်းစင်မှုကို သက်သေပြရန် သူတော်စင်မင်းသားကျိုးယင်က စတင်၍ တိုက်ခိုက်လိုက်ပြီဖြစ်၏။ သူသည် ကြမ်းကြုတ်တောကောင် ခေါင်းကိုးလုံးနတ်သူငယ်၏ အစစ်အမှန်ပုံစံသို့ အသွင်ပြောင်းလဲကာ ညဝိညာဉ်ကို ပြင်းထန်ကြမ်းတမ်းစွာ တိုက်ခိုက်လိုက်၏။

သူတို့နှစ်ယောက်ကြားမှာ ကျင့်ကြံမှုနယ်ပယ်အသေးတစ်ခု ကွာဟနေပြီး ညဝိညာဉ်သည် သူ့ကို ထိပ်တိုက်ရင်ဆိုင်ခြင်း မရှိပေ။ ထိုအစား သူ၏ ပေါ့ပါးဖျတ်လတ်သော လှုပ်ရှားမှုနည်းစနစ်များအပေါ် မှီခိုကာ တိုက်ခိုက်မှုများကို ကိုင်တွယ်နေ၏။

အခြားသော သူတော်စင်မင်းသားမင်းသမီးများက ဝင်ရောက်တိုက်ခိုက်တော့မည့်ဆဲဆဲမှာပင် သူတို့၏ ရင်ထဲမှာ သတိပေးချက်တစ်ခု ဖျတ်ခနဲ ပေါ်ထွက်လာပြီး ကျောရိုးတစ်လျှောက် ချမ်းစိမ့်လာ၏။

သူ၏ ဝိသေသအမှတ်လက္ခဏာဖြစ်သော အနက်ရောင်ဆံပင်နှင့် အစိမ်းရောင်ဝတ်ရုံနှင့်အတူ ဆူဇီမိုသည် ဓားနှစ်လက်ကို ကိုင်စွဲကာ သူ့မျက်လုံးထဲရှိ ခရမ်းရောင်မီးတောက်များနှင့်အတူ လေထဲကနေ ပျံသန်းလာ၏။

ကစဉ့်ကလျား မိစ္ဆာမျောက်ကတော့ သူသည် ရွှေရောင်တောင်ဝှေးတစ်ချောင်းကို ကိုင်စွဲပြီး ပြင်းထန်ကြမ်းတမ်းသော အော်ဟစ်သံတစ်ခုကို ထုတ်ဖော်ထားလေသည်။ သူ၏ တိုက်ပွဲဝင်စိတ်ဝိညာဉ်က ဆူနာမီလှိုင်းတစ်ခုကဲ့သို့ တလိပ်လိပ်ထိုးတက်လာနေ၏။

“ညဝိညာဉ်... မင်းရူးသွားပြီ”

“မင်း ထွက်ရပ်လမ်း အထွတ်အမြတ်ခိုလှုံရာကို ဘယ်လိုတောင် သစ္စာဖောက်ရဲတာလဲ”

“မင်း အတိအကျ ဘာလုပ်ဖို့ ကြိုးစားနေတာလဲ”

သူတော်စင်မင်းသား ကျိုးယင်က ညဝိညာဉ်နောက်ကို ပြေးလိုက်ရင်း သူ၏ ခေါင်းကိုးလုံးက စူးရှသော အော်ဟစ်သံများကို ဆက်တိုက်ထုတ်ဖော်လိုက်၏။

“ဟား ဟား ဟား”

မျောက်က ဟားတိုက်ရယ်မောလိုက်၏။

“ညဝိညာဉ် ဘာမှမကြောက်နဲ့... ငါတို့ မင်းကို ကူညီပေးမယ်... ငါတို့ညီအစ်ကိုသုံးယောက် ရင်ဘောင်တန်း ရပ်နေမယ်ဆိုရင် သူတော်စင်မင်းသားတွေပဲဖြစ်ဖြစ် မျိုးနွယ်စုတစ်သောင်းပဲဖြစ်ဖြစ် ဘာမှကြောက်စရာ မရှိဘူး”

“မင်းက သူတို့နဲ့ ညီအစ်ကိုလား”

သူတော်စင်မင်းသား ကျိုးယင်က တုန်လှုပ်၍ ဒေါသချောင်းချောင်းထွက်လာ၏။ သူ၏ခေါင်းကိုးလုံးပေါ်ရှိ မျက်လုံးများက ညဝိညာဉ်ကို ပြင်းထန်ကြမ်းတမ်းစွာ စိုက်ကြည့်နေ၏။ သူတို့က အဖြေတစ်ခုကို ရယူချင်နေသည့်အလားပင်။

ညဝိညာဉ်က အမူအရာကင်းမဲ့နေပြီး မှင်သေသေဖြင့် ပြောလိုက်၏။

“ငါက သူတော်စင်မျိုးနွယ်အဖြစ် ငါတို့ရဲ့ဆက်ဆံရေးကို ထောက်ထားပြီး စောစောက မင်းကို မတိုက်ခိုက်ခဲ့ဘူး... မင်း ငါ့ကို ဆက်ပြီး နားပူနားဆာလုပ်နေမယ်ဆိုရင် မင်းကိုလည်း သတ်ဖြတ်ရမယ့်အတွက် ငါ့ကို အပြစ်မတင်နဲ့တော့”

“မင်းဘယ်လိုတောင် ပြောရဲတာလဲ”

“မင်းကလား”

“မင်းအသက်ရှင်ရတာ တကယ်ကို ငြီးငွေ့နေတာပဲ”

“မင်းက ထွက်ရပ်လမ်း အထွတ်အမြတ်ခိုလှုံရာကို သစ္စာဖောက်လိုက်တယ်... မင်း ဒီနေ့ သေချာပေါက် သေရလိမ့်မယ်”

သူတော်စင်မင်းသားကျိုးယင်၏ ဦးခေါင်းကိုးလုံးက တစ်ချိန်တည်းမှာ ဟိန်းဟောက်ပြောဆိုလိုက်ကြ၏။

ညဝိညာဉ်သည် သူတော်စင်မင်းသားများကို သတ်ဖြတ်ဖို့ ရွေးချယ်ခဲ့သည်ဆိုမှတော့ သူသည် ဤနေရာကနေ အသက်ရှင်လျက် ပြန်ထွက်သွားဖို့ စိတ်ကူးမရှိတော့ပေ။

ညဝိညာဉ်မှာ ဘိုးဘေးဗီဇမျိုးဆက်သွေးရှိပြီး သူသည် သူတော်စင်မျိုးနွယ်အဖြစ် ကြည်ညိုလေးစားခံရ၏။ သို့သော်လည်း သူသည် ထွက်ရပ်လမ်းအထွတ်အမြတ်ခိုလှုံရာနှင့် သူတော်စင်မျိုးနွယ်အပေါ် သူ၏ရင်ထဲမှာ ခံစားချက်များစွာ မရှိပေ။

သူ၏ ရင်ထဲမှာ တစ်ခါက မိသားစုကလန်တစ်ခုသာ ရှိခဲ့လေသည်။

ထိုမိသားစုသည် ထျန်ဟွမ်ကုန်းမြေတိုက်မှ သူ၏ သွေးသောက်ညီအစ်ကိုမောင်နှမများပင် ဖြစ်လေသည်။

သူ၏ မိသားစုဝင်များကို ထိပါးလာသော ဘယ်သူမဆို သူ၏ ကမ္ဘာမကြေရန်သူများ ဖြစ်လာပေလိမ့်မည်။

“သူတို့ကို သတ်ကြ”

“ဆူဇီမိုက စောစောကတင် မျိုးနွယ်စုတစ်သောင်းရဲ့ တိုက်ခိုက်မှုတွေကို တစ်ယောက်တည်း ခုခံထားတာ… သူက လမ်းဆုံးကို ရောက်နေပြီ… သတိထားစရာဆိုလို့ သူ့ရဲ့ ဟိုဓားနှစ်လက်ပဲ ရှိတယ်”

“ဟိုမျောက်က ဒဏ်ရာအပြင်းအထန် ရထားတာ… သူ့ကိုလည်း ဘာမှကြောက်စရာ မရှိဘူး”

သူတော်စင်မင်းသားမင်းသမီး လေးဦးသည် အဓိပတိသာလွန်သူ ချန်ချင်း၊ ဟွာရော၊ ဟွိုက်အန်နှင့် ဆိုးယုတ်ဖျက်ဆီးခြင်းတို့ကို ရင်ဆိုင်နေရ၏။

သည်ဘက်ခြမ်းမှာ ကျိုးယင်နှင့် သူတော်စင်မင်းသားမင်းသမီး လေးဦးသာ ကျန်ခဲ့လေသည်။

သူတော်စင်မင်းသားကျိုးယင်နှင့် ညဝိညာဉ်ကြား ပြင်းထန်ကြမ်းတမ်းသော တိုက်ပွဲမှာ တစ်ခဏအတွင်း အနိုင်ရလဒ်ကို ဆုံးဖြတ်ဖို့ ခက်ခဲနေ၏။

ကျန်ရှိနေသော သူတော်စင်မင်းသားမင်းသမီး လေးဦးသည် ဆူဇီမိုနှင့်မျောက်၏ အခြေအနေကို တစ်ချက်ကြည့်ရုံဖြင့် တွေ့မြင်သွားလေသည်။ သူတို့သည် နောက်ဆုတ်ခြင်းမရှိဘဲ အရင်စတင်တိုက်ခိုက်လိုက်ကြ၏။

သူတော်စင်မင်းသား မင်းသမီးများ ပြောသည်မှာ မှန်လေသည်။ ဆူဇီမိုသည် တကယ်ပင် သူ၏ လမ်းဆုံးကို ရောက်ရှိနေပြီဖြစ်၏။

အဝီစိဓားနှင့် တမလွန်ဓားနှင့်ပင်လျှင် သူ့ခန္ဓာကိုယ်ထဲရှိ စွမ်းအားသည် သူတော်စင်မင်းသား မင်းသမီးများကို ဆန့်ကျင်တိုက်ခိုက်ဖို့ မလုံလောက်တော့ပေ။

သူ၏မျိုးဆက်သွေးနယ်မြေဖြစ်စဉ်နှင့် ခေါင်းသုံးလုံးလက်ခြောက်ဖက် နတ်ဘုရားစွမ်းအားကိုလည်း ဆက်လက်၍ ထိန်းမထားနိုင်တော့ပေ။

သို့သော်လည်း ဆူဇီမို၏ မျက်လုံးထဲရှိ လောင်ကျွမ်းနေသော ခရမ်းရောင် မီးတောက်နှစ်ခုက ဘာကိုရည်ညွှန်းသည်ကို သူတော်စင်မင်းသား မင်းသမီးများက နားမလည်ကြပေ။