ဒဏ္ဍာရီလာ နတ်ဆိုးဝိဉာဉ်၊ အနှိုင်းမဲ့အင်အား

နတ်ဘုရားသတ် ဓားမြှောင်ပျံသည် အမှန်တကယ်ပင် သတ်ဖြတ်ခြင်းအတွက် အဖိုးတန်ရတနာတစ်ခု ဖြစ်ပေသည်။ ၎င်း၏ အတွင်းပိုင်း ကန့်သတ်ချက် တားမြစ်ချက်များမှာ အလွန်တရာ ရှုပ်ထွေးလှပြီး၊ ကျန်းချန်ရှန်း အနေဖြင့် ၎င်းကို မိမိ၏ အရှင်သခင်အဖြစ် အသိအမှတ်ပြုရန် ပြုလုပ်သည်မှာပင် ခြောက်လကြာမြင့်ခဲ့သည်။ယ

အနီရောင် ဗူးသီးခြောက်လေးက မြေကမ္ဘာနှင့် ကောင်းကင်၏ ဝိညာဉ်စွမ်းအင်များကို စုပ်ယူနိုင်ပြီး၊ ဗူးသီးထဲရှိ နတ်ဘုရားသတ်ဓားမြှောင်ပျံကို ပြုစုပျိုးထောင်ပေးထားနိုင်ကာ စွမ်းအင်အမြောက်အမြားကို သိုလှောင်ထားနိုင်စွမ်း ရှိသည်။

ကျန်းချန်ရှန်း ဂါထာမန္တန်တစ်ခုကို ကြိုတင်ပြင်ဆင်ထားပြီး ဖြစ်သည်။ ၎င်းကို "းကောင်းကင်နှင့် မြေကမ္ဘာ၏ အတိုင်းအဆမဲ့ မျက်လုံးနှင့် ပေါင်းစပ်လိုက်ပါက၊ နတ်ဘုရားသတ်ဓားမြှောင်ပျံကို အသုံးပြု၍ ဟင်းလင်းပြင်ကို ဖြတ်ကျော်ကာ ဝေးကွာသော အရပ်မှ ရန်သူများကို သုတ်သင်နိုင်မည် ဖြစ်သည်။

ထိုအချိန်တွင် သူ၏ ခါး၌ ဗူးသီးခြောက် နှစ်လုံး ရှိနေပြီဖြစ်သည်။ ခရမ်းရောင် ကျောက်သလင်း ဗူးသီးခြောက်က ရန်သူများကို ချုပ်နှောင်ရန်ဖြစ်ပြီး၊ အနီရောင် ဗူးသီးခြောက်မှာမူ ရန်သူများကို သတ်ဖြတ်ရန် ဖြစ်သည်။ ၎င်းတို့ကို ခါးတွင် ချိတ်ဆွဲထားခြင်းက သူ့အတွက် အနှောင့်အယှက် မဖြစ်စေပါ။

မူလင်းလော့နှင့် ပိုင်ချီတို့ကလည်း ထိုဗူးသီးခြောက်နှင့် ပတ်သက်၍ အများကြီး မမေးမြန်းကြချေ။ ရက်အနည်းငယ်အကြာတွင် သူတို့ ခရမ်းရောင် တိမ်တိုက်နန်းတော်မှ ထွက်ခွာ၍ အောက်ဘုံသို့ ဆင်းသွားကြရာ နန်းတော်ထဲတွင် ကျန်းချန်ရှန်း တစ်ဦးတည်းသာ ကျန်ရစ်ခဲ့သည်။

အနီရောင် ဗူးသီးခြောက်လေးကို ခဏတာ ကိုင်တွယ်ကြည့်ရှုပြီးနောက် ကျန်းချန်ရှန်း ကျင့်ကြံခြင်းကို စတင်လိုက်သည်။

"ဝိညာဉ်အရိုးစု ဧကရီ ပေါ်လာခြင်းက သွေးနယ်မြေသည်လည်း ရွှမ်ဟွမ် မဟာကမ္ဘာကို တိုက်ခိုက်တော့မည် ဖြစ်ကြောင်း ညွှန်ပြနေသည်။ ၎င်းသည် သိုင်းတာအို ကပ်ဘေးတစ်ခု ဖြစ်သော်လည်း ခွန်းလွန်နယ်မြေကို အလွယ်တကူ သက်ရောက်သွားနိုင်သည်။ ထို့ကြောင့် ကျန်းချန်ရှန်းအနေဖြင့် ငုတ်တုတ်ထိုင် စောင့်နေ၍ မဖြစ်ပေ။

အမြန်ဆုံး အဆင့်တက်နိုင်မှသာ ပိုမို ဘေးကင်းမည် ဖြစ်သည်။

တာအိုဘိုးဘေးနှင့် ဝိညာဉ်အရိုးစု ဧကရီတို့၏ တိုက်ပွဲသတင်း ကမ္ဘာသားတိုင်း၏ နားထဲသို့ မရောက်ရှိခဲ့ပေ။ ချန်မျိုးနွယ်စုသာလျှင် သိရှိခဲ့ပြီး၊ ထို့နောက်တွင် ကောင်းကင်နန်းတော်တစ်ခုလုံးသို့ ပျံ့နှံ့သွားကာ နတ်ဘုရားများကို တုန်လှုပ်စေခဲ့သည်။ ငြိမ်းချမ်းလှသည်ဟု ထင်ရသော နှစ်များအတွင်း တာအိုဘိုးဘေးက လူတိုင်းအတွက် ကပ်ဘေးတစ်ခုကို တိတ်တဆိတ် ခုခံပေးခဲ့ခြင်း ဖြစ်သည်။

နတ်ဘုရားတိုင်းတွင် ပြင်းထန်သော တိုက်ခိုက်လိုစိတ်နှင့် မာန်မာနများ ရှိကြရာ၊ အမြဲတမ်း စောင့်ရှောက်ခံနေရခြင်းကို သူတို့ မခံစားနိုင်ကြပေ။ ခဏအတွင်းမှာပင် ကောင်းကင်ဘုံ၏ ကျင့်ကြံရေးကွင်းပြင်တွင် အရှိန်အဝါများ မြင့်တက်လာခဲ့သည်။

ချန်မျိုးနွယ်စုက ဝိညာဉ်အရိုးစုဧကရီအကြောင်းကို ကောင်းစွာ နားလည်ထားပုံ ရသည်။

သူတို့ ထိုဒဏ္ဍာရီအကြောင်းကို ကောင်းကင်ဘုံသို့ ဖြန့်ဝေခဲ့ပြီး၊ ထို့နောက်တွင် စိတ်ဝိညာဉ်ကင်းလွတ်ခြင်းနယ်မြေ သို့ ပျံ့နှံ့သွားစေရာ ဝတ်ပြုကိုးကွယ်သူများကို တုန်လှုပ်သွားစေသည်။

အစုလိုက်အပြုံလိုက် သတ်ဖြတ်ခြင်းကို နှစ်သက်သော မသေမျိုးမိစ္ဆာများက ခွန်းလွန်နယ်မြေကို ပစ်မှတ်ထားနေပြီ ဖြစ်ကာ၊ သိုင်းတာအို ကပ်ဘေးကလည်း မကြာမီ ကျရောက်တော့မည် ဖြစ်သည်။

မကြုံစဖူးသော ဖိအားများက စိတ်ဝိညာဉ်ကင်းလွတ်ခြင်းနယ်မြေသို့ လွှမ်းမိုးလာခဲ့သည်။ တာအိုဘိုးဘေးကို ယုံကြည်ကြသော်လည်း မမျှော်လင့်ထားသည်များ ဖြစ်လာမည်ကို သူတို့ စိုးရိမ်နေကြသည်။

နောက်ဆုံးတွင်တော့ သူတို့နှင့် တာအိုဘိုးဘေးကြားရှိ ခွန်အားကွာဟချက်က ကြီးမားလွန်းလှသည်။တာအိုဘိုးဘေး သန်မာခြင်းက ခွန်းလွန်နယ်မြေ သန်မာခြင်းဟု မဆိုလိုနိုင်ပေ။

ရွှမ်ဟွမ် မဟာကမ္ဘာရှိ ခမ်းနားသော အိမ်တော်တစ်ခုအတွင်း၌.....

မီးတောက်သခင် မျက်လုံးများကို ဖွင့်လိုက်ပြီး လေပူတစ်ချက် မှုတ်ထုတ်လိုက်သည်။သို့သော် မျက်လုံးထဲမှ စိတ်လှုပ်ရှားမှုများကို ဖုံးကွယ်၍ မရနိုင်ပေ။

"ဒဏ္ဍာရီလာ မသေမျိုးမိစ္ဆာတောင် တာအိုဘိုးဘေးရဲ့ နှိမ်နင်းခြင်းကို ခံလိုက်ရတာလား...တာအိုဘိုးဘေး ဘယ်လောက်တောင် အစွမ်းထက်တာလဲ....တော်သေးတာပေါ့...ယန်မျိုးနွယ်စုက သူနဲ့ ပတ်သက်ခွင့်ရခဲ့လို့!"

မီးတောက်သခင်သည်လည်း ချန်ယွဲ့ချန်းကဲ့သို့ပင် သတင်းအချက်အလက် ကြွယ်ဝသူဖြစ်ပြီး၊ မျိုးနွယ်စုအတွင်း မြင့်မားသော အဆင့်အတန်းရှိသူ ဖြစ်သည်။ သို့မဟုတ်ပါက ယန်မျိုးနွယ်စု၏ အမြင့်ဆုံးပညာရပ်ဖြစ်သော "မူလဝိညာဉ် နည်းစနစ်ကို ရရှိမည် မဟုတ်ပေ။

ဒဏ္ဍာရီများအရ အချိန်ကာလ တစ်ခုကြာတိုင်းတွင် ဟင်းလင်းပြင်မှ မသေမျိုးမိစ္ဆာများသည် ရွှမ်ဟွမ် မဟာကမ္ဘာသို့ ကျူးကျော်လာတတ်ပြီး၊ ကမ္ဘာပေါင်းများစွာကို သတ်ဖြတ်ဖျက်ဆီးလေ့ရှိသည်။

ယန်မျိုးနွယ်စု၏ မှတ်တမ်းများအရ မီးတောက်သခင် သိရှိထားသည်မှာ သိုင်းတာအိုဝိညာဉ် နယ်ပယ် ပညာရှင်များပင် ထိုမိစ္ဆာများ လက်ချက်ဖြင့် သေဆုံးခဲ့ဖူးကြောင်း ဖြစ်သည်။

မသေမျိုးမိစ္ဆာ စုစုပေါင်း သုံးပါး ရှိသည်။ ၎င်းတို့မှာ ဝိညာဉ်အရိုးစု ဧကရီ၊ လောဘ ချန်ဧကရာဇ် နှင့် အာဃာတ ဧကရာဇ် တို့ ဖြစ်ကြသည်။ ထိုအမည် သုံးခုသည် ဒဏ္ဍာရီများစွာတွင် ပါဝင်ပြီး အစွန်းကုန် ဆိုးယုတ်မှုကို ကိုယ်စားပြုသည်။

မီးတောက်သခင် ထိုင်ရာမှထ၍ အခန်းပြင်သို့ ထွက်လာခဲ့သည်။ ခဏအကြာတွင် ခန်းမတစ်ခုအတွင်းသို့ ဝင်ရောက်လာရာ ယန်မျိုးနွယ်စုမှ အကြီးအကဲများ တစ်ခုခုကို ဆွေးနွေးနေကြသည်ကို တွေ့ရသည်။ ထို့ကြောင့် အားလပ်နေသော ထိုင်ခုံတစ်ခုတွင် ထိုင်ကာ တိတ်တဆိတ် နားထောင်နေလိုက်သည်။

"နတ်ဘုရားပြစ်ဒဏ်ပေး စစ်တပ်ကတော့ ရှေးဟောင်းဂိုဏ်းတွေကို အခုလောလောဆယ် အမြစ်ပြတ် မချေမှုန်းနိုင်သေးဘူး။ မကြာခင် စစ်ပွဲက ယန်မျိုးနွယ်စုဆီကို ကူးစက်လာလိမ့်မယ်။ အခုအချိန်မှာ ငါတို့ လုပ်နိုင်တာက ရှေးဟောင်းဂိုဏ်းတွေကို တိုက်ထုတ်တဲ့ စစ်ပွဲမှာ ပါဝင်ပြီး ငါတို့ရဲ့ နယ်မြေကို ကာကွယ်ဖို့ပဲ။"

"ဒါက ကိုယ့်ကိုယ်ကိုယ် သေတွင်းထဲ ခုန်ဆင်းတာ မဟုတ်ဘူးလား။ သိုင်းနတ်ဘုရားမြေက 'သိုင်းသခင်'တစ်ယောက်ကို လွှတ်လိုက်တယ်လို့ ကြားတယ်၊ ဒါပေမဲ့ သူတောင်မှ ရှေးဟောင်းဂိုဏ်းကို ဘာမှ မတတ်နိုင်ခဲ့ဘူး။"

"အဲဒီ ရှေးဟောင်းဂိုဏ်းတွေမှာ ခေတ်အဆက်ဆက်က ပညာရှင်တွေ ရှိနေတာလေ.... သိုင်းသခင်တောင် ဘာမှ မလုပ်နိုင်တာ မဆန်းပါဘူး။ အဓိကကတော့ သူတို့က ထူးဆန်းတဲ့ ရှေးဟောင်း နည်းစနစ်တွေကို တတ်မြောက်ထားတာပဲ။ အခြေအနေ မဟန်ရင် သူတို့က ဆုတ်ခွာသွားကြတာ၊ နတ်ဘုရားပြစ်ဒဏ်ပေး စစ်တပ်က သူတို့ကို မမီနိုင်ဘူး။"

အကြီးအကဲများက တစ်ယောက်တစ်ပေါက် စိုးရိမ်တကြီး ပြောဆိုနေကြသည်။

ယန်မျိုးနွယ်စု၏ အကြီးအကဲက ခန်းမ၏ ထိပ်ဆုံးတွင် ထိုင်နေပြီး မီးတောက်သခင်နှင့် အလွန်တူသည်။တကယ်တော့ သူတို့မှာ သားအဖများ ဖြစ်ကြသည်။ မီးတောက်သခင်သည် ငယ်ရွယ်သော်လည်း ပါရမီထူးချွန်သူ ဖြစ်သည်။

ယန်မျိုးနွယ်စု အကြီးအကဲက ရုတ်တရက် မီးတောက်သခင်ကို ကြည့်ကာ မေးလိုက်သည်။ "ရွှီအာ... ဒီသိုင်းတာအို ကပ်ဘေးရဲ့ အစက အောက်ဘုံက ကောင်းကင်ဘုံရဲ့ တာအိုဘိုးဘေးနဲ့ ဆက်စပ်နေတယ်။ မင်းရဲ့ အမြင်ကို ပြောပါဉီး..."

ထိုသို့ မေးလိုက်သည်နှင့် လူတိုင်းက မီးတောက်သခင်ကို လှည့်ကြည့်ကြသည်။

မီးတောက်သခင် အောက်ဘုံမှ မည်သို့ ပြန်လာသည်ကို မျိုးနွယ်စုဘက်က အဖြေမရသေးသော်လည်း၊ ဘေးဒုက္ခ ကျရောက်မည် စိုးသောကြောင့် သိုင်းနတ်ဘုရားနယ်မြေသို့ သတင်းမပို့ဝံ့ကြပေ။ ထို့ကြောင့် မီးတောက်သခင်ခင်မျာ မျိုးနွယ်စု အိမ်တော်အတွင်း၌သာ နေထိုင်နေရခြင်း ဖြစ်သည်။

ရွှမ်ဟွမ် မဟာကမ္ဘာတွင် မျိုးနွယ်စုများ၏ စည်းလုံးမှုက အရာရာထက် အရေးကြီးသည်။ ထို့ကြောင့် သစ္စာဖောက် ပေါ်ပေါက်ရန် ခဲယဉ်းလှသည်။

မီးတောက်သခင်က "ကျွန်တော့်အမြင်အရ ယန်မျိုးနွယ်စုအနေနဲ့ ဒီကိစ္စမှာ မပတ်သက်သင့်ဘူး။ ရှေးဟောင်းဂိုဏ်းတွေက စစ်မှန်တဲ့ ကပ်ဘေး မဟုတ်သေးဘူး။ ကပ်ဘေးအစစ်က အခုမှ ဖြစ်တည်လာနေတုန်းပဲ။ ယန်မျိုးနွယ်စု အနေနဲ့ အင်အားကို တတ်နိုင်သမျှ ထိန်းသိမ်းထားဖို့ လိုတယ်။" ဟု ပြောလိုက်သည်။

သူသည် မိမိ၏ လူမျိုးများကို စိတ်ဝိညာဉ်ကင်းလွတ်ခြင်းနယ်မြေသို့ မည်သို့ ခေါ်ဆောင်ရမလဲနှင့် တာအိုဘိုးဘေးကို ယုံကြည်လာအောင် မည်သို့ ပြောရမလဲဟု ဝေခွဲမရ ဖြစ်နေခဲ့သည်။ ယခုမူ အခွင့်အရေးက သူ့ဆီ ဆိုက်ဆိုက်မြိုက်မြိုက် ရောက်လာခဲ့ပြီ ဖြစ်သည်။

"ကောင်းကင်ဘုံက ရှေးဟောင်း နည်းစနစ်တွေကို ကျင့်ကြံတာ မဟုတ်ဘဲ အင်မော်တယ် ပညာရပ်တွေကို ကျင့်ကြံတာပါ။ တာအိုဘိုးဘေးက ကမ္ဘာကြီးကို လက်ဝါးထဲ ထည့်နိုင်တာ၊ သေသူကို ပြန်ရှင်စေတာနဲ့ ကောင်းကင်နဲ့ မြေကြီးကို ပြောင်းလဲနိုင်တာမျိုး မယုံနိုင်စရာ စွမ်းရည်တွေကို ပိုင်ဆိုင်ထားတယ်။ သိုင်း တာအိုပဖျက်ဆီးဖို့ပဲ ကောင်းတာ၊ ဒါပေမဲ့ ဒီလို စွမ်းရည်မျိုး ရှိတဲ့သူကို ခင်ဗျားတို့ ကြားဖူးလို့လား။" ဟု မီးတောက်သခင်က ဆက်လက် ပြောဆိုလိုက်သည်။

ယန်မျိုးနွယ်စု အကြီးအကဲများ စဉ်းစားခန်း ဝင်သွားကြသည်။

မီးတောက်သခင်က မျက်လုံးကို ကျဉ်းလိုက်ပြီး.... "ကောင်းကင်ဘုံက တခြား ကျင့်စဉ်စနစ်ကို သုံးနေပြီး သိုင်းနတ်ဘုရားနယ်မြေက သူတို့ကို ခြေရာမခံနိုင်ဘူးဆိုရင်၊ ကောင်းကင်ဘုံက ရှေးဟောင်းဂိုဏ်းတွေထက် ပိုသန်မာနေမှာ မဟုတ်ဘူးလား။ အဲဒီ အင်မော်တယ် ပညာရပ် ဆိုတာတွေကရော တကယ်ပဲ ရှိနေတာလား။"

"ဒါက ဘယ်လိုလုပ် ဖြစ်နိုင်မှာလဲ...အင်မော်တယ် ပညာရပ်ဆိုတာ မရှိနိုင်ဘူး.... ကမ္ဘာကြီးကို လက်ထဲထည့်တယ်ဆိုတာ လှည့်စားမှုတစ်ခု ဖြစ်မှာပါ...သေသူကို ရှင်စေတယ်ဆိုတာကလည်း သေလုမျောပါး ဖြစ်နေတဲ့သူကို ကယ်တာ ဖြစ်လိမ့်မယ်။ ငါလည်း လက်တစ်ဖက်နဲ့ ကောင်းကင်နဲ့ မြေကြီးကို ပြောင်းလဲပြနိုင်တယ်!" ဟု အဘိုးအို တစ်ဦးက ခေါင်းခါရင်း ရယ်မောကာ ပြောလိုက်သည်။

သူ၏ စကားကို အခြားသူများကလည်း ထောက်ခံကြပြီး မီးတောက်သခင်ကို စနောက်ကြသည်။

ထိုစဉ် ယန်မျိုးနွယ်စုဝင် တစ်ဦးသည် လေပွေကဲ့သို့ ပြေးဝင်လာကာ ...

"အစီရင်ခံပါတယ် အကြီးအကဲ... အခြေအနေ မကောင်းတော့ဘူး... ရှေးဟောင်းဂိုဏ်းက လူတွေ အနီးအနားက ကြယ်တာရာ ဟင်းလင်းပြင်မှာ ပေါ်လာပြီ။ သူတို့ အရေအတွက်ကလည်း တိုးလာနေတယ်!" ဟု အော်ပြောလိုက်သည်။

လူတိုင်း တုန်လှုပ်သွားကြသည်။

အကြီးအကဲ ချက်ချင်းပင် ထိုင်ရာမှထ၍ ပျောက်ကွယ်သွားသည်။

မီးတောက်သခင်၏ မျက်လုံးများကမူ အရောင်တောက်သွားပြီး စိတ်ထဲတွင် တိတ်တဆိတ် စိတ်လှုပ်ရှားနေသည်။ အကယ်၍ ရှေးဟောင်းဂိုဏ်းများက တာအိုဘိုးဘေးကို အရေးယူအောင် ဖိအားပေးနိုင်မည်ဆိုပါက၊ သူသည် ယန်မျိုးနွယ်စု၏ စိတ်နှလုံးကို ချက်ချင်း သိမ်းပိုက်နိုင်မည် မဟုတ်ပါလား။

သူ ချက်ချင်းပင် အခန်းသို့ ပြန်သွားပြီး တာအိုဘိုးဘေးထံမှ ညွှန်ကြားချက် တောင်းခံရန် စိတ်ဝိညာဉ်ကင်းလွတ်ခြင်းနယ်မြေသို့ ဝင်ရောက်လိုက်သည်။

စိတ်ဝိညာဉ်ကင်းလွတ်ခြင်းနယ်မြေ ကောင်းကင်ဘုံ ၃၃လွှာရှိ ခရမ်းရောင် တိမ်တိုက်နန်းတော် ရှေ့တွင်....

မီးတောက်သခင် တံခါးရှေ့တွင် ဒူးထောက်ကာ နဖူးနှင့် ကြမ်းပြင်ကို ထိကပ်၍ တောင်းပန်တိုးလျှိုးနေသည်။ သူသည် မိမိ၏ တာဝန်ကို မကျေပွန်သေးဘဲ အကူအညီ တောင်းခံမိသည့်အတွက် တာအိုဘိုးဘေး စိတ်ပျက်သွားမည်ကို စိုးရိမ်နေသည်။

"ယန်မျိုးနွယ်စုက ငါနဲ့ ဘာမှ မဆိုင်ဘူး.... ကောင်းကင်ဘုံ ဒါမှမဟုတ် ခွန်းလွန်နယ်မြေနဲ့လည်း မဆိုင်ဘူး၊ မင်းကလည်း ကောင်းကင်ဘုံက မဟုတ်ဘူး။"

တာအိုဘိုးဘေး၏ အသံ နန်းတော်ထဲမှ ထွက်ပေါ်လာရာ မီးတောက်သခင်၏ နှလုံးသား တစ်ခုလုံး ချောက်ထဲကျသွားသလို ခံစားလိုက်ရသည်။ သို့သော် နောက်ဆက်တွဲ စကားများက သူ့ကို အံ့အားသင့်သွားစေသည်။

"ဒါပေမဲ့ ယန်မျိုးနွယ်စုက ထူးဆန်းတဲ့ အရာတွေရဲ့ တိုက်ခိုက်ခြင်းကို ခံနေရတာမို့ ငါ လက်တွဲကူညီပေးမယ်။ အကယ်၍ ယန်မျိုးနွယ်စုက ရှေးဟောင်းဂိုဏ်းတွေကို မယှဉ်နိုင်ရင် မင်းရဲ့ စိတ်ထဲကနေ ငါ့ကို ခေါ်လိုက်ပါ။ မင်းမှာ စိတ်ရင်းအမှန်ရှိရင် အလုပ်ဖြစ်လိမ့်မယ်။ မှတ်ထားပါ... ဒါဟာ အလွန် အရေးကြီးတဲ့ အချိန်ကျမှ ဖြစ်ရမယ်။"

တာအိုဘိုးဘေး၏ အသံက မည်သည့် ခံစားချက်မျှ မပါဘဲ အေးစက်တည်ငြိမ်နေသည်။ မီးတောက်သခင် အလွန်ဝမ်းသာသွားပြီး ကျေးဇူးတင်စကား ပြောကာ ပြန်လည် ထွက်ခွာသွားခဲ့သည်။

လက်တွေ့ကမ္ဘာတွင်.....

ကျန်းချန်ရှန်း မျက်လုံးများကို ဖွင့်လိုက်ပြီး မီးတောက်သခင်၏ ခန္ဓာကိုယ်ပေါ်ရှိ ပြန်လည်ဝင်စားခြင်း အမှတ်အသားမှတစ်ဆင့် အကွာအဝေးကို တိုင်းတာလိုက်သည်။

"နတ်ဘုရားသတ်လွှားဓားမြှောင်ပျံ" ကို စမ်းသပ်ရန် အခွင့်ကောင်းပင်!

အကယ်၍ သူသာ ကမ္ဘာဖျက်မြှားကို သုံးမည်ဆိုလျှင် သိုင်းနတ်ဘုရားနယ်မြေက တားဆီးနိုင်ချေ ရှိသည်။ သို့သော် နတ်ဘုရားသတ်ဓားမြှောင်ပျံက သတ်ဖြတ်ခြင်း ရတနာဖြစ်ပြီး ၎င်း၏ အဆင့်အတန်းမှာ နေမင်းပစ်ခွင်းလေးထက်ပင် မြင့်မားသည်။ ၎င်း၏ အရှိန်မှာလည်း ထူးခြားလှပြီး၊ အကယ်၍ မအောင်မြင်ခဲ့လျှင်ပင် သူ၏ မှော်ရတနာကို ပြန်လည် ခေါ်ယူနိုင်သည်။

ကျန်းချန်ရှန်း ကျင့်ကြံခြင်းမှ ခဏနားကာ လူသားကမ္ဘာကို ကြည့်ရှုလိုက်သည်။

ကောင်းကင်အမွေနှစ်ခေတ် စတင်ခဲ့သည်မှာ ၅၃ နှစ် ရှိပြီဖြစ်သည်။

ထျန်းကျင်းအင်ပါယာသည်လည်း အုပ်စိုးမှုလမ်းကြောင်းပေါ်တွင် ရှိနေဆဲဖြစ်သည်။ ကမ္ဘာအနှံ့ရှိ တောင်စောင့်နတ်နှင့် မြေစောင့်နတ်များသည်လည်း သူတို့၏ တာဝန်များကို ကျင့်သားရနေပြီ ဖြစ်ကာ၊ သာမန်ပြည်သူများကလည်း နတ်ဘုရားများ ရှိကြောင်းကို လက်ခံလာကြသည်။ သို့သော် လူတိုင်းက အင်မော်တယ်ပညာရပ်ကို မယုံကြည်ကြသေးဘဲ၊ အချို့က နတ်ဘုရားများကို အစွမ်းထက်သော သိုင်းပညာရှင်များဟုသာ ထင်မြင်နေကြဆဲ ဖြစ်သည်။

ခွန်းလွန်နယ်မြေရှိ လူထုကို ကြည့်ရင်း ကျန်းချန်ရှန်း သူ၏ ကိုယ်ပိုင် တာအိုကမ္ဘာအကြောင်းကို တွေးတောမိသည်။

ယခင်က သက်ရှိတစ်ခု မွေးဖွားခဲ့သော်လည်း၊ တာအိုကမ္ဘာတွင်နောက်ထပ် သက်ရှိများစွာ ထွန်းကားခြင်း မရှိသေးဘဲ တိတ်ဆိတ်နေဆဲ ဖြစ်သည်။ သို့သော် တာအိုကမ္ဘာ၏ ဟင်းလင်းပြင်မှာမူ အဆမတန် ကျယ်ပြန့်လာနေသည်။

လက်ရှိတွင် ၎င်းသည် ကောင်းကင်နှင့် မြေကြီး၏ ဝိညာဉ်စွမ်းအင်များကို သိုလှောင်ရာနေရာအဖြစ်သာ ရှိနေပြီး သူ၏ မှော်စွမ်းအားများကို အဆုံးမရှိ ထောက်ပံ့ပေးထားသည်။

ကျန်းချန်ရှန်း ကမ္ဘာနှစ်ခုကို စောင့်ကြည့်နေစဉ်၊ ဝေးကွာလှသော ရွှမ်ဟွမ် မဟာကမ္ဘာရှိ မီးတောက်သခင်သည်လည်း မျိုးနွယ်စု အကြီးအကဲ၏ ခေါ်ယူခြင်းကို ခံလိုက်ရသည်။

ယခုတစ်ခါတွင် ခေါ်ယူသည့်နေရာမှာ အကြီးအကဲ၏ နန်းဆောင်မဟုတ်ဘဲ ယန်မျိုးနွယ်စု၏ သိုင်းပညာ သင်ကြားရေး ခန်းမဖြစ်သည်။ ခန်းမကြီးမှာ အလွန်ခမ်းနားပြီး မီးတောက်သခင် ရောက်လာချိန်တွင် ယန်မျိုးနွယ်စုမှ ပညာရှင် ထောင်ပေါင်းများစွာ ရောက်ရှိနေကြပြီ ဖြစ်သည်။

"ပထမအကြီးအကဲက ရှေးဟောင်းဂိုဏ်းက မိစ္ဆာတွေနဲ့ စစ်ဖြစ်နေပြီ၊ ဒါပေမဲ့ အဲဒီ မိစ္ဆာတွေက အရမ်း သန်မာလွန်းတယ်။"

"ရှေးဟောင်းဂိုဏ်းတွေက တကယ်ပဲ အဲဒီလောက် အစွမ်းထက်တာလား။ သိုင်းသခင်ကို တိုက်ခိုက်ခဲ့တဲ့ ရှေးဟောင်း ပညာရှင်ကြီး ရောက်လာတာလား။"

"မဖြစ်နိုင်တာ။ အဲဒီ ပညာရှင်ကြီးသာ တကယ်လာရင် ငါတို့ အားလုံး ပြားပြားဝပ်သွားမှာပေါ့။ အခုဟာက ရှေးဟောင်းဂိုဏ်းတစ်ခုရဲ့ ဌာနခွဲခေါင်းဆောင်လို့ပဲ ပြောတယ်။"

မီးတောက်သခင် နားထောင်ရင်း မျက်မှောင်ကြုတ်လိုက်သည်။ ရန်သူ၏ အခြေအနေက သူထင်ထားသည်ထက် ပိုမို ပြင်းထန်နေသည်။ နာရီအနည်းငယ်အတွင်းမှာပင် ယန်မျိုးနွယ်စုဘက်က ရှုံးနိမ့်မှုနှင့် ရင်ဆိုင်နေရပြီ ဖြစ်သည်။

တာအိုဘိုးဘေးကို အခုချက်ချင်း ခေါ်ရမလားဟု ဝေခွဲမရ ဖြစ်နေသည်။ သို့သော် တာအိုဘိုးဘေးက "အလွန် အရေးကြီးတဲ့ အချိန်ကျမှ" ဟု မှာကြားထားသည် မဟုတ်ပါလား။

အကယ်၍ တာအိုဘိုးဘေး ရောက်လာချိန်တွင် ရှေးဟောင်းဂိုဏ်းများ ဆုတ်ခွာသွားပါက အလွန် ရှက်စရာကောင်းပေလိမ့်မည်။

ယန်မျိုးနွယ်စု၏ လူစွမ်းကောင်းများ ဆွေးနွေးနေစဉ်၊ ကောင်းကင်ယံမှ ပုံရိပ်တစ်ခု ပျံသန်းလာပြီး ခန်းမထဲသို့ အမြန်ဝင်လာသည်။ လူတိုင်း ကြည့်လိုက်ရာ အဘိုးအို တစ်ဦးကို တွေ့ရသည်။ သူသည် ကြမ်းပြင်ပေါ်သို့ လဲကျသွားကာ ခန္ဓာကိုယ်တစ်ခုလုံး သွေးများဖြင့် ရွှဲနစ်နေသည်။

အဘိုးအိုက ညာဘက်လက်ကို အားယူကာ မြှောက်လိုက်ပြီး တုန်ယင်နေသော အသံဖြင့် ပြောလိုက်သည်။ "မျိုးနွယ်စု အကြီးအကဲ... ငါတို့ မတိုက်နိုင်တော့ဘူး... မတိုက်နိုင်တော့ဘူး!"

ထိုစကားကြောင့် ခန်းမတစ်ခုလုံး ရုတ်ရုတ်သဲသဲ ဖြစ်သွားသည်။ ပထမအကြီးအကဲပင် ရှုံးနိမ့်သွားပြီး ဤကဲ့သို့ စကားမျိုး ပြောလာသည် မဟုတ်ပါလား။

ယန်မျိုးနွယ်စု အကြီးအကဲ၏ မျက်နှာထား အလွန်အမင်း ရုပ်ဆိုးသွားသည်။ သူ မတ်တတ်ရပ်၍ စကားပြောရန် ပြင်လိုက်စဉ်၊ ခန်းမအပြင်ဘက်သို့ လှမ်းကြည့်လိုက်သည်။ လူတိုင်းလည်း လှည့်ကြည့်လိုက်ကြရာ...

ခန်းမအပြင်ဘက် ကောင်းကင်ယံတွင် ကြီးမားသော ဟင်းလင်းပြင် အပေါက်ကြီးတစ်ခု ပွင့်ထွက်လာပြီး၊ လျှပ်စီးများ လက်ကာ မိုးခြိမ်းသံများဖြင့် အလွန်တရာ ထိတ်လန့်ဖွယ်ကောင်းသော မြင်ကွင်းကြီး ပေါ်ပေါက်လာလေတော့သည်။