အခန်း (၁၄၀)

ဗိုလ်ချုပ်ကြီးနှင့် ဝန်ကြီးချုပ်တို့သည် တစ်ယောက်မျက်နှာ တစ်ယောက်ကြည့်လိုက်ပြီး စကားတစ်ခွန်းမှ မပြောတော့ဘဲ တိတ်ဆိတ်သွားခဲ့ကြသည်။

"ကျွန်တော် ဦးလေးတို့နှစ်ယောက်ကို ရာထူးတွေကနေ ဘာကြောင့်ထုတ်ပစ်ခဲ့လဲဆိုတာ အခုနားလည်ပြီလား"

လင်းပိုင်ဖန်က အရက်ကို သောက်နေရင်း ပြောလိုက်သည်။ "အဲဒါ ဦးလေးတို့နှစ်ယောက်က အရမ်းသစ္စာရှိလွန်းလို့ပဲ၊ ဦးလေးတို့ရဲ့ ရည်ရွယ်ချက်တွေက ကောင်းပေမယ့် ကျွန်တော့်ရဲ့အတွေးတွေနဲ့ ဆန့်ကျင်နေတယ်"

"တစ်ယောက်က နန်းတော်ရဲ့ မဟာဗိုလ်ချုပ်ကြီး၊ နောက်တစ်ယောက်က လက်ရှိ ဝန်ကြီးချုပ် ဖြစ်နေတယ်။ နန်းတော်ထဲမှာ ဦးလေးတို့က ကျွန်တော့်ကို ချည်နှောင်ပြီး ကျွန်တော့်ရဲ့ လုပ်ဆောင်ချက်တွေကို အနှောင့်အယှက် ဖြစ်စေလိမ့်မယ်"

"ဒါကြောင့် ကျွန်တော်က ဦးလေးတို့နှစ်ယောက်ကို တစ်ခါတည်းနဲ့ ရာထူးကနေထုတ်ပစ်ခဲ့တာ"

ဝန်ကြီးချုပ်နှင့် ဗိုလ်ချုပ်ကြီးတို့သည် အချင်းချင်း ထပ်မံကြည့်ရှုလိုက်ကြပြီး ဝန်ကြီးချုပ်က ခါးသီးစွာပြုံးကာ- "ဒါဆို ဒါက အကြောင်းရင်းပဲပေါ့။ အရှင်မင်းကြီး၊ ဒီလိုဆိုရင် ကျွန်တော်မျိုးတို့ နန်းတော်ကို ပြန်လာဖို့ အခွင့်အရေး မရှိတော့ဘူးလား" ဟု မေးလိုက်သည်။

"မဟုတ်ဘူး၊ အခွင့်အရေးရှိသေးတယ်"

လင်းပိုင်ဖန်က ရယ်လိုက်ပြီး- "ကျွန်တော် ဦးလေးတို့ကို ရာထူးတွေကနေ ထုတ်ပစ်ခဲ့တာက ကျွန်တော့်ရဲ့နည်းလမ်းတွေနဲ့ မဟာရှကို တဆင့်ချင်းစီ ဘယ်လိုမျိုး တိုးတက်လာအောင်၊ အင်အားကြီးမားလာအောင် လုပ်မလဲဆိုတာကို ဦးလေးတို့ကို ကောင်းကောင်းမြင်စေချင်လို့ပဲ၊ ကျွန်တော့်ရဲ့နည်းလမ်းတွေက ထူးဆန်းပြီး မကြာခဏဆိုသလို အထင်လွဲခံရပေမယ့် အရမ်းကို ထိရောက်တယ်လေ၊ အခု ရလဒ်တွေက ဘယ်လိုလဲဆိုတာ ဦးလေးတို့ ကိုယ်တိုင် မြင်ပြီးပြီပဲ မဟုတ်လား" ဟု ပြောလိုက်သည်။

ဝန်ကြီးချုပ်က အံ့အားသင့်စွာဖြင့် " ရလဒ်က စိတ်ကူးလို့တောင် မရနိုင်လောက်အောင်ပါပဲ"

ဗိုလ်ချုပ်ကြီးကလည်း "တကယ်ပါပဲ၊ တစ်နှစ်အတွင်းမှာပဲ နိုင်ငံငယ်လေး တစ်ခုကို နိုင်ငံကြီးတစ်ခုအဖြစ် တိုးတက်အောင် လုပ်နိုင်တာက ကမ္ဘာပေါ်မှာ ရှားပါးလှတဲ့ အရာပဲ။ အစ်ကိုကြီးသာ သိခဲ့ရင် အလွန် ဝမ်းသာနေမှာ အသေအချာပဲ"

"အမှန်ပဲ"

လင်းပိုင်ဖန်က- "ဦးလေးတို့နှစ်ယောက် သိဖို့လိုတာက မဟာရှ စည်ပင်ဝပြောလာဖို့ကို ကျွန်တော့်ထက်ပိုပြီး လိုချင်တဲ့သူ ရှိမှာမဟုတ်ဘူး"

နှစ်ဦးစလုံးက လေးနက်စွာဖြင့် သဘောတူညီကြောင်းကို ခေါင်းညှိတ်လိုက်ကြသည်။

"ကျွန်တော့်ရဲ့ ဦးလေးတို့"

လင်းပိုင်ဖန်က ဆက်ပြောလိုက်သည်- "အခုဆိုရင် ကျွန်တော့်ရဲ့ ကြိုးပမ်းမှုတွေကို နားလည်သွားပြီဆိုတော့။ ဦးလေးတို့ ပြန်လာရမယ့် အချိန်ရောက်ပြီ"

လူအိုကြီးနှစ်ဦး၏ မျက်လုံးများ အရောင်တောက်ပသွားပြီး- "တကယ်လား"

"အမှန်ပဲ၊ ကျွန်တော် အစိုးရအဖွဲ့ တစ်ခု ဖွဲ့စည်းဖို့ ပြင်နေတယ်"

လူအိုကြီးနှစ်ဦးလုံးက နားမလည်စွာဖြင့် "အစိုးရအဖွဲ့ဆိုတာ ဘာလဲ" ဟု မေးလိုက်သည်။

"အစိုးရအဖွဲ့လို့ ခေါ်တဲ့အရာက..."

ထို့နောက် လင်းပိုင်ဖန်က အစိုးရအဖွဲ့ စနစ်ကို တစ်ခုချင်း ရှင်းပြလိုက်သည်။

အစိုးရအဖွဲ့လို့ ခေါ်တဲ့အရာက တကယ်တော့ လင်းပိုင်ဖန်ကိုယ်စား အုပ်ချုပ်ရေးရာတွေကို ကိုင်တွယ်ရတဲ့ ရုံးတစ်ခုပင် ဖြစ်တယ်။

ဒီရုံးက အရှင်မင်းကြီးကို ကူညီပြီး အမတ်တွေ တင်ပြထားတဲ့ စာချွန်လွှာတွေကို ရေးဆွဲဖို့နဲ့ ပြန်လည် တုံ့ပြန်ဖို့အတွက် ထိပ်တန်းပညာရှင်တွေကို စုစည်းပြီး ဖွဲ့စည်းထားတာဖြစ်တယ်။ ဒီရုံးရဲ့ အကြီးအကဲကိုလည်း ဝန်ကြီးချုပ်လို့လည်း ခေါ်တယ်။

သို့သော်လည်း ဝန်ကြီးဌာန ခြောက်ခုနဲ့ ရာထူးမြင့်အရာရှိ ကိုးဦးတို့နဲ့ ယှဉ်ရင် ဒီအစိုးရအဖွဲ့မှာ သိသာလှတဲ့ အာဏာမရှိပေ။

ဘာကြောင့်လဲဆိုတော့ သူတို့တင်ပြတဲ့ စာချွန်လွှာတွေဟာ အကောင်အထည်မဖော်ခင် လင်းပိုင်ဖန်ရဲ့ ခွင့်ပြုချက်ကို လိုအပ်နေသေးလို့ပင် ဖြစ်သည်။

" ဦးလေးတို့ နှစ်ယောက်က ကျွန်တော် အလွန်ကို ယုံကြည်ရတဲ့သူတွေဖြစ်သလို နှစ်ပေါင်းများစွာ စွမ်းဆောင်ရည်မြင့်မားစွာနဲ့ အုပ်ချုပ်ခဲ့ကြသူတွေလည်း ဖြစ်တယ်။ ဒါကြောင့် ဒီအစိုးရအဖွဲ့ရဲ့ ဝန်ကြီးချုပ် ရာထူးကို ဦးလေးတို့ဆီ အပ်နှင်းလိုက်တယ်၊ ဦးလေးတို့က ကိုယ်စားလှယ်လောင်း အချို့ကို ရွေးချယ်ပြီး ကျွန်တော့်ရဲ့စိုးရိမ်ပူပန်မှုတွေကို ဝေမျှဖို့ အစိုးရအဖွဲ့ကို ဖွဲ့စည်းနိုင်တယ်"

"အရှင်မင်းကြီး၊ ဒီအစီအစဉ်ကနေ ဘာအကျိုးကျေးဇူးတွေ ရရှိမှာလဲ"

လင်းပိုင်ဖန်က ချောင်းဆိုးလိုက်ကာ-"ဒီအစီအစဉ်ရဲ့ အကြီးမားဆုံး အကျိုးကျေးဇူးကတော့ အခုကစပြီး ကျွန်တော်က ဒီဝန်ထုပ်ဝန်ပိုးဖြစ်တဲ့ အစိုးရရေးရာ ကိစ္စတွေကနေ လွတ်လပ်နိုင်ပြီ။ မနက်ခင်း နန်းတွင်းအစည်းအဝေးတွေကိုတောင် ရှောင်ရှားနိုင်ပြီး တကယ်ကို ဘဝကို ပျော်ချင်သလို ပျော်လို့ရပြီ၊ ဟား..ဟား…" ဟု ပြောလိုက်သည်။

သူ ဒီအစိုးရအဖွဲ့ကို ဖွဲ့စည်းရခြင်းရဲ့ အဓိက ရည်ရွယ်ချက်က သူ့တာဝန်တွေကို လျှော့ချချင်လို့ပင် ဖြစ်သည်။

အခုဆိုရင် နိုင်ငံက ကြီးမားလာပြီး လူဦးရေကလည်း တိုးလာတာနဲ့အမျှ သူ ကိုင်တွယ်ရမယ့် နိုင်ငံတော်ရေး ကိစ္စတွေကလည်း များပြားလာပြီး အဆုံးမရှိတော့ပဲ၊ စိတ် အနှောင့်အယှက် ဖြစ်လာခဲ့သည်။

ရိုးရိုးသားသားပြောရရင် နိုင်ငံတော်ရေးကိစ္စ အများအပြားကို သူကိုယ်တိုင် ကိုင်တွယ်စရာ မလိုခဲ့ပေ။

ဘာကြောင့်လဲဆိုတော့ နိုင်ငံနဲ့ပတ်သက်တဲ့ ပြဿနာတစ်ခုခု ပေါ်လာတိုင်း သူဟာ အင်ပါယာ မြေပုံ ကို ကြည့်လိုက်ရုံနဲ့ အရာအားလုံးကို သိနိုင်လို့ပင် ဖြစ်သည်။

ကြည်လင်ပြတ်သားပြီးတော့... ရိုးရှင်းလွယ်ကူလှသည်။

ဒါကြောင့် သူဟာ ဒီကိစ္စတွေအတွက် သူ့ရဲ့ စွမ်းအင်တွေကို တကယ်ပဲ မဖြုန်းတီးချင်ခဲ့ပေ။

အစိုးရအဖွဲ့ဖွဲ့စည်းခြင်းက တကယ်ပင် လိုအပ်နေသည်၊ ဘာလို့လဲဆိုတော့ အနည်းဆုံးတော့ အလုပ်တွေရဲ့ ၉၀% ကို စစ်ထုတ်ပေးနိုင်လို့ပဲ ဖြစ်သည်။

ဝန်ကြီးချုပ်နဲ့ ဗိုလ်ချုပ်ကြီးတို့က အချင်းချင်း အကြည့်ချင်း ဖလှယ်လိုက်ကြသည်။ အရှင်မင်းကြီးဟာ အပျင်းထူဖို့အတွက် အစိုးရအဖွဲ့ကို ဖွဲ့စည်းချင်နေတာကိုး။

အရင်တုန်းကအတိုင်းဆိုရင် သူတို့ဟာ အားပေးစကားအချို့ ပြောပြီး လုံ့လဝီရိယရှိရှိနဲ့ ကြိုးစားအားထုတ်ပြီး၊ ကရုဏာ ကြီးမားတဲ့ ဧကရာဇ်ဖြစ်လာဖို့ကို တိုက်တွန်းပြောဆိုကြမှာ အသေအချာပင်။

သို့သော်လည်း ပြီးခဲ့တဲ့ တစ်နှစ်ကျော် ကာလအတွင်းမှာ လင်းပိုင်ဖန်ဟာ သမားရိုးကျ မဟုတ်တဲ့၊ တချို့သူတွေရဲ့အမြင်မှာဆိုရင် မိုက်မဲပုံရနေတဲ့ ဆုံးဖြတ်ချက်တွေကို အများအပြား ချမှတ်ခဲ့ပေမယ့် နောက်ဆုံးမှာတော့ အဲဒီဆုံးဖြတ်ချက်တွေအားလုံးဟာ ထူးထူးခြားခြား ထိရောက်မှုရှိပြီး နိုင်ငံတော်ကို ပိုမိုစည်ပင်ဝပြောမှုဆီသို့ ဦးတည်သွားစေခဲ့သည်။

ဒါကြောင့် သူတို့ရဲ့ အကန့်အသတ်ရှိတဲ့ အမြင်တွေကြောင့် ဧကရာဇ်မင်းကြီးရဲ့ အရေးကြီးတဲ့ ကိစ္စတွေကို အနှောင့်အယှက်မဖြစ်စေဖို့အတွက် သူတို့ဟာ ဆန့်ကျင်ခြင်းမှ ရှောင်ကြဉ်ခဲ့ကြလိုက်သည်။

ဒါ့အပြင်ကိုမှ သူတို့ဟာ နန်းတော်ကို ပြန်လာဖို့အတွက် အရမ်းပဲ စိတ်အားထက်သန်နေကြသည်။ အစိုးရအဖွဲ့ရဲ့ ဝန်ကြီးချုပ်ဖြစ်လာပြီး နိုင်ငံတော်ရဲ့ အဓိက ကိစ္စရပ်တွေမှာ တိုက်ရိုက်ပါဝင်ကာ၊ အရှင်မင်းကြီးရဲ့ အကြံပေးအဖြစ် ဆောင်ရွက်ရတာဟာ သူတို့အတွက် ကောင်းမွန်တဲ့ ရလဒ်တစ်ခုအဖြစ် သတ်မှတ်နိုင်ပေသည်။

လူအိုကြီးနှစ်ဦးစလုံးက တပြိုင်တည်း- "အရှင်မင်းကြီး၊ စိတ်ချပါ၊ ကျွန်တော်မျိုးတို့က သင့်လျော်တဲ့ ကိုယ်စားလှယ်လောင်းတွေကို ရှာဖွေပြီး အစိုးရအဖွဲ့ကို ဖွဲ့စည်းကာ အရှင်မင်းကြီးရဲ့ စိုးရိမ်ပူပန်မှုတွေကို ဝေမျှပေးပါ့မယ်" ဟု ပြောလိုက်ကြသည်။

လင်းပိုင်ဖန်က အလွန်ကျေနပ်အားရစွာဖြင့်- "ကောင်းပြီ ဆက်သောက်ကြရအောင်"

တစ်နှစ်တာ အနားယူခဲ့ပြီးနောက်တွင် မဟာဗိုလ်ချုပ်ကြီးနှင့် ဝန်ကြီးချုပ်တို့သည် အရာရှိဘဝသို့ ပြန်လည်ရောက်ရှိရန် အခွင့်အရေးက ရောက်လာခဲ့သဖြင့် စိတ်အားထက်သန်မှုတို့ဖြင့် ပြည့်နှက်နေကြသည်။ နားချိန်တောင် မယူဘဲ အလုပ်ရှုပ်နေခဲ့ကြပြီး အစိုးရအဖွဲ့ ဖွဲ့စည်းရန် ကိုယ်စားလှယ်လောင်းများကို စတင်ရှာဖွေခဲ့ကြသည်။

ဒီသတင်းက တဖြည်းဖြည်း ပျံ့နှံ့လာခဲ့သည်။

"ဦးလေးတို့ ကြားပြီးပြီလား။ အရှင်မင်းကြီးက အစိုးရအဖွဲ့တစ်ခု ဖွဲ့စည်းဖို့ ပြင်ဆင်နေတယ်တဲ့"

"အစိုးရအဖွဲ့ဆိုတာ ဘာလဲဟ"

"အစိုးရအဖွဲ့ဆိုတာက အရှင်မင်းကြီးကို နိုင်ငံတော်ရေးရာ ကိစ္စတွေကို ကိုင်တွယ်ရာမှာ ကူညီရတဲ့ အဖွဲ့အစည်းတစ်ခုပဲ၊ ရိုးရိုးရှင်းရှင်း ပြောရရင်ကွာ အခုကစပြီး အစိုးရအဖွဲ့က စာချွန်လွှာအများစုကို ပြန်လည်စိစစ်မှာဖြစ်ပြီးတော့ အရှင်မင်းကြီး လုပ်ဖို့လိုတာက နောက်ဆုံးမှာ ခေါင်းညှိတ်ပေးဖို့ပဲ"

"အစိုးရအဖွဲ့ ဖွဲ့စည်းပြီးရင် မနက်ခင်း နန်းတွင်းအစည်းအဝေးတွေ ဖျက်သိမ်းတော့မယ်လို့လည်း ကြားတယ် အခုကစပြီး တနင်္လာနေ့ ဒါမှမဟုတ် အခြားအရေးကြီးတဲ့ နေ့တွေကလွဲရင် အရပ်ဘက်နဲ့ စစ်ဘက်အရာရှိတွေ မနက်ခင်း နန်းတွင်းအစည်းအဝေးကို တက်ရောက်ဖို့ မလိုတော့ဘူးတဲ့"

"ဒီမိုက်မဲတဲ့ ဧကရာဇ်က ရူးနေတာလား၊ နိုင်ငံက တိုးတက်လာပြီဆိုတာနဲ့ အပျင်းထူဖို့ပဲ စဉ်းစားနေပြီ၊ မနက်ခင်း နန်းတွင်းအစည်းအဝေးလည်း မရှိဘူး၊ စာချွန်လွှာတွေကိုတောင် အစိုးရအဖွဲ့က စိစစ်ရမယ်ဆိုရင် သူ့ကို ဧကရာဇ်အဖြစ် ဘာလို့ လိုအပ်တော့မှာလဲ"

"သူ လုပ်ချင်တာ လုပ်ပါစေ၊ မဟာရှက မကြာခင်မှာ သူ့လက်ထဲမှာ ပျက်စီးရလိမ့်မယ်"

နှစ်သစ်ကူးပွဲတော် ရက်ရှည် ရုံးပိတ်ရက်က မြန်မြန်ဆန်ဆန်ပဲ ကုန်ဆုံးသွားခဲ့သည်။

လူတိုင်း အလုပ်တွေ ပြန်စလုပ်ကြပြီးတော့ လယ်ယာတွေရှင်း၊ စိုက်ပျိုးရေးတွေ လုပ်၊ သတ္တုတွေ တူးဖော်၊ အိမ်တွေဆောက်၊ နန်းတော် တည်ဆောက်တာတွေ၊ အဝတ်အထည် ရက်လုပ်ခြင်း စသည့် ဆိုင်ရာဆိုင်ရာ အလုပ်တွေကို စတင်လုပ်ကိုင်နေခဲ့သည်။

နန်းတော်ဟာလည်း တစ်ဖန် အရှိန်အဟုန်ပြင်းစွာဖြင့် လည်ပတ်လာခဲ့ပြန်သည်။

ဒီအချိန်မှာတော့ အစိုးရအဖွဲ့ကို ဖွဲ့စည်းပြီးခဲ့ပြီဖြစ်ပြီး လင်းပိုင်ဖန်ကို သူရဲ့စိုးရိမ်ပူပန်မှုတွေကနေ သက်သာရာရစေဖို့ ကူညီပေးနေပြီဖြစ်ကာ၊ သူဟာ ဝန်ထုပ်ဝန်ပိုးဖြစ်တဲ့ နိုင်ငံတော်ရေးရာ ကိစ္စတွေကနေ နောက်ဆုတ်ပြီး တကယ်ကို ဘဝကို ပျော်မွေ့စွာ စံစားနေပြီဖြစ်သည်။

ဘဏ္ဍာရေးဝန်ကြီးဌာနရဲ့ ဝန်ကြီး ဟီရှန်းသည် အခြားနိုင်ငံများမှ သင်္ဘောဆောက်လုပ်ရေး ကျွမ်းကျင်ပညာရှင်များကို ခေါ်ယူရန်အတွက် စစ်ဆေးရေးအဖွဲ့တစ်ဖွဲ့ကို ဖွဲ့စည်းရန် အမိန့်ပေးခဲ့သည်။

တစ်ချိန်တည်းမှာပင်၊ ဘိလပ်မြေလမ်းများကိုလည်း စတင်တည်ဆောက်လုပ်ရန်အတွက် လုပ်သား ထောင်ပေါင်းများစွာကို စုစည်းခဲ့သည်။

လမ်းတွေကို မြို့တော်ကနေ စတင်ပြီး အခြားမြို့ကြီးများစွာအထိ တည်ဆောက်ခဲ့ကြသည်။

ယဥ်ကျေးမှုငှာနရဲ့ ဒုတိယဝန်ကြီး လီလင်းဖူကတော့ နိုင်ငံတော်အတွက် အရည်အချင်းရှိသူတွေကို ရွေးချယ်ရန် နန်းတွင်းစာမေးပွဲကို စီစဉ်ရာမှာလည်း အလုပ်များနေခဲ့သည်။

အခုအချိန်မှာတော့ မဟာရှဟာ အရင်ကလို နိုင်ငံငယ်လေး မဟုတ်တော့ပေ။

တစ်နှစ်အတွင်းမှာပဲ နိုင်ငံငယ်လေးကနေ စတုရန်းမိုင် ရှစ်သိန်းကျော် ကျယ်ဝန်းပြီး လူဦးရေ ဆယ်သန်းနီးပါးရှိတဲ့ နိုင်ငံကြီးတစ်ခုအဖြစ် ပြောင်းလဲလာခဲ့ကာ ထူးခြားတဲ့ အလားအလာတွေကို ပြသနေခဲ့သည်။

ပညာရှင်အများအပြားဟာ သူတို့ရဲ့ ကံကို စမ်းကြည့်ချင်ကြတဲ့အပြင်၊ စာမေးပွဲတွေ ဖြေဆိုဖို့နဲ့ သူတို့ရဲ့ ပညာရပ်တွေကို ပြသဖို့အတွက် မဟာရှဆီကို မိုင်ထောင်ချီ ခရီးနှင်လာခဲ့ကြသည်။