အမွေအနှစ် ရယူခြင်း

~သူ့ရှေ့တွင် ရှိနေသော ဧရာမလိပ်ကြီးသည် ပေ (၁၀၀) ခန့် ကြီးမားပြီး၊ ခိုင်ခံ့ထူထဲသော အခွံကြီးကို ပိုင်ဆိုင်ထားသည်။ လှိုင်းတံပိုးများကြား လျှောက်လှမ်းနေသော ၎င်း၏ ပုံစံသည် ရွေ့လျားနေသော တောင်ငယ်လေး တစ်လုံးပမာပင်။ ဖိနှိပ်မှု အရှိန်အဝါများ ပြည့်နှက်နေ၏။ နင်ချီသည် သိုင်းသူတော်စင် စစ်စစ်ကို တစ်ခါမှ မမြင်ဖူးသော်လည်း၊ ဤ လိပ်ကြီးသည် သိုင်းသူတော်စင်အဆင့် ရှိသည်ဟု ရာနှုန်းပြည့် သေချာနေ၏။

နင်ချီ၏ မျက်နှာထား ချက်ချင်း လေးနက်သွား၏။

အမှန်အတိုင်း ဝန်ခံရလျှင်... ဒါက သူ မျှော်လင့်ထားသည်ထက် ကျော်လွန်နေ၏။

ယခင် စမ်းသပ်မှု အဆင့်ဆင့်၏ စွမ်းအား တိုးတက်လာပုံအရ ဆိုလျှင်၊ နောက်ဆုံး ပြိုင်ဘက်သည် ယွီဘုရင်ပုလဲကို အသုံးပြုထားသော မိစ္ဆာဂိုဏ်း မဟာအကြီးအကဲ အဆင့်လောက်သာ ရှိမည်ဟု သူ တွက်ဆထားခဲ့သည်။ ပြီးခဲ့သော အဆင့်တွင် 'အစစ်အမှန်သိုင်း တံဆိပ်တော် အငယ်စား' ၏ ခက်ခဲမှု ရုတ်တရက် မြင့်တက်လာသည်ကို ထည့်တွက်လျှင်တောင်မှ၊ အလွန်ဆုံး 'သိုင်းသူတော်စင် အတု' တစ်ကောင်လောက်နှင့်သာ ရင်ဆိုင်ရမည်ဟု ပြင်ဆင်ထားခဲ့သည်။

သို့ရာတွင်၊... မထင်မှတ်ထားဘဲ...

တကယ့် သိုင်းသူတော်စင်အဆင့် လိပ်ကြီးတစ်ကောင် ထွက်ပေါ်လာခဲ့သည်။

၎င်းကို ဝန်းရံထားသော ဝိညာဉ်စွမ်းအား လှိုင်းဂယက်များသည် အတုအယောင် မရှိ၊ အစစ်အမှန်များသာ ဖြစ်၏။ အဆုံးအစမရှိသော အသက်စွမ်းအင်များနှင့် ပြည့်နှက်နေပြီး၊ 'တာအိုဆရာ ပိုင်ရှန်' ပြောပြခဲ့ဖူးသော သိုင်းသူတော်စင် အတုများနှင့် လုံးဝ ကွဲပြားခြားနားနေ၏။

နင်ချီသည် ရှေ့မှ လိပ်ကြီးကို သေချာ စူးစိုက်ကြည့်လိုက်သည်။ ယခင် လိပ်ကြီးများလို ရုပ်သေးရုပ် မဟုတ်ဘဲ၊ ဤလိပ်ကြီး၏ မျက်လုံးများထဲတွင် အေးစက်မှု အရိပ်အယောင်များ ပါဝင်နေ၏။ ဉာဏ်ရည်ဉာဏ်သွေး ရှိကြောင်း သိသာထင်ရှားသည်။ ဘာကြောင့်မှန်းမသိ၊ လိပ်ကြီး၏ အကြည့်များက သူ့အပေါ် မလိုလားအပ်သော ရည်ရွယ်ချက်များ ရှိနေသလို နင်ချီ ခံစားလိုက်ရသည်။

နင်ချီ အသက်ကို ဝဝရှူသွင်းလိုက်ပြီး၊ တစ်ကိုယ်လုံးကို အသင့်အနေအထား ပြင်လိုက်သည်။

ပြိုင်ဘက်က အလွန်အမင်း အစွမ်းထက်လွန်းနေ၏။

မိမိ၏ ရှိသမျှ အစွမ်းကုန် ထုတ်သုံးလိုက်လျှင်ပင် အနိုင်ရမည်ဟူသော အာမခံချက်ကား မရှိလှပေ။

အထူးသဖြင့် ဤစမ်းသပ်မှုအတွင်းတွင် ယွီဘုရင်ပုလဲ၏ စွမ်းအားကို ထုတ်ဖော်အသုံးပြုရန် ကြိုးပမ်းခဲ့သော်လည်း အရာမထင်ခဲ့လေ၏။

‘ကောင်းကင်ဘုံလူသား အဆင့်လောက်နဲ့ သိုင်းသူတော်စင်အဆင့်ကို အနိုင်ယူရမယ် ဟုတ်လား... ဒီကမ္ဘာပေါ်မှာ ဘယ်သူမှ လုပ်နိုင်မှာ မဟုတ်ဘူး... ကြည့်ရတာ အစစ်အမှန်သိုင်း အမွေအနှစ် ဆိုတာ ထာဝရ ပျောက်ကွယ်သွားတော့မယ့် ပုံပဲ’

နင်ချီ တိတ်တဆိတ် တွေးတောနေမိသည်။

ဤကိစ္စရပ်ကို အခြားမည်သူကမျှ ပြီးမြောက်အောင်မြင်နိုင်မည်ဟု သူ မယုံကြည်မိပေ။ ရှေးဟောင်းသိုင်းသူတော်စင်ကြီးများ ဆိုလျှင်ပင် မျှော်လင့်ချက် ရောင်ခြည် သမ်းနိုင်မည် မဟုတ်ချေ။

ကောင်းကင်ဘုံလူသားအဆင့်နှင့် သိုင်းသူတော်စင်အဆင့်တို့ကြားရှိ ကွာဟချက်ကို သဘောပေါက် နားလည်ထားသူများသာလျှင်၊ ထိုကွာဟချက်သည် မည်မျှလောက်အထိ ကြီးမားကျယ်ပြန့်ကြောင်းကို ခန့်မှန်းသိရှိနိုင်ကြပေလိမ့်မည်။

သို့သော်ငြားလည်း...

သူ ကိုယ်တိုင်ပင် သတိမထားမိလိုက်သော အချိန်တွင်၊ နင်ချီ၏ မျက်ဝန်းအစုံ၌ ပြင်းပြသော တိုက်ခိုက်လိုစိတ်များက ဟုန်းခနဲ တောက်လောင်လာခဲ့လေပြီ။

ဤသို့သော ပြိုင်ဘက်ကောင်းမျိုးကား လောကတွင် ရှာဖွေရ ခက်ခဲလှသည် မဟုတ်ပါလော။

“လာစမ်းပါ... ငါ့ရဲ့ အကန့်အသတ်က ဘယ်လောက်လဲဆိုတာ ကြည့်ကြသေးတာပေါ့”

သိုင်းသူတော်စင် လိပ်ကြီးသည် နင်ချီ၏ တိုက်ခိုက်လိုစိတ်ကို အာရုံခံမိပုံရပြီး၊ မျက်ဝန်းထဲတွင် အထင်သေးမှုများ ဖြတ်ပြေးသွား၏။ ၎င်းသည် နက်ရှိုင်းစွာ ဟိန်းဟောက်လိုက်ရာ သမုဒ္ဒရာတစ်ခုလုံး တုန်ခါသွားပြီး၊ ရေတိုင်ကြီးများသည် ရူးသွပ်နေသော နဂါးများအလား ကောင်းကင်သို့ ထိုးတက်သွားကာ နင်ချီကို ဝါးမြိုဖျက်ဆီးရန် ပြေးဝင်လာကြလေတော့သည်။ ဝိညာဉ်စွမ်းအားများ ပေါင်းစပ်ထားသော ရိုးရှင်းသည့် ရေတိုင်ကြီးများသည်ပင်လျှင် အလွန်အမင်း အစွမ်းထက်လှပြီး၊ ကောင်းကင်ဘုံလူသား စာရင်းဝင် ထိပ်ဆုံး (၁၀) ယောက်ကို ချက်ချင်း သတ်ပစ်နိုင်စွမ်း ရှိလေသည်။

လိပ်ကြီးသည် လေထဲတွင် တည်ငြိမ်စွာ ထိုင်နေပြီး၊ နင်ချီကို ကလေးကစားစရာ ကြည့်သလို ကြည့်နေ၏။

နင်ချီ၏ လက်များ လျင်မြန်စွာ လှုပ်ရှားသွား၏။

သူ့စိတ်စွမ်းအားများ လှိုင်းထန်လာပြီး၊ ပထမဆုံးအကြိမ်အဖြစ် အစွမ်းကုန် ထုတ်သုံးလိုက်သည်။

ကြီးမားလှသော ကောင်းကင်နှင့်မြေကြီး စွမ်းအားများ သူ့ဘေးပတ်လည်တွင် စုစည်းလာသည်။ ဝိညာဉ်စွမ်းအားလောက် မသန့်စင်သော်လည်း၊ ပမာဏကတော့ ကြောက်ခမန်းလိလိပင်။ ရှေးဟောင်း တံဆိပ်တော် တစ်ခုအဖြစ် ပြောင်းလဲသွားပြီး ရှေ့သို့ ဖိနှိပ်ဝင်ရောက်သွားရာ လေထုပင် ရပ်တန့်သွားရသည်။

နင်ချီသည် မကြာသေးမီကမှ တတ်မြောက်ထားသော 'အစစ်အမှန်သိုင်း တံဆိပ်တော် အငယ်စား' ကို ထုတ်သုံးလိုက်ခြင်း ဖြစ်၏။ ယခင် တိုက်ပွဲများမှ ရရှိခဲ့သော အတွေ့အကြုံများကြောင့် ယခုအခါ ပိုမို ထိရောက်စွာ အသုံးပြုနိုင်ပြီ ဖြစ်၏။

ရေနဂါးကြီးများသည် ဖိနှိပ်မှုအောက်တွင် ကွဲကြေသွားသော်လည်း၊ ရှေးဟောင်း တံဆိပ်တော်သည်လည်း ပြိုပျက်လုနီးပါး ဖြစ်သွားရသည်။

လိပ်ကြီး၏ မျက်လုံးများထဲမှ လှောင်ပြောင်မှုများ ပျောက်ကွယ်သွားပြီး၊ အံ့သြမှု အရိပ်အယောင် အနည်းငယ် ပေါ်လာသည်။

အမြဲတမ်း စူးစမ်းလေ့လာတတ်သော နင်ချီသည် ၎င်းက ဘာကြောင့် အစစ်အမှန်သိုင်း တံဆိပ်တော် အငယ်စားကို အရင်ဆုံး ထုတ်သုံးလိုက်သလဲ ဆိုတာ ချက်ချင်း နားလည်လိုက်သည်။ ရေချိန်ကို စမ်းသပ်လိုက်ခြင်းပင်။

‘ဒီလိပ်ကြီးက အစစ်အမှန်သိုင်း တံဆိပ်တော် အငယ်စားကို သိနေပုံပဲ... အရင်က လိပ်တွေနဲ့ မတူဘူး... နေပါဦး... ဒါဆို အရင်က လိပ်တွေက သူ့ရဲ့ ကိုယ်ပွားတွေ၊ ဒါမှမဟုတ် သူ ဖန်တီးထားတာတွေများလား... ငါက အဲ့ဒီလိပ်တွေကို အားမနာပါးမနာ ဖောက်ခွဲပစ်လိုက်လို့ သူ ဒေါသထွက်နေတာလား’

ထိုအခိုက်အတန့်တွင် နင်ချီ သဘောပေါက်သွားသလို ခံစားလိုက်ရသည်။

သူ ခါးသီးစွာ ပြုံးလိုက်မိသည်။ ဒါက မလိုအပ်ဘဲ ပြဿနာ ရှာမိသလို ဖြစ်သွားပြီ ဖြစ်လေ၏။

ယခုမှ နောင်တရနေလို့လည်း အပိုပဲ။

လိပ်ကြီး၏ ခန္ဓာကိုယ် တုန်ခါသွားပြီး၊ ပြန့်ကျဲနေသော ရေတိုင်များသည် ကြမ်းတမ်းခက်ထန်သော ရေနဂါးကြီးတစ်ကောင်အဖြစ် ပေါင်းစပ်သွားကာ နင်ချီဆီသို့ ပြိုင်ဘက်ကင်း အရှိန်အဟုန်ဖြင့် ခုန်အုပ်လာလေတော့သည်။ သားရဲဘုရင် ဆိုသော ကောင်များထက် အဆပေါင်းများစွာ သာလွန်ပြီး၊ လာရာလမ်းကြောင်းတစ်လျှောက်ရှိ လေဟာနယ်ကိုပင် ဆုတ်ဖြဲပစ်လိုက်သည်။ နင်ချီ အစွမ်းကုန် အာရုံစိုက်ထားလိုက်ရသည်။

ပြတ်သားစွာပင်... နင်ချီ တုံ့ပြန်လိုက်သည်။

'ပန်းပွင့်သုံးပွင့် ထိပ်မှာ စုဝေးခြင်း'၊ 'ကောင်းကင်ဘုံလူသား တံတား' အားလုံးကို လည်ပတ်လိုက်ပြီး ကောင်းကင်နှင့်မြေကြီး စွမ်းအား အမြောက်အမြားကို ဆွဲယူလိုက်သည်။ ထို့အပြင် ပန်းပွင့်သုံးပွင့်သည် ထူးခြားသော ကြိမ်နှုန်းတစ်ခုဖြင့် တုန်ခါလာပြီး၊ စစ်ထုတ်စက် တစ်ခုအလား လုပ်ဆောင်ကာ စွမ်းအားများကို ပိုမို ကြံ့ခိုင်သန်စွမ်းလာစေ၏။

ဒါက ဓားမမိစ္ဆာနှင့် စမ်းသပ်မှုတွေကနေ ရရှိလာသော ရလဒ်တွေပင်။

သိုင်းသူတော်စင် ကျင့်စဉ်ကို လေ့လာရင်း မမျှော်လင့်ဘဲ ရရှိလိုက်သည့် ဘေးထွက်ဆုလာဘ်ပါတည်း။

တိုက်ပွဲမှာလည်း ထိရောက်မှု ရှိ‌ပေသား။

ကောင်းကင်ဓားများ စုစည်းလာပြီး ပြိုင်ဘက်ကင်း ထက်ရှမှုများဖြင့် ပြည့်နှက်နေ၏။ နင်ချီ၏ ဓားစိတ်ဆန္ဒများ အဆက်မပြတ် ကြီးထွားလာပြီး၊ ကောင်းကင်ဓားသိုင်း၏ စွမ်းအားနှင့်အညီ မြင့်တက်လာနေ၏။

လိပ်ကြီး၏ မျက်လုံးများထဲတွင် ယခုအခါ အံ့သြမှုများ အပြည့်။

မျက်စိတစ်မှိတ် အတွင်းမှာပင်...

ကောင်းကင်ဓားများသည် ကြယ်တာရာများအလား ကောင်းကင်ယံတွင် ပြည့်နှက်သွား၏။

တစ်ရာ။

တစ်ထောင်။

တစ်သောင်း။

ကောင်းကင်ဓားများသည် ကောင်းကင်ကို ဖြတ်သန်းသွားပြီး၊ ပြိုင်ဘက်ကင်း ထက်ရှမှုများ ယှက်နွှယ်ကာ 'ဆမ်လော် ဓားကွန်ရက်' တစ်ခုအဖြစ် ဖွဲ့စည်းလိုက်သည်။ လေဟာနယ်ထဲတွင် သိမ်မွေ့သော အက်ကွဲကြောင်းများ ပေါ်လာသည်။ မိစ္ဆာဂိုဏ်း မဟာအကြီးအကဲနှင့် တိုက်ခိုက်စဉ်ကနှင့် ယှဉ်လျှင် နင်ချီ၏ ကျင့်ကြံခြင်းသည် ကောင်းကင်ဘုံလူသား အထွတ်အထိပ်သို့ ရောက်ရှိနေပြီ ဖြစ်ပြီး၊ လျှို့ဝှက်နည်းလမ်းများလည်း ပိုမို တိုးတက်လာခဲ့ပြီ ဖြစ်ရာ၊ သူ့တိုက်ခိုက်နိုင်စွမ်းသည် မှတ်မိနိုင်စရာ မရှိလောက်အောင် မြင့်မားသွားခဲ့ပြီ ဖြစ်၏။

လိပ်ကြီး၏ မျက်လုံးများထဲတွင် လှောင်ပြောင်မှုများ လုံးဝ မရှိတော့။

ရေနဂါးကြီး ဟိန်းဟောက်လိုက်ပြီး ကြီးမားသော လှိုင်းလုံးများကို မြှောက်တင်ကာ ရိုက်ချလိုက်သည်။ ထိုဖိအားက စိတ်ဝိညာဉ်ကိုပင် ရိုက်ခတ်သွားစေ၏။

သို့သော် နင်ချီ၏ စိတ်အာရုံ လှုပ်ရှားလိုက်သည်နှင့် မရေမတွက်နိုင်သော ကောင်းကင်ဓားများသည် ရာချီသော ဓားချီများအဖြစ် ကွဲထွက်သွားပြီး၊ သန်းပေါင်းများစွာသော ဓားချီများဖြင့် ဖွဲ့စည်းထားသည့် ကြောက်မက်ဖွယ် ကွန်ရက်ကြီးတစ်ခု ဖွဲ့တည်လာကာ အချင်းချင်း အားဖြည့်ပေးနေကြသည်။

လေဟာနယ် အပိုင်းပိုင်း အစစ ပြတ်တောက်သွား၏။

လှိုင်းလုံးကြီးများမှာ ဓားချီများ၏ ချေမှုန်းမှုကို ခံလိုက်ရပြီး လုံးဝ ပျက်စီးသွား၏။ ဓားချီများက ဆက်လက် လိုက်ပါသွားပြီး၊ တချိန်က ဟိန်းဟောက်နေခဲ့သော ရေနဂါးကြီးကို ပိတ်လှောင်လိုက်လေတော့သည်။ အတွင်းထဲမှ အစွမ်းထက် ဝိညာဉ်စွမ်းအားများက ဓားချီများကို ဖျက်ဆီးပစ်ရန် ခြိမ်းခြောက်နေသော်လည်း၊ ဓားချီ အရေအတွက်က များပြားလွန်းလှသဖြင့် ရေနဂါးကြီးကို တဖြည်းဖြည်းချင်း ဝါးမြိုသွားလေတော့သည်။