ရှောင်လင်းယဲ့၏နောက်ခံကို ခန့်မှန်းမိခြင်း
Vol. 50 Ch. 816
မောင်လေးဖြစ်သူ ကျောင်းတွင်ကြုံတွေ့ရသည့် ပြဿနာများကို ရှောင်လင်းယွီသည် ခင်ပွန်းဖြစ်သူ ကုန်းထျန်းဟောက်ထံမှ ကြားသိခဲ့ရသည်။
သူမ၏မောင်လေးသည် မိတ်ဆွေဟောင်းများ၏လုပ်ကြံခြင်းကို ခံရသော်လည်း လက်ထဲတွင် သက်သေအထောက်အထားများ ရှိနေကြောင်း ကြားသိရသောအခါ ရှောင်လင်းယွီ အံ့သြသွားလေသည်။
ရှောင်လင်းယွီက ရယ်မောကာ ပြောလိုက်သည်။ "ဟားဟား... ကျွန်မမောင်လေးက အတော်ဆုံးဆိုတာ ငါသိသားပဲ"
ယခင်ဘဝက ရှောင်လင်းယဲ့သည် သစ္စာဖောက်ခံရပြီးနောက် လျင်မြန်စွာ ပြန်လည်ထူထောင်နိုင်ခဲ့သည်။ ထို့နောက် ကမ္ဘာကျော်ကုမ္ပဏီကြီးတစ်ခု၏ ဟွာရှဆိုင်ရာ ဥက္ကဌအဖြစ် ခန့်အပ်ခံရပြီး သ့်အောင်မြင်မှုများသည် ကမ္ဘာကပင် အသိအမှတ်ပြုခဲ့ရသည်။
ဤဘဝတွင် မောင်လေးသည် ထိုကုမ္ပဏီကြီး၏ ခန့်အပ်ခြင်းခံရဦးမည်လား မသိသော်လည်း သူ့ကံကြမ္မာ ပြောင်းလဲသွားပြီဖြစ်ကြောင်း သူမ သိသည်။
သူ့လို အရည်အချင်းရှိတဲ့သူက ဘယ်နေရာရောက်ရောက် တောက်ပနေမှာပါ။ အခုက ကြီးပြင်းလာဖို့ အချိန်လိုနေတာပဲ ရှိတယ်။
ကုန်းထျန်းဟောက်က ပြုံးလျက် ပြောလိုက်သည်။ "ဟုတ်တယ်... ကိုယ်တို့ညီလေးက အထူးချွန်ဆုံးနဲ့ အတော်ဆုံးပဲ"
ထို့နောက် ကုန်းထျန်းဟောက်က ရှောင်လင်းယွီကို ပြောပြလိုက်သည်။ "ဒါနဲ့ ယွီအာ၊ ရှင်းထိန်နည်းပညာကုမ္ပဏီရဲ့ ဥက္ကဌ လဲ့ကျွင်းရှန်က ယဲ့အာကို တပည့်မွေးချင်တယ်လို့ ပြောတယ်"
"ရှင်းထိန်နည်းပညာကုမ္ပဏီ... လဲ့ကျွင်းရှန် ဟုတ်လား" ရှောင်လင်းယွီ အံ့သြတကြီး မေးလိုက်သည်။ "ထျန်းဟောက်၊ ရှင် နားကြားမှားတာ မဟုတ်ပါဘူးနော်။ တကယ် လဲ့ကျွင်းရှန်လား"
လဲ့ကျွင်းရှန်သည် အင်တာနက်နည်းပညာလောကတွင် ဒဏ္ဍာရီလာပုဂ္ဂိုလ်တစ်ဦး ဖြစ်သည်။ လူအများ ကိုးကွယ်လေးစားရသူ ဖြစ်သည်။
"အင်း လဲ့ကျွင်းရှန်ပါပဲ" မိန်းမဖြစ်သူ၏ အံ့သြနေသော ချစ်စရာပုံစံကိုကြည့်ပြီး ကုန်းထျန်းဟောက်၏ နှလုံးသား နူးညံ့သွားသည်။ သူ့ယွီအာက ဉာဏ်ကောင်းပြီး လှပရုံတင်မကဘူး၊ ချစ်စရာလည်း ကောင်းတာပဲ။
ခဏအကြာတွင် ရှောင်လင်းယွီ သတိပြန်ဝင်လာပြီး သံသယဖြင့် မေးလိုက်သည်။ "လဲ့ကျွင်းရှန်က ရှင်နဲ့ ပြောတာလား။ လောင်ကုန်း... လဲ့ကျွင်းရှန်က ရှင်နဲ့ ဘာပတ်သက်လို့လဲ"
ကုန်းထျန်းဟောက်က ပြောလိုက်သည်။ "အင်း... သူက ကိုယ့်ရဲ့ တက္ကသိုလ်ကျောင်းနေဖက် သူငယ်ချင်းလေ"
"တက္ကသိုလ်ကျောင်းနေဖက် သူငယ်ချင်း ဟုတ်လား" ရှောင်လင်းယွီ ခေါင်းညိတ်လိုက်သည်။ "ဒါကြောင့်ကိုး"
ထို့နောက် သူမ သံသယဖြင့် မေးလိုက်ပြန်သည်။ "ထျန်းဟောက်၊ အမှန်အတိုင်း ပြောပါဦး။ ဥက္ကဌလဲ့က ယဲ့အာကို တပည့်မွေးတာ ရှင့်မျက်နှာကြောင့်လား"
မောင်လေးကို လဲ့ကျွင်းရှန်က တပည့်မွေးတာ ဝမ်းသာပေမယ့် ကုန်းထျန်းဟောက်ကြောင့်ဆိုရင်တော့ သိပ်ပြီး စိတ်မသန့်ဘူး။
ကုန်းထျန်းဟောက်က သူမ၏ခေါင်းကို ဖွဖွလေး ခေါက်လိုက်ပြီး ရယ်မောကာ ပြောလိုက်သည်။ "မင်းတို့မောင်နှမနှစ်ယောက်က အတွေးချင်း တူလိုက်တာ။ မင်းတို့ လဲ့ကျွင်းရှန်ကို နားမလည်ဘူး။ ယဲ့အာမှာ အရည်အချင်းမရှိရင်၊ စိတ်နေသဘောထား မကောင်းရင် ကိုယ်နဲ့ဘယ်လောက်ပဲ ရင်းနှီးရင်းနှီး ကိုယ့်မျက်နှာကိုထောက်ပြီး ယဲ့အာကို တပည့်မွေးမှာ မဟုတ်ဘူး"
ရှောင်လင်းယွီ သံသယဝင်နေဆဲပင်။ "ဒါပေမဲ့ ဥက္ကဌလဲ့လို အဆင့်အတန်းရှိတဲ့လူက ကျွန်မမောင်လေးလို သာမန်လူတစ်ယောက်အကြောင်း ဘယ်လိုလုပ် သိသွားတာလဲ"
ကုန်းထျန်းဟောက်က မဖုံးကွယ်ဘဲ ပြောပြလိုက်သည်။ "ယဲ့အာအကြောင်းကို ကိုယ်က လဲ့ကျွင်းရှန်ကို ပြောပြလိုက်တာ။ သူ နားထောင်ပြီး စိတ်ဝင်စားသွားတယ်။ နောက်ပိုင်း လူလွှတ်ပြီး စုံစမ်းခိုင်းလိုက်တော့ ရလဒ်က အံ့သြစရာ ကောင်းနေတယ်။ ကိုယ်တို့ယဲ့အာက တကယ့်ကို ပြုစုပျိုးထောင်လို့ရတဲ့ အလားအလာရှိတဲ့ ကလေးတစ်ယောက်ပဲတဲ့။ သူပြောတာက ယဲ့အာကို ကောင်းကောင်း ပြုစုပျိုးထောင်ပေးရင် အနာဂတ်မှာ သူ့ထက်မလျော့တဲ့ အောင်မြင်မှုတွေ ရလာနိုင်တယ်တဲ့။ ဒါကြောင့် သူက ယဲ့အာကို တပည့်မွေးဖို့ စိတ်ဝင်စားနေတာ"
ရှောင်လင်းယွီ ကြားလိုက်ရသောအခါ အံ့သြသွားသည်။ "ဥက္ကဌလဲ့က ကျွန်မတို့မောင်လေးကို ဒီလောက်တောင် အထင်ကြီးတာလား"
ကုန်းထျန်းဟောက် ခေါင်းညိတ်လိုက်သည်။ "ဟုတ်တယ်။ ဒီလောက်ထိ အထင်ကြီးတာ။ လဲ့ကျွင်းရှန်က ပြောသေးတယ်၊ ယဲ့အာမှာ ပါရမီရှိတယ်တဲ့။ ဒီလောကအတွက် မွေးဖွားလာသူလိုပဲတဲ့"
ရှောင်လင်းယွီ မယုံကြည်နိုင် ဖြစ်နေသည်။ အင်တာနက်နည်းပညာလောကမှ ဒဏ္ဍာရီလာပုဂ္ဂိုလ် လဲ့ကျွင်းရှန်က ရှောင်လင်းယဲ့ကို ဤမျှအထိ ချီးကျူးပြောဆိုလိမ့်မည်ဟု ထင်မထားခဲ့ပေ။
ကုန်းထျန်းဟောက်က ဆက်ပြောသည်။ "လဲ့ကျွင်းရှန်က ယဲ့အာကို တပည့်မွေးတဲ့နေ့ကျရင် ကိုယ်တို့ အတူတူ ထမင်းစားကြမယ်"
ရှောင်လင်းယွီ ခေါင်းညိတ်လိုက်သည်။ "ဒါကတော့ သေချာပေါက် စားရမှာပေါ့"
မောင်လေးက နတ်ဘုရားလဲ့ရဲ့ တပည့်ဖြစ်လာမှာဆိုတော့ ဘယ်လောက်ပဲ အလုပ်များများ အချိန်ပေးရမှာပေါ့။
"ဘယ်နေ့လဲ"
"လဲ့ကျွင်းရှန်က မြန်လေ ကောင်းလေလို့ ပြောတယ်။ ၃ ရက်နေရင်လို့ သတ်မှတ်ထားတယ်။ ယဲ့အာကို မေးကြည့်တော့ အချိန်ရတယ်တဲ့" ကုန်းထျန်းဟောက် ပြောလိုက်သည်။
ရှောင်လင်းယွီ ခေါင်းညိတ်လိုက်သည်။ "အင်း"
ထို့နောက် ရှောင်လင်းယွီ တစ်စုံတစ်ရာကို သတိရသွားပြီး ပြောလိုက်သည်။ "ကုမ္ပဏီကိစ္စနဲ့ပတ်သက်ပြီး ယဲ့အာ ဘာစီစဉ်ထားသေးလဲ"
ကုန်းထျန်းဟောက် ရယ်မောကာ ပြောလိုက်သည်။ "အဲဒါအတွက်တော့ မင်း စိတ်ချလိုက်ပါ။ မူလက ထိန်ဖေးကုမ္ပဏီရဲ့ ၂၀ ရာခိုင်နှုန်း ရှယ်ယာတန်ဖိုးက ယွမ် ၄ သန်းကျော်ပဲ ရှိတာ။ ယဲ့အာက ယွမ် ၈ သန်းကျော်နဲ့ သူ့ကို သစ္စာဖောက်တဲ့လူတွေကို ရောင်းလိုက်တယ်။ ပြီးတော့ အရင်တုန်းက ကုမ္ပဏီရဲ့ အော်ဒါတွေကို ယဲ့အာပဲ ရှာဖွေခဲ့တာ။ အခု ယဲ့အာ ကုမ္ပဏီက ထွက်သွားပြီဆိုတော့ အဲဒီစီးပွားရေးမိတ်ဖက်တွေက သူတို့နဲ့ ဆက်လက်ပူးပေါင်းချင်မှာ မဟုတ်တော့ဘူး။ ဘာပဲဖြစ်ဖြစ် ဒီလူတွေက ကိုယ့်မိတ်ဆွေရင်းကိုတောင် နောက်ကျောကနေ ဓားနဲ့ထိုးရဲတာ။ တစ်နေ့ကျရင် အကျိုးစီးပွားအတွက်နဲ့ သူတို့ကိုပါ ဓားနဲ့မထိုးဘူးလို့ ဘယ်သူပြောနိုင်မလဲ။ စီးပွားရေးသမားတွေက ပါးနပ်ကြပါတယ်။ ယဲ့အာရဲ့ နည်းပညာနဲ့ အာမခံချက် မရှိရင် သူတို့က လက်ရှိ ထိန်ဖေးကုမ္ပဏီကို လုံးဝ ယုံကြည်မှာမဟုတ်ဘူး"
ရှောင်လင်းယွီ မနေနိုင်ဘဲ ရယ်မောလိုက်သည်။ "ဟားဟား... အဲဒီလူတွေက ကိုယ့်ရှူးကိုယ်ပတ်တာပဲ။ သူတို့က မောင်လေးလက်ထဲက ရှယ်ယာတွေကို ရလိုက်ရင်ကော ဘာထူးမှာလဲ။ အရည်အချင်းမရှိရင် လက်ထဲမှာ ကိုင်ထားလည်း စက္ကူစုတ်လို တန်ဖိုးကျသွားမှာပဲ။ အခု ယဲ့အာ ဘာတွေ တွေးနေလဲ။ ဘာအစီအစဉ်တွေရှိလဲ"
"အင်း" ကုန်းထျန်းဟောက် ခေါင်းညိတ်လိုက်သည်။ "မင်းက ယဲ့အာကို တကယ် နားလည်တာပဲ"
"ဒါပေါ့... ကျွန်မတို့က ငယ်ငယ်လေးကတည်းက အတူတူကြီးပြင်းလာတဲ့ မောင်နှမတွေလေ။ နားလည်မှာပေါ့" ရှောင်လင်းယွီ ယုံကြည်မှုရှိရှိ ပြောလိုက်သည်။
"ယဲ့အာ ပြောတာတော့ ထိန်ဖေးကုမ္ပဏီက သူ ကိုယ်တိုင်မွေးမြူထားတဲ့ ကလေးလိုပဲတဲ့။ ဒီအတိုင်း လက်လွှတ်လိုက်ဖို့ မဖြစ်နိုင်ဘူးတဲ့" ကုန်းထျန်းဟောက် ပြုံးလျက် ပြောလိုက်သည်။
"ဒါဆို ရှင် ဆိုလိုတာက..." ရှောင်လင်းယွီ မျက်တောင်ခတ်လိုက်ပြီး စိတ်လှုပ်ရှားစွာ ပြောလိုက်သည်။ "မောင်လေးက ကုမ္ပဏီကို ပြန်ယူချင်တာပေါ့"
ကုန်းထျန်းဟောက် ခေါင်းညိတ်လိုက်သည်။ "ဒါပေါ့... ကိုယ်တိုင် မွေးမြူထားတဲ့ ကလေးကို ဘယ်သူက သူများလက်ထဲ ထည့်ပေးချင်မှာလဲ။ ဟုတ်တယ်မလား"
ရှောင်လင်းယွီ ပြုံးလျက် ခေါင်းညိတ်လိုက်သည်။ "ဟုတ်တာပေါ့"
ပါးနပ်သူတိုင်း သိကြပါတယ်။ ထိန်ဖေးနည်းပညာကုမ္ပဏီ ဒီနေ့အထိ ရောက်လာတာ အဓိကရှယ်ယာရှင်နဲ့ နည်းပညာဒါရိုက်တာဖြစ်တဲ့ ရှောင်လင်းယဲ့ရဲ့ ကြိုးပမ်းအားထုတ်မှုကြောင့်ပဲ။
ပြီးတော့ ကုမ္ပဏီရဲ့ အော်ဒါတွေကိုလည်း ရှောင်လင်းယဲ့ပဲ ရှာဖွေပေးခဲ့တာ။
အဲဒီ မိတ်ဆွေဟောင်းတွေက မိုက်မဲမနေဘဲ ကုမ္ပဏီကြီးပွားလာတာကို စောင့်ပြီး အမြတ်ဝေစု ခွဲယူလိုက်ရင် ပြီးပြီ။
ဟမ့် သူတို့က အမြော်အမြင် မရှိကြဘူး။ မိန်းမတစ်ယောက်ရဲ့ မြှူဆွယ်မှုကို မခံနိုင်ဘဲ မျက်မှောက်အကျိုးစီးပွားကိုပဲ ကြည့်ပြီး ကိုယ့်လမ်းကိုယ်ဖျက်၊ ကုမ္ပဏီရဲ့ အလားအလာကို ဖျက်ဆီးပစ်လိုက်တာ။
ကုန်းထျန်းဟောက်ကတော့ ရှောင်လင်းယဲ့အပေါ် ယုံကြည်မှု ရှိသည်။ "ယဲ့အာ ထိန်ဖေးကုမ္ပဏီက ထွက်သွားပြီးရင် ယဲ့အာ ဆွဲဆောင်ထားတဲ့ စီးပွားရေးမိတ်ဖက်တွေက သတင်းကြားတာနဲ့ စာချုပ်ဖျက်သိမ်းကြလိမ့်မယ်။ ဘာလို့လဲဆိုတော့ သူတို့ ထိန်ဖေးကုမ္ပဏီနဲ့ ပူးပေါင်းတာ ယဲ့အာရဲ့ နည်းပညာနဲ့ ရိုးသားမှုကို ယုံကြည်လို့လေ။ ရလဒ်အနေနဲ့ သူတို့နဲ့ ပူးပေါင်းဆောင်ရွက်တဲ့သူက ထွက်သွားပြီဆိုတော့ သူတို့က ဆက်ပူးပေါင်းချင်မှာ မဟုတ်တော့ဘူး။ ပြီးတော့ ယဲ့အာရဲ့မိတ်ဆွေဟောင်းတွေက ကိုယ့်မိတ်ဆွေရင်းကိုတောင် နောက်ကျောကနေ ဓားနဲ့ထိုးရဲတာ။ တစ်နေ့ကျရင် ပိုကြီးမားတဲ့ အကျိုးစီးပွားအတွက် သူတို့ကို ဓားနဲ့ထိုးလာနိုင်တယ် မဟုတ်လား။ စီးပွားရေးသမားတွေက မအကြပါဘူး"
စီးပွားရေးသမားတွေက ယုံကြည်မှုနဲ့ ရိုးသားမှုကို အလေးထားဆုံးပဲ။
ရှောင်လင်းယွီ ရယ်မောကာ ပြောလိုက်သည်။ "ယဲ့အာရဲ့ သစ္စာဖောက်မိတ်ဆွေတွေက စောစောသစ္စာဖောက်တာ ကောင်းပါတယ်။ မဟုတ်ရင် ကုမ္ပဏီကြီးလာတဲ့အခါ ယဲ့အာ ပြန်ယူဖို့ ပိုခက်ခဲလိမ့်မယ်"
ကုန်းထျန်းဟောက် ခေါင်းညိတ်လိုက်သည်။ "အင်း... ဟုတ်တယ်"
……
ကျန်းရုံသည် ကျောင်းမှပြန်လာပြီးနောက် အမူအရာမကောင်းဘဲ တည်ငြိမ်နေသည်။
အမေကျန်းက မြင်လိုက်သောအခါ ရင်ထဲတွင် ထိတ်ခနဲဖြစ်သွားပြီး မကောင်းသော အတိတ်နိမိတ်ကို ခံစားလိုက်ရသည်။
သူမ စိတ်လှုပ်ရှားစွာ မေးလိုက်သည်။ "ယောကျ်ား... ကျောင်းနဲ့ ဆွေးနွေးတာ အဆင်ပြေလား"
ကျန်းရုံက လေးနက်စွာ ပြောလိုက်သည်။ "ငါ အဖိုးအခတချို့ပေးပြီး ကျောင်းအုပ်ကြီးကျန်းဆီကနေ သိလိုက်ရတာက အဲဒီ ၅ ယောက်ကို အပြစ်ပေးတာ အထက်လူကြီးတစ်ယောက် ဝင်ပါနေလို့တဲ့"
အမေကျန်း ရင်ထဲ ထိတ်ခနဲ ဖြစ်သွားကာ မယုံကြည်နိုင်စွာ ပြောလိုက်သည်။ "အထက်လူကြီး ဟုတ်လား။ ဘယ်အထက်လူကြီးက ကျန်းမိသားစုထက် ကြီးမှာလဲ။ ဒါ..." မိသားစုကြီးတွေထဲက တစ်ယောက်ယောက်လား။
သူမ မျက်လုံးပြူးသွားပြီး တွေးမိသော်လည်း ချက်ချင်း ပါးစပ်ပိတ်ကာ ခေါင်းခါလိုက်သည်။ "မဖြစ်နိုင်ပါဘူး။ ယွီအာ ပြောတာတော့ အဲဒီကောင်လေးက ဝေးလံခေါင်သီတဲ့ဒေသကလာတဲ့ ဆင်းရဲသားလေးပါတဲ့။ ဘယ်လိုလုပ် ဒီလောက်ကြီးမားတဲ့ နောက်ခံရှိမှာလဲ"
ကျန်းရုံ စဉ်းစားလိုက်ပြီး ပြောလိုက်သည်။ "ငါ အဲဒီကောင်လေးအကြောင်း စုံစမ်းကြည့်လိုက်တယ်။ ရှောင်လင်းယဲ့က ဝေးလံခေါင်သီတဲ့ဒေသက လာတာ ဟုတ်တယ်။ ဒါပေမဲ့ အဲဒီကျေးရွာနာမည်က ဘာလဲဆိုတာ သိလား"
"ဘာလဲ" အမေကျန်း မေးလိုက်သည်။
"ထောင်ယွမ်ရွာ" ကျန်းရုံ ဖြေလိုက်သည်။
"ထောင်ယွမ်ရွာ ဟုတ်လား" အမေကျန်း အံ့သြသွားသော်လည်း သံသယဖြင့် မေးလိုက်သည်။ "ထောင်ယွမ်ရွာဆိုရင်လည်း ကျေးရွာပဲလေ။ အဲဒီမှာ ဖွံ့ဖြိုးတိုးတက်နေတယ် ဆိုရုံလောက်ပဲ။ ဘယ်လိုလုပ် မြို့တော်နဲ့ ပတ်သက်နေမှာလဲ"
ကျန်းရုံ ရုတ်တရက် မေးလိုက်သည်။ "ကုန်းထျန်းဟောက် မိန်းမနာမည်က ဘယ်သူလဲ၊ ဘယ်ကလာတာလဲဆိုတာ သိလား"
အမေကျန်း စဉ်းစားပြီး ပြောလိုက်သည်။ "မှတ်မိသလောက်တော့ ရှောင်လင်းယွီ၊ ထောင်ယွမ်ရွာက လာတာ"
ကုန်းမိသားစုက သခင်မလေးကို ခမ်းခမ်းနားနားနဲ့ အိမ်ပြန်ခေါ်လာတော့ မြို့တော်အထက်တန်းလွှာတွေက သူ့နောက်ခံကို စုံစမ်းထားကြတာပေါ့။ တစ်နေ့ကျရင် တွေ့ဆုံရင် မိတ်ဆွေမဖြစ်ရင်တောင် ရန်သူမဖြစ်အောင်လို့လေ။
"ဟုတ်တယ်။ ကုန်းထျန်းဟောက် မိန်းမနာမည်က ရှောင်လင်းယွီ။ ယွီအာပြောတဲ့ ဆင်းရဲသားကောင်လေး နာမည်က ရှောင်လင်းယဲ့" ကျန်းရုံ လေးနက်စွာ ပြောလိုက်သည်။ "နှစ်ယောက်စလုံးက ထောင်ယွမ်ရွာက လာကြတာ။ သူတို့ မပတ်သက်ဘူးဆိုရင် ဘယ်သူက ယုံမှာလဲ"
အမေကျန်း ကြားလိုက်ရသောအခါ အလွန်အံ့သြသွားသည်။ "ဒါဆို ရှင် ပြောချင်တာက စူးယန်တို့ ၅ ယောက်ကို မြို့တော်တက္ကသိုလ်က ကျောင်းထုတ်လိုက်တာ ကုန်းထျန်းဟောက် လက်ချက်ပေါ့"
"ဖြစ်နိုင်တာ မဟုတ်ဘူး" ကျန်းရုံ အတိအကျ ပြောလိုက်သည်။ "သေချာပေါက် ဟုတ်တယ်။ မဟုတ်ရင် မြို့တော်က အင်အားကြီးအဖွဲ့အစည်းတွေ ဘယ်သူမှ ထောင်ယွမ်ရွာနဲ့ မပတ်သက်ကြဘူး"
ထို့နောက် အဖေကျန်း ရုတ်တရက် သတိရသွားပြီး အမေကျန်းကို အလျင်အမြန် ပြောလိုက်သည်။ "မြန်မြန်... ယွီအာဆီ ဖုန်းဆက်ပြီး မေးကြည့်။ ပြီးခဲ့တဲ့တစ်ခေါက် ငါတို့ ကျန်းမိသားစု အိမ်တော်ကနေ ပြန်လာတုန်းက သူဌေးရပ်ကွက်ထဲမှာ ဘတ်စ်ကားစောင့်နေတဲ့ ကောင်လေးက ရှောင်လင်းယဲ့လားလို့"
အမေကျန်းလည်း သတိရသွားပြီး ချက်ချင်း ကျန်းရှုယွီထံ ဖုန်းဆက်လိုက်သည်။
ဖုန်းကိုင်လိုက်ပြီးနောက် ပြန်ချလိုက်သောအခါ အမေကျန်း၏အမူအရာမှာ အလွန်ဆိုးရွားနေသည်။
"ဘယ်လိုလဲ။ ဟုတ်လား" ကျန်းရုံ စိတ်လှုပ်ရှားစွာ မေးလိုက်သည်။
တကယ်လို့ ဟုတ်တယ်ဆိုရင် သူတို့သမီးက ပြဿနာကြီးတစ်ခု ရှာလိုက်ပြီ။ ဩော်... မဟုတ်ဘူး... သူတို့မိသားစုက ပြဿနာကြီးတစ်ခု ရှာလိုက်ပြီ။
ကျန်းရုံ စိတ်ပူပြီး ဒေါသထွက်လာသည်။
အမေကျန်း ခေါင်းညိတ်လိုက်သည်။ "ဟုတ်တယ်... သူပဲ"
နှစ်ယောက်စလုံး မျက်နှာ ဖြူဖျော့သွားကြသည်။
ကျန်းရုံ သတိပြန်ဝင်လာပြီး ဒေါသတကြီး အော်ဟစ်လိုက်သည်။ "မြန်မြန်... သူ့ကို အိမ်ပြန်ခေါ်လိုက်"
သူတို့သမီးက ကုန်းထျန်းဟောက်မိန်းမရဲ့ မောင်ကို ရန်စခဲ့တာ။ ပြီးတော့ သုံးခဲ့တဲ့နည်းလမ်းကလည်း ယုတ်မာလွန်းတယ်။ ကုန်းထျန်းဟောက်လို မိန်းမကိုကာကွယ်တတ်တဲ့၊ စိတ်ထားကျဉ်းမြောင်းပြီး ရက်စက်တဲ့သူက သူ့မိန်းမရဲ့မောင်ကို အနိုင်ကျင့်တာ လွှတ်ပေးထားမှာ မဟုတ်ဘူး။
ကျန်းရှုယွီ အိမ်ပြန်ရောက်သောအခါ မိဘများ၏အမူအရာ ဆိုးရွားနေသည်ကို တွေ့လိုက်ရသဖြင့် ရင်ထဲ ထိတ်ခနဲ ဖြစ်သွားသည်။
"ဖေဖေ... မေမေ" ကျန်းရှုယွီ သတိထားပြီး ခေါ်လိုက်သည်။
"ဖြောင်း..."
ချက်ချင်းပင် သူမ ပါးရိုက်ခံလိုက်ရသည်။
ကျန်းရှုယွီသည် ဖခင်ဖြစ်သူ၏ ရုတ်တရက်ပါးရိုက်ချက်ကြောင့် ကြောင်သွားသည်။
ပါးကိုအုပ်ပြီး မျက်လုံးပြူးကာ မယုံကြည်နိုင်စွာ ကြည့်လိုက်သည်။
ငယ်ငယ်ကတည်းက ဖခင်ဖြစ်သူက ရံဖန်ရံခါ ဆူပူတတ်သော်လည်း လက်ဖျားနဲ့တောင် မထိဖူးပေ။
အခု ရောက်တာနဲ့ ပါးရိုက်ခံလိုက်ရတော့ ဘာဖြစ်သွားမှန်း နားမလည်နိုင်အောင် ဖြစ်နေသည်။
"အဖေ့" ကျန်းရှုယွီ အော်ဟစ်လိုက်သည်။
"ယောကျ်ား" အမေကျန်းသည် သမီးအရိုက်ခံရသည်ကို မြင်သောအခါ စိတ်မကောင်းဖြစ်သွားသည်။ "ပြောစရာရှိတာ သေချာပြောလေ။ ဘာလို့ လူကို ရိုက်ရတာလဲ"
အဖေကျန်းက ကျန်းရှုယွီကို လက်ညှိုးထိုးပြီး ဒေါသတကြီး အော်ဟစ်လိုက်သည်။ "ငါတို့ကို ပြဿနာကြီးတစ်ခု ရှာပေးထားတာကို မင်းက ကာကွယ်ပေးနေသေးတာလား"
ကျန်းရှုယွီက မျက်ရည်များကျလျက် မေးလိုက်သည်။ "မေမေ... ဖေဖေက ဘာလို့ ဒီလောက် ဒေါသထွက်နေတာလဲ"
"မင်း မေးရဲသေးတယ်ပေါ့" အဖေကျန်းက အော်ဟစ်လိုက်သည်။ "မင်းမှာ မေးစရာမျက်နှာရှိသေးလား"
"ဖေဖေ... သမီး ဘာလုပ်မိလို့ ဖေဖေ ဒီလောက် ဒေါသထွက်နေရတာလဲ" ကျန်းရှုယွီ ပို၍ ဝမ်းနည်းသွားသည်။ "သမီးကို ရှင်းပြပါဦး"
အမေကျန်းက ကျန်းရှုယွီကို ကြည့်ပြီး လေးနက်စွာ ပြောလိုက်သည်။ "ယွီအာ၊ ငါတို့ ကုန်းမိသားစုကို ရန်စမိပြီထင်တယ်"
"ကုန်းမိသားစု ဟုတ်လား" ကျန်းရှုယွီ အစပိုင်းတွင် နားမလည်သော်လည်း သဘောပေါက်သွားသောအခါ မျက်လုံးများ ပြူးကျယ်သွားပြီး အံ့သြတကြီး ပြောလိုက်သည်။ "အဲဒီ ကုန်းမိသားစုလား။ ဘယ်လိုလုပ် ဖြစ်နိုင်မှာလဲ"
သူမက အလုပ်လုပ်ရင် အတိုင်းအတာ ရှိပါတယ်။ အာဏာရှိတဲ့သူတွေကို ဘယ်တော့မှ ရန်မစပါဘူး။
ကုန်းမိသားစုကို ဘယ်ကနေစပြီး ရန်စမိမှန်း သူမ စဉ်းစားလို့ မရဘူး။
အမေကျန်းသည် သမီးဖြစ်သူ နားမလည်သည်ကို မြင်သောအခါ သက်ပြင်းချလိုက်ပြီး မေးလိုက်သည်။ "ယွီအာ၊ အဲဒီ ဆင်းရဲသားကောင်လေး နာမည်က ဘယ်သူလဲ"
"သူ့နာမည်က ရှောင်လင်းယဲ့လေ။ ဘာဖြစ်လို့လဲ" ကျန်းရှုယွီ ချက်ချင်း သဘောမပေါက်သေးပေ။
အမေကျန်းက ထပ်မေးလိုက်သည်။ "ဒါဆို ကုန်းထျန်းဟောက် မိန်းမနာမည်က ဘယ်သူလဲ သိလား"
ကျန်းရှုယွီ စဉ်းစားပြီး ပြောလိုက်သည်။ "ရှောင်လင်းယွီလို့ ထင်တယ်"
"ဟုတ်တယ်။ တစ်ယောက်က ရှောင်လင်းယွီ၊ တစ်ယောက်က ရှောင်လင်းယဲ့။ ရှောင်လင်းယွီက Z မြို့ ထောင်ယွမ်ရွာက လာတာ။ နင့်အဖေက ရှောင်လင်းယဲ့ကို စုံစမ်းကြည့်တော့ သူလည်း ထောင်ယွမ်ရွာက လာတာပဲ"
အမေကျန်းက လေးနက်စွာ ပြောလိုက်သည်။ "ငါ မှတ်မိသလောက်ဆိုရင် ပြီးခဲ့တဲ့တစ်ခေါက် ငါတို့ ကျန်းမိသားစု အိမ်တော်က ပြန်လာတုန်းက လမ်းမှာ ရှောင်လင်းယဲ့ကို တွေ့လိုက်ရတယ်။ အဲဒီတုန်းက သူ ကုန်းအိမ်တော်ကို သွားခဲ့တာဖြစ်လောက်တယ်။ ဒါကြောင့် ရှောင်လင်းယဲ့နဲ့ ရှောင်လင်းယွီက ဆွေမျိုးတွေ ဖြစ်လောက်တယ်။ ကုန်းမိသားစုနဲ့လည်း ပတ်သက်မှု ကြီးမားလောက်တယ်"
မိခင်ဖြစ်သူ၏စကားကို ကြားသောအခါ ကျန်းရှုယွီ မျက်နှာ ဖြူဖျော့သွားသည်။ သူမ မယုံကြည်နိုင်စွာ ပြောလိုက်သည်။ "ဘယ်လိုလုပ် ဖြစ်နိုင်မှာလဲ။ သူက ကုန်းမိသားစုနဲ့ ပတ်သက်မှုရှိရင် ဘာလို့ တစ်ခါမှ ထုတ်မပြောတာလဲ။ ကျောင်းမှာလည်း ဘယ်သူမှ မသိကြဘူး"
ရှောင်လင်းယဲ့နှင့် ကုန်းမိသားစု ပတ်သက်မှုရှိသည်ကို ကြားသောအခါ ကျန်းရှုယွီ စိတ်ဓာတ်ကျသွားသည်။
သူ ကုန်းမိသားစုနဲ့ပတ်သက်မှန်း ကြိုသိရင် သူမ ဘယ်တော့မှ ရန်စမှာ မဟုတ်ဘူး။ လုပ်ကြံမှာ မဟုတ်ဘူး။ လုပ်ကြံမှု မအောင်မြင်ဘဲ သူမက မြှောက်ပေးသူအဖြစ် အခုလို ရှေ့တိုးရခက် နောက်ဆုတ်ရခက်အခြေအနေ ရောက်နေမှာ မဟုတ်ဘူး။
"မေမေ၊ ရှောင်လင်းယဲ့နဲ့ ကုန်းထျန်းဟောက်မိန်းမ ရှောင်လင်းယွီက ဘာတော်စပ်တာလဲ" ကျန်းရှုယွီ အံ့သြသွားပြီးနောက် သံသယဖြင့် မေးလိုက်သည်။
အဖေကျန်းက ကျယ်လောင်စွာ ပြောလိုက်သည်။ "ဘာတော်တော်... သူတို့က ဆွေမျိုးတွေဆိုတာ သေချာတယ်"
ရှောင်လင်းယဲ့ ကုန်းအိမ်တော်ကို သွားနိုင်တယ်ဆိုတော့ ရှောင်လင်းယွီနဲ့ ဆွေမျိုးဖြစ်မှာ သေချာတယ်။ သာမန် အိမ်နီးချင်းလောက်ဆိုရင် ကုန်းမိသားစုရဲ့အဆင့်အတန်းနဲ့ အိမ်ကို ဖိတ်ခေါ်မှာ မဟုတ်ဘူး။
"မဟုတ်ဘူး" ကျန်းရှုယွီ မယုံကြည်နိုင်သေးပေ။ "ဆွေမျိုးတွေဆိုရင် ပြီးခဲ့တဲ့တစ်ခေါက် သမီးတို့တွေ့တုန်းက ရှောင်လင်းယဲ့ ကုန်းအိမ်တော်သွားပြီး ပြန်လာတော့ ဘာလို့ ဘတ်စ်ကား စီးပြန်တာလဲ။ ဘာလို့ ကားနဲ့ လိုက်မပို့တာလဲ"
"ငတုံးမ" အဖေကျန်း ဒေါသတကြီး ဆဲဆိုလိုက်သည်။ "ရှောင်လင်းယဲ့က မြို့တော်တက္ကသိုလ်မှာ ဒီလောက်ကြာနေပြီ။ ကုန်းမိသားစုနဲ့ ပတ်သက်တာ ဘယ်သူမှ မသိဘူးဆိုတာ သူက သိုသိုသိပ်သိပ် နေတတ်လို့လေ။ သိုသိုသိပ်သိပ် နေချင်မှတော့ ကုန်းမိသားစုက လိုက်ပို့တာကို သူ လက်ခံပါ့မလား"
ရှောင်လင်းယဲ့ နည်းနည်းလောက် ကြွားဝါလိုက်ရင် ကုန်းမိသားစုနဲ့ ပတ်သက်တာ ပေါ်သွားမှာ။ ဒါပေမဲ့ မြို့တော်တက္ကသိုလ်တစ်ခုလုံး ဘယ်သူမှ မသိကြဘူး။
ဒီကိစ္စ မဖြစ်ရင် ကျန်းရုံလည်း သူ့မှတ်တမ်းကို သွားစစ်မိမှာ မဟုတ်ဘူး။ ကုန်းမိသားစုနဲ့ ပတ်သက်တာကိုလည်း တွေးမိမှာ မဟုတ်ဘူး။
ကျန်းရှုယွီ သဘောပေါက်သွားပြီး မျက်နှာဖြူဖျော့ကာ မိခင်၏ လက်ကိုဆွဲပြီး စိုးရိမ်တကြီး မေးလိုက်သည်။ "မေမေ... သမီး အခု ဘယ်လိုလုပ်ရမလဲ"
ရှောင်လင်းယဲ့ရဲ့ နောက်ခံအသိုင်းအဝိုင်း ဒီလောက်ကြီးမယ်လို့ သူမ ထင်မထားခဲ့ဘူး။
ကြိုသိခဲ့ရင်... ကြိုသိခဲ့ရင်...
***