အခန်း (၃၈)

"ဆရာ သူကို အဆုံးစီရင်ခွင့်ပြုပါ"

လွေ့ဝူတိ၏ မျက်လုံးများထဲတွင် သတ်ဖြတ်လိုစိတ်များ လက်ခနဲ ဖြစ်သွားသည်။

ဤမိန်းမသည် ယခင်က အလွန်အမင်း မောက်မာခဲ့သည့်အပြင် ချင်ထျန်းတောင်ထွတ်သို့ ကျူးကျော်ဝင်ရောက်ကာ ဤနေရာကို ကိုယ်ပိုင်အဖြစ် သိမ်းပိုက်ရန်ပင် ကြိုးစားခဲ့သောကြောင့် သူမသည် အမှန်တကယ်ပင် ရွံရှာဖွေဖွယ်ကောင်းလှသည်။

သူသည် ရွှယ်ဝူရွှမ်၏ ခန္ဓာကိုယ်အတွင်းရှိ အဆုံးမဲ့ဓားစိတ်အာရုံများကို လှုံ့ဆော်လိုက်ပြီး သူမ၏ တာအိုရွှေအမြုတေနှင့် ရေခဲနှလုံးသားကို ဦးတည်လိုက်သည်။

သူ၏ အတွေးတစ်ခုတည်းဖြင့်ပင် သူမ၏ အသက်စွမ်းအင်ကို ဖြတ်တောက်နိုင်ပြီး သူမ၏ ဝိညာဉ်ပင် လွတ်မြောက်နိုင်မည်မဟုတ်ပေ။

"နေဦး သူရဲ့ ရေခဲနတ်ဘုရား အမွေအနှစ်နဲ့ ရေခဲဝိညာဉ်အေးခဲခြင်းနည်းစနစ်က အသုံးဝင်နေသေးတယ်"

ကျုံးရှန်က ပြောလိုက်သည်။ ရွှယ်ဝူရွှမ်သည် သူမ သေရတော့မည်ကို သိရှိပြီး နှလုံးသားထဲတွင် အပြည့်အဝ မျှော်လင့်ချက်မဲ့နေသည်။

လူတစ်ယောက် သေဆုံးသွားလျှင် ဝိညာဉ်က ပျက်စီးသွားပြီး အရာအားလုံးသည် သုညသို့ ပြန်ရောက်သွားမည်ဖြစ်သောကြောင့် ရေခဲနတ်ဘုရား အမွေအနှစ်များကို ဆုပ်ကိုင်ထားခြင်းက ဘာထူးခြားမည်နည်း။

သူမသည် မြေပြင်ပေါ်တွင် မည်သည့်ခံစားချက်မှမရှိဘဲ လဲလျောင်းနေပြီး သူ၏ သနားညှာတာမှုကို စောင့်ဆိုင်းနေသည့်အလား မြန်မြန်သေခွင့်ရရန်သာ မျှော်လင့်နေသည်။

ကျုံးရှန်သည် ဖြည်းညှင်းစွာ ထရပ်လိုက်ပြီး သူမအနားသို့ လျှောက်သွားကာ ဆောင့်ကြောင့်ထိုင်လျက် လက်တစ်ဖက်ကို ဆန့်ထုတ်လိုက်သည်။

ထိုအခါ ရွှယ်ဝူရွှမ်သည် ဖြူစင်သော လက်ညှိုးတစ်ချောင်းက သူမ၏ နဖူးကို ထိလိုက်သည်ကိုသာ မြင်တွေ့လိုက်ရသည်။ ထို့နောက် သူမသည် မူးဝေနောက်ကျိသွားပြီး ခန္ဓာကိုယ်အတွင်းရှိ နာကျင်မှုများအားလုံး ပျောက်ကွယ်သွားတော့သည်။

ထိုခံစားချက်သည် လွန်ခဲ့သော နှစ်ပေါင်းသောင်းချီက သူမ၏ ဖခင်နှင့်အတူ ကျင့်ကြံခဲ့စဉ်အချိန်ကဲ့သို့ပင် ဖြစ်သည်။

မြောက်ဘက်စွန်းဒေသရှိ ရွှယ်မျိုးနွယ်စု နန်ယန်စီရင်စုနှင့် ပြည်နယ်ပေါင်းများစွာ ခြားနားနေပြီး ဟင်းလင်းပြင်ကို ဖောက်ထွက်နိုင်စွမ်းရှိသော နိယာမနယ်ပယ် အဆင့် ၂၄ ရှိ ကျွမ်းကျင်သူတစ်ဦးပင်လျှင် ဟင်းလင်းပြင်ကို ဖြတ်ကျော်မည်ဆိုပါက ဆယ်စုနှစ်တစ်ခုကျော် ကြာမြင့်မည်ဖြစ်သည်။

ထိုစီရင်စုနှစ်ခုကြားရှိ အကွာအဝေးမှာ မိုင်သန်းပေါင်းများစွာထက်ပင် ပိုမိုဝေးကွာသည်။ ရွှယ်ဝူရွှမ်သည် ယခင်မျိုးနွယ်စုခေါင်းဆောင်၏ သမီးဖြစ်ပြီး ရွှယ်မျိုးနွယ်စု၏ အချစ်တော် ပါရမီရှင်တစ်ဦးဖြစ်ကာ အလွန်အေးစက်သော ခန္ဓာကိုယ်ဖွဲ့စည်းပုံဖြင့် မွေးဖွားလာသူဖြစ်သည်။

ဤခန္ဓာကိုယ်သည် မျိုးနွယ်စု၏ ကျင့်စဉ်ဖြစ်သော နှင်းတစ်သောင်းနှင်းခဲတစ်ထောင်နည်းစနစ်နှင့် အလွန်ကိုက်ညီလှသည်။

"အဖေ သမီး ဘာလို့ အမေကို တစ်ခါမှ မမြင်ဖူးတာလဲ"

ငယ်စဉ်က ရွှယ်ဝူရွှမ်သည် ဤမေးခွန်းကို အကြိမ်ကြိမ် မေးခဲ့ဖူးသည်။ သို့သော် သူမ၏ ဖခင် ရွှယ်အောက်ထျန်းသည် အမြဲတမ်း နှုတ်ဆိတ်နေခဲ့ပြီး သူမ အရွယ်ရောက်လာမှသာ ထိုရက်စက်သော အကြောင်းရင်းကို သိရှိခဲ့ရသည်။

နှင်းတစ်သောင်းနှင်းခဲတစ်ထောင်နည်းစနစ်သည် ရှေးဟောင်းကာလမှ ရေခဲနတ်ဘုရားနှင့် နက်ရှိုင်းသော ဆက်နွှယ်မှုရှိသည်ဟု ဆိုကြသည်။

ထိပ်တန်းအဆင့် ရေခဲကျင့်စဉ်များအားလုံးတွင် အားနည်းချက်တစ်ခုရှိသည်မှာ ကျင့်ကြံသူကို ရေခဲကဲ့သို့ တဖြည်းဖြည်း အေးစက်ပြီး ရက်စက်အထီးကျန်လာစေခြင်းပင် ဖြစ်သည်။

နိယာမနယ်ပယ်ကို ကျော်လွန်ပြီး သူတော်စင်အဆင့်သို့ မရောက်မချင်း ဤဒဏ်ကို ခံစားရမည်ဖြစ်သည်။ ရွှယ်မျိုးနွယ်စုတွင် ပါရမီကသာ အရာအားလုံး ဖြစ်သည်။

ပါရမီညံ့ဖျင်းသူများသည် မျိုးနွယ်စုမှ နှင်ထုတ်ခံရပြီး တစ်သက်လုံး ကျင့်ကြံခွင့်အပိတ်ပင်ခံရကာ လောကီစည်းစိမ်ကိုသာ ခံစားရသည်။

ပါရမီထူးချွန်သူများသာ မျိုးနွယ်စုတွင် နေထိုင်ခွင့်ရပြီး ကျင့်ကြံခြင်း အရင်းအမြစ်များကို ခံစားခွင့်ရှိသည်။ ဤသည်မှာ ရက်စက်ပုံရသော်လည်း အမှန်တကယ်တွင် ကျင့်ကြံခွင့်ဆုံးရှုံးခြင်းသည် မကောင်းသော အရာမဟုတ်ပေ။

နှင်းတစ်သောင်းနှင်းခဲတစ်ထောင်နည်းစနစ်သည် နိယာမနယ်ပယ် အဆင့် ၂၀ မတိုင်မီအထိ ပုံမှန်ကျင့်စဉ်တစ်ခု ဖြစ်သော်လည်း အဆင့် ၂၀ ကျော်လွန်ပြီးနောက်တွင် ရက်စက်သော အတားအဆီးတစ်ခု ပေါ်လာပြီး ကျင့်ကြံမှု တိုးတက်ရန်အတွက် ချစ်ရသူတစ်ဦးကို သတ်ဖြတ်ရန် လိုအပ်သည်။

သူမ၏ မိခင်သည် နောက်ဆုံးတွင် သူမ၏ ဖခင်လက်ချက်ဖြင့် သေဆုံးခဲ့ရသည်။ သူမသည် နိယာမနယ်ပယ် အဆင့် ၁၈ ရွှေအမြုတေအဆင့်သို့ ရောက်ရှိသောအခါ သူမ ချစ်ရသော အမျိုးသားနှင့် တွေ့ဆုံခဲ့သည်။

သူ၏ အမည်မှာ ယွမ်ယန် ဖြစ်ပြီး ယင်မီးတောက်နတ်ဆိုး၏ ညီ ဖြစ်သည်။ သူသည် ယန်ချန်မိစ္ဆာလမ်းစဉ်၏ လျာထားခြင်းခံရသော မြင့်မြတ်သားတော်ဖြစ်ပြီး ဖြူစင်သောယန်မီးတောက်အရင်းအမြစ်ခန္ဓာကို ပိုင်ဆိုင်ထားသည်။

သူ၏ ပါရမီမှာ အံ့မခန်းဖြစ်ပြီး ထိုမျိုးဆက်ရှိ အခြားပါရမီရှင်များအားလုံးကို သာလွန်သည်။ သူသည် လူကြီးများနှင့်အတူ လေ့ကျင့်ရေးခရီးထွက်လာပြီး မြောက်ဘက်စွန်းဒေသသို့ ရောက်ရှိရန် ဆယ်စုနှစ်တစ်ခုကျော်ကြာအောင် တမင်တကာ ခရီးနှင်လာခဲ့ခြင်းဖြစ်သည်။

ရေခဲနှင့် မီးသည် အတူတူမရှိနိုင်သော်လည်း ဂုဏ်သတ္တိများ မကိုက်ညီလေလေ သူ၏ ဖြူစင်သောယန်မီးတောက်အရင်းအမြစ်ခန္ဓာ၏ အလားအလာကို ပိုမိုလှုံ့ဆော်ပေးလေလေဖြစ်ပြီး ကျင့်ကြံမှုအဆင့် မြင့်တက်ရန် အထောက်အကူပြုသည်။

ဆယ်စုနှစ်များစွာမှာ မျက်စိတစ်မှိတ်အတွင်း ကုန်ဆုံးသွားခဲ့သည်။ ရုတ်တရက် မြောက်ဘက်စွန်းဒေသတွင် ရေခဲနန်းတော်လျှို့ဝှက်နယ်မြေ ပေါ်ပေါက်လာခဲ့သည်။

ဒဏ္ဍာရီများအရ ထိုလျှို့ဝှက်နယ်မြေသည် ရှေးဟောင်းရေခဲနတ်ဘုရား ချန်ထားခဲ့သော လေ့ကျင့်ရေးကွင်းဖြစ်ပြီး ရေခဲနတ်ဘုရား၏ အမွေအနှစ်များနှင့် ရတနာများ ပါရှိသည်။

ရှေးဟောင်းသူတော်စင်များနှင့် နတ်ဘုရားများ၏ အမွေအနှစ်များ ပေါ်ထွက်လာခြင်းသည် နှစ်ပေါင်းရာချီကြာတတ်ပြီး ပါရမီရှင်များက ဤအခွင့်အရေးကို လက်လွတ်ခံမည်မဟုတ်ပေ။

ရေခဲကျင့်စဉ်ကို ကျင့်ကြံသည်ဖြစ်စေ၊ မကျင့်ကြံသည်ဖြစ်စေ မရေမတွက်နိုင်သော ပါရမီရှင်များသည် တောင်တန်းများနှင့် မြစ်များကို ဖြတ်ကျော်ကာ လျှို့ဝှက်နယ်မြေဖွင့်မည့်အချိန်ကို စောင့်ဆိုင်းရန် မြောက်ဘက်စွန်းဒေသသို့ ရောက်ရှိလာကြသည်။

ထိုသူများထဲတွင် ယွမ်ယန်နှင့် ရွှယ်ဝူရွှမ်တို့လည်း ပါဝင်သည်။ လျှို့ဝှက်နယ်မြေ ပွင့်လာပြီးနောက် သူတို့နှစ်ဦးသည် အတွင်းပိုင်းသို့ ဝင်ရောက်ကာ မရေမတွက်နိုင်သော ပါရမီရှင်များကို သုတ်သင်ခဲ့ကြသည်။

နောက်ဆုံးတွင် သူတို့နှစ်ဦးသည် လျှို့ဝှက်နယ်မြေ၏ အနက်ရှိုင်းဆုံးနေရာတွင် တွေ့ဆုံခဲ့ကြသည်။ ကံတရားက မီးနှင့် ရေခဲကို တစ်ခုနှင့်တစ်ခု ရောယှက်ရန် သတ်မှတ်ထားသည့်အလား ပြင်းထန်သော တိုက်ပွဲတစ်ခု ဖြစ်ပွားခဲ့သည်။

သူတို့နှစ်ဦးစလုံးမှာ ထိုမျိုးဆက်၏ အထူးချွန်ဆုံး ပါရမီရှင်များဖြစ်ကြပြီး ဂုဏ်သတ္တိများက တစ်ဦးကိုတစ်ဦး ဖိနှိပ်ထားသောကြောင့် တိုက်ပွဲမှာ အလွန်ရက်စက်လှသည်။

ယွမ်ယန်၏ ဖြူစင်သောယန်မီးတောက်အရင်းအမြစ်ခန္ဓာမှာ အလွန်အမင်း အစွမ်းထက်လှသည်။ နယ်မြေအနေအထား အားသာချက်ရှိသော်လည်း ရွှယ်ဝူရွှမ်သည် အနိုင်မရဘဲ ပြင်းထန်စွာ ဒဏ်ရာရရှိကာ ယွမ်ယန်၏ လက်ထဲသို့ ကျရောက်သွားခဲ့သည်။

သို့သော် ထူးဆန်းသော မြင်ကွင်းတစ်ခု ဖြစ်ပေါ်လာသည်။ မီးကျင့်စဉ်များသည် အရာအားလုံးကို လောင်ကျွမ်းစေနိုင်သော်လည်း ကျင့်ကြံခြင်း၏ အချို့သောအဆင့်များတွင် ခံစားချက်များကို ထိခိုက်စေနိုင်သည်။

မီးတောက်သည် ဖြူစင်ပြီး စစ်မှန်သည်။ ယန်ချန်မိစ္ဆာလမ်းစဉ်သည် မိစ္ဆာလမ်းစဉ်ဖြစ်သော်လည်း ယင်းမျိုးနွယ်၏ မျိုးဆက်သစ်အများစုမှာ မီးတောက်ကဲ့သို့ ဖြူစင်သော နှလုံးသားများကို ပိုင်ဆိုင်ကြသည်။

ယခင်က ယွမ်ရှောင်ဟော်သည်လည်း ဤကဲ့သို့ပင်ဖြစ်ပြီး ယွမ်ယန်သည်လည်း ထိုနည်းတူပင် ဖြစ်သည်။ သူသည် ရွှယ်ဝူရွှမ်ကို ဒဏ်ရာရစေပြီးနောက် သတ်ပစ်ခြင်းမပြုဘဲ သူမ၏ ဒဏ်ရာများကို ကုသပေးရန်အတွက် လျှို့ဝှက်နယ်မြေအတွင်းရှိ ရေခဲစွမ်းအင်ပါသော ဆေးဖက်ဝင်အပင်များကို ရှာဖွေပေးခဲ့သည်။

"ကောင်းပြီ အခုကစပြီး မင်းက ငါ့မိန်းမပဲ"

ယွမ်ယန်က စိတ်အားထက်သန်စွာဖြင့် ပြောလိုက်သည်။ သူ၏ စွမ်းအားမှာ ရွှယ်ဝူရွှမ်ထက်ပင် သာလွန်သည်။

အစပိုင်းတွင် ရွှယ်ဝူရွှမ်က လက်မခံဘဲ သူ၏ စိတ်ဝိညာဉ်စွမ်းအင်များ ပြန်လည်ပြည့်ဝလာသည်နှင့် သူ့ကို တိုက်ခိုက်ရန် ကြိုးစားခဲ့သည်။

သို့သော် ယွမ်ယန်က စိတ်မဆိုးခဲ့ဘဲ သူမကို လျှို့ဝှက်နယ်မြေ၏ အတွင်းပိုင်းအထိ ခေါ်ဆောင်သွားခဲ့သည်။

လမ်းတစ်လျှောက်တွင် အန္တရာယ်များစွာ ရှိနေသည်။ လျှို့ဝှက်နယ်မြေအတွင်းရှိ အန္တရာယ်များကို သတိထားရရုံသာမက အခြားပါရမီရှင်များ၏ ချောင်းမြောင်းမှုကိုလည်း ကာကွယ်ရသည်။

သတ်ဖြတ်လိုစိတ်များမှာ နေရာတိုင်းတွင် ရှိနေသည်။ ဤကဲ့သို့သော အခြေအနေမျိုးတွင် သူတို့နှစ်ဦးသည် လျှို့ဝှက်နယ်မြေအတွင်း၌ နှစ်ပေါင်းတစ်ရာခန့် အတူတူ ဖြတ်သန်းခဲ့ကြသည်။

ရွှယ်ဝူရွှမ်၏ ခုခံမှုသည် နောက်ဆုံးတွင် ပျော်ရွှင်မှုအဖြစ် ပြောင်းလဲသွားပြီး သူတို့နှစ်ဦးသည် လက်တွဲကာ နက်ရှိုင်းသော သံယောဇဉ်များ ဖြစ်ပေါ်လာခဲ့သည်။

နောက်ဆုံးတွင် သူတို့သည် လျှို့ဝှက်နယ်မြေတစ်ခုလုံး၏ ဗဟိုချက်ဖြစ်သော ရေခဲနန်းတော်၏ အပြင်ဘက်သို့ ရောက်ရှိလာသည်။

ထိုနေရာတွင် နိယာမနယ်ပယ် အဆင့် ၂၁ ရှိ ရေခဲဝိညာဉ် ၁၈ ကောင်၏ ဝိုင်းရံတိုက်ခိုက်ခြင်းကို ခံခဲ့ရသည်။ ထိုစဉ်က ရွှယ်ဝူရွှမ်သည် နိယာမနယ်ပယ် အဆင့် ၂၀ ၏ အထွတ်အထိပ်တွင်သာ ရှိနေပြီး ရက်စက်သောအတားအဆီးကို မကျော်လွှားနိုင်သေးပေ။

ယွမ်ယန်သည်လည်း အဆင့် ၂၀ တွင်သာ ရှိသော်လည်း ရေခဲနန်းတော်အတွင်းရှိ ရေခဲနှလုံးသား၏ ဖိနှိပ်ခြင်းကို ခံထားရသည်။

သူတို့နှစ်ဦးစလုံးသည် ရေခဲဝိညာဉ် ၁၈ ကောင်ကို မယှဉ်နိုင်ဘဲ အင်အားချင်း မမျှတခဲ့ပေ။ ယွမ်ယန်သည် ရွှယ်ဝူရွှမ်ကို တိုက်ခိုက်မှုများမှ ကာကွယ်ပေးခဲ့ပြီး နောက်ဆုံးတွင် နှစ်ဦးစလုံး သေလုမြောပါး ဖြစ်ခဲ့ရသည်။

အမှန်တကယ်တွင် ကောင်းကင်တာအိုသည် ကျိန်စာတစ်ခုသာ ဖြစ်သည်။ အကယ်၍ သူတို့နှစ်ဦးစလုံးသည် အစောကတည်းက တိုက်ခိုက်ခဲ့ကြမည်ဆိုလျှင် အသက်ရှင်ကျန်ရစ်သူသည် ကြီးမားသော ကံကမ္မာကို ရရှိမည်ဖြစ်ပြီး ရေခဲဝိညာဉ်များကို အောင်မြင်စွာ သတ်ဖြတ်နိုင်မည်ဖြစ်သည်။

သို့သော် ကောင်းကင်တာအိုက အရာအားလုံးကို ကြိုတင်သတ်မှတ်ထားပြီး ဖြစ်သည်။ ကံမကောင်းစွာဖြင့် သူတို့နှစ်ဦးစလုံးမှာ ချစ်ခြင်းမေတ္တာတွင် နက်ရှိုင်းစွာ နစ်မွန်းနေပြီး ရုန်းထွက်နိုင်ခြင်း မရှိခဲ့ကြပေ။

ပြတ်သားသော ဆုံးဖြတ်ချက်မချနိုင်ပါက သူတို့နှစ်ဦးစလုံး ဤနေရာတွင် သေဆုံးရမည်ဖြစ်သည်။

"သောက်ခွေး ကောင်းကင်ဘုံ"

"ရွှမ်အာ ကို့ကို သတ်လိုက်ပါ"

သူက ဘေးပတ်ပတ်လည်ရှိ ရေခဲဝိညာဉ်များကို ကြည့်ကာ ပွင့်ပွင့်လင်းလင်း ပြောလိုက်သည်။ ရွှယ်ဝူရွှမ်က ငြင်းဆိုခဲ့သည်။

"ဟင်အင်း မရဘူး"

"ရွှမ်အာ ကို့ရဲ့စကားကို နားထောင်စမ်းပါ မင်းက ရေခဲခန္ဓာကိုယ်ကို ပိုင်ဆိုင်ထားတဲ့အတွက် ဒီအမွေအနှစ်နဲ့ အသင့်တော်ဆုံးဖြစ်ပြီး ကို့ထက် ပိုပြီး အသက်ရှင်နိုင်ချေများတယ်"

ထို့နောက် ယွမ်ယန်က သူမကို ပြုံးပြလိုက်သည်။

နောက်ဆက်တွဲဖြစ်ပျက်သောအရာများသည် ရွှယ်ဝူရွှမ်ကို အလွန်အမင်း နာကျင်စေခဲ့သည်။ သူသည် သူ၏ ကျန်ရှိသော စိတ်ဝိညာဉ်စွမ်းအင်များအားလုံးကို သုံးကာ ရေခဲဝိညာဉ်ဆီသို့ တမင်တကာ ပျံသန်းသွားခဲ့သည်။

ရေခဲဝိညာဉ်က သူ့ကို ဝိုင်းရံကာ သူ၏ ဦးခေါင်းကို ဖြတ်တောက်တော့မည့်အချိန်တွင် သူသည် ကိုယ့်ကိုယ်ကိုယ် ဖောက်ခွဲဖျက်ဆီးရန် ပြတ်သားစွာ ရွေးချယ်လိုက်သည်။