ပိုင်ယွမ်၏တိုက်ပွဲ။ ရင်သပ်ရှုမောဖွယ် မြင်ကွင်း။

လင်းတုန်နှင့် ပိုင်ယွမ်တို့သည်လည်း စိတ်လှုပ်ရှား တက်ကြွစွာဖြင့် စုရုံးရောက်ရှိလာကြလေသည်။

“အခုလေးတင် အရောင်းအဝယ်ဌာနမှာ ကောင်းကင်နတ်ဆိုးကျားနဲ့ ပတ်သက်တဲ့ သတင်းအချက်အလက်ကို ရဖို့အတွက် လူတစ်ယောက်ကို နိဗ္ဗာန်ဆေးလုံး သုံးသောင်းလောက် ပေးခဲ့ရတယ်။ ဒီမြို့ရဲ့ မြောက်ဘက် ငါးမိုင်ခန့်အကွာမှာ သားရဲချိုင့်ဝှမ်းတစ်ခု ရှိတယ်။ အဲဒီချိုင့်ဝှမ်းမှာ မရေမတွက်နိုင်တဲ့ မိစ္ဆာသားရဲတွေ ရှိနေပေမဲ့ အဲဒီနေရာရဲ့ အရှင်သခင်ကတော့ ‘အနန္တမြေခွဲကျား’ ပဲ။ သူက အဆင့်တစ် နိဗ္ဗာန်အဆင့် ရှိတဲ့ သားရဲတစ်ကောင်ပေါ့” မိုလင်းက အစီရင်ခံလိုက်လေသည်။

“အနန္တမြေခွဲကျားရဲ့ ရတနာသိုက်ထဲမှာ ကောင်းကင်နတ်ဆိုးကျားရဲ့ အရိုးတစ်ချောင်း ရှိနေတယ်တဲ့။ အဲဒီလူ ပြောတဲ့စကားအရဆိုရင် အနန္တမြေခွဲကျားက အဲဒီအရိုးကို တိုက်တိုက်ဆိုင်ဆိုင် ရရှိထားတာဖြစ်ပြီး သူရဲ့ ဒုတိယအကြိမ်မြောက် နိဗ္ဗာန်ဘေးဒုက္ခကို ကျော်ဖြတ်တဲ့အခါမှာ အသုံးပြုဖို့ ရည်ရွယ်ထားတာလို့ သိရတယ်”

“ကျားအရိုးလား”

လင်းတုန်က ခဏလောက် စမ်းတဝါးဝါး စဉ်းစားနေပြီးနောက် ဝိညာဉ်စွမ်းအင်မှတစ်ဆင့် ရှောင်တျောင်းထံသို့ “ကျားအရိုးဆိုရင်ကော အဆင်ပြေပါ့မလား” ဟု လှမ်း၍ မေးမြန်းလိုက်သည်။

“ကောင်းကင်နတ်ဆိုးကျားမျိုးနွယ်အတွက်တော့ ကျားအရိုးဆိုရင် လုံလောက်တာထက်တောင် ပိုသေးတယ်။ သူတို့မျိုးနွယ်ရဲ့ အင်အားတွေက အရိုးထဲမှာပဲ အခြေခံပြီး စုစည်းနေတာ။ သူတို့ရဲ့ အရိုးဟာ ခန္ဓာကိုယ်ရဲ့ အင်အားအကြီးဆုံးအစိတ်အပိုင်းဖြစ်သလို သူတို့ဖြစ်တည်မှုရဲ့ အနှစ်သာရလည်း ဖြစ်တယ်။ အဲဒီအထဲမှာ အားကောင်းတဲ့ ‘ကျားဖြူ သွေးမျိုးဆက်’ စွမ်းအားတွေ ပါဝင်နေမှာ အသေအချာပဲ” ရှောင်တျောင်းကလည်း ပြန်ပြောလိုက်သည်။

“သတင်းအတိအကျ ရပြီဆိုရင်တော့ လက်မနှေးဘဲ လှုပ်ရှားကြစို့” ဝူယွမ်သည် အချိန်ဆွဲမနေလိုတော့ဘဲ ချက်ချင်းပင် ခရီးဆက်ရန် ပြင်ဆင်လိုက်တော့သည်။

ဝူယွမ်ထွက်ခွာဖို့ ပြင်နေသည်ကိုမြင်ပြီး မိုလင်းက အလျင်အမြန်ပဲ ဖြည့်စွက်၍ ပြောကြားလိုက်သည်။ “ခေါင်းဆောင်၊ နောက်ထပ် သိထားရမယ့်အချက်တစ်ခု ရှိပါသေးတယ်။ အဲဒီသတင်းပေးတဲ့လူက ကျွန်တော်တို့ဟာ မဟာယန်ပြည်ထောင်စုကဆိုတာ သိသွားတော့ အပိုဆောင်းသတင်းတွေ ထပ်ပြောပြခဲ့တယ်။ အခု ကောင်းကင်နတ်ဆိုးကျားအရိုးကို အဆင့်မြင့်ပြည်ထောင်စုကြီး နှစ်ခုကလည်း မျက်စိကျနေကြတယ်”

“သူတို့ကတော့ ‘နတ်ဆိုးကျောက်တုံး ပြည်ထောင်စု’ နဲ့ ‘သားရဲပြည်ထောင်စု’ တို့ပဲ။ နှစ်ဖက်စလုံးမှာ အဆင့်တစ် နိဗ္ဗာန်အဆင့်ရှိတဲ့ ပုဂ္ဂိုလ်တွေ ပါဝင်နေကြတယ်။ သိရတာကတော့ အဲဒီအဆင့်မြင့်ပြည်ထောင်စုကြီး နှစ်ခုဟာ အခုချိန်မှာ မဟာမိတ်ဖွဲ့ထားကြတယ်တဲ့။ နတ်ဆိုးကျောက်တုံးပြည်ထောင်စုရဲ့ ကျင့်စဉ်တွေနဲ့ သိုင်းပညာရပ်တွေက ကျားအမျိုးအနွယ် သားရဲတွေနဲ့ ဆက်နွှယ်နေတာမို့ သူတို့ကျင့်စဉ် တိုးတက်ဖို့အတွက် အဲဒီအရိုးကို လိုချင်နေကြတာ။ သားရဲပြည်ထောင်စုကတော့ မိစ္ဆာသားရဲတွေကို ထိန်းချုပ်နိုင်တဲ့စွမ်းအား ရှိတယ်၊ သူတို့ရဲ့ ပစ်မှတ်ကတော့ အနန္တမြေခွဲကျားကိုယ်တိုင်ပဲ”

“အဆင့်မြင့်ပြည်ထောင်စု နှစ်ခုရယ်၊ အဆင့်တစ် နိဗ္ဗာန်အဆင့် ကျွမ်းကျင်သူ နှစ်ယောက်ရယ်ပေါ့လေ” ဝူယွမ်က တည်ငြိမ်အေးဆေးသော လေသံဖြင့် “ပြဿနာမရှိပါဘူး၊ သွားကြစို့”

မြို့ထဲသို့ ခဏသာခြေချလိုက်ရပြီး မဟာယန်ပြည်ထောင်စုမှ လူစုက မြို့ပြင်သို့ ချက်ချင်း ပြန်လည်ထွက်ခွာလာကြကာ မြောက်ဘက်အရပ်ဆီသို့ လျင်မြန်သော အရှိန်အဟုန်ဖြင့် ဦးတည်သွားကြလေသည်။

ငါးမိုင်လောက် သွားပြီးနောက် ဝူယွမ်တို့ ကျယ်ပြောလှသော သစ်တောကြီးတစ်ခုကို မြင်တွေ့လိုက်ရသည်။ ဝူယွမ်က တွန့်ဆုတ်ခြင်းမရှိဘဲ လူတိုင်းကို ဦးဆောင်ကာ မှောင်မည်းအုပ်ဆိုင်းနေသော တောနက်ကြီးထဲသို့ ဆက်လက်ဝင်ရောက်သွားသည်။

ရုတ်တရက်ဆိုသလို တောအုပ်အတွင်းမှ လူရိပ်လေးခု ထွက်ပေါ်လာပြီး လမ်းကို ပိတ်ဆို့ထားလိုက်သည်။ မဟာယန်ပြည်ထောင်စုမှ လူများကို မြင်သောအခါ ထိုလေးဦးသည် တစ်ဦးကိုတစ်ဦး ကြည့်လိုက်ကြပြီးနောက် တစ်ယောက်က ရှေ့သို့ တိုးထွက်လာကာ လေးနက်သော လေသံဖြင့် “အားလုံးပဲ၊ ကျွန်ုပ်တို့ရဲ့ နတ်ဆိုးကျောက်တုံး ပြည်ထောင်စုနဲ့ သားရဲပြည်ထောင်စုတို့ဟာ ဒီနယ်မြေကို ပိတ်ဆို့ထားပါတယ်။ ကျေးဇူးပြုပြီး တခြားလမ်းကနေ ပတ်သွားပေးကြပါ” ဟု ပြောလိုက်လေသည်။

“စိတ်မကောင်းပါဘူး၊ ငါတို့ လမ်းလွှဲသွားလို့ မရဘူး။ ငါတို့ သွားရမယ့်လမ်းက ရှေ့တည့်တည့်မှာပဲ ရှိတယ်” ဝူယွမ်က ပြတ်သားစွာ တုံ့ပြန်လိုက်သည်။

ထိုလူလေးဦး၏ မျက်နှာထားများ ချက်ချင်းပင် အေးစက်သွားကြသည်။ တစ်ဦးက မာနထောင်လွှားသော အမူအရာဖြင့် “မင်းတို့က ဘယ်ပြည်ထောင်စုကလဲ။ ငါတို့ရဲ့ အဆင့်မြင့်ပြည်ထောင်စုကြီး နှစ်ခုလုံးနဲ့ ရန်သူဖြစ်ချင်နေတာလား” ဟု ဟိန်းဟောက်လိုက်သည်။

“မဟာယန် ပြည်ထောင်စုကွ၊ ကြားဖူးလား” မိုလင်းက ဂုဏ်ယူဝင့်ကြွားစွာဖြင့် ပြန်လည်ပြောဆိုလိုက်လေသည်။

“မဟာယန် ပြည်ထောင်စုလား”

အမှန်တကယ်ပင် မဟာယန်ပြည်ထောင်စုဟူသော အမည်နာမကို ကြားလိုက်ရသည်နှင့် ထိုလေးဦး၏ မျက်နှာများ ပျက်ယွင်းသွားကြသည်။ လက်ရှိ အနောက်မြောက်ဒေသတွင် နတ်ဆိုးကျောက်တုံး ပြည်ထောင်စုအကြောင်း သိသူမှန်သမျှ မဟာယန်ပြည်ထောင်စု၏ အရှိန်အဝါကို မသိသူ မရှိသလောက်ပင် ဖြစ်သည်။

“သူတို့နဲ့ စကားများပြီး အချိန်မဖြုန်းနဲ့တော့၊ ကျားအရိုးကို ရဖို့က ပိုအရေးကြီးတယ်” ဝူယွမ်က ထိုလူလေးဦးကို လျစ်လျူရှုကာ အတွင်းဘက်သို့ ပျံသန်းဝင်ရောက်သွားတော့သည်။

သူ၏ ပြင်းထန်လှသော စွမ်းအားအရှိန်အဝါက ထိုလေးဦးကို လေထဲတွင်ပင် ငြိမ်သက်သွားစေကာ ထိုသူတို့သည် လှုပ်ရှားရန် ကြိုးစားသော်လည်း နောက်မှ ကပ်လျက်လိုက်ပါလာသော လင်းတုန်၏ လက်ဝါးချက်တစ်ချက်အောက်တွင် တောနက်ထဲသို့ လွင့်စင်သွားကြရလေသည်။

တောနက်ကြီး၏ အဆုံးတွင် ကြီးမားလှသော ချိုင့်ဝှမ်းကြီးတစ်ခု ရှိနေပြီး ထိုနေရာက သူတို့၏ ဦးတည်ရာဘဲ ဖြစ်သည်။ ထိုအခိုက်တွင် ချိုင့်ဝှမ်း၏ ကမ်းပါးများပေါ်၌ လူရိပ်များစွာက ဝိုင်းရံပိတ်ဆို့ထားကြသည်ကို မြင်တွေ့လိုက်ရသည်။

တောင်ထိပ်ပေါ်တွင် လူရိပ်နှစ်ခုက တင့်တယ်စွာ ရပ်တန့်နေကြပြီး သူတို့၏ ရှေ့မှောက်တွင်မူ ဧရာမ သတ္တဝါကြီးတစ်ကောင် ရှိနေသည်။ သူ၏ ခန္ဓာကိုယ်မှာ တောင်ကုန်းငယ်တစ်ခုပမာ ကြီးမားပြီး သံမဏိကဲ့သို့ မာကျောသော အမည်းရောင် အမွေးအမျှင်တိုများဖြင့် ဖုံးလွှမ်းထားသည်။ သို့သော် သူ၏ ဦးခေါင်းမှာ လူဦးခေါင်းမဟုတ်ဘဲ ထွားကျိုင်းလှသော ကျားခေါင်းကြီး ဖြစ်နေလေသည်။

၎င်းမှာ လူအသွင်သို့ အပြည့်အဝ မကူးပြောင်းနိုင်သေးသော ကျားတစ်ပိုင်း လူတစ်ပိုင်း ‘အနန္တမြေခွဲကျား’ ဘဲ ဖြစ်သည်။ ၎င်း၏ အစွယ်များက ရှည်လျားထက်မြက်လှပြီး သွေးဆာနေသော မျက်လုံးအစုံမှာ ကြောက်မက်ဖွယ်ရာ အရှိန်အဝါတို့ကို ထုတ်လွှတ်နေသည်။

‌”ဝေါင်း”

သူက ဒေါသတကြီး ဟိန်းဟောက်လိုက်ပြီး လူဘာသာ စကားဖြင့် “မင်းတို့ ဒီကို ဘာလာလုပ်တာလဲ၊ အခုချက်ချင်း သားရဲချိုင့်ဝှမ်းကနေ ထွက်သွားကြစမ်း” ဟု အော်ဟစ်လိုက်သည်။

သူ၏ လေသံမှာ ပြင်းထန်နေသော်လည်း အဆင့်တစ် နိဗ္ဗာန်အဆင့် ကျင့်ကြံသူ နှစ်ဦးကို ရင်ဆိုင်နေရသဖြင့် အနည်းငယ် စိုးရိမ်ထိတ်လန့်နေသည်မှာ အထင်အရှားပင်။

အနန္တမြေခွဲကျား၏ ဟိန်းဟောက်သံကို ထိုလူနှစ်ဦးက ဂရုမစိုက်ဘဲ ရှိနေကြသည်။ မျက်နှာပေါ်တွင် ထူးဆန်းသော ကျားအစင်းကြောင်းများ ရှိနေပြီး မီးခိုးရောင် ဝတ်စုံကို ဝတ်ဆင်ထားသည့် ‘ထန်ဟူ’ က လှောင်ပြောင်သရော်လိုက်သည်။

“ဟက်ဟက်၊ သားရဲဆိုတာ သားရဲပါပဲ။ နိဗ္ဗာန်ဘေးဒုက္ခ တစ်ကြိမ်တည်း ကျော်ဖြတ်ထားရုံနဲ့ ဒီလောက် ထောင်လွှားနေတာလား။ ဒီတောင်ပေါ်မှာ မင်းကိုယ်မင်း ဘုရင်လို့ ထင်နေတာလား။ မင်းမှာ ကောင်းကင်နတ်ဆိုးကျားအရိုး ရှိနေတာကို ငါသိတယ်။ အဲဒါကို အေးအေးဆေးဆေး အပ်နှံပြီး ငါတို့ရဲ့ စီနီယာ အစ်ကိုကြီး ‘ချန်မို’ ကို သခင်အဖြစ် အသိအမှတ်ပြုမယ်ဆိုရင် မင်းရဲ့ အသက်ကို ချမ်းသာပေးမယ်။ မဟုတ်ရင်တော့ သေဖို့သာ ပြင်ထားတော့”

“လူသားတွေ၊ မင်းတို့က ငါ့ရဲ့ အရိုးကိုလည်း လိုချင်တယ်၊ ငါ့ကိုလည်း ကျွန်ပြုချင်တယ်ပေါ့လေ။ အိမ်မက် မက်နေလိုက်စမ်း”

အနန္တမြေခွဲကျားက ဒေါသအလိပ်လိပ် ထွက်ပေါ်လာခဲ့သည်။ ဂုဏ်သိက္ခာရှိလှသော ကျားဘုရင်တစ်ကောင်အနေဖြင့် ဤကဲ့သို့ အရှက်ခွဲမှုကို မည်သို့ခံနိုင်ပါမည်နည်း။ သူက ချက်ချင်းပင် ဧရာမ ကျောက်တုံးကြီးတစ်ခုကို ထိုလူနှစ်ဦးထံသို့ ပစ်ပေါက် တိုက်ခိုက်လိုက်တော့သည်။

“ဟွန့်၊ ရူးသွပ်နေတဲ့ ကျားအိုကြီး၊ ငါ မင်းကို ဘယ်လို ဆုံးမမလဲဆိုတာ စောင့်ကြည့်နေလိုက်”

စီနီယာ အစ်ကိုကြီး ချန်မို၏ မျက်လုံးများထဲတွင် ရက်စက်မှုများ ဖြတ်သန်းသွားသည်။ အကယ်၍ ဤသားရဲကို သူ တပ်ဆင်စီးနင်းနိုင်မည်ဆိုပါက အလွန်ပင် ခန့်ညားထည်ဝါပေလိမ့်မည်။

“ထန်ဟူ၊ အတူတူ တိုက်ကြစို့”

“ကောင်းကင်ကျား ဝါးမျိုခြင်း”

ထန်ဟူက လေထဲသို့ ပျံတက်သွားပြီး ဟိန်းဟောက်လိုက်ရာ သူ၏ ပတ်ဝန်းကျင်တွင် ယွမ်စွမ်းအင်များ စုစည်းလာပြီး ဧရာမ ယွမ်စွမ်းအင်ကျားကြီးတစ်ကောင်အဖြစ် ပြောင်းလဲသွားကာ ကောင်းကင်ယံသို့ ဟိန်းဟောက်တိုက်ခိုက်လေသည်။

“သားရဲထောင်ချောက် အဆောင်”

စီနီယာ ချန်မိုသည်လည်း လက်ကွက်များကို လျင်မြန်စွာ ဖော်ဆောင်လိုက်ရာ တောက်ပသော အလင်းတံဆိပ်တစ်ခုအဖြစ် ပြောင်းလဲသွားပြီး အနန္တမြေခွဲကျား၏ ဦးခေါင်းထက်သို့ ရောက်ရှိသွားသည်။ မရေမတွက်နိုင်သော အလင်းတန်းများက လိုက်ကာများပမာ ကျဆင်းလာပြီး သားရဲကြီးကို ပိတ်ဆို့ထားလိုက်သည်။

ထိုနှစ်ဦး၏ ပူးပေါင်းတိုက်ခိုက်မှုမှာ အလွန်ပင် စည်းချက်ကျလှကာ အနန္တမြေခွဲကျား၏ ကြီးမားလှသော ခန္ဓာကိုယ်က ကမ်းပါးယံနှင့် ဆောင့်မိပြီး လဲကျသွားရသည်။ သို့သော် အနန္တမြေခွဲကျားသည်လည်း အလျှော့မပေးဘဲ ပြန်လည်ခုခံလေသည်။

“နတ်ဆိုးကျား လက်သီး”

ထန်ဟူက ကျောက်တုံးကြီးများကြားမှ တိုးထွက်ကာ အနန္တမြေခွဲကျားနှင့် အနီးကပ် တိုက်ပွဲဝင်လေသည်။ ချိုင့်ဝှမ်းတစ်ခုလုံးတွင် ပြင်းထန်သော လေပြင်းများ တိုက်ခတ်နေပြီး ဖုန်မှုန့်များ ထစပြုလာသည်။

“အားလုံး အတူတူ တိုက်ကြစို့”

စီနီယာ ချန်မို၏ အမိန့်ပေးသံအဆုံးတွင် သားရဲပြည်ထောင်စုမှ ကျွမ်းကျင်သူများက ချန်မို၏ နောက်ကွယ်တွင် စုရုံးကာ သူတို့၏ ယွမ်စွမ်းအင်များကို ချန်မို၏ ခန္ဓာကိုယ်ထဲသို့ ထည့်ဝင်ပေးကြလိုက်သည်။ ချန်မို၏ ခန္ဓာကိုယ်မှ ထူးဆန်းသော အလင်းများ ထွက်ပေါ်လာပြီး -

“နတ်ဆိုးချည်နှောင် ကြိုး”

တောက်ပသော အလင်းတန်းများက အနန္တမြေခွဲကျား၏ ခန္ဓာကိုယ်ပေါ်သို့ ကျရောက်သွားပြီး ယွမ်စွမ်းအင်ဖြင့် ပြုလုပ်ထားသော သံကြိုးများစွာ ထွက်ပေါ်လာကာ သားရဲကြီးကို ရစ်ပတ်ထားလိုက်သည်။ ထိုသံကြိုးများပေါ်ရှိ ထူးဆန်းသော ရူန်းစာသားများက အနန္တမြေခွဲကျား၏ အရှိန်အဝါကို ဖိနှိပ်လိုက်လေသည်။

“တစ်ကယ်ကောင်းတဲ့ နည်းပညာပဲ။ သားရဲပြည်ထောင်စုက မိစ္ဆာသားရဲတွေအတွက် တကယ်ကို ကြောက်စရာကောင်းတဲ့ ရန်သူပဲ” ထန်ဟူက ချီးမွမ်းစကား ဆိုလိုက်သည်။ “အခု အောင်မြင်ပြီဆိုတော့ ဒီသားရဲက မင်းတို့အပိုင်ပဲ။ ငါကတော့ ကျားအရိုးကို သွားရှာတော့မယ်”

ထန်ဟူက အနန္တမြေခွဲကျား၏ ဂူအတွင်းသို့ ဝင်ရောက်ရန် ပြင်ဆင်လိုက်စဉ် -

ရုတ်တရက်ဆိုသလို ကောင်းကင်ယံမှ အမည်းရောင် တောင်ထိပ်တစ်ခု ပြုတ်ကျလာသည်။ ကြောက်မက်ဖွယ်ကောင်းလှသော ဆွဲငင်အား ဖိအားကြောင့် ထန်ဟူနှင့် ချန်မိုတို့မှာ တုန်လှုပ်သွားကြပြီး သူတို့၏ ယွမ်စွမ်းအင်များကို အစွမ်းကုန် ထုတ်လွှတ်ကာ ခုခံလိုက်ကြရသည်။

“နည်းနည်းလေး နောက်ကျသွားရင် ကျားအရိုးကို မင်းတို့ ယူသွားကြတော့မှာပဲ”

ဝူယွမ်သည် ‘လေးလံ အကျဉ်းထောင်တောင်ထိပ်’ ပေါ်တွင် ရပ်တန့်လျက် ထွက်ပေါ်လာခဲ့သည်။

“တောက်၊ မင်းက ဘယ်သူလဲ” ထန်ဟူင ဒေါသတကြီးဖြင့် တောင်ထိပ်ကို ရိုက်ချရန် ကြိုးစားသော်လည်း အမည်းရောင်တောင်ထိပ်မှာ အနည်းငယ်မျှပင် မလှုပ်ရှားဘဲ သူတို့ကို ပိုမိုဖိနှိပ်ထားလေသည်။

ဝူယွမ်က တောင်ထိပ်ကို သိမ်းဆည်းလိုက်ပြီး အထက်စီးမှနေ၍ “ငါတို့ မဟာယန်ပြည်ထောင်စုက ဒီကျားအရိုးကို လိုချင်တယ်။ မင်းတို့ လိမ္မာပါးနပ်တယ်ဆိုရင် အခုချက်ချင်း ထွက်သွားကြစို့” ဟု ပြောလိုက်သည်။

“မဟာယန်... မင်းက ဝူယွမ်ပဲ”

ထန်ဟူ၏ လည်ချောင်းမှာ ခြောက်သွေ့သွားခဲ့သည်။ ဝူယွမ်က နတ်ဆိုးကျောက်ဆောင် ပြည်ထောင်စုကို တစ်ဦးတည်းဖြင့် နှိမ်နင်းခဲ့ပြီး ရှီရွှမ်ကို သတ်ဖြတ်ခဲ့သည့် သတင်းမှာ ပြည်နယ် တစ်ခုလုံး ပျံ့နှံ့နေပြီ ဖြစ်သည်။

ထန်ဟူနှင့် စီနီယာ ချန်မိုတို့က တစ်ဦးကိုတစ်ဦး ကြည့်လိုက်ကြပြီး မကျေမနပ်ဖြစ်နေကြသည်။

“ဘာလဲ၊ တိုက်ချင်သေးလို့လား” ဝူယွမ်က အေးစက်စွာ မေးလိုက်သည်။

ထန်ဟူက အံကြိတ်လျက် “ငါတို့ ဒီအနန္တမြေခွဲကျားကို ဖမ်းဖို့ ဘယ်လောက် ပင်ပန်းခဲ့ရလဲဆိုတာ မင်းသိမှာပါ။ အခုမှ လက်လွှတ်လိုက်ဖို့ဆိုတာ မလွယ်ဘူး။ ဝူယွမ်ရဲ့ နာမည်ကို ကြားဖူးတာ ကြာပါပြီ၊ ဒီနေ့တော့ စမ်းသပ်ကြည့်ရတာပေါ့။ အကယ်၍ မင်း ငါတို့နှစ်ယောက်ကို အနိုင်ယူနိုင်ရင် ဒီကျားအရိုးက မင်းအပိုင်ပဲ”

“ခေါင်းဆောင်၊ ကျွန်မကို တိုက်ခွင့်ပြုပါ”

ပိုင်ယွမ်က ရှေ့သို့ တိုးထွက်လာခဲ့သည်။ သူမက လူသားအသွင် ကူးပြောင်းပြီးနောက် ပထမဆုံးအကြိမ် တိုက်ပွဲဝင်လိုစိတ် ပြင်းပြနေသည်။ သူမ၏ ဝတ်စုံနှင့် ဦးထုပ်က သူမ၏ သားရဲနားရွက်များကို ဖုံးကွယ်ထား ပေးခဲ့ပြီး ရဲရင့်ပြတ်သားသော အမျိုးသမီးစစ်သည်တစ်ဦးပမာ ခန့်ညားနေခဲ့သည်။

“အင်း၊ သွားလေ” ဝူယွမ်က ခေါင်းညိတ်ပြလိုက်သည်။

“ဝူယွမ်၊ မင်း ငါတို့ကို အထင်သေးလွန်းတာ မဟုတ်ဘူးလား” ပိုင်ယွမ်ကို မြင်သောအခါ ထန်ဟုက မျက်မှောင်ကြုတ်လိုက်သည်။ သူ့မျက်လုံးထဲတွင် အမျိုးသမီးဟူသည် နုနယ်ပျော့ပျောင်းသူများသာ ဖြစ်သည်ဟု ထင်မြင်နေပုံရသည်။

“သူမကို တိုက်ခိုက်ခိုင်းတက မင်းတို့ကို တော်တော်လေး လေးစားရာရောက်နေပါပြီ။ စကားတွေ အများကြီး ပြောမနေနဲ့။ သူမရဲ့ တိုက်ခိုက်မှုကို ခံပြီးလို့မှ မင်းတို့ မတ်တတ်ရပ်နိုင်သေးရင်… အဲဒီကျတော့မှ ဆက်ပြောတာပေါ့” ဝူယွမ်က လှောင်ပြောင်လိုက်ပြီး ပိုင်ယွမ်ကို “ပိုင်ယွမ်၊ သူတို့က မင်းကို အထင်သေးနေကြတယ်၊ အားရပါးရသာ ဆုံးမလိုက်စမ်းပါ” ဟု ပြောလိုက်သည်။

ပိုင်ယွမ်က ချက်ချင်းပင် ရှေ့တက်လာကာ ပိုင်ယွမ်၏ ခြေလှမ်းများ ရှေ့သို့ တိုးလာသည်နှင့်အမျှ ကြောက်မက်ဖွယ်ကောင်းသော ယွမ်စွမ်းအင်များ ထွက်ပေါ်လာသည်။ အဆင့်တစ် နိဗ္ဗာန်အဆင့်၏ အင်အားမှာ အထင်အရှား ထွက်ပေါ်လာခဲ့သည်။

ပိုင်ယွမ်၏ နုနယ်လှပသော လက်ချောင်းလေးများက လျင်မြန်လှသော အရှိန်ဖြင့် လက်ကွက်များကို ဖော်ဆောင်လိုက်သည်။

“သန့်စင် ကျားဖြူတံဆိပ်”

ယွမ်စွမ်းအင်ဖြင့် ပြုလုပ်ထားသော အဖြူရောင်ကျားကြီးများက ထိန်ဟုနှင့် ချန်မိုထံသို့ ဟိန်းဟောက်ကာ ပြေးဝင်သွားကြသည်။ ထိုနှစ်ဦးသည်လည်း သူတို့၏ အစွမ်းကုန် ခုခံကြသော်လည်း ပိုင်ယွမ်မှာ အနန္တမြေခွဲကျားကဲ့သို့ မဟုတ်ပေ။ သူမ၏ ကျောပြင်တွင် ‘လေနတ်ဘုရား တောင်ပံ’ များ ထွက်ပေါ်လာပြီး လျင်မြန်သော အရှိန်ဖြင့် သူတို့၏ တိုက်ခိုက်မှုများကို လွယ်ကူစွာ ရှောင်တိမ်းလေသည်။

သူမက ကောင်းကင်ယံတွင် ကခုန်နေသော နတ်မိမယ်တစ်ပါးကဲ့သို့ နွဲ့နှောင်းသေသပ်စွာ လှုပ်ရှားနေသော်လည်း တိုက်ခိုက်မှုတိုင်းမှာ ပြင်းထန်လှသော စွမ်းအားများ ပါဝင်နေခဲ့သည်။ သူမ၏ တိုက်ခိုက်ပုံမှာ ကြည့်ရှုသူအပေါင်းအတွက် ရင်သပ်ရှုမောဖွယ် မြင်ကွင်းတစ်ခုပမာ ဖြစ်နေတော့သည်။

သေသပ်လှပမှု။

ဝူယွမ်က အမြဲတမ်း သန့်ရှင်းမှုကို မြတ်နိုးသော ပိုင်ယွမ်၏ စရိုက်ကို သတိရမိသွားသည်။ သူမက အနီးကပ် တိုက်ခိုက်ခြင်းကို ရှောင်ကြဉ်ပြီး အဝေးမှနေ၍ ပြင်းထန်သော တိုက်ခိုက်မှုများကိုသာ လုပ်ဆောင်လေသည်။

“တော်ပြီ၊ တော်ပြီ၊ ငါတို့ အရှုံးပေးပါတယ်”

ထန်ဟူနှင့် စီနီယာ ချန်မိုတို့မှာ ပိုင်ယွမ်၏ တိုက်ခိုက်မှုအောက်တွင် မြေပေါ်၌ လူးလိမ့်နေရရှာသည်။

“ကဲ၊ တော်ပြီ ပိုင်ယွမ်” ဝူယွမ်က လှမ်းခေါ်လိုက်သည်။

“ဟွန့်” ပိုင်ယွမ်က ထိုလူနှစ်ဦးကို မျက်စောင်းထိုးလိုက်ပြီး ဝူယွမ်၏ ဘေးနားသို့ ပြန်လည်ရောက်ရှိလာခဲ့သည်။

“ငါတို့ အားနည်းလို့ ရှုံးနိမ့်ခဲ့ပြီးပြီ ဆိုတော့။ ကျားအရိုးနဲ့ ဒီသားရဲကြီးက ခေါင်းဆောင်ဝူယွမ်ရဲ့ အပိုင်ပါပဲ” ထန်ဟူက ရိုးသားစွာ ဝန်ခံပြီး သူ၏ လူများကို ခေါ်ကာ ထွက်ခွာသွားလေသည်။

ထိုသူများ ထွက်သွားပြီးနောက် ဝူယွမ်က အနန္တမြေခွဲကျားကို ချည်နှောင်ထားသော သံကြိုးများကို ဖျက်ဆီးပေးလိုက်ပြီး -

“ကဲ၊ ကျားကြီး၊ မင်း ရွေးချယ်စမ်း။ ချက်ချင်း သေမလား၊ ဒါမှမဟုတ် ငါ့ဆီမှာ အညံ့ခံမလား” ဟု အေးစက်စွာ မေးလိုက်သည်။

သို့သော် ဝူယွမ် အံ့ဩသွားရသည်မှာ အနန္တမြေခွဲကျားသည် ချက်ချင်းပင် ဒူးထောက်လိုက်ပြီး -

“ကျွန်တော် အညံ့ခံပါတယ်၊ အညံ့ခံပါတယ်” ဟု တောင်းပန်တိုးလျှိုးလိုက်လေသည်။

၎င်းမှာ ပိုင်ယွမ်ထံမှ ထွက်ပေါ်နေသော မြင့်မြတ်လှသော ‘အဖြူရောင်ကျား သွေးမျိုးဆက်’ ၏ ဖိအားကို ခံစားနေရသဖြင့် ကြောက်ရွံ့တုန်လှုပ်ကာ ဒူးထောက်လိုက်ခြင်း ဖြစ်သည်။ စောစောက ရှိခဲ့သော မာန်မာနများမှာလည်း လုံးဝ ပျောက်ကွယ်သွားလေပြီ။

“ကြည့်ထား၊ အခုကစပြီး သူဟာ မင်းရဲ့ သခင်ပဲ” ပိုင်ယွမ်က ဝူယွမ်ကို ညွှန်ပြလျက် အသံချိုချိုလေးဖြင့် အမိန့်ပေးလိုက်လေတော့သည်။