ရှာဖွေတွေ့ရှိခြင်း

ကျန်းရှုယွီသည် ရှောင်လင်းယဲ့၏နောက်ခံကို ထုတ်ပြောမည် မဟုတ်ပါ။ ပြောလိုက်လျှင် ရှောင်လင်းယဲ့၏ တန်ဖိုးတက်သွားပြီး ပြိုင်ဘက်တွေ များလာလိမ့်မည်။ သူမက ရှောင်လင်းယဲ့၏အချစ်ကို မရသေးသဖြင့် အခြေအနေ ပိုဆိုးသွားနိုင်သည်။

ကျန်းရှုယွီက ဘာမှမပြောသဖြင့် လူတိုင်းက ရှောင်လင်းယဲ့ မကောင်းတာတစ်ခုခုလုပ်ထားသည်ဟု ထင်ကြေးပေးကြသည်။ အချို့က ရှောင်လင်းယဲ့ကို နောက်ယောင်ခံလိုက်ကြသည်။ နောက်ဆုံးတွင် ရှောင်လင်းယဲ့ ရှင်းထိန်အဆောက်အဦးသို့ ဝင်သွားသည်ကို တွေ့လိုက်ရသည်။ ထိုအခါမှ ရှောင်လင်းယဲ့က ရှင်းထိန်အုပ်စုတွင် အလုပ်လုပ်နေကြောင်း သိလိုက်ရသည်။

ဒါပေမဲ့ လဲ့ကျွင်းရှန်နှင့် ရှောင်လင်းယဲ့၏ဆက်ဆံရေးကိုတော့ ဘယ်သူမှ မသိကြသေးပေ။

"ဒီပဝါလေးက အဘွားနဲ့ လိုက်မလား" လဲ့ကျွင်းရှန်သည် ကုန်တိုက်တွင် အနီရောင်ပဝါတစ်ထည်ကို မြင်သောအခါ အဖွားရှောင်ကို သတိရသွားသည်။

ရှောင်လင်းယဲ့ ခေါင်းခါလိုက်သည်။ "အဘွားက ရိုးရိုးရှင်းရှင်းပဲနေတတ်တာ။ အလှအပ သိပ်မကြိုက်ဘူး"

လဲ့ကျွင်းရှန် သဘောပေါက်သွားသည်။

"ဒါဆို အကြီးဆုံးအဒေါ်ကို ပေးလိုက်ရင် ကောင်းမလား။ အကြီးဆုံးအဒေါ်က အနီရောင် ကြိုက်တယ်လေ" ရှောင်လင်းယဲ့ အကြံပြုလိုက်သည်။

လဲ့ကျွင်းရှန်၏မျက်လုံးများ အရောင်လက်သွားပြီး ဆိုင်တွင် ဈေးအကြီးဆုံး အနီရောင်ပဝါကို ဝယ်လိုက်သည်။

ထို့နောက် ရှောင်လင်းယဲ့နှင့် လဲ့ကျွင်းရှန်တို့သည် လက်ဆောင်ပစ္စည်းများကို လိုက်လံဝယ်ယူကြသည်။ ယောကျ်ားနှစ်ယောက် ဈေးဝယ်ထွက်ပြီး ဈေးကြီးပေး ဝယ်နေသည်ကို မြင်သောအခါ မိန်းကလေးအများစု စိတ်ဝင်တစား ကြည့်နေကြသည်။ အထူးသဖြင့် ရှောင်လင်းယဲ့လို ချောမောခန့်ညားသော လူငယ်လေးကို မိန်းကလေးများက သဘောကျနေကြသည်။

သို့သော်...

"ဒီယောကျ်ားနှစ်ယောက် လက်ဆောင်တွေ လိုက်ဝယ်နေတာ အတွဲတွေများလား" မိန်းကလေးနှစ်ယောက် တိုးတိုးလေး ပြောနေကြသည်။

"ဖြစ်နိုင်တယ်နော်။ တစ်ယောက်က မုတ်ဆိတ်တွေနဲ့ ကြမ်းတမ်းတဲ့ပုံစံ၊ မျက်လုံးတွေက စူးရှနေတယ်။ နောက်တစ်ယောက်ကတော့ နေရောင်ခြည်လို တောက်ပပြီး ချောမောနေတယ်။ ဒါက Seme နဲ့ Uke အတွဲပဲ"

"ဝါး... အပြင်မှာ Seme နဲ့ Uke အတွဲကို တွေ့ရပြီ"

......

သူတို့ပြောစကားများကို ကြားသောအခါ လဲ့ကျွင်းရှန်နှင့် ရှောင်လင်းယဲ့ ရင်ထဲထိတ်ခနဲ ဖြစ်သွားသည်။

လဲ့ကျွင်းရှန်က မေးလိုက်သည်။ "ယဲ့အာ၊ Seme နဲ့ Uke ဆိုတာ ဘာလဲ"

ရှောင်လင်းယဲ့က စာနဲ့ အလုပ်ပဲ စိတ်ဝင်စားတဲ့သူဆိုတော့ ဒါတွေကို မသိပါဘူး။

ဒါပေမဲ့ ရှောင်လင်းယဲ့က ဉာဏ်ကောင်းသူမို့လို့ သူတို့ ဘာပြောချင်လဲဆိုတာ ရိပ်မိလိုက်သည်။ ထို့ကြောင့် တမင် ကျယ်လောင်စွာ ပြောလိုက်သည်။ "အစ်ကိုကြီး၊ ဒီအင်္ကျီကို မေမေ ကြိုက်မယ်ထင်တယ်"

ရှောင်လင်းယဲ့ ရုတ်တရက် အသံကျယ်ကျယ် ပြောလိုက်သဖြင့် လဲ့ကျွင်းရှန် ကြောင်သွားသော်လည်း လိုက်လျောညီထွေ ပြန်ပြောလိုက်သည်။ "အမေ ကြိုက်မယ်ဆိုရင် ဝယ်လိုက်မယ်လေ။ ပြီးရင် အဖေနဲ့ တခြားလူတွေအတွက် လက်ဆောင် ဆက်ရွေးကြမယ်"

"ဟုတ်ကဲ့... အစ်ကိုကြီး"

BL ဝါသနာအိုးမလေးများ သူတို့ပြောစကားကို ကြားသောအခါ စိတ်ပျက်သွားကြသည်။ "အတွဲလို့ ထင်နေတာ၊ ညီအစ်ကိုတွေ ဖြစ်နေတာကိုး။ ဒါပေမဲ့ ရုပ်ချင်း မတူလိုက်တာ"

"ဟိုတစ်ယောက်က မုတ်ဆိတ်တွေနဲ့ဆိုတော့ ရုပ်ချင်းတူမတူ ကြည့်ရခက်တယ်"

"ဟုတ်တယ်နော်" သူငယ်ချင်းက ထောက်ခံလိုက်သည်။

"ညီအစ်ကိုတွေဆိုတော့ မိဘတွေအတွက် လက်ဆောင်ဝယ်တာ ဘာမှ မဆန်းပါဘူး။ အတွဲလို့ ထင်လိုက်တာ"

......

ရှောင်လင်းယဲ့ သက်ပြင်းချလိုက်သည်။

ဒီမိန်းကလေးတွေက ကြောက်စရာကောင်းလိုက်တာ။ ယောကျ်ားနှစ်ယောက် ဈေးဝယ်ထွက်တာကို အတွဲလို့ ထင်နေကြတယ်။ ဘာတွေ တွေးနေကြမှန်း မသိဘူး။

ထို့နောက် သူတို့နှစ်ဦး လက်ဆောင်ပစ္စည်းများကို အလေးအနက်ဆက်လက်ရွေးချယ်ကြသည်။

မိန်းကလေးအချို့က သူတို့ ငွေသုံးနိုင်တာကိုမြင်ပြီး လာရောက်မိတ်ဖွဲ့ကြသည်။

လဲ့ကျွင်းရှန်နှင့် ရှောင်လင်းယဲ့ နှစ်ယောက်စလုံးက မိန်းမကိစ္စ စိတ်မဝင်စားသူများဖြစ်သဖြင့် မိန်းကလေးများ လက်လျော့ပြီး ပြန်လှည့်သွားကြရသည်။

......

လဲ့ကျွင်းရှန် ညီဖြစ်သူကို ပြန်တွေ့သောအခါ အံ့သြသွားသည်။

အရင်တုန်းက အနီရောင်အဝတ်အစားတွေ ဝတ်ပြီး ဟော့ဟော့ရမ်းရမ်း နေတတ်တဲ့သူက အခု အပြာရောင် ရိုးရိုးရှင်းရှင်း အဝတ်အစားတွေ ဝတ်ထားတယ်။ ဂျယ်လ်တွေနဲ့ သပ်သပ်ရပ်ရပ် ဖီးထားတဲ့ ဆံပင်က အခု ဆံပင်တိုကေလေးဖြစ်နေပြီ။ အရင်ကထက် ပိုပြီး ကြည့်ကောင်းနေတယ်။

"အစ်ကိုကြီး" လဲ့ကျုံးဇီ အစ်ကိုဖြစ်သူကို မြင်သောအခါ ဝမ်းသာအားရ နှုတ်ဆက်လိုက်သည်။

လဲ့ကျွင်းရှန် ကြောင်အသွားပြီး မေးလိုက်သည်။ "ရှောင်ဇီ၊ မင်း ဘယ်လိုဖြစ်သွားတာလဲ"

လဲ့ကျုံးဇီ မျက်မှောင်ကြုတ်လိုက်ပြီး မေးလိုက်သည်။ "အစ်ကိုကြီး၊ ဒီလိုပြောင်းလဲသွားတာ မကောင်းလို့လား"

လဲ့ကျွင်းရှန် သတိပြန်ဝင်လာပြီး ခေါင်းညိတ်ကာ ပြုံးလိုက်သည်။ "ကောင်းပါတယ်။ အခုက ပိုပြီး လန်းဆန်းတက်ကြွတဲ့ လူငယ်လေးပုံစံ ပေါက်နေတယ်"

လဲ့ကျုံးဇီ၏မျက်လုံးများ အရောင်လက်သွားပြီး ဝမ်းသာအားရ မေးလိုက်သည်။ "ဟုတ်လား အစ်ကိုကြီး"

"အင်း... တကယ်ပေါ့" လဲ့ကျွင်းရှန် ညီဖြစ်သူ၏ပခုံးကို ပုတ်ပေးလိုက်သည်။

'ညီလေးကို ထောင်ယွမ်ရွာ ပို့လိုက်တာ မှန်ကန်တဲ့ ဆုံးဖြတ်ချက်ပဲ' ဟု စိတ်ထဲတွင် တွေးလိုက်သည်။

"ကျွင်းရှန်၊ မင်းဝယ်လာတဲ့ လက်ဆောင်တွေကို အားလုံး သဘောကျကြတယ်။ ကျေးဇူးတင်ပါတယ်ကွယ်" အဖွားရှောင်က ပြုံးလျက်ပြောလိုက်သည်။

လဲ့ကျွင်းရှန်က နှိမ့်ချစွာ ပြောလိုက်သည်။ "ယဲ့အာ ရွေးပေးတာပါ"

"အင်း... သားတို့နှစ်ယောက်စလုံး လိမ္မာကြတယ်" အဖွားရှောင်က ထပ်မံချီးကျူးလိုက်သည်။

မိသားစုဝင်များ ပျော်ရွှင်စွာ စားသောက်ကြသည်။

.....

ညဘက်တွင် လဲ့ကျွင်းရှန်နှင့် လဲ့ကျုံးဇီ ညီအစ်ကိုနှစ်ယောက် အခန်းတစ်ခန်းတည်း အတူနေကြသည်။

လဲ့ကျွင်းရှန်သည် စားပွဲပေါ်မှ စာအုပ်များကို မြင်သောအခါ မျက်ခုံးပင့်လိုက်ပြီး မေးလိုက်သည်။ "ရှောင်ဇီ၊ စိုက်ပျိုးရေးစာအုပ်တွေ ဖတ်နေတာလား။ အလုပ်ပြောင်းမလို့လား"

လဲ့ကျုံးဇီ လေးနက်စွာ ခေါင်းညိတ်လိုက်သည်။ "အစ်ကိုကြီး၊ ကျွန်တော် အလုပ်ပြောင်းချင်တယ်။ စိုက်ပျိုးရေးပညာရှင်ဖြစ်ချင်တယ်"

လဲ့ကျွင်းရှန် ကြောင်သွားပြီး လေးနက်စွာ မေးလိုက်သည်။ "ရှောင်ဇီ၊ မင်း တကယ် ပြောနေတာလား"

"အစ်ကိုကြီး၊ ကျွန်တော် အတည်ပြောနေတာပါ" လဲ့ကျုံးဇီ လေးနက်စွာ ပြောလိုက်သည်။ "ကျွန်တော် စိုက်ပျိုးရေးကို ဝါသနာပါမှန်း ဒီရောက်လာမှ သိလိုက်ရတာ။ ဒါကြောင့် အစ်မဆီက စာအုပ်တွေ ငှားဖတ်ကြည့်တာ။ ဖတ်ရင်းဖတ်ရင်း ပိုစိတ်ဝင်စားလာတယ်။ အစ်ကိုကြီး သိလား၊ ဒီစာအုပ်တွေ ဖတ်ရတာ ကမ္ဘာသစ်တစ်ခုကို ရှာတွေ့လိုက်သလိုပဲ။ စိတ်ဝင်စားစရာ ကောင်းလိုက်တာ"

လဲ့ကျွင်းရှန် တိတ်ဆိတ်စွာ နားထောင်နေသည်။

လဲ့ကျုံးဇီက အစ်ကိုဖြစ်သူကို စိုးရိမ်တကြီး ကြည့်ပြီး မေးလိုက်သည်။ "အစ်ကိုကြီး၊ ကျွန်တော် အလုပ်ပြောင်းရင် အစ်ကိုကြီး ထောက်ခံပေးမလား"

နည်းပညာနဲ့ စိုက်ပျိုးရေးက မိုးနဲ့မြေလို ကွာခြားတာလေ။ အလုပ်ပြောင်းဖို့ မလွယ်ကူဘူး။

တကယ်တော့ လဲ့ကျုံးဇီအတွက် အခက်အခဲက အရေးမကြီးပါဘူး။ အစ်ကိုဖြစ်သူရဲ့သဘောထားကသာ အရေးကြီးတာပါ။

လဲ့ကျွင်းရှန်သည် ညီဖြစ်သူ၏ စိုးရိမ်ပူပန်နေသောမျက်နှာကို ကြည့်ပြီး သက်ပြင်းချလိုက်သည်။ ထို့နောက် ပခုံးကို ပုတ်ပေးပြီး လေးနက်စွာ ပြောလိုက်သည်။ "ရှောင်ဇီ၊ မင်း လုပ်ချင်တာ လုပ်ပါ။ အစ်ကိုကြီး ထောက်ခံပေးမယ်"

လဲ့ကျုံးဇီ ဝမ်းသာအားရ ပြုံးလိုက်သည်။ "ကျေးဇူးတင်ပါတယ် အစ်ကိုကြီး"

ထို့နောက် ရှောင်မိသားစုအကြောင်း ပြောဖြစ်ကြသည်။ "အစ်ကိုကြီး၊ ကျွန်တော် ရှောင်မိသားစုကို တကယ် သဘောကျတယ်။ သူတို့က သဘောကောင်းကြတယ်။ ကျွန်တော့်ကို ဂရုစိုက်ကြတယ်။ မိသားစု နွေးထွေးမှုကို ခံစားရတယ်။ ဖေဖေ၊ မေမေ၊ အဘိုး၊ အဘွား၊ အစ်မ၊ မောင်လေး အကုန်လုံးက ကျွန်တော့်ကို ရင်းရင်းနှီးနှီး ချစ်ခင်ကြတယ်"

လဲ့ကျွင်းရှန် ခေါင်းညိတ်လိုက်သည်။ "အင်း... ရှောင်မိသားစုက အခု ငါတို့မိသားစု ဖြစ်နေပြီလေ"

***