ငါ မင်းအတွက် တွက်ချက်ပေးမယ်

ချန်ဟွိုက်အန် တစ်ယောက် တကယ်ပင် နို့လက်ဖက်ရည် သောက်သုံးခွင့်ကို အပြည့်အဝ ရရှိလိမ့်မည်ဟု တစ်ခါမှ မတွေးခဲ့ဖူးပေ။

သို့သော် အမှန်အတိုင်းပြောရလျှင် သူက နို့ထည့်ရန်ပင် မလိုခဲ့။ သူ၏ လက်ဖက်ခြောက် အိတ်လေးများက ထူးခြားသော အာနိသင်ရှိပြီး ဖျော်လိုက်သည်နှင့် နူးညံ့သော နို့ရနံ့လေးက လက်ဖက်ရည်ထဲသို့ အလိုအလျောက် ပျံ့နှံ့သွားခြင်းပင်။

နို့များ အလွန်အကျွံ ထည့်လိုက်ပါက လက်ဖက်၏ အရသာရင်းကို ဖုံးလွှမ်းသွားပြီး အီသွားနိုင်၏။ သင်းပျံ့ရုံရှိသော နို့ရနံ့လေးကသာ အကောင်းဆုံး လက်ဖက်ရည်တစ်ခွက်၏ လျို့ဝှက်ချက်ပင်။

သူ ယခုသောက်နေသည့် အရသာမျိုးကို ကမ္ဘာပေါ်မှာ မည်သူမှ ခံစားဖူးမည်မဟုတ်ကြောင်း သူ သေချာပေါက် ယုံကြည်နေသည်။

သို့သော် တကယ်တမ်းတွင်မူ သူက အေးအေးဆေးဆေး အရသာခံနေနိုင်သည့် အခြေအနေတွင် မရှိနေပေ။ အကြောင်းမှာ အဓိကတာဝန် ၃.၀၏ နောက်ဆုံး အက်ပ်ဒိတ်က သူ့ကို ရက်စက်သည့် အမှန်တရားတစ်ခုနှင့် ရင်ဆိုင်ခိုင်းလိုက်သောကြောင့်ပင်။

[ အဓိကတာဝန် ၃.၀ - ကျုံးကျိုးလျို့ဝှက်နယ်မြေ ဖွင့်လှစ်ရန် ရက်ပေါင်း (၂၁)ရက်သာ လိုတော့သည်။ ကျေးဇူးပြု၍ သင်၏ ပုံရိပ်ယောင် ကောင်မလေး၏ အသက်ရှင်သန်နိုင်စွမ်းနှုန်းကို မြှင့်တင်ပေးပါ။ အသက်ရှင်နှုန်း ၃၀% တိုးတိုင်း ကောင်းကင်ဘုံနက္ခတ် အရိပ်အမြွက်တစ်ခု ရရှိမည်။ လက်ရှိ အသက်ရှင်နှုန်း - ၆၁% ]

[ အရိပ်အမြွက် (၁) - အသုံးပြုရန် အဆင်သင့် ]

[ အရိပ်အမြွက် (၂) - အသုံးပြုရန် အဆင်သင့် ]

လီချင်းရန်က အခြေခံအုတ်မြစ်အဆင့် (အလယ်)သို့ ရောက်ရှိနေပြီဖြစ်ပြီး အန္တိမအဆင့် ဒန်တျန်၊ ရေဓာတ်သီးသန့် စိတ်ဝိညာဉ်အမြစ်နှင့် စုရွှမ်ဓားတို့ကို ပိုင်ဆိုင်ထားသည့်အပြင်၊ ခိုင်မာသော ဓားသိုင်းနှင့် အတွင်းအားကျင့်စဉ်များကိုလည်း တတ်မြောက်ထားရာ ထိုကဲ့သို့ နယ်မြေ အသေးစားလေးတွင် အသက်ရှင်နှုန်း ၁၀၀% ရှိလိမ့်မည်ဟု ချန်ဟွိုက်အန် ထင်ခဲ့၏။

အဆိုးဆုံးအခြေအနေတွင်ပင် သူ့တွင် ရွှေရောင်အနှစ်သာရအဆင့် ကျင့်ကြံသူများကိုပင် မှုန့်မှုန့်ညက်ညက် ကြေစေနိုင်သည့် မိုးကြိုးမီး အဆောင်များ ရှိနေသေးသည်။ သို့သော် တာဝန်မှတ်တမ်းကို စစ်ဆေးလိုက်သောအခါ...

သူ၏ အသက်ရှင်နှုန်းမှာ ၆၁% သာ ရှိနေ၏။

၆၁% ဆိုသည်မှာ သူ့မျက်လုံးထဲတွင် သုညနှင့် အတူတူပင်။ ချန်ဟွိုက်အန် တစ်ယောက် ခဏမျှ ကောင်းကင်ပြိုကျသွားသလို ခံစားလိုက်ရသည်။

ဒီကျုံးကျိုးလျို့ဝှက်နယ်မြေမှာ ဘာတွေက အဲဒီလောက်တောင် ခက်ခဲနေလို့ ၁၀၀% အောင်မြင်ဖို့ အာမမခံနိုင်ရတာလဲ...

သူက အရိပ်အမြွက် (၁)ကို နှိပ်ကြည့်လိုက်သည်။

[ အရိပ်အမြွက်(၁) - နယ်မြေထဲသို့ ဝင်ရောက်ပြီးနောက် ကစားသူသည် မည်သည့်နည်းနှင့်မျှ ဝင်ရောက်စွက်ဖက်ခွင့် ရှိမည်မဟုတ်ပါ။ စောင့်ကြည့်ရန်သာ ခွင့်ပြုသည်။ (အသေးစိတ်ကြည့်ရန် နှိပ်ပါ) ]

စွက်ဖက်ခွင့် မရှိဘူးတဲ့လား။

၎င်းက ပထမဆုံးအကြိမ်ပင် ဖြစ်သည်။ သူ အသေးစိတ်ကို ထပ်မံဖွင့်ကြည့်လို၏။

ရှင်းလင်းချက် - ကျုံးကျိုးလျို့ဝှက်နယ်မြေသည် ကိုယ်ပိုင် တာအိုဥပဒေသများများရှိသော သီးခြားကမ္ဘာငယ်တစ်ခု ဖြစ်သည်။ ကစားသူက ကမ္ဘာသုံးခုကို ဖြတ်ကျော်၍ ထိုနယ်မြေအတွင်းရှိ အရာများကို ပြောင်းလဲရန် စွက်ဖက်၍ မရနိုင်ပါ။

ကောင်းပြီလေ။ ဒီစည်းမျဉ်းတစ်ခုတည်းနှင့်ပင် ခက်ခဲမှုက ငရဲအဆင့် ကို ရောက်သွားပြီ။

ထို့နောက် သူက အရိပ်အမြွက် (၂)နှင့် ၎င်း၏ ရှင်းလင်းချက်ကို စစ်ဆေးလိုက်သည်။

[ ဗေဒင်အရိပ်အမြွက်(၂) - ကျုံးကျိုးလျို့ဝှက်နယ်မြေအတွင်း မိစ္ဆာလမ်းစဉ်ကျင့်ကြံသူ အမြောက်အမြားနှင့် သားရဲကျင့်ကြံသူအချို့ ပေါ်လာလိမ့်မည် ]

ရှင်းလင်းချက် - မိစ္ဆာလမ်းစဉ်ကျင့်ကြံသူများသည် အလွန်အစွမ်းထက်ပြီး ခွဲထုတ်ချေမှုန်းရေး ဗျူဟာကို အသုံးပြုကြလိမ့်မည်။ ဓားကျောင်းတော် တပည့်များ တစ်ယောက်ပြီးတစ်ယောက် သတ်ဖြတ်ခံရလိမ့်မည်။ လီချင်းရန် အစွမ်းကုန် တိုက်ခိုက်လိမ့်မည် ဖြစ်သော်လည်း နောက်ဆုံး အင်အားချင်းမမျှဘဲ ကျဆုံးသွားလိမ့်မည်။

ချန်ဟွိုက်အန် - “...”

နေပါဦး... ဒါက တကယ့်ကို အစုလိုက်အပြုံလိုက် သတ်ဖြတ်ပွဲ မဖြစ်နေဘူးလား...

ယခင်က စုချီနျန် ပြောပြချက်အရ ထိုလျို့ဝှက်နယ်မြေပွဲသည် ချင်းယွန်ဘုံရှိ ဖြောင့်မှန်တဲ့ ဂိုဏ်းများအားလုံးအတွက် ကြီးကျယ်သော ဖြစ်စဉ် ဖြစ်သည်ဟု သိရသည်။ နယ်မြေ အသေးစားများမှာ နှစ်စဉ် ပွင့်သော်လည်း နယ်မြေအကြီးစားများမှာမူ ၁၀နှစ်မှ တစ်ကြိမ်သာ ပွင့်ခြင်းဖြစ်သည်။

အခုနှစ်မှာ နယ်မြေအသေးရော အကြီးရော တစ်ပြိုင်နက်ပွင့်မည်ဆိုတော့ မကြုံစဖူး ထူးခြားသည့် ဖြစ်စဉ်ကြီးပင်။ ဖြောင့်မှန်တဲ့ဂိုဏ်းများ၏ စုရပ်ဆိုလျှင်... မိစ္ဆာလမ်းစဉ်ကျင့်ကြံသူများနှင့် သားရဲကျင့်ကြံသူများက မည်သို့ ခိုးဝင်လာကြသနည်း...

သူ မသိလျှင် ထား။ ယခု သူ သိသွားပြီဖြစ်ရာ တစ်ခုခု လုပ်မှ ဖြစ်ပေမည်။

ချန်ဟွိုက်အန် နည်းလမ်းနှစ်ခုကို စဉ်းစားလိုက်သည်။

ပထမအချက်မှာ လီချင်းရန်ကို ပိုမိုသန်မာအောင် လုပ်ပေးရန်မှာ ပထမဦးစားပေး ဖြစ်သည်။ သူကိုယ်တိုင် မသန်မာလျှင် မည်သည့်ဗျူဟာမှ အရာထင်မည်မဟုတ်။

ဒုတိယအချက်မှာမူ စုချီနျန်ကို ကြိုတင်သတိပေးရန် ဖြစ်သည်။ ရန်သူက မည်သူ၊ မည်သည့် နေရာမှ တိုက်ခိုက်လာမည်ကို မသိသေးသော်လည်း စုချီနျန်က အခြားဂိုဏ်းများကိုပါ သတိပေးထားနိုင်ပါသည်။ ၎င်းမှာ မိစ္ဆာလမ်းစဉ်ကျင့်ကြံသူများကို ရိပ်မိသွားစေနိုင်သော်လည်း မည်သည်ကိုမှ မသိဘဲ အဝင်ခံရခြင်းထက်စာလျှင် ပိုကောင်း၏။

ထို့ပြင် သူ့တွင် ကောင်းကင်နက္ခတ် ရှိနေသေးသည်။ အကယ်၍ အဆင်ပြေလျှင် သူတို့ မလှုပ်ရှားခင်ကတည်းက ခြိမ်းခြောက်မှုအချို့ကို အမြစ်ဖြတ်ပစ်နိုင်သည်။

ထိုအတွေးဖြင့် သူက အသံလွှင့်အဆောင်ကို အသုံးပြုကာ ခေါင်းအုံးစွပ်ချုပ်နေသည့် လီချင်းရန်ကို ပြောလိုက်၏။

“ချင်းရန်၊ ဂိုဏ်းချုပ်စုကို သွားခေါ်လိုက်။ သူ့ကို ပြောစရာ အရေးကြီးကိစ္စ ရှိတယ်။”

ခဏအကြာ လျိုရှားတောင်ထွတ်ရှိ ရေကန်ဘေး၌...

စုချီနျန်နှင့် လီချင်းရန်တို့ မျက်နှာချင်းဆိုင် ထိုင်နေကြသည်။ လီချင်းရန်ကတော့ ခိုးနားထောင်နေရုံမျှသာ။ စုချီနျန်က လီချင်းရန်၏ ခေါင်းပေါ်ရှိ နေရာလွတ်ကို အရိုအသေပေးလိုက်ရင်း ပြောလိုက်သည်။

“ဘိုးဘေး... ကျွန်တော့်ကို ဘာများ ညွှန်ကြားချင်လို့လဲ...”

[ငါ မနေ့ညက ကြယ်တာရာ နိမိတ်များကို ကြည့်ပြီး ကောင်းကင်ကံကြမ္မာကို တွက်ချက် ကြည့်တော့... ကျုံးကျိုးလျို့ဝှက်နယ်မြေမှာ ကြီးမားတဲ့ ဘေးဒုက္ခတစ်ခု ကျရောက်တော့မယ် ဆိုတာကို တွေ့ရှိခဲ့ရတယ်...]

စုချီနျန်၏ နှုတ်ခမ်းများ တွန့်သွား၏။ အိုး... အခုတော့ နက္ခတ်ပါ တွက်နေပြီလား။ လောလောလတ်လတ် ချင်းယွန်ဘုံရဲ့ ကံကြမ္မာကို ခဏခဏ တွက်ချက်နေတဲ့ လျို့ဝှက် ဆန်းကြယ် ကျင့်ကြံသူကြီးက... တကယ်တော့ ငါတို့ဂိုဏ်းရဲ့ ဘိုးဘေးကြီး ဖြစ်နေခဲ့တာလား

ဒီအတွေးက ခဏမျှသာ။ ဘိုးဘေးတွင် ထိုစွမ်းအားမျိုး ရှိနိုင်သည်ဟု သူ ယုံကြည်သည်။ သို့သော် ချန်ဟွိုက်အန်၏ နောက်ထပ်စကားများက စုချီနျန်ကို တောင့်တင်းသွားစေ၏။

[ ဒီဘေးဒုက္ခကြောင့် ဓားကျောင်းတော် တပည့် ဆယ်ယောက်မှာ ကိုးယောက်လောက် သေဆုံးသွားနိုင်တယ်... ]

“ဘယ်လို...”

စုချီနျန် စားပွဲကို ရိုက်ကာ ထရပ်လိုက်သည်။ သူ၏မျက်လုံးထဲတွင် စူးရှသော ဓားအသိများ လျှံထွက်လာ၏။

“ဘယ်ဂိုဏ်းကများ ဓားကျောင်းတော် တပည့်တွေကို ကျုံးကျိုးနယ်မြေထဲမှာ သတ်ရဲတာလဲ...”

နယ်မြေထဲတွင် တပည့်အချင်းချင်း တိုက်ခိုက်ခြင်းမှာ ပုံမှန်ဖြစ်သော်လည်း အစုလိုက်အပြုံလိုက် သတ်ဖြတ်ခြင်းမျိုးမှာမူ တစ်ခါမှ မကြားဖူးသလောက်ပင်။

[ ဖြောင့်မှန်တဲ့ဂိုဏ်းတွေ မဟုတ်ဘူး။ မိစ္ဆာဂိုဏ်းပဲ... ]

ထိုစကားကို ကြားကြားချင်း စုချီနျန်၏ ပထမဆုံးအာရုံမှာ မယုံကြည်နိုင်ခြင်း ဖြစ်သည်။ မိစ္ဆာဂိုဏ်းဆိုသည်မှာ ချင်းယွန်ဘုံတွင် မျိုးသုဉ်းလုနီးပါး ဖြစ်နေလေပြီ။ မည်သို့ အင်အား အလုံးအရင်းဖြင့် ကျုံးကျိုးနယ်မြေတစ်ခုလုံးကို ခြိမ်းခြောက်နိုင်မည်နည်း...

“ဘိုးဘေး... အသေးစိတ် အချက်အလက်များ ရှိမလား...” စုချီနျန် စိုးရိမ်တကြီး မေးလိုက်သည်။

[ ကောင်းပြီလေ။ ငါ မင်းအတွက် တွက်ချက်ပေးမယ် ]

ချန်ဟွိုက်အန် ကောင်းကင်နက္ခတ်ကို စတင်အသုံးပြုလိုက်သည်။ တစ်ရက်လျှင် အခမဲ့ တစ်ကြိမ် တွက်ချက်ခွင့် ရှိသည်။ ၎င်းက မိစ္ဆာလမ်းစဉ်ကျင့်ကြံသူများရှိရာ နေရာကို ဖော်ပြပေးနိုင်မနိုင်ကို သူ မသေချာပေ။

သို့သော် ယခုထိတော့ တွက်ချက်မှုတိုင်းက အသုံးဝင်သည့် အချက်အလက်များသာ ပေးခဲ့သည်။ အဆိုးဆုံးဖြစ်လာလျှင်ပင် တစ်ခုခုကို လုပ်ကြံပြောကာ ဓားကျောင်းတော်ကို သတိကြီးကြီး ထားရန် ပြောနိုင်၏။ အခြားဂိုဏ်းများ၏ ကံကြမ္မာကတော့ သူနှင့် မဆိုင်ပေ။

သူက မေးခွန်းကို ရိုက်ထည့်လိုက်သည်။ “မိစ္ဆာလမ်းစဉ်ကျင့်ကြံသူတွေအားလုံးရဲ့ တည်နေရာကို မြေပုံပေါ်မှာ ပြပေးပါ...”

စနစ်ထဲတွင် အဝိုင်းလည်နေပြီး ခဏအကြာ၌ အနီရောင် သတိပေးချက်တစ်ခု ပေါ်လာ၏။

[ မိစ္ဆာလမ်းစဉ်ကျင့်ကြံသူ အားလုံး၏ တည်နေရာကို တွက်ချက်ရန် သေချာပါသလား။ သတိပေးချက် - ထိုတွက်ချက်မှုကြောင့် ဖြစ်ပေါ်လာသော ကံကြမ္မာတန်ပြန်မှုက ပြင်းထန်သော ကံတရား ဆုံးရှုံးမှုကို ဖြစ်စေလိမ့်မည်... ]

ကံတရား ဆုံးရှုံးမည်ကို ချန်ဟွိုက်အန် ဂရုမစိုက်။ သူက အခုပင် အကျဉ်းခန်း(၀)ထဲတွင် ပိတ်မိနေသည်။ ဘာများ ပိုဆိုးသွားနိုင်ဦးမည်နည်း။

“သေချာတယ်။ တွက်ချက်ပေး။”

[ ကောင်းကင်နက္ခတ် တွက်ချက်နေပါသည်... ]

ဝုန်း...

ချင်းယွန်ဘုံ၏ ကောင်းကင်ကြီး ချက်ချင်းဆိုသလို မှောင်အတိ ကျသွားသည်။

လျိုရှားတောင်ထွတ်ပေါ်တွင် မုန်တိုင်းတိမ်တိုက်များ လိပ်တက်လာပြီး လျှပ်စီးများ လက်ကာ ပြင်းထန်သော ဖိအားကြီးတစ်ခု ကျဆင်းလာ၏။

ထိုကြောက်မက်ဖွယ် တိမ်တိုက်များကြားထဲမှ ကြီးမားလှသော ရွှေရောင် မျက်လုံးကြီးတစ်လုံး ဖြည်းညင်းစွာ ပွင့်လာသည်။ ထိုမျက်လုံး၏ အကြည့်က စုချီနျန်အပေါ် ကျရောက်သွားသည့်အခါ ဝိညာဉ်ပါ အပြင်ထုတ်ခံလိုက်ရသလို ခံစားလိုက်ရသည်။ သူက စကားတစ်လုံးမှ မပြောနိုင်ဘဲ ကောင်းကင်ကြီးကို ကြည့်ကာ ကြောင်အမ်းနေမိပြီး လည်ချောင်းထဲ တစ်စုံတစ်ခု တစ်နေသလို ခံစားလိုက်ရလေသည်။

အို..ဘုရားရေ...

တစ်ချိန်လုံး ကောင်းကင်နိမိတ်များကို တွက်ချက်နေတဲ့ လျို့ဝှက်ဆန်းကြယ် ကျင့်ကြံသူကြီးက...

တကယ်တော့ ငါတို့ ဓားကျောင်းတော်ရဲ့ ဘိုးဘေး ဖြစ်နေခဲ့တာလား...