တောင်နှင့် ပင်လယ် နယ်မြေ

~ထိုခေတ်က သိုင်းသူတော်စင် အဆင့် ကျွမ်းကျင်သူ အရေအတွက်သည် ယခုခေတ်လောက် မများပြားခဲ့လျှင်တောင်မှ၊ အနည်းဆုံး သုံးဆယ် ရာခိုင်နှုန်းလောက်တော့ ရှိလိမ့်မည်ဟု ယူဆနိုင်၏။ ဘာပဲပြောပြော ရှေးဟောင်း ဂုဏ်ရောင်ထွန်းပြောင်မှု၏ လက်ကျန် အရှိန်အဝါများ ရှိနေသေးသည် မဟုတ်ပါလား။

‘ဒါဆိုရင် အဲ့ဒီ ပမာဏထက် အဆတစ်ရာ ပိုများတယ်ဆိုတာ ဘာအဓိပ္ပာယ်လဲ။

သိုင်းသူတော်စင် ထောင်ချီ ရှိတယ်ဆိုတဲ့ သဘောပေါ့။

ဒါမှမဟုတ် ဒီထက်တောင် ပိုများဦးမယ်။’

နင်ချီ၏ မျက်နှာထား

လေးနက်သွားသည်။

ပထမအဆင့် သိုင်းသူတော်စင် ထောင်နှင့်ချီမျှသာ ရှိသည် ဆိုလျှင်ပင်၊ ဤကမ္ဘာကြီးကို ဒါဇင်နှင့်ချီ၍ ဖျက်ဆီးပစ်နိုင်ပြီ ဖြစ်လေသည်။

အကြောင်းမူကား သိုင်းသူတော်စင်တစ်ပါး၏ စွမ်းအားသည် ကောင်းကင်ဘုံလူသားအဆင့်ထက် များစွာ သာလွန်လွန်း

လှသောကြောင့်တည်း။

ထို့ပြင် ဤကျူးကျော်သူများထဲတွင် ပထမအဆင့်

သိုင်းသူတော်စင်များချည်းသာ ပါဝင်လာမည်ဟု မဆိုနိုင်ပေ။

ပဉ္စမအဆင့် သိုင်းသူတော်စင်များ အမြောက်အမြား ပါဝင်လာရန်မှာ သေချာသလောက် ရှိနေလေသည်။

ဤသို့ နှိုင်းယှဉ်ကြည့်လိုက်မည် ဆိုလျှင်...

အောင်နိုင်ရန် အခွင့်အရေးဟူ၍ လုံးဝ မရှိတော့ချေ။

ပုံမှန် ယုတ္တိဗေဒနည်းအရ တွေးဆကြည့်မည်ဆိုပါက ဤကမ္ဘာကြီးသည် ပျက်စီးသွားသည်မှာ ကြာမြင့်လှပြီ ဖြစ်သည်။

သို့သော်လည်း ယခုအချိန်အထိ တည်ရှိနေသေးသည် ဆိုရာ၌ မျှော်လင့်မထားသော အားကောင်းမောင်းသန် စွမ်းအားတစ်ခုခုက ဝင်ရောက်စွက်ဖက်ခဲ့ခြင်း ဖြစ်ရပေမည်။

"နောက်ပိုင်း ဘာဆက်ဖြစ်သွားလဲဗျ" နင်ချီ တိုးတိုးလေး မေးလိုက်သည်။

ကောင်းကင်သတ်သိုင်းသူတော်စင် မတ်တတ်ရပ်လိုက်ပြီး ကောင်းကင်ကို မော့ကြည့်ကာ အသက်ပြင်းပြင်း ရှူသွင်းလိုက်သည်။

"မင်း ခန့်မှန်းမိတဲ့အတိုင်းပါပဲ... ပုံမှန် အခြေအနေမှာဆိုရင် ငါတို့က သူတို့ရဲ့ ပြိုင်ဘက် လုံးဝ မဟုတ်ပါဘူး... တကယ်တမ်း ဖြစ်ပျက်ခဲ့တာကလည်း အဲဒီအတိုင်းပဲ... ငါတို့ တဖြည်းဖြည်းချင်း ရှုံးနိမ့်ခဲ့ရတာ... အားကောင်းသူတွေ တစ်ယောက်ပြီးတစ်ယောက် တိုက်ပွဲမှာ ကျဆုံးကုန်ကြတယ်... လူတိုင်း စိတ်ပျက်အားငယ်နေခဲ့ကြတာပေါ့"

စကားလုံးတွေက ရိုးရှင်းသော်ငြား၊ နာကျင်စရာ ကောင်းသည့် ခေတ်ကာလ တစ်ခု ဖြစ်ခဲ့မှာ အသေအချာပါပင်။

"ကံကောင်းထောက်မစွာနဲ့ အရေးကြီးတဲ့ အချိန်မှာ ကမ္ဘာ့အသိစိတ် နိုးထလာခဲ့တယ်"

ကောင်းကင်သတ်သိုင်းသူတော်စင်၏ မျက်လုံးများထဲတွင် စိတ်အားထက်သန်မှုများ တောက်လောင်နေ၏။

"ကျူးကျော်သူတွေတောင် ဒီအပြောင်းအလဲကို မမျှော်လင့်ထားခဲ့ကြဘူး... သူတို့အဆိုအရ ငါတို့လို နိမ့်ကျတဲ့ ကမ္ဘာ ရဲ့ အသိစိတ်က နိုးထဖို့ အရမ်း ခက်ခဲတာတဲ့... ဖြစ်နိုင်တာကတော့ ရှေ့လူတွေရဲ့ မျိုးဆက်ပေါင်းများစွာ ကြိုးပမ်းအားထုတ်မှုတွေ အရာ ထင်လာတာ ဖြစ်မယ်... ဒါမှမဟုတ် အဆင့်တက်ခါနီး ဖြစ်နေတဲ့ ငါတို့ ကမ္ဘာကြီးက အစွန်းရောက် အခြေအနေတွေကြောင့် နိုးထလာတာလည်း ဖြစ်နိုင်တယ်"

"ကမ္ဘာ့အသိစိတ်ရဲ့ စွမ်းအားက ငြင်းလို့ မရအောင် ကြီးမားပါတယ်... သူက ငါတို့ကမ္ဘာက သိုင်းသူတော်စင်တွေကို စွမ်းအားတွေ ပေးအပ်ခဲ့တယ်... သူတို့ရဲ့ ခွန်အားတွေကို သိသိသာသာ မြှင့်တင်ပေးခဲ့ပြီး ကျူးကျော်သူတွေကို အလွယ်တကူ ချေမှုန်းပစ်နိုင်ခဲ့တယ်... အောင်ပွဲကို လှမ်းမြင်နေရပြီ... ကမ္ဘာ့အသိစိတ်က ချိတ်ဆက်ထားတဲ့ ကမ္ဘာ့ လမ်းကြောင်းတွေကိုပါ ဖျက်ဆီးပစ်လိုက်ပြီး အရင်က ဖြစ်ပေါ်ခဲ့တဲ့ သိုင်းသူတော်စင် တာအို အမှတ်အသား အားလုံးကိုပါ ဖြတ်တောက်ပစ်လိုက်နိုင်ခဲ့တယ်"

"ဒါပေမယ့်... အဲဒါက အလကား ရလိုက်တာတော့ မဟုတ်ဘူး"

"အသစ် နိုးထလာတဲ့ ကမ္ဘာ့အသိစိတ်က မတည်ငြိမ်သေးဘူး... ဒီတိုက်ပွဲအပြီးမှာ ပျောက်ကွယ်လုနီးပါး ဖြစ်သွားခဲ့ပေမယ့် နောက်ဆုံးမှာတော့ အားလုံးရဲ့ ဝိုင်းဝန်း ကြိုးပမ်းမှုကြောင့် အိပ်ပျော်

သွားရုံလောက်ပဲ ဖြစ်သွားခဲ့ရတယ်"

ဒီ စကားလုံးတိုတိုလေးတွေထဲမှာ၊

နင်ချီကတော့ ဂုဏ်ယူစရာကောင်းပြီး စိတ်လှုပ်ရှားဖွယ်ရာ ခုခံကာကွယ်မှု သမိုင်းကြောင်းကြီး တစ်ခုလုံးကို မြင်ယောင်နေမိ၏။ သေချာပေါက် ဝမ်းနည်းကြေကွဲစရာ ဇာတ်လမ်းတွေ အများကြီး ပါဝင်နေမည်ပင်။

သူ စိတ်ထဲမှာ တိတ်တဆိတ် သက်ပြင်းချလိုက်မိသည်။

‘ရှင်းနေတာပဲ။

ကျူးကျော်မှုကြီးက မပြီးဆုံးသေးဘူး။’

ထိုအခိုက်အတန့်မှာ၊ ကောင်းကင်သတ် သိုင်းသူတော်စင်က ဆက်ပြောသည်။

"အကြပ်အတည်းက ခဏတာ ပြေလည်သွားရုံပါပဲ... ငါတို့ကမ္ဘာကို ကျူးကျော်ဖို့ ကြံစည်နေတဲ့ စောင့်ကြည့်သူတွေ ရှိနေတယ်ဆိုတာ ငါတို့ သိပြီးသား... ပြီးတော့ သူတို့ရဲ့ စွမ်းအားက ငါတို့ထက် အများကြီး သာလွန်တယ်... ကမ္ဘာ့အသိစိတ်ရဲ့ စွမ်းအားက လုံလောက်အောင် အားကောင်းနေပြီ ဆိုပေမယ့်... ငါ မင်းကို ပြောပြမယ်... အဲဒီနေ့တုန်းက ကမ္ဘာ့အပြင်ဘက် ကောင်းကင်ယံမှာ ပေါ်လာတဲ့ အားကောင်းသူတွေထဲမှာ ကမ္ဘာ့အသိစိတ်ထက် သာလွန်တဲ့သူတွေ အများကြီး ပါတယ်ကွ"

"တကယ်လို့သာ ကန့်သတ်ချက် တစ်ခုခု မရှိခဲ့ရင် သူတို့ တစ်ယောက်တည်းနဲ့တင် ငါတို့အားလုံးကို ဖျက်ဆီးပစ်နိုင်တယ်... သူတို့အဆိုအရ ငါတို့က နိမ့်ကျတဲ့ ကမ္ဘာ ဖြစ်ပြီး သူတို့က မြင့်မြတ်တဲ့ ကမ္ဘာတဲ့"

ထို ခံစားချက်က အလွန်ပင် မျှော်လင့်ချက် ကင်းမဲ့စရာ ကောင်းသည်ပင်။

နင်ချီ ပြင်းထန်သည့် ဖိအားတစ်ခုကို ခံစားလိုက်ရ၏။

သူ၏ နားလည်သဘောပေါက်နိုင်စွမ်းသည် သာမန်ထက် ထူးကဲနေသော်လည်း အချိန်အလုံအလောက်သာ ရရှိပါက မည်သူ့ကိုမျှ မရှုံးနိုင်ဟု ယုံကြည်ချက် ရှိသည်။ သို့သော် ပြဿနာမှာ ယခု ထိုမျှ အချိန်ရပါမည်လော ဆိုသည်သာ ဖြစ်သည်။

သို့သော် ရှေးဟောင်း သူတော်စင် များ တပြိုင်နက် ပေါ်ထွက်လာခြင်းနှင့် ဝိညာဉ်နိုးထခြင်း တို့ကို ပေါင်းစပ် စဉ်းစားလိုက်သောအခါ အချိန်မရှိတော့ကြောင်း နင်ချီ သဘောပေါက်လိုက်သည်။

ယခု အချိန်မှာ၊

ကောင်းကင်သတ်သိုင်းသူတော်စင် က သိုင်းသူတော်စင် အချင်းချင်း ပဋိပက္ခ မဖြစ်အောင် အဘယ်ကြောင့် အသည်းအသန် တားဆီးနေရသလဲ ဆိုတာကို သူ ဝေဝါးဝါး နားလည်လာသည်။ သူတို့က အနာဂတ် ကျူးကျော်သူတွေကို ခုခံမည့် အဓိက အင်အားစုတွေ ဖြစ်နေ၍တည်း။

သို့သော်၊ နင်ချီ နောင်တမရပါ။

သတ်ဖြတ်ပြီးလျှင် သတ်ဖြတ်ပြီးသည်သာ ဖြစ်သည်။ ထိုသို့သော လူစားများသည် အနာဂတ်တွင် သစ္စာဖောက်ဖျက်ရန် ဝန်လေးမည် မဟုတ်ချေ။

နင်ချီ ဘာမှ မပြောဘဲ ကောင်းကင်သတ်သိုင်းသူတော်စင် ဆက်ပြောမည့် စကားကိုသာ စောင့်နေလိုက်သည်။ သူတော်စင် များ၏ ကတိကဝတ်နှင့် ဘာများ ဆက်စပ်နေမလဲ ဆိုတာ သိချင်နေမိသည်။

ကောင်းကင်သတ်သိုင်းသူတော်စင် သည် လက်ကို နောက်ပစ်ထားလိုက်ပြီး သူ့၏ ဟာလာဟင်းလင်း မျက်လုံးများထဲတွင် အလင်းတန်းများစွာ ဖြာထွက်နေသယောင် ထင်ရ၏။

"ဟုတ်တယ်... သူတို့က အရမ်းသန်မာတယ်... ဒါပေမယ့် ငါတို့က လက်ပိုက်ကြည့်ပြီး သေမယ့်နေ့ကို ထိုင်စောင့်နေလို့တော့ လုံးဝ မဖြစ်ဘူး"

"ကျူးကျော်သူတွေ ဘယ်တော့ ထပ်ဆင်းလာမလဲ ဆိုတာ မသိရသေးပေမယ့် ငါတို့ ကြိုတင် ပြင်ဆင်ထားဖို့ လိုတယ်... ဒီတိုက်ပွဲအပြီးမှာ ငါတို့ သူတို့အကြောင်း လုံးဝ မသိတာ မဟုတ်တော့ဘူး... အနည်းအကျဉ်းတော့ နားလည်လာပြီ"

"မြင့်မြတ်တဲ့ကမ္ဘာ ဆိုတာ တောင်နှင့် ပင်လယ် နယ်မြေလို့ ခေါ်တယ်... မူလက သိုင်းသူတော်စင် အထက် အဆင့်ရောက်တဲ့ ကျွမ်းကျင်သူတွေက အဆင့်ချိုးဖောက်ပြီး တက်ရောက်သွားကြတဲ့ နေရာပေါ့... သူတို့ရဲ့ ပါးစပ်ဖျားမှာတော့ ငါတို့ကမ္ဘာကို ကျားဇီ (၁၆၇၃) ကမ္ဘာ လို့ ခေါ်ကြတယ်... ရွံစရာကောင်းတဲ့ နာမည်ပဲ... သိုင်းကမ္ဘာ ဆိုတာ ငါတို့ရဲ့ မူရင်းနာမည်ပါ"

ကောင်းကင်သတ်သိုင်းသူတော်စင်က အေးစက်စွာ နှာခေါင်းရှုံ့လိုက်ပြီး မကျေနပ်ချက်ကို ဖွင့်ထုတ်လိုက်သည်။ ထို့နောက် ဆက်ပြောသည်။

"အဲဒီတိုက်ပွဲအပြီးမှာ ကျန်ရစ်ခဲ့တဲ့ သိုင်းသူတော်စင် တွေအားလုံး ထိုင်ပြီး ခေါင်းချင်းဆိုင် တိုင်ပင်ခဲ့ကြတယ်... နောက်တစ်ကြိမ် ကျူးကျော်မှုကို ဘယ်လို ရင်ဆိုင်မလဲ ဆိုတာ ဆန်းစစ်ခဲ့ကြတယ်"

"အဓိက သတင်းအချက်အလက် အချို့ကို ငါတို့ ဆုပ်ကိုင်နိုင်ခဲ့တယ်... ပထမဆုံးနဲ့ အရေးအကြီးဆုံးကတော့ တောင်နှင့် ပင်လယ် နယ်မြေ က ငါတို့ သိုင်းကမ္ဘာ ရဲ့ အထက်ကမ္ဘာ ဖြစ်တယ်ဆိုတာပဲ...ဓမ္မဓိဌာန် အရဆိုရင် ငါတို့ရဲ့ ကျင့်ကြံခြင်းက သိုင်းသူတော်စင် အထက် နတ်ဘုရားစွမ်းအား နယ်ပယ် ကို ရောက်ရင် ပျံသန်းတက်ရောက်လို့ ရတယ်... ဒါပေမယ့် သူတို့က အောက်ကမ္ဘာ ကို ဆင်းသက်လာတဲ့အခါ သဘာဝက ပေးတဲ့ ကန့်သတ်ချက်တွေ ရှိနေတယ်"

"ဒါကြောင့် သူတို့က အသက်အဆိပ် ကို လွှတ်လိုက်တာ... ငါတို့ သိုင်းကမ္ဘာ ရဲ့ စွမ်းအား ကြီးထွားလာမှုကို ကန့်သတ်ဖို့ ရည်ရွယ်တာ မှန်ပေမယ့် ပိုအရေးကြီးတာက တာအိုအမှတ်အသား တွေ ဖန်တီးဖို့ပဲ... အသက်အဆိပ် က ဝိညာဉ်ချီ ထဲမှာ အမြစ်တွယ်နေပြီး မသိမသာ ကျောက်ဆူးမှတ် တွေ ဖန်တီးနေတာ"

"ဒါပေမယ့် ဒီ ကျောက်ဆူးမှတ် တွေက ထင်ရှားမနေဘူး... တကယ်လို့ ငါတို့ သိုင်းကမ္ဘာ က တစ်ယောက်ယောက်က သိုင်းသူတော်စင် အဆင့်ကို တက်လှမ်းပြီး ဝိညာဉ်ချီ ကို ခန္ဓာကိုယ်ထဲ သန့်စင်လိုက်တာနဲ့ အသက်အဆိပ် က အသားနဲ့ ဝိညာဉ်ထဲကို ပေါင်းစပ်သွားပြီး ဒီ ကျောက်ဆူးမှတ် တွေက တာအိုအမှတ်အသား တွေအဖြစ် ပြောင်းလဲသွားကြတာ... လုံလောက်တဲ့ တာအိုအမှတ်အသား တွေ ရှိလာမှသာ သူတို့က ကမ္ဘာ့လမ်းကြောင်းကို ချိတ်ဆက်လို့ ရမှာ"

"ဒါကြောင့် ငါတို့ရဲ့ ပထမဆုံး အဆင့်က အချိန်ဆွဲဖို့ပဲ"

နင်ချီ၏ မျက်နှာတွင် သဘောပေါက်သွားသော အမူအရာ ပေါ်လာသည်။

"ဪ... ဒါကြောင့် ခင်ဗျားတို့အားလုံး ပေါင်းပြီး သိုင်းသူတော်စင် နည်းစနစ် တွေကို ဖျောက်ဖျက်ပစ်ခဲ့ကြတာကိုး... ဘယ်သူ့ကိုမှ သိုင်းသူတော်စင် အဆင့် တက်မလာစေချင်ဘဲ တာအိုအမှတ်အသား တွေ မဖြစ်ပေါ်လာစေချင်လို့ပေါ့"

ကောင်းကင်သတ်သိုင်းသူတော်စင် ခေါင်းညိတ်လိုက်ပြီး ပြောသည်။

"လုံးဝ ဖျောက်ဖျက်လိုက်တာတော့ မဟုတ်ပါဘူး... တကယ်လို့ ထူးချွန်ပြောင်မြောက်တဲ့ ပါရမီရှင် ပေါ်လာရင်တော့ သူ့ကို သိုင်းသူတော်စင် နည်းစနစ် တွေ ရရှိမယ့် အခွင့်အရေး ပေးမှာပါ... ဟန်ချက်ညီဖို့ လိုတယ်လေ... သိုင်းသူတော်စင် တိုက်ခိုက်ရေးစွမ်းအား လုံလောက်အောင် ထိန်းထားဖို့ လိုသလို သိုင်းသူတော်စင် အရေအတွက် အရမ်းမများသွားအောင်လည်း တားဆီးရမယ်... ဒါမှ တောင်နှင့် ပင်လယ် နယ်မြေ က ချက်ချင်း ဝင်ရောက် ကျူးကျော်တာကို ရှောင်ရှားနိုင်မှာ”