နှစ်ပွဲရှုံးပြီး သုံးပွဲပြန်နိုင်ခြင်းနှင့် အံ့ဖွယ်ဖြစ်ရပ်

~"ဒီပွဲကို မြူခိုးဂိုဏ်းက အနိုင်ရရှိပါတယ်"

တာဝန်ခံကျိုးသည် ကျောက်မီးသွေးတူးရာမှ ပြန်လာသူအလား မည်းနက်နေသော မျက်နှာအမဲကွက်နှင့် တပည့်ကို တစ်ချက်ကြည့်လိုက်၏။ တောင့်တောင့်ကြီး ဖြစ်နေသော ထိုတပည့်မှာ အနည်းဆုံး လဝက်ခန့် အိပ်ရာထဲ လဲနေရမည့်ကိန်း ဆိုက်နေပြီ ဖြစ်ရာ၊ တာဝန်ခံကျိုးက ရလဒ်ကို တိုက်ရိုက် ကြေညာပေးလိုက်ခြင်း ဖြစ်၏။

"ဂိုဏ်းချုပ်ဦးလေး... ကျွန်မ နိုင်ခဲ့ပြီ"

လီကျောက်ကျောက်သည် စိတ်လှုပ်ရှားစွာဖြင့် ယဲ့ဖုန်း၏ ရင်ခွင်ထဲသို့ ပြေးဝင်ကာ ဖက်ထားလိုက်ရာ၊ ဂိုဏ်းအသီးသီးမှ အမျိုးသားတပည့်များမှာ မနာလိုဝန်တိုစိတ်များဖြင့် တောက်ခေါက်လိုက်ကြ၏။

သူတို့အားလုံး တစ်ညီတစ်ညွတ်တည်း အော်ဟစ်ချင်နေကြသော စကားလုံးမှာ...

'ဘာလို့ သူ ဖြစ်နေရတာလဲကွ'

ကျင့်ကြံခြင်းအဆင့် နတ္ထိ၊ ဘာမှ သုံးစားမရတဲ့ ဂိုဏ်းချုပ်တစ်ယောက်က... ရုပ်လေး နည်းနည်း ပိုချောတာကလွဲရင် ငါတို့ထက် ဘာများ သာလို့လဲ။

"မြူခိုးဂိုဏ်း... စောစောစီးစီး မပျော်နဲ့ဦး... (၅) ပွဲမှာ (၂) ပွဲပဲ နိုင်သေးတာ... ဒီနောက်ဆုံးပွဲမှာ အစွမ်းထက်တယ်ဆိုတာ ဘာလဲ ငါပြမယ်"

စစ်ထိုက်ကျန်သည် လေပေါ်သို့ ခုန်တက်လိုက်ပြီး စင်မြင့်ပေါ်သို့ ဝုန်းခနဲ ပြန်ဆင်းသက်လိုက်ရာ သစ်သားစင်မြင့်ကြီးမှာ "ကျွီ" ခနဲ မြည်ဟီးသွားပြီး ချိုင့်ဝင်သွားလေသည်။

"ဂိုဏ်းချုပ်ဦးလေး... ကျွန်တော် သွားတော့မယ်"

ဟိုယွင်ကျဲသည် သူ၏ ဝတ်ရုံကို ချွတ်လိုက်ပြီး စင်ပေါ်သို့ ခုန်တက်လိုက်၏။

သူသည် ကြယ်ရောင်ကဲ့သို့ တောက်ပသော မျက်ဝန်း၊ ဓားသွားကဲ့သို့ ထက်ရှသော မျက်ခုံးတန်းတို့ဖြင့် ခန့်ညားထည်ဝါသော ရုပ်ရည်ကို ပိုင်ဆိုင်ထားသူ ဖြစ်၏။ ထို့အပြင် အရပ် (၆) ပေကျော် မြင့်မားသူဖြစ်ရာ မြူခိုးဂိုဏ်းတွင် အရပ်အရှည်ဆုံးသူလည်း ဖြစ်၏။

"အမလေး... မြူခိုးဂိုဏ်းက ဟိုယွင်ကျဲက တော်တော် ချောတာပဲဟေ့... ငါတို့ ညီအစ်မတွေ ကံကောင်းပြီ"

မိန်းကလေး သီးသန့်ဖွဲ့စည်းထားသော ဂိုဏ်းတစ်ခုမှ နှုတ်ခမ်းနီမလေးများ၏ တအံ့တဩ ရေရွတ်သံများ ထွက်ပေါ်လာပြီး၊ စင်မြင့်ဆီသို့ မျက်စိဒေါက်ထောက် ကြည့်နေကြ၏။

"ချောနေတော့ရော ဘာလုပ်ရမှာလဲ... ခဏနေရင် မြူခိုးဂိုဏ်း တစ်ဂိုဏ်းလုံး အထုပ်ဆွဲပြီး ပြေးရအောင် ငါ လုပ်ပြမယ်"

စစ်ထိုက်ကျန်က ပါးစပ်ရွဲ့ဖြင့် လှောင်ပြောင်လိုက်၏။

ဟိုယွင်ကျဲ ဘာမှ ပြန်မပြောပေ။ သူ၏ လက်ကို ဆန့်ထုတ်လိုက်ပြီး လက်ဝါးကို အောက်သို့ စိုက်လိုက်ရာ အဆင့်ငယ်အောင်မြင်မှု အဆင့်ရှိ 'သံမဏိဒိုင်းကာသိုင်း' ကို ထုတ်ဖော်ပြသလိုက်ပြီး ဖြစ်နေ၏။

ဒါက နောက်ဆုံး အဆုံးအဖြတ်ပွဲ ဖြစ်၏။ မိမိ၏ အစွမ်းအစမှန်ကို ဖုံးကွယ်ထားရန် မလိုအပ်တော့ပေ။

ထို့အပြင် ယခင် (၂) ပွဲတွင် အလစ်အငိုက် ဝင်တိုက်ခဲ့ကြသဖြင့် ပါရမီရှင် စစ်ထိုက်ကျန်သည် သတိထားနေမည်မှာ သေချာသည်။ ထို့ကြောင့် အရင်နည်းလမ်းဟောင်းကို သုံး၍ ရမည် မဟုတ်တော့ပေ။

ထို့ကြောင့် ဟိုယွင်ကျဲသည် ယဲ့ဖုန်း စီစဉ်ပေးထားသော နည်းဗျူဟာအသစ်ကို အသုံးပြုရန် ဆုံးဖြတ်လိုက်၏။

တစ်လုံးတည်းသော စကားလုံး... "တိုက်"။

ထိုအခြေအနေကို မြင်လိုက်ရသောအခါ စစ်ထိုက်ကျန်က တဟားဟား ရယ်မောလိုက်၏။

"သံမဏိဒိုင်းကာသိုင်း အဆင့်ငယ်အောင်မြင်မှု ဟုတ်လား... မင်း လျှို့ဝှက်ထားတာတွေ ရှိသေးတယ်ဆိုတာ ငါသိတယ်... ငါ ခန့်မှန်းကြည့်ရမလား... မင်းရဲ့ သံမဏိဒိုင်းကာသိုင်းက အဆင့်ကြီးအောင်မြင်မှု ရောက်နေပြီ မဟုတ်လား"

သို့သော် သူ ထိတ်လန့်ခြင်း မရှိပေ။ လက်ကို ဆန့်ထုတ်လိုက်ရာ မီးတောက်များဖြင့် ဖွဲ့စည်းထားသော လှံရှည်တစ်ချောင်း သူ့လက်ထဲသို့ ရောက်ရှိလာသည်။

"အဲ့ဒါ ပထမအဆင့် သိုင်းပညာ 'မီးလျှံလှံရှည်သိုင်း'ပဲ... သူက အဆင့်ကြီး အောင်မြင်မှု အထိတောင် ရောက်အောင် ကျင့်ကြံထားတာလား"

"မြူခိုးဂိုဏ်းက ဟိုယွင်ကျဲတော့ သူ့ပြိုင်ဘက် မဖြစ်လောက်တော့ဘူး"

"ဒါက ဘယ်သူ နေရမလဲ၊ ဘယ်သူ ထွက်သွားရမလဲ ဆိုတာ ဆုံးဖြတ်မယ့် ပွဲပဲ... စစ်ထိုက်ကျန်က လျှော့ပေးမှာ မဟုတ်ဘူး... ဟိုယွင်ကျဲရဲ့ သိုင်းပညာတွေက ကောင်းတယ် ဆိုရင်တောင် ကျင့်ကြံခြင်း အဆင့်မှာ နိမ့်နေသေးတယ်"

ဂိုဏ်းအသီးသီးမှ တပည့်များက အချင်းချင်း ဆွေးနွေးငြင်းခုံနေကြ၏။

ဟိုယွင်ကျဲသည် မြူခိုးဂိုဏ်းတွင် တစ်ဦးတည်းသော ချီစုစည်းခြင်း (၄) ဆင့်မြောက် ကျင့်ကြံသူ ဖြစ်သော်လည်း၊ ပရိသတ်များက သူ့ဘက်တွင် မရှိကြပေ။

"မင်း ခန့်မှန်းတာ မှန်တယ်"

စစ်ထိုက်ကျန်၏ စကားကို ကြားလိုက်ရသောအခါ ဟိုယွင်ကျဲ၏ လက်က အနည်းငယ် တုန်ခါသွားပြီး၊ သူ့ရှေ့ရှိ အနက်ရောင် ဒိုင်းကာကြီးသည် ပိုမို ခိုင်ခံ့ထူထဲလာသည်။

ဤသည်မှာ 'သံမဏိဒိုင်းကာသိုင်း' အဆင့်ကြီးအောင်မြင်မှု သို့ ရောက်ရှိခြင်း၏ လက္ခဏာပင် ဖြစ်၏။

"မြူခိုးဂိုဏ်းက တပည့်တွေ ဘယ်လိုများ ကျင့်ကြံကြတာလဲကွာ... လူတိုင်းမှာ အနည်းဆုံး သိုင်းပညာတစ်ခုတော့ အဆင့်ကြီးအောင်မြင်မှု ရောက်နေကြတယ်... သတ္တဝါဆန်းတွေကျနေတာပဲ"

"ဒီနေ့ ကိုယ်တိုင် မမြင်ရရင် ယုံမှာတောင် မဟုတ်ဘူး... နာမည်မကြီးတဲ့ မြူခိုးဂိုဏ်းလေးက ဒီလောက် ကြောက်စရာကောင်းလိမ့်မယ်လို့ ထင်မထားမိဘူး"

ဟိုယွင်ကျဲ၏ 'သံမဏိဒိုင်းကာသိုင်း' အဆင့်ကြီးအောင်မြင်မှု ရောက်ရှိနေခြင်းက ဂိုဏ်းအသီးသီးမှ တပည့်များအကြား နောက်ထပ် ဆွေးနွေးငြင်းခုံစရာ ခေါင်းစဉ်တစ်ခု ဖြစ်လာပြန်သည်။

"တကယ်ကြီး အဆင့်ကြီးအောင်မြင်မှု ရောက်နေတာပဲ"

“ဒါပေမယ့် ဒီလောက်နဲ့တော့ မပြီးသေးဘူး ထင်တယ်... 'လေဝိညာဉ်ခြေလှမ်းသိုင်း' နဲ့ 'မီးတိမ်တိုက်လက်ဝါးသိုင်း' တွေရော... အနည်းဆုံး အဆင့်ငယ်အောင်မြင်မှု လောက်တော့ ရောက်နေပြီ မဟုတ်လား”

စစ်ထိုက်ကျန်၏ အသံမှာ လေးနက်ခက်ထန်နေ၏။

သူသည် မီးလျှံလှံရှည်ကို ကိုင်ဆောင်လျက် တိုက်ခိုက်ခြင်း မပြုသေးဘဲ၊ သားကောင်ကို ခုန်အုပ်တော့မည့် ကျားသစ်တစ်ကောင်အလား ခန္ဓာကိုယ်ကို နှိမ့်ချလိုက်၏။ သူ၏ မျက်ဝန်းထဲတွင် မီးတောက် အရိပ်အယောင်များပင် ဖြတ်သန်းသွား၏။

ထိုစကားကို ကြားလိုက်ရသောအခါ ပရိသတ်များ၏ ဆွေးနွေးသံများ တဖြည်းဖြည်း တိတ်ဆိတ်သွားကြ၏။

မြူခိုးဂိုဏ်းမှ တပည့်များသည် ပထမအဆင့် သိုင်းပညာများကို အဆင့်ကြီးအောင်မြင်မှု အထိ ရောက်အောင် ကျင့်ကြံနိုင်သော ပါရမီရှင်များ ဖြစ်နေလိမ့်မည်ဟု သူတို့ အိပ်မက်ပင် မမက်ဖူးခဲ့ကြချေ။

ကျင့်ကြံခြင်းအဆင့်ကို ခဏဖယ်ထားလိုက်လျှင်၊ သိုင်းပညာ တတ်မြောက်မှု အပိုင်း၌ သူတို့သည် အဆင့်နိမ့်ဂိုဏ်းများမှ ဂိုဏ်းချုပ်များနှင့်ပင် ယှဉ်နိုင်နေပြီ ဖြစ်၏။

စစ်ထိုက်ကျန်၏ ခန့်မှန်းချက်ကို ကြားလိုက်ရသော်လည်း ဟိုယွင်ကျဲ ငြင်းဆန်ခြင်း မပြုပေ။ သူ၏ ဘယ်လက်တွင် အလင်းဒိုင်းကာကို ကိုင်ဆောင်ထားပြီး၊ ညာလက်တွင် မီးတောက်များ တောက်လောင်နေ၏။ ခန္ဓာကိုယ်တစ်ခုလုံးကို ပျော့ပျောင်းသော အလင်းရောင်များ လွှမ်းခြုံထားပြီး၊ ခြေထောက်တစ်ဝိုက်တွင် လေပွေများ လှည့်ပတ်နေ၏။

"သိုင်းပညာ (၃) ခုစလုံးကို အဆင့်ကြီးအောင်မြင်မှု ရောက်အောင် ကျင့်ကြံထားတာလား... ရူးချင်စရာပဲ"

"သူက တကယ်ရော ချီစုစည်းခြင်း (၄) ဆင့်မြောက် တပည့် ဟုတ်ရဲ့လား"

"သူ့ကို ငါတို့ဂိုဏ်း ခေါ်ပြီး သိုင်းပညာသင်ပေးတဲ့ အကြီးအကဲ ခန့်လိုက်ချင်စမ်းပါဘိ"

ဂိုဏ်းအသီးသီးမှ တပည့်များ အုံးအုံးကျွက်ကျွက် ဖြစ်ကုန်ကြ၏။

"ဒီတပည့်က တကယ့် ပါရမီရှင်ပဲ... မြူခိုးဂိုဏ်းမှာ နေမယ့်အစား တခြားဂိုဏ်းတွေကို တိုက်ရိုက်တပည့် အနေနဲ့ ဝင်ရင်တောင် အလွယ်လေး ရနိုင်တယ်"

တာဝန်ခံကျိုး မျက်လုံးများ ပြူးကျယ်လျက် ထုတ်ဖော် ချီးကျူးလိုက်၏။

ထိုမြင်ကွင်းကို ကြည့်ရင်း စစ်ထိုက်ကျန် မျက်လုံးများ ကျဉ်းမြောင်းသွားရသည်။

"သိုင်းပညာ (၃) ခုစလုံး အဆင့်ကြီးအောင်မြင်မှု တဲ့လား"

"မင်း ဘာလုပ်နေတာလဲ... မြန်မြန် အပြတ်ရှင်းလိုက်စမ်း"

စင်အောက်မှ သွေးရောင်မြွေဂိုဏ်း ဂိုဏ်းချုပ် ကျောက်တာ့ကျန်း၏ စိတ်မရှည်သော အော်ဟစ်သံ ထွက်ပေါ်လာသည်။

ထိုအခါ၊ စစ်ထိုက်ကျန်သည် ကျယ်လောင်စွာ ကြုံးဝါးလိုက်ပြီး အဆင့်ကြီးအောင်မြင်မှု ရောက်ရှိနေသော မီးလျှံလှံရှည်ဖြင့် ထိုးစိုက်လိုက်၏။ သူ၏ ချီစုစည်းခြင်း (၅) ဆင့်မြောက် စွမ်းအားနှင့် ပေါင်းစပ်လိုက်သောအခါ ဟိုယွင်ကျဲ၏ 'သံမဏိဒိုင်းကာသိုင်း' သည် အဆင့်ကြီးအောင်မြင်မှု ရောက်နေလျှင်ပင် တားဆီးနိုင်မည် မဟုတ်ချေ။

သို့သော် ဟိုယွင်ကျဲသည် နလပိန်းတုံး မဟုတ်ပေ။

သူသည် အားချင်း ပြိုင်၍ ခုခံခြင်း မပြုဘဲ၊ အဆင့်ကြီး အောင်မြင်မှု 'လေဝိညာဉ် ခြေလှမ်းသိုင်း' ကို သုံး၍ ရှောင်တိမ်းလိုက်၏။ ထို့နောက် 'သံမဏိဒိုင်းကာသိုင်း' ဖြင့် မီးလျှံလှံရှည်ကို ပယ်ထုတ်လိုက်ပြီး၊ နောက်ဆုံးတွင် ပူပြင်းနေသော လက်ဝါးဖြင့် စစ်ထိုက်ကျန်၏ ရင်ဘတ်ကို ရိုက်ချလိုက်၏။

“ဘုန်း”

လှုပ်ရှားမှု အားလုံးသည် ရေစီးကမ်းပြိုသကဲ့သို့ တရစပ် ဖြစ်ပျက်သွားသဖြင့် စစ်ထိုက်ကျန်ခမျာ တုံ့ပြန်ချိန်ပင် မရလိုက်ပေ။

သို့သော် စစ်ထိုက်ကျန်သည်လည်း လွယ်လွယ်နှင့် အရှုံးပေးမည့်သူ မဟုတ်ချေ။

သူသည် မီးလျှံလှံရှည်ကို ကိုင်ဆောင်လျက် နေရာတွင်ပင် လည်ပတ်လိုက်ရာ ဒိုင်းကာတစ်ခု ဖြစ်ပေါ်လာပြီး ဟိုယွင်ကျဲ၏ လက်ဝါးရိုက်ချက်ကို "ဝုန်း" ခနဲ တွန်းထုတ်လိုက်၏။

နှစ်ယောက်စလုံး နောက်သို့ လွင့်စဉ်သွားကြသော်လည်း တိုက်ပွဲကို ဆက်လက် ဆင်နွှဲကြ၏။

ဟိုယွင်ကျဲသည် အဆင့်ကြီးအောင်မြင်မှု သိုင်းပညာ (၃) ခုကို ကျွမ်းကျင်စွာ အသုံးပြုလျက် စစ်ထိုက်ကျန်နှင့် အပြန်အလှန် တိုက်ခိုက်နေပြီး အချိန်ဆွဲထားနိုင်ခဲ့၏။

"ဟိုယွင်ကျဲက စစ်ထိုက်ကျန်နဲ့ ယှဉ်တိုက်နိုင်နေတာပဲ... မယုံနိုင်စရာပဲ"

ဂိုဏ်းအသီးသီးမှ တပည့်များ တအံ့တဩ ရေရွတ်သံများဖြင့် ရေရွတ်လိုက်ကြ၏။

အနီးအနားရှိ တောင်တန်းများပေါ်တွင် ဂိုဏ်းပေါင်း တစ်ဒါဇင်ကျော် ရှိသော်လည်း၊ သွေးရောင်မြွေဂိုဏ်းမှာ အကျော်ကြားဆုံး မဟုတ်ခဲ့ပေ။ သို့သော် သွေးရောင်မြွေဂိုဏ်းမှ စစ်ထိုက်ကျန်ကိုမူ လူအများ သိကြ၏။

ထိုလူသည် ချီစုစည်းခြင်း (၅) ဆင့်မြောက်သို့ ရောက်ရှိနေသည်မှာ ကြာပြီဖြစ်ပြီး၊ ရိုင်းစိုင်းကြမ်းတမ်းကာ မောက်မာသူ တစ်ဦး ဖြစ်၏။ အနီးဝန်းကျင် ဒေသများရှိ လူငယ်မျိုးဆက်သစ်များအကြားတွင် ထိပ်တန်းစာရင်းဝင် တစ်ဦးလည်း ဖြစ်၏။

ရေပေါ်ဖြူမြို့တော် တစ်ခုလုံး အတိုင်းအတာဖြင့် ကြည့်လျှင်ပင် သူ့ကို ပါရမီရှင်တစ်ဦးဟု သတ်မှတ်ထားကြ၏။

သို့သော် ယခုတွင်မူ... ထိုပါရမီရှင်သည် သူ့ထက် အဆင့်တစ်ဆင့် နိမ့်သော ဟိုယွင်ကျဲနှင့် သရေကျအောင်ပင် မနည်း တိုက်ခိုက်နေရသည် မဟုတ်ပါလော။

ဤအချက်က လူတိုင်းကို အံ့သြမှင်သက်သွားစေသည်။

"မြူခိုးဂိုဏ်း ရှုံးတော့မယ်"

ဂိုဏ်းတစ်ခုမှ ဂိုဏ်းချုပ်တစ်ယောက်က သက်ပြင်းချရင်း ပြောလိုက်၏။

သွေးရောင်မြွေဂိုဏ်း ဂိုဏ်းချုပ် ကျောက်တာ့ကျန်းကမူ အောင်နိုင်သူအပြုံးဖြင့် ရယ်မောနေ၏။

ပွဲစီစဉ်သူ တာဝန်ခံကျိုးလည်း ခေါင်းကို အသာအယာ ခါယမ်းလိုက်မိ၏။

သူတို့အားလုံး ဟိုယွင်ကျဲ အပေါ် မျှော်လင့်ချက် မထားကြတော့သည်မှာ ထင်ရှားလှသည်။

"ဘာလို့လဲဗျ"

တပည့် တစ်ယောက်က သတ္တိမွေးပြီး မေးလိုက်၏။

"ဟိုယွင်ကျဲက ချီစုစည်းခြင်း (၄) ဆင့်မြောက်ပဲ ရှိသေးတော့ မူလကတည်းက အားနည်းချက် ရှိနေပြီးသား... အခု သူက သိုင်းပညာ (၃) ခုကို တစ်ပြိုင်နက်တည်း ထုတ်သုံးနေရတာ... စစ်ထိုက်ကျန်ကို ထိန်းထားနိုင်တယ် ဆိုပေမဲ့ စွမ်းအင်ကုန်ခမ်းမှုက အရမ်း များလွန်းတယ်... သူ ကြာကြာ တောင့်ခံနိုင်မှာ မဟုတ်ဘူး"

ယခင်က ဂိုဏ်းချုပ်က ရှင်းပြလိုက်၏။

"ဪ... ဒါကြောင့်ကိုး"

ဂိုဏ်းအသီးသီးမှ တပည့်များ သဘောပေါက်သွားကြ၏။

စစ်ထိုက်ကျန်၏ အသက်ရှုသံမှာ ပုံမှန်ဖြစ်နေသော်လည်း၊ ဟိုယွင်ကျဲ၏ မျက်နှာမှာမူ ဖြူဖျော့စ ပြုလာသည်ကို သူတို့ သတိထားမိလိုက်ကြ၏။

ဟိုယွင်ကျဲ ကြာကြာ တောင့်ခံနိုင်တော့မည် မဟုတ်ပေ။

"ဒုတိယ အစ်ကိုကြီး ယှဉ်နိုင်မယ့်ပုံ မပေါ်တော့ဘူး... ဘယ်လို လုပ်ကြမလဲ" လီကျောက်ကျောက်မှာ စိုးရိမ်လွန်းသဖြင့် ငိုမဲ့မဲ့ ဖြစ်နေရှာသည်။

"ဒုတိယညီလေး... မင်း အရှုံးပေးလို့ မဖြစ်ဘူးနော်"

ရှီလေ့သည် လက်သီးကို ကျစ်ကျစ်ပါအောင် ဆုပ်ထားပြီး စင်ပေါ်တက်၍ ကူညီချင်စိတ်များ ပေါ်ပေါက်နေမိ၏။

ယဲ့ဖုန်းသည် စင်မြင့်ထက်မှ တိုက်ပွဲကို ကြည့်ရင်း အခြေအနေ မကောင်းတော့သည်ကို ရိပ်မိလိုက်၏။ သို့သော် ယခုအချိန်တွင် အရာအားလုံးသည် ဟိုယွင်ကျဲ၏ စွမ်းဆောင်ရည် အပေါ်တွင်သာ မူတည်နေပြီး အခြားသူများ ဝင်ရောက်စွက်ဖက်၍ မရနိုင်ပေ။

ဘေးပတ်ဝန်းကျင်ကို ကြည့်လိုက်သောအခါ အခြားဂိုဏ်းမှ တပည့်များစွာကလည်း ဟိုယွင်ကျဲအတွက် အားပေးအော်ဟစ်နေကြသည်ကို တွေ့လိုက်ရသည်။

မြူခိုးဂိုဏ်းမှာ လုံးဝ အထီးကျန်နေသည်တော့ မဟုတ်ပေ။

ရုတ်တရက်... ဂိုဏ်း၏ ဂုဏ်သတင်း အမှတ်များ တိုးတက်လာသည်ကို ယဲ့ဖုန်း သတိထားမိလိုက်၏။ မူလက "၅" သာ ရှိရာမှ "၇" သို့ တက်လာပြီး၊ တဖြည်းဖြည်းနှင့် "၁၀" ကို ကျော်လွန်သွားလေသည်။

ထိုအချိန်မှာပင်...

ဟိုယွင်ကျဲ၏ အရှိန်အဝါသည် ရုတ်တရက် သုံးပုံတစ်ပုံခန့် မြင့်တက်သွား၏။

အဆင့်တက်သွားပြီ...

သူသည် တိုက်ပွဲအတွင်းမှာပင် ချီစုစည်းခြင်း (၅) ဆင့်မြောက်သို့ ထိုးဖောက် ဝင်ရောက်သွားခဲ့ခြင်း ဖြစ်၏။

ချီပင်လယ်အတွင်းရှိ ဝိညာဉ်စွမ်းအင် ပမာဏ တိုးမလာသော်လည်း၊ သူ၏ ခွန်အားမှာ သုံးပုံတစ်ပုံခန့် တိုးတက်သွားခဲ့၏။

ဟိုယွင်ကျဲသည် မိမိ၏ အစွမ်းအစကို ဖုံးကွယ်မထားတော့ပေ။

သူသည် 'သံမဏိဒိုင်းကာသိုင်း' နှင့် 'လေဝိညာဉ်ခြေလှမ်းသိုင်း' တို့ကို ရုတ်သိမ်းလိုက်ပြီး၊ ကျန်ရှိနေသော ဝိညာဉ်စွမ်းအင် အားလုံးကို အသုံးပြုကာ အထွတ်အထိပ်အဆင့်သို့ ရောက်ရှိနေသော 'မီးတိမ်တိုက်လက်ဝါးသိုင်း' ကို ထုတ်ဖော်လိုက်၏။ သူ၏ ရှေ့မှောက်တွင် လူတစ်ပိုင်းခန့် မြင့်မားသော မီးတောက်လက်ဝါးကြီး တစ်ခု ဖြစ်တည်လာလေတော့၏။

"အထွတ်အထိပ်အဆင့် သိုင်းပညာ ဟုတ်လား"

စစ်ထိုက်ကျန် လန့်ဖျပ်သွားပြီး 'မီးလျှံလှံရှည်သိုင်း' ဖြင့် အလျင်အမြန် ကာကွယ်လိုက်သော်လည်း၊ ပူပြင်းတောက်လောင်နေသော မီးနံရံကြီး တစ်ခုနှင့် ဝင်တိုက်မိသလို ခံစားလိုက်ရပြီး ပြင်းထန်စွာ နာကျင်မှုကို ခံစားရင်း စင်မြင့်အပြင်ဘက်သို့ လွင့်စင်ကျသွားလေတော့၏။

သူ့ဘေးပတ်လည်တွင် မီးတောက်များ ပြန့်ကျဲနေ၏။

ထိုအရာများမှာ 'မီးလျှံလှံရှည်သိုင်း' ပျက်စီးသွားပြီး လွင့်စင်လာသော အပိုင်းအစများပင် ဖြစ်လေသည်။

"မြူခိုးဂိုဏ်း... နိုင်သွားပြီလား"

ထိုမြင်ကွင်းကို မျက်ဝါးထင်ထင် တွေ့မြင်လိုက်ရသူတိုင်း တအံ့တဩ ဖြစ်ကုန်ကြတော့၏။