ဂိုဏ်းဂုဏ်သတင်း၏ ထူးဆန်းသော စွမ်းပကား

~ယဲ့ဖုန်း တစ်ယောက် မှင်သက်သွားရရှာသည်။

ဟိုယွင်ကျဲ ဘာကြောင့် ရုတ်တရက် အဆင့်တက်သွားသည်ကို သူ နားမလည်နိုင်အောင် ဖြစ်နေရသည်။

[ ဂိုဏ်းဂုဏ်သတင်း - ၁၅ ]

ထိုစာတန်းလေး သူ့မျက်စိရှေ့တွင် ပေါ်လာသောအခါမှ ယဲ့ဖုန်း သဘောပေါက်သွားပြီး အတွေးများ နက်ရှိုင်းသွားရသည်။

ဟိုယွင်ကျဲက စစ်ထိုက်ကျန်ကို အသာစီးရသွားပြီး၊ တခြားဂိုဏ်းမှ တပည့်များက အားပေးလာကြသည့် အချိန်မှစ၍ ဂိုဏ်းဂုဏ်သတင်း အမှတ်များ တဖြည်းဖြည်း တက်လာခဲ့ခြင်း ဖြစ်၏။

ဂိုဏ်းဂုဏ်သတင်း အမှတ် (၁၀) ကို ကျော်လွန်သွားချိန်တွင် ဟိုယွင်ကျဲ၏ ကျင့်ကြံခြင်း အဆင့်သည်လည်း ထိုးဖောက် တက်ရောက်သွားခဲ့၏။

ဤအချက်က ယဲ့ဖုန်းကို အရဲကိုးသော ယူဆချက်များ ဖြစ်ပေါ်လာစေသည်။

'ဂုဏ်သတင်း အမှတ်တွေက တပည့်တွေကို အဆင့်တက်စေတာများလား'

'ဒါမှမဟုတ် ဂုဏ်သတင်းအမှတ်တွေက ဂိုဏ်းကို ပိုပြီး ကျော်ကြားလာစေတယ်... ကံကောင်းခြင်းတွေ ယူဆောင်လာပေးတယ် ဆိုတဲ့ သဘောလား'

ယဲ့ဖုန်း၏ ခေါင်းထဲတွင် မေးခွန်းပေါင်းများစွာ ပြည့်နှက်နေ၏။

"တီ... ဂိုဏ်းဂုဏ်သတင်း တန်ဖိုးဆိုတာ ဂိုဏ်းရဲ့ ကျော်ကြားမှု အတိုင်းအတာကို ကိုယ်စားပြုသလို၊ ဂိုဏ်းရဲ့ ကံတရား သင်္ကေတ တစ်ခုလည်း ဖြစ်ပါတယ်... လူတစ်ယောက်က သင့်ဂိုဏ်းကို အသိအမှတ်ပြုလိုက်တိုင်း ဂိုဏ်းဂုဏ်သတင်း တန်ဖိုး +၁ တိုးလာပါမယ်... ဂုဏ်သတင်း တန်ဖိုး မြင့်လေလေ၊ ဂိုဏ်းရဲ့ ကံတရားနဲ့ ကျော်ကြားမှုက ပိုအားကောင်းလာလေလေ ဖြစ်ပြီး၊ တပည့်တွေဆီကိုလည်း ကံကောင်းခြင်းတွေ ပိုမို ဖြန့်ဝေပေးနိုင်လေလေ ဖြစ်ပါတယ်"

စနစ်က ရုတ်တရက် ဝင်ရောက် ရှင်းပြလိုက်သဖြင့် ယဲ့ဖုန်း လန့်ဖျပ်သွားရသည်။

သို့သော် ရှင်းပြချက်ကို ကြားပြီးနောက် သူ နောက်ဆုံးတွင် နားလည်သဘောပေါက်သွားလေသည်။

'ဂုဏ်သတင်း တန်ဖိုးက ကံတရားကို ကိုယ်စားပြုတယ် ဆိုရင်... ဒီတန်ဖိုး (၁၀) ကို ကျော်သွားတဲ့အချိန်မှာ အတိုင်းအတာ တစ်ခုကို ကျော်ဖြတ်သွားသလို ဖြစ်မယ်၊ အဲ့အခါမှာ၊ ဟိုယွင်ကျဲရဲ့ ကျင့်ကြံခြင်း အဆင့်တက်ဖို့ အဟန့်အတား လျော့ရဲသွားပြီးတော့ ချီစုစည်းခြင်း (၅) ဆင့်မြောက်ကို ချက်ချင်း တက်လှမ်းနိုင်ခဲ့တာ ဖြစ်မယ်'

'ဒါဆိုရင် ငါက မြူခိုးဂိုဏ်းကို လူသိများအောင်၊ အသိအမှတ်ပြုခံရအောင် ကြိုးစားပြီး ဂုဏ်သတင်း တန်ဖိုးတွေကို အမြဲတမ်း မြှင့်တင်နေရမှာပေါ့... ဒါမှ တပည့်တွေက ကံကောင်းခြင်း အထောက်အပံ့တွေ ရရှိပြီး ကျင့်ကြံရတာ ပိုလွယ်ကူလာမှာ'

ယဲ့ဖုန်းသည် ဂိုဏ်းဂုဏ်သတင်းနှင့် ပတ်သက်သော အချက်အလက်များကို ခေါင်းထဲတွင် စနစ်တကျ မှတ်သားလိုက်၏။

ထိုအချိန်တွင်... ခေတ္တမျှ တိတ်ဆိတ်ငြိမ်သက်နေသော လူအုပ်ကြီးသည် ဗြုန်းစားကြီး ဆူညံပွက်လောရိုက်လာကြ၏။

"ဟိုယွင်ကျဲက တိုက်ပွဲထဲမှာတင် ချီစုစည်းခြင်း (၅) ဆင့်မြောက်ကို ရောက်သွားတာလား... ပြီးတော့ အထွတ်အထိပ်အဆင့် 'မီးတိမ်တိုက်လက်ဝါးသိုင်း' ကိုပါ ထုတ်သုံးလိုက်သေးတယ်... ကြောက်စရာကြီးကွာ"

"သူ့ကံတရားက ဘာလို့ ဒီလောက်တောင် ကောင်းနေရတာလဲ... တကယ်လို့သာ တိုက်ပွဲထဲမှာ အဆင့်မတက်ခဲ့ရင် သေချာပေါက် ရှုံးသွားမှာ"

"ကြည့်ရတာ မြူခိုးဂိုဏ်းရဲ့ ကံကြမ္မာက မကုန်ဆုံးသေးဘူး ထင်ပါရဲ့"

ဂိုဏ်းချုပ်များ အားလုံး တီးတိုး ဝေဖန်နေကြ၏။

"မြူခိုးဂိုဏ်းက တပည့် (၃) ယောက်စလုံးက လူထူးဆန်းတွေချည်းပါပဲလား"

တာဝန်ခံကျိုးလည်း နေရာတွင်ပင် ကြောင်ငေးနေမိ၏။

သူသည် သိုင်းပညာပေါင်းများစွာကို ကျင့်ကြံခဲ့ဖူးပြီး၊ အချို့ကို အထွတ်အထိပ်အဆင့်အထိ တတ်မြောက်ထားသူ ဖြစ်၏။

သို့သော် သူသည် ချီစုစည်းခြင်း (၉) ဆင့်မြောက် အထွတ်အထိပ်သို့ ရောက်ရှိနေပြီး၊ ဓာတ်ကြီးလေးပါး စုစည်းခြင်း အဆင့်သို့ ရောက်ရန် ခြေတစ်လှမ်းသာ လိုတော့သည့် ဝါရင့် ကျင့်ကြံသူကြီးတစ်ဦး ဖြစ်၏။

ဟိုယွင်ကျဲကမူ ယခုမှ ချီစုစည်းခြင်း (၅) ဆင့်မြောက်သို့ ရောက်ရှိလာသူမျှသာ။

"ဒီဂိုဏ်းမှာ လျှို့ဝှက်ချက်တွေ ရှိနေတယ်"

တာဝန်ခံကျိုးသည် ယဲ့ဖုန်းကို အဓိပ္ပာယ်ပါပါ လှမ်းကြည့်လိုက်၏။

"ဒါပေမယ့် လက်ရှိ စွမ်းဆောင်ရည်အရ ကြည့်မယ်ဆိုရင်... မြူခိုးဂိုဏ်း တပည့်တွေက သိုင်းပညာ တတ်မြောက်မှုမှာပဲ ထူးချွန်ကြတာ... ကျင့်ကြံခြင်း အဆင့်ကတော့ သာမန်ပါပဲ"

ရေပေါ်ဖြူမြို့တော်၏ တာဝန်ခံတစ်ဦး အနေဖြင့် သူသည် ဗဟုသုတ နှံ့စပ်သူ ဖြစ်၏။ အသက် ၁၀ နှစ်ကျော်ကျော်ဖြင့် ချီစုစည်းခြင်း (၉) ဆင့်မြောက် ရောက်ရှိနေသော ပါရမီရှင်များအကြောင်းကိုပင် ကြားဖူးနားဝ ရှိခဲ့သဖြင့်၊ ယခု အဖြစ်အပျက်ကို ခေတ္တမျှသာ အံ့သြမိခြင်း ဖြစ်၏။

အခြားတစ်ဖက်တွင်မူ...

သွေးရောင်မြွေဂိုဏ်း ဂိုဏ်းချုပ် ကျောက်တာ့ကျန်းမှာ ဒေါသအိုး ပေါက်ကွဲနေတော့၏။

"တိုက်ပွဲထဲမှာ အဆင့်တက်သွားတာက ထားပါတော့... သိုင်းပညာကို အထွတ်အထိပ်အဆင့် ရောက်အောင် ကျင့်ကြံထားတယ် ဆိုတာကတော့ လွန်လွန်းတယ်... သူတို့ မသမာတဲ့ နည်းလမ်းတွေ သုံးထားတာ သေချာတယ်"

ကျောက်တာ့ကျန်းသည် ဒေါသထွက်လွန်းသဖြင့် ဘီးတပ်ကုလားထိုင်ကို ရိုက်ချလိုက်ပြီး မတ်တပ်ရပ်ကာ အသံကျယ်ကြီးဖြင့် ဆဲဆိုကြိမ်းမောင်းလိုက်၏။

"ခင်ဗျားက ကျုပ်ကို သံသယ ဝင်နေတာလား"

တာဝန်ခံကျိုးက သူ့အား အေးစက်စွာ ပြန်ကြည့်လိုက်၏။ တစ်ဆက်တည်း၌ ချီစုစည်းခြင်း (၉) ဆင့်မြောက် အထွတ်အထိပ် အရှိန်အဝါကို ထုတ်လွှတ်လိုက်ရာ ချီစုစည်းခြင်း (၇) ဆင့်မြောက်သာ ရှိသော ကျောက်တာ့ကျန်းမှာ ဖိအားကြောင့် အသက်ရှုပင် ရပ်တန့်မတတ် ဖြစ်သွားရသည်။

"မဟုတ်... မဟုတ်ရပါဘူးဗျာ"

ကျောက်တာ့ကျန်းသည် စကားမှားသွားမှန်း သိလိုက်ပြီး တာဝန်ခံကျိုး အငြိုးထားမည်ကို စိုးရိမ်သဖြင့် ကပျာကယာ တောင်းပန်လိုက်ရသည်။

တာဝန်ခံကျိုးက နှာခေါင်းတစ်ချက် ရှုံ့လိုက်ပြီး မြေကြီးပေါ်တွင် မလှုပ်မယှက် လဲနေသော စစ်ထိုက်ကျန်ကို ကြည့်ကာ ရှုံးနိမ့်ကြောင်း အတည်ပြုလိုက်၏။ ထို့နောက် ကြေညာလိုက်၏။

"တတိယပွဲကို မြူခိုးဂိုဏ်းက ဟိုယွင်ကျဲ အနိုင်ရရှိပါတယ်... ဂိုဏ်းနှစ်ခုကြား တိုက်ပွဲရလဒ်ကတော့ မြူခိုးဂိုဏ်းက (၂) ပွဲရှုံး (၃) ပွဲနိုင်နဲ့ အလုံးစုံ အနိုင်ရရှိသွားပါတယ်"

ပြောရင်းနှင့် တာဝန်ခံကျိုးသည် ကျောက်တာ့ကျန်းဘက်သို့ လက်ဖြန့်လိုက်၏။

"ဂိုဏ်းချုပ်ကျောက်... ခင်ဗျားဂိုဏ်းရဲ့ ပိုင်ဆိုင်မှု စာချုပ်ကို ပေးပါ"

ကျောက်တာ့ကျန်း၏ မျက်နှာမှာ သွေးဆုတ်ပြီး ဖြူဖျော့သွား၏။

ကျောက်တာ့ကျန်း မငြင်းဆန်ရဲပေ။

ငြင်းဆန်ခြင်းသည် ရေပေါ်ဖြူမြို့တော်ကို ဆန့်ကျင်ခြင်း မည်ရာ ရလဒ်ကောင်း ထွက်လာမည် မဟုတ်ချေ။

"ရော့... ယူသွား"

ကျောက်တာ့ကျန်းသည် ဒေါသကြောင့် ပြာနှမ်းနေသော မျက်နှာထားဖြင့် စာချုပ်တစ်ခုကို တာဝန်ခံကျိုးထံ ပေးအပ်လိုက်၏။ ထို့နောက် ဘီးတပ်ကုလားထိုင်ကိုပင် ပြန်မယူတော့ဘဲ ဓားပျံစီးကာ ကောင်းကင်ယံသို့ ပျံတက် ထွက်ခွာသွားလေတော့၏။

"သွေးရောင်မြွေဂိုဏ်း ဂိုဏ်းချုပ်က တကယ် ဒုက္ခိတ မဟုတ်ဘူးပဲ"

ယဲ့ဖုန်း ရုတ်တရက် သဘောပေါက်သွား၏။

"ကျောက်တာ့ကျန်းက ဒုက္ခိတ မဟုတ်ပါဘူး... ဘီးတပ်ကုလားထိုင်ပေါ် ထိုင်နေတာက ဟန်ပြသက်သက်ပါ"

တာဝန်ခံကျိုးက လျှောက်လာပြီး သွေးရောင်မြွေဂိုဏ်း၏ ပိုင်ဆိုင်မှု စာချုပ်ကို ယဲ့ဖုန်းအား ကမ်းပေးလိုက်၏။

"ဂိုဏ်းချုပ်ယဲ့... ဒီပစ္စည်းက ခင်ဗျားတို့ ပိုင်သွားပါပြီ"

ယဲ့ဖုန်း စာချုပ်ကို ယူလိုက်သော်လည်း စိတ်ထဲတွင် အနည်းငယ် ဝေခွဲမရ ဖြစ်နေ၏။

သွေးရောင်မြွေဂိုဏ်း၏ တည်နေရာသည် ဤနေရာမှ မိုင်အနည်းငယ် ဝေးကွာသဖြင့် ရယူလိုက်လျှင်လည်း အသုံးပြုရန် အဆင်မပြေလှပေ။

"အကယ်၍ ဂိုဏ်းချုပ်ယဲ့ အနေနဲ့ သွေးရောင်မြွေဂိုဏ်းရဲ့ နယ်မြေကို မလိုအပ်ဘူး ဆိုရင်... မြို့စားမင်းအိမ်တော်ကို ပြန်လည် ရောင်းချလို့ ရပါတယ်... လျော်ကြေးအနေနဲ့ အဆင့်နိမ့် ဝိညာဉ်ကျောက်တုံး (၁၀၀) နဲ့ 'ဝိညာဉ်မျက်လုံးဆေးရည်'(၁၀) ပုလင်း ပေးပါမယ်"

ယဲ့ဖုန်း တွန့်ဆုတ်နေသည်ကို မြင်သောအခါ တာဝန်ခံကျိုးက ထပ်ဖြည့်ပြောလိုက်၏။

"ဂိုဏ်းချုပ်ဦးလေး... ကျွန်တော်... ကျွန်တော် နိုင်ခဲ့ပြီ"

ထိုအချိန်တွင် ဟိုယွင်ကျဲသည် စင်မြင့်ပေါ်မှ ဆင်းလာသည်။ အားကုန်ထုတ်ထားရသဖြင့် သူ၏ မျက်နှာမှာ အနည်းငယ် ဖြူဖျော့နေရှာသည်။

ယဲ့ဖုန်းသည် တပည့် (၃) ယောက်ဖြစ်သော ရှီလေ့၊ ဟိုယွင်ကျဲ နှင့် လီကျောက်ကျောက် တို့ကို တစ်လှည့်၊ တာဝန်ခံကျိုးကို တစ်လှည့် ကြည့်လိုက်ပြီး ပြောလိုက်၏။

"ဒီဂိုဏ်းပိုင်ဆိုင်မှု စာချုပ်ကို ဘာလုပ်မလဲ ဆိုတဲ့ ဆုံးဖြတ်ခွင့်ကို... ကျွန်တော် ဒီတပည့် (၃) ယောက်ကိုပဲ ပေးလိုက်ပါမယ်... ဘာပဲဖြစ်ဖြစ် ဒါက သူတို့ ကိုယ်တိုင် ကြိုးစားပြီး ရယူခဲ့တာပဲလေ"

ထိုစကားကို ကြားလိုက်ရသောအခါ တပည့် (၃) ယောက်စလုံး ရင်ထဲတွင် ထိရှသွားရသည်။

အခြားဂိုဏ်းမှ တပည့်များမှာမူ အားကျသော မျက်လုံးများဖြင့် ကြည့်နေကြ၏။

ဂိုဏ်းပိုင်ဆိုင်မှု စာချုပ်ဆိုသည်မှာ ဂိုဏ်းတစ်ခုအတွက် အရေးအကြီးဆုံး အရာများထဲမှ တစ်ခုပင် ဖြစ်သည် မဟုတ်ပါလော။

ယဲ့ဖုန်းက ထိုကဲ့သို့ အရေးကြီးသော ကိစ္စကို တပည့်များအား ဆုံးဖြတ်ခွင့် ပေးလိုက်ခြင်းသည် တပည့်တို့ကို မည်မျှ ယုံကြည်ပြီး တန်ဖိုးထားကြောင်း ပြသလိုက်ခြင်းပင် ဖြစ်ရာ၊ အားလုံးက မနာလို ဖြစ်ကုန်ကြ၏။

တာဝန်ခံကျိုးလည်း အံ့သြသွားသော်လည်း ကန့်ကွက်ခြင်း မပြုပေ။

"ဂိုဏ်းချုပ်ဦးလေး... ကျွန်တော်တို့မှာ ဒီလောက် အရေးကြီးတဲ့ ကိစ္စကို ဆုံးဖြတ်ဖို့ အရည်အချင်း မရှိပါဘူး"

တပည့် (၃) ယောက်စလုံး ခေါင်းခါ ငြင်းဆန်လိုက်ကြ၏။

ယဲ့ဖုန်းသည် ပန်ဒါ မျက်ကွင်းညိုကြီးများဖြင့် သူတို့ကို ရှုတည်တည် ကြည့်လိုက်ပြီး ဆူပူလိုက်၏။

"ငါက ဂိုဏ်းချုပ်ကွ... ငါက မင်းတို့ကို ဆုံးဖြတ်ခိုင်းရင် မြန်မြန်သာ ဆုံးဖြတ်လိုက်စမ်းပါ"

တပည့်များမှာ ထိုစကားကြောင့် ပိုမို ကြည်နူးသွားကြ၏။

ခေတ္တမျှ တိုင်ပင်ပြီးနောက်၊ သူတို့သည် စာချုပ်ကို တာဝန်ခံကျိုး ကမ်းလှမ်းထားသော ကျင့်ကြံခြင်း အထောက်အကူပြု ပစ္စည်းများဖြင့် လဲလှယ်ရန် တညီတညွတ်တည်း ဆုံးဖြတ်လိုက်ကြ၏။

"ဒီပစ္စည်းတွေ ခင်ဗျားတို့ ရပါပြီ"

တာဝန်ခံကျိုးသည် သွေးရောင်မြွေဂိုဏ်း၏ စာချုပ်ကို ပြန်ယူလိုက်ပြီး၊ သစ်သားသေတ္တာတစ်လုံးကို မြေကြီးပေါ်တွင် ချထားပေးလိုက်၏။ ထို့နောက် သူ၏ နောက်လိုက်နှစ်ယောက်နှင့်အတူ ဓားပျံပေါ် တက်ကာ ကောင်းကင်ယံသို့ ပျံသန်း ထွက်ခွာသွားလေသည်။

"ဂိုဏ်းချုပ်ယဲ့... ခင်ဗျားတို့ဂိုဏ်း ဒီထက်မက တိုးတက်ပါစေဗျာ"

တာဝန်ခံကျိုး၏ အသံသည် အဝေးမှ ပဲ့တင်ထပ်ကာ ကြားလိုက်ရသည်။

"ဂုဏ်ပြုပါတယ်... ဂိုဏ်းချုပ်ယဲ့"

"ဂိုဏ်းချုပ်ယဲ့... အားတဲ့အချိန်ကျရင် တပည့်တွေကို အချင်းချင်း ပညာဖလှယ်ခိုင်းရအောင်ဗျာ"

"ဂိုဏ်းချုပ်ယဲ့... မိန်းမ လိုချင်လား... ကျုပ်သူငယ်ချင်းတစ်ယောက်မှာ ခင်ဗျားနဲ့ရွယ်တူ သမီးတစ်ယောက် ရှိတယ်... နည်းနည်းတော့ ဝတာပေါ့ဗျာ... ပေါင် (၃၀၀) လောက်ပဲ ရှိတာပါ"

ထိုသို့၊ အခြားဂိုဏ်းချုပ်များလည်း အနားသို့ ရောက်လာပြီး ဖော်ရွေသော အပြုံးများဖြင့် ဂုဏ်ပြုစကား ဆိုကြ၏။

မြူခိုးဂိုဏ်း တပည့်များ မည်ကဲ့သို့ သိုင်းပညာများကို အထွတ်အထိပ်ရောက်အောင် ကျင့်ကြံနိုင်ခဲ့သည်ကို သူတို့ မသိကြသော်လည်း၊ မြူခိုးဂိုဏ်းသည် နာမည်တစ်ခု ရရှိသွားပြီ ဖြစ်ရာ ယဲ့ဖုန်းနှင့် ဆက်ဆံရေးကောင်း တည်ဆောက်ထားသင့်သည်ဟု ယူဆလိုက်ကြခြင်း ဖြစ်၏။

"စေတနာကို ကျေးဇူးတင်ပါတယ်ဗျာ... ဂိုဏ်းမှာ လုပ်စရာ ကိစ္စလေးတွေ ရှိသေးလို့ ဧည့်မခံနိုင်တာ ခွင့်လွှတ်ပေးကြပါ"

ယဲ့ဖုန်းသည် လက်သီးဆုပ်ကာ အားလုံးကို နှုတ်ဆက်လိုက်၏။ သူ့စိတ်ထဲတွင်မူ ရရှိထားသော ဝိညာဉ်ကျောက်တုံးများနှင့် ဝိညာဉ်မျက်လုံးဆေးရည်များကို အသုံးပြုချင်စိတ်က တဖွားဖွား ဖြစ်ပေါ်နေတော့၏။

"နောက်မှ တွေ့ကြတာပေါ့... ဂိုဏ်းချုပ်ယဲ့"

ဂိုဏ်းချုပ်များကလည်း ယဲ့ဖုန်း ဧည့်သည်ပြန်လွှတ်နေကြောင်း သဘောပေါက်သဖြင့် လက်သီးပြန်ဆုပ်ကာ နှုတ်ဆက်ပြီး တပည့်များကို ခေါ်လျက် ထွက်ခွာသွားကြလေသည်။

ထိုအချိန်တွင် ဂိုဏ်းဂုဏ်သတင်း တန်ဖိုး ဆက်လက် မြင့်တက်လာပြီး (၂၀) ကျော်သွားသည်ကို ယဲ့ဖုန်း သတိထားမိလိုက်၏။

ဆိုလိုသည်မှာ လူ (၂၀) ကျော်က မြူခိုးဂိုဏ်းကို အသိအမှတ် ပြုလိုက်ခြင်းပင်။ ထွက်ခွာသွားသော ဂိုဏ်းချုပ်များထဲမှ အချို့သည် ဟန်ဆောင်ယဉ်ကျေးပြခြင်း မဟုတ်ဘဲ တကယ်တမ်း အသိအမှတ်ပြုသွားကြသည်မှာ ထင်ရှားသည်။

‘အစတုန်းက ဂိုဏ်းထဲမှာ ငါတို့ (၄) ယောက်ပဲ ရှိတာဆိုတော့ ဂုဏ်သတင်းက (၅) ဖြစ်နေတယ်... ဒါဆိုရင် ပိုနေတဲ့ (၁) မှတ်က ဘယ်သူ့ဆီကလဲ’

ယဲ့ဖုန်းသည် တစ်ကြိမ်သာ တွေ့ဖူးခဲ့သော ပဉ္စမတပည့် ရှုဟုန်ယွီ ကို သတိရလိုက်၏။

သူမက အတွေ့အကြုံ ရှာဖွေရန် ထွက်ခွာသွားသည်ဟု ပြောပြီး ပြန်မလာသေးပေ။

‘ရှုဟုန်ယွီက မြူခိုးဂိုဏ်းကို အသိအမှတ်ပြုထားသေးတယ် ဆိုရင်... နောင်တစ်ချိန်ကျရင် ပြန်လာလောက်ပါတယ်’

ဟု ယဲ့ဖုန်း တွေးတောလိုက်မိ၏။

"ဝိုးးးး"

ထိုအချိန်တွင် တပည့် (၃) ယောက်၏ တအံ့တဩ အော်ဟစ်သံများကို ကြားလိုက်ရသည်။

အသံလာရာသို့ လှမ်းကြည့်လိုက်သောအခါ မြေကြီးပေါ်တွင် ချထားသော သေတ္တာပွင့်နေသည်ကို တွေ့လိုက်ရသည်။

သေတ္တာထဲတွင်...

စနစ်တကျ စီထားသော လေးထောင့်ပုံစံ ကျောက်စိမ်းတုံးလေးများ ရှိနေပြီး၊ ဝိညာဉ်စွမ်းအင်များ တောက်ပနေကာ အလွန် ဆွဲဆောင်မှု ရှိလှပေသည်။