အခန်း (၁၃၆)

ပထမဆုံး ရွေးချယ်ပွဲစိန်ခေါ်မှုက အလျင်အမြန်ပဲ ပြီးဆုံးသွားပြီး ရလဒ်တွေကိုလည်း ကြေညာလိုက်ပါတယ်။

ချန်ဆန်းရှီကတော့ သံသယဖြစ်စရာမလိုဘဲ အဆင့် 'A' ရရှိခဲ့ပါတယ်။ သူ့အပြင် နန်းတွင်းတပ်မတော်က ချောင်ဖန်၊ လုရှုဟွာ နဲ့ တခြားသူအချို့လည်း အဆင့် 'A' ရကြပါတယ်။ ဒါပေမဲ့ ကျင့်စဉ်အဆင့်မြင့်ပေမဲ့ တပ်ကွပ်ကဲမှု ညံ့ဖျင်းတဲ့ ယန်ပြည်နယ်က 'ကျဲ့စီရှု' လို ပါရမီရှင်မျိုးကျတော့ အဆင့် 'C' ပဲ ရခဲ့ပြီး ဗိုလ်ချုပ်လောင်းစာရင်းကနေ ထက်ဝက်နီးပါး ပြုတ်သွားခဲ့ရပါတယ်။

"သူ တကယ်မှန်တာပဲဟ"

ဝမ်ချိုးရှီက ကြေညာချက်ကို နားထောင်ရင်း အံ့သြတကြီး ပြောလိုက်သည်။ "ဟို ချန်ဆိုတဲ့ကောင်က ဒီအဆင့်မှာ အဆင့် 'A' တကယ်ရသွားတာပဲ"

"ဒါရလို့ရော ဘာထူးမှာလဲ"

ယင်ဟန်ဝမ်ကတော့ ဒဏ်ရာတွေ ပြန်ပွင့်လာလို့ မျက်နှာက သေလူလို ဖြူဖတ်ဖြူလျော် ဖြစ်နေပေမဲ့ မာန်မလျှော့သေးပါဘူး "ဒါက စမ်းသပ်မှုတစ်ခုတည်းမှ မဟုတ်တာ"

ချောင်ဖန်ကတော့ ဒုတိယအဆင့်အတွက် ပြင်ဆင်နေတဲ့ စစ်ကွင်းကြီးကို ခက်ထန်တဲ့ မျက်လုံးတွေနဲ့ စိုက်ကြည့်နေပါတယ်။

နာရီဝက်ခန့် အနားယူပြီးနောက်...

ဒုတိယမြောက် စိန်ခေါ်မှုဖြစ်တဲ့ "စစ်ဗျူဟာကို ထိုးဖောက်ခြင်း" စတင်ပါတော့တယ်။

လီချန်ကျုံးက အသံကိုမြှင့်ပြီး စည်းကမ်းတွေကို ကြေညာလိုက်ပါတယ်။ "နောက်တစ်ဆင့်မှာတော့ တပ်စခန်းရှစ်ခုက စစ်သည်အင်အား လေးသောင်း (၄၀,၀၀၀) ကို သုံးပြီး စစ်ကွင်းထဲမှာ 'ကိုးပြည်ထောင်ရှစ်ကွက် စစ်ဗျူဟာ' ကို ခင်းကျင်းထားမှာ ဖြစ်ပါတယ်။ မင်းတို့ရဲ့ ရည်မှန်းချက်က အဲဒီစစ်ကြောင်းထဲကို ဝင်ပြီး အမြန်ဆုံး အချိန်အတွင်းမှာ ပြန်ထွက်လာဖို့ပဲ"

"စစ်သည်အင်အား အများကြီးဆိုတော့ လန့်သွားကြပြီလား"

"မကြောက်ကြပါနဲ့ ဒီအဆင့်က မင်းတို့ကို ရန်သူအင်အား အလုံးအရင်းနဲ့ ဝိုင်းထားတဲ့အခါ ဘယ်လိုတုံ့ပြန်မလဲ ၊ ကိုယ့်တပ်ကို ဘယ်လို စုစည်းမလဲနဲ့ စစ်ကြောင်းကို နားလည်ပြီး လွတ်မြောက်ရာလမ်းကို ဘယ်လိုရှာမလဲဆိုတာ စမ်းသပ်တာပါ။ စစ်ကြောင်းထဲက စစ်သည်တွေက မင်းတို့ကို အသေသတ်မှာမဟုတ်ဘဲ အရှင်ဖမ်းဖို့ပဲ ကြိုးစားကြမှာပါ။ လူအင်အား များလွန်းတာကြောင့် စစ်ကြောင်းထဲက အမြင့်ဆုံး တပ်သားက'အရိုးဖွဲ့စည်းခြင်း ပြီးပြည့်စုံခြင်း' အဆင့်ပဲ ရှိပါလိမ့်မယ်။ မင်းတို့နဲ့ အဆင့်တူတဲ့ 'အတွင်းအားသန့်စင်ခြင်း' အဆင့် တစ်ယောက်မှ မပါဘူး။ မင်းတို့ လုပ်ရမှာက ထွက်ပေါက်ကို ရှာပြီး ထိုးဖောက်ဖို့ပဲ"

"အမွှေးတိုင် တစ်တိုင်စာ အချိန်အတွင်းမှာ ထွက်နိုင်ရင် အဆင့် 'A' သတ်မှတ်မယ်။ အမွှေးတိုင် တဝက်စာ နောက်ကျတိုင်း အဆင့်တစ်ဆင့်စီ လျော့သွားမယ်။ အရှင်ဖမ်းခံရရင်တော့ ဗိုလ်ချုပ် အဆင့် စစ်ဆေးမှုကနေ တိုက်ရိုက်ပြုတ်မှာဖြစ်ပြီး ဘေးကွင်းက ဗိုလ်ချုပ်ငယ် စစ်ဆေးမှုမှာပဲ ပါဝင်ခွင့်ရတော့မယ်။ စိတ်မပျက်ကြပါနဲ့၊ နောင်တစ်ချိန်မှာ စွမ်းဆောင်

ရည်ပြနိုင်ရင် ဗိုလ်ချုပ်ကြီး ပြန်ဖြစ်နိုင်ပါသေးတယ်"

"စစ်ကြောင်း အဆင်သင့်ဖြစ်ပြီ အရင်အတိုင်းပဲ နာမည်ခေါ်ပြီး စတင်

မယ်"

"ဆွေယုံဖိန် "

"ဝုန်း——"

လူလေးသောင်းရဲ့ ဟိန်းဟောက်သံနဲ့အတူ ခန့်ညားထည်ဝါလှတဲ့ စစ်ဗျူဟာကြီးဟာ အားလုံးရဲ့ ရှေ့မှာ ပေါ်လာပါတယ်။ အလံတွေက လေထဲမှာ တဖျတ်ဖျတ်လွင့်နေပြီး စစ်ဗုံသံတွေကလည်း ကောင်းကင်အထိ ဟည်းနေတာပဲ။ အပေါ်ကနေ ကြည့်မယ်ဆိုရင် ဒီစစ်ကြောင်းဟာ သက်ရှိ ရှစ်ကွက်စစ်တုရင်ကွက်ကြီး ရွေ့လျားနေသလိုပါပဲ။ စစ်သည်တွေရဲ့ ရွေ့လျားမှုက သဘာဝတရားရဲ့ နိယာမတွေနဲ့ ကိုက်ညီနေပြီး စစ်သည်တွေရဲ့ တိုက်ခိုက်ရေးစွမ်းအားကိုပါ မြှင့်တင်ပေးနိုင်တဲ့ အစွမ်းရှိပါတယ်။

'တကယ့်ကို ထူးခြားတဲ့ စစ်ဗျူဟာပဲ'

ဒီတစ်ခါတော့ အလုံပိတ်ကွင်း မဟုတ်တော့ဘဲ အပြင်ကနေ ကြည့်လို့ရပါတယ်။ ဒါပေမဲ့ 'ကိုးပြည်ထောင်ရှစ်ကွက် စစ်ဗျူဟာ' ဆိုတာ အမြဲတမ်း ပြောင်းလဲနေတဲ့ သက်ရှိစစ်ကြောင်း ဖြစ်တာကြောင့် အပြင်ကနေ ကြည့်ရုံနဲ့တော့ ဘာမှ နားလည်မှာမဟုတ်ပါဘူး။ ပြီးတော့ ရှေ့ဆုံးမှာ ရှစ်ပေမြင့်တဲ့ သံမဏိဒိုင်းလွှားကြီးတွေက ကာထားလို့ အတွင်းထဲက အခြေအနေကို ဘယ်လိုမှ မမြင်ရပါဘူး။

ပထမဆုံး ဆွေယုံဖိန် ဝင်သွားပါတယ်။ အမွှေးတိုင် တဝက်စာလောက် ကြာတဲ့အခါမှာတော့...

"ဆွေယုံဖိန်... အရှင်ဖမ်းခံရသဖြင့်၊ ပြုတ်"

အဲဒီနောက် ဝင်သွားတဲ့ ၈ ယောက်မှာလည်း ထက်ဝက်က အရှင်ဖမ်းခံရပြီး ကျန်တဲ့လူတွေလည်း အမြင့်ဆုံး အဆင့် 'B' ပဲ ရကြပါတယ်။ တစ်ယောက်မှ အဆင့် 'A' မရကြတဲ့အတွက် ဝင်ပြိုင်မယ့်လူတွေကြားမှာ စိုးရိမ်မှုတွေ တိုးလာပါတယ်။

"ယန်ပြည်နယ်က 'ချီလင်သားတော်' ကျဲ့စီရှုတောင်မှ အဆင့် 'B' ပဲ ရတယ်ဆိုတော့"

"ဒီစစ်ကြောင်းက လူတွေကို ဝါးမြိုနေသလိုပဲ၊ ဝင်သွားရင် ပြန်ထွက်မလာနိုင်တော့ဘူး"

"ဒီနှစ် ဘာလို့ ဒီလောက် ခက်နေရတာလဲ..."

ရွေးချယ်ပွဲရဲ့ ထိပ်တန်းပါရမီရှင်တွေဖြစ်တဲ့ လုရှုဟွာ၊ ချောင်ဖန် နဲ့ ယန်ချန်းချင်းတို့တောင် တင်းမာလာကြပါတယ်။ လူလေးသောင်းရဲ့ စစ်ကြောင်းဆိုတာ အရှင်ဖမ်းဖို့ပဲ လုပ်တာဆိုရင်တောင် တကယ်ကို ကြောက်စရာကောင်းတဲ့ အခက်အခဲပါ။

"ချန်ဆန်းရှီ "

ပြင်ဆင်ပြီးသားဖြစ်တဲ့ ချန်ဆန်းရှီဟာ ရှေ့ကို ထွက်လာပါတယ်။

"ဒါက မြင်း၊ ဒါက လက်နက်"

ဒီအဆင့်က အချိန်နဲ့ လုရတာဖြစ်လို့ မြင်းကောင်းဖို့က အရမ်းအရေးကြီးပါတယ်။ အရာရှိကြီးတွေရဲ့ သားသမီးတွေဆိုရင် 'ထူးဆန်းသားရဲ' မြင်းတွေကို စီးခွင့်ရနိုင်ပေမဲ့ တရားမျှတမှုရှိအောင် အားလုံးကို ကိုယ်ပိုင်မြင်း မစီးခိုင်းဘဲ စစ်တပ်ကပေးတဲ့ မြင်းကိုပဲ စီးခိုင်းပါတယ်။

ချန်ဆန်းရှီ ရရှိတဲ့မြင်းက မြင်းနက်တစ်ကောင်ပါ။ သူ့ရဲ့ 'ရှောင်ရှင်း' နဲ့တော့ မယှဉ်နိုင်ပေမဲ့ မြင်းကောင်းတစ်ကောင်လို့ ပြောလို့ရပါတယ်။ ပြီးတော့ သူက အသွားမတင်ထားတဲ့ လှံရှည်တစ်လက်ကို ရရှိပါတယ်။

လက်နက်ကို အသွားမတင်ထားတာက အခက်အခဲကို မြှင့်တင်ဖို့ရယ်၊ ပါရမီရှင်တွေက လက်နက်ထက်ရင် စစ်သည်တွေကို အစုလိုက်အပြုံလိုက် သတ်ပစ်မှာ စိုးရိမ်လို့ရယ်ကြောင့် ဖြစ်ပါတယ်။ စစ်သည်တွေရဲ့ အသက်ကိုလည်း တန်ဖိုးထားရတာကိုး။

ချန်ဆန်းရှီရဲ့ ကိုယ်ပိုင်ဓား 'ကျန်းယွဲ့' ကိုလည်း ယူခွင့်မပေးပါဘူး။ အဲဒီလို မှော်လက်နက်တွေက ဟွာကျန်းအဆင့် သိုင်းသမားတွေပဲ သုံးတာဖြစ်လို့ ဒီနေရာမှာ သုံးရင် မတရားသလို ဖြစ်မှာစိုးလို့ပါ။

ချန်ဆန်းရှီကတော့ ဒါတွေကို သိပ်ဂရုမစိုက်ပါဘူး။ သူ အတွင်းအားသန့်စင်ခြင်းအဆင့်ကို ရောက်ပြီးကတည်းက ဓားအတတ်ကို သေသေချာချာ လေ့ကျင့်ချိန် မရသေးတာကြောင့် လှံပဲဖြစ်ဖြစ်၊ ဓားပဲဖြစ်ဖြစ် အဆင်ပြေပါတယ်။

သူက မြင်းကို စစ်ဆေးတယ်၊ လက်နက်ကို ကြည့်တယ်။ အပေါ်ယံမှာတော့ ဘာပြဿနာမှ မရှိသလိုပါပဲ။ ဒါပေမဲ့ တကယ့်တိုက်ပွဲ မဝင်မချင်းတော့ ဒီလက်နက်မှာ အားနည်းချက်တွေ ဖုံးကွယ်ထားသလားဆိုတာ မသိနိုင်ပါဘူး။ အမွှေးတိုင်ကို မီးညှိလိုက်ပြီမို့ အချိန်က တန်ဖိုးရှိလှပါတယ်။

"စတင်စေ"

"ဟိီ..."

ချန်ဆန်းရှီဟာ မြင်းကို ဒုန်းစိုင်းစီးပြီး စစ်ဗျူဟာကြီးထဲကို ဝင်သွားပါတော့တယ်။ လူနဲ့မြင်းဟာ သားရဲကြီးတစ်ကောင်ရဲ့ ပါးစပ်ထဲကို ဝင်သွားသလိုမျိုး မျက်စိတစ်မှိတ်အတွင်းမှာပဲ ပျောက်ကွယ်သွားပါတယ်။

ဒီ 'ကိုးပြည်ထောင်ရှစ်ကွက် စစ်ဗျူဟာ' ဆိုတာ လွန်ခဲ့တဲ့ နှစ်ပေါင်းတစ်ထောင်ကျော်က ပေါ်ပေါက်ခဲ့ပြီး နှစ်ပေါင်း ၉၀၀ နီးပါး ပျောက်ကွယ်နေခဲ့တာပါ။ လွန်ခဲ့တဲ့ ဆယ်စုနှစ်တစ်ခုလောက်ကမှ ဖန်ချင်းယွမ်က ပြန်လည်ဖော်ထုတ်နိုင်ခဲ့တာကြောင့် သူဟာ 'ဖီးနစ်' လို့ နာမည်ကြီးခဲ့တာ ဖြစ်ပါတယ်။

ဒီစစ်ကြောင်းက အရမ်းကို ရှုပ်ထွေးနက်နဲပါတယ်။ စစ်ကြောင်းရဲ့ တည်ဆောက်ပုံကို သိရင်တောင် အတုနဲ့ အစစ်ကို ခွဲခြားနိုင်ဖို့ လိုအပ်ပါတယ်။ ရှေ့ကလူတွေ အရှင်ဖမ်းခံရတာ မဆန်းပါဘူး။

ကံကောင်းတာက ချန်ဆန်းရှီဟာ ဒီစစ်ကြောင်းကို အရင်ကတည်းက ကျွမ်းကျင်အောင် လေ့လာထားပြီးသားပါ။ သာမန်အတိုင်းသာဆိုရင် သူဟာ အမွှေးတိုင် တစ်တိုင်စာ မပြည့်ခင်မှာတင် သေချာပေါက် ဖောက်ထွက်နိုင်ပါတယ်။

ဒါပေမဲ့...

သူ့ရဲ့ ထူးကဲတဲ့ အာရုံခံစားမှုအရ မင်းသားလေးချောင်ဖန်က သူ့ကို အေးစက်နေတဲ့ မျက်လုံးတွေနဲ့ စိုက်ကြည့်နေတာကို သူ သတိထားမိပါတယ်။ အပြင်မှာလည်း ထန်ရင်ခက သူ့ကို သတိပေးထားခဲ့တယ် မဟုတ်လား။ ဒီအဆင့်မှာ တစ်ခုခု ကြုံရလိမ့်မယ်ဆိုတာ သူ သိနေပါတယ်။

'ကောင်းပြီလေ... ငါ့လမ်းက အမြဲတမ်း စိန်ခေါ်မှုတွေနဲ့ ပြည့်နေတာပဲ'

ချန်ဆန်းရှီက အသွားမပါတဲ့ လှံရှည်ကို ခိုင်ခိုင်မြဲမြဲ ဆုပ်ကိုင်လိုက်ပါတယ်။ သူ့ရဲ့ မျက်လုံးတွေကတော့ ပြတ်သားပြီး ကြောက်ရွံ့မှု ကင်းမဲ့နေပါတယ်။

'တကယ်လို့ တစ်စုံတစ်ယောက်က ငါ့ကို ဒုက္ခပေးဖို့ ကြံနေမယ်ဆိုရင်တော့... အသွားမရှိတဲ့ လက်နက်ကလည်း လူသတ်နိုင်တယ်ဆိုတာ ငါ ပြရမှာပေါ့'