ကြီးမြတ်သော နတ်ဘုရားရတနာ (၂)

ဤအရိုးစုသူရဲကောင်း နှစ်ဦးမှာ အဆင့် ၆ အဆင့်မြင့် တောက်ပသူရဲကောင်းများဖြစ်ကြပြီး ကျန့်ဖုန်းသည် သူတို့ အသုံးပြုသော ကျွမ်းကျင်မှု အများစုကို အကျွမ်းတဝင် ရှိသည်။ သူ့ကို ပို၍ အံ့အားသင့်စေသည်မှာ ဤအရိုးစုသူရဲကောင်းများက ကျန့်ဖုန်း အကျွမ်းတဝင်မရှိသော အစွမ်းထက် ကျွမ်းကျင်မှုအချို့ကိုလည်း အသုံးပြုနေခြင်း ဖြစ်သည်။ ၎င်းတို့မှာ ပျောက်ကွယ်သွားပြီဖြစ်သော တောက်ပသောခေတ် မှ ကျွမ်းကျင်မှုများဖြစ်မည်ဟု သူ ယူဆလိုက်သည်။

သို့သော် ၎င်းမှာ ယနေ့ခေတ် ကျွမ်းကျင်မှုများက တောက်ပသောခေတ်ထက် ညံ့သည် မဆိုလိုပေ။ တောက်ပသောခေတ်မှ အစွမ်းထက် ကျွမ်းကျင်မှုများစွာမှာ နောက်မျိုးဆက်သို့ လက်ဆင့်မကမ်းနိုင်ခဲ့ခြင်းသာ ဖြစ်သည်။ ယခုခေတ်တွင်လည်း ကျန့်ဖုန်း၏ ဆရာ ယန်ဟောက်ယွီကဲ့သို့ အစွမ်းထက် ကျွမ်းကျင်မှုများစွာကို ဖန်တီးခဲ့ကြသော အစွမ်းထက် သူရဲကောင်းများ ရှိနေကြသည်။ သူသည် သူ၏ အလင်းဒြပ်စင်ကို ကြယ်တာရာကောင်းကင်၏ အလင်းနှင့် ပေါင်းစပ်ကာ ကြယ်စင်ချေမှုန်းခြင်းဓားချက် နှင့် ကြယ်တာရာမြစ်ဓားချက်ကဲ့သို့သော ပြစ်ဒဏ်ခတ်ခြင်း ကျွမ်းကျင်မှုများကို ဖန်တီးခဲ့သည်။

(ကြယ်ခြွေဓားချက်ကို ကြယ်စင်ချေမှုန်းခြင်းဓားချက်လို့ ပြောင်းထားပါတယ်၊ ပြောင်းတာများလည်း သည်းခံပေးကြပါ၊ E sub ကိုက MTL မလို့ အကုန် ပြောင်းနေလို့ပါ)

ဥပမာအားဖြင့် လုံဟောက်ချန်း၏ ဖခင် လုံရှင်းယွီသည်လည်း ဖိအားပေးသတ်ဖြတ်ရေး လည်ပတ်ဓား ကဲ့သို့သော အစွမ်းထက် ကျွမ်းကျင်မှုများကို ဖန်တီးခဲ့သည်။

တိုးဝင်တိုက်ခိုက်မှု၊ မြင့်မြတ်အလင်းကြက်ခြေခတ်ဓားချက်။

ကျန့်ဖုန်းသည် အရိုးစုသူရဲကောင်း နှစ်ဦးကို နောက်သို့ ဆုတ်သွားအောင် လုပ်ပြီးနောက် အံ့ဩဖွယ်ကောင်းသော အရှိန်ဖြင့် သူတို့နောက်သို့ အရိပ်တစ်ခုကဲ့သို့ လိုက်ပါသွားကာ ပြင်းထန်သော တိုက်စစ်ကို ဆင်နွှဲလိုက်သည်။ ယခုအခါ ကျန့်ဖုန်းသည် အဆင့် ၅ နှင့် အောက်ရှိ ကျွမ်းကျင်မှုများကို အသုံးပြုရာတွင် တစ်ခုနှင့်တစ်ခုကြား ဟာကွက်မရှိအောင် ချိတ်ဆက်နိုင်ပြီး ကျွမ်းကျင်မှု အများအပြားကိုပင် တစ်ပြိုင်နက်တည်း ထုတ်လွှတ်နိုင်သည်။

ဤသည်မှာ ကျန့်ဖုန်း၏ အစွမ်းထက်သော တိုက်ခိုက်ရေး ပါရမီနှင့် ဆက်စပ်နေသလို၊ အလင်းသားတော်အဖြစ် သူ၏ အစွမ်းထက်သော ခန္ဓာကိုယ်ကြောင့်လည်း ဖြစ်ကာ ၎င်းက သူ့ကို အလင်းဒြပ်စင်နှင့် အမြင့်ဆုံးအဆင့်အထိ နီးစပ်စေသည်။ လုံဟောက်ချန်းမှာလည်း အလင်းသားတော် ဖြစ်သော်လည်း သူ၏အဆင့်မှာ အဆင့် ၅ တွင်သာ ရှိသေးသည်။ အကယ်၍ သူ အဆင့် ၆ သို့ တက်လှမ်းနိုင်ပါက ကျန့်ဖုန်း၏ အဆင့်သို့ ရောက်ရှိလာနိုင်ပေမည်။ သို့သော် ၎င်းမှာ အရေးမကြီးပေ၊ လုံဟောက်ချန်း အဆင့် ၆ သို့ ရောက်ချိန်တွင် ကျန့်ဖုန်းသည် အဆင့် ၇ သို့ပင် နီးကပ်နေနိုင်သောကြောင့် ဖြစ်သည်။

တိုက်ပွဲမှာ ဆက်လက် ဖြစ်ပွားနေသည်။ ကျန့်ဖုန်း၏ မြင့်မြတ်အလင်းကြက်ခြေခတ်ဓားချက်သည် အရိုးစုသူရဲကောင်း တစ်ဦးကို တိုက်ရိုက် လေးပိုင်းပိုင်းပစ်လိုက်ပြီး ၎င်း၏ မျက်လုံးထဲမှ ဝိညာဉ်မီးတောက်ကိုပင် ငြှိမ်းသတ်လိုက်သည်။ လဲကျသွားသော အရိုးစုသူရဲကောင်းထံမှ နို့နှစ်ရောင် အလင်းစက်စုလေးတစ်ခု ထွက်ပေါ်လာပြီး ကျန့်ဖုန်း၏ အဝတ်အစားကို လျှပ်စီးကဲ့သို့ ဖြတ်သန်းကာ သူ၏ ခန္ဓာကိုယ်အတွင်းသို့ ပေါင်းစပ်သွားသည်။

ကျန်ရှိနေသော အရိုးစုသူရဲကောင်းအတွက်မူ ကျန့်ဖုန်းက လက်ဗလာဖြင့် တိုက်ခိုက်ရန် ဆုံးဖြတ်လိုက်ပြီး သူ၏ ရုပ်ပိုင်းဆိုင်ရာ ခန္ဓာကိုယ် ခွန်အားသက်သက်ဖြင့်သာ ယှဉ်ပြိုင်ခဲ့သည်။ သူ၏ ပြင်ပဝိညာဉ်စွမ်းအားမှာ ၇,၀၀၀ ကျော် ရှိနေသဖြင့် သီအိုရီအရ ဤအရိုးစုသူရဲကောင်းအနေဖြင့် ကျန့်ဖုန်းကို ထိခိုက်အောင် လုပ်ရန်မှာ အလွန်ခက်ခဲလှသည်။ ကျန့်ဖုန်း ဤသို့လုပ်ဆောင်ခြင်းမှာ ဖြစ်နိုင်ခြေတစ်ခုကို စမ်းသပ်ရန် ဖြစ်သည်။

သူ၏ လက်ရှိ ပြင်ပဝိညာဉ်စွမ်းအား ကန့်သတ်ချက်မှာ ၁၀,၀၀၀ ဖြစ်သဖြင့် သူ့တွင် တိုးတက်ရန် အမှတ် ၂,၀၀၀ ကျော် ကျန်ရှိနေသေးသည်။ ပြင်ပဝိညာဉ်စွမ်းအားမှာ ယေဘုယျအားဖြင့် ရုပ်ပိုင်းဆိုင်ရာ ခန္ဓာကိုယ်ကို ဖိအားပေးလေ့ကျင့်ခြင်းမှတစ်ဆင့် တိုးတက်လာတတ်သည်။ ကျန့်ဖုန်းက လက်ဗလာဖြင့် တိုက်ခိုက်ခြင်းမှာ အရိုးစုသူရဲကောင်း၏ စွမ်းအားကို အသုံးပြု၍ သူ၏ ခန္ဓာကိုယ်ကို လေ့ကျင့်ရန် ဖြစ်သည်။

အမှန်တကယ်ပင် ကျန့်ဖုန်း၏ နည်းလမ်းမှာ အလုပ်ဖြစ်ကြောင်း သက်သေပြခဲ့သည်။ သာမန်လူသားများ၏ ပြင်ပဝိညာဉ်စွမ်းအား ကန့်သတ်ချက်မှာ ၂၀၀ ဖြစ်သည်။ ပြင်ပဝိညာဉ်စွမ်းအား ၂၀၀ သို့ ရောက်သွားပါက တိုးတက်ရန် အလွန်ခက်ခဲသွားပြီး အမှတ်တိုင်းမှာ မိမိ၏ ကန့်သတ်ချက်ကို ချိုးဖျက်နေရသကဲ့သို့ပင် ဖြစ်သည်။ သိသာသည်မှာ အတွင်းဝိညာဉ်စွမ်းအား အဆင့် တိုးတက်လာသည်နှင့်အမျှ ပြင်ပဝိညာဉ်စွမ်းအား ကန့်သတ်ချက်မှာလည်း လိုက်ပါ တိုးတက်လာမည် ဖြစ်သည်။ သို့သော် သာမန် အဆင့် ၆ တောက်ပသူရဲကောင်းတစ်ဦး၏ ပြင်ပဝိညာဉ်စွမ်းအားမှာ ၁,၀၀၀ ထက် မည်သို့မျှ ကျော်လွန်မည် မဟုတ်ပေ။

ထို့ကြောင့် အဆင့်တူချင်း ဖြစ်သော်လည်း လုံဟောက်ချန်နှင့် ကျန့်ဖုန်းကြားတွင် ကြီးမားသော ကွာဟချက် ရှိနေပြီး ၎င်းမှာ ပြင်ပဝိညာဉ်စွမ်းအားမှ လာခြင်းဖြစ်သည်။ လုံဟောက်ချန် မသန်မာခြင်း မဟုတ်ပေ၊ အဆင့်တူချင်းကြားတွင် ကျန့်ဖုန်းမှလွဲလျှင် လုံဟောက်ချန်မှာ ဘုရားကျောင်းမဟာမိတ်တွင် အသန်မာဆုံးသော လူငယ်ဖြစ်သည်။ သူသည် ဂိမ်းကို ဟက်ထားသူနှင့် ဆုံတွေ့လိုက်ရသဖြင့် ကံမကောင်းခြင်းသာ ဖြစ်သည်ဟု ဆိုရပေမည်။

ကျန့်ဖုန်းနှင့် ကျန်ရှိသော အရိုးစုသူရဲကောင်းတို့၏ တိုက်ပွဲမှာ အလွန်ပြင်းထန်လှပြီး လက်သီးနှင့် ဓားတို့၏ တိုက်ပွဲ ဖြစ်သည်။ ဤမျှ အစွမ်းထက်သော အရိုးစုသူရဲကောင်းသည်ပင် အစွမ်းကုန် တိုက်ခိုက်သော်လည်း ကျန့်ဖုန်း၏ လက်သီးပေါ်တွင် သွေးစွန်းရုံလောက်သာ ဒဏ်ရာပေးနိုင်သည်။ ဒဏ်ရာရသွားခြင်းမှာလည်း တောက်ပသောခေတ်မှ အစွမ်းထက် ကျွမ်းကျင်မှုများကြောင့် ဖြစ်သည်။ သို့သော် မရှုံးနိမ့်နိုင်သောခန္ဓာကိုယ် ရှိသည့် ကျန့်ဖုန်းအတွက်မူ ဤဒဏ်ရာများမှာ ဘာမှမဟုတ်ဘဲ မျက်စိတစ်မှိတ်အတွင်းမှာပင် ပြန်လည် ပျောက်ကွယ်သွားခဲ့သည်။

"ဘုန်း"

ကျန့်ဖုန်းသည် ဩဇာကြီးမားသော လက်သီးတစ်ချက် ပစ်သွင်းလိုက်ရာ အရိုးစုသူရဲကောင်း၏ လက်ထဲရှိ အရိုးဒိုင်းမှာ တိုက်ရိုက် ကြေမွသွားခဲ့သည်။ ထို့နောက် သူက သူ၏လက်ထဲရှိ ဓားရှည်ကို လွှဲလိုက်ရာ ကျန့်ဖုန်း၏ ရင်ဘတ်ပေါ်တွင် သွေးစွန်းသော ဒဏ်ရာတစ်ခု ဖြစ်သွားစေသည့် အစွမ်းထက် ကျွမ်းကျင်မှုတစ်ခု ထွက်ပေါ်လာသည်။ ဤတိုက်ခိုက်မှုက ကျန့်ဖုန်းကို အံ့အားသင့်စေခဲ့သည်။ အဘယ်ကြောင့်ဆိုသော် ဤကျွမ်းကျင်မှု၏ စွမ်းအားမှာ အဆင့် ၆ ကျွမ်းကျင်မှုများထဲတွင် ထိပ်တန်းအဆင့်ဖြစ်ပြီး ကျန့်ဖုန်း၏ ကြယ်စင်ချေမှုန်းခြင်းဓားချက် နှင့်ပင် ဖျက်ဆီးအား ယှဉ်နိုင်သောကြောင့် ဖြစ်သည်။

အဆက်မပြတ် တိုက်ခိုက်ခြင်းဖြင့် ကျန့်ဖုန်း၏ ရုပ်ပိုင်းဆိုင်ရာ ခန္ဓာကိုယ်မှာ ဤအဆင့်ရှိသော တိုက်ခိုက်မှုများနှင့် အသားကျသွားပုံရပြီး ကျန့်ဖုန်းသည်လည်း တိုက်ပွဲအတွင်း သူ၏ လက်ဗလာ တိုက်ခိုက်ရေး ကျွမ်းကျင်မှုများကို ပိုမို ထက်မြက်အောင် လုပ်နိုင်ခဲ့သည်။ ရုတ်တရက် သွေးစာချုပ်မှတစ်ဆင့် ကျန့်ဖုန်း၏ စိတ်ထဲသို့ သတင်းစကားတစ်ခု ရောက်ရှိလာသဖြင့် သူ မျက်မှောင် အနည်းငယ် ကြုတ်လိုက်မိသည်။

ထို့ကြောင့် သူသည် တိုက်ပွဲကို အမြန်ဆုံး အဆုံးသတ်ရန် ဆုံးဖြတ်လိုက်ပြီး လက်သီးတစ်ချက်ဖြင့် အရိုးစုသူရဲကောင်း၏ အရိုးခေါင်းကို ရိုက်ခွဲပစ်လိုက်သည်။ နောက်ထပ် အဖြူရောင် အလင်းလေးတစ်ခု ရရှိပြီးနောက် ကျန့်ဖုန်း၏ ရှေ့တွင် ရွှေရောင်ပုတီးစေ့လေး တစ်စေ့ ပေါ်လာသည်ကို သူ တွေ့လိုက်ရသည်။

ကျန့်ဖုန်းက သူ၏ လက်ညှိုးဖြင့် ၎င်းကို အသာအယာ ထိလိုက်ရာ ထိုရွှေရောင်ပုတီးစေ့မှာ ချက်ချင်းပင် ရွှေရောင်အလင်းတန်းတစ်ခုအဖြစ် ပြောင်းလဲသွားပြီး ကျန့်ဖုန်း၏ မျက်ခုံးနှစ်ခုကြားသို့ ပေါင်းစပ်ဝင်ရောက်သွားသည်။ တစ်ချိန်တည်းမှာပင် မှတ်ဉာဏ်တစ်ခု ကျန့်ဖုန်း၏ စိတ်ထဲတွင် ပေါ်လာခဲ့သည်။

"အသူရာခုတ်ချက်၊ ဝိညာဉ်စွမ်းအားကို စုစည်းကာ စကြာဝဠာကြီးကို ရှင်းလင်းစွာ ဖြတ်တောက်ပါ..."

ဤသည်မှာ ကျွမ်းကျင်မှု အမွေအနှစ် မှတ်ဉာဏ်တစ်ခုဖြစ်ပြီး အလွန်အစွမ်းထက်သော အဆင့် ၆ ကျွမ်းကျင်မှု ဖြစ်သည်။ ၎င်းမှာ စောစောက အရိုးစုသူရဲကောင်း အသုံးပြုခဲ့ပြီး ကျန့်ဖုန်းကိုပင် အံ့အားသင့်စေခဲ့သော အစွမ်းထက် ကျွမ်းကျင်မှုပင် ဖြစ်သည်။ ရွှေရောင်ပုတီးစေ့မှာ ကျန့်ဖုန်း၏ မျက်ခုံးကြားသို့ ပေါင်းစပ်သွားပြီးနောက် ကျန့်ဖုန်းသည် ဤကျွမ်းကျင်မှုကို တတ်မြောက်သွားခဲ့သည်။ သို့သော် သူ၏ ကျွမ်းကျင်မှုမှာ မပြည့်စုံသေးသဖြင့် ယခုအချိန်တွင် ဤကျွမ်းကျင်မှု၏ စစ်မှန်သော စွမ်းအားကိုတော့ ထုတ်ဖော်နိုင်ဦးမည် မဟုတ်ပေ။

အသူရာခုတ်ချက် သည် ငါးမီတာ ပတ်လည်အတွင်း မည်သည့် ရန်သူ၏ ရှောင်တိမ်းခြင်း ကျွမ်းကျင်မှုကိုမဆို လျစ်လျူရှုနိုင်စွမ်း ရှိသည်။ သို့သော် ၎င်းကို တစ်ကြိမ် အသုံးပြုလျှင် ဝိညာဉ်စွမ်းအား ၁,၀၀၀ အထိ အလွန်များပြားစွာ သုံးစွဲရသည်။ သို့သော် ကျန့်ဖုန်း တတ်မြောက်ထားပြီးဖြစ်သော ကြယ်စင်ချေမှုန်းခြင်း ခုတ်ချက် သည်လည်း ဝိညာဉ်စွမ်းအား များစွာ သုံးစွဲရသဖြင့် ၎င်းတို့နှစ်ခုမှာ သိပ်မကွာခြားလှပေ။

အသူရာခုတ်ချက် ကို အလျင်အမြန် နားလည်သဘောပေါက်ပြီးနောက် ကျန့်ဖုန်းသည် ထာဝရမျှော်စင်၏ တံခါးမှ အမြန် ထွက်လာခဲ့သည်။ ထာဝရမျှော်စင်၏ အတွင်းပိုင်းနှင့် အပြင်ဘက်မှာ ကွဲပြားခြားနားသော ကမ္ဘာငယ်လေးနှစ်ခုကဲ့သို့ပင် ဖြစ်သည်။ သူ အပြင်သို့ ထွက်လာသည်နှင့် ကျန့်ဖုန်းသည် ကြောက်မက်ဖွယ်ကောင်းသော အော်ဟစ်သံကြီးကို ကြားလိုက်ရသည်။

ဂူ၏ အပေါ်ပိုင်းတွင် ကြီးမားလှသော တွင်းနက်ကြီးတစ်ခုသည် ဖြည်းညှင်းစွာ ပွင့်လာပြီးနောက် ဂူတစ်ခုလုံးမှာ ပြိုကျတော့မတတ် ပြင်းထန်စွာ တုန်ခါလာခဲ့သည်။ ထာဝရမျှော်စင်မှာလည်း ဝေဝါးလာပြီး ခဏချင်းမှာပင် ထိုတွင်းနက်ကြီးအတွင်းသို့ တိုးဝင်ကာ ပျောက်ကွယ်သွားခဲ့သည်။

ယီလိုင်ခဲ့စစ်က ယခင်က ပြောခဲ့ဖူးသည်မှာ ကျန့်ဖုန်း ထာဝရမျှော်စင်မှ ထွက်ခွာသွားသောအခါ ၎င်းသည် ယီလိုင်ခဲ့စစ် ဖွင့်လှစ်ထားသော ကမ္ဘာငယ်လေးအတွင်းသို့ ဟင်းလင်းပြင်ကို ဖြတ်သန်းကာ သွားမည်ဖြစ်ကြောင်း ဖြစ်သည်။ ကျန့်ဖုန်း၏ လည်ပင်းတွင် ရှိနေသော ထာဝရသံစဉ် သည်သာ ထာဝရမျှော်စင်နှင့် ဆက်သွယ်နိုင်သော တစ်ခုတည်းသော လမ်းကြောင်း ဖြစ်သည်။

တစ်ချိန်တည်းမှာပင် ကြောက်မက်ဖွယ်ငိုကြွေးသံဂူ၏ အပြင်ဘက်တွင် စစ်သူကြီးအဆင့် နံပါတ် ၂၁ အဖွဲ့သားများသည်လည်း အန္တရာယ်နှင့် ကြုံတွေ့နေရပြီ ဖြစ်သည်။