ဝိညာဉ်ဆင့်ခေါ်သူ နတ်ဘုရား၏ အမွေအနှစ် (၂)

ကျန့်ဖုန်းက အားလုံးကို ကြည့်ကာ ပြောလိုက်သည်။

"တာဝန်တာဝါ ကိစ္စက ပြေလည်သွားပါပြီ။ တာဝန်ရှိသူတွေကို ဖမ်းဆီးထားပြီး အနည်းဆုံး ထောင်ဒဏ် ၁၀ နှစ် ကျခံရပါလိမ့်မယ်"

"ဒါ တကယ် ကောင်းတာပဲ အဲ့ဒီလို တာဝန်မဲ့တဲ့ ဝန်ထမ်းတွေကို ဆက်ထားနေမယ်ဆိုရင် သူတို့ရဲ့ အမှားတွေကြောင့် နတ်ဆိုးအမဲလိုက်အဖွဲ့ ဘယ်နှစ်ဖွဲ့တောင် ပျက်စီးရဦးမလဲ မသိဘူး"

ဝမ်မင်ကလည်း ခေါင်းညိတ်ကာ ပြောလိုက်သည်။

"မဟာမိတ်အဖွဲ့က ငါတို့ကို စိတ်မပျက်စေဘူးပဲ"

ကျန့်ဖုန်းသည် အားလုံးကို ကြည့်လိုက်ရာ သူ၏ မျက်နှာအမူအရာမှာ ရုတ်တရက် အနည်းငယ် လေးနက်သွားသည်။ သူက ပြောလိုက်သည်။

"အားလုံးကို ပြောပြသင့်၊ မပြောပြသင့် ဝေခွဲမရဖြစ်နေတဲ့ နောက်ထပ် အလွန်အရေးကြီးတဲ့ ကိစ္စတစ်ခု ရှိသေးတယ်။ ဘာလို့လဲဆိုတော့ ဒီကိစ္စသာ အပြင်ကို ပေါက်ကြားသွားရင် ပြဿနာတွေ အများကြီးဖြစ်လာနိုင်တယ်၊ ထိတ်လန့်တုန်လှုပ်မှုတွေတောင် ဖြစ်စေနိုင်တယ်၊ ပြီးတော့ ကျွန်တော်တို့ရဲ့ နတ်ဆိုးအမဲလိုက်အဖွဲ့ပါ ဖျက်သိမ်းခံရဖို့ အကြောင်းရှိတယ်"

"ကျန့်ဖုန်း... တစ်ခုခု ဖြစ်လို့လား"

ကျန်းရှင်းရန်က စိုးရိမ်တကြီး မေးလိုက်သည်။

"ခေါင်းဆောင်... အဲ့ဒါက ဟိုမျှော်စင်လား၊ ကြောက်မက်ဖွယ် အော်ဟစ်သံဂူထဲက မျှော်စင်လေ"

ဖန်းလီက တိတိကျကျ မေးလိုက်သည်။

ကျန့်ဖုန်းက ခေါင်းညိတ်ကာ ပြောသည်။

"နောက်ပိုင်းမှာ ငါတို့ အချိန်အတော်ကြာအောင် ကျင့်ကြံကြမယ်၊ လောလောဆယ် မစ်ရှင်တွေ သွားမှာ မဟုတ်ဘူး။ ဒီမျှော်စင်ကြောင့်ပဲ မင်းတို့ကို နောက် ခြောက်လအတွင်းမှာ အဆင့် ၆ ရောက်အောင် ငါ ကူညီပေးနိုင်မယ်လို့ ယုံကြည်ချက် ရှိတယ်"

ဤစကားကို ကြားသောအခါ ဝမ်မင်နှင့် အခြားသူများမှာ သဘောပေါက်သွားကြပြီး ချက်ချင်းပင် ကျိန်ဆိုလိုက်ကြသည်။

"ကျွန်တော် ကျိန်ဆိုပါတယ်၊ ဒီနေ့ ခေါင်းဆောင်ပြောသမျှကို တစ်လုံးမှ အပြင်ကို မပေါက်ကြားစေရပါဘူး၊ မဟုတ်ရင် ကောင်းကင်နဲ့ မြေကြီးရဲ့ အပြစ်ပေးမှုကို ခံရပါစေ၊ ဘယ်တော့မှ လူပြန်မဖြစ်ပါစေနဲ့"

အခြားသူများလည်း ကိစ္စ၏ လေးနက်မှုနှင့် ၎င်းတွင် ပါဝင်နေသော အခွင့်အရေးကို နားလည်သွားကြသည်။

ကျန့်ဖုန်းသည် သူ၏ အဖော်အားလုံးကို လွှမ်းခြုံနိုင်ရန် မြင့်မြတ်သောအလင်းဒိုင်းတစ်ခု ဖန်တီးလိုက်ပြီးနောက် စတင်ပြောပြသည်။

"ဖန်းလီ ပြောတာ မှန်တယ်၊ ကျွန်တော် ပြောချင်တာက အဲ့ဒီ မျှော်စင်အကြောင်းပဲ။ ဝိညာဉ်ပုံရိပ်ဖော် ပုံဆောင်ခဲထဲမှာ နောက်ပိုင်းဖြစ်ရပ်တွေကို ကျွန်တော် မှတ်တမ်းမတင်ခဲ့ဘူး။ ထပ်ပြောရရင် ကျွန်တော် အဲ့ဒီ မျှော်စင်ထဲကို ဝင်ပြီး လွန်တဲ့ နှစ်ပေါင်း တစ်သောင်းက ယီလိုင်ခဲ့စစ်လို့ ခေါ်တဲ့ ဝိညာဉ်ဆင့်ခေါ်သူ ချန်ထားတဲ့ အမွေအနှစ်ကို ရရှိခဲ့တယ်"

"အဲ့ဒီမျှော်စင်ကို ထာဝရမျှော်စင်လို့ ခေါ်ပြီး သူ့ရဲ့ အရှင်သခင်ကတော့ ဝိညာဉ်ဆင့်ခေါ်သူ သူတော်စင်၊ သေခြင်းတရားမှော်ပညာ နတ်ဘုရား၊ ထာဝရအိပ်စက်ခြင်းရဲ့ ကပ်ဘေး၊ ယီလိုခဲ့စစ်ပဲ..."

ကျန့်ဖုန်းသည် ထာဝရမျှော်စင်အတွင်းရှိ သူ၏ အတွေ့အကြုံများကို ရိုးရှင်းစွာ ပြန်ပြောပြလိုက်သည်။ ဗီလာဝင်း တစ်ခုလုံးမှာ တိတ်ဆိတ်သွားပြီး အပ်ကျသံပင် ကြားနိုင်လောက်အောင် ငြိမ်သက်သွားသည်။

ကျန့်ဖုန်း၏ ပြောပြချက်မှာ အားလုံးကို တုန်လှုပ်စေရုံသာမက သူတို့၏ နားလည်မှုကိုလည်း ပြောင်းလဲစေသည်။ ဝိညာဉ်ဆင့်ခေါ်သူ သူတော်စင်၊ သေခြင်းတရားမှော်ပညာ နတ်ဘုရားမှာ မြင့်မြတ်သောအလင်းဂုဏ်သတ္တိ ရှိနေသည်ဆိုသော အချက်ကပင် အားလုံးကို အံ့အားသင့်စေသည်။

"ကျန့်ဖုန်း... မင်းက ဝိညာဉ်ဆင့်ခေါ်သူရဲ့ အမွေအနှစ်ကို ဆက်ခံမှာလား"

ကျန်းရှင်းရန်က စိုးရိမ်တကြီး မေးလိုက်သည်။

ဘာကြောင့်လဲဆိုတော့ ကျန့်ဖုန်း၏ ကိုယ်ပိုင်ပါရမီမှာပင် အလွန်အားကောင်းနေပြီဖြစ်ရာ ဝိညာဉ်ဆင့်ခေါ်သူ၏ အမွေအနှစ်ကို မယူလျှင်ပင် သူသည် တိုက်ကြီး၏ အထွတ်အထိပ်သို့ ရောက်ရှိနိုင်ပြီး နတ်ဘုရားချိပ်ပိတ်သူရဲကောင်း ဖြစ်လာနိုင်သောကြောင့် ဖြစ်သည်။ သို့သော် သူသာ ဝိညာဉ်ဆင့်ခေါ်သူ၏ အမွေအနှစ်နှင့် ပတ်သက်မိသွားပြီး ဤကိစ္စသာ ပေါက်ကြားသွားပါက ကျန့်ဖုန်းသည် မဟာမိတ်အဖွဲ့ တစ်ခုလုံး၏ စွန့်ပစ်ခြင်းကို ခံရမည်ဖြစ်ပြီး လူသားအားလုံး၏ မုန်းတီးခြင်းကို ခံရပေလိမ့်မည်။

ကျန့်ဖုန်းက ခါးသီးစွာ ပြုံးလိုက်ပြီး ဆိုသည်။

"ငါ ဆက်ခံချင်လို့ မဟုတ်ဘူး၊ ငြင်းပယ်လို့ မရလို့ပဲ။ ငါ ကျင့်ကြံတဲ့ နေ့တိုင်းမှာ ထာဝရမျှော်စင်ဆီကနေ အချက်အလက်အချို့ ရရှိနေတယ်၊ အဲ့ဒီထဲမှာ ဝိညာဉ်ဆင့်ခေါ်သူရဲ့ အမွေအနှစ်တွေ အများကြီး ပါဝင်နေတယ်"

"ခေါင်းဆောင်... မကောင်းမှုဆိုတာ စိတ်နှလုံးမှာပဲ ရှိတာပါ၊ စွမ်းရည်မှာ မရှိဘူး။ အကယ်၍ ခေါင်းဆောင်က ဝိညာဉ်ဆင့်ခေါ်သူရဲ့ အမွေအနှစ်ကို နတ်ဆိုးတွေကို တိုက်ခိုက်ဖို့ သုံးမယ်ဆိုရင် ငါကတော့ ဘာမှ မမှားဘူးလို့ ထင်တယ်။ ဝိညာဉ်ဆင့်ခေါ်သူ သူတော်စင်က ခေါင်းဆောင်ကို သူ့ရဲ့ အမွေဆက်ခံသူအဖြစ် ရွေးချယ်တာက ကြီးမားတဲ့ အခွင့်အရေး တစ်ခုပဲ"

ဝမ်မင်က နှစ်သိမ့်လိုက်သည်။

"ဟုတ်တယ်၊ ဟုတ်တယ်"

ဝတုတ်လေး ယောင်လီက ပြောလိုက်သည်၊

"ဘော့စ်... ဒါက ဖြစ်ပြီးသွားပြီပဲ။ ငြင်းလို့မရမှတော့ ပွင့်ပွင့်လင်းလင်းပဲ လက်ခံလိုက်ကြရအောင်"

မုရုံရှန်းအာက စိုးရိမ်တကြီး ပြောသည်။

"ဒါပေမဲ့ ကျွန်မတို့ လူသားတွေက အဲ့ဒီအတတ်ပညာကြောင့် အများကြီး ခံစားခဲ့ရတာ။ ခေါင်းဆောင်က အလင်းသားတော် ဖြစ်နေတယ်။ အကယ်၍ မဟာမိတ်အဖွဲ့ကသာ ခေါင်းဆောင် ဝိညာဉ်ဆင့်ခေါ်မှော်ပညာကို သင်နေတယ်ဆိုတာ သိသွားရင် မဟာမိတ်အဖွဲ့က ခေါင်းဆောင်ကို လက်ခံမှာ မဟုတ်ဘူး"

ဖန်းလီက ပြောသည်။

"ဒါဆို မဟာမိတ်အဖွဲ့ကို မသိအောင် လုပ်ရုံပေါ့။ သင်ထားရင်တောင် ခေါင်းဆောင်က ဖုံးကွယ်ထားပြီး မသုံးဘဲ နေလို့ရတာပဲ။ အပိုစွမ်းရည်တစ်ခု ရှိနေတာ ဘာမှ မမှားပါဘူး"

"ကျန့်ဖုန်း... မင်း ဘယ်လိုပဲ ဆုံးဖြတ်ဆုံးဖြတ် ငါကတော့ မင်းဘေးမှာ အမြဲရှိနေမှာပါ"

ကျန်းရှင်းရန်သည် ကျန့်ဖုန်း၏ လက်မောင်းကို ချိတ်ကာ သူ၏ ဘေးတွင် ရပ်လိုက်သည်။

ကျန့်ဖုန်း ပြုံးလိုက်ပြီး ပြောသည်။

"ဒီကိစ္စရဲ့ အဓိကက ဝိညာဉ်ဆင့်ခေါ်မှော်ပညာ သင်သင့်၊ မသင်သင့် မဟုတ်ဘူး။ ငါ ပြောချင်တာက ထာဝရမျှော်စင်ဟာ ငါတို့ရဲ့ အင်အားကို အလျင်အမြန် မြှင့်တင်ပေးနိုင်မယ့် အလွန်ကောင်းမွန်တဲ့ လေ့ကျင့်ရေးကွင်းတစ်ခု ဖြစ်တယ်ဆိုတာပဲ"

ကျန့်ဖုန်း၏ စကားကို ကြားပြီးနောက် အားလုံးသည် တစ်ဦးကိုတစ်ဦး ကြည့်လိုက်ကြပြီး သူတို့၏ မျက်နှာပေါ်တွင် စိတ်လှုပ်ရှားမှုများ ပြည့်နှက်သွားသည်။

ထာဝရမျှော်စင်မှာ ဝိညာဉ်ဆင့်ခေါ်သူများနှင့် ဆက်စပ်နေသဖြင့် အလွန် ထိရှလွယ်သော အကြောင်းအရာ ဖြစ်သည်။ ထို့ပြင် ၎င်းအတွင်း၌ အင်အားကို လျင်မြန်စွာ မြှင့်တင်နိုင်သည်။ ဤကဲ့သို့သော လျှို့ဝှက်ချက်ကို မည်သူက အခြားသူများနှင့် မျှဝေပါမည်နည်း။ အဘယ်ကြောင့်ဆိုသော် ဤသို့လုပ်ခြင်းသည် ကြီးမားသော စွန့်စားမှု ဖြစ်ပြီး အမှားတစ်ခု ဖြစ်သည်နှင့် သူတို့အားလုံး အဆုံးမဲ့ ချောက်ကမ်းပါးထဲသို့ ကျဆင်းသွားနိုင်သောကြောင့် ဖြစ်သည်။

သို့သော် ကျန့်ဖုန်းသည် ဤလျှို့ဝှက်ချက်ကို မျှဝေသဖြင့် သူတို့ကို အလွန် စိတ်လှုပ်ရှားစေသည်။

ယောင်လီက ပြောလိုက်သည်။

"ဘော့စ်... ခင်ဗျားနဲ့ ဆုံတွေ့ရတာ ကျွန်တော့်အတွက်တော့ တကယ် ကံကောင်းတာပဲ"

နတ်ဆိုးအမဲလိုက်အဖွဲ့ စတင်ဖွဲ့စည်းချိန်မှစ၍ ဝတုတ်လေး၏ အင်အားမှာ ကောင်းကင်နှင့် မြေကြီးကဲ့သို့ ပြောင်းလဲသွားသည်။ ကိုယ်ခန္ဓာအားတိုးဆေးလုံး တစ်ခုတည်းနှင့်တင် သူတို့တစ်ဦးစီသည် အဆင့် ၅ ကျင့်ကြံခြင်းတွင် ပြင်ပဝိညာဉ်စွမ်းအား ၁,၀၀၀ စီ ရရှိကြသည်။

"ခေါင်းဆောင်... စိတ်ချပါ၊ ငါတို့ ဒီကိစ္စကို ရင်ထဲမှာ မြုပ်နှံထားပြီး ဘယ်တော့မှ အပြင်ကို ထုတ်မပြောပါဘူး။ နောက်နောင် ငါတို့ရဲ့ အဖော်တွေကိုတောင် ပြောမှာ မဟုတ်ပါဘူး"

ဝမ်မင်က လေးနက်စွာ ပြောလိုက်သည်။

ဖန်းလီနှင့် မုရုံရှန်းအာတို့ကလည်း ခေါင်းညိတ်လိုက်ကြသည်။

"ဒါဆိုရင်တော့ နောက် ၆ လအတွင်း ငါတို့ရဲ့ အဓိက အာရုံစိုက်မှုက ထာဝရမျှော်စင်က စမ်းသပ်မှုတွေ ဖြစ်လိမ့်မယ်။ ဒါပေမဲ့ ထာဝရမျှော်စင်ရဲ့ ပထမအထပ်က စမ်းသပ်မှုတွေက အဆင့် ၆ ကျွမ်းကျင်သူတွေအတွက် သတ်မှတ်ထားတာမို့လို့ အားလုံးရဲ့ အင်အားကို မြှင့်တင်ဖို့ လိုသေးတယ်။ မနေ့က ဝယ်ထားတဲ့ မြင့်မြတ်ဝိညာဉ်ဆေးလုံး ၃ လုံးကို ရှင်းရန်၊ ဖန်းလီနဲ့ ရှန်းအာတို့ကို အရင်ပေးမယ်။ မှာထားတဲ့ ဆေးလုံး ၃ လုံးက ၁၀ ရက်နေရင် ရောက်လာလိမ့်မယ်၊ အဲ့ဒီကျမှ ဝမ်မင်၊ ယောင်လီနဲ့ ငါတို့ သောက်ကြမယ်"

"ကျွန်တော် အားလုံးကို တစ်လ အချိန်ပေးမယ်၊ အဲ့ဒီတစ်လအတွင်း ကျင့်ကြံခြင်းကို ကြိုးစားမြှင့်တင်ပြီး ပစ္စည်းအသစ်တွေနဲ့ အသားကျအောင် လုပ်ကြ။ တစ်လပြည့်ရင် ထာဝရမျှော်စင်ထဲဝင်ပြီး စမ်းသပ်မှုတွေကို စတင်ကြမယ်"

"ဟုတ်ကဲ့ပါ"

အားလုံးက တညီတညွတ်တည်း ပြန်ဖြေကြသည်။

ကျန်းရှင်းရန်၊ ဖန်းလီနှင့် မုရုံရှန်းအာတို့သည် မြင့်မြတ်ဝိညာဉ်ဆေးလုံးများကို သောက်သုံးပြီးနောက် သူတို့၏ ကျင့်ကြံခြင်းအဆင့်ကို မြှင့်တင်ရန်အတွက် အခန်းအသီးသီးသို့ ပြန်ကာ တံခါးပိတ် ကျင့်ကြံခြင်းကို စတင်ကြသည်။

သို့သော် ကျန်းရှင်းရန်မှာမူ ကျန့်ဖုန်း၏ အခန်းသို့ ပြန်လာသည်။ ဖန်းလီနှင့် မုရုံရှန်းအာတို့၏ နောက်ပြောင်ခြင်းကို ခံထားရပြီး ဖြစ်သဖြင့် သူမသည် ကျန့်ဖုန်းနှင့်အတူ နေထိုင်ရန် ကျန့်ဖုန်း၏ အခန်းသို့သာ ပြောင်းရွှေ့လိုက်တော့သည်။

အခြားသူများလည်း ကျင့်ကြံခြင်းကို စတင်ကြသည်။ ကျန့်ဖုန်းသည် ကျင့်ကြံရင်း တစ်ဖက်မှလည်း ဝိညာဉ်ဆင့်ခေါ်သူ သူတော်စင်၏ အမွေအနှစ်များကို လက်ခံနေရာ တစ်ခုနှင့်တစ်ခု အနှောင့်အယှက် မဖြစ်စေပေ။ သူသည် ဝိညာဉ်ဆင့်ခေါ်သူ၏ အမွေအနှစ်ကို ငြင်းပယ်ခြင်း မရှိဘဲ အမှန်တကယ်ပင် ဝိညာဉ်ဆင့်ခေါ်သူ မှော်ပညာမှ စိတ်ကူးစိတ်သန်းသစ်များစွာ ရရှိသည်။

၁၀ ရက်အကြာတွင် ကျန့်ဖုန်းသည် ကုန်သွယ်ရေးစင်တာသို့ သွားရာလမ်းတွင် တာဝန်တာဝါကို ဖြတ်သွားစဉ် လုံဟောက်ချန်၏ နတ်ဆိုးအမဲလိုက်အဖွဲ့နှင့် လုရှီး၏ နတ်ဆိုးအမဲလိုက်အဖွဲ့၊ စုစုပေါင်း လူ ၁၃ ဦးတို့သည် တာဝန်တာဝါထဲမှ ဒေါသတကြီး ထွက်လာပြီး အုပ်ချုပ်ရေးရုံးခန်းဆီသို့ ဦးတည်သွားနေကြသည်ကို မြင်လိုက်ရသည်။

"ဘာဖြစ်တာလဲ တာဝန်တာဝါ ဝန်ထမ်းတွေ နောက်ထပ် အမှားတစ်ခု ထပ်လုပ်လိုက်ပြန်ပြီလား"

ကျန့်ဖုန်း အနည်းငယ် ဇဝေဇဝါ ဖြစ်သွားမိသည်။