သိုင်းသူတော်စင် (၁၀၀) စုဝေးပွဲနှင့် မိတ်ဟောင်းဆွေဟောင်းများ

~"သိုင်းသူတော်စင် ပြိုင်ပွဲ ဟုတ်လား။ ရှေးဟောင်း သူတော်စင်ရော၊ အသစ်တွေရော မဖြစ်မနေ တက်ရောက်ရမယ်လား"

ထိုသတင်းကို ကြားလိုက်ရသည့်အခါ နင်ချီ မျက်ခုံးများ ကျုံ့လိုက်မိ၏။

သူ၏ ပထမအဆင့် နယ်ပယ် တည်ဆောက်မှုမှာ ပြီးပြည့်စုံလုနီးပါး ဖြစ်နေပြီ ဖြစ်ရာ ဤကဲ့သို့ အရေးကြီးသော အချိန်မျိုးတွင် အပြင်သို့ မထွက်ချင်ပေ။

မူလကတော့ ငြင်းပယ်လိုက်ရန် နင်ချီ စိတ်ကူးထားသည်။ သူ့လက်ရှိ အင်အားနှင့်ဆိုလျှင် သိုင်းကမ္ဘာတွင် သူ့ဆန္ဒကို ဆန့်ကျင်ရဲသူဟူ၍ မရှိသလောက် ရှားပါးနေပြီ မဟုတ်ပါလော။ သို့သော် မကြာမီမှာပင် ထိုအစီအစဉ်ကို သူ စွန့်လွှတ်လိုက်၏။

အကြောင်းမူကား အရာ တစ်ခုကို သူ သတိရသွားသောကြောင့် ဖြစ်၏။

အတွင်းသစ္စာဖောက် ဆိုသည့် ကိစ္စပင်၊

'တာအိုဆရာ ပိုင်ရှန်နဲ့ ကောင်းကင်သတ် သိုင်းသူတော်စင်တို့ အရင်က ပြောဖူးတဲ့ စကားအရ ဆိုရင်... ဒီပြိုင်ပွဲက တောင်နှင့် ပင်လယ် နယ်မြေ အကြောင်းကို အတိအလင်း ချပြမယ့်ပွဲ ဖြစ်သလို၊ နောက်ပိုင်း ကမ္ဘာ့ဆန္ဒ ရဲ့ စွမ်းအားကို ခွဲဝေယူမယ့် ကိစ္စနဲ့လည်း သက်ဆိုင်နေတယ်။ လူတိုင်းက သူတို့ရဲ့ စွမ်းအားတွေကို စုစည်းပြီး ကမ္ဘာ့ဆန္ဒကို နှိုးထကြရမှာ'

'တကယ်လို့သာ ငါက အတွင်းသစ္စာဖောက် ဖြစ်ခဲ့မယ်ဆိုရင်... ဒီအခွင့်အရေးကို လက်လွတ်ခံမှာ မဟုတ်ဘူး။ ပြဿနာတစ်ခုခု ရှာမှာ သေချာတယ်'

နင်ချီ အခြေအနေကို တွက်ချက် သုံးသပ်ကြည့်လိုက်၏။ တောင်နှင့် ပင်လယ် နယ်မြေက သိုင်းကမ္ဘာကို ကျူးကျော်ရန်အတွက် အကြီးမားဆုံး အတားအဆီးမှာ ကမ္ဘာ့ဆန္ဒမှလွဲ၍ အခြား မရှိပေ။ ကမ္ဘာ့ဆန္ဒ၏ အထောက်အပံ့သာ မရှိပါက သိုင်းကမ္ဘာသည် ခုခံနိုင်စွမ်းမရှိသော သိုးတစ်ကောင် ဖြစ်သွားပေလိမ့်မည်။

ထို့ကြောင့် ရန်သူ့ဘက်က လုပ်ဆောင်ရန် အသင့်တော်ဆုံး နည်းလမ်းမှာ ကမ္ဘာ့ဆန္ဒကို ပြင်းပြင်းထန်ထန် ထိခိုက်အောင် လုပ်ခြင်းသာ ဖြစ်ချေသည်။

ဒါကိုတော့ နင်ချီ လုံးဝ လက်ခံနိုင်စရာ အကြောင်းမရှိ။

သူ လျှောက်လှမ်းမည့် လမ်းစဉ်မှာ ကမ္ဘာ့ဆန္ဒနှင့် ပေါင်းစည်းရမည့် လမ်းစဉ် ဖြစ်၏။ အကယ်၍ ကမ္ဘာ့ဆန္ဒသာ ထိခိုက်ပျက်စီးသွားခဲ့လျှင် သူ့အနာဂတ် စွမ်းအားများ လျော့နည်းသွားမည့်အပြင်၊ နယ်မြေ အရှင်သခင် အဆင့်သို့ တက်လှမ်းမည့် အခွင့်အရေးပါ ဆုံးရှုံးသွားနိုင်သည်။

သေချာစွာ စဉ်းစားပြီးနောက်။

သူ ကိုယ်တိုင် တက်ရောက်ရန် ဆုံးဖြတ်လိုက်တော့သည်။

ခရီးသွားနေစဉ် အတွင်းမှာလည်း သူ၏ တာအို ပြီးပြည့်စုံမှုအတွက် ဆက်လက် အားထုတ်သွားနိုင်သည်။ အချိန် သိပ်ကြန့်ကြာမည် မဟုတ်ပေ။

သူက ထိုသတင်းကို အခြားသူများထံ ဖြန့်ဝေလိုက်၏။

ယခုအခါ အစစ်အမှန်သိုင်းဂိုဏ်းတွင် သိုင်းသူတော်စင် အဆင့်ရှိသော အင်အားစုများစွာ ရှိနေပြီ ဖြစ်၏။

အစစ်အမှန်သိုင်း ခန်းမဆောင်ထဲမှ ဝိညာဉ်သားရဲများ အပါအဝင် ဆိုလျှင် သိုင်းသူတော်စင် အဆင့်ရှိသူ ဒါဇင်နှင့်ချီ ရှိနေ၏။ သို့သော် ထိုသားရဲများ၏ အင်အားကို သိုင်းကမ္ဘာက မသိရှိကြသေး။ နင်ချီသည် အင်မော်တယ် ကြိုးကြာနီနှင့် အခြားသားရဲအချို့ကို ဂိုဏ်းစောင့်ရှောက်ရန် ထားခဲ့လိုက်၏။ သူ မရှိခိုက် တစ်စုံတစ်ယောက် လာရောက် ကျူးကျော်မည်ကို ကာကွယ်ရန် ဖြစ်၏။

စီနီယာ လိပ်အိုကြီးနှင့် အခြားသူများကိုမူ သူနှင့်အတူ ခေါ်ဆောင်သွားမည် ဖြစ်၏။

သို့သော် နင်ချီ့တွင် အစီအစဉ် ရှိသည်။ လိပ်အိုကြီးအား သူတို့နှစ်ဦး၏ ပတ်သက်မှုကို ခေတ္တမျှ ဖုံးကွယ်ထားရန် မှာကြားပြီး လိပ်အိုကြီးကို သီးသန့် ကြိုလွှတ်လိုက်၏။ နင်ချီကမူ ဓားမ မိစ္ဆာ၊ အခြားသူများနှင့်အတူ နောက်မှ လိုက်ပါသွားမည် ဖြစ်၏။

ဆုံးဖြတ်ချက် ချပြီးနောက် နင်ချီ၏ စိတ်သည် တည်ငြိမ်သွားလေသည်။

ကြီးမားသော ကိုယ်ပိုင်အင်အားက သူ့ကို ယုံကြည်မှု အပြည့်အဝ ပေးစွမ်းထား၏။ မျှော်လင့်မထားသော အခြေအနေများ ဖြစ်ပေါ်လာလျှင်ပင် အခြေအနေကို တည်ငြိမ်အောင် ထိန်းချုပ်နိုင်စွမ်း သူ့တွင် ရှိနေ၏။

သူသည် သိုင်းကမ္ဘာကို သူ့ပိုင်ဆိုင်မှု တစ်ခုအဖြစ် သတ်မှတ်ထားပြီး ဖြစ်ရာ၊ မည်သူ့ကိုမျှ ဖျက်ဆီးခွင့် ပြုမည် မဟုတ်ပေ။

ရက်အနည်းငယ် ကြာပြီးနောက် ..နင်ချီနှင့် အဖွဲ့ ထွက်ခွာလာခဲ့ကြ၏။

သိုင်းသူတော်စင် ပြိုင်ပွဲ သတင်းကြောင့် ကမ္ဘာလောကကြီး တစ်ခုလုံး ဆူညံပွက်လောရိုက်နေပြီ ဖြစ်၏။ ဒါသည် ဖုံးဖိထား၍ ရသော သတင်းမျိုး မဟုတ်ပေ။ ပြောရလျှင် သိုင်းသူတော်စင်များ ကိုယ်တိုင်ကလည်း ဖုံးကွယ်ထားရန် ဆန္ဒမရှိကြ။ ဤအခွင့်အရေးကို အသုံးချပြီး ကမ္ဘာ့ပြင်ပမှ ကြောက်မက်ဖွယ် ရန်သူများအကြောင်း လူအများ သိရှိသွားစေရန် ရည်ရွယ်ချက် ရှိပုံရ၏။

အချေအတင် ဆွေးနွေးမှုများလည်း ပြင်းထန်နေကြ၏။

စွမ်းအားရှင်များသည် ကောင်းကင်ယံကို ဖြတ်သန်းပြီး တစ်ပါးပြီးတစ်ပါး ထွက်ခွာသွားကြ၏။

သူတော်စင် `(၁၀၀)` ခန့် စုဝေးရောက်ရှိနေသော ခံ့ညားထည်ဝါသည့် မြင်ကွင်းကြီးက သိုင်းသူတော်စင်များကိုပင် အားကျ လေးစားသွားစေသည်။

...

ကောင်းကင်ဘုံ တောင်ထွတ် ။

၎င်းသည် သိုင်းကမ္ဘာ၏ အမြင့်ဆုံးတောင် ဖြစ်ပြီး ကောင်းကင်အထွတ်အထိပ်သို့ ထိုးတက်နေသဖြင့် ထိုအမည်ကို ရရှိခဲ့ခြင်း ဖြစ်၏။ ကမ္ဘာကြီး ပြောင်းလဲသွားပြီးနောက် ဤတောင်ကြီးသည် ပေပေါင်း သောင်းချီ မြင့်တက်လာခဲ့ပြီး အဝေးမှ လှမ်းကြည့်လျှင် မိုးတိမ်များကို ထိုးဖောက်နေသော နတ်ဘုရားဓား တစ်စင်းအလား ထင်မှတ်ရပေသည်။

တောင်ထိပ်ပေါ်မှာ..၊

ကြီးကျယ်ခမ်းနားသော ရှေးဟောင်း နန်းတော်ကြီးများစွာ တည်ရှိနေ၏။ သိုင်းသူတော်စင်များ အနေဖြင့် ကောင်းကင်ဘုံလူသား နယ်ပယ် အဆင့်ရှိသော သိုင်းပညာရှင် အများအပြားကို ဆင့်ခေါ်ပြီး နန်းတော် ဆောက်လုပ်ခိုင်းသည်မှာ မခက်ခဲလှပေ။

ထိုအချိန်၌..၊

ကောင်းကင်ယံမှ စွမ်းအားရှင်များ တစ်ပါးပြီးတစ်ပါး ရောက်ရှိလာကြ၏။

"မိတ်ဆွေ ဟေးဇီး... မတွေ့တာ ကြာပြီပဲ"

"ဝိညာဉ် နိုးထပြီးကတည်းက အလည်လာဖို့ အခွင့်မသာခဲ့ဘူး။ အခုမှပဲ အခွင့်အရေး ရတော့တယ်ဗျာ"

"ဟုတ်ပါ့... ဟုတ်ပါ့"

ရှေးဟောင်း သူတော်စင်များသည် ရယ်မောကာ နှုတ်ဆက်နေကြ၏။

သူတို့သည် ခေတ်ကာလ ရှည်လျားစွာ ရှင်သန်ခဲ့ကြသူများ ဖြစ်ပြီး တစ်ဦး၏ နာမည်ကို တစ်ဦး ကြားဖူးနားဝ ရှိကြသလို၊ အများစုမှာ ရင်းနှီးသော ပတ်သက်မှုများလည်း ရှိခဲ့ကြရာ ယခုလို တွေ့ဆုံချိန်တွင် အသားကျနေကြ၏။

ထိုအချက်က သိုင်းသူတော်စင် အသစ်များကို အနည်းငယ် အနေခက်စေသည်။

သူတို့သည် သိုင်းသူတော်စင် နယ်ပယ်ထဲသို့ ဝင်ရောက်ကာစသာ ရှိသေးပြီး အင်အားနှင့် အတွေ့အကြုံအရ ရှေးဟောင်း သူတော်စင်များကို ဘယ်လိုမှ မယှဉ်နိုင်ကြသေးပေ။ သိုင်းသူတော်စင် အသစ် အများစုမှာ ရှေးဟောင်း သူတော်စင်များ၏ ပြုစုပျိုးထောင်မှုကြောင့် ကောင်းကင်ဘုံ လူသား နယ်ပယ် ပြည့်စုံခြင်း အဆင့်သို့ ရောက်ရှိခဲ့ကြပြီး၊ ဝိညာဉ် နိုးထခြင်း အခွင့်အရေးကို ရယူကာ သိုင်းသူတော်စင် အဆင့်သို့ တက်လှမ်းလာနိုင်ကြသူများ ဖြစ်၏။ မိမိကိုယ်ပိုင် စွမ်းရည်ဖြင့် တက်လှမ်းလာသူမှာ လက်ချိုးရေ၍ပင် ရနိုင်၏။

ခြုံငုံကြည့်လိုက်လျှင်။

လေထုအခြေအနေက မဆိုးလှပေ။

စောစီးစွာ ရောက်ရှိနေကြသော သိုင်းသူတော်စင် အချို့သည် သူတို့၏ အတွေ့အကြုံနှင့် ဉာဏ်အလင်းများကို ဖလှယ်နေကြသလို၊ ရတနာ ပစ္စည်းများကိုလည်း အလဲအလှယ် လုပ်နေကြရာ သိုင်းသူတော်စင် အသစ်များအဖို့ အံ့အားသင့်စရာ အတွေ့အကြုံသစ် ဖြစ်နေတော့သည်။

တဖြည်းဖြည်းနှင့် သိုင်းသူတော်စင်များ ပိုမို ရောက်ရှိလာကြ၏။

ရုတ်တရက်၊

သိုင်းသူတော်စင် ဟေးဇီး ၏ မျက်လုံးများ အရောင်တောက်သွားသည်။ သူက ဘေးနားရှိ မိုးကြိုးမုန်တိုင်း သိုင်းသူတော်စင်နှင့် မြူဖြူ သိုင်းသူတော်စင် တို့ကို လက်ဖြင့် တို့လိုက်ရာ သူတို့နှစ်ဦးလည်း လှမ်းကြည့်လိုက်မိပြီး မျက်လုံးများ ပြူးကျယ်သွားကြ၏။ ထို့နောက် သုံးဦးသား အပြေးအလွှား ရှေ့တိုးကာ နှုတ်ဆက်လိုက်ကြလေသည်။

"အချိန်တိုလေး အတွင်းမှာ မိတ်ဆွေ ကောင်းကင်ဘုံဓားသခင် ရဲ့ အရှိန်အဝါက ပိုပြီး ခံ့ညားထည်ဝါ လာပါရောလား။ တာအိုမိတ်ဆွေများကို ဂါရဝပြုပါတယ်"

သူတို့ `(၃)` ဦးသည် ယဉ်ကျေးစွာ နှုတ်ဆက်လိုက်ကြ၏။

ရောက်လာသူများမှာ နင်ချီနှင့် သူ့အဖွဲ့ပင် ဖြစ်၏။ မိုးကြိုးမုန်တိုင်းနှင့် အဖွဲ့က မြှောက်ပင့် ဖားနေခြင်း မဟုတ်ပေ။ နင်ချီ့ထံတွင် သူတို့ နားမလည်နိုင်သော ပြောင်းလဲမှုများ ဖြစ်ပေါ်ခဲ့ကြောင်း အမှန်တကယ် ခံစားလိုက်ရသောကြောင့် ဖြစ်၏။ ထိုတာအိုဆရာ လူငယ်လေး၏ အရှိန်အဝါသည် အတိုင်းအဆမရှိ နက်ရှိုင်းလှသဖြင့် သူတို့ရင်ထဲတွင် အလိုလို လေးစားရိုသေစိတ်များ ဖြစ်ပေါ်လာရခြင်း ဖြစ်၏။

အကြည့်များစွာသည် နင်ချီ့ထံသို့ ရောက်ရှိလာကြပြီး သူတို့၏ ရင်ထဲတွင် တုန်လှုပ်မှုများ ဖြစ်ပေါ်သွားကြ၏။

လူတစ်ယောက်၏ နာမည်ဂုဏ်သတင်း ဆိုသည်မှာ သစ်ပင်ကြီးတစ်ပင်၏ အရိပ်အာဝါသ ကဲ့သို့ပင်၊

ကောင်းကင်ဘုံဓားသခင် သိုင်းသူတော်စင် ဆိုသော အမည်နာမသည် ဟိန်းထွက်နေပေသည်။

သူသည် တစ်ပိုင်း နတ်ဘုရား စွမ်းအား နယ်ပယ်သို့ မရောက်သေးသော်လည်း တိုက်ခိုက်နိုင်စွမ်းရည်မှာ ကြောက်ခမန်းလိလိ ကောင်းမွန်လှပြီး၊ ကောင်းကင်သတ် သိုင်းသူတော်စင်နှင့်ပင် ယှဉ်ပြိုင်ရန် အရည်အချင်း ပြည့်မီသူ ဖြစ်သည်ဟု ဆိုကြ၏။ ကောလာဟလ တစ်ခုအရ ကောင်းကင်ဘုံဓားသခင် သိုင်းသူတော်စင်သည် ရှေးဟောင်း သူတော်စင် မဟုတ်ဘဲ ယခုခေတ်မှ ပေါ်ထွက်လာသူ ဖြစ်သည်ဟု ပြောကြ၏။ သို့သော် လူအများက ထိုကောလာဟလကို မယုံကြ။ အချိန်တိုအတွင်း ဤမျှ မြင့်မားသော အဆင့်သို့ ရောက်ရှိနိုင်သည် ဆိုခြင်းမှာ ဖြစ်နိုင်ချေ မရှိဟု ယူဆကြ၏။

ထိုအချိန်၌..၊

မိုးကြိုးမုန်တိုင်းနှင့် အဖွဲ့က နင်ချီ့ကို သွားရောက် နှုတ်ဆက်သည်ကို မြင်လိုက်ရသောအခါ အချို့သော ရှေးဟောင်း သူတော်စင်များ၏ မျက်လုံးထဲတွင် မနာလိုဝန်တိုမှု အရိပ်အယောင်များ ဖြတ်ပြေးသွားသည်။ မိုးကြိုးမုန်တိုင်းတို့ အဖွဲ့သည် ကောင်းကင်ဘုံဓားသခင် သိုင်းသူတော်စင်ကို ရန်စခဲ့ဖူးသော်လည်း ကံဆိုးမသွားဘဲ အကျိုးထူးများပင် ရရှိခဲ့သည်ဟု သတင်းထွက်နေသည် မဟုတ်ပါလော။

ပြီးခဲ့သည့် ကာလများအတွင်း သိုင်းသူတော်စင် အများအပြားသည် နင်ချီ့ကို လာရောက် တွေ့ဆုံရန် ကြိုးပမ်းခဲ့သော်လည်း အားလုံး ယဉ်ကျေးစွာ ငြင်းပယ်ခြင်း ခံခဲ့ရသည်ကိုး။