မိစ္ဆာဘုရင်ကို ဆုံးမခြင်း

~တာအိုဆရာ လူငယ်လေးသည် လေဟာနယ် အလယ်တွင် မတ်မတ်ရပ်နေလေသည်။ သူ့ခန္ဓာကိုယ်ပေါ်မှ ဖြူဖွေးသော တာအိုဝတ်ရုံသည် လေထဲတွင် တဖျပ်ဖျပ် လွင့်ပျံနေပြီး သာမန်လူသားတို့ လိုက်မီနိုင်စွမ်းမရှိသော အရှိန်အဝါမျိုး ထွက်ပေါ်နေ၏။ သူ့ထံမှ ထွက်ပေါ်နေသော စူးရှသည့် ဓားသွားအငွေ့အသက်များကြောင့် သိုင်းသူတော်စင် အများစုမှာ သူ့ကို တည့်တည့်ပင် မကြည့်ရဲကြချေ။

သို့သော် သိုင်းသူတော်စင်များကို အပြင်းထန်ဆုံး တုန်လှုပ်သွားစေသည်မှာ နင်ချီ၏ ပါးစပ်မှ ထွက်လာသော စကားလုံးများပင် ဖြစ်တော့သည်။

တစ်ပိုင်း နတ်ဘုရား စွမ်းအား နယ်ပယ် အဆင့်ရှိသော အထွတ်အထိပ် ပုဂ္ဂိုလ်ကြီး တစ်ဦးကို ဒီနေရာသို့ "တက်ခဲ့" ဟု ခေါ်လိုက်သည်တဲ့လား။

ဘယ်လောက်တောင် မောက်မာလိုက်တဲ့ စကားလဲ။

အခြားသော အထွတ်အထိပ် ပုဂ္ဂိုလ်ကြီးများပင် ဒီလိုစကားမျိုး ပြောရဲမည် မဟုတ်ပေ။

သိုင်းသူတော်စင် အားလုံး၏ မျက်လုံးများ ပြူးကျယ်ကုန်ကြပြီး အသက်ရှူဖို့ပင် မေ့လျော့နေကြတော့သည်။

"မိတ်ဆွေ ဟေးရွှယ်..."

ကောင်းကင်သတ် သိုင်းသူတော်စင်က ဝင်ရောက် ဖျန်ဖြေရန် ကြိုးစားလိုက်သော်လည်း စကားပင် မဆုံးလိုက်ချေ။

သွေးမည်း မိစ္ဆာ ဘုရင် သည် ကောင်းကင်ယံသို့ ဒုံးပျံတစ်ခုပမာ ထိုးတက်သွားပြီး ဖြစ်နေ၏။ သူ့ဝတ်ရုံနက်ကြီးသည် လေထဲတွင် တလိပ်လိပ် တက်လာသော မိစ္ဆာ အခိုးအငွေ့များနှင့်အတူ လွင့်ပျံနေပြီး မျက်လုံးများထဲတွင် ဒေါသမီးများ တဟုန်းဟုန်း တောက်လောင်နေတော့သည်။

"ကောင်းပြီ... တော်တော် ကောင်းတဲ့ ကောင်လေး"

သွေးမည်း မိစ္ဆာ ဘုရင်က အံကြိတ်သံဖြင့် ပြောလိုက်၏။

"ငါ သွေးမည်း မိစ္ဆာ ဘုရင် လက်ငြိမ်နေတာ ကြာပြီ ဆိုပြီး ဘယ်ကမှန်း မသိတဲ့ ကောင်စုတ်လေးက ငါ့ခေါင်းပေါ် တက်နင်းရဲတယ်ပေါ့လေ"

သူက လူအုပ်ကြီးဘက်သို့ လှည့်ကာ ကြိမ်းမောင်းလိုက်၏။

"ဘယ်သူမှ ဝင်မပါနဲ့... ဝင်ပါတဲ့ကောင် ငါ့ရန်သူပဲ"

ကောင်းကင်သတ် သိုင်းသူတော်စင်၏ မျက်နှာထား ပျက်သွားသော်လည်း ပြောလုဆဲဆဲ စကားများကို ပြန်မျိုချလိုက်ရ၏။

မဟာယန် သိုင်းသူတော်စင်သည် သူတို့နှစ်ဦးကို စူးစိုက်ကြည့်နေပြီး ဘာလုပ်ရမှန်း မဝေခွဲတတ်သလို ဖြစ်နေ၏။

လိပ်အိုကြီး ၏ မျက်လုံးများကတော့ သွေးမည်း မိစ္ဆာ ဘုရင်အပေါ်တွင် အေးစက်စွာ ကျရောက်နေ၏။ သို့သော် သူ သက်ပြင်းတစ်ချက်ချပြီး မလိုအပ်ဘဲ ဝင်မပါရန် ဆုံးဖြတ်လိုက်၏။ ခန်းမဆောင် သခင်က အမိန့်မပေးဘဲ သူ ပြဿနာ မရှာချင်ပေ။ သို့သော်၊ ခန်းမဆောင် သခင်သာ တကယ်တမ်း နစ်နာသွားမည့် အခြေအနေမျိုး ဖြစ်လာခဲ့လျှင်တော့ သူ လက်ပိုက်ကြည့်နေမည် မဟုတ်ကြောင်း ဆုံးဖြတ်ချက်ချထားလိုက်၏။

တောင်ပင်လယ် နတ်ဘုရားအရှင်မကမူ ဝမ်းနည်းသယောင် အကြည့်မျိုးဖြင့် ကြည့်နေသော်လည်း နောက်ဆုံးတွင် သက်ပြင်းသဲ့သဲ့သာ ချလိုက်ရှာသည်။

အထွတ်အထိပ် ပုဂ္ဂိုလ်ကြီးများပင် နှုတ်ဆိတ်နေကြရာ အခြားလူများမှာ ဝင်ပြောရဲစရာ အကြောင်းမရှိ။ ပြောရလျှင် သူတို့မှာ ဝင်ပြောခွင့် အဆင့်အတန်းလည်း မရှိကြပေ။

အားလုံး နားလည်လိုက်ကြ၏။

ဒီနေ့ ဒီပုဂ္ဂိုလ်ကြီး `(၂)` ဦး၏ တိုက်ပွဲက ရှောင်လွှဲလို့ မရတော့သည့် အခြေအနေသို့ ဆိုက်ရောက်သွားချေပြီ။ ဒါသည် သိက္ခာပိုင်းဆိုင်ရာ တိုက်ပွဲပင် ဖြစ်တော့သည်။

နင်ချီနှင့် သွေးမည်း မိစ္ဆာ ဘုရင်တို့သည် လေဟာနယ် အလယ်တွင် မျက်နှာချင်းဆိုင် ရပ်လိုက်ကြ၏။

တစ်ဖက်က တည်ငြိမ်အေးဆေးနေပြီး ကျန်တစ်ဖက်ကတော့ ဒေါသအိုး ပေါက်ကွဲနေသကဲ့သို့ ဖြစ်နေသည်။

"ကောင်လေး... ဒီနေ့ ဒီဘုရင်ကြီးက အားနည်းတဲ့သူကို အနိုင်ကျင့်တယ်လို့ အပြောမခံချင်ဘူး။ ဒါကြောင့် မင်းကို `(၃)` ကွက် အရင် ပေးမယ်"

သွေးမည်း မိစ္ဆာ ဘုရင်က လက်တစ်ဖက်ကို နောက်ပစ်လိုက်ပြီး မောက်မာစွာ နှာမှုတ်လိုက်၏။ သူ့အရှိန်အဝါများကတော့ မိုးကောင်းကင်ကို ဖုံးလွှမ်းသွားမတတ် ကြီးမားနေသည်။

"သတိထားနော်... ဒီနေ့ ငါလုပ်တာ မင်းကို ရည်ရွယ်တာ မဟုတ်ဘူး။ စည်းကမ်း ဆိုတာ စည်းကမ်းအတိုင်း ဖြစ်ရမယ်။ ဘယ်သူမှ စည်းကမ်းကို ထင်သလို ချိုးဖောက်လို့ မရဘူး"

ပြောရင်းဆိုရင်း သူ့ပုံစံက ပေါ့ပေါ့ပါးပါးနှင့် အထင်သေးသည့် ပုံစံမျိုး ဖြစ်လာသည်။

နင်ချီ၏ မျက်လုံးများထဲတွင် ရွှေရောင်အလင်းများ လက်သွားသည်။

ဒီလူကို သူ ဒီနေ့မှ ပထမဆုံး မြင်ဖူးခြင်း ဖြစ်၏။ သို့သော် တစ်ဖက်လူက သူ့ကို အစကတည်းက ရန်လိုနေကြောင်း သူ အာရုံခံမိ၏။

ဝမ်ချွမ်နှင့် မိစ္ဆာဂိုဏ်းချုပ်ကြောင့် ဆိုလျှင်လည်း ဒီလောက်ထိ ဖြစ်စရာ အကြောင်းမရှိ။

သည်ကိစ္စက ရိုးရှင်းမည့်ပုံ မပေါ်ပေ။

'ငါ့ကို `(၃)` ကွက် အရင် ပေးမယ် ဟုတ်လား'

နင်ချီ့ နှုတ်ခမ်းထောင့်များ ကွေးညွတ်သွားပြီး လှောင်ပြုံးတစ်ခု ဖြစ်ပေါ်လာသည်။

တကယ်လို့သာ သူ အစွမ်းကုန် ထုတ်သုံးလိုက်မယ် ဆိုလျှင် ဒီ သွေးမည်း မိစ္ဆာ ဘုရင် ဆိုသည့် လူကြီး တစ်ကွက်တောင် ခံနိုင်မှာ မဟုတ်ပေ။ သို့သော် နင်ချီ အစွမ်းကုန် မသုံးချင်သေး။ လိပ်အိုကြီး သတိပေးထားသလို သိုင်းကမ္ဘာထဲမှာ မကောင်းကြံမည့်သူ ရှိနေနိုင်သည်။ သူသာ အစွမ်းကုန် ထုတ်ပြလိုက်လျှင် ပုန်းနေသည့် သစ္စာဖောက်က ကြောက်ပြီး ထွက်မလာဘဲ နေလိမ့်မည်။

သစ္စာဖောက်ကို ပုန်းခွင့် ပေးထားမည့်အစား ကိုယ့်သဘောနှင့် ကိုယ် ထွက်လာအောင် မျှားခေါ်လိုက်တာက နောက်မှ ဒုက္ခမရောက်အောင် ကာကွယ်ရာ ရောက်ပေမည်။

ထိုအတွေးနှင့်အတူ၊ နင်ချီ ဆုံးဖြတ်ချက် ချလိုက်၏။

သူ နိုင်ကို နိုင်ရမည်။ သွေးမည်း မိစ္ဆာ ဘုရင်၏ မောက်မာမှုကို ရိုက်ချိုးပစ်ရမည်။ သို့သော် အရမ်းကြီး မြန်မြန်ဆန်ဆန်နှင့် ပြတ်ပြတ်သားသားကြီး အနိုင်ယူလိုက်လို့ မဖြစ်သေး။ အမှောင်ထဲက သစ္စာဖောက် ကြောက်လန့်သွားမည် စိုးရ၏။

သူ့ခန္ဓာကိုယ်ပေါ်မှ အရှိန်အဝါများ ရုတ်တရက် မြင့်တက်လာသည်။

ပြိုင်ဘက်ကင်း ဓားစိတ်ဆန္ဒ တစ်ခု ကောင်းကင်ယံသို့ ထိုးတက်သွားလေသည်။ သိုင်းသူတော်စင် အဆင့်သို့ ရောက်ရှိပြီးနောက် ဓားစိတ်ဆန္ဒနှင့် ဝိညာဉ်စွမ်းအား ပေါင်းစပ်မှုသည် အရည်အသွေးပိုင်းဆိုင်ရာ ပြောင်းလဲမှုကြီး ဖြစ်ပေါ်ခဲ့ပြီး နောက်ထပ်တစ်ဆင့်သို့ မြင့်တက်သွားခဲ့ပြီ ဖြစ်၏။ ထိုအရာကို လူအများရှေ့ ထုတ်ပြလိုက်သည်နှင့် သိုင်းသူတော်စင် အများအပြားမှာ ပါးစပ်အဟောင်းသားနှင့် ငေးကြည့်နေမိကြတော့သည်။

ဒါတောင်မှ သွေးမည်း မိစ္ဆာ ဘုရင်က လက်တစ်ဖက် နောက်ပစ်ထားပြီး စတိုင်လ် ပျက်မခံသေးပေ။

နင်ချီကလည်း အားနာမနေတော့။

‘ခင်ဗျားကပဲ အတင်းပေးမယ် ဆိုမှတော့လည်း ကျွန်တော်က ယူရမှာပေါ့ဗျာ။’

သူ့မျက်နှာထားက တည်ငြိမ်နေပြီး လက်ညှိုးတစ်ချောင်းကို ဖြည်းညှင်းစွာ ထောင်လိုက်၏။

မျက်တောင်တစ်ခတ် အတွင်းမှာပင်၊

လက်ညှိုးထိပ်မှ ရွှေရောင်အလင်းတန်း တစ်ခု စူးရှစွာ ထွက်ပေါ်လာပြီး ကောင်းကင်တစ်ခွင်လုံးကို လွှမ်းခြုံသွားလေသည်။ အစွန်းရောက် ထက်ရှမှု တစ်ခု ရုတ်တရက် ပေါက်ကွဲထွက်လာ၏။ လူတိုင်း အံ့အားသင့်စွာ ကြည့်နေကြစဉ်မှာပင် ကြောက်မက်ဖွယ် ကောင်းသော ရွှေရောင် ဓားချီ တစ်ခုသည် လေဟာနယ်ကို ဆုတ်ဖြဲပြီး သွေးမည်း မိစ္ဆာ ဘုရင်ထံသို့ တိုးဝင်သွားလေတော့သည်။

"ကန်း သတ္တု နတ်ဘုရား ဓားချီ "

နင်ချီသည် အစကတည်းက သေကွက်တစ်ခုကို ထုတ်သုံးလိုက်ခြင်းပင်၊ အင်အားကို ထိန်းထားသည် ဆိုသော်လည်း ကောင်းကင်သတ် သိုင်းသူတော်စင်နှင့် တိုက်ခိုက်စဉ်ကထက် ပိုမို ပြင်းထန်နေသေးသည်။

ကောင်းကင်သတ် သိုင်းသူတော်စင်၏ မျက်လုံးအိမ်များ ကျဉ်းမြောင်းသွားပြီး ရင်ထဲတွင် တုန်လှုပ်သွားသည်။

သူသည် နင်ချီနှင့် ယှဉ်ပြိုင်ခဲ့ဖူးပြီး ထိုစဉ်က နင်ချီသည် ကျား (သစ်သားဓာတ်) နတ်ဘုရား ဓားချီကို သုံးခဲ့သည်။ ယခု ဓားချီနှင့် ယခင် ဓားချီသည် မူလဇာစ်မြစ် တစ်ခုတည်းက လာကြောင်း သူ သိလိုက်၏။ မထင်မှတ်ဘဲ အချိန်တိုလေး အတွင်းမှာ ဓားချီ၏ စွမ်းအားက ဒီလောက်ထိ တိုးတက်လာခဲ့သည်လား။

'သူ ထပ်ပြီး အဆင့်တက်သွားတာလား... ဒါမှမဟုတ် အဲဒီတုန်းကပဲ ငါ့ကို လက်လျှော့ပေးခဲ့တာလား'

ကောင်းကင်သတ် သိုင်းသူတော်စင် ဝေခွဲမရ ဖြစ်နေ၏။

အထွတ်အထိပ် ပုဂ္ဂိုလ်ကြီးများ၏ မျက်ဝန်းများ တည်ကြည်လေးနက် သွားကြ၏။

သိုင်းသူတော်စင် အသစ်များမှာမူ ပို၍ပင် တုန်လှုပ်နေကြ၏။

ဒီဓားတစ်ချက်တည်းနှင့်ပင် နင်ချီသည် သူ့အစွမ်းကို သက်သေပြလိုက်ပြီ ဖြစ်၏။ ဓာတ်ကြီးငါးပါး ပြည့်စုံခြင်း အဆင့်ရှိသော လူရိုင်းဧကရာဇ် ကဲ့သို့သော သူများပင် ရင်ထဲတွင် ထိတ်လန့်သွားကြ၏။ ထိုဓားချက်သာ သူတို့အပေါ် ကျရောက်လာပါက အလွယ်တကူပင် ခန္ဓာကိုယ် ပေါက်ထွက်သွားနိုင်ကြောင်း တွေးမိလိုက်ကြ၏။

သို့သော် အလန့်ဆုံး ဖြစ်သွားသူမှာ သွေးမည်း မိစ္ဆာ ဘုရင်ပင်၊

သူက ထိုဓားချက်ကို ထိပ်ဆုံးက ရင်ဆိုင်နေရသူ ဖြစ်သည်ကိုး။

ဓားချီက လေဟာနယ်ကို ခွဲပြီး ဝင်ရောက်လာသည့် တခဏမှာပင် ကြောက်မက်ဖွယ် ကောင်းသော ခြိမ်းခြောက်မှုကြီးကို သူ ခံစားလိုက်ရ၏။ ပြိုင်ဘက်ကင်းသော ထက်ရှမှုကြောင့် သူ့တစ်ကိုယ်လုံး ဆူးနှင့် အထိုးခံရသလို နာကျင်လာ၏။ သူ့မျက်လုံးအိမ်များ ကျဉ်းမြောင်းသွားပြီး အလိုအလျောက် ပြန်လည် တိုက်ခိုက်ရန် ပြင်လိုက်မိ၏။

သို့သော် ချက်ချင်းပင် အရာတစ်ခုကို သူ သတိရသွားသည်။

စောစောကမှ `(၃)` ကွက် အရင် ပေးမယ်လို့ သူပဲ လေလုံးထွားခဲ့သည် မဟုတ်ပါလော။ အခုမှ ထပြီး ပြန်တိုက်ခိုက်လိုက်လျှင် ကိုယ့်စကား ကိုယ် ပြန်ရုပ်သိမ်းရာ ရောက်ပြီး တစ်သက်လုံး ခေါင်းဖော်ရတော့မည် မဟုတ်။

"ဝုန်း"

သွေးမည်း မိစ္ဆာ ဘုရင် အံကိုတင်းတင်း ကြိတ်လိုက်၏။ မည်းနက်သော မိစ္ဆာ အခိုးအငွေ့များ သူ့ခန္ဓာကိုယ်မှ လှိမ့်ထွက်လာပြီး အလွှာလိုက် အလွှာလိုက် ကာကွယ်လိုက်ကြ၏။ ထို အခိုးအငွေ့များထဲမှ သရဲတစ္ဆေများ၏ ညည်းညူသံများ ထွက်ပေါ်လာပြီး ဖြူဖျော့သော လက်ချောင်းပေါင်း များစွာ ထိုးထွက်လာကြ၏။ ၎င်းတို့သည် သွေးမည်း မိစ္ဆာ ဘုရင် သတ်ဖြတ်ခဲ့သော ဝိညာဉ်များဖြင့် ဖန်တီးထားခြင်း ဖြစ်သည်ဟု ဆိုကြ၏။

မည်းနက်သော မိစ္ဆာ တိမ်တိုက်ကြီး ဖြစ်ပေါ်လာသည့် တခဏချင်းစီမှာပင် ရွှေရောင် ဓားချီက ထိုးဖောက် ဝင်ရောက်လာလေတော့သည်။

"ရွှီး... ရွှီး... ရွှီး"

တို့ဟူးကို ဓားနှင့် လှီးလိုက်သကဲ့သို့ပင်၊ ဘာမှ ခုခံနိုင်စွမ်း မရှိ။

ရွှေရောင် ဓားအလင်းတန်းသည် မိစ္ဆာ တိမ်တိုက်ကြီးကို ထိုးခွဲလိုက်ပြီး မရေမတွက်နိုင်သော ဖြူဖျော့သည့် လက်ချောင်းများကို ဖြတ်တောက် ပစ်လိုက်၏။ တိမ်တိုက်ကြီး တစ်ခုလုံး အမှုန့်အမွှား ဖြစ်သွားပြီး ဟင်းလင်းပြင် အက်ကြောင်းများ ပင့်ကူအိမ်သဖွယ် ပြိုကွဲထွက်လာတော့သည်။

ထိုစွမ်းအားသည် သိုင်းသူတော်စင် နယ်ပယ်ကို ကျော်လွန်နေပြီ ဖြစ်ရာ သိုင်းသူတော်စင် အားလုံး ပါးစပ်အဟောင်းသား ဖြစ်ကျန်ရစ်ခဲ့ကြ၏။

ပြိုင်ဘက်ကင်း ပါရမီရှင် ဆိုတာ ဘယ်လိုမျိုးလဲ ဆိုတာ သူတို့ ကောင်းကောင်းကြီး နားလည်သွားကြလေပြီတကား။