ကမ္ဘာ့ဆန္ဒ

~တောင်ပင်လယ် နတ်ဘုရားအရှင်မက နင်ချီ့ကို ပြန်လည် ပြုံးပြလိုက်သည့်အခါ သူမ၏ အပြုံးသည် အလွန်အမင်း တောက်ပနေပြီး ဖြူဖွေးသော အလင်းရောင်များက သူမ၏ ကိုယ်ခန္ဓာကို လွှမ်းခြုံထားရာ မည်သူမျှ မထိပါးရဲလောက်အောင် မြင့်မြတ်သော အရှိန်အဝါမျိုး ထွက်ပေါ်နေလေသည်။

ထိုမြင်ကွင်းက အခြားသူများ၏ မျက်လုံးထဲသို့ ရောက်သွား၏။

လူအများက စိတ်ထဲတွင် ကျိတ်ပြီး သက်ပြင်းချမိကြ၏။ ကမ္ဘာပေါ်တွင် ဆွဲဆောင်မှု အရှိဆုံး အမျိုးသမီးဟု သတ်မှတ်ခံရသူ တောင်ပင်လယ် နတ်ဘုရားအရှင်မသည် ကောင်းကင်ဘုံဓားသခင် သိုင်းသူတော်စင် ကဲ့သို့သော ပြိုင်ဘက်ကင်း ပါရမီရှင်မျိုးကိုမှ မျက်နှာသာ ပေးတတ်ပါလားဟု တွေးမိကြ၏။

သွေးမည်း မိစ္ဆာ ဘုရင်၏ မျက်နှာကမူ အိုးမဲသုတ်ထားသကဲ့သို့ မည်းနက်နေတော့သည်။

သူက ပြင်းထန်စွာ နှာမှုတ်လိုက်ပြီး သူ့နေရာတွင် ပြန်ထိုင်လိုက်၏။

ဒီနေ့တော့ သူ့သိက္ခာ လုံးဝ ကျသွားခဲ့ချေပြီ။ ကာလတိုအတွင်း ပြန်ဆယ်ဖို့ အခွင့်အလမ်း မရှိတော့။ တောင်နှင့် ပင်လယ် နယ်မြေ၏ ခြိမ်းခြောက်မှု ရှိနေသရွေ့ ကောင်းကင်သတ် သိုင်းသူတော်စင်နှင့် သွေးမည်း မိစ္ဆာ ဘုရင်တို့သည် သေသည်အထိ တိုက်ခိုက်ကြမည် မဟုတ်ကြောင်း လူတိုင်း သိထားကြ၏။

သူတို့နှစ်ဦး အပြန်အလှန် သည်းခံနေကြသည်မှာ တစ်ဦးကို တစ်ဦး အသုံးလိုနေသေးသည်ဟု ယူဆထားကြသောကြောင့်သာ ဖြစ်၏။

သိုင်းသူတော်စင် အားလုံး ဒါကို ကောင်းကောင်းကြီး နားလည်ထားကြ၏။

သို့သော် သူတို့အားလုံး အံ့အားသင့်နေကြဆဲပင်၊

ဒီနေ့ တိုက်ပွဲ ပြီးသွားသောအခါ။

သိုင်းကမ္ဘာ၏ အထွတ်အထိပ် ပုဂ္ဂိုလ်ကြီးများ စာရင်းတွင် `(၅)` ဦး မဟုတ်တော့ဘဲ `(၆)` ဦး ဖြစ်လာခဲ့ပြီ ဖြစ်၏။

အစမှအဆုံး တည်ငြိမ်နေသော နင်ချီ့ကို ကြည့်ပြီး သူတို့၏ မျက်လုံးများထဲတွင် လေးစားရိုသေစိတ်များ ပြည့်နှက်နေ၏။ နင်ချီနှင့် သွေးမည်း မိစ္ဆာ ဘုရင်တို့၏ ပဋိပက္ခသည် မည်သို့ပင် ဖြစ်စေကာမူ၊ ဒါသည် အထွတ်အထိပ် ပုဂ္ဂိုလ်ကြီးများကြားက ကိစ္စသာ ဖြစ်ပြီး သူတို့ လိုက်မီနိုင်သော အရာ မဟုတ်ပေ။

ကြားဖြတ် အစီအစဉ် ပြီးဆုံးသွားသည်။

လူတိုင်း နေရာပြန်ယူလိုက်ကြ၏။

ကောင်းကင်သတ် သိုင်းသူတော်စင်က ထပ်မံ မေးမြန်းလိုက်၏။

"သိုင်းသူတော်စင် ကောင်းကင်ဘုံဓားသခင်ရဲ့ နေရာနဲ့ ပတ်သက်ပြီး တစ်ခြား သဘောထား ကွဲလွဲတာများ ရှိကြသေးလား"

သိုင်းသူတော်စင် အားလုံး တညီတညွတ်တည်း ခေါင်းခါလိုက်ကြပြီး ပြောလိုက်ကြ၏။

"သိုင်းသူတော်စင် ကောင်းကင်ဘုံဓားသခင် ရှိနေတာ ကျုပ်တို့ သိုင်းကမ္ဘာအတွက် ကံကောင်းခြင်းပါပဲဗျာ"

ဟာသပဲ... အထွတ်အထိပ် ပုဂ္ဂိုလ်ကြီး အများစုက သဘောတူလိုက်မှတော့ သူတို့က ဘာပြောနိုင်ဦးမှာလဲ။ ကျင့်ကြံခြင်း အဆင့်နဲ့ ခွဲဝေမယ်သာ ပြောတယ်... တကယ်တမ်းကျတော့ လက်သီး ဘယ်သူ ပိုကြီးလဲ ဆိုတာကပဲ အဆုံးအဖြတ် ပေးသွားတာပါပဲ။

သွေးမည်း မိစ္ဆာ ဘုရင်က အေးစက်စွာ နှာမှုတ်လိုက်သော်လည်း လေထု ပျက်သွားအောင် ထပ်ပြီး ဘာမှ မပြောတော့ပေ။

သို့သော် သူ့နောက်မှ ဝမ်ချွမ်နှင့် မိစ္ဆာဂိုဏ်းချုပ်တို့ နှစ်ဦးစလုံး ခေါင်းငုံ့ထားကြပြီး အသက်ပင် ပြင်းပြင်း မရှူရဲကြ။ တစ်ချိန်က တာအိုဆရာ ကောင်းကင်ဘုံဓားသခင် ဆိုသော ပုဂ္ဂိုလ်သည် ဤမျှ ကြမ်းတမ်းခက်ထန်လိမ့်မည်ဟု သူတို့ ထင်မထားခဲ့ကြပေ။

ဖုန်မှုန့်များ ငြိမ်သက်သွားပြီ ဖြစ်၏။

ကောင်းကင်သတ် သိုင်းသူတော်စင်က ပြုံး၍ ပြောလိုက်၏။

"ကန့်ကွက်သူ မရှိရင် ဒီအတိုင်းပဲ ဆုံးဖြတ်လိုက်ကြတာပေါ့။ ဒီရက်ပိုင်းအတွင်း လူတိုင်း ကောင်းကင်ဘုံ တောင်ထွတ် မှာပဲ တည်းခိုကြပါ။ နောက် `(၅)` ရက်နေရင် ငါတို့ ကောင်းကင်ဘုံ ဆီ တက်ကြမယ်... မိုးကြိုးမုန်တိုင်း တားမြစ်နယ်မြေ ကို ဖြတ်ကျော်ကြမယ်"

သိုင်းသူတော်စင် အားလုံး စိတ်လှုပ်ရှားမှုကြောင့် သွေးများ ဆူပွက်လာကြ၏။

နှစ်ပေါင်း ထောင်ချီ ကြာမြင့်ခဲ့သော စီမံကိန်းကြီးသည် ဤ ရင်ခုန်စရာ အခိုက်အတန့်လေး အတွက်ပင် မဟုတ်ပါလော။

အဲဒီအချိန် ရောက်ရင်။

လူတိုင်း မိမိတို့၏ အကန့်အသတ်ကို ကျော်လွန်ပြီး နောက်ထပ်တစ်ဆင့် တက်လှမ်းနိုင်ကြတော့မည်။ ကျင့်ကြံခြင်း အဆင့် နိမ့်လေ တိုးတက်မှု ပိုများလေပင် ဖြစ်၏။

နင်ချီလည်း မျှော်လင့်နေမိ၏။

သို့သော် တွက်ချက်ကြည့်လိုက်သည့်အခါ နယ်မြေ အရှင်သခင် နယ်ပယ် ကို `(၅)` ရက်အတွင်း အပြီးသတ် ဖန်တီးနိုင်ဖို့ မဖြစ်နိုင်ကြောင်း တွေ့ရှိလိုက်ရ၏။ နောက်ထပ် ရက်အနည်းငယ်လောက် လိုဦးမည်။

"ထားလိုက်ပါတော့လေ... လက်ရှိ ကြုံတွေ့နေရတဲ့ ကိစ္စတွေကိုပဲ အရင် ဖြေရှင်းလိုက်တာပေါ့"

...

ညဉ့်နက်သန်းခေါင်။

ကောင်းကင်ဘုံ တောင်ထွတ်တွင် မီးရောင်များ ထိန်ထိန်လင်းနေဆဲ။ သိုင်းသူတော်စင်များအတွက် ရက်အနည်းငယ် အိပ်မပျော်ဘဲ နေရသည်မှာ ရိုးရှင်းသော ကိစ္စပင်၊ ဤကဲ့သို့ သိုင်းသူတော်စင် အများအပြား စုဝေးမိခဲသဖြင့် အများစုမှာ သိုင်းပညာ အတွေ့အကြုံများ ဖလှယ်ခြင်း၊ အသုံးဝင်သော ရတနာများ လဲလှယ်ခြင်းများ ပြုလုပ်နေကြ၏။

နင်ချီ ခေတ္တမျှ လမ်းလျှောက်ထွက်ကြည့်ပြီးနောက် နယ်မြေ အရှင်သခင် နယ်ပယ်ကို ဆက်လက် တွက်ချက်ရန် ပြန်လာခဲ့သည်။

သူ့အတွက်တော့ သိုင်းသူတော်စင်များ ကမ်းလှမ်းသော ပစ္စည်းအများစုမှာ စိတ်ဝင်စားစရာ မကောင်းလှပေ။

ခန်းမဆောင် အတွင်း၌..၊

နင်ချီသည် ပင်မနယ်ပယ်အား ပြီးပြည့်စုံအောင် ဖန်တီးနေရင်း ဉာဏ်အလင်းများ တဖျပ်ဖျပ် ပွင့်နေ၏။

"နယ်မြေ အရှင်သခင် နယ်ပယ်ထဲ ဝင်ရောက်ဖို့ ပထမ အတားအဆီးက တာအို တစ်သောင်း ကို သဘောပေါက် နားလည်ပြီး တစ်ခုတည်းအဖြစ် ပေါင်းစည်းရမယ်။ ဒါမှ ကမ္ဘာငယ်လေးရဲ့ ကမ္ဘာ့ဆန္ဒနဲ့ အပြည့်အဝ ထပ်တူကျနိုင်မှာ"

ဒီအတားအဆီးက အလွန် ခက်ခဲသော်လည်း နင်ချီ့အတွက်တော့ ရိုးရှင်းလွန်းသည်။ အဘယ်ကြောင့်ဆိုသော် တာအို တစ်သောင်း နိဗ္ဗာန် နည်းစနစ် ကို ဖန်တီးစဉ်ကတည်းက ဒီလုပ်ငန်းစဉ်ကို သူ ပြီးမြောက်ခဲ့ပြီး ဖြစ်၏။ နိဗ္ဗာန် မီးတောက် ဆိုသည်မှာ တာအို တစ်သောင်း၏ အနှစ်သာရများ ပေါင်းစပ်ထားခြင်းပင် မဟုတ်ပါလော။

"ဒုတိယ အတားအဆီးက ကမ္ဘာ့ဆန္ဒနဲ့ ပေါင်းစည်းရမယ်။ ဒီအဆင့်မှာ အသေးစိတ် စိစစ်စရာတွေ ပိုများတယ်။ ကမ္ဘာ့ဆန္ဒမှာ ပြည့်စုံတဲ့ ဉာဏ်ပညာ မရှိပေမယ့် အန္တရာယ်ကို အလိုအလျောက် အာရုံခံနိုင်စွမ်းတော့ ရှိတယ်။ မဟုတ်ရင် တောင်နှင့် ပင်လယ် နယ်မြေ ကျူးကျော်မှုကို ခုခံဖို့ နိုးထလာမှာ မဟုတ်ဘူး"

"ကံကောင်းတာ တစ်ခုက ငါ့ရဲ့ ပေါင်းစည်းမှုက သိုင်းကမ္ဘာအတွက် အန္တရာယ် မရှိဘူး။ ဒါကြောင့် ခုခံမှု သိပ်မပြင်းထန်လောက်ဘူး။ ဒါပေမဲ့ အကြွင်းမဲ့ အင်အားတော့ လိုအပ်နေသေးတယ်"

"နောက်ဆုံး အတားအဆီးကတော့... ကမ္ဘာ့ဆန္ဒနဲ့ ပေါင်းစည်းပြီးရင် ကမ္ဘာကြီးကို ခရမ်းရောင် နန်းတော်အဖြစ် ပြောင်းလဲပစ်ရမယ်။ ဒါမှ မှော်စွမ်းအင် ထက် ပိုသန်မာတဲ့ နယ်ပယ် စွမ်းအား ကို စုစည်းနိုင်မှာ.. ပြီးတော့ မွေးရာပါ နတ်ဘုရား နည်းစနစ်တွေကိုပါ ဖန်တီးနိုင်မယ်။ သူများတွေက တစ်ခုပဲ ရှိချိန်မှာ ငါက ထောင်နဲ့ချီ ပိုင်ဆိုင်ထားနိုင်မယ်"

နင်ချီ အသေးစိတ် အချက်အလက်များကို အဆက်မပြတ် စဉ်းစားသုံးသပ်နေ၏။

နယ်ပယ်သစ် တစ်ခု ဖော်ထုတ်ခြင်းသည် လွယ်ကူသော ကိစ္စ မဟုတ်။

ကံကောင်းသည်မှာ အစစ်အမှန်သိုင်း ဘိုးဘေး၏ အထွတ်အထိပ် ဓမ္မ နည်းလမ်းများနှင့် အင်မော်တယ် လမ်းစဉ် ကျင့်ကြံခြင်း စနစ်တို့ကို အခြေခံထားသဖြင့် အချိန်များစွာ သက်သာစေခဲ့သည်။

ရုတ်တရက်။

သူ့မျက်နှာထား ပြောင်းလဲသွားပြီး မျက်လုံးများ ဖွင့်လိုက်၏။

ခန်းမဆောင် အပြင်ဘက်မှ ချီးကျူးသံ ပါသော ရယ်သံတစ်သံ ထွက်ပေါ်လာသည်။

"သိုင်းသူတော်စင် ကောင်းကင်ဘုံဓားသခင် ဆိုတာ တကယ်ပဲ ထိုက်တန်ပါပေတယ်။ မမဖြင့် အားကျလိုက်တာ"

နင်ချီ၏ မျက်နှာထား အနည်းငယ် ထူးဆန်းသွားသည်။

မမ ဟုတ်လား။

နှစ်ပေါင်း သောင်းချီ နေလာတဲ့ စုန်းမကြီးကများ... ငါ့လို ဆယ်ကျော်သက်လေး ရှေ့မှာ မမလို့ ကိုယ့်ကိုယ်ကိုယ် သုံးနှုန်းရဲတယ်ပေါ့လေ။

သူက အေးစက်စွာ ပြန်ပြောလိုက်၏။

"နတ်ဘုရားအရှင်မ မြှောက်ပင့်လွန်းပါပြီ။ ဒါတွေက သာမန် မျက်လှည့်ပြကွက်တွေပါပဲ။ ဒီလောက် ညကြီးမင်းကြီး ဘာကိစ္စ ရှိလို့ ရောက်လာတာပါလိမ့်"

ခန်းမ တံခါး ပွင့်သွားသည်။

တောင်ပင်လယ် နတ်ဘုရားအရှင်မ၏ ကျက်သရေရှိပြီး ရိုးရှင်းသော ပုံရိပ် ပေါ်ထွက်လာသည်။ လက်ထဲတွင် သန့်စင်ခြင်း ပုလင်း ကို ကိုင်ဆောင်ထားပြီး နတ်ဘုရားမ တစ်ပါးကဲ့သို့ ခံ့ညားထည်ဝါနေ၏။ သူမက နင်ချီ့ကို တောက်ပသော မျက်ဝန်းများဖြင့် ကြည့်လိုက်၏။

"ဒီနေ့ မောင်လေးရဲ့ နတ်ဘုရား စွမ်းအားကို မြင်လိုက်ရတော့ မမ… လေးစားမိသွားလို့ လာနှုတ်ဆက်တာပါ။ နေ့ခင်းတုန်းက ဖြစ်ခဲ့တာတွေကို စိတ်ထဲ မထားဘူးလို့ မျှော်လင့်ပါတယ်" သူမက နူးညံ့စွာ ပြောလိုက်၏။ သူမ၏ အသံတွင် ညှို့ဓာတ်များ ပါဝင်နေသဖြင့် ကြားရသူကို သတိလက်လွတ် ဖြစ်သွားစေနိုင်သည်။

သို့သော် နင်ချီ၏ စိတ်နှလုံးက တည်ငြိမ်နေပြီး တုန်လှုပ်ခြင်း မရှိ။

"နောက်နေပါပြီ.. နတ်ဘုရားအရှင်မရယ်။ တာအိုမိတ်ဆွေကြီးတို့နဲ့ ယှဉ်ရင် ကျွန်တော်က လိုပါသေးတယ်"

တောင်ပင်လယ် နတ်ဘုရားအရှင်မ၏ မျက်ဝန်းများ အနည်းငယ် မှေးမှိန်သွားသည်။