ကမ္ဘာ့ဆန္ဒ (၃)

~နင်ချီသည် ထိုလမ်းကြောင်းကို ကောင်းစွာ ရင်းနှီးကျွမ်းဝင်နေပြီ ဖြစ်၍ သူ၏ စိတ်နှလုံးသည် ရေပြင်ပမာ တည်ငြိမ်နေလေသည်။

သူသည် ကောင်းကင်ဘုံလူသား နယ်ပယ်သို့ ရောက်ရှိစ အချိန်ကတည်းက ဤနေရာသို့ ခြေချခဲ့ဖူးပြီး၊ ဤနေရာရှိ မိုးကြိုးမုန်တိုင်းများကို အသုံးပြု၍ ကျင့်ကြံအားထုတ်ခဲ့ဖူးသည်။ အတိတ်ကာလက ဤမျှများပြားသော မိုးကြိုးများသည် သူ့အတွက် အလွန်အမင်း ကြောက်မက်ဖွယ်ကောင်းခဲ့သော်လည်း၊ ယခုအချိန်တွင်မူ လေပြေလေညှင်းသကဲ့သို့သာ သဘောထားလိုက်တော့သည်။

ထိုအချိန်၌ သူတော်စင်အပေါင်းတို့သည် စုဝေးရောက်ရှိနေကြပြီး၊ ဝိညာဉ်စွမ်းအားများ ပေါင်းစည်းကာ အကာအကွယ်နယ်မြေတစ်ခု ဖန်တီးလိုက်ကြရာ မိုးကြိုးအများအပြားသည် လမ်းခုလတ်၌ပင် ပျက်စီးပျောက်ကွယ်သွားကြလေသည်။

သိုင်းသူတော်စင်များအတွက် မိုးကြိုးမုန်တိုင်း တားမြစ်နယ်မြေ အတွင်းရှိ မိုးကြိုးအများစုသည် ကြောက်ရွံ့စရာ မဟုတ်တော့ချေ။

သူတော်စင်အပေါင်းတို့သည် တားမြစ်နယ်မြေအတွင်းသို့ ခြေလှမ်းကျဲကျဲ လှမ်းဝင်လိုက်ကြ၏။

ဤမျှများပြားသော ပြင်ပဧည့်သည်များ ဝင်ရောက်လာမှုသည် မိုးကြိုးများကို အမျက်ဒေါသ ထွက်စေခဲ့ပုံရပြီး၊ နင်ချီ တစ်ခါမှ မကြုံဖူးလောက်အောင် ပိုမိုပြင်းထန်ကြမ်းတမ်းလာသည်။ သို့သော် အချည်းနှီးသာ ဖြစ်လေ၏။

နောက်ဆုံးတွင် သူတို့သည် နောက်ဆုံးအတားအဆီးသို့ ရောက်ရှိလာကြ၏။

သွေးရောင် လျှပ်စီးများ။

`ဂျိန်း... ဒိုင်း`

ကြောက်မက်ဖွယ် ကောင်းသော မြည်ဟိန်းသံကြီးသည် သိုင်းသူတော်စင်တိုင်း၏ နားစည်ကို ရိုက်ခတ်သွားလေသည်။ ထိုအချိန်၌ ကောင်းကင်သတ် သိုင်းသူတော်စင် နှင့် အခြားသော အထွတ်အထိပ် ပုဂ္ဂိုလ်ကြီးများပင်လျှင် မျက်နှာထား တည်ကြည်လေးနက်သွားကြ၏။ သွေးရောင်လျှပ်စီးများ ယှက်နွယ်နေသည်မှာ လမ်းကြောင်းတစ်ခုလုံးကို ပိတ်ဆို့ထားသော မိုးကြိုးကောင်းကင် ကာရံကြီးသဖွယ် ဖြစ်ပေါ်နေသည်ကို တွေ့မြင်လိုက်ရသောကြောင့် ဖြစ်ပေသည်။

သွေးရောင်လျှပ်စီး တစ်ခုချင်းစီသည် ကြောက်မက်ဖွယ် အရှိန်အဝါများကို ထုတ်လွှတ်နေပြီး အတွင်း၌ ထူးဆန်းသော ပုံရိပ်များ ပေါ်ထွက်နေ၏။ တစ်ခါတစ်ရံတွင် သွေးရောင် မိုးကြိုးနဂါးကြီးအဖြစ် ပြောင်းလဲသွားလိုက်၊ တစ်ခါတစ်ရံတွင် ရှေးဟောင်း မိုးကြိုးတောင်ကြီးအဖြစ် ပုံစံပြောင်းသွားလိုက်နှင့် အမျိုးမျိုး အဖုံဖုံ ဆန်းကြယ်လှပေသည်။

ဤအခြင်းအရာက ကမ္ဘာ့ဆန္ဒ အစဦး နိုးထမှုကြောင့် သွေးရောင်လျှပ်စီးများ၏ စွမ်းအား အတော်အတန် လျော့ကျသွားပြီး ဖြစ်သော အခြေအနေပင်၊ သို့မဟုတ်ပါက သူတို့အနေဖြင့် ဤနေရာသို့ ခြေချရဲကြမည် မဟုတ်ချေ။

ကောင်းကင်သတ် သိုင်းသူတော်စင်သည် အခြားသော အထွတ်အထိပ် ပုဂ္ဂိုလ်ကြီးများကို လှမ်းကြည့်လိုက်၏။

"ကဲ... လူကြီးမင်းတို့ ခင်ဗျာ။ ကျွန်တော်တို့ တစ်ယောက်စီက တာအိုမိတ်ဆွေ တချို့ကို တာဝန်ယူ ကာကွယ်ပေးလိုက်ကြရအောင် ဗျာ"

အားလုံးက သဘောတူ ခေါင်းညိတ်လိုက်ကြ၏။

ထို့နောက်။

ကောင်းကင်သတ် သိုင်းသူတော်စင်က ရှေ့ဆုံးမှ ဦးဆောင်ထွက်လိုက်၏။ သူကိုင်ဆောင်ထားသော တောင်ဝှေးကို ပစ်လိုက်ရာ ချက်ချင်းပင် ကောင်းကင်ထိုးမတ်နေသော တိုင်လုံးကြီးအဖြစ် ပြောင်းလဲသွားသည်။

တစ်ဆက်တည်း၌၊ ကြီးမားသော ဓားတစ်လက်သည် ဓားအိမ်ထဲမှ ထွက်ပေါ်လာပြီး၊ ကောင်းကင်သတ် ဓားစိတ်ဆန္ဒသည် အာဏာစက် ပြင်းထန်စွာဖြင့် ပတ်ဝန်းကျင်ရှိ သွေးရောင်လျှပ်စီးများကို အတင်းအဓမ္မ ချေမှုန်းပစ်လိုက်၏။ ကောင်းကင်သတ် ဓားစိတ်ဆန္ဒ အတွင်း၌ ကိန်းအောင်းနေသော စွမ်းအားတစ်ခု ရှိနေကြောင်း နင်ချီ သတိထားမိလိုက်၏။

“ဒါ... နတ်ဘုရား နည်းစနစ် အကြမ်းထည် များလား”

နင်ချီ တိုးညှင်းစွာ ရေရွတ်လိုက်မိသည်။

ကောင်းကင်သတ် သိုင်းသူတော်စင်က အော်ဟစ်လိုက်၏။

"ငါ့နောက် လိုက်ခဲ့ကြဟေ့"

ကောင်းကင်ထိုး ဓားအလင်းတန်းကြီးသည် သိုင်းသူတော်စင် `(၂၀)` ခန့်ကို သယ်ဆောင်ပြီး လမ်းဖွင့်ပေးလိုက်၏။

နောက်တစ်ယောက်မှာ မဟာယန် သိုင်းသူတော်စင် ဖြစ်၏။ သူသည် လက်ထဲတွင် အနီရောင် တံဆိပ်တုံး တစ်ခုကို ကိုင်ဆောင်ထားပြီး ကြီးမားသော အရှိန်အဝါများ ထွက်ပေါ်နေ၏။ တစ်ခဏအတွင်း အဆုံးမဲ့ မီးတောက်များ လှိမ့်ထွက်လာပြီး မီးကြာပန်းကြီး တစ်ပွင့်အဖြစ် ပြောင်းလဲသွားသည်။ သူသည်လည်း သိုင်းသူတော်စင် `(၂၀)` ခန့်ကို သယ်ဆောင်ပြီး ကောင်းကင်သတ် သိုင်းသူတော်စင်၏ နောက်မှ ကပ်လျက် လိုက်ပါသွားသည်။

လိပ်အိုကြီက အနည်းငယ် ပြုံးလိုက်၏။

သူသည် မူလဇာစ်မြစ် ပုံစံအမှန်ကို ထုတ်ဖော်လိုက်၏။ ပေပေါင်း ထောင်ချီ ကြီးမားသော ပုံစံ မဟုတ်သော်လည်း ပေ `(၁၀)` ကျော်ခန့် ရှိသော လိပ်ကြီးအဖြစ် ပြောင်းလဲလိုက်၏။ လိပ်ခွံပေါ်မှ စိမ်းစိုသော အလင်းရောင်များ တောက်ပနေသည်။

သူသည် သိုင်းသူတော်စင် `(၂၀)` ခန့်ကို သူ့အောက်တွင် ခိုလှုံစေပြီး သွေးရောင်လျှပ်စီးများကို ပင်လယ်ရေပြင်သဖွယ် သဘောထားကာ သက်တောင့်သက်သာပင် ကူးခတ်သွားလေသည်။

၎င်းကို ကြည့်ရင်း၊ သွေးမည်း မိစ္ဆာ ဘုရင် က အေးစက်စွာ နှာမှုတ်လိုက်၏။

ရုတ်ချည်းပင်၊ သူ့လက်ထဲတွင် သွေးမည်း မိစ္ဆာ တံခွန် ဖွဲ့တည်လာသည်။ တံခွန်သည် လေတိုက်ခတ်မှုကြောင့် ကြီးထွားလာပြီး မည်းနက်သော တိမ်တိုက်များ လိပ်တက်လာကာ သိုင်းသူတော်စင် `(၂၀)` ခန့်ကို သယ်ဆောင်ပြီး ထွက်ခွာသွားသည်။

တောင်ပင်လယ် နတ်ဘုရားအရှင်မ က နင်ချီ့ကို နူးညံ့စွာ ပြုံးပြလိုက်၏။ ထို့နောက် လက်ထဲမှ သန့်စင်ခြင်း ကျောက်စိမ်းပုလင်း သည် နူးညံ့သော မြင့်မြတ်အလင်းရောင်များ ထုတ်လွှတ်လိုက်ပြီး လက်တစ်ထောင် ဗောဓိသတ္တ ပုံရိပ်ကို ဖန်တီးလိုက်သည်။ ဗောဓိသတ္တ၏ လက်ဝါး `(၂၀)` သည် သိုင်းသူတော်စင် `(၂၀)` ကို မတင်လိုက်ပြီး ရင်ခွင်ထဲတွင် ကာကွယ်ထားလျက် သွေးရောင်လျှပ်စီးများဆီသို့ ဦးတည်သွားသည်။

အထွတ်အထိပ် ပုဂ္ဂိုလ်ကြီး တစ်ဦးစီသည် သူတို့၏ နတ်ဘုရား နည်းစနစ်များကို ထုတ်ဖော်ပြသလိုက်ရာ သိုင်းသူတော်စင် အားလုံး အံ့သြမှင်သက်သွားကြ၏။

နင်ချီ၏ မျက်လုံးများထဲတွင် ရွှေရောင်အလင်းများ တောက်ပသွားပြီး တိတ်တဆိတ် ခေါင်းညိတ်လိုက်သည်။

ယခုမူ၊ သူ တစ်ယောက်တည်းသာ ကျန်တော့သည်။

သူ ပေါ့ပါးစွာ ရယ်မောလိုက်ပြီး လက်ကို ဝှေ့ယမ်းလိုက်ရာ အစစ်အမှန်သိုင်းဓား သည် ချက်ချင်းပင် ပေ `(၁၀)` ကျော်ခန့် ကြီးထွားလာပြီး ပြိုင်ဘက်ကင်း ထက်ရှမှုကို ထုတ်လွှတ်ကာ ဓားသွားရှေ့မှ လျှပ်စီးများကို ဖြတ်တောက်လိုက်၏။

"ခင်ဗျားတို့ ကျွန်တော့်နောက် လိုက်ခဲ့ကြ ဗျာ"

ကျန်ရှိနေသော သိုင်းသူတော်စင်များသည် လေးစားစွာဖြင့် အစစ်အမှန်သိုင်းဓားပေါ်သို့ ခုန်တက်လိုက်ကြပြီး အားလုံးသည် ဓားအလင်းတန်း တစ်ခုအသွင် ပြောင်းလဲကာ ရှေ့သို့ တိုးဝင်သွားကြသည်။

သွေးရောင် လျှပ်စီးများသည် နက်ရှိုင်းသော ချောက်ကမ်းပါးကြီးသဖွယ်၊ သမုဒ္ဒရာကြီးသဖွယ် ဖြစ်နေပြီး ၎င်း၏ ကြောက်မက်ဖွယ် စွမ်းအားကြောင့် အထွတ်အထိပ် ပုဂ္ဂိုလ်ကြီးများပင် သတိကြီးကြီး ထားနေရ၏။ သိုင်းသူတော်စင်များမှာမူ ကြောက်ရွံ့မှုများ ပြည့်နှက်နေပြီး ခြေလှမ်းတစ်လှမ်း မှားလိုက်သည်နှင့် လျှပ်စီးပင်လယ်ထဲတွင် အရိုးပင် ရှာမရအောင် ပျောက်ဆုံးသွားမည်ကို စိုးရိမ်နေကြသည်။

နင်ချီသည် သက်တောင့်သက်သာပင် သွားလာနေသော်လည်း အခြားသူများနှင့် သိပ်မကွာခြားသော အနေအထားကို ထိန်းသိမ်းထားသည်။

ထိုအချက်က တိတ်တဆိတ် စောင့်ကြည့်နေသူများကို သက်ပြင်းချနိုင်စေခဲ့၏။

မကြာမီ ၊ သွေးရောင် လျှပ်စီးပင်လယ်သည် အထွတ်အထိပ်သို့ ရောက်ရှိသွားသည်။

ကြီးမားခမ်းနားပြီး လေးစားဖွယ် ကောင်းသော အရှိန်အဝါကြီး တစ်ခု သူတို့ကို လွှမ်းခြုံသွားရာ သိုင်းသူတော်စင်တိုင်း၏ ရင်ထဲတွင် အလိုအလျောက် ရိုသေစိတ်များ ဖြစ်ပေါ်လာကြ၏။

နင်ချီ၏ စိတ်နှလုံး လှုပ်ရှားသွားပြီး အနည်းငယ် စိတ်လှုပ်ရှားလာသည်။

'အဲဒါများ... ကမ္ဘာ့ဆန္ဒ ဖြစ်နေမလား'

သွေးရောင် လျှပ်စီးများကို ဖြတ်ကျော်လိုက်သည်နှင့် နေရာလပ် အသစ်တစ်ခု လူတိုင်း၏ ရှေ့မှောက်တွင် ပေါ်လာသည်။ ထိုနေရာ၏ အမြင့်ဆုံး အထွတ်အထိပ်တွင် ဖော်ပြ၍ မရနိုင်သော ဖြစ်တည်မှုကြီး တစ်ခုသည် ထာဝရ တည်ရှိနေသကဲ့သို့ တိတ်ဆိတ်စွာ ရပ်တန့်နေလေသည်။