ဒုတိယအဆင့် ယဉ်ပါးသားရဲ (အပိုင်း - ၂)

~“မီးဓာတ် နဲ့ သတ္တုဓာတ် သားရဲ အမြုတေ ဆေးလုံးတွေက လူကြိုက် အများဆုံးနဲ့ ဈေးအကြီးဆုံးပဲ... ဒါပေမဲ့ နင် လိုချင်တယ် ဆိုရင်တော့... အဆင့်နိမ့် ဝိညာဉ်ကျောက်တုံး နှစ်ထောင့်နှစ်ရာ (၂၂၀၀) နဲ့ ရအောင် လုပ်ပေးမယ်”

ယွီခယ်အာ စုယွီကို ကြည့်ပြီး ပြောလိုက်လေ၏။

စုယွီ ခေတ္တမျှ စဉ်းစားခန်း ဝင်သွားသည်။

အဆင့်နိမ့် ဝိညာဉ်ကျောက်တုံး (၂၂၀၀)...။

ငါ့မှာ အဲ့ဒီလောက် မရှိဘူးလေ။

လွန်ခဲ့တဲ့ တစ်နှစ်အတွင်း ဝင်ငွေ သိပ်မရှိခဲ့ဘူး။ ပိုင်ယွဲ့ အင်မော်တယ် မြို့တော် အခြေအနေကို လေ့လာနေရတုန်း ဆိုတော့... ထွက်ငွေပဲ ရှိတယ်။

ပြီးတော့ ဒုတိယအဆင့် အဆင့်နိမ့် 'နဂါးမိကျောင်း ရုပ်သေးသားရဲ' ဖန်တီးဖို့ ကုန်ကြမ်းပစ္စည်းတွေ အများကြီး ဝယ်ထားရသေးတယ်။

အခု ငါ့လက်ထဲမှာ အဆင့်နိမ့် ဝိညာဉ်ကျောက်တုံး (၂၀၀၀) တောင် မပြည့်တော့ဘူး။

ခဏကြာ၊ စဉ်းစားပြီးနောက်... စုယွီသည် 'နဂါးလင်းယုန် ရုပ်သေးသားရဲ' ကို ထုတ်ယူလိုက်ပြီး ယွီခယ်အာကို ပြောလိုက်လေ၏။

“ဒါက ပထမအဆင့် ထိပ်တန်း ရုပ်သေးသားရဲ ပါ... အဆင့်တူ အချင်းချင်း ဆိုရင် ပြိုင်ဘက်ကင်း သလောက်ပဲ... 'အခြေခံ တည်ဆောက်ခြင်း အဆင့်' သားရဲနဲ့တောင် ခဏလောက် ယှဉ်နိုင်တယ်”

“မိန်းကလေးယွီ... ဒီ ရုပ်သေးသားရဲကို စိတ်ဝင်စားမလား”

နေ့ဝက် ကြာသောအခါ...

ယွီမိသားစု သားရဲအရောင်းဆိုင်မှ ထွက်လာသော စုယွီသည် စိတ်သက်သာရာရစွာဖြင့် သက်ပြင်းချလိုက်မိသည်။

'နဂါးလင်းယုန် ရုပ်သေးသားရဲ' ကို ယွီခယ်အာထံ အဆင့်နိမ့် ဝိညာဉ်ကျောက်တုံး (၆၀၀၀) ဖြင့် ရောင်းချလိုက်သည်။

ဆေးလုံး နှစ်လုံးဖိုး နုတ်ပြီးတော့ သူ့လက်ထဲမှာ (၃၈၀၀) ကျန်နေသေးသည်။

လက်ရှိ ရှိနေသော ကျောက်တုံးများနှင့် ပေါင်းလိုက်လျှင် စုစုပေါင်း (၅၆၀၀) ကျော် ရှိသွားပြီ။

“ဒုတိယအဆင့် ကို အောင်မြင်စွာ ရောက်ရှိနိုင်ပါစေလို့ ဆုတောင်းရမှာပဲ”

စုယွီ တိုးတိုးလေး ရေရွတ်လိုက်လေ၏။

'နဂါးလင်းယုန် ရုပ်သေးသားရဲ' ကို ဘာကြောင့် ရောင်းလိုက်ရသလဲ ဆိုတော့...

ပထမ အချက်က ပိုက်ဆံ လိုလို့။

ဒုတိယ အချက်ကတော့... သူ့ရဲ့ ကိုယ်ခန္ဓာ ကြံ့ခိုင်ရေး ကျင့်စဉ်က (၁၀) ဆင့် ကို ရောက်တော့မည်လေ။

ထိုအဆင့် ရောက်လျှင် သူ့ခန္ဓာကိုယ် စွမ်းအား တစ်ခုတည်းနှင့်တင် နဂါးလင်းယုန် ရုပ်သေးသားရဲ ကို နိုင်နေပြီ ဖြစ်၏။

ကာကွယ်ရေး အတွက် ဒီကောင်ကြီးကို မလိုတော့ပါ။

ယွီမိသားစုကို ရောင်းပြီး လုံလောက်သည့် ဝိညာဉ်ကျောက်တုံးတွေ၊ အရင်းအမြစ်တွေ ရယူလိုက်တာက ပိုအကျိုးရှိ၏။ ပြီးတော့ မြေကမ္ဘာမီးလျှံ မျောက်ဝံ နှင့် အကြေးခွံနက် လင်းယုန် တို့ကို ဒုတိယအဆင့် ရောက်အောင် ကူညီပေးနိုင်မည်လေ။

လဝက်ခန့် ကြာသောအခါ...၊

ယွီခယ်အာ ပြင်ဆင်ပေးသော အမြုတေ ဆေးလုံး နှစ်လုံး ရရှိပြီ ဖြစ်သည်။ မူလက စုယွီ ကိုယ်တိုင် သွားယူရန် စီစဉ်ထားသော်လည်း၊ ယွီခယ်အာ ကိုယ်တိုင် သူ့ခြံဝင်းထဲသို့ ဆေးလုံးများ လာပို့ပေးလေ၏။

ယွီခယ်အာက ခပ်ကြွားကြွားလေး ပြောလာ၏။

“ငါက ဒုတိယအဆင့် အဆင့်နိမ့် သားရဲထိန်းသိမ်းသူ တစ်ယောက်ပါ... မတော်တဆ တစ်ခုခု ဖြစ်ခဲ့ရင် နင့်ကို ကူညီပေးနိုင်မလားလို့ လိုက်လာတာ”

စုယွီ ချက်ချင်းပင် လက်များ ဆုပ်ပြီး အရိုအသေ ပေးလိုက်သည်။

“သြော်... စီနီယာယွီ ပါလား... ကျွန်တော် မသိလို့ ရိုင်းပြမိတာ ခွင့်လွှတ်ပါ”

ဂုဏ်ပုဒ် အရ ကြည့်မည် ဆိုလျှင်... ဒုတိယအဆင့် သားရဲထိန်းသိမ်းသူ (သို့မဟုတ်) ရုပ်သေးပညာရှင် ဆိုတာ 'အခြေခံ တည်ဆောက်ခြင်း အဆင့်' ကျင့်ကြံသူ တစ်ဦးနဲ့ တန်းတူပဲလေ။

ဒါကြောင့် ချီစွမ်းအင် စုစည်းခြင်း အဆင့် သာ ရှိသေးသော စုယွီက သူမကို 'စီနီယာ' လို့ ခေါ်တာ မမှားပါချေ

ဒါပေမဲ့ စုယွီရဲ့ နောက်ပြောင်တဲ့ လေသံကို ကြားတော့ ယွီခယ်အာ အံကြိတ်ပြီး မျက်စောင်းထိုးလိုက်တယ်။

“နင်က တကယ့် လူယုတ်မာပဲ... ငါ နင့်ကို အထင်ကြီးမိတာ မှားသွားတယ်”

“မြန်မြန် လုပ်... ပြင်ဆင်စရာ ရှိတာ ပြင်ဆင်... ဘယ်ကောင်က ဒုတိယအဆင့်ကို အရင် ရောက်မလဲ ကြည့်ရအောင်”

ယွီခယ်အာက ခပ်ဖွဖွ ဆူပူလိုက်သည်။

ထိုအခါ၊ စုယွီသည် မြေကမ္ဘာမီးလျှံ မျောက်ဝံ ကို ထုတ်ပေးလိုက်ပြီး၊ 'ပြည့်စုံအဆင့်' သားရဲ တစ်ရာ ဆေးလုံး နှစ်လုံးကို တိတ်တဆိတ် ကျွေးမွေးလိုက်တော့သည်။ သို့မှသာ အကောင်းဆုံး အခြေအနေသို့ ရောက်ရှိနိုင်မည် ဖြစ်သည်။

ရက်အနည်းငယ် ကြာသောအခါ...၊

အခန်းအောက်ရှိ လျှို့ဝှက်ခန်း အတွင်း၌...

မီးဓာတ် သားရဲ အမြုတေ ဆေးလုံးကို မျိုချပြီးနောက်၊ မြေကမ္ဘာမီးလျှံ မျောက်ဝံ ၏ ခန္ဓာကိုယ်မှ ပြင်းထန်သော မီးတောက် အရှိန်အဝါများ ပေါက်ကွဲထွက်လာလေ၏။

(၂) ပေခန့်သာ ရှိသော ခန္ဓာကိုယ်လေးသည် ချက်ချင်း ကြီးထွားလာပြီး မူလ ပုံသဏ္ဍာန် အမှန်သို့ ပြောင်းလဲသွားသည်။ (၁၃) (၁၄) ပေခန့် မြင့်မားသော ဧရာမ မျောက်ဝံကြီး တစ်ကောင်သည် လျှို့ဝှက်ခန်း အလယ်တွင် မီးတောက်များ လွှမ်းခြုံလျက် မတ်မတ် ရပ်နေလေ၏။

“ဂါး... ဂါး... ဂါး...”

ဒုတိယအဆင့် သားရဲ အမြုတေ ဆေးလုံး၏ အပူရှိန်များ ထွက်ပေါ်လာပြီး၊ ကြီးမားလှသော စွမ်းအားများကြောင့် မျောက်ဝံကြီးသည် ဟိန်းဟောက်သံများကို မထိန်းချုပ်နိုင်တော့ပေ။

သာမန် မြေကမ္ဘာမီးလျှံ မျောက်ဝံ ဆိုလျှင် ယခုအချိန်တွင် သတိလွတ်သွားလောက်ပြီ ဖြစ်သည်။

ဆေးစွမ်းအင်များကို ထုတ်လွှတ်လိုသော ဗီဇစိတ် တစ်ခုတည်းသာ ကျန်ရစ်တော့မည် ဖြစ်သည်။

သို့သော် 'အစိမ်းရောင် သစ်သား နှစ်ပတ်လည် ကွင်း ကျင့်စဉ်' ၏ ချီစွမ်းအင်ဖြင့် (၁၀) နှစ်ကျော်ကြာ ပြုစုပျိုးထောင်ခြင်း ခံခဲ့ရသော ဤမျောက်ဝံကြီးသည် ထူးခြားသော ပြောင်းလဲမှုများ ရှိနေလေ၏။ ၎င်း၏ ဉာဏ်ရည်သည် များစွာ တိုးတက်နေပြီး သာမန် သားရဲများနှင့် လုံးဝ ကွဲပြားခြားနားနေသည်။

အနည်းဆုံးတော့... သူ့သွေးမျိုးဆက်ထဲက ကြမ်းတမ်းတဲ့ စွမ်းအားတွေကို ထိန်းချုပ်နိုင်စွမ်း ရှိတယ်။

ဘေးမှ ကြည့်နေသော ယွီခယ်အာက တိုးတိုးလေး အမိန့်ပေးလိုက်သည်။

“သူ့ကို သည်းခံခိုင်းထား... ဆေးစွမ်းအင်တွေကို စုပ်ယူပြီး ဒုတိယအဆင့် အဟန့်အတားကို အစွမ်းကုန် ချိုးဖျက်ခိုင်းလိုက်”

စုယွီ၏ ထိန်းချုပ်မှုအောက်တွင် မျောက်ဝံကြီးသည် သွေးမျိုးဆက် အတွင်းမှ ကြမ်းတမ်းသော အရှိန်အဝါများကို အောင်မြင်စွာ ဖိနှိပ်ထားနိုင်ခဲ့သည်။ ၎င်း၏ အသိစိတ် ကင်းလွတ်မသွားဘဲ၊ ဒုတိယအဆင့် သားရဲ ဖြစ်လာရန် အဟန့်အတားကို ချိုးဖျက်နေကြောင်း သိရှိနားလည်နေလေ၏။

ထို့ကြောင့် မျောက်ဝံကြီးသည် မရပ်မနား ဟိန်းဟောက်နေပြီး၊ ခန္ဓာကိုယ် အတွင်းရှိ ဆေးစွမ်းအင်များကို အပြည့်အဝ သန့်စင်ကာ ဒုတိယအဆင့် အဟန့်အတားကို ထပ်ခါတလဲလဲ တိုက်ခိုက်နေလေတော့သည်။

အချိန်များ လျင်မြန်စွာ ကုန်ဆုံးသွားသည်။

တစ်နာရီ ကြာသောအခါ...

မျောက်ဝံကြီး၏ အရှိန်အဝါသည် အထွတ်အထိပ်သို့ ရောက်ရှိလာခဲ့သည်။ နားကွဲလုမတတ် ကျယ်လောင်သော ဟိန်းဟောက်သံနှင့်အတူ၊ စုဆောင်းထားသမျှ စွမ်းအား အကုန်လုံးကို ထုတ်သုံးပြီး အဟန့်အတားကို တစ်ရှိန်ထိုး ချိုးဖျက်ပစ်လိုက်လေ၏။

သို့သော်... ချိုးဖျက်ပြီးသည်နှင့် တစ်ပြိုင်နက် မျောက်ဝံကြီး ပါးစပ်မှ သွေးများ အန်ထုတ်လိုက်ရသည်။ အရေပြားများ ကွဲအက်သွားပြီး ခန္ဓာကိုယ် တစ်ခုလုံး သွေးများဖြင့် ရွှဲနစ်သွားလေတော့သည်။

ယွီခယ်အာ မျက်နှာပျက်သွားသည်။

“မကောင်းတော့ဘူး... စွမ်းအားက ကြမ်းတမ်းလွန်းတယ်... ဆေးစွမ်းအင်ရဲ့ တွန်းအားပေးမှုကြောင့် ပေါက်ကွဲထွက်လာတဲ့ စွမ်းအားကို မျောက်ဝံရဲ့ ခန္ဓာကိုယ်က မခံနိုင်တော့ဘူး”

ထိုစကားကို ကြားသည်နှင့် စုယွီသည် မျောက်ဝံကြီး၏ ကျောဘက်သို့ ချက်ချင်း ရောက်ရှိသွားလေ၏။

လက်တစ်ဖက်ကို မျောက်ဝံကြီး၏ ကျောပေါ် တင်လိုက်သည်။

“ဝုန်း...”

'အစိမ်းရောင် သစ်သား နှစ်ပတ်လည် ကွင်း ကျင့်စဉ်' ၏ ချီစွမ်းအင်များသည် မျောက်ဝံကြီး၏ ခန္ဓာကိုယ်ထဲသို့ တိုးဝင်သွားကြသည်။

ပေါက်ကွဲအားကြောင့် ဖြစ်ပေါ်လာသော ဒဏ်ရာများသည် ချက်ချင်း ပြန်လည် ကောင်းမွန်သွားကြသည်။ ကြောက်မက်ဖွယ် ကောင်းလှသော ကုသနိုင်စွမ်းကြောင့် မျောက်ဝံကြီး၏ ခန္ဓာကိုယ်သည် ပျက်စီးလိုက်၊ ပြန်ကောင်းလိုက် ဖြစ်နေသော်လည်း ပြိုလဲမသွားခဲ့ပေ။

စုယွီ၏ ချီစွမ်းအင် ကုသနိုင်စွမ်းကို မြင်လိုက်ရသော ယွီခယ်အာသည် ပါးစပ်အဟောင်းသား ဖြစ်သွားရလေ၏။

“ဒါ... ဒါ ဘာကျင့်စဉ်ကြီးလဲ”

ယွီခယ်အာ လွှတ်ခနဲ ရေရွတ်မိသွားမိသည်။

စုယွီသည် မျောက်ဝံကြီးကို သေမင်းလက်ထဲမှ အကြိမ်ကြိမ် ပြန်ဆွဲခေါ်နေသကဲ့သို့ပင်။

နာရီဝက်ခန့် ကြာမြင့်သွားသည်။

စုယွီ၏ မျက်နှာ ဖြူဖျော့သွားပြီး ချွေးများ ရွှဲနစ်လာချိန်တွင်၊ မျောက်ဝံကြီး၏ အရှိန်အဝါသည် ပိုမို အားကောင်းလာပြီး ပေါက်ကွဲသံကြီး တစ်ခုနှင့်အတူ အတားအဆီး တစ်ခုကို နောက်ဆုံးတွင် ကျော်ဖြတ်နိုင်ခဲ့လေ၏။ ၎င်း၏ ကြမ်းတမ်းသော အရှိန်အဝါသည် သိသိသာသာ မြင့်တက်လာပြီး ပထမအဆင့်ကို ကျော်လွန်သွားခဲ့လေပြီ။

“ဂါး...”

မျောက်ဝံကြီး စိတ်လှုပ်ရှားစွာ ဟိန်းဟောက်လိုက်သည်။ အဆင့် ချိုးဖြတ်ပြီးနောက် ခန္ဓာကိုယ်ပေါ်ရှိ အနီရောင် မီးတောက် အရှိန်အဝါများသည် ပိုမို ရင့်ကျက်လာပြီး၊ အနီရောင်မှ လိမ္မော်ရောင်သို့ ပြောင်းလဲမည့် အရိပ်အယောင်များ ပေါ်ထွက်လာလေ၏။

စုယွီ ဘေးသို့ ဆုတ်လိုက်ပြီး အသက်ပြင်းပြင်း ရှူလိုက်သည်။ မျောက်ဝံကြီး အောင်မြင်သွားသည်ကို မြင်သောအခါမှ စိတ်သက်သာရာရစွာ သက်ပြင်းချနိုင်တော့သည်။

ကံကောင်းလို့ အောင်မြင်သွားတာ... မဟုတ်ရင် အကြီးအကျယ် ရှုံးပြီ။

အောင်မြင်စွာ ပြောင်းလဲသွားသော မျောက်ဝံကြီးကို ကြည့်ရင်း ယွီခယ်အာ ဝမ်းသာအားရ ဖြစ်နေသလို အံ့သြမှင်သက်နေမိသည်။ သူမသည် စုယွီကို အားကျမှု၊ တုန်လှုပ်မှုများ ရောပြွမ်းနေသော အကြည့်များဖြင့် ကြည့်လိုက်မိသည်။

စုယွီ အားပြန်ပြည့်လာသောအခါ ယွီခယ်အာ ပြောလိုက်သည်။

“နင့်ရဲ့ ကြောက်စရာကောင်းတဲ့ ကုသနိုင်စွမ်းကြောင့်သာ သူ အောင်မြင်သွားတာ”

“မဟုတ်ရင်... ဒီတစ်ခေါက် သူ ကျရှုံးသွားလောက်ပြီ”

မျောက်ဝံကြီးသည် အောင်မြင်ပြီးနောက် ပြန်လည် တည်ငြိမ်သွားပြီး မူလ (၂) ပေ အရွယ်အစားသို့ ပြန်ပြောင်းသွားသည်။ စုယွီထံ ပြေးလာပြီး ခြေထောက်ကို ဖက်ကာ ပျော်ရွှင်စွာ အော်မြည်နေရှာသည်။

သခင်ဖြစ်သူ စုယွီကို ကျေးဇူးတင်ကြောင်း ပြောနေသကဲ့သို့ပင်။

စုယွီသည် ယွီခယ်အာကို ကြည့်ပြီး မျက်တောင်ခတ်လိုက်သည်။

“အခုဆိုရင် ငါ့ကို ဒုတိယအဆင့် အဆင့်နိမ့် သားရဲထိန်းသိမ်းသူ အဖြစ် သတ်မှတ်လို့ ရပြီလား”

ယွီခယ်အာ မျက်စောင်းထိုးလိုက်သည်။

“မရပါဘူး... ဒုတိယအဆင့် အဆင့်နိမ့် သားရဲထိန်းသိမ်းသူ ဆိုတာ ဒုတိယအဆင့် သားရဲ တစ်ကောင် ပိုင်ဆိုင်ရုံနဲ့ ဘယ်ပြီးမလဲ”

“တောရိုင်းထဲက ဒုတိယအဆင့် အစောပိုင်း သားရဲတွေကို ယဉ်ပါးအောင် လုပ်နိုင်ပြီး ကိုယ့်သားရဲ ဖြစ်အောင် ထိန်းချုပ်နိုင်မှ ခေါ်တာ”

ဒါကို ကြားတော့ စုယွီ သဘောပေါက်သွားသည်။

ရှင်းရှင်းပြောရရင်... သားရဲ ရှိတာ မဟုတ်ဘဲ၊ သားရဲ ဖမ်းနိုင်မှ ဖြစ်မှာပေါ့။

“ရက်နည်းနည်းလောက် နားလိုက်ဦး... ပြီးမှ အကြေးခွံနက် လင်းယုန်ကို စမ်းကြည့်ကြတာပေါ့”

အကြေးခွံနက် လင်းယုန်လည်း ကျရှုံးနိုင်သည်ဟု စုယွီ ကြိုတင် တွက်ဆထားသော်လည်း၊ မျောက်ဝံကြီးကဲ့သို့ အခြေအနေဆိုးမျိုး မကြုံတွေ့ခဲ့ရပေ။

သတ္တုဓာတ် သားရဲ အမြုတေ ဆေးလုံးကို မျိုချပြီးနောက်၊ လင်းယုန်ကြီးသည် နေရာမှာပင် ငြိမ်သက်စွာ ဝပ်နေပြီး ဆေးစွမ်းအင်များကို သန့်စင်လေ၏။

ထက်ရှသော သတ္တုဓာတ် မိစ္ဆာစွမ်းအင်များ ၎င်း၏ ခန္ဓာကိုယ်ပေါ်တွင် လှိုင်းထနေသည်။

တစ်နာရီကျော် ကြာသောအခါ... လင်းယုန်ကြီးသည် တိတ်ဆိတ်စွာပင် စွမ်းအား အကုန်ထုတ်သုံးပြီး အဟန့်အတားကို ချိုးဖျက်လိုက်လေ၏။

“ဝုန်း...”

ပထမဆုံး အကြိမ် ကြိုးစားမှုမှာပင် အောင်မြင်သွားပြီး ၎င်း၏ အရှိန်အဝါသည် ချက်ချင်း မြင့်တက်လာလေ၏။

ယခုအခါ အကြေးခွံနက် လင်းယုန် နှင့် မြေကမ္ဘာမီးလျှံ မျောက်ဝံ... ယဉ်ပါးသားရဲ နှစ်ကောင်စလုံးသည် ဒုတိယအဆင့် အစောပိုင်း သားရဲများ အဖြစ်သို့ ရောက်ရှိသွားကြပြီ ဖြစ်လေ၏။