အခန်း (၅၄၈)

တကယ်ပဲ ... ဒီကောင်မလေး ဖြစ်နေခဲ့သည်!

ထိုခဏမှာပင် အန်းယောက်၏ ဒေါသအရှိန်အဟုန်သည် အမြင့်ဆုံးသို့ ထိုးတက်သွားတော့သည်။

အကယ်၍သာ ဤသောက်ကျိုးနည်း ကောင်မလေးကြောင့်မဟုတ်လျှင် သူမ မည်သို့ ဒဏ်ရာရနိုင်မည်နည်း။ လူများစွာ၏ ရှေ့မှောက်တွင် သူမ မည်သို့ ဟန်ဆောင်နေနိုင်မည်နည်း။ သူမ၏ မျက်နှာပျက်စရာများ ဖြစ်ခဲ့ရလေသည်။

ဤအကြောင်းကို တွေးမိလိုက်သည်နှင့် အန်းယောက်သည် မော့ချူးကို အရှင်လတ်လတ် ဆွဲဖြဲပစ်ချင်စိတ် ပေါက်သွားခဲ့သည်။

"နင်ပဲကိုး" အန်းယောက်သည် ဤရိုးရှင်းသော စကားလုံးနှစ်လုံးကို ပြောလိုက်ချိန်တွင် အံကြိတ်ထားခဲ့သည်။ သူမ၏ မျက်ဝန်းထဲမှ ဒေါသများမှာ ပေါက်ကွဲထွက်လုနီးပါး ဖြစ်နေသည်။ အကယ်၍ ဤဒေါသသာ ဖျက်ဆီးနိုင်စွမ်းရှိခဲ့လျှင် မော့ချူးသည် ယခုအချိန်၌ ပြာကျသွားပြီးဖြစ်ပေလိမ့်မည်။

"ဘာလို့လဲ။ နင်တို့နှစ်ယောက်က သိနေကြသေးတာလား"

ရှဲ့ချွင်ရှီး၏အကြည့်က သူမတို့နှစ်ယောက်ကြားတွင် ဝေ့ဝဲသွားပြီး သံသယအချို့ဖြင့် မေးလိုက်သည်။

အန်းယောက်က အေးစက်စက် နှာမှုတ်လိုက်ပြီး ပြောလိုက်သည်။ "ဒါပေါ့၊ သူသာ မရှိရင် ငါဘယ်လိုလုပ် ဒီလိုပုံစံ ဖြစ်လာမှာလဲ"

ဤကောင်မလေး မည်သို့ ရှင်းပြမည်ကို သူမ ကြည့်ချင်သေးသည်။

မော့ချူးသည် အန်းယောက် မျှော်လင့်ထားသကဲ့သို့ တုန်လှုပ်ချောက်ချားခြင်း မရှိဘဲ ထူးထူးခြားခြား တည်ငြိမ်နေခဲ့သည်။ သူမက အခြေအနေကို ကျစ်လျစ်ပြီး ပြည့်စုံစွာ ရှင်းပြလိုက်သည်။

"အဲ့ဒီတုန်းက ငါတို့ချင်း တိုက်မိသွားကြတာလေ။ သူက ငါ့ရဲ့ သားကောင်ကို လုချင်နေတာ၊ ဒါပေမဲ့ ငါ့ကို မနိုင်ဘူးလေ။ အဲ့ဒီအစား ငါ့လက်ချက်နဲ့ သူဒဏ်ရာရသွားတာ"

"အော်!"

ထိုစကားကို ကြားသောအခါ ရှဲ့ချွင်ရှီး နားလည်သဘောပေါက်စွာဖြင့် ခေါင်းမညိတ်ဘဲ မနေနိုင်တော့ချေ။ "ငါလည်း စဉ်းစားနေတာ၊ နင် ဒီကောင်မလေးကို ဘယ်လိုလုပ် သိတာလဲလို့။ အဲ့လိုကိုး"

သူ စကားပြောနေရင်း အန်းယောက်၏ ဒဏ်ရာကို ပေါ့ပေါ့ပါးပါး လှမ်းကြည့်လိုက်ပြီး မော့ချူး၏ ပခုံးကို အသိအမှတ်ပြုသောအားဖြင့် ပုတ်ကာ အသံနှိမ့်လျက် ပြောလိုက်သည်။ "ယိုး ... နင့်ခွန်အားက မဆိုးဘူးပဲ၊ နင် ဒီကောင်မလေးကိုတောင် ဖြိုလှဲနိုင်တယ်ပေါ့"

အန်း မိသားစုသည်လည်း မဟူရာသမုဒ္ဒရာ ဂလက်ဆီ တွင် ထိပ်တန်းမိသားစုများထဲမှ တစ်ခုဖြစ်သည်။ သူတို့ထဲတွင် အကျော်ကြားဆုံးမှာ အန်းယောက် ဖြစ်သည်။

အန်းယောက်သည် တစ်မိသားစုလုံးတွင် တစ်ဦးတည်းသော သမီးမိန်းကလေး ဖြစ်သည်။ ထို့ကြောင့် သူမသည် အမြဲတမ်း အလိုလိုက်ခံရပြီး နောက်ဆုံးတွင် ဆိုးသွမ်း၍ ဗိုလ်ကျစိုးမိုးတတ်သော စိတ်နေသဘောထား ဖြစ်ပေါ်လာခဲ့ကာ ဤအကြောင်းကို အသိုင်းအဝိုင်းတစ်ခုလုံး နီးပါး ကြားဖူးကြသည်။

ရှဲ့ချွင်ရှီး၏ စကားများကို ကြားလိုက်ရသောအခါ အန်းယောက် သွေးအန်လုနီးပါး ဖြစ်သွားရသည်။

သူမ ဝမ်းဗိုက်ပေါ်က သွေးထွက်နေတဲ့ ဒဏ်ရာကို သူ မမြင်ဘူးလား။

သူမက သိသာထင်ရှားစွာပင် နစ်နာသူဖြစ်သော်လည်း ရှဲ့ချွင်ရှီးက မော့ချူးကို ကောင်းကောင်းလုပ်ခဲ့သည်ဟု ချီးကျူးလိုက်သေးသည်။ 'သောက်ကျိုးနည်း! ဒီလူရဲ့ ဦးနှောက်က မမှန်တော့ဘူးလား၊ သူ၏ ကိုယ်ကျင့်တရား ဖြောင့်မတ်မှုများက အစားခံလိုက်ရပြီလား။'

အန်းယောက် စိတ်သက်သာရာရစွာ သက်ပြင်း မချနိုင်ခင်မှာပင် မော့ယန်က သူမကို နောက်ထပ် ပြင်းထန်သော ထိုးနှက်ချက်တစ်ခု ပေးလိုက်ပြန်သည်။ သူသည် ဒဏ်ရာရနေသော သူမကို မမြင်သကဲ့သို့ မော့ချူး၏ ဘေးပတ်လည်၌ ဝဲပျံနေကာ ပြောလိုက်သည်။

"နင်တို့ တိုက်တောင် တိုက်ခိုက်ခဲ့ကြသေးတာလား။ နင် ဘယ်လိုနေလဲ။ ဒဏ်ရာရသွားသေးလား။ နေမကောင်းဖြစ်နေလား"

"ညီမလေး အဆင်ပြေပါတယ်။ ဒါနဲ့ စောစောက ဘာဖြစ်ကြတာလဲ"

"ဘာမှ မဟုတ်ပါဘူး၊ မတော်တဆမှုလေး တစ်ခု ဖြစ်သွားရုံပါ၊ စောစောကလေ ..."

မော့ယန်က အခြေအနေကို စာကြောင်းအနည်းငယ်ဖြင့် ရှင်းလင်းစွာ ရှင်းပြရင်း ပြောလိုက်သည်။

"အော်" ရှင်းရှင်းလင်းလင်း ကြားလိုက်ရပြီးနောက် မော့ချူး၏ မျက်နှာပေါ်တွင် အပြစ်ရှိစိတ် အနည်းငယ် မပြဘဲ မနေနိုင်တော့ချေ။ "တောင်းပန်ပါတယ်၊ ငါ နောက်ကျသွားတယ် ..."

အကယ်၍ သူမသည် မှော်အပင်များနှင့် မှော်သားရဲများကို လေ့လာခြင်း၌ နှစ်မြုပ်မနေခဲ့လျှင် သူမ၏ အချိန်များကို ဖြုန်းတီးမိမည် မဟုတ်ပေ၊ ထိုလုပ်ရပ်က ဤကဲ့သို့သော ရှုပ်ထွေးမှုကို ဖြစ်စေခဲ့သည်။

မော့ချူး စကားမဆုံးခင်မှာပင် နျဥ်ယွိယွမ်က ဖြတ်ပြောလိုက်သည်။ သူသည် မော့ချူး၏ ခေါင်းကို သူ၏ သွယ်လျသော လက်ဖဝါးကြီးဖြင့် ညင်သာစွာ ပွတ်သပ်ပေးရင်း ပြောလိုက်သည်။

"ကိစ္စမရှိပါဘူး၊ ကိုယ်တို့ ခဏလောက်ပဲ စောင့်လိုက်ရတာပါ"

သူမ၏ နောက်တွင်ရှိသော ကျုံးဝမ်သည် ခေါင်းမော့လာပြီး သူ၏ဘော့စ်ကို စကားတစ်ခွန်းမျှ မဆိုဘဲ စိုက်ကြည့်နေခဲ့သည်။

သူ့စိတ်ထဲတွင် ညည်းညူမနေဘဲ မနေနိုင်တော့ချေ ... ဒါက သိသိသာသာကြီး ဘက်လိုက်တာပင်!

ထိုစဉ်က သူတို့ လေ့ကျင့်နေကြချိန်တွင် အချိန်ဇယားများကို စက္ကန့်နှင့်အမျှ တွက်ချက်ထားခဲ့သည်။ လေ့ကျင့်ချိန်သည် အလွန်လျင်မြန်စွာပင် နှစ်ဆ တိုးသွားလေ့ရှိသည်။ လူမဆန်ဘူးဟုပင် ပြောနိုင်သည်။

ဝမ်းနည်းစရာ အကောင်းဆုံး အချက်မှာ ထိုအရာများအပြင် သူတို့သည် နျဥ်ယွိယွမ်၏ အေးစက်သော မျက်နှာကို ရင်ဆိုင်ခဲ့ရခြင်း ဖြစ်သည်။ အေးစက်မှုကို ထားလိုက်ပါဦး၊ နျဥ်ယွိယွမ်၏ အထင်သေးသော အကြည့်က သူတို့ကို စိတ်ဆင်းရဲစေခဲ့သည်။

မလှမ်းမကမ်းရှိ နွေးထွေးပြီး သဟဇာတဖြစ်နေသော လူများကို အေးစက်စွာ ကြည့်လိုက်ရင်း အန်းယောက်၏ မျက်ဝန်းထဲမှ မီးတောက်များက ပို၍ ပူပြင်းလာခဲ့သည်။

'ဟွန်း! နင်တို့ စောင့်နေလိုက်!'

'နင်တို့ ဘယ်လောက်ကြာကြာ မောက်မာနိုင်မလဲ ဆိုတာ ကြည့်ကြသေးတာပေါ့!'

"ဒီလူတွေက ... ရင်းနှီးနေတယ်လို့ မထင်ဘူးလား" အန်းယောက်ကို တွဲထားပေးသော အမျိုးသားက မျက်မှောင်အနည်းငယ် ကြုတ်ပြီး တွန့်ဆုတ်တွန့်ဆုတ်ဖြင့် မေးလိုက်သည်။ "ဟုတ်တယ်၊ ငါလည်း အဲ့လိုထင်တယ် ..."

"ဟွန်း" အန်းယောက်က အေးစက်စက် နှာမှုတ်လိုက်ပြီး ထိုအမျိုးသမီး၏ စကားကို ဖြတ်ပြောလိုက်သည်။ "ရှဲ့ချွင်ရှီးနဲ့ အတူသွားလာနိုင်တဲ့သူကို ငါတို့က ဘယ်လိုလုပ် မရင်းနှီးဘဲ နေမလဲ။ သူ့ဘော်ဒါ အသေးစားလေးတွေထဲက တစ်ယောက်ယောက်က မာနကို ဘေးချပြီး သူ့နား တမင်တကာ ကပ်နေတာ ဖြစ်ချင်ဖြစ်မှာပေါ့"

အဲ့ဒါလည်း ဟုတ်တာပဲ! အန်းယောက်၏ ရှင်းပြချက်ကို ကြားပြီးနောက် ထိုအမျိုးသား စိတ်သက်သာရာ ရသွားသော်လည်း တစ်စုံတစ်ခု မှားယွင်းနေသည်ဟု ခံစားနေရဆဲဖြစ်သည်။

"သူ နောက်ဆုံးတော့ ရောက်လာပြီပဲ" အန်းယောက်၏ မျက်နှာ အမူအရာ ရုတ်တရက် ပြောင်းလဲသွားပြီး သူမ၏ မျက်လုံးများထဲတွင် ပျော်ရွှင်မှု အရိပ်အယောင် ပေါ်လာကာ ပြောလိုက်သည်။

ဘယ်သူရောက်လာတာလဲ။

ထိုအမျိုးသား ခေါင်းလှည့်ကြည့်လိုက်ပြီး လန့်ဖျပ်သွားသည်။

ဒါက အမဲလိုက်ပွဲတော်အတွင်း စည်းကမ်းထိန်းသိမ်းရေး စစ်ဆေးရေးမှူး မဟုတ်ပါလား။

ဖြစ်နိုင်တာက အန်းယောက်က တစ်ခုခုလုပ်ဖို့ ပြင်ဆင်နေ...

"တော်ကြာကျရင် ဘယ်လို ပြောရမလဲဆိုတာ ... နင်တို့အားလုံး နားလည်တယ်မလား"

အန်းယောက်က ခေါင်းလှည့်လိုက်ပြီး သူမဘေးရှိ လူနှစ်ယောက်ကို မောက်မာစွာ ကြည့်ရင်း မေးလိုက်သည်။

သူမက သူတို့ ခေါင်းညိတ်ပြသည်ကို မြင်သောအခါ ပြုံးမနေဘဲ မနေနိုင်တော့ချေ။

အလွန်ကောင်းသည်၊ သူမက ထိုကဲ့သို့ အကင်းပါးသူများကို သဘောကျသည်။

"စစ်ဆေးရေးမှူး!”ထိုအမျိုးသားက အသက်ပြင်းပြင်း ရှူလိုက်ပြီး ကျယ်လောင်စွာ အော်ပြောလိုက်သည်။ “လူတစ်ယောက် ဒဏ်ရာရထားတယ်ဗျ"

ဒဏ်ရာရတယ် ဟုတ်လား?

ထိုစကားနှစ်လုံးကို ကြားလိုက်ရသည်နှင့် စစ်ဆေးရေးမှူးသည် အချိန်ဆွဲမနေရဲတော့ဘဲ ချက်ချင်း ပြေးသွားလိုက်သည်။ သူ အနားသို့ ရောက်၍ ကြည့်လိုက်သောအခါ အသက်ပြင်းပြင်း ရှူမိသွားတော့သည်!

သူသည် ဤလူများကို မသိသော်လည်း သူတို့ဝတ်ဆင်ထားသော ရှေးဟောင်း လက်လုပ်အဝတ်အစားများကို မှတ်မိခြင်းမှ တားဆီးမထားနိုင်ပေ။

ဤအဝတ်အစား ပါးပါးလေး တစ်ထည်တည်းကပင် သူ၏ တစ်သက်တာ လစာ တစ်ဝက်ခန့် တန်ဖိုးရှိနိုင်သည်။ အခြားအရာများကို ထားလိုက်ပါဦး၊ ထိုကဲ့သို့ အဝတ်အစား ဝတ်ဆင်နိုင်သူသည် သေချာပေါက် သူ ပြစ်မှား၍မရသော ပုဂ္ဂိုလ်ကြီး ဖြစ်ပေလိမ့်မည်။

ထိုကဲ့သို့သော ပုဂ္ဂိုလ်ကြီးတစ်ဦးက သူ၏ ပိုင်နက်အတွင်း၌ အမှန်တကယ် ဒဏ်ရာရသွားသည်လား။ သူ၏ ကံတရားက အနည်းငယ် ဆိုးရွားလွန်းနေသည်။ ဤအကြောင်းကို တွေးမိလိုက်ပြီး စစ်ဆေးရေးမှူး၏ မျက်နှာပေါ်တွင် စိုးရိမ်ပူပန်မှု အချို့ မပြဘဲ မနေနိုင်တော့ချေ။ သူ၏ သေးငယ်သော အရပ်အမောင်းနှင့် နိမ့်ပါးသော အဆင့်အတန်းဖြင့် သူသည် ဤပုဂ္ဂိုလ်ကြီးများထံမှ စကားတစ်ခွန်းကိုပင် ခံနိုင်ရည်ရှိမည် မဟုတ်ပေ!

"အဲ့တစ်ယောက်ပဲ ..." အန်းယောက်တွင် စစ်ဆေးရေးမှူး ဘာတွေးနေသည်ကို ခန့်မှန်းရန် အချိန်မရှိသည်မှာ သဘာဝပင်။ သူမက လက်လှမ်းလိုက်ပြီး မော့ချူးကို ညွှန်ပြကာ ပြောလိုက်သည်။

"တွေ့လား။ အဲ့ဒီကောင်မလေးက ငါ့ကို ဒဏ်ရာရအောင် လုပ်လိုက်တာ။ ကျန်တာကိုတော့ ရှင် ကိုင်တွယ်နိုင်မယ် မဟုတ်လား"

အန်းယောက် ညွှန်ပြရာ လမ်းကြောင်းအတိုင်း လိုက်ကြည့်လိုက်ရာ စစ်ဆေးရေးမှူးသည် မော့ချူးကို သဘာဝကျစွာ မြင်လိုက်ရသည်။ သူ၏ ခြေလှမ်းများ ရပ်တန့်မသွားဘဲ မနေနိုင်တော့ချေ ... ဤမျှ နူးညံ့သိမ်မွေ့ပြီး အားနည်းသော ကောင်မလေးတစ်ယောက်က သူမကို ဤအတိုင်းအတာထိ ဒဏ်ရာရအောင် မည်သို့ လုပ်နိုင်မည်နည်း။ ဒါ မဖြစ်နိုင်ပါဘူး!

"မြန်မြန်သွားလေ" အန်းယောက်က သူ့ကို ဒေါသတကြီး စိုက်ကြည့်ပြီး ပြောလိုက်သည်။

စစ်ဆေးရေးမှူးသည် အချိန်မဆွဲရဲတော့ဘဲ မော့ချူးနှင့် အခြားသူများထံသို့ ချက်ချင်း လှမ်းသွားလိုက်သည်။

"ကျွန်တော် တိုင်ကြားချက်တစ်ခု လက်ခံရရှိထားပါတယ်” စစ်ဆေးရေးမှူးက အလုပ်သဘောဆန်သော ပုံစံဖြင့် မေးလိုက်သည်။ “ခင်ဗျားက မှော်ဒေသမှာ လူတစ်ယောက်ကို ဒဏ်ရာရအောင် လုပ်ခဲ့တယ်ဆို၊ အဲ့ဒါ အမှန်ပဲလား"

"ဟုတ်ပါတယ်"

မော့ချူး ခေတ္တမျှ ကြောင်အမ်းသွားပြီးမှ ခေါင်းညိတ်ကာ ရှင်းပြလိုက်သည်။ "ဒါပေမဲ့ သူက ကျွန်မကို အရင် တိုက်ခိုက်တာပါ၊ ကျွန်မက ဒီတိုင်း ..."

"သူ ဝန်ခံပြီးပြီဆိုမှတော့ ..." မော့ချူး စကားမဆုံးခင်မှာပင် အန်းယောက် လျှောက်လာခဲ့သည်။ သူမက သူမ၏ ရှည်လျားသော လက်ချောင်းဖြင့် မော့ချူးကို ညွှန်ပြလိုက်ပြီး ပြောလိုက်သည်။ "သူ့ကို ဘာလို့ မဖမ်းသေးတာလဲ"

စစ်ဆေးရေးမှူး တွန့်ဆုတ်နေသေးသည်ကို မြင်သောအခါ အန်းယောက်၏ မျက်နှာ မည်းမှောင်မသွားဘဲ မနေနိုင်တော့ချေ။

"ဘာလဲ၊ ဒီလို ကိစ္စသေးသေးလေးကို ကိုင်တွယ်ဖို့ ရှင့်အထက်လူကြီးကို ကျွန်မ အကြောင်းကြားပေးဖို့ လိုနေတာလား"

"မလိုပါဘူး၊ မလိုပါဘူး" အန်းယောက်၏ စကားကို ကြားပြီးနောက် စစ်ဆေးရေးမှူးသည် ထပ်ပြီး မတွန့်ဆုတ်ရဲတော့ချေ။ သူသည် ချက်ချင်း မော့ချူး အနားသို့ လျှောက်သွားပြီး ပြောလိုက်သည်။

"တောင်းပန်ပါတယ်၊ အဲ့ဒီကိစ္စအတွက် ... ကျွန်တော်တို့နဲ့ လိုက်ခဲ့ပေးလို့ ရမလား"

"ကျွန်တော့်သူငယ်ချင်းက ကိုယ့်ကိုယ်ကိုယ် ကာကွယ်လိုက်ရုံ သက်သက်ပါ။ သူက ဘယ်သူ့ကိုမှ ရည်ရွယ်ချက်ရှိရှိ နာကျင်အောင် လုပ်ခဲ့တာ မဟုတ်ဘူး။ သူက ဘာကိစ္စ ခင်ဗျားတို့နဲ့ လိုက်ရမှာလဲ"

ရှဲ့ချွင်ရှီးက မားမားမတ်မတ် ရပ်လိုက်ပြီး ပြောလိုက်သည်။

ပြီးနောက် သူက လှည့်ပြီး အန်းယောက်ကို စိုက်ကြည့်ကာ ပြောလိုက်သည်။

"အနောက်မှာ လူရှိတာ နင်တစ်ယောက်တည်း ရှိတယ်လို့ မထင်နဲ့။ အကယ်၍ ငါတို့သာ အဆက်အသွယ်တွေအကြောင်း ပြောကြမယ်ဆိုရင် ဘယ်သူနိုင်မလဲ၊ ဘယ်သူရှုံးမလဲ ဆိုတာ မသေချာသေးဘူးနော်"

ထိုအချိန်ကျမှသာ စစ်ဆေးရေးမှူးသည် ရှဲ့ချွင်ရှီးနှင့် အခြားသူများကို သေချာ ကြည့်မိလိုက်သည်။ ထို့နောက် သူ၏ နှလုံးသား ထပ်မံ တုန်လှုပ်သွားပြန်သည်! ဤလူများသည် ရှေးဟောင်း လက်လုပ်အဝတ်အစားများ ဝတ်ဆင်မထားသော်လည်း သူတို့၏ အဝတ်အစားများကို ကြည့်ခြင်းအားဖြင့် သာမန်လူများ မဖြစ်နိုင်ပေ။

အိုက်ယိုး!

ဤသည်မှာ တကယ့်ကို လူကြီးလူကောင်းများကြားမှ တိုက်ပွဲတစ်ခုပင်။ သူတော့ သွားပါပြီ!

စစ်ဆေးရေးမှူးများသည် ရှေ့သို့လည်း တိုးမရ၊ နောက်သို့လည်း ဆုတ်မရ ဖြစ်နေသည်။ သူသည် ကျောက်ဆောင်နှင့် ကျဥ်းထဲကြပ်ထဲရောက်စေသော နေရာတစ်ခုကြားတွင် ပိတ်မိနေတော့သည်။

"ရှဲ့ချွင်ရှီး၊ နင် တကယ်ပဲ ငါနဲ့ ကန့်လန့်တိုက်ချင်လို့လား" အန်းယောက်က အံကြိတ်ရင်း မေးလိုက်သည်။

"ကျစ်.. နင်က ဘယ်သူမို့လို့လဲ" ရှဲ့ချွင်ရှီး၏ မျက်နှာတွင် မာနတရားများ ပြည့်နှက်နေပြီး ပြောလိုက်သည်။ "ငါက နင့်ကို ကန့်လန့်တိုက်ဖို့ ဘယ်လိုလုပ် အချိန်ရှိမှာလဲ။ ငါက ချူးလေး အတွက် လုပ်ပေးနေတာ အသိအသာကြီးပဲ၊ ဟုတ်ပြီလား? ကိုယ့်ကိုယ်ကိုယ် အထင်ကြီးမနေနဲ့"

ရှဲ့ချွင်ရှီး၏ ပြန်လှန်ချေပမှုကြောင့် အန်းယောက်၏ မျက်နှာမှာ ဖြူတစ်လှည့် နီတစ်လှည့် ဖြစ်သွားသည်။ သူမက ဘေးနားရှိ စစ်ဆေးရေးမှူးဘက်သို့ ချက်ချင်း လှည့်ကြည့်လိုက်ပြီး တင်းမာစွာ ပြောလိုက်သည်။ "ဒါ ရှင့်အလုပ် မဟုတ်ဘူးလား။ သူ့ကို မြန်မြန် ဖမ်းလေ။ အဲ့ဒီမှာ ဘာရပ်လုပ်နေတာလဲ"

"ပြီးတော့ အန်းမိသားစုက ဖမ်းချင်တဲ့ လူတစ်ယောက်ကို ဘယ်သူမှ ပြန်မလွှတ်ပေးရဲဘူး" သူမ၏ စကားလုံးများနောက်ကွယ်မှ အဓိပ္ပာယ်မှာ ရှင်းလင်းနေသည်။ အန်းယောက်သည် သူမ၏ အာဏာကို အသုံးပြု၍ သူ့ကို ဖိနှိပ်ရန် ပြင်ဆင်နေခြင်း ဖြစ်သည်!

သို့သော် သူမတွင် ထိုသို့လုပ်ဆောင်ရန် အရင်းအနှီး ရှိနေခဲ့သည်။ အဘယ်ကြောင့်ဆိုသော် အန်း မိသားစု၏ အနက်ရှိုင်းဆုံး အုတ်မြစ်များသည် တရားစီရင်ရေးနှင့် ဥပဒေစိုးမိုးရေး ဌာနများတွင် ရှိနေသောကြောင့် ဖြစ်သည်။ ဤအချိန်၌ မော့ချူးသည် သူ့ဆီသို့ တည့်တည့်တိုးဝင်လာခြင်း ဖြစ်သည်!

ရှဲ့ချွင်ရှီး၏ မိသားစုတွင် အာဏာရှိလျှင်ပင် သူတို့ လက်လှမ်းမမီနိုင်ပေ။ ထို့အပြင် မော့ချူးသည် ရှဲ့ချွင်ရှီး နှင့် သူငယ်ချင်းသာ ဖြစ်သည်။ သူမကဲ့သို့ ပြင်ပလူတစ်ယောက်အတွက် အန်း မိသားစုနှင့် ရန်သူဖြစ်ခံမလား ဆိုသည်မှာ မသိနိုင်သော မေးခွန်းတစ်ခု ဖြစ်နေသေးသည်။

ထိုစကားကို ကြားလိုက်ရသောအခါ စစ်ဆေးရေးမှူးသည် စိတ်မြန်လက်မြန် ရှိသူ ဖြစ်လျှင်ပင် သူ၏ ရှေ့မှ ဒဏ်ရာရနေသော မိန်းကလေးမှာ သူတို့ ဘော့စ်အန်း မိသားစု၏ မင်းသမီးလေး ဖြစ်ကြောင်း နားလည်လိုက်သည်။

ကောင်းပြီ! ယခု သူ ဘာလုပ်ရမလဲကို သိသွားပြီ။