သိုင်းကမ္ဘာ့ သက်ရှိသတ္တဝါအပေါင်းတို့... ငါဟာ သိုင်းကမ္ဘာ့ သခင်ပဲ (၂)

~၎င်းတြိ့က အခင်းအကျင်း မျက်လုံးများ၏ တည်နေရာ အချက်အလက်တွေပင်။

နင်ချီ၏ စွမ်းရည်ဖြင့် သိုင်းကမ္ဘာ တစ်ခုလုံးရှိ ကောင်းကင်ဘုံလူသား နယ်ပယ်အထက် သက်ရှိ အားလုံးကို အခင်းအကျင်း မျက်လုံး `(၇၂)` ခုဆီသို့ ချက်ချင်း တာဝန်ချပေးနိုင်စွမ်း ရှိသည်။ လက်ရှိ သိုင်းကမ္ဘာတွင် ဆန်းပြား သားရဲများနှင့် လူသားများကို ပေါင်းလိုက်လျှင် ကောင်းကင်ဘုံလူသား နယ်ပယ် အဆင့်ရှိသူ တစ်သောင်းကျော် ရှိသင့်သည်။

မကြာမီ ဖြစ်ပွားမည့် စစ်ပွဲကြီးတွင်၊

အနည်းဆုံး ဒီလောက် အင်အားတော့ ရှိမှ ထိရောက်မှု ရှိနိုင်မည်။

အကြောင်းရင်းက ရိုးရှင်းသည်။

စစ်ပွဲ စတင်သည့်အခါ ကမ္ဘာ့ စွမ်းအား၏ မြှင့်တင်ပေးမှုဖြင့် ကောင်းကင်ဘုံလူသား နယ်ပယ် အဆင့်ရှိသူများသည် ယာယီအားဖြင့် သိုင်းသူတော်စင် အဆင့် စွမ်းအားကို ထုတ်သုံးနိုင်ကြမည်။ ကောင်းကင်ဘုံလူသား နယ်ပယ် အောက်ရှိ သူများကမူ ဝိညာဉ်ချီနှင့် ပဲ့တင်ထပ်နိုင်ခြင်း မရှိသေးသဖြင့် ကမ္ဘာ့ စွမ်းအားဖြင့် မြှင့်တင်ပေးလျှင်လည်း အလကားသာ ဖြစ်နေမည်။

"တိုက်ခိုက်မယ်... တိုက်ခိုက်ကြမယ်..."

"ပြင်ပရန်သူတွေ... ငါတို့ လေပြင်းဓား ဂိုဏ်းရဲ့ စွမ်းရည်ကို လာစမ်းသပ်ကြည့်ကြစမ်းပါ"

"သိုင်းကမ္ဘာနဲ့အတူ အေးအတူ ပူအမျှ နေသွားမယ်"

သိုင်းကမ္ဘာ အနှံ့အပြားမှ ဟိန်းဟောက်သံများ ထွက်ပေါ်လာ၏။

အကြောင်းပြချက်က ဘာပဲဖြစ်ဖြစ်... ဒီအချိန်မှာတော့ ကောင်းကင်ဘုံလူသား နယ်ပယ် အထက်ရှိ သက်ရှိ အားလုံးနီးပါး စစ်တိုက်ရန် ဆုံးဖြတ်လိုက်ကြ၏။

အချို့က သိုင်းကမ္ဘာ ရှေ့ဆောင် ပညာရှိကြီးများ၏ ပေးဆပ်မှုကြောင့် စိတ်ဓာတ်တက်ကြွလာကြ၏။

အချို့က အသိုက်ပျက်လျှင် ဥ မကွဲဘဲ မနေနိုင်ဘူး ဆိုသော သဘောတရားကြောင့် မဖြစ်မနေ တိုက်ခိုက်ရန် ဆုံးဖြတ်လိုက်ကြ၏။

အချို့ကတော့ မွေးရာပါ စစ်သွေးစစ်မာန် ပြင်းထန်သူများ ဖြစ်ပြီး၊ ဤမျှ ကြီးမားသော ကမ္ဘာစစ်ပွဲကြီးတွင် ပါဝင်ချင်စိတ် ပြင်းပြနေကြ၏။

ကောင်းကင်ဘုံလူသား နယ်ပယ် အောက်တွင် ရှိသော်လည်း၊ မူလအမြုတေ နယ်ပယ် အဆင့်ရှိ သိုင်းပညာရှင် အချို့လည်း တိုက်ပွဲဝင်ရန် ရွေးချယ်လိုက်ကြ၏။ သူတို့၏ အင်အား နည်းပါးသော်လည်း တစ်တပ်တစ်အား ပါဝင်ချင်ကြ၏။

နင်ချီ အာရုံခံမိလိုက်သည်။ တိုက်ပွဲဝင်ရန် ရွေးချယ်လိုက်သော သိုင်းကမ္ဘာ့ သက်ရှိ တစ်ဦးချင်းစီကို မှတ်သားထားလိုက်သည်။

ဒါသည် သိုင်းကမ္ဘာ၏ ကပ်ဘေးကြီး။

သိုင်းကမ္ဘာ့ သက်ရှိတိုင်းတွင် ရန်သူကို ရင်ဆိုင်ရန် တာဝန် ရှိသည်။

ယုံမှားသံသယ ရှိဖွယ်ရာ မလိုပေ...။

နင်ချီသည် လက်အောက်ငယ်သားများအား စွမ်းဆောင်မှုအတွက် ဆုလာဘ်များ ချီးမြှင့်ရာ၌ လက်တွန့်နေမည့်သူ တစ်ဦး မဟုတ်ချေ။

နောင်လာမည့် အနာဂတ်ကာလများတွင် မိမိတို့၏ စွမ်းဆောင်ရည်ကို ထုတ်ဖော်ပြသနိုင်သူများအား သူသည် ထိုက်တန်သည့် ဆုလာဘ်တော်များကို ရက်ရောစွာ ပေးအပိသွားမည်သာ ဖြစ်၏။

ထိုသို့ ပြုလုပ်ခြင်းဖြင့်သာလျှင်... ရှေ့ဆက်လျှောက်လှမ်းမည့် ခရီးလမ်း၌ ကောင်းမွန် မှန်ကန်သော အကျိုးပြုသံသရာ လည်ပတ်မှု တစ်ခုကို ဖန်တီးတည်ဆောက်နိုင်မည် ဖြစ်ပေသတည်း။

ကောင်းကင်ဘုံလူသား နယ်ပယ် အထက်ရှိ သက်ရှိများအတွက် တစ်ဝက်တစ်ပျက် မဖြစ်မနေ တာဝန် ဖြစ်သော်လည်း၊ ထိုအဆင့်အောက် သက်ရှိများအတွက်မူ သူတို့ ဆန္ဒအတိုင်းသာ ထားလိုက်သည်။

နင်ချီ၏ စကားအနည်းငယ်ကြောင့် သိုင်းကမ္ဘာ တစ်ခုလုံး မီးဟုန်းဟုန်း တောက်လောင်လာ၏။

ထိုအခိုက်အတန့်၌၊ သက်ရှိ အားလုံးသည် မျိုးနွယ် ခွဲခြားမှုများ၊ မင်းဆက် ကွဲပြားမှုများနှင့် ဂိုဏ်းဂဏ စွဲလမ်းမှုများကို ဘေးဖယ်ထားလိုက်ကြ၏။ သိုင်းကမ္ဘာတွင် စစ်ပွဲကြီး ဖြစ်ပွားတော့မည် ဖြစ်ပြီး၊ ရှုံးနိမ့်လျှင် ကမ္ဘာပျက်စီးပြီး အားလုံး သေဆုံးရမည်ကို နားလည်ထားကြသည်။

ဤကဲ့သို့ အရေးကြီးသော အချိန်တွင် စည်းလုံးညီညွတ်သော အင်အားဖြင့်သာ အခက်အခဲကို ကျော်လွှားနိုင်မည်။

အစွမ်းထက် သက်ရှိများသည် အခင်းအကျင်း မျက်လုံး `(၇၂)` ခုဆီသို့ အတူတကွ ဦးတည် သွားရောက်နေကြ၏။ ယခင်က မတည့်ကြသော သားရဲဘုရင်များနှင့် လူသား သိုင်းပညာရှင်များပင် ဘေးချင်းယှဉ် လျှောက်လှမ်းနေကြသည်ကို တွေ့ရသည်။

နင်ချီ ဒါတွေအားလုံးကို အာရုံခံမိနေလေ၏။

သူ့စိတ်ထဲတွင် လှုပ်ရှားသွားသည်။

တကယ်ပါပဲ... ဉာဏ်ရည်ရှိတဲ့ သက်ရှိတွေကြားက ပဋိပက္ခတွေကို ဘေးဖယ်ထားနိုင်ဖို့ ဆိုတာ ပြင်ပဖိအား ပြင်းပြင်းထန်ထန် ရှိမှ ရတာကိုး။

...

အချိန်များ ကုန်ဆုံးသွား၏။

သိုင်းကမ္ဘာ တစ်ခုလုံး အပြည့်အဝ စည်းရုံးပြီး ဖြစ်နေပြီ။

ရှစ်ကိုးသွယ် ဆန်းကြယ်အလင်း ကောင်းကင် အခင်းအကျင်း၏ နာမည်သည် သိုင်းကမ္ဘာ အနှံ့ ကျော်ကြားနေပြီ ဖြစ်သည်။ သိုင်းသူတော်စင် `(၇၂)` ဦးသည် အခင်းအကျင်း မျက်လုံးများကို စောင့်ကြပ်နေကြပြီး၊ တစ်ဦးစီ၏ လက်အောက်တွင် ကောင်းကင်ဘုံလူသား နယ်ပယ် တိုက်ခိုက်ရေးသမား `(၂၀၀)` ခန့် ရှိနေလေ၏။ ထို့အပြင် မူလအမြုတေ နယ်ပယ် သိုင်းပညာရှင် ထောင်ပေါင်းများစွာလည်း အခင်းအကျင်း မျက်လုံး တစ်ခုစီတွင် လာရောက် စုဝေးနေကြ၏။ အားလုံးက ကိုယ့်သဘောဆန္ဒအလျောက် လာကြခြင်း ဖြစ်သည်။

အဆင့်နိမ့် သိုင်းပညာရှင်များကတော့ ကောင်းကင်ပျံသန်းနိုင်စွမ်း မရှိသဖြင့် လာချင်လျှင်တောင် မလာနိုင်ကြပေ။

ယခု အခိုက်အတန့်၌၊

သိုင်းသူတော်စင် အားလုံး နေရာယူပြီးပြီ ဖြစ်ရာ၊ နင်ချီသည် အခင်းအကျင်းကြီးကို စတင် လည်ပတ်စေလိုက်သည်။

နောက်တစ်ခဏတွင်၊ တောက်ပသော ကြယ်တာရာ အလင်းတန်းများ ကောင်းကင်ဘုံမှ ဆင်းသက်လာပြီး ကမ္ဘာလောကကို လင်းထိန်သွားစေသည်။ ကောင်းကင်ထိုး အလင်းတိုင်ကြီး `(၇၂)` ခုသည် အထူး ထင်ရှားနေလေ၏။ အခင်းအကျင်း မျက်လုံးများကို စောင့်ကြပ်နေသော သိုင်းသူတော်စင်များသည် အလွန်အမင်း ကြီးမားသော စွမ်းအား တစ်ခု သူတို့အပေါ် စီးဆင်းလာသည်ကို ခံစားလိုက်ရသည်။

သူတို့သည် ဘုရားသခင်၏ ရှုထောင့်ကို ရရှိလိုက်သကဲ့သို့ ခံစားရသည်။ နေရာအနှံ့ ပျံ့နှံ့နေသော ကြယ်တာရာ အလင်းရောင်များမှတစ်ဆင့် သူတို့ စောင့်ကြပ်ရမည့် နယ်မြေ၏ အခြေအနေ အရပ်ရပ်ကို သိရှိနိုင်ပြီး၊ အချင်းချင်းလည်း ဆက်သွယ် တုံ့ပြန်နိုင်ကြ၏။

ဤ အံ့မခန်း ခံစားမှုကြောင့် သူတို့ အံ့အားသင့်သွားကြပြီး နင်ချီ့အပေါ် လေးစားရိုသေမှုများ ပိုမို တိုးပွားလာ၏။

ထိုအချိန်တွင် သိုင်းကမ္ဘာ့ သက်ရှိ အားလုံးသည် ဤ အံ့သြဖွယ် မြင်ကွင်းကို မြင်တွေ့လိုက်ကြရသည်။

ကောင်းကင်ယံသည် လျှို့ဝှက်ဆန်းကြယ်သော ကြယ်တာရာ အလင်းများဖြင့် ဖုံးလွှမ်းသွား၏။

မရေမတွက်နိုင်သော လူများ ဒူးထောက် ဆုတောင်းနေကြ၏။

နင်ချီ… သိုင်းကမ္ဘာ့ သခင် အဖြစ် အံ့ဖွယ်တန်ခိုး ပြသခဲ့သည့် နေ့ကတည်းက သက်ရှိ အများအပြားသည် ဤ အထွတ်အထိပ် သိုင်းကမ္ဘာ့ သခင်အပေါ် ရိုသေမှုများ ဖြစ်ပေါ်နေခဲ့ကြရာ၊ ယခုအခါ ပိုမို နက်ရှိုင်းလာခဲ့သည်။

ခဏအကြာတွင်၊

ကြယ်တာရာ အလင်းများ မှေးမှိန်သွား၏။

သိုင်းကမ္ဘာမှ စစ်သည်တော် အများအပြားသည်လည်း သတိဝီရိယ ပိုမို ရှိလာကြသည်။

ကောင်းကင်အပြင်ဘက်မှ ရန်သူများသည် အချိန်မရွေး ဆင်းသက်လာနိုင်ကြောင်း သူတို့ သိနေကြ၏။

...

နင်ချီ သက်ပြင်း သဲ့သဲ့ ချလိုက်သည်။

လွန်ခဲ့သော ရက်အနည်းငယ် အတွင်း သူ အစိုးရိမ်ဆုံး ကိစ္စမှာ... တောင်နှင့် ပင်လယ် နယ်မြေမှ ရန်သူများ ရောက်လာချိန်တွင် ရှစ်ကိုးသွယ် ဆန်းကြယ်အလင်း ကောင်းကင် အခင်းအကျင်း မပြီးစီးသေးဘဲ ဖြစ်နေမှာကိုပင်။ ထိုသို့သာ ဖြစ်ခဲ့လျှင် အစီအစဉ်တွေ အကုန် ပျက်စီးသွားပြီး နင်ချီ ကိုယ်တိုင်လည်း သိုင်းကမ္ဘာထဲမှာ ပိတ်မိသွားနိုင်သည်။

ကံကောင်းထောက်မစွာဖြင့်၊ သူ ကြောက်ရွံ့သော အရာ ဖြစ်မလာခဲ့ပေ။

အခင်းအကျင်းကြီး၏ စွမ်းအားကို အာရုံခံမိလိုက်သောအခါ နင်ချီ အနည်းငယ် ပြုံးလိုက်သည်။

"ဒီ အခင်းအကျင်း ရှိနေသရွေ့... တောင်နှင့် ပင်လယ် နယ်မြေက ရန်သူ အင်အား.. အရမ်း မများဘူး ဆိုရင်... အချိန်အတိုင်းအတာ တစ်ခုအထိ ဆွဲထားလို့ ရပြီ"

သူသည် အစစ်အမှန်သိုင်းတောင်ထိပ်တွင် လက်ကို နောက်ပစ်လျက် ကမ္ဘာလောကကို ငုံ့ကြည့်နေလေ၏။

သူ့ဘေးတွင် လော့ဝမ်ထျန်းနှင့် အခြား ရင်းနှီးသော မိတ်ဆွေများ ရှိနေလေ၏။

ထိုအချိန်၌ လော့ဝမ်ထျန်းနှင့် အခြားသူများသည် စိတ်လှုပ်ရှားနေသလို၊ ယုံကြည်ရ ခက်သလို၊ ကြောင်အမ်းအမ်းလည်း ဖြစ်နေကြ၏။

ရက်အနည်းငယ် အတွင်း ကြီးမားသော အပြောင်းအလဲများ ဖြစ်ပေါ်ခဲ့ပြီး၊ သူတို့၏ ဂျူနီယာ မောင်လေးသည် သိုင်းကမ္ဘာ့ သခင် ဖြစ်သွားခဲ့ပြီ မဟုတ်ပါလော။

သူတို့၏ ကျင့်ကြံခြင်း အဆင့်သည်လည်း ပဉ္စမအဆင့် သိုင်းသူတော်စင် အထိ ရောက်ရှိသွားခဲ့ပြီ။

ဒါသည် လက်ရှိ နင်ချီ ကူညီပေးနိုင်သော အကန့်အသတ်ပင်။ ဒီအဆင့် ရောက်ဖို့ လိုအပ်တာက စွမ်းအင် စုဆောင်းမှု ဖြစ်ပြီး ကောင်းကင်နှင့် မြေကြီး၏ မူလအစ စွမ်းအားကို ထည့်သွင်းပေးလိုက်ရုံဖြင့် ရနိုင်သည်။

သို့သော် ဓာတ်ကြီးငါးပါး ပြည့်စုံခြင်း အဆင့်သို့ ဝင်ရောက်ရန်မှာမူ သူတို့ ကိုယ်တိုင် အခြေခံအုတ်မြစ် တည်ဆောက်ပြီးမှ ရရှိနိုင်မည့် အရာ ဖြစ်သည်။ နင်ချီက အတင်းအဓမ္မ လုပ်ပေးလိုက်လျှင် အနာဂတ်တွင် သူတို့၏ တိုးတက်မှုကို ကန့်သတ်လိုက်သလို ဖြစ်သွားလိမ့်မည်။

သို့တောင်မှ... ဒီလို အဆင့်တက်သွားတာက အနာဂတ်မှာ အခြေခံအုတ်မြစ် ခိုင်မာအောင် အချိန်အကြာကြီး ပြန်ပေးဆပ်ရဦးမှာ..

သူတို့ အားလုံးထဲမှာ ကျွမ်းချန်နှင့် ယွမ်ထျန်းရှန်းလောက်သာ သည်လောက် မြန်မြန်ဆန်ဆန် အဆင့်တက်တာကို ခံနိုင်ရည် ရှိလိမ့်မည်။

အခြေအနေ ထူးခြားမနေလျှင် နင်ချီ ဒီနည်းလမ်းကို သုံးမှာ မဟုတ်ပါ။

"ကိုးလေး... ငါတို့လည်း ဆရာ နဲ့ ရှစ်တို့လိုမျိုး …အခင်းအကျင်း မျက်လုံးတွေကို သွားစောင့်ကြပ်သင့်တာ မဟုတ်ဘူးလား"

လော့ဝမ်ထျန်းက မနေနိုင်ဘဲ ထုတ်မေးလိုက်သည်။

ပဉ္စမ အဆင့် သိုင်းသူတော်စင် ဖြစ်လာပြီးနောက်၊ အစစ်အမှန်သိုင်းတောင်ပေါ်မှာသာ နေပြီး သူများတွေ ရန်သူနှင့် တိုက်ခိုက်နေတာကို ထိုင်ကြည့်နေရမည်ကို သူ သဘောမကျပေ။