လေလံပွဲ

~အခြေခံ တည်ဆောက်ခြင်း ဆေးလုံး တစ်ဖိုကို အောင်မြင်စွာ ဖော်စပ်နိုင်ပါက ပျမ်းမျှအားဖြင့် ဆေးလုံး သုံးလုံးမှ လေးလုံးအထိ ထွက်ရှိတတ်ပေသည်။ ပိုင်ယွဲ့ အင်မော်တယ် မြို့တော်တွင် အရည်အသွေး သာမန်ရှိသော အခြေခံ တည်ဆောက်ခြင်း ဆေးလုံး တစ်လုံး၏ တန်ဖိုးမှာ အဆင့်နိမ့် ဝိညာဉ်ကျောက်တုံး ရှစ်ထောင်ခန့် ရှိလေသည်။

အရည်အသွေး နိမ့်ကျသော ဆေးလုံးများဆိုပါက ဈေးနှုန်း အနည်းငယ် လျော့နည်းနိုင်ပေ၏။

သို့သော် ဤသည်မှာ သတ်မှတ်ထားသော ဈေးနှုန်းမျှသာ ဖြစ်ချေသည်။ ပိုင်ယွဲ့ အင်မော်တယ် မြို့တော်ကဲ့သို့သော နေရာမျိုး၌ပင် သာမန် အရည်အသွေးရှိသော အခြေခံ တည်ဆောက်ခြင်း ဆေးလုံး တစ်လုံးနှစ်လုံးကို ဝယ်ယူရရှိနိုင်ရန် ဆယ်နှစ်၊ အနှစ်နှစ်ဆယ်ခန့် စောင့်ဆိုင်းရတတ်ပေသည်။

ဝယ်ယူရန် ခက်ခဲရခြင်းမှာ ဈေးနှုန်း ကြီးမြင့်မှု တစ်ခုတည်းကြောင့် မဟုတ်ဘဲ ကံတရားနှင့်လည်း သက်ဆိုင်နေသောကြောင့် ဖြစ်ပေသည်။ မိမိ လက်ဝယ်သို့ ရောက်ရှိလာနိုင်ခြင်း ရှိမရှိ ဆိုသည်မှာ ကံစီမံရာပင် ဖြစ်တော့သည်။

အခြေခံ တည်ဆောက်ခြင်း ဆေးလုံး ရှားပါးသော်လည်း ၎င်း၏ အဓိက ကုန်ကြမ်းပစ္စည်း တစ်ခုဖြစ်သော ခုန်းလင် ဝိညာဉ်သစ်သီး၏ ဈေးနှုန်းမှာမူ အလွန်အမင်း မြင့်မားခြင်း မရှိပေ။ စုမိသားစုသည် စုဇီကို ဝိညာဉ်ကျောက်တုံး ခြောက်ထောင် ထောက်ပံ့ပေးထားခဲ့၏။

ဝိညာဉ်သစ်သီးသည် သူတို့၏ အဓိက ပစ်မှတ် ဖြစ်လေသည်။ အကယ်၍ အခြေအနေ ပေးခဲ့ပါက လိုအပ်နေသေးသော အခြား အဓိက ကုန်ကြမ်းပစ္စည်းများကိုပါ လေလံပွဲတွင် ဝယ်ယူနိုင်ရန် သူတို့ ကြိုးပမ်းကြရမည် ဖြစ်ပေသည်။

စုယွီသည် စုဇီကို ခြံဝင်းအတွင်းသို့ ဖိတ်ခေါ်လိုက်ပြီး သစ်ပင်အောက်ရှိ ကျောက်စားပွဲတွင် မျက်နှာချင်းဆိုင် ထိုင်စေလိုက်၏။ မီးဖိုပေါ်ရှိ ရေနွေးအိုးမှ အခိုးအငွေ့များ တလူလူ ထွက်ပေါ်နေလေသည်။

စုယွီ နေထိုင်ရာ ပတ်ဝန်းကျင်ကို ကြည့်ရှုရင်း စုဇီ၏ မျက်ဝန်းထဲတွင် အားကျသော အရိပ်အယောင်များ ယှက်သန်းလာပြီး စကားဆိုလိုက်၏။

"ဂိုဏ်းစည်းကမ်းတွေသာ မရှိရင် ဒီ ပိုင်ယွဲ့မြို့တော်က ဂိုဏ်းခွဲမှာပဲ နေချင်တော့တယ်... ပြင်ပက အရှုပ်အထွေးတွေနဲ့ ဝေးပြီး ဒီလို အမိုးအကာအောက်မှာ နေရတာ သိပ်ကောင်းတာပဲ"

စုယွီက သူမကို ကြည့်ရင်း သက်ပြင်းတစ်ချက် ချလိုက်ကာ ပြန်ပြောလိုက်သည်။

"အစ်မ... ကျွန်တော်က မိသားစုကို လစ်လျူရှုထားတာ မဟုတ်ပါဘူးနော်... မိသားစုဆီက သတင်းတွေ၊ စာတွေကို ကျွန်တော် အမြဲ စောင့်စား နားစွင့်နေတာပါ"

စုဇီက ခေါင်းကို ဖြည်းညှင်းစွာ ခါယမ်းလိုက်၏။

"နင် ဒီမှာ နေနေလို့ မိသားစုကို ပစ်ထားတယ်လို့ ဆိုလိုတာ မဟုတ်ပါဘူး... ငါ စိတ်နည်းနည်း ပင်ပန်းနေလို့ပါ"

"ဘာတွေ ဖြစ်ခဲ့လို့လဲဗျ"

စုယွီက မျက်မှောင်ကြုတ်လျက် မေးမြန်းလိုက်သည်။ စုဇီက သက်ပြင်းအနည်းငယ် ချလိုက်ပြီးမှ ခပ်တိုးတိုး ရင်ဖွင့်လာ၏။

"ငါ ပိုင်ယွဲ့မြို့တော်ကို မလာခင်တုန်းက ဂိုဏ်းခေါင်းဆောင်က ငါနဲ့ စီစီဆီကို လာတယ်၊ ကျန်းမိသားစု၊ ဟွမ်မိသားစုတို့နဲ့ လက်ထပ်ပြီး မဟာမိတ် ဖွဲ့စေချင်နေတယ်... ဂိုဏ်းပိုင်နက် တည်ငြိမ်ဖို့အတွက်တဲ့လေ"

ထိုစကားကို ကြားလိုက်ရသောအခါ စုယွီ၏ မျက်နှာထားမှာ ချက်ချင်း ပြောင်းလဲသွားတော့သည်။

မဟာမိတ် ဟူလော။

ကြီးမြတ်လှပါသော ယွင်ကျန်းဂိုဏ်း၏ ဂိုဏ်းခေါင်းဆောင်က အခြေခံ တည်ဆောက်ခြင်း အဆင့်ရှိသည့် အမျိုးသမီး ကျင့်ကြံသူ နှစ်ဦးကို သာမန် ကျင့်ကြံခြင်း မိသားစု နှစ်ခုထံသို့ လက်ထပ်ပေးပြီး မျက်နှာလိုမျက်နှာရ လုပ်ချင်နေသည်လော။

သူ၏ ဂုဏ်သိက္ခာများကို လုံးဝ ဂရုမစိုက်တော့ပြီလော။

"အရှက်မရှိလိုက်တဲ့ လူယုတ်မာတွေ... ရယ်စရာ ကောင်းလိုက်တာဗျာ"

စုယွီက ဒေါသတကြီး ရယ်မောလိုက်လေသည်။ ယွင်ကျန်းဂိုဏ်းသည် ပျက်စီးမည့် လမ်းစသို့ ဦးတည်နေပြီ ဖြစ်ကြောင်း သူ ရိပ်စားမိလိုက်၏။ မိမိ လက်အောက်ခံ မိသားစုငယ်လေးများကိုပင် မျက်နှာချိုသွေးရန် ကြိုးစားနေသော ဂိုဏ်းခေါင်းဆောင် တစ်ယောက် ရှိနေသမျှ ထိုဂိုဏ်းသည် ရေရှည် ရပ်တည်နိုင်မည် မဟုတ်ပေ။

တပည့်ရွေးချယ်ပွဲ အောင်မြင်ပြီးချိန်က ထိုဂိုဏ်းသို့ မဝင်ရောက်ခဲ့မိသည်မှာ ကံကောင်းလေစွ ဟု စုယွီ တွေးတောလိုက်မိသည်။ သို့မဟုတ်ပါက သူ အလွန်တရာ ရွံရှာမိမည်မှာ အမှန်ပင် ဖြစ်ချေသည်။

ထို့နောက် စုယွီက ဆက်လက် မေးမြန်းလိုက်၏။

"ဒါဆို ပထမ အကြီးအကဲကရော... ဂိုဏ်းရဲ့ ပထမ အကြီးအကဲက ဘာပြောလဲ"

"ပထမ အကြီးအကဲက ဂိုဏ်းခေါင်းဆောင်နဲ့ ပြင်းပြင်းထန်ထန် စကားများပြီး ရန်ဖြစ်ခဲ့ကြတယ်... အခုဆို ဂိုဏ်းထဲက အခြေအနေတွေက လုံးဝ ပြောင်းလဲသွားပြီ... အပြင်စည်း တပည့်တွေတောင် ဘယ်ဘက်က ပါရမလဲ ဆိုတာ ရွေးချယ်ဖို့ ဖိအားပေးခံနေရတယ်"

စကားပြောရင်း စုဇီက သူမ၏ နားထင်ကြောများကို ဖိနှိပ်လိုက်၏။ သူမ၏ ပုံစံမှာ အလွန်ပင်ပန်းနွမ်းနယ်နေပုံ ရလေသည်။

"ပထမ အကြီးအကဲနဲ့ စီနီယာအစ်မ ချန်ယွီ တို့ ရှိနေသေးသရွေ့တော့ ဂိုဏ်းက ငါတို့ကို အတင်းအကျပ် မဖိအားပေးရဲပါဘူး... ဒါပေမဲ့ မကြာသေးခင်က ကျန်းနဲ့ ဟွမ် မိသားစုတွေ ပေါင်းပြီး မေပယ်မြို့တော်က ပိုင်မိသားစု ကိစ္စတွေမှာ ဝင်ပါလာကြပြီ... ပိုင်မိသားစုက အရင်တုန်းက ငါတို့ သိမ်းပိုက်ခဲ့တဲ့ အရင်းအမြစ် နေရာကို အဲ့ဒီ မိသားစု နှစ်ခုရဲ့ အကူအညီနဲ့ ပြန်ယူသွားပြီလေ"

"ဒါက အစပဲ ရှိသေးတယ်... နောက်တစ်ခါဆိုရင် ခရမ်းရောင် ရွှေ သတ္တုတွင်းကိုပါ သူတို့ ပစ်မှတ်ထားလာလိမ့်မယ်... ငါတို့ဘက်က အညံ့မခံသရွေ့ပေါ့"

စုယွီ၏ မျက်နှာထားမှာ ထပ်မံ ပျက်ယွင်းသွားပြန်သည်။ ကျန်းမိသားစုနှင့် ဟွမ်မိသားစု ပူးပေါင်းလိုက်ခြင်းသည် မေပယ်မြို့တော်မှ ပိုင်မိသားစု၏ အရင်းအမြစ် နေရာ သို့မဟုတ် သတ္တုတွင်းကို လိုချင်၍ မဟုတ်ပေ။ သူတို့၏ အဓိက ပစ်မှတ်မှာ စုမိသားစုနှင့် ချန်မိသားစုပင် ဖြစ်လေသည်။

မိသားစု နှစ်ခုလုံးကို ဒူးထောက် အညံ့ခံစေရန် ရည်ရွယ်ခြင်း ဖြစ်ပေ၏။

စုယွီသည် ပြင်းထန်သော ဖိအားတစ်ရပ်ကို ခံစားလိုက်ရသည်။ သူ မသိရှိမီက ကိစ္စမရှိသော်လည်း ယခုကဲ့သို့ သတင်းစကားကို ကြားသိလိုက်ရသောအခါ ရင်ဘတ်ထဲတွင် လေးလံသော ကျောက်တုံးကြီး ဖိထားသကဲ့သို့ အသက်ရှူရ ကြပ်လာခဲ့ရသည်။ မိသားစုကို ထောက်ပံ့နေရသော စုဇီနှင့် ပဉ္စမ အဘိုး စုပင်းတို့ မည်မျှအထိ ဖိအားများ ခံစားနေရမည်ကို တွေးကြည့်ရုံဖြင့် သိနိုင်ပေသည်။

ခေတ္တမျှ တိတ်ဆိတ်သွားကြ၏။

စုယွီ၏ မျက်ဝန်းထဲတွင် ရက်စက်သော အလင်းရောင်များ ဖြတ်ပြေးသွားပြီး ပြတ်သားစွာ ပြောလိုက်သည်။

"အစ်မ... ဒီလေလံပွဲက ခုန်းလင် ဝိညာဉ်သစ်သီးကို လက်လွှတ်ခံလို့ မဖြစ်ဘူး"

ကျင့်ကြံခြင်း လောကသည် အင်အားကိုသာ အမြဲတမ်း ဦးစားပေးလေသည်။ အားနည်းသူကို အားကြီးသူက ဝါးမြိုခြင်းမှာ သဘာဝတရားပင် ဖြစ်ချေသည်။ လက်ရှိ စုမိသားစုနှင့် ချန်မိသားစု၏ အခြေအနေမှာ ယွင်ကျန်းဂိုဏ်းမှ ပထမ အကြီးအကဲ၏ ကျောထောက်နောက်ခံကြောင့်သာ တောင့်ခံထားနိုင်ခြင်း ဖြစ်သည်။

ထို့ကြောင့် ကျန်းနှင့် ဟွမ် မိသားစုတို့သည် မဆင်မခြင် မလုပ်ရဲကြသေးပေ။ ဤကဲ့သို့ အခြေအနေမျိုးတွင် စုမိသားစု အနေဖြင့် မိမိတို့၏ စွမ်းအားကို အတတ်နိုင်ဆုံး မြှင့်တင်ရန်မှတစ်ပါး အခြား ရွေးချယ်စရာ မရှိတော့ပေ။

အင်အားရှိမှသာလျှင် စုမိသားစုသည် စကားပြောခွင့်နှင့် ရွေးချယ်ခွင့် ရရှိနိုင်မည် ဖြစ်ပေသည်။

စုဇီက ခေါင်းညိတ်လိုက်ပြီး ပြော၏။

"ဒါပေမဲ့ ဝိညာဉ်သစ်သီးကို ရပြီးရင်တောင် နောက်ထပ် အဓိက ပစ္စည်းနှစ်မျိုး လိုနေသေးတယ်... ပြီးတော့ အခြေခံ တည်ဆောက်ခြင်း ဆေးလုံးကို ဖော်စပ်ပေးနိုင်မယ့် ဒုတိယအဆင့် ဆေးပညာရှင်ကိုလည်း ရှာရဦးမယ်"

"ကျွန်တော်တို့ တစ်မျိုးပဲ လိုတော့တာပါ... သန့်စင်သော မိစ္ဆာ အမြုတေ တစ်ခုပဲ လိုတော့တယ်... ရေခဲနှလုံးသား ကြာပန်းက ကျွန်တော့်ဆီမှာ ရှိပါတယ်"

ထိုစကားကို ကြားလိုက်ရသောအခါ စုဇီ အလွန် အံ့အားသင့်သွားလေသည်။ ရေခဲနှလုံးသား ကြာပန်းသည်လည်း ရှားပါး ပစ္စည်းတစ်ခု ဖြစ်သည်။ ပိုင်ယွဲ့မြို့တော်သို့ ရောက်ရှိနေသည်မှာ မကြာသေးသော စုယွီက ၎င်းကို လက်ဝယ်ပိုင်ဆိုင်ထားလိမ့်မည်ဟု သူမ ထင်မှတ်မထားခဲ့မိပေ။

ထိုအချိန်တွင် စုယွီက ဆက်လက် ပြောကြားလိုက်၏။

"အခြေခံ တည်ဆောက်ခြင်း ဆေးလုံး အတွက်တော့... ကျွန်တော် ကိုယ်တိုင် ဖော်စပ်နိုင်တယ်"

စုဇီ၏ မျက်လုံးများ ပြူးကျယ်သွားပြီး အံ့ဩဝမ်းသာသော အကြည့်များဖြင့် စုယွီကို ကြည့်လိုက်မိသည်။

"နင်... ဒုတိယအဆင့် ကနဦးအဆင့် ဆေးပညာရှင် ဖြစ်သွားပြီလား"

စုယွီက ခေါင်းညိတ်ပြလိုက်သောအခါ စုဇီက ဝမ်းမြောက်ဝမ်းသာ ရေရွတ်လိုက်၏။

"ကောင်းတယ်... သိပ်ကောင်းတာပဲ...ဖေဖေတို့သာ သိရင် သေချာပေါက် ပျော်သွားကြမှာပဲ"

စုယွီသည် ဒုတိယအဆင့် ဆေးပညာရှင် ဖြစ်လာကြောင်း သိလိုက်ရသဖြင့် စုဇီ၏ စိတ်ထဲတွင် ပျော်ရွှင်သွားရလေသည်။ သူမသည် စုယွီကို ခေါ်ဆောင်ကာ ဝိညာဉ် အရက်အိုးများကို သွားရောက် ဝယ်ယူခဲ့ပြီး အရသာရှိသော ဟင်းလျာများကို ကိုယ်တိုင် ချက်ပြုတ်ကာ မောင်နှမ နှစ်ယောက် အောင်ပွဲခံခဲ့ကြတော့သည်။

စားပွဲဝိုင်း သိမ်းချိန်တွင် အခြေခံ တည်ဆောက်ခြင်း အဆင့်ရှိသော စုဇီသည် အနည်းငယ် မူးဝေနေပြီ ဖြစ်လေသည်။ သူမသည် ကျောက်စားပွဲကို မှီတွယ်လျက် ထိုင်နေ၏။

မီးအိမ်ရောင်အောက်တွင် သူမ၏ မျက်နှာလေးမှာ ပန်းရောင်သမ်းနေပြီး နှုတ်ခမ်းဖျားမှ တိုးညှင်းသော စကားလုံးများကို ရေရွတ်နေလေသည်။ ထိုမြင်ကွင်းသည် ကြည့်မိသူအပေါင်းကို ယုယချင်စိတ် ဖြစ်ပေါ်စေနိုင်ပေသည်။

စုယွီမှာမူ အနည်းငယ် မူးဝေနေသော်လည်း အဆင်ပြေနေဆဲပင် ဖြစ်သည်။ သူ၏ ကိုယ်ခန္ဓာ ကျင့်စဉ် ဆယ်ဆင့်ကြောင့် ခန္ဓာကိုယ်မှာ အလွန် ကြံ့ခိုင်သန်မာနေပြီ ဖြစ်ရာ အရက်ဒဏ်ကို ကောင်းစွာ ခံနိုင်ရည် ရှိနေခြင်း ဖြစ်ပေသည်။

မူးနေသော စုဇီကို ကြည့်ရင်း စုယွီက ခေါင်းကို ဖြည်းညှင်းစွာ ခါယမ်းလိုက်၏။ ထို့နောက် သူမကို ပွေ့ချီကာ နံနက်ကတည်းက ပြင်ဆင်ထားသော အခန်းထဲသို့ ပို့ဆောင်ပြီး ကောင်းစွာ အနားယူစေလိုက်လေသည်။

ခြံဝင်းထဲသို့ ပြန်လည် ရောက်ရှိလာသောအခါ စုယွီသည် မိမိအတွက် အရက်တစ်ခွက် ထပ်မံ ငှဲ့လိုက်ပြန်သည်။ သူသည် ကြယ်ရောင်စုံသော ကောင်းကင်ကြီးကို မော့ကြည့်လိုက်၏။ သူ့မျက်ဝန်းများထဲတွင် စူးရှသော အလင်းရောင်တို့ ဖြတ်သန်းသွားလေသည်။

"ကျန်းမိသားစု... ဟွမ်မိသားစု... စောင့်နေကြစမ်းပါ... ငါ့မှာ အချိန်တွေ အများကြီး ရှိပါသေးတယ်... မေပယ်မြို့တော်က ပိုင်မိသားစုလည်း အခုထိ ခုန်ပေါက်နေရဲသေးတယ်ပေါ့လေ"

နောက်ဆုံးတွင် စုယွီသည် ဖိအားများ အားလုံးကို အရက်နှင့်အတူ မျိုချလိုက်ပြီး အခန်းထဲသို့ ဝင်ရောက် အနားယူလိုက်တော့သည်။

ပိုင်ယွဲ့ အင်မော်တယ် မြို့တော်၏ လေလံပွဲ ကျင်းပမည့် ရက် နီးကပ်လာသည်နှင့်အမျှ ကျင့်ကြံသူ အများအပြား ရောက်ရှိလာကြသဖြင့် လမ်းမများပေါ်တွင် စည်ကားသိုက်မြိုက်နေလေသည်။

စုဇီသည် စုယွီ၏ ခြံဝင်းထဲတွင် ယာယီ တည်းခိုနေထိုင်လျက် ရှိ၏။ စုယွီ၏ အိမ်နီးချင်းများသည် ကျင့်ကြံသူ ညီအစ်မနှစ်ဦး ဖြစ်ကြောင်း သိလိုက်ရသောအခါ သူမက သွားရောက် လည်ပတ်ခဲ့သော်လည်း သာမန် ကျင့်ကြံသူများသာ ဖြစ်နေသဖြင့် စုဇီ စိတ်ပျက်သွားခဲ့ရသည်။

သို့သော် လန်ရှီနှင့် လန်ကုန်း ညီအစ်မ နှစ်ဦးမှာမူ အလွန်တရာ တုန်လှုပ်သွားကြလေသည်။

ဘုရားရေ... မိတ်ဆွေ စုယွီ၏ နောက်ကွယ်တွင် အခြေခံ တည်ဆောက်ခြင်း အဆင့်ရှိသော အစ်မတစ်ယောက် ရှိနေတယ်တဲ့လား။ ကြောက်ဖို့ ကောင်းလိုက်လေခြင်း။

ထို့ကြောင့် လန်ညီအစ်မ နှစ်ဦး၏ စုယွီအပေါ် ဆက်ဆံပုံမှာ ပိုမို ရင်းနှီးနွေးထွေးလာပြီး လေးစားမှုနှင့် မျက်နှာလိုမျက်နှာရ ပြုမှုများ ပါဝင်လာခဲ့တော့သည်။

လဝက်ခန့် ကြာမြင့်ပြီးနောက်၊

စုယွီနှင့် စုဇီတို့သည် မြို့လယ်ရှိ ဝိညာဉ် နန်းတော်သို့ ရောက်ရှိလာကြ၏။

ယွင်ကျန်းဂိုဏ်း၏ တံဆိပ်ပြားကို အသုံးပြုကာ ဒုတိယထပ်ရှိ သီးသန့် အခန်းငယ် တစ်ခုကို ရယူလိုက်ကြသည်။

အခန်းငယ်မှ ငုံ့ကြည့်လိုက်သောအခါ အောက်ထပ် လေလံ ခန်းမကြီးထဲတွင် လူပင်လယ်ကြီး တည်ရှိနေသည်ကို တွေ့မြင်လိုက်ရပေသည်။ ဝင်ကြေး အဖြစ် အဆင့်နိမ့် ဝိညာဉ်ကျောက်တုံး တစ်ထောင် ပေးရသော်လည်း ကျင့်ကြံသူ ထောင်ပေါင်းများစွာ ရောက်ရှိနေကြခြင်း ဖြစ်သည်။

မကြာမီ လေလံပွဲကြီး တရားဝင် စတင်လေတော့သည်။

ဖွင့်ပွဲ အနေဖြင့် ဒုတိယအဆင့် ကနဦးအဆင့် ဆေးပညာရှင် တစ်ဦး၏ အမွေအနှစ် လက်ရာကို စတင် ရောင်းချခဲ့သည်။ ကြမ်းခင်းဈေးမှာ ဝိညာဉ်ကျောက်တုံး တစ်ထောင် ဖြစ်လေသည်။

အပြိုင်အဆိုင် ဈေးခေါ်ကြပြီးနောက် ပထမထပ် ခန်းမကြီးထဲရှိ အဘိုးအို တစ်ဦးက ဝိညာဉ်ကျောက်တုံး နှစ်ထောင့်ခြောက်ရာဖြင့် ဝယ်ယူသွားခဲ့လေသည်။

ထို့နောက်တွင် အထွေထွေ ပစ္စည်းများစွာကို ဆက်လက် လေလံတင်ခဲ့ကြသည်။ အချို့ ပစ္စည်းများသည် စုယွီနှင့် စုဇီတို့၏ စိတ်ဝင်စားမှုကို ဆွဲဆောင်နိုင်ခဲ့သော်လည်း သူတို့ ဝင်ရောက် ယှဉ်ပြိုင်ခြင်း မပြုခဲ့ကြပေ။

သို့သော် ဒုတိယအဆင့် အလယ်အလတ် မြေဓာတ် မိစ္ဆာ အမြုတေ တစ်ခု ထွက်ပေါ်လာသောအခါ စုယွီ၏ မျက်နှာတွင် အပြုံးတစ်ခု ဖြစ်ပေါ်လာခဲ့လေသည်။

နဂါးမိကျောင်း ရုပ်သေးသားရဲ အတွက် အလိုအပ်ဆုံး ပစ္စည်းကို တွေ့ရှိခဲ့ပြီ ဖြစ်ပေသည်။