အဓိက ခန်းမဆောင်၏ ကျေးကျွန်

~သူ၏ စိတ်အာရုံသည် ကျွမ်းကျင်မှု မျက်နှာပြင်ဆီသို့ ရောက်သွားခဲ့သည်။ တစ်ညတာ အတွင်းတွင် သိသာထင်ရှားသော ပြောင်းလဲမှုများ ဖြစ်ပေါ်ခဲ့သည်ကို တွေ့မြင်လိုက်ရပေသည်။

[နာမည် - စုယွီ]

[ကျင့်ကြံမှု - ချီစွမ်းအင် စုစည်းခြင်း နဝမဆင့်]

[သက်တမ်း - ၄၅/၁၆၄]

[ကျွမ်းကျင်မှုများ - အစိမ်းရောင် သစ်သား နှစ်ပတ်လည် ကွင်း ကျင့်စဉ် (ပထမ စက်ဝန်း ကိုးပတ်လည်၊ ကျွမ်းကျင်မှု ၂၅.၉၄%)၊ ရွှမ်မင် ထူထဲသော မြေကမ္ဘာ သိုင်းကျမ်း (ဆဋ္ဌမ အဆင့်၊ ကျွမ်းကျင်မှု ၈၇.၄၄%)၊ ၁၀၈ ကွက် မိကျောင်းသားရဲ ကိုယ်ခန္ဓာ ကျင့်စဉ် (ဒသမ အဆင့်၊ ကျွမ်းကျင်မှု ၁၉.၈၇%)၊ သွေးဝေလငါး လမင်းမြို ကျင့်စဉ် (ဒုတိယ အဆင့်၊ ကျွမ်းကျင်မှု ၁၀%)၊ ရွှေပုစဉ်းရင်ကွဲ ကျင့်စဉ် (ဒုတိယ အလွှာ၊ ကျွမ်းကျင်မှု ၄.၆၆%) ]

[မန္တန်များ - သစ်သားနွယ်ပင် မန္တန် (ပြီးပြည့်စုံ)၊ ဝိညာဉ် မွေးမြူခြင်း (ပြီးပြည့်စုံ)၊ ဝိညာဉ် လှံတံ (ပြီးပြည့်စုံ)၊ ဝိညာဉ် ပျိုးထောင်ခြင်း (ပြီးပြည့်စုံ)... မြေကမ္ဘာ ရှောင်တိမ်းခြင်း (ပြီးပြည့်စုံ)၊ လျှို့ဝှက်ဆန်းကြယ် ချပ်ဝတ် မန္တန် (ပြီးပြည့်စုံ)၊ မြေနဂါး ပြန်လှန်ခြင်း (ကျွမ်းကျင်မှု ၄၃.၁၇%)၊ လျှို့ဝှက်ဆန်းကြယ် နဂါး ချုပ်နှောင်ခြင်း (ကျွမ်းကျင်မှု ၂၃.၄၂%) ]

"အသက် ၄၅ နှစ် ရှိပြီ... ယွင်ကျန်းဂိုဏ်းကနေ ထုတ်ပယ်ခံရပြီးကတည်းက ကျင့်ကြံလာတာ ၂၉ နှစ်တောင် ရှိခဲ့ပြီပဲ"

စုယွီ သက်ပြင်းချလိုက်မိသည်။

"နောက်ဆုံးတော့ ချီစွမ်းအင် စုစည်းခြင်း နဝမဆင့်ကို ရောက်ရှိလာခဲ့ပြီ"

ချီစွမ်းအင် စုစည်းခြင်း နဝမဆင့်တွင် အံ့မခန်းဖွယ် ၁၆၄ နှစ်အထိ ရောက်ရှိလာသော သက်တမ်းကို ကြည့်ရင်း စုယွီ လေးနက်စွာ စိုက်ကြည့်နေမိသည်။

မိမိ၏ ခန္ဓာကိုယ်ကို သေချာစွာ စစ်ဆေးကြည့်လိုက်ရာ အစိမ်းရောင် သစ်သား နှစ်ပတ်လည် ကွင်း ကျင့်စဉ်သည် ပထမ စက်ဝန်း ကိုးပတ်လည်သို့ ရောက်ရှိနေပြီ ဖြစ်ကြောင်း တွေ့ရှိရသည်။ ကိုးကြိမ်တိုင်တိုင် ပြောင်းလဲခဲ့ပြီးသော နှစ်ပတ်လည် ကွင်းများသည် သူ၏ ကိုယ်တွင်း အနက်ရှိုင်းဆုံး နေရာတွင် နက်ရှိုင်းသော အမှတ်အသားများ ချန်ထားရစ်ခဲ့လေသည်။

အရေးကြီးဆုံး အချက်မှာ ဖမ်းဆုပ်၍ မရနိုင်သော အချိန်ကာလ၏ အရှိန်အဝါ တစ်ခု ရှိနေခြင်းပင်။

အလွန် ဖျော့တော့လှသည်။

သို့သော် ထိုအရှိန်အဝါ ရှိနေခြင်းကပင် သူ့အား အချိန်ကာလ၏ တိုက်စားဖျက်ဆီးမှုများကို အတိုင်းအတာ တစ်ခုအထိ ခုခံနိုင်စွမ်း ရှိစေပေသည်။

ဤအချက်သည် အစိမ်းရောင် သစ်သား နှစ်ပတ်လည် ကွင်း ကျင့်စဉ်က အခြား သစ်သားဓာတ် ကျင့်စဉ်များထက် အသက်ပိုရှည်စေရခြင်း၏ အကြောင်းရင်း တစ်ခု ဖြစ်ကောင်း ဖြစ်နိုင်ပေသည်။

"အခု ငါ့အသက် ၄၅ နှစ် ရှိပြီ ဆိုပေမဲ့ သေချာ တွက်ကြည့်မယ် ဆိုရင် နောက်ထပ် ၁၁၉ နှစ်တောင် နေရဦးမှာပဲ"

"ဒါတောင် ကျင့်ကြံမှု အဆင့် ဆက်တက်သွားရင် ရမယ့် သက်တမ်းကို ထည့်မတွက်ထားသေးဘူး"

"မတော်တဆ ဖြစ်ရပ်တွေသာ မရှိရင် အခြေခံ တည်ဆောက်ခြင်း အဆင့်ကို တက်လှမ်းဖို့က ပြဿနာ မရှိနိုင်ပါဘူး"

ပုံမှန် အခြေအနေတွင် အစိမ်းရောင် သစ်သား နှစ်ပတ်လည် ကွင်း ကျင့်စဉ်၏ ဒုတိယ စက်ဝန်းသို့ ရောက်ရှိရန် ခြောက်နှစ်ခန့် ကြာမြင့်မည်ဟု ခန့်မှန်းရသည်။

ဤ တွက်ချက်မှုသည် ရွှေပုစဉ်းရင်ကွဲ ကျင့်စဉ် ဒုတိယ အလွှာ၏ အကျိုးသက်ရောက်မှုကို ထည့်မတွက်ထားခြင်း ဖြစ်သည်။

ရွှေပုစဉ်းရင်ကွဲ ကျင့်စဉ်၏ အကူအညီဖြင့် ဆိုပါက စုယွီသည် လေးနှစ်ကျော် ငါးနှစ်အောက် ကာလအတွင်း အဆင့်ချိုးဖြတ်နိုင်ပြီး ကျွမ်းကျင်မှုကို မြှင့်တင်နိုင်ဖွယ် ရှိပေသည်။

ရွှမ်မင် ထူထဲသော မြေကမ္ဘာ သိုင်းကျမ်းသည်လည်း မကြာသေးမီက သိသာထင်ရှားသော တိုးတက်မှုများ ရှိခဲ့ပြီး စတုတ္ထ အဆင့်မှ ဆဋ္ဌမ အဆင့်သို့ ရောက်ရှိခဲ့ကာ ကျွမ်းကျင်မှု ၈၇.၄၄% အထိ ရှိလာခဲ့သည်။ နောက်ထပ် နှစ်လ၊ သုံးလ အတွင်း သတ္တမ အဆင့်သို့ ထပ်မံ တက်လှမ်းနိုင်လိမ့်မည်ဟု စုယွီ ခန့်မှန်းမိသည်။

သတ္တမ အဆင့်သို့ ရောက်ရှိပါက သူ၏ မြေဓာတ် ဝိညာဉ်အမြစ် ကျင့်ကြံမှုသည် ချီစွမ်းအင် စုစည်းခြင်း သတ္တမဆင့်နှင့် ညီမျှသွားမည် ဖြစ်သည်။ ထိုအခါ စုယွီ အနေဖြင့် မြေဓာတ် မန္တန်များကို အသုံးပြုရာတွင် အထောက်အကူ အချို့ ရရှိလာမည် ဖြစ်သည်။

သူ လေ့ကျင့်ထားသော မြေဓာတ် မန္တန်သစ် ရှစ်မျိုးကိုလည်း အသုံးပြုနိုင်တော့မည် ဖြစ်လေသည်။

—----------

နေရောင်ခြည် ထွက်ပေါ်လာသည်နှင့်အမျှ ငှက်ငယ်လေးများသည် နောက်ဖေး ခြံဝင်းရှိ သစ်ကိုင်းများပေါ်တွင် ခုန်ပေါက်ကာ ပျော်ရွှင်စွာ တေးသီနေကြသည်။

ဝူထုံ ဆေးလုံးမျှော်စင်…။

ဝူထုံ ဆေးလုံးမျှော်စင် ဖွင့်လှစ်လိုက်သည်နှင့် ယွီခယ်အာ ဖိတ်ခေါ်ထားသော စာရေးနှစ်ဦး ဝင်ရောက်လာပြီး ကုန်ပစ္စည်း စာရင်းများကို စတင် စစ်ဆေးကြတော့သည်။ ဆေးလုံးများ၊ ဝိညာဉ် ဆေးပင်များ လက်ကျန် စာရင်းနှင့် ဆေးလုံး အော်ဒါများကို ပြန်လည် စစ်ဆေးခြင်း စသည်တို့ကို တာဝန်ယူ ဆောင်ရွက်ကြလေသည်။

ထိုနှစ်ဦးစလုံးသည် ပထမအဆင့် အလယ်အလတ် ဆေးပညာရှင်များ ဖြစ်ကြသည်။ တစ်ဦးမှာ အသက် ၆၉ နှစ် ရှိပြီဖြစ်သော ရှုသယ်ရှန်း ဖြစ်ပြီး အခြားတစ်ဦးမှာ အသက် ၇၁ နှစ် ရှိသော ခန်းယွင်နျန် ဖြစ်လေသည်။

သူတို့နှစ်ဦးက ဆေးလုံးမျှော်စင်ကို စီမံခန့်ခွဲပေးနေသဖြင့် စုယွီ အနေဖြင့် ကိစ္စတိုင်းတွင် ပါဝင်နေစရာ မလိုတော့ဘဲ ကျင့်ကြံရန် အချိန်ပို ရရှိလာခဲ့သည်။

နောက်ဖေး ခြံဝင်း။

နှစ်နာရီကျော်ကြာ နေ့စဉ် ဆေးဖော်စပ်ခြင်း လုပ်ငန်းကို ပြီးစီးအောင် ဆောင်ရွက်ပြီးနောက် စုယွီသည် ဆေးလုံးများကို ပေးအပ်ကာ နောက်ဖေး ခြံဝင်းရှိ ဆေးဖော်စပ်ရာ အခန်းသို့ ပြန်လာခဲ့သည်။ သူ၏ နေ့စဉ် ကျင့်ကြံခြင်းကို အစိမ်းရောင် သစ်သား နှစ်ပတ်လည် ကွင်း ကျင့်စဉ်ဖြင့် စတင်လိုက်လေသည်။

"ဝုန်း"

ပြီးပြည့်စုံသော အရည်အသွေးရှိသည့် ပထမအဆင့် အဆင့်မြင့် ချီစွမ်းအင် ဆေးလုံးကို သောက်သုံးပြီးနောက် စုယွီသည် ကျင့်ကြံခြင်း လုပ်ငန်းစဉ်ကို စတင်လိုက်သည်။

ရှေးဟောင်း သစ်သား ရနံ့သင်းသင်းလေးသည် ပတ်ဝန်းကျင် တစ်ခုလုံးတွင် ‌ရိုက်ခတ်သွား၏။

တင်ပျဉ်ခွေ ထိုင်နေသော စုယွီသည် မြေကြီးထဲတွင် ခိုင်မြဲစွာ အမြစ်တွယ်နေသည့် ရှေးဟောင်း သစ်ပင်ကြီး တစ်ပင်အလား ပြောင်းလဲသွားသယောင် ရှိလေသည်။

တစ်ချိန်တည်းမှာပင်။

စုယွီက ရွှေပုစဉ်းရင်ကွဲ ကျင့်စဉ်ကို အသက်သွင်းလိုက်ရာ သူ၏ စိတ်ထဲရှိ ဝိညာဉ်သည် ရွှေရောင် ပုစဉ်းအိမ် အဖြစ်သို့ ပြောင်းလဲသွား၏။ ဖျော့တော့သော ရွှေရောင် အလင်းတန်း တစ်ခုသည် သူ၏ ခန္ဓာကိုယ် တစ်ခုလုံးကို လွှမ်းခြုံသွားပြီး စိတ်အာရုံသည် ရုတ်တရက် ထုံထိုင်းသွားတော့သည်။

ပြီးပြည့်စုံသော အရည်အသွေးရှိသည့် ဆေးလုံး၏ အာနိသင်ကြောင့် သူ၏ ကိုယ်တွင်း ချီစွမ်းအင် လည်ပတ်မှုနှုန်းသည် ၁၀ ရာခိုင်နှုန်းကျော် တိုးတက်နေပြီး ဖြစ်သည်။ ယခု ရွှေပုစဉ်းရင်ကွဲ ကျင့်စဉ်၏ လွှမ်းမိုးမှုကြောင့် နောက်ထပ် ၂၀ ရာခိုင်နှုန်း ထပ်မံ တိုးတက်လာပြန်သည်။

"ဝေါ... ဝေါ... ဝေါ..."

ဒုတိယအဆင့် ဝိညာဉ် သွေးကြောများကဲ့သို့ ထူထပ်သော သဘာဝ ဝိညာဉ် စွမ်းအင်များသည် ဝိညာဉ် စုစည်းခြင်း အခင်းအကျင်းကြောင့် ဆေးဖော်စပ်ရာ အခန်းဆီသို့ စုဝေးလာကြပြီး စုယွီ၏ ခန္ဓာကိုယ်ထဲသို့ မြောက်မြားစွာ စီးဝင်ကာ အစိမ်းရောင် သစ်သား ဝိညာဉ် စွမ်းအင် အဖြစ် သန့်စင်ခြင်း ခံလိုက်ရသည်။

ဤ လှုပ်ရှားမှု ပမာဏသည် သူ၏ ယခင် ကျင့်ကြံခြင်းများထက် များစွာ ကြီးမားလေသည်။

ဝိညာဉ် စွမ်းအင် အမျှင်တန်းလေးများသည် တစ်ခုပြီးတစ်ခု စုစည်းကာ မွေးဖွားလာပြီး စုယွီ၏ ကျင့်ကြံမှုကို အဆက်မပြတ် အားဖြည့်ပေးနေတော့သည်။

ဤ ကျင့်ကြံမှု အတွင်း အစိမ်းရောင် သစ်သား နှစ်ပတ်လည် ကွင်း ကျင့်စဉ်၏ ကျွမ်းကျင်မှုသည်လည်း တစ်စတစ်စ တိုးတက်လာနေလေသည်။

တစ်နာရီခွဲခန့် ကြာသောအခါ၊

စုယွီသည် ပြည့်ဝသော ခံစားမှု တစ်ခုကို ရရှိလိုက်သည်။ အစိမ်းရောင် သစ်သား နှစ်ပတ်လည် ကွင်း ကျင့်စဉ် လည်ပတ်မှုကို ချက်ချင်း ရပ်တန့်လိုက်ပြီး ကျင့်ကြံခြင်း အခြေအနေမှ ဖြည်းညှင်းစွာ ထွက်ခွာလာကာ စိမ်းပြာရောင် အသက်ရှူငွေ့ တစ်ခုကို မှုတ်ထုတ်လိုက်လေသည်။

ဒန်တျန် အတွင်း၌ အသစ်စက်စက် ဖွဲ့စည်းထားသော အစိမ်းရောင် သစ်သား ဝိညာဉ် စွမ်းအင်များသည် တဖြည်းဖြည်း ပေါင်းစည်းသွားပြီး ယနေ့အတွက် ကန့်သတ်ချက်သို့ ရောက်ရှိသွား၏။

အလျင်လိုလျှင် အမှား ဖြစ်တတ်သည် မဟုတ်ပါလော။

ဤ မွေးဖွားစ ဝိညာဉ် စွမ်းအင်များသည် တဖြည်းဖြည်းချင်း ပေါင်းစပ်ပြီး ထိန်းချုပ်ရန် အချိန်ယူရမည် ဖြစ်သည်။ အတင်းအဓမ္မ တိုးမြှင့်၍ မရနိုင်ပေ။

ကျွမ်းကျင်မှု မျက်နှာပြင်ကို တစ်ချက် ကြည့်လိုက်သည်။

[ကျင့်စဉ် - အစိမ်းရောင် သစ်သား နှစ်ပတ်လည် ကွင်း ကျင့်စဉ် (ပထမ စက်ဝန်း ကိုးပတ်လည်၊ ကျွမ်းကျင်မှု ၂၅.၉၉%) ]

"တစ်ရက် အတွင်းမှာ ကျွမ်းကျင်မှုက ၀.၀၄၅% လောက် တိုးလာတာပဲ"

"ဒါဆိုရင် တစ်နှစ် အတွင်း ၁၇% လောက် တိုးလာမှာပေါ့"

စုယွီ ယခင်က တွေးတောခဲ့သည့် အတိုင်းပင် အစိမ်းရောင် သစ်သား နှစ်ပတ်လည် ကွင်း ကျင့်စဉ်၏ ကျွမ်းကျင်မှုကို ဒုတိယ စက်ဝန်း၊ ပထမ ပတ်လည် အဆင့်သို့ မြှင့်တင်ရန်နှင့် အခြေခံ တည်ဆောက်ခြင်း ပထမ အဆင့်သို့ ရောက်ရှိရန် လေးနှစ်ကျော် ငါးနှစ်အောက် အချိန် ကြာမြင့်မည် ဖြစ်သည်။

သေချာသည်မှာ၊

ဤ တိုးတက်မှုနှုန်းသည် ပြီးပြည့်စုံသော အရည်အသွေးရှိသည့် ပထမအဆင့် ချီစွမ်းအင် ဆေးလုံးများနှင့် ရွှေပုစဉ်းရင်ကွဲ ကျင့်စဉ် ဒုတိယ အလွှာတို့၏ အကူအညီကြောင့်သာ ရရှိနိုင်ခြင်း ဖြစ်သည်။

"အလယ်အလတ် အဆင့် ဝိညာဉ်အမြစ် ရှိတဲ့ ကျင့်ကြံသူ တစ်ယောက်နဲ့ ယှဉ်နိုင်လောက်တယ်... ဒါမှမဟုတ် အလယ်အလတ် အဆင့် ဝိညာဉ်အမြစ် ရှိသူတွေထဲမှာ ပါရမီ ပိုမြင့်တဲ့သူ တစ်ယောက်နဲ့တောင် တူနေပြီ"

စုယွီ ကျေနပ်သွားမိသည်။ ရွှေပုစဉ်းရင်ကွဲ ကျင့်စဉ်သည် အမှန်တကယ်ပင် ကောင်းကင်ဘုံကို ဆန့်ကျင်နိုင်သော ပညာရပ် ဖြစ်ပေသည်။ ရွှေပုစဉ်းရင်ကွဲ ကျင့်စဉ် ဒုတိယ အဆင့်သည် ပို၍ပင် ကြောက်မက်ဖွယ် ကောင်းလှပေသည်။

စိတ်ထဲမှ အတွေးများကို ဖိနှိပ်လိုက်ပြီး စုယွီသည် ချန်ခွန်းအိတ်ထဲမှ ဒုတိယအဆင့် အလယ်အလတ် မိစ္ဆာသားရဲ သွေးအဆီအနှစ် တစ်စက်ကို ထုတ်ယူကာ မျိုချလိုက်သည်။ ထို့နောက် ၁၀၈ ကွက် မိကျောင်းသားရဲ ကိုယ်ခန္ဓာ ကျင့်စဉ်ကို စတင် လေ့ကျင့်လိုက်လေသည်။

ရွှေပုစဉ်းရင်ကွဲ ကျင့်စဉ် ဒုတိယ အလွှာ၏ လွှမ်းမိုးမှု အောက်တွင် ကိုယ်ခန္ဓာ ကျင့်စဉ်၏ ကျင့်ကြံမှုနှုန်းသည်လည်း ၂၀ ရာခိုင်နှုန်း တိုးတက်လာခဲ့သည်။

အချိန်များ တရွေ့ရွေ့ ကုန်ဆုံးသွား၏။

နေ့လယ်ပိုင်း ကျော်လွန်ပြီး ညနေခင်းသို့ ရောက်ရှိလာချိန်၌မူ၊

လူနှစ်ဦး ဆေးလုံးမျှော်စင် ရှေ့သို့ ရောက်ရှိလာကြသည်။ သူတို့ မည်သူမည်ဝါ ဖြစ်ကြောင်း အတည်ပြုပြီးနောက် ရှုသယ်ရှန်းသည် နောက်ဖေး ခြံဝင်းထဲသို့ ကပျာကယာ ဝင်ရောက်လာပြီး စုယွီကို အပြင်သို့ ဖိတ်ခေါ်လေသည်။

စုယွီ ဆေးလုံးမျှော်စင်သို့ ရောက်ရှိလာသောအခါ အသက် ၃၀ ခန့် ရှိပုံ ရပြီး မုတ်ဆိတ်မွေးများနှင့် ထူးခြားသော အရှိန်အဝါ တစ်ခု ပိုင်ဆိုင်ထားသည့် အမျိုးသား တစ်ဦးကို တွေ့လိုက်ရသည်။ ထိုသူ၏ ဘေးတွင် အသက် ၅၀၊ ၆၀ ခန့် ရှိပုံ ရသော အကူ အဘိုးအို တစ်ဦးသည် ဆိုင်ထဲတွင် တိတ်ဆိတ်စွာ ရပ်လျက် စိတ်ရှည်လက်ရှည် စောင့်ဆိုင်းနေလေသည်။

ထိုအမျိုးသားကို မြင်လိုက်ရသောအခါ စုယွီ၏ မျက်နှာထား တင်းမာသွား၏။ ဤအမျိုးသားသည် သာမန် ပုံစံပေါက်နေသော်လည်း စုယွီသည် မိမိ၏ နတ်ဘုရား အာရုံ နှင့် အမြင်အာရုံကို အသုံးပြု၍ သူ၏ ကျင့်ကြံမှု အဆင့်ကို ထိုးဖောက် မြင်တွေ့လိုက်ရသည်။

အခြေခံ တည်ဆောက်ခြင်း ပထမ အဆင့်။

ထိုအမျိုးသား၏ အသက်သည် အပြင်ပန်း မြင်ရသည့် အသက် ၃၀ ကျော် မဟုတ်သည်မှာ သေချာလှပေသည်။

စုယွီက ထိုအမျိုးသားကို လေ့လာနေစဉ် ထိုအမျိုးသားကလည်း စုယွီကို ပြန်လည် အကဲခတ်နေ၏။ သူသည် အနည်းငယ် အံ့အားသင့်နေပုံ ရပြီး တုန်လှုပ်နေပုံလည်း ပေါ်လွင်နေသည်။ ခေတ္တမျှ ကြာပြီးနောက် သူက စကားစလိုက်သည်။

"ဈေးထဲမှာ ဝူထုံ ဆေးလုံးမျှော်စင် အသစ် ဖွင့်တယ်လို့ ကြားမိပါတယ်... ဒီမှာ ဖော်စပ်တဲ့ ဆေးလုံးတွေရဲ့ အရည်အသွေးက အရမ်း ကောင်းတယ်လို့လည်း ကြားတယ်"

"ပြီးတော့ ဒီမှာ ဒုတိယအဆင့် ကနဦးအဆင့် ဆေးပညာရှင် တစ်ယောက် ရှိတယ် ဆိုတာ... မိတ်ဆွေလား ခင်ဗျာ"

စုယွီက စဉ်းစားဟန်ဖြင့် ခေါင်းညိတ်ပြလိုက်သည်။

"မင်္ဂလာပါ မိတ်ဆွေ... ဒုတိယ ဝူထုံ ဆေးလုံးမျှော်စင် ဆိုတာ မရှိဘူး ဆိုရင်တော့ အဲ့ဒီလူက ကျွန်တော် ဖြစ်မှာပါ"

စကား ခေတ္တ ရပ်လိုက်ပြီး စုယွီက ထိုအမျိုးသားကို ကြည့်ကာ မေးမြန်းလိုက်သည်။

"အမှန်တရား ခန်းမဆောင်က ဘဏ္ဍာစိုး တစ်ယောက် အနေနဲ့ ကျွန်တော့်ဆီ လာလည်တဲ့ ရည်ရွယ်ချက်ကို သိခွင့်ရှိမလား ခင်ဗျာ"

"ချီစွမ်းအင် စုစည်းခြင်း နဝမဆင့်နဲ့ ဒုတိယအဆင့် ကနဦးအဆင့် ဆေးပညာရှင် ဖြစ်လာနိုင်တယ်... ပြီးတော့ လူတွေက ထိပ်တန်း အဆင့်လို့ ချီးမွမ်းကြတဲ့ ဒုတိယအဆင့် ကနဦးအဆင့် ဆေးလုံးတွေကို ဖော်စပ်နိုင်တယ်"

ထိုအမျိုးသား၏ မျက်လုံးများတွင် စုယွီကို လေးစားသော အရိပ်အယောင်များ ပေါ်လာ၏။

"ခင်ဗျားရဲ့ ဆေးပညာ ပါရမီက တကယ်ကို ထူးခြားတာပဲဗျာ"

ထို့နောက် ထိုအမျိုးသားက ပွင့်ပွင့်လင်းလင်း ပြောဆိုလိုက်လေသည်။

"ကျွန်တော်က အမှန်တရား ခန်းမဆောင်ရဲ့ ဘဏ္ဍာစိုး ဟူရှို့ ပါ... ပိုင်ယွဲ့ အင်မော်တယ် မြို့တော် သခင်ကြီးရဲ့ တတိယ တပည့်၊ ဒုတိယအဆင့် ကနဦးအဆင့် ဆေးပညာရှင် တည်ထောင်ထားတဲ့ ခန်းမဆောင်ပေါ့"

"ကျွန်တော် ဒီကို လာတာ ခင်ဗျားကို အမှန်တရား ခန်းမဆောင်ဆီ ဖိတ်ခေါ်ဖို့ပါ”