သန်းတစ်ရာမှာ တစ်ယောက်ပဲရှိတဲ့ ပါရမီရှင်ကို ဦးညွှတ်ခြင်း…အပြစ်စီရင်ရာစင်မြင့်

"အဲဒီအကွက်ပဲ!"

ကျန်းထျန်းမင်နှင့် လုရှန်ကျိုးတို့ တပြိုင်နက်တည်း တွေးလိုက်ကြသည်။ ပထမလူက ထိတ်လန့်နေပြီး ဒုတိယလူက ပျော်ရွှင်အံ့သြနေသည်။

သူ့ နိမိတ်အိပ်မက်ထဲတွင် ဤတိုက်ကွက်က ကောင်းကင်တရားရုံးကို တိုက်ရိုက် ရှုံးနိမ့်စေခဲ့သည်။ လုရှန်ကျိုး၏ မှတ်ဉာဏ်ထဲတွင် ဤတိုက်ကွက်က သိုင်းနတ်ဘုရားနယ်မြေမှ မဟာကောင်းကင်သူတော်စင် ငါးပါး အပါအဝင် ကျွမ်းကျင်သူ သန်းပေါင်းများစွာကို တိုက်ရိုက် ချေမှုန်းပစ်ခဲ့သည်။

ဤတိုက်ကွက်ကို ပြန်မြင်ရသောအခါ လုရှန်ကျိုး အလွန်အမင်း စိတ်လှုပ်ရှားနေသည်။

ဤသည်မှာ သူ လိုက်စားချင်ဆုံးသော အန္တိမပညာရပ်ပင် ဖြစ်သည်။ တစ်ချက်တည်းနှင့် အရာအားလုံးကို ဖျက်ဆီးပစ်ခြင်း!

ချန်ယွဲ့ချန်းက စွမ်းအင်များကို လှည့်ပတ်လိုက်ပြီး သူ့ရဲ့ ကျယ်ပြန့်သော သိုင်းမူလစွမ်းအင်များက ကောင်းကင်နှင့်မြေကြီး ပျက်သုဉ်းခြင်း၏ သက်ရောက်မှုများကို တားဆီးရန် ကြီးမားသော အကာအရံတစ်ခု ဖြစ်ပေါ်လာသည်။

နောက်တစ်စက္ကန့်တွင် သူ မျက်လုံးပြူးသွားပြီး မယုံကြည်နိုင်သော အမူအရာကို ထုတ်ဖော်လိုက်သည်။ ပြင်းထန်သော အလင်းရောင်နှင့် ထိတွေ့လိုက်သည်နှင့် သူ့ရဲ့ သိုင်းမူလစွမ်းအင်များ မည်သည့် ခုခံမှုမှ မရှိဘဲ အရည်ပျော်ကျသွားလေသည်။

အဲဒါ ဘာအန္တိမပညာရပ်လဲ…

ချန်ယွဲ့ချန်း နားမလည်နိုင်ပေ။

သူနှင့် လုရှန်ကျိုးကြားတွင် ကြီးမားသော ကွာဟချက် ရှိသည်ကို သူ သိသော်လည်း ဤမျှလောက် မကြီးမားသင့်ပေ။

ကောင်းကင်တရားရုံးရှိ လူတိုင်း ထိတ်လန့်သွားကြသည်။ အစီအရင်နှစ်ခုက နောက်ထပ် တိုက်ခိုက်မှုတစ်ခု ပြုလုပ်လိုက်သော်လည်း အလင်းရောင် ကြီးထွားလာခြင်းကို မတားဆီးနိုင်ချေ။ အလင်းရောင်က ချန်ယွဲ့ချန်းကို လွှမ်းခြုံတော့မည့်ဆဲဆဲတွင် ထိုကြောက်မက်ဖွယ်ကောင်းသော အလင်းရောင် လေထုထဲသို့ ပျောက်ကွယ်သွားသည်။

ချန်ယွဲ့ချန်း သက်ပြင်းချလိုက်ပြီး ပြုံးလိုက်မိသည်။

သူ မရှောင်တိမ်းခဲ့ရသည့် အကြောင်းရင်းမှာ သူ့တွင် အားကိုးရာ ရှိနေသောကြောင့် ဖြစ်သည်။

တောက်ပသော အလင်းရောင် ပျောက်ကွယ်သွားပြီးနောက် ပေတစ်သောင်း အမြင့်ရှိ ပုံရိပ်သည်လည်း ပျောက်ကွယ်သွားသဖြင့် လူတိုင်း ထိတ်လန့်သွားကြသလို လုရှန်ကျိုးလည်း ကြောင်အသွား၏။

ကောင်းကင်တရားရုံး၏ နောက်ဘက်မှ ပေပေါင်းသောင်းချီသော ရွှေရောင်အလင်းတန်းများ လင်းလက်လာပြီး လျင်မြန်စွာ ကြီးထွားလာကာ လေဟာနယ်ကို လင်းထိန်သွားစေသည်။

ထို့နောက် ခမ်းနားထည်ဝါသော ပုံရိပ်တစ်ခု ဖြည်းညင်းစွာ စုစည်းလာကာ ၎င်းသည် ကောင်းကင်တရားရုံးမှ အင်မော်တယ်နတ်ဘုရားများအထက်၌ မာန်ပါပါ ရပ်တည်နေသော မဟာတာအိုမူလနတ်ဘုရားပလ္လင် ဖြစ်သည်။ တာအိုဘိုးဘေးက ပလ္လင်ပေါ်တွင် ထိုင်၍ လုရှန်ကျိုးကို ငုံ့ကြည့်လိုက်သည်။

လုရှန်ကျိုး တာအိုဘိုးဘေးနှင့် နောက်ဆုံး ရင်ဆိုင်ခဲ့စဉ်က မဟာတာအိုမူလနတ်ဘုရားပလ္လင် မရှိခဲ့ပေ။ ထို့ကြောင့် တာအိုဘိုးဘေး ပေါ်ထွက်လာပုံကြောင့် သူ ထိတ်လန့်သွားသည်။

အဲဒါ ဘာလဲ…

တာအိုဘိုးဘေးက ဘယ်လိုလုပ် ဒီလောက် ကြီးမားသွားတာလဲ…

အရွယ်အစားက မူလကောင်းကင်ဝိညာဉ်သန္ဓေသားထက် လုံးဝ မနိမ့်ကျပေ။ သို့သော် မူလကောင်းကင်ဝိညာဉ်သန္ဓေသားသည် ကောင်းကင်ဥပဒေသကျောက်တုံးမှ ပြုလုပ်ထားခြင်း ဖြစ်သည်။ ကောင်းကင်မူလသန္ဓေသားကျောက်တုံးသည်ပင် ဤမျှ ကြီးမားနေပြီဖြစ်ရာ လူတစ်ယောက်က မည်သို့ ဤမျှ ကြီးမားနိုင်မည်နည်း။

သူ သေချာ ကြည့်လိုက်သောအခါ တာအိုဘိုးဘေး၏ ညာဘက်လက်ထဲတွင် မျက်စိကျိန်းမတတ် တောက်ပသော အလင်းလုံးတစ်ခု ဝဲပျံနေသည်ကို တွေ့လိုက်ရကာ အတွင်း၌ ရုန်းကန်နေသော ပုံရိပ်တစ်ခု ရှိနေသည်။

လုရှန်ကျိုး၏ ခန္ဓာကိုယ် တုန်ခါသွားသည်။ ယခင်တိုက်ပွဲတွင် တာအိုဘိုးဘေး သူ့ကို မည်သို့ ကျုံ့သွားစေခဲ့သည်ကို သူ ပြန်သတိရလိုက်သည်။

အဲဒါ ဘယ်လိုပညာရပ်မျိုးလဲ.. အဝေးကနေတောင် ဘာဖြစ်သွားလဲဆိုတာ သူ မမြင်လိုက်ရပေ။

"ပြီးခဲ့တဲ့တစ်ခေါက်တုန်းက မင်း ငါ့ကိုယ်ပွားကိုတောင် မနိုင်ခဲ့ဘူး.. အခု ဒုတိယအခွင့်အရေး ရမယ်လို့ ထင်နေတာလား…"

ကျန်းချန်ရှန်း၏ အသံ ထွက်ပေါ်လာပြီး လူတိုင်း ရှင်းလင်းစွာ ကြားလိုက်ရသည်။

ကောင်းကင်သင်္ဘောထဲတွင် ပြင်းထန်စွာ ဒဏ်ရာရထားသော လီချန်းဟိုင်သည်လည်း အခက်အခဲကြားမှ တွားသွားတက်လာကာ အဝေးမှ ခမ်းနားထည်ဝါသော ပုံရိပ်ကို မော့ကြည့်လိုက်ပြီး မျက်လုံးများ ပြူးကျယ်သွားသည်။

ကိုယ်ပွား...

ဘယ်လို ဖြစ်တည်မှုမျိုးကို သူတို့ ရင်ဆိုင်နေရတာလဲ…

ကောင်းကင်သင်္ဘောထဲမှ အခြား သိုင်းပညာရှင်များက လုရှန်ကျိုး၏ ယုံကြည်ရသော လက်အောက်ငယ်သားများ ဖြစ်ကြပြီး ထိုအချိန်တွင် အလားတူ ထိတ်လန့်သွားကြသည်။ လုရှန်ကျိုး တာအိုဘိုးဘေးလက်ထဲတွင် အကြီးအကျယ် ရှုံးနိမ့်ခဲ့ကြောင်း သူတို့ ကြားဖူးသည်။ ထိုတိုက်ပွဲတွင် သိုင်းပညာရှင် သန်းပေါင်းများစွာနှင့် မဟာကောင်းကင်သူတော်စင် ငါးပါး သေဆုံးခဲ့သည်ဟု ဆိုကြသည်။

အဲဒါက ကိုယ်ပွားတစ်ခုကြောင့်လား…

ကောင်းကင်တရားရုံးဘက်တွင်မူ သူတို့အားလုံး သိချင်စိတ် ဖြစ်ပေါ်နေကြသည်။ တာအိုဘိုးဘေး ဘယ်တုန်းက ဒီလိုကျွမ်းကျင်သူမျိုးနဲ့ တိုက်ခိုက်ခဲ့တာလဲ…

ဒီနှစ်တွေမှာ အေးချမ်းနေပုံရပေမယ့် တကယ်တော့ သူတို့ကို လေဒဏ်မိုးဒဏ်မှ ကာကွယ်ပေးနေတာ တာအိုဘိုးဘေး ဖြစ်နေခဲ့သည်။ သူတို့တွေ တာအိုဘိုးဘေးကို ရူးသွပ်စွာ ကြည့်လိုက်ပြီး နောက်ထပ် ဆန်းကြယ်သော စွမ်းရည်များကို မျှော်လင့်နေကြသည်။

လူတိုင်း တာအိုဘိုးဘေး တိုက်ခိုက်သည်ကို မမြင်ဖူးကြပေ။ထို့ကြောင့် တာအိုဘိုးဘေး၏ ဆန်းကြယ်သော စွမ်းရည်များနှင့် လက်လှမ်းမမီနိုင်သော အင်မော်တယ်တာအိုကို မျက်မြင်တွေ့ရရန် မျှော်လင့်နေကြသည်။

"ဒုတိယအခွင့်အရေး မရှိဘူးဆိုတာ ကျွန်တော် သိပါတယ်... ဒါပေမဲ့ ကျွန်တော် တာအိုဘိုးဘေးနဲ့ ကောင်းကင်တရားရုံးကို အလုပ်အကျွေး ပြုချင်ပါတယ်… ကျေးဇူးပြုပြီး အင်မော်တယ်တာအိုရဲ့ စစ်မှန်တဲ့ စွမ်းအားကို ပြသပေးပါ!"

လုရှန်ကျိုး အော်ဟစ်လိုက်သည်။ ခဏတာ ထိတ်လန့်သွားပြီးနောက် သူ ပို၍ပင် စိတ်လှုပ်ရှားလာသည်။

သူ အခြေအနေများစွာကို တွေးတောခဲ့ပြီး ဖြစ်နိုင်ချေ အနည်းဆုံးအရာ ဖြစ်ပျက်ခဲ့သည်။ တာအိုဘိုးဘေး၏ စွမ်းရည်ကို ကူးယူထားသော မူလကောင်းကင်ဝိညာဉ်သန္ဓေသားသည် သူ့အတွက် မည်သည့် ခြိမ်းခြောက်မှုမှ မဖြစ်စေခဲ့ပေ။

လုရှန်ကျိုး၏ စကားကို ကြားသောအခါ လီချန်းဟိုင် လက်သီးကို ဆုပ်လိုက်သော်လည်း သူ ပိုခံစားရသည်မှာ အားကိုးရာမဲ့ခြင်း ဖြစ်သည်။

သူသည် တာအိုဘိုးဘေးကိုရော လုရှန်ကျိုးကိုပါ ရင်ဆိုင်ရန် အင်အားမရှိပေ။ ကိုယ်ပိုင် အခန်းကဏ္ဍကိုပင် သူ ရှာမတွေ့တော့ချေ။

"ဒါဆိုရင် မင်းနဲ့ မူလကောင်းကင်ဝိညာဉ်သန္ဓေသားရဲ့ စွမ်းအားကို ငါ့ကို ပြပါစေ!"

ကျန်းချန်ရှန်းက လက်ကို မြှောက်လိုက်ပြီး မူလကောင်းကင်ဝိညာဉ်သန္ဓေသားကို လွှတ်ပေးလိုက်သည်။ လုရှန်ကျိုးဆီသို့ ပို့ပေးလိုက်ရာ မကြာမီ ယခင် အရွယ်အစားအတိုင်း ပြန်ဖြစ်သွားသည်။

ထိုစကားကို ကြားသောအခါ လုရှန်ကျိုး ချက်ချင်းပင် ခုန်တက်လိုက်ပြီး မူလကောင်းကင်ဝိညာဉ်သန္ဓေသား၏ ခေါင်းပေါ်သို့ ရောက်ရှိသွားသည်။ မူလကောင်းကင်ဝိညာဉ်သန္ဓေသားသည်လည်း ခုန်တက်လိုက်ပြီး အရှိန်အဟုန် မြင့်တင်ရန် ဟိန်းဟောက်လိုက်သည်။ လုရှန်ကျိုးက သူ့ရဲ့အထက်တန်းစား မူလဥပဒေသစွမ်းအားကို တိုက်ရိုက် အသုံးပြုလိုက်ပြီး ငွေရောင်အလင်းမျ မူလကောင်းကင်ဝိညာဉ်သန္ဓေသား၏ ခန္ဓာကိုယ်၌ ကပ်ငြိသွားကာ အရပ်ရပ်မှ နေရာလွတ်များကို တွန့်လိမ်သွားစေသည်။

ထိုအခါ ကြောက်မက်ဖွယ်ကောင်းသော ဖိအားတစ်ခု သက်ဆင်းလာပြီး ကောင်းကင်တရားရုံးရှိ လူတိုင်းကို ထိတ်လန့်သွားစေသည်။

သူ ဘယ်လောက် သန်မာတာလဲ…

အရေးအကြီးဆုံးမှာ ထို ပြိုင်ဘက်ကင်း စွမ်းအားဟု ခံစားရသော အရာသည် တာအိုဘိုးဘေး၏ တစ်ချက်တည်းသော တိုက်ခိုက်မှုကိုပင် ခံနိုင်ရည်ရှိပုံ မရပေ။

လုရှန်ကျိုး ညာဘက်လက်ကို မြှောက်၍ လက်သီးဆုပ်လိုက်သည်နှင့် မှောင်မိုက်နေသော လေဟာနယ်ထဲတွင် မှန်ကွဲသံကဲ့သို့ ပြတ်သားသော အသံ ထွက်ပေါ်လာသည်။လူတိုင်း ကွဲအက်သည့် လက္ခဏာများကို ရှင်းရှင်းလင်းလင်း မြင်လိုက်ရသော်လည်း လေဟာနယ်သည် မှောင်မိုက်နေဆဲပင်။ ဤခံစားချက်က အလွန် ထူးဆန်းသည်။

မူလကောင်းကင်ဝိညာဉ်သန္ဓေသားက ညာဘက်ခြေထောက်ကို ထပ်မံ မြှောက်လိုက်ပြီး ကောင်းကင်နှင့်မြေကြီး ပျက်သုဉ်းခြင်းကို ထုတ်သုံးလိုက်သည်။

ခြေထောက်ကို ဆောင့်နင်းလိုက်သည်နှင့် အထက်တန်းစား မူလဥပဒေသစွမ်းအား ပါဝင်သော ကောင်းကင်နှင့်မြေကြီး ပျက်သုဉ်းခြင်းစွမ်းအားများက လေဟာနယ်အတွင်းရှိ နေရာလပ်ကို ချေမှုန်းပစ်လိုက်ပြီး မုန်တိုင်းနှင့်အတူ ကျန်းချန်ရှန်းနှင့် ကောင်းကင်တရားရုံးဆီသို့ တိုက်ခတ်သွားသည်။

ယခုအကြိမ် ကောင်းကင်နှင့်မြေကြီး ပျက်သုဉ်းခြင်း၏ အရှိန်အဝါက ယခင်ကထက် များစွာ ပိုမို အားကောင်းနေသည်။

အလွန်တောက်ပသော အလင်းရောင်ကြောင့် ကောင်းကင်တရားရုံးမှ အင်မော်တယ်နတ်ဘုရားများ ဆွံအမှင်သက်နေကြသည်။ မပြောပလောက်သယောင် ဖြစ်သွား၏။

သို့သော် တုံ့ပြန်မှုအနေဖြင့် ကျန်းချန်ရှန်းက ညာဘက်လက်ကို ပေါ့ပါးစွာ မြှောက်လိုက်ပြီး လေထဲသို့ ဖမ်းဆုပ်လိုက်သည်။

နတ်ဘုရားစွမ်းအား...

စကြဝဠာလက်ဝါး!

ကောင်းကင်နှင့်မြေကြီး ပျက်သုဉ်းခြင်းကြောင့် ဖြစ်ပေါ်လာသော တောက်ပသည့် အလင်းလုံး လျင်မြန်စွာ ကျုံ့သွားပြီး မူလကောင်းကင်ဝိညာဉ်သန္ဓေသားနှင့် လုရှန်ကျိုး အပါအဝင် ကွဲအက်နေသော နေရာလပ် တစ်ခုလုံး သူ့ လက်ဝါးထဲသို့ စုပ်ယူခြင်း ခံလိုက်ရသည်။

ဤမြင်ကွင်းက ကောင်းကင်တရားရုံးရှိ လူတိုင်းကို ထိတ်လန့်သွားစေသည်။ လုပ်ငန်းစဉ်သည် ယခင်ကထက် ပိုနှေးကွေးသောကြောင့် ရန်သူ ကျုံ့သွားပြီး တာအိုဘိုးဘေးလက်ထဲသို့ ကျရောက်သွားသည်ကို သူတို့ မျက်မြင်တွေ့လိုက်ရသည်။

တာအိုဘိုးဘေးက ကြောက်မက်ဖွယ်ရာ အဖျက်စွမ်းအားပါသော နတ်ဘုရားစွမ်းအားကို အသုံးမပြုခဲ့ပေ။ သူသည် သူ့ရှေ့မှ ဖြတ်သန်းသွားသော ပိုးကောင်လေး တစ်ကောင်ကို ဖမ်းဆုပ်လိုက်သကဲ့သို့ ပေါ့ပေါ့ပါးပါး ဖမ်းဆုပ်ကာ ရန်သူကို အလွယ်တကူ နှိမ်နင်းလိုက်ခြင်း ဖြစ်သည်။

သူ ပိုပေါ့ပါးလေလေ သူတို့ ပိုထိတ်လန့်လေလေပင်…

လီချန်းဟိုင်နှင့် လုရှန်ကျိုး၏ လက်အောက်ငယ်သားများသည်လည်း ကြောင်အသွားကြပြီး နေရာမှာပင် အမြစ်တွယ်နေသကဲ့သို့ ဖြစ်နေကြသည်။

ကျန်းချန်ရှန်း၏ လက်ဝါးပေါ်တွင် မူလကောင်းကင်ဝိညာဉ်သန္ဓေသား၏ ပခုံးပေါ်၌ ရပ်နေသော လုရှန်ကျိုးက မော့ကြည့်လိုက်သည်။ ကျန်းချန်ရှန်း၏ ခန္ဓာကိုယ် အပေါ်ပိုင်းက သူ့ မြင်ကွင်းတစ်ခုလုံးကို လွှမ်းမိုးထားသည်။ ဤမျှ နီးကပ်သော အကွာအဝေးမှာပင် တာအိုဘိုးဘေး၏ စစ်မှန်သော ရုပ်သွင်ကို သူ မမြင်နိုင်ပေ။ တုနှိုင်းမဲ့ယန်အလင်းတန်းက တာအိုဘိုးဘေး၏ ပခုံးပေါ်တွင် ဝဲပျံနေသော နေတစ်စင်းကဲ့သို့ ဖြစ်ပြီး နေရောင်ခြည်က စစ်မှန်သော ရုပ်သွင်ကို ဖုံးကွယ်ထားသည်။ တာအိုဘိုးဘေး၏ နောက်ရှိ အလင်းလုံးကိုးခုကလည်း ကောင်းကင်ဥပဒေသများကဲ့သို့ မြင့်မား၍ ကြီးကျယ်ခမ်းနားပြီး မြင့်မြတ်ကာ သိက္ခာရှိလှသည်။

အကယ်၍ ဤကမ္ဘာပေါ်ရှိ အရာအားလုံးကို ဖန်ဆင်းသော ဘုရားသခင် အမှန်တကယ် ရှိခဲ့လျှင် ဤကဲ့သို့ ဖြစ်ပေလိမ့်မည်။

ဒါက လုရှန်ကျိုး၏ စိတ်ထဲတွင် ပေါ်လာသော အတွေးဖြစ်သည်။

ထိုစဉ် ဆန်းကြယ်သော စွမ်းအားနှစ်ခု သူနှင့် မူလကောင်းကင်ဝိညာဉ်သန္ဓေသား၏ ခန္ဓာကိုယ်ထဲသို့ ရုတ်တရက် ဝင်ရောက်လာသည်။ သူ မခုခံသလို ခုခံ၍လည်း မရနိုင်ပေ။

အစားထိုးအနေဖြင့် သူက ကျိုးနွံသော ကိုယ်နေဟန်ထားကို ပြုလုပ်လိုက်သည်။

ဤစွမ်းအားက သူ့ခန္ဓာကိုယ်ထဲတွင် ဖျောက်ဖျက်၍ မရနိုင်သော အမှတ်အသားတစ်ခု ချန်ထားခဲ့ပြီးနောက် လျင်မြန်စွာ ပျောက်ကွယ်သွားသည်။ ထိတ်လန့်မည့်အစား သူ ဝမ်းသာသွားခဲ့သည်။

ဒါက သူ့အစီအစဉ်ပဲ!

တာအိုဘိုးဘေးကို လက်စားချေခြင်းနှင့် ယှဉ်လျှင် သူ မည်မျှ သန်မာသည်ကို မြင်ချင်သည်။ အကယ်၍ လုံလောက်အောင် သန်မာလျှင် သူ အင်မော်တယ်တာအို နောက်သို့ လိုက်မည်။

မူလကောင်းကင်ဝိညာဉ်သန္ဓေသားက တာအိုဘိုးဘေး၏ စွမ်းအားအပြည့်အဝကို မကူးယူနိုင်လျှင် တာအိုဘိုးဘေး ဘယ်လောက်တောင် သန်မာသနည်း။

လုရှန်ကျိုး နက်နက်နဲနဲ တွေးတောနေစဉ် သူ့မျက်လုံးများ ရွှေရောင်အလင်းတန်း တစ်ခုနှင့် ဆုံမိသွားသည်။ ရုတ်တရက် သူ ကမ္ဘာကြီး ဝေဝါးသွားသည်ဟု ခံစားလိုက်ရပြီး ရွှေရောင်အလင်း ပျောက်ကွယ်သွားသည်။ သူက စိတ်ထင်ယောင်ထင်မှား ဖြစ်သည်ဟု ယူဆကာ သိပ်မတွေးတော့ပေ။

ကျန်းချန်ရှန်း လက်ကို ဝှေ့ယမ်းလိုက်ပြီး သူနှင့် မူလကောင်းကင်ဝိညာဉ်သန္ဓေသားကို လွှတ်ပေးလိုက်သည်။

"သူတို့ကို ခွန်းလွန်လွင်ပြင်ဆီ ခေါ်သွားလိုက်ပါ…"

ကျန်းချန်ရှန်း၏ အသံ ထွက်ပေါ်လာပြီး ပျောက်ကွယ်သွားသည်။

ဝိညာဉ်စိတ်ဆန္ဒဖြင့် လုရှန်ကျိုး၏ မှတ်ဉာဏ်များကို စစ်ဆေးခဲ့သော်လည်း သိုင်းနတ်ဘုရားနယ်မြေ၏ မည်သည့် ပူးပေါင်းကြံစည်မှုကိုမှ မတွေ့ရှိခဲ့ရပေ။

အင်မော်တယ်တာအို၏ စွမ်းအားကို စမ်းသပ်ရန် လုရှန်ကျိုး ကိုယ်ပိုင် သဘောဆန္ဒဖြင့် လုပ်ဆောင်ခဲ့ခြင်း ဖြစ်သည်။

ကျန်းချန်ရှန်းက ကျန်းဇီယုထံ အသံပေးပို့ပြီး လုရှန်ကျိုးအား သိုင်းတာအိုနှင့် လုံးဝ အဆက်အသွယ်ဖြတ်ကာ ကောင်းကင်တရားရုံး၏ စခန်းသို့ ဆွဲသွင်းနိုင်ရန် ကောင်းကင်စစ်သည် တစ်ဦး ဖြစ်လာစေရေး စီစဉ်ခိုင်းလိုက်သည်။ လုရှန်ကျိုးကလည်း ပြတ်သားသည်။ ယုံကြည်ရသော လက်အောက်ငယ်သားများ အားလုံးကိုပင် ခေါ်ဆောင်လာခဲ့သော်လည လုကလန်အတွက်မူ သူ ဂရုမစိုက်ပေ။

ကျန်းချန်ရှန်း သူ့ကို သတ်မည် စိုးရိမ်သဖြင့် လီချန်းဟိုင်ကို ခေါ်ဆောင်လာခြင်း ဖြစ်ပြီး လီချန်းဟိုင်ကို ညှိနှိုင်းရေး အပေါင်ပစ္စည်းအဖြစ် အသုံးပြုရန် စီစဉ်ထားသည်။

လုရှန်ကျိုး စိတ်လျှော့လိုက်ပြီး တာအိုဘိုးဘေး ပျောက်ကွယ်သွားရာ အရပ်သို့ လေထဲတွင် ဒူးထောက်လိုက်ကာ ကျယ်လောင်စွာ ရယ်မောလိုက်ပြီး…

"လုရှန်ကျိုးက တာအိုဘိုးဘေးနောက်ကို ထာဝရ လိုက်ပါဖို့ ဆန္ဒရှိပါတယ်!"

သူ့မျက်ဝန်းထံတွင် ပြင်းပြသော ဆန္ဒများ တောက်လောင်နေသည်။

အင်မော်တယ်တာအို၏ စွမ်းအားကို သူ မဖြစ်မနေ ရယူရမည်!

ကောင်းကင်တရားရုံးဘက်မှ လူများ တစ်ယောက်ကို တစ်ယောက် ကြည့်ကာ စိတ်လှုပ်ရှားလာကြသည်။

လုရှန်ကျိုးနှင့် မူလကောင်းကင်ဝိညာဉ်သန္ဓေသား၏ စွမ်းအားကို သူတို့ မျက်မြင်တွေ့ခဲ့ရပြီးပြီ ဖြစ်သည်။ ထိုကဲ့သို့သော ကျွမ်းကျင်သူများ ကောင်းကင်တရားရုံးသို့ ဝင်ရောက်လာခြင်းသည် သေချာပေါက် ကောင်းမွန်သော ကိစ္စဖြစ်သည်။

တိုင်ရှီးချန်၊ ချန်ယွဲ့ချန်းနှင့် ချန်မျိုးနွယ်စုမှ ကျွမ်းကျင်သူများသည်ပင် ထိတ်လန့်နေဆဲပင်။

သိုင်းနတ်ဘုရားနယ်မြေ၏ ကျော်ကြားသော ပါရမီရှင် လုရှန်ကျိုးက တာအိုဘိုးဘေး လက်အောက်ကို ဒီအတိုင်းရောက်လာတာလား…

အကယ်၍ လုရှန်ကျိုးသာ ဒီလိုဖြစ်နေရင် တခြား ပါရမီရှင်တွေလည်း...

သူတို့ တူညီသော ဖြစ်နိုင်ချေတစ်ခုကို တိတ်တဆိတ် တွေးမိလိုက်ကြသည်။ သိုင်းနတ်ဘုရားနယ်မြေ၏ အုပ်ချုပ်မှုကို ကောင်းကင်တရားရုံးက ဖြုတ်ချမည့် မျှော်လင့်ချက်ကို နောက်ဆုံးတွင် သူတို့ မြင်တွေ့လိုက်ရပြီ ဖြစ်သည်။

၃၃ ထပ် ကောင်းကင်ရှိ ခရမ်းရောင်တိမ်တိုက်နန်းတော်။

[ ကောင်းကင်အမွေခံခေါတ်၏ ၂၁၂ နှစ်တွင် လုရှန်ကျိုးက သင့်ကို မူလကောင်းကင်ဝိညာဉ်သန္ဓေသားဖြင့် တိုက်ခိုက်ခဲ့သည်။ သင်သည် ဝိုင်းရံပိတ်ဆို့မှုကို အောင်မြင်စွာ ကျော်လွှားနိုင်ခဲ့ပြီး ကပ်ဘေးမှ လွတ်မြောက်ခဲ့သည်။ထို့​ကြောင့် ရှင်သန်မှုဆုလာဘ်အဖြစ် ဝိညာဉ်ပစ္စည်းတခုဖြစ်သော 'အပြစ်စီရင်ရာစင်မြင့်' ကို ရရှိသည်။]

အသိပေးချက်ကို ကြည့်ပြီး ကျန်းချန်ရှန်း သက်ပြင်းချလိုက်သည်။

ရှင်သန်မှုဆုလာဘ် မရရှိမှာကို သူ စိုးရိမ်နေခဲ့မိသည်။ လုရှန်ကျိုးက လူကောင်းတစ်ယောက် မဟုတ်နိုင်ပေ။ အကယ်၍ မူလကောင်းကင်ဝိညာဉ်သန္ဓေသားက သူ့ကို နိုင်နိုင်ခဲ့လျှင် သေချာပေါက် ပြဿနာရှာပေလိမ့်မည်။

သို့သော် ဤသည်မှာ ပုံမှန်သာ ဖြစ်သည်။ လုရှန်ကျိုးကို အသုံးချနိုင်သရွေ့ အဆင်ပြေသည်။

ထို့အပြင် လုရှန်ကျိုးက ကောင်းမွန်သော ဆိုင်းဘုတ်တစ်ခုလည်း ဖြစ်သည်။ ဘာပဲဖြစ်ဖြစ် ရွှမ်ဟွမ်မဟာကမ္ဘာရှိ လူငယ်သိုင်းပညာရှင် အများစုက လုရှန်ကျိုးကို သူတို့၏ ရည်မှန်းချက်အဖြစ် သတ်မှတ်ထားကြသည်။

ကျန်းချန်ရှန်း အပြစ်စီရင်ရာစင်မြင့်၏ မှတ်ဉာဏ်များကို ချက်ချင်း အမွေမဆက်ခံသေးပေ။ အစားထိုးအနေဖြင့် သူ လုရှန်ကျိုးကို စိုက်ကြည့်နေသည်။ လုရှန်ကျိုး တရားဝင် နတ်ဘုရားတစ်ပါး ဖြစ်လာမှသာ သူ စိတ်အေးနိုင်မည် ဖြစ်သည်။

ဤတိုက်ပွဲတွင် ကောင်းကင်တရားရုံးဘက်က မည်သည့် အကျိုးပြုမှုမှ မလုပ်ခဲ့သော်လည်း ရွှမ်ဟွမ်မဟာကမ္ဘာမှ ပါရမီရှင်များ၏ စွမ်းအားနှင့် တာအိုဘိုးဘေး၏ နက်နဲလှသော နတ်ဘုရားစွမ်းအားကို မြင်တွေ့ခဲ့ရသည်။ထို့ကြောင့် သူတို့အားလုံး စိတ်လှုပ်ရှားနေကြပြီး ကောင်းကင်တရားရုံး၏ စိတ်ဓာတ်အဟုန် အကြီးအကျယ် မြင့်တက်လာခဲ့သည်။

လုရှန်ကျိုးက မူလကောင်းကင်ဝိညာဉ်သန္ဓေသားကို ကောင်းကင်မြစ် အထက်တွင် ရပ်တန့်ခိုင်းလိုက်ပြီး ကောင်းကင်သင်္ဘောကတော့ သူ့နောက်သို့ လိုက်ကာ ခွန်းလွန်လွင်ပြင်ထဲ ဝင်ရောက်လာသည်။

သူက ကောင်းကင်ဧကရာဇ်နောက်သို့ လိုက်၍ ကောင်းကင်တရားရုံးထဲသို့ တစ်ယောက်တည်း ဝင်ရောက်လာပြီး ကောင်းကင်သင်္ဘောက အပြင်တွင် စောင့်ဆိုင်းနေသည်။

ကျန်းဇီယုသည်လည်း လုရှန်ကျိုး ပြန်လှည့်တိုက်မည်ကို ကြောက်သဖြင့် နတ်ဘုရားခန့်အပ်လွှာထဲသို့ ချက်ချင်း ခေါ်ဆောင်သွားလိုက်သည်။

နတ်ဘုရားခန့်အပ်လွှာကို မြင်လိုက်ရသောအခါ လုရှန်ကျိုး သူ့ ရွေးချယ်မှုအတွက် ပို၍ပင် ဝမ်းမြောက်မိသွားသည်။

နတ်ဘုရားခန့်အပ်လွှာကို ဖြတ်သန်းပြီးနောက် နတ်ဘုရားခန့်အပ်လွှာ၏ ကံတရားကို ရရှိခဲ့သည်။ထိုအခါ ကျန်းချန်ရှန်း၏ ကံတရားသည်လည်း ရုတ်တရက် အများကြီး တိုးတက်လာသည်။

ဤလူတစ်ယောက်တည်းက ကောင်းကင်တရားရုံး တစ်ခုလုံးနှင့် ညီမျှသည်။ သူ အမှန်တကယ် စွမ်းအားကြီးပေသည်။

အစမှ အဆုံးထိ လုရှန်ကျိုး ခုခံခြင်း မရှိပေ။ ထိုအချက်က သူ့ ကံတရား အလွန်လျင်မြန်စွာ ပေါင်းစပ်နိုင်ရခြင်း၏ အဓိက အကြောင်းရင်း ဖြစ်သည်။

ကျန်းဇီယုက လုရှန်ကျိုးနှင့် စတင် ဆက်သွယ်ပြီး ကောင်းကင်တရားရုံးအကြောင်း မိတ်ဆက်ပေးလိုက်သည်။

ကောင်းကင်တရားရုံးက လုရှန်ကျိုး မျှော်လင့်ထားသကဲ့သို့ အားနည်းသော်လည်း ဖွံ့ဖြိုးတိုးတက်မှု အရှိန်အဟုန်က သူ့ကို ထိတ်လန့်သွားစေသည်။ ကောင်းကင်တရားရုံးရှိ လူအများစုက အောက်ပိုင်းနယ်ပယ်မှ ဖြစ်ကြသည်။

မျှော်လင့်ထားသည့်အတိုင်း အင်မော်တယ်တာအိုပင်!

ထိုအချိန်မှစ၍ လုရှန်ကျိုး ကောင်းကင်တရားရုံးသို့ ဝင်ရောက်ခဲ့ပြီး အသန်မာဆုံး ကောင်းကင်စစ်သည်အဖြစ် စံချိန်သစ် တစ်ခု ထပ်မံ တင်ရှိခဲ့ကာ ထိုသတင်းက ကောင်းကင်တရားရုံးတွင် ကျယ်ကျယ်ပြန့်ပြန့် ပျံ့နှံ့သွားခဲ့သည်။

ယခုမှသာ ကျန်းချန်ရှန်း အပြစ်စီရင်ရာစင်မြင့်၏ မှတ်ဉာဏ်များကို စတင် အမွေဆက်ခံလိုက်သည်။

အပြစ်စီရင်ရာစင်မြင့်သည် သတ်ဖြတ်ခြင်း ဝိညာဉ်ရတနာ တစ်ခုဖြစ်သည်။ သခင်အဖြစ် အသိအမှတ်ပြုခိုင်းရန် မလိုအပ်ပေ။ ၎င်း၏ လုပ်ဆောင်ချက်မှာလည်း အလွန် ရိုးရှင်းသည်။ စင်မြင့်ပေါ်တွင် ခေါင်းဖြတ်ခံရသည်နှင့် သူတို့၏ ကံ၊ ကံတရားနှင့် စွမ်းအားတို့သည်လည်း ၎င်းနှင့်အတူ ပါသွားမည် ဖြစ်သည်။

အခြေခံအုတ်မြစ်နှင့် ခန္ဓာကိုယ် မည်မျှပင် သန်မာစေကာမူ အပြစ်စီရင်ရာစင်မြင့်၏ သတ်ဖြတ်ခြင်း ပြစ်ဒဏ်ဓားများကို ခံနိုင်ရည် မရှိနိုင်ပေ။

ဤသည်မှာ အပြစ်စီရင်ရာစင်မြင့်၏ မိတ်ဆက်မျှသာ ဖြစ်သည်။ လက်တွေ့ အကျိုးသက်ရောက်မှုကို အတည်ပြုရန် လိုသေးသည်။

အနောက်အရပ်သို့ ခရီးသွားခြင်း ဇာတ်လမ်းတွင် ကောင်းကင်တရားရုံးက စွန်းဝူခုန်းကို ဖမ်းဆီးပြီး သူ့ကို ပိုမို သန်မာလာစေရန် အမျိုးမျိုးသော ကောင်းကင်ပြစ်ဒဏ်များကို အသုံးပြုခဲ့ဖူးသည်။