ကံကောင်းသူ၊ ပဉ္စမအဆင့်

ညနေ မစောင်းမီ လီချင်းချိုးက တပည့်အားလုံးကို စုဝေးစေပြီး ကျန်းကျောက်ရှားက "ဓားပျံတစ်ဆယ့်သုံးလက်" ဖွဲ့စည်းတော့မည် ဖြစ်ကြောင်း ကြေညာလိုက်ရာ တပည့်များ အလွန် စိတ်လှုပ်ရှားသွားကြပြီး ကျန်းကျောက်ရှားကို မျှော်လင့်ချက် ကြီးစွာဖြင့် ကြည့်လိုက်ကြသည်။

ဒီလူက ချင်းရှောင်းဂိုဏ်းမှာ အစွမ်းအထက်ဆုံး လူသား ဖြစ်ပြီး သိုင်းလောကမှာ ဒုတိယ အစွမ်းအထက်ဆုံး လူသား ဖြစ်တယ်၊ သူ့ဆီက သိုင်းပညာ သင်ယူခွင့်ရရင် အနာဂတ်က သေချာပေါက် တောက်ပနေမှာပဲ။

ထို့အပြင် "ဓားပျံတစ်ဆယ့်သုံးလက်" ဆိုသည့် နာမည်ကလည်း ခမ်းနားနေသည်။ လက်ရှိတွင် "ချင်းရှောင်း၏ နတ်ဘုရားးခုနစ်ပါး" သာ ဂိုဏ်းတွင် နာမည်ကြီးသည်။ ယခုအခါ "ဓားပျံတစ်ဆယ့်သုံးလက်" ထပ်တိုးလာမည် ဆိုပါက တပည့်များ မည်သို့ စိတ်မလှုပ်ရှားဘဲ နေမည်နည်း။

ကျန်းကျောက်ရှား လူရွေးနေသည်ကို လီချင်းချိုး ကြည့်နေသည်။ ကျန်းကျောက်ရှား ၁၂ ယောက် ရွေးပြီးသွားသောအခါ သူ ရုတ်တရက် ဝင်ပြောလိုက်ပြီး တပည့်တစ်ဦးကို လက်ညှိုးထိုးပြကာ … "တတိယဂျူနီယာညီလေး၊ သူ့ကို နောက်ဆုံးနေရာ ပေးလိုက်ပါ။"

လီချင်းချိုး လက်ညှိုးထိုးပြသော တပည့်၏ အမည်မှာ ရွှဲ့ကျင်း ဖြစ်သည်။ ဒီနှစ် သူ ၁၆ နှစ် ရှိပြီ။ သူ့ရုပ်ရည်က သာမန် ဖြစ်ပြီး အရပ်လည်း သိပ်မရှည်သဖြင့် လူအုပ်ထဲတွင် ရှိနေလျှင် သတိပြုမိရန် ခက်ခဲသည်။

လီချင်းချိုး သူ့ကို လက်ညှိုးထိုးလိုက်သောအခါ ရွှဲ့ကျင်း ကြောင်အမ်းသွားသည်။ ဂိုဏ်းချုပ်က သူ့ရှေ့နှင့် သူ့နောက်က လူများကို ရည်ညွှန်းနေသည်ဟု ထင်မှတ်ပြီး သူ မသိစိတ်ဖြင့် ဘေးဘီကို လှည့်ကြည့်လိုက်မိသည်။

ကျန်းကျောက်ရှားက ရွှဲ့ကျင်းကို ကြည့်ပြီး မျက်မှောင်အနည်းငယ် ကြုတ်လိုက်သည်။ ရွှဲ့ကျင်းနှင့် ပတ်သက်၍ သူ့တွင် ဘာအမှတ်တရမှ မရှိပေ။ ဘယ်လိုကြည့်ကြည့် ဒီကောင်လေးက အလားအလာရှိတဲ့ ပါရမီရှင်နဲ့ မတူဘူး။

လီချင်းချိုးက သူ၏ သံသယကို မြင်လိုက်ရသဖြင့် ပြုံးလျက် ဆက်ပြောလိုက်၏။ "သူ့မှာ အကန့်အသတ်မဲ့တဲ့ အလားအလာ ရှိနေတယ် ဆိုတာ ငါ အာရုံခံမိတယ်၊ အနာဂတ်မှာ မင်းအတွက် အကူအညီကောင်း တစ်ယောက် ဖြစ်လာလိမ့်မယ်။"

ရွှဲ့ကျင်းသည် ပါရမီနှင့် ဉာဏ်ပညာ အတော်အတန် ကောင်းမွန်သော တစ်ဦးတည်းသော တပည့်သစ် ဖြစ်သည်။ ဂိုဏ်းသို့ ဝင်ရောက်ပြီးနောက် သူ၏ သစ္စာရှိမှု လျင်မြန်စွာ တိုးတက်လာသဖြင့် သူ့ကို ရာထူးတိုးပေးရန် လီချင်းချိုး စိတ်သန့်နေသည်။

"ကောင်းမွန်သော" ဆိုသည့် စကားလုံးက ရွှီနင်း သို့မဟုတ် ကျန်းကျောက်ရှားလောက် ပါရမီ မပါဘူးဟု ဆိုလိုနိုင်သော်လည်း ချင်းရှောင်းဂိုဏ်း အတွင်းတွင်မူ သူ့ကို ပါရမီရှင်ဟု သတ်မှတ်နိုင်ပေသည်။

ကျန်းကျောက်ရှား ကိုယ်တိုင် ရွေးချယ်ထားသော ၁၂ ယောက်က ရွှဲ့ကျင်းလောက် မကောင်းပေ။

လီချင်းချိုး၏ စကားကို ကြားလိုက်ရသဖြင့် ရွှဲ့ကျင်း စိတ်လှုပ်ရှားပြီး ရင်ထဲ ထိခိုက်သွားကာ မျက်ရည်ကျချင်စိတ်ပင် ပေါက်လာသည်။

ဂိုဏ်းချုပ်က သူ့ကို တကယ်ပဲ အာရုံစိုက်နေတာလား။

ဘေးတွင် ရပ်နေသော ယန်ကျွယ်တိန်၊ ချန်ချန်ဟိုင်၊ လီစီဖုန်းနှင့် အခြားသူများလည်း ရွှဲ့ကျင်းကို စူးစမ်းလိုစိတ်ဖြင့် ကြည့်လိုက်ကြသည်။ လီချင်းချိုး သူ့ တပည့်ကို ဤကဲ့သို့ ရှားရှားပါးပါး ချီးကျူးလေ့ ရှိသည်။ ရွှီနင်းကို နမူနာ ယူ၍ လူတိုင်း မသိစိတ်ဖြင့် မျှော်လင့်နေကြသည်။

ဒီကလေးက တကယ်ပဲ ထူးခြားနေတာလား။

ကျန်းကျောက်ရှား သဘောတူလိုက်၏။ "အဲဒီလို ဆိုမှတော့ ဂိုဏ်းချုပ်အစ်ကို့ကို ယုံလိုက်မယ်။"

သူက ရွှဲ့ကျင်းကို လက်ဖြင့် လှမ်းခေါ်လိုက်ပြီး ရှေ့ထွက်လာရန် အချက်ပြကာ သူရွေးချယ်ထားသော ဓားပျံတစ်ဆယ့်သုံးလက်နှင့်အတူ ထွက်ခွာသွားလေသည်။

အရွေးမခံရသော တပည့်များ အနည်းငယ် စိတ်ပျက်သွားကြသော်လည်း တစ်ချိန်တည်းမှာပင် "ဓားပျံတစ်ဆယ့်သုံးလက်" သည် အနာဂတ်တွင် မည်မျှ အောင်မြင်မှု ရရှိမည်ကို စောင့်မျှော်နေကြသည်။

လီချင်းချိုး တပည့်များကို လူစုခွဲလိုက်သည်။ ထိုအချိန်တွင် လီစီဖုန်း သူ့အနားသို့ ရောက်လာပြီး ရယ်မောကာ

"ဒုတိယအစ်ကိုမှာ ချင်းရှောင်းရဲ့ နတ်ဘုရားခုနစ်ပါး ရှိတယ်၊ တတိယအစ်ကိုမှာ ဓားပျံတစ်ဆယ့်သုံးလက် ရှိသွားပြီ၊ ကျွန်တော်ရော အဖွဲ့တစ်ခုလောက် ဖွဲ့လို့ ရမလား။"

လီချင်းချိုး သူ့ကို ကြည့်ပြီး "ဘာအဖွဲ့လဲ"

"ချင်းရှောင်းရဲ့ တ​စ္ဆေကိုးကောင် ဆိုရင်ရော.."

"နားထောင်လို့ မကောင်းဘူး၊ ငါ ထပ်စဉ်းစားလိုက်ဦးမယ်။"

လီချင်းချိုး သူ့ကို မျက်လုံးလှန်ကြည့်လိုက်ပြီး တောင်တံခါးဝဆီသို့ လျှောက်သွားလေသည်။

လီစီဖုန်း ချက်ချင်း နောက်မှ လိုက်သွားပြီး သူ့ကို စတင် ပူဆာလေတော့သည်။

လီချင်းချိုးက လီစီဖုန်း၏ တောင်းဆိုမှုကို သဘောမတူသော်လည်း လီစီဖုန်း၏ စကားများက သူ့ကို စိတ်ကူး ဉာဏ်ကွန့်မြူးစေခဲ့သည်။ သူ၏ ဂျူနီယာ ညီညီမများက တပည့်တစ်စုစီကို ဦးဆောင်ပြီး မျိုးဆက်တစ်ခုမှ တစ်ခုသို့ လက်ဆင့်ကမ်းသင့်သည်ဟု သူ အကြံပြုလိုက်သည်။ ထိုသို့ဆိုလျှင် နောက်ဆုံး၌ အာဏာဖွဲ့စည်းပုံ တစ်ခု ဖြစ်လာမည် မဟုတ်ပါလား။

ဝူမန်အာသည် တပည့်များကို လမ်းညွှန်ရန် မသင့်တော်သလို လီစီဖုန်းကလည်း စည်းကမ်းမရှိလွန်းသဖြင့် နှစ်ယောက်စလုံး အဆင်မပြေပေ။

လီချင်းချိုးက လီတုန်းယွဲ့နှင့် လီစီကျင်ကို တပည့်တစ်စုစီ ရွေးချယ်ခိုင်းရန် ဆုံးဖြတ်လိုက်သည်။

လီတုန်းယွဲ့၏ ပြန်လည်နုပျိုစေသော တစ္ဆေဝိညာဉ်အပ်တွင် ဆေးပညာ ကျွမ်းကျင်မှုများ ပါဝင်သည်။ မူလစွမ်းအင် မပါဘဲနှင့်ပင် ၎င်းသည် သွေးကြောများနှင့် သွေးလှည့်ပတ်မှုအပေါ် နားလည်မှုကို တိုးမြှင့်ပေးနိုင်ပြီး ဂိုဏ်းတွင်းရှိ တပည့်များနှင့် အနာဂတ်တွင် ဆေးကုသရန် တောင်ပေါ်တက်လာမည့် လူများကို ကုသပေးရာတွင် သူမကို ကူညီပေးနိုင်သည်။

လီစီကျင်က အဆောင်လက်ဖွဲ့ ပြုလုပ်နည်းကို သင်ပေးနိုင်သည်။ စစ်မှန်သော အင်မော်တယ် ကျင့်ကြံခြင်း အဆောင်လက်ဖွဲ့များ မဟုတ်လျှင်တောင် ငွေရှာရန် အသုံးပြုနိုင်သေးသည်။ ဤလောကတွင် စိတ်ငြိမ်းချမ်းမှုကို ရှာဖွေနေသော လောကီသားများစွာ ရှိသည်။ ချင်းရှောင်းဂိုဏ်း၏ ဂုဏ်သတင်း ပျံ့နှံ့နေသရွေ့ လုံလောက်ပြီ ဖြစ်သည်။

ဆုံးဖြတ်ချက် ချပြီးနောက် လီချင်းချိုးက ထိုညမှာပင် လီတုန်းယွဲ့ကို ခေါ်ယူ၍ ထိုကိစ္စကို ဆွေးနွေးလိုက်သည်။

လီတုန်းယွဲ့ ဤကိစ္စအတွက် အလွန် ပျော်ရွှင်သွားသည်။ သူမ ဤသို့ လုပ်ချင်နေသည်မှာ ကြာပြီ ဖြစ်သော်လည်း လီချင်းချိုးက ပြန်လည်နုပျိုစေသော တစ္ဆေဝိညာဉ်အပ် ပညာကို လက်ဆင့်ကမ်းခွင့် မပြုမည်ကို စိုးရိမ်နေခဲ့ခြင်း ဖြစ်သည်။

...

နောက်တစ်နေ့ မနက်စောစောတွင် လီတုန်းယွဲ့ တပည့် သွားရွေးသည်။ လှုပ်ရှားမှုက ကျန်းကျောက်ရှားလောက် မကြီးမားသော်လည်း တပည့်များအကြား လှုပ်လှုပ်ရွရွ ဖြစ်စေခဲ့သေးသည်။

နောက်ဆုံးတွင် လီတုန်းယွဲ့က တပည့် ၉ ဦး ရွေးချယ်ခဲ့ရာ အမျိုးသမီး ၇ ဦးနှင့် အမျိုးသား ၂ ဦး ပါဝင်သည်။

လီစီကျင် အနေဖြင့် လောလောဆယ် ထိုကိစ္စကို စိတ်မပူချင်သေးဘဲ တပည့်လက်ခံရန် နှစ်နှစ်ခန့် စောင့်လိုသည်။ လီချင်းချိုးက သဘာဝကျစွာပင် ကန့်ကွက်ခြင်း မရှိပေ။ သူ့ညီမလေးတွင် အစီအစဉ် ရှိနေသရွေ့ သူက ဘာပဲဖြစ်ဖြစ် ပံ့ပိုးပေးမည် ဖြစ်သည်။

ဤနေ့တွင် ကျန်းယွီချွန်းက သူ့လူများကို ဦးဆောင်၍ တောင်အောက်သို့ ဆင်းသွားသည်။ ဒီတစ်ခါတွင် သူသည် ဟွမ်ရှန်နှင့် ယွီလင်ကိုသာ မကဘဲ အတူတကွ လေ့ကျင့်ရန် "ချင်းရှောင်း၏နတ်ဘုရားခုနစ်ပါး" အဖွဲ့ဝင် ခုနစ်ဦးစလုံးကို ခေါ်ဆောင်သွားသည်။ လီချင်းချိုး စိတ်ပူသဖြင့် လီစီဖုန်းကို သူတို့နှင့်အတူ လိုက်ပါသွားရန် စီစဉ်ပေးလိုက်သည်။

ကျန်းယွီချွန်းက သိုင်းပညာ သိပ်မသန်မာလှသဖြင့် လက်ရှိ ကမ္ဘာကြီးတွင် သူ့လုံခြုံရေးအတွက် လီချင်းချိုး စိတ်ပူမိသည်။

လဝက်ခန့် ကြာပြီးနောက် ကျန်းယွီချွန်းနှင့် အခြားသူများ ပြန်ရောက်လာကြသည်။ ဒီတစ်ခါတွင် သူတို့ တပည့်သစ် ၂၃ ယောက်တိတိ စုဆောင်းလာနိုင်ခဲ့သည်။

ချင်းရှောင်းဂိုဏ်းရှိ တပည့်အရေအတွက် ရုတ်တရက် ၈၀ ကျော်သွားပြီ။

လီချင်းချိုးက တပည့်သစ်များကို ကိုယ်တိုင်ကိုယ်ကျ တွေ့ဆုံပြီး အားပေးစကား အနည်းငယ် ပြောကြားကာ သူတို့၏ နေထိုင်ရေးကို စီစဉ်ပေးရန် လီတုန်းယွဲ့အား ညွှန်ကြားလိုက်သည်။

လွန်ခဲ့သော တစ်နှစ်အတွင်း (ဝင်းအသစ်) အောက်တွင် နောက်ထပ် ဝင်းအနည်းငယ် ထပ်မံ တည်ဆောက်ခဲ့သည်။ အနည်းငယ် ရိုးရှင်းသော်လည်း တပည့်များ နေထိုင်ရန် လုံလောက်သည်။

လီချင်းချိုးက တာအိုမျိုးဆက် ဇယားကွက်ကို ဖွင့်၍ အခန်းထဲတွင် ဝေ့ဝဲကြည့်လိုက်သည်။ ကျင့်ကြံခြင်း ပါရမီ သို့မဟုတ် ဉာဏ်ပညာပိုင်းတွင် ထူးခြားသော ပုဂ္ဂိုလ်များ မရှိသော်လည်း ကံကြမ္မာ အနည်းငယ် ထူးခြားသော လူတစ်ယောက် ရှိနေသည်။

[ကံကောင်းသူ (Lucky One): သူတို့သည် ဘဝတစ်လျှောက်လုံး အမြဲတမ်း ကံကောင်းနေတတ်သည် ]

ဒီကောင်လေး နာမည်က ပိုင်နင်အာ…. ဒီနှစ်မှ ၁၃ နှစ်ပဲ ရှိသေးတယ်။ ပိန်ပိန်ပါးပါးနဲ့ အသားညိုပြီး လူအုပ်အလယ်မှာ ရပ်နေရင် လုံးဝ မမြင်ရသလောက်ပဲ။

"ကံကောင်းသူ" ဆိုသည့် စကားလုံးက စိတ်ကူးယဉ်စရာ အကန့်အသတ်မဲ့ ဖြစ်စေသည်။ ပိုင်နင်အာ၏ ကျင့်ကြံခြင်း ပါရမီနှင့် ဉာဏ်ပညာမှာ သာမန်သာ ရှိသဖြင့် ထင်သလောက် ပုံကြီးချဲ့ထားခြင်း မဟုတ်တာလည်း ဖြစ်နိုင်သည်။

ငါတို့ ဆက်လက် စောင့်ကြည့်ရမယ်။

လီချင်းချိုးက ပိုင်နင်အာကို တစ်ချက်သာ ကြည့်လိုက်ပြီး သူ့အတွက် အထူးအစီအစဉ် မလုပ်ပေးသလို ကျန်းယွီချွန်းထံမှလည်း သူ့အကြောင်း မမေးမြန်းခဲ့ပေ။

ချင်းရှောင်းဂိုဏ်းသည် တပည့် ၂၃ ယောက် ထပ်တိုးလာပြီး ကျန်းယွီချွန်း၏ စီစဉ်မှုအောက်တွင် ဆောက်လုပ်ရေး လုပ်ငန်းခွင်အသီးသီးနှင့် စက်မှုဇုန်များရှိ လုပ်သားလိုအပ်ချက် ဖိအားများ လျော့ကျသွားသည်။

နှင်းများ သည်းထန်စွာ ကျဆင်းလာပြီး တောင်တန်းများမှာ အဖြူရောင် စောင်လွှမ်းထားသကဲ့သို့ ဖြစ်နေသည်။

တောင်ထိပ်တစ်ခုပေါ်တွင် လီချင်းချိုးနှင့် ချင်ယဲ့တို့ ဘေးချင်းယှဉ်လျက် တရားထိုင်နေကြပြီး လေနှင့် နှင်းများကို သူတို့ထံမှ ထွက်ပေါ်လာသော ဝိညာဉ်စွမ်းအင်များက ဖယ်ရှားပစ်လိုက်သည်။

ချင်ယဲ့ မျက်လုံးများကို ဖြည်းညင်းစွာ ဖွင့်လိုက်ပြီး အာမေဋိတ်သံဖြင့်

"ဆရာ၊ ဒီဟွမ်ယွမ်ကျမ်းစာက တကယ်ကို နက်နဲပြီး ကျွန်တော့်ရဲ့ စစ်သည်တစ်သောင်း မိစ္ဆာနှိမ်တုတ်သိုင်းနဲ့ အရမ်း လိုက်ဖက်တာပဲ၊ စိတ်နဲ့ မှန်းဆကြည့်ရုံနဲ့တင် ဉာဏ်အလင်းတွေ အများကြီး ရခဲ့ပြီ။"

သူသည် ဆရာနှင့်အတူ ကျင့်ကြံခွင့် ရသည့်အတွက် အလွန် ပျော်ရွှင်နေပြီး ဆရာက သူ့အနားသို့ ပိုမို နီးကပ်လာသည်ဟု ခံစားနေရသည်။

"မင်းက ပထမအဆင့်မှာပဲ ရှိသေးတယ်၊ ဒုတိယအဆင့် ရောက်မှ မိစ္ဆာနှိမ်တုတ်သိုင်းရဲ့ စွမ်းအားအပြည့်အဝကို ထုတ်ဖော်နိုင်မှာ။"

လီချင်းချိုးက မျက်လုံးမှိတ်လျက် ပြောလိုက်သည်။ ချင်ယဲ့ ခေါင်းညိတ်လိုက်သော်လည်း ဟွမ်ယွမ်ကျမ်းစာ ဒုတိယအဆင့်သို့ ရောက်ရန် အလွန် ခက်ခဲမည်ဟု ရင်ထဲတွင် ခံစားနေရပြီး နှစ်ပေါင်း မည်မျှ ကြာဦးမည်ကို တွေးတောနေမိသည်။

"မင်း ဝူပေါင်ယွီအတွက် လက်စားချေချင်လား။" လီချင်းချိုး ရုတ်တရက် မေးလိုက်သည်။

ချင်ယဲ့ ခဏတာ ကြောင်အမ်းသွားပြီးနောက်မျက်နှာထား တည်ကြည်သွားသည်။

"စီနီယာဝူ သေဆုံးရတာ အရမ်း ဆိုးရွားလွန်းတယ်၊ ကျွန်တော် သူ့နာမည်ကို အပြစ်ကင်းစင်စေပြီး သူ့အတွက် လက်စားချေရမယ်။"

"သူ့နာမည်ကို အပြစ်ကင်းစင်စေတာက ကိစ္စမရှိဘူး၊ ဘာပဲပြောပြော မင်းက သူ့အမွေကို ဆက်ခံထားတာပဲ၊ ဒါပေမဲ့ သူ့အတွက် လက်စားချေမယ် ဆိုတာက နည်းနည်း မောက်မာလွန်းရာ မကျဘူးလား။"

လီချင်းချိုးက တည်ငြိမ်စွာ ပြောလိုက်တော့ ချင်ယဲ့ သူ့ကို လှည့်ကြည့်လိုက်ပြီး မယုံကြည်နိုင်သော မျက်နှာထားဖြင့် ဆရာက သူ့ကို ဘာကြောင့် ဒီလောက် ထိခိုက်အောင် ပြောရသလဲ ဆိုတာ နားမလည်နိုင် ဖြစ်သွားသည်။

"စီနီယာဝူက သူ့အတွက် လက်စားချေပေးဖို့ မင်းကို တောင်းဆိုခဲ့လို့လား။"

"မတောင်းဆိုခဲ့ပါဘူး၊ ဒါပေမဲ့ ကျွန်တော် မလုပ်နိုင်မှာ စိုးရိမ်လို့ ဖြစ်လောက်တယ်။"

"သူ မင်းကို သိုင်းပညာ သင်ပေးတုန်းက ဘာပြောခဲ့လဲ ဆိုတာ မှတ်မိလား။"

"သူ စကားတွေ အများကြီး ပြောခဲ့တယ်၊ ကျွန်တော် အကုန် မှတ်မိပါတယ်။"

"သူ့စိတ်ထဲမှာ အမုန်းတရားက ပိုအရေးကြီးလား၊ နိုင်ငံ တည်ငြိမ်အေးချမ်းမှုက ပိုအရေးကြီးလား၊ မင်း ဘယ်လိုထင်လဲ။"

"ဒါက..."

ချင်ယဲ့ ရုတ်တရက် ဘယ်လို ဖြေရမလဲ မသိတော့ပေ။ အဘယ်ကြောင့်ဆိုသော် ဝူပေါင်ယွီက ချင်ယဲ့ကို စစ်တပ်ထဲ ဝင်ပြီး တာလီမင်းဆက်ကို ကာကွယ်စေချင်ကြောင်း ပြောခဲ့ဖူးသောကြောင့် ဖြစ်သည်။

"မင်း ဧကရာဇ်ကို သတ်လိုက်ရင် နောက်ဆက်တွဲ အကျိုးဆက်ကို သိလား။" လီချင်းချိုးက ဆက်မေးလိုက်သည်။

ချင်ယဲ့၏ မျက်နှာ အရောင်မှာ အနီမှ အစိမ်းသို့ ပြောင်းသွားသည်။ သူ ငယ်ရွယ်သော်လည်း ဤအရေးကြီးသော မူဝါဒများကို နားလည်သည်။ အကယ်၍ ဧကရာဇ် သေဆုံးသွားလျှင် ကမ္ဘာလောကကြီး သေချာပေါက် ဖရိုဖရဲ ဖြစ်သွားလိမ့်မည်။

"လက်စားချေတာကို ငါ မတားပါဘူး၊ ဒါပေမဲ့ စီနီယာဝူ မင်းကို သင်ပေးခဲ့တာက သိုင်းပညာလား သူ့ရဲ့ စိတ်ဓာတ်လား ဆိုတာ စဉ်းစားစေချင်တယ်၊ လက်စားချေဖို့ နည်းလမ်းတွေ အများကြီး ရှိပါတယ်၊ ကမ္ဘာပေါ်က လူတွေရဲ့ ကောင်းကျိုးချမ်းသာကို အရေးအကြီးဆုံး နေရာမှာ ထားပြီးမှ အဲဒီအခြေခံပေါ်မှာ လက်စားချေဖို့ ပြောစေချင်တယ်။"

လီချင်းချိုးက လေးနက်စွာ ပြောနေသော်လည်း အစကနေ အဆုံးထိ သူ မျက်လုံး မဖွင့်ခဲ့ပေ။

ချင်ယဲ့ နက်နက်နဲနဲ တွေးတောနေမိသည်။

ဆရာ့ရဲ့ အခန်းကဏ္ဍက အရမ်း အရေးကြီးပြီး ကျွမ်းကျင်မှုတွေကို လက်ဆင့်ကမ်းရုံ သက်သက် မကန့်သတ်ထားသင့်ဘူးလို့ လီချင်းချိုး ခံစားမိသည်။ ချင်ယဲ့က ငယ်ရွယ်ပြီး လောကဓံကို မခံစားရသေးခင်မှာ ချင်ယဲ့ရဲ့ အမြင်တွေကို ပြုပြင်ပေးရမယ်၊ ဒီကောင်လေး အစွန်းရောက်မသွားအောင် တားဆီးရမယ်။

ခေတ္တမျှ ကြာပြီးနောက်။

ချင်ယဲ့ မော့ကြည့်ပြီး စူးစမ်းလိုစိတ်ဖြင့် "ဆရာ၊ ချင်းရှောင်းဂိုဏ်းက ကမ္ဘာလောကကို ကာကွယ်ဖို့ ရည်မှန်းချက်နဲ့ သိုင်းကျင့်တာလား။"

ကျန်းကျောက်ရှားကို အတိပ်ခတ်သော အမျိုးသမီး ကိုယ့်ကိုယ်ကိုယ် သတ်သေသွားတုန်းက လီချင်းချိုးက အလွန် အေးစက်သော စကားများ ပြောခဲ့သဖြင့် တပည့်များ သီးသန့် ဆွေးနွေးခဲ့ကြသည်။ သူ အမြဲ မှတ်မိနေသဖြင့် သူ့ဆရာသည် ကြင်နာပြီး သဘောထားကြီးသော လူမျိုး မဟုတ်ဘူးဟု အမြဲ ခံစားနေရသည်။

"ကမ္ဘာလောကကြီးက အရမ်း ကျယ်ဝန်းပြီး ဒီပန်းတိုင်က အရမ်း စိတ်ကူးယဉ်ဆန်လွန်းတယ်၊ ဒါပေမဲ့ ချင်းရှောင်းဂိုဏ်းက လမ်းတစ်လျှောက် ငါတို့ကို ပံ့ပိုးပေးခဲ့တဲ့ သူတွေကို ကာကွယ်ပေးလိမ့်မယ်၊ တောင်ခြေက ရွာသားတွေလိုမျိုးပေါ့၊ သူတို့က ငါတို့ကို ဂိုဏ်းတည်ဆောက်ဖို့ ကူညီပေးခဲ့တယ်၊ လယ်စိုက်ဖို့ ကူညီပေးခဲ့တယ်၊ ငါတို့ကို အစားအစာ ပေးခဲ့တယ်၊ ငါတို့ သူတို့ကို မကာကွယ်ပေးသင့်ဘူးလား။ ချင်းရှောင်းဂိုဏ်းက ဆက်လက် ကြီးထွားလာမှာ ဖြစ်ပြီး လူတွေ ပိုများလာလေ ငါတို့ကို ကူညီမယ့်သူတွေ ပိုများလာလေပဲ၊ တကယ်လို့ တစ်နေ့နေ့မှာ ကမ္ဘာတစ်ခုလုံးက ငါတို့ကို ထောက်ခံလာရင် ငါတို့ ကမ္ဘာကြီးကို ကာကွယ်ပေးသင့်တာပေါ့။"

လီချင်းချိုး၏ စကားများက ချင်ယဲ့ကို ဉာဏ်အလင်း ရစေခဲ့ပြီး ချင်းရှောင်းဂိုဏ်း လျှောက်လှမ်းနေသော လမ်းကြောင်း ရှင်းလင်းသွားသည်ဟု သူ ရုတ်တရက် ခံစားလိုက်ရသည်။

ကိုယ့်အားကိုယ်ကိုးပေမဲ့ မေတ္တာတရားနဲ့ တရားမျှတမှု မကင်းမဲ့ဘူး၊ ကိုယ့်အကျိုးစီးပွားကို တန်ဖိုးထားပေမဲ့ ကျေးဇူးတရားကို လျစ်လျူမရှုဘူး။

ချင်ယဲ့၏ ရင်ထဲတွင် စုပုံနေသော နာကြည်းမှုများ စတင် ပျောက်ကွယ်သွားသည်။ အတိတ်တုန်းက သူ ရယ်စရာ ကောင်းခဲ့ကြောင်း၊ စီနီယာဝူ၏ ဆန္ဒကို နားမလည်ဘဲ အမုန်းတရားထဲတွင်သာ နှစ်မြှုပ်နေခဲ့ကြောင်း သူ သဘောပေါက်လိုက်သည်။

ပြန်ကြည့်လိုက်သောအခါ ချင်မိသားစုမှ အခြား အဖွဲ့ဝင် ငါးဦးနှင့် သူ့ ဆက်ဆံရေးမှာ စိမ်းကားသွားခဲ့ပြီး အခြားတပည့်များနှင့် ဆက်ဆံရေးကိုမူ ဆိုဖွယ်ရာ မရှိတော့ပေ။

ဂိုဏ်းချုပ်ရဲ့ တပည့်တစ်ယောက် အနေနဲ့ ဒီလို မပြုမူသင့်ဘူး။

လီချင်းချိုးက ချင်ယဲ့ကို လမ်းညွှန်နေချိန်တွင် ကျန်းကျောက်ရှားသည်လည်း ထိုနည်းအတိုင်း လုပ်ဆောင်နေသည်။

ကျန်းကျောက်ရှားက ဓားသိုင်းပညာကို သင်ကြားပေးရုံသာမက ဓားပျံတစ်ဆယ့်သုံးလက်၏ ဒဿနကိုပါ ရိုက်သွင်းပေးနေသည်။ ဓားပျံတစ်ဆယ့်သုံးလက် အနေဖြင့် ချင်းရှောင်းဂိုဏ်း၏အကျိုးစီးပွားကို ဦးစားပေးစေလိုပြီး ဂိုဏ်းအတွက် ခြိမ်းခြောက်မှု မှန်သမျှကို ဖယ်ရှားပစ်စေလိုသည်။

ဒီနှစ် ဆောင်းရာသီက ပုံမှန်ထက် ပိုအေးပေမဲ့ ချင်းရှောင်းဂိုဏ်းသား တပည့်တွေရဲ့ နှလုံးသားတွေကတော့ ပြင်းပြတဲ့ စိတ်ဓာတ်တွေနဲ့ လောင်ကျွမ်းနေပြီး တိုက်ခိုက်လိုစိတ်တွေ ပြည့်နှက်နေကြတယ်။

...

နွေဦးပွဲတော် ပြီးနောက် ချင်းရှောင်းဂိုဏ်း၏ စိတ်လှုပ်ရှားမှုများ မပြေပျောက်မီ လီချင်းချိုး သတင်းကောင်း တစ်ခု ရရှိခဲ့သည် ။သူ မူလအားဖြည့်နယ်ပယ် ပဉ္စမအဆင့်သို့ အောင်မြင်စွာ တက်လှမ်းနိုင်ခဲ့ပြီ ဖြစ်သည်။

ဒီအကြောင်းကို သူ ဘယ်သူ့ကိုမှ မပြောခဲ့ပေ။ သူက အများပြည်သူ အမြင်ကနေ တတ်နိုင်သမျှ ကင်းဝေးအောင် နေဖို့ စီစဉ်ထားပြီး ချင်းရှောင်းဂိုဏ်း အန္တရာယ်ကြုံမှသာ အရေးယူ ဆောင်ရွက်မည် ဖြစ်သည်။ အများပြည်သူ အမြင်မှာ အသန်မာဆုံးဆိုတဲ့ နေရာကို တခြားသူတွေဆီ လွှဲပေးထားလိုက်မည်။

ပဉ္စမအဆင့်သို့ ရောက်ရှိသောအခါ သူ့ မူလစွမ်းအင် နှစ်ဆ တိုးလာပြီး နောက်ဆုံးတွင် သိုင်းပညာရှင်များ ပြောဆိုကြသော နက်ရှိုင်းသည့် စွမ်းရည် ဆိုသည့် ခံစားချက်ကို တွေ့ကြုံခံစားလိုက်ရသည်။ ယခုအခါ သူ ဂါထာများ ရွတ်ဆိုသည့်အခါ ယခင်ကကဲ့သို့ စွမ်းအင် ချွေတာနေစရာ မလိုတော့ပေ။

နှစ်သစ်ကူး ပြီးနောက် လီတုန်းယွဲ့၏ ဆေးကုသရေး လုပ်ငန်း ပြန်လည် ဖွင့်လှစ်ရာ ကုန်သည်တစ်ဦးက သမီးဖြစ်သူကို ဆေးကုသရန် တောင်ပေါ်သို့ ခေါ်ဆောင်လာခဲ့သည်။

သူ့သမီးမှာ ထူးဆန်းသော ရောဂါတစ်ခု စွဲကပ်နေပြီး နာမည်ကြီးသမားတော်များကို ရှာဖွေ ကုသသော်လည်း မပျောက်ကင်းခဲ့ပေ။ ရောဂါက မကြာခဏ ပြန်ပေါ်လာစမြဲပင်… ချင်းရှောင်းဂိုဏ်းက ခက်ခဲနက်နဲသော ရောဂါမျိုးစုံကို ကုသပေးနိုင်ကြောင်း တိုက်ဆိုင်စွာ ကြားသိလိုက်ရသဖြင့် သူ ကံစမ်းကြည့်ရန် ဆုံးဖြတ်လိုက်ခြင်း ဖြစ်သည်။