ခုန်းရှီအား ကယ်တင်ခြင်း (အပိုင်း ၂)

"အင်း... လောကီအရေးတွေနဲ့ မညစ်နွမ်းဘူးလို့ ထင်ရတဲ့ သူတော်စင်မလေးတောင်မှ ကိုယ်ကျိုးအတ္တတွေနဲ့ စိတ်ခံစားချက်တွေ ရှိနေတာပဲ"

ကျန်းရွှမ်က တိတ်တဆိတ် ခေါင်းညိတ်လိုက်သည်။

ရန်ချူးယောင်သည် ထျန်းလီအင်ပါယာတွင် အလွန်ကျော်ကြားပြီး သူမ၏သန့်ရှင်းစင်ကြယ်မှုနှင့် အထိအတွေ့မခံရသော အလှတရားကြောင့် နာမည်ကြီးသည်။ တခြားလူများကို မဆိုထားနှင့် ကျန်းရွှမ်ကိုယ်တိုင်ပင် သူမသည် မွေးရာပါ မြင့်မြတ်ပြီး လောကီရွှံ့နွံများနှင့် မညစ်နွမ်းဟု အမြဲတစေ ခံစားခဲ့ရသည်။

သို့ရာတွင် ယခုချိန်၌ သူမ၏ ကောင်းကင်ကံကြမ္မာမြစ်နှင့် ဆက်သွယ်ရန် စိတ်ခံစားချက် ကြိုးမျှင်များကို အသုံးပြုပြီးနောက် ဤအတွေးသည် ချက်ချင်းပျောက်ကွယ်သွားတော့သည်။

အေးစက်သည်ဟု ထင်ရသော ဤမိန်းမလှလေးသည် အမှန်အားဖြင့် အိမ်ရှေ့စံမင်းသားယွမ်ချင်းကို သဘောကျနေခြင်းပင်။ သူမသည် သူ့ကို ကူညီနေကာ ကျန်းရွှမ်ကိုသတ်ရန် ထပ်ခါတလဲလဲ ကြိုးစားနေခြင်း ခုန်းရှီကိုပင် အလွတ်မပေးခြင်းမှာ အံ့အားသင့်စရာ မဟုတ်တော့ချေ။

သဘောတရားအရဆိုလျှင် ထုံးတမ်းစဉ်လာနှင့် ဂီတသည် တသားတည်း ဖြစ်သင့်သော်လည်း သူမသည် အိမ်ရှေ့စံမင်းသားယွမ်ချင်းကို ကူညီခဲ့သည်မှာ ကိုယ်ကျိုးအတ္တများကြောင့် ဖြစ်ကြောင်း သိသာထင်ရှားသည်။

"မင်းမှာ ကိုယ်ကျိုးအတ္တတွေ ရှိနေမှတော့ အဲ့ဒါတွေကို ပိုပြီးကြီးထွားလာအောင် ငါ ကူညီပေးလိုက်မယ်..."

ကျန်းရွှမ်က အေးစက်စက် နှာခေါင်းရှုံ့လိုက်သည်။ စိတ်ခံစားချက်ကြိုးမျှင်များသည် ကံကြမ္မာမြစ်ပြင်ကို မွှေနှောက်လိုက်ရာ လှိုင်းဂယက်များ ပို၍ပို၍ကြီးမားလာသည်။

စိတ်ခံစားချက် ကံကြမ္မာအပေါ် သူ၏နားလည်သဘောပေါက်မှု နက်ရှိုင်းလာသည်နှင့်အမျှ ဤပထမတန်းစား ကောင်းကင်ကံကြမ္မာ၏ ကြောက်မက်ဖွယ်ကောင်းပုံကိုလည်း သူ နားလည်သဘောပေါက်လာပေ၏။

စိတ်ခံစားချက်ရှိနေသမျှ ကာလပတ်လုံး သူ အရာရာတိုင်းကို ကြိုးကိုင်ခြယ်လှယ်နိုင်သည်။ သို့ရာတွင် သူ့ထက် အဆင့်နိမ့်သော ကောင်းကင်ကံကြမ္မာ ဖြစ်သည့်တိုင် ကျင့်ကြံဆင့်ကွာခြားလွန်းလျှင် သို့မဟုတ် သူနှင့် တူညီသော ကံကြမ္မာအဆင့်တွင် ရှိနေလျှင် ဤမျှထိ လွယ်ကူလိမ့်မည် မဟုတ်ချေ။

"မဖြစ်ဘူး..."

ကျန်းရွှမ်၏ထိန်းချုပ်မှုအောက်တွင် ယုံကြည်မှုအပြည့် ရှိနေခဲ့သော ရန်ချူးယောင်၏မျက်နှာ ချက်ချင်း ဖြူဖပ်ဖြူရော် ဖြစ်သွားသည်။ ဝမ်းနည်းပူဆွေးမှုများက သူမ၏စိတ်နှလုံးသားထဲတွင် ပြည့်နှက်လာပေ၏။

ဤခံစားချက်သည် သူမ အရာအားလုံး ပေးဆပ်ခဲ့သော်လည်း နောက်ဆုံးတွင် အရာအားလုံးကို ဆုံးရှုံးလိုက်ရသည့်အလားပင်။

သူမ၏စိတ်အခြေအနေ ပြောင်းလဲလာသည်နှင့်အမျှ ဇီသာတေးသံသည်လည်း ထိန်းချုပ်၍မရဘဲ ပြောင်းလဲသွားသည်။ မူလက ကျားဖြူအစောင့်တပ်သားများ၏နားထဲတွင် စိတ်အားထက်သန်မှုအပြည့်ဖြင့် ပဲ့တင်ထပ်နေသော ဇီသာတေးသံသည် ယခုအချိန်၌ အလွန်ဆွေးမြေ့ဖွယ်ကောင်းလာသည်။

ရုတ်ချည်းဆိုသလိုပင် ကျားဖြူအစောင့်တပ်သား သုံးထောင်သည် ယခင်က တိုက်ခိုက်လိုစိတ်များ ပျောက်ဆုံးသွားပြီး စိတ်ပျက်အားငယ်မှု ဝမ်းနည်းမှုတို့ဖြင့် အစားထိုးခံလိုက်ရသည့်အလားပင်။

"မကောင်းတော့ဘူး"

အိမ်ရှေ့စံမင်းသားယွမ်ချင်းသည် စိတ်ဓာတ်ခွန်အားအပြည့် ဖြစ်စေခဲ့သော ဇီသာတေးသံသည် မျက်စိတစ်မှိတ်အတွင်း ဤမျှထိ ယိုယွင်းသွားလိမ့်မည်ဟု မျှော်လင့်မထားထားခဲ့ချေ။ ဤသည်မှာ နေ့ဘက်တွင် ချူစစ်တပ်သည် ပြိုင်ဘက်ကင်းသော်လည်း ညဘက်တွင် ရန်သူများဖြင့် ဝိုင်းရံခံထားရသည့် အလားပင်။

အုပ်စုလိုက် တိုက်ခိုက်ရာတွင် အကြောက်ရဆုံးအရာမှာ တောင်ပြိုသကဲ့သို့ စစ်ရေးပြိုလဲခြင်းဟုခေါ်သော စိတ်ဓာတ်ကျဆင်းမှုမျိုးပင်။

ကျားဖြူအစောင့်တပ်သားသုံးထောင်၏ စိတ်ခံစားချက်များ ယိုယွင်းစပြုလာသည်နှင့် တပြိုင်နက် သူတို့ ဖွဲ့စည်းထားသော ပေါင်းစပ်စွမ်းအားသည် ချောက်ကမ်းပါးမှ ပြုတ်ကျလာသည့်အလား ချက်ချင်းထိုးကျသွားတော့သည်။

"အခုလှုပ်ရှားရမယ်...."

ကျန်းရွှမ်သည် အနည်းငယ်မျှ တွေဝေတုံ့ဆိုင်းမနေချေ။ သူ၏လက်ထဲမှ စိတ်ဝိညာဉ်ဆင့်ခေါ် ဓားသည် လေဟာနယ်ကို ပြင်းထန်စွာ ထိုးဖောက်လိုက်ပြီး ကတ္တရာစေးကဲ့သို့ မည်းနက်သော အက်ကွဲကြောင်းတစ်ခုကို ဆုတ်ဖြဲလိုက်၏။

ဒုတ်....ဒုတ်...ဒုတ်...ဒုတ်....

ထာဝရနှလုံးသားသည် လျှင်မြန်စွာ ခုန်လှုပ်သွားပြီး မရေမတွက်နိုင်သော စွမ်းအားစီးကြောင်းများသည် သူ၏လက်တစ်လျှောက် စီးဆင်းသွားသည်။

ဓားချက်တစ်ချက်တည်းဖြင့် ကြာပန်းနီမီးတောက်နတ်ဆိုးအရှင်၏ အနှစ်သာရ အမြုတေတစ်ခုလုံး လုံးလုံးလျားလျား ကုန်ဆုံးသွားတော့သည်။

ဆိုလိုသည်မှာ ဤဓားချက်တွင် ပါဝင်သော စွမ်းအားသည် ကြာပန်းနီမီးတောက် နတ်ဆိုးအရှင်ကဲ့သို့သော ထိပ်သီးကျင့်ကြံသူတစ်ဦး ကိုယ့်ကိုယ်ကိုယ် ဖောက်ခွဲလိုက်ခြင်းဖြင့် ထုတ်လွှတ်နိုင်သော စွမ်းအားများအားလုံးနှင့် ညီမျှသည်။

ထာဝရနှလုံးသားကို ထာဝရအဆုတ်နှင့် တခြားခန္ဓာကိုယ်တွင်းအင်္ဂါနှင့် ပြီးပြည့်စုံစွာ တွဲဖက်လုပ်ဆောင်မှသာ ဤအရာကို အောင်မြင်နိုင်သည်။ တခြားသူတစ်ဦးဖြစ်ပါက ဗောဓိသတ္တတစ်ပါးပင်လျှင် ထိုကဲ့သို့ တိုက်ကွက်မျိုးကို အသုံးပြုပါက သူတို့၏မရီဒါန်းများ ကြေမွှပျက်စီးသွားပြီး တိုက်ခိုက်ရေးစွမ်းရည်ကို ချက်ချင်း ဆုံးရှုံးသွားပေလိမ့်မည်။

ကျန်းရွှမ်သည် သူ၏ စွမ်းအားအပြည့်ကို ထုတ်လွှတ်လိုက်စဉ်၌ တစ်ဖက်ရှိ ကျားဖြူအစောင့်တပ်သားများသည် ဂီတကြောင့် တိုက်ခိုက်ရေးစွမ်းရည်များ ဆုံးရှုံးနေကြသည်။ တစ်ဖက်သည် အားနည်းသွားပြီး တစ်ဖက်ကမူ အားကောင်းလာသဖြင့် ကွာဟချက်သည် ချက်ချင်း ကျယ်ပြန့်သွားလေ၏။

ဝှစ်....

ဓားချီအလင်းတန်းတစ်တန်း ဖြတ်သန်းသွားပြီး ကျားဖြူအစောင့်တပ်သား သုံးထောင်သည် တပြိုင်နက်တည်း ပေါက်ကွဲသွားကာ အသွေးအသားစများအဖြစ် ပြောင်းလဲသွားတော့သည်။

"ဘာဖြစ်သွားတာလဲ"

ကျန်းရွှမ် ကြက်သေသေသွားသည်။

သူ၏ခန့်မှန်းချက်အရ ဤဓားချက်၏စွမ်းအားသည် ကြီးမားသော်လည်း ထိုတပ်သားများ၏သုံးပုံတစ်ပုံကိုသာ သတ်ဖြတ်နိုင်ပေမည်။ ထိုတပ်သားများသည် ကြီးမားသော တိုက်ပွဲဝင်ဝင်္ကပါကို ထပ်မံ၍ မဖွဲ့စည်းနိုင်အောင် သူ တားဆီးနိုင်လျှင်ပင် အောင်မြင်သည်ဟု ယူဆနိုင်သည်။ ဓားချက်တစ်ချက်တည်းဖြင့် သူသည် ဤတပ်သားများအားလုံးကို တစ်ယောက်မကျန် သတ်ဖြတ်နိုင်လိမ့်မည်ဟု သူ အနည်းငယ်မျှ မျှော်လင့်မထားခဲ့ချေ။

ဤသည်မှာ လူပေါင်းသုံးထောင် အတိအကျ ဖြစ်ပြီး တစ်ယောက်မျှ မလွတ်မြောက်ခဲ့ချေ။ မည်သို့ပင် ကြည့်စေကာမူ ဤအရာသည် အလွန်ထူးဆန်းနေပေ၏။

"ဒါက ကံတရားကြောင့် ဖြစ်လောက်တယ်... ဒီလူအုပ်စုရဲ့ ကံတရားက အရမ်းဆိုးရွားနေတာပဲ...သခင် ကြည့်လိုက်အုံး... ဓားချီအလင်းတန်းက အရေးကြီးတဲ့ နေရာကို မထိတာတောင် လူတွေအများကြီး သေကုန်တယ်..."

နှင်းနတ်ဆိုးအရှင်၏အသံ ထွက်ပေါ်လာသည်။

ကျန်းရွှမ် ကြည့်လိုက်ရာ အမှန်တကယ်ကိုပင် တစ်စုံတစ်ရာ မှားယွင်းနေကြောင်း တွေ့ရှိလိုက်၏။

ကျားဖြူအစောင့်တပ်သား အများစုအတွက် သူ၏ဓားချီစွမ်းအင်သည် သူတို့၏ဆံပင်ကို ထိရုံမျှသာ ထိခဲ့သည်။ သဘောတရားအရ ထိုကဲ့သို့သော အခြေအနေမျိုးတွင် သေဆုံးရန် မဆိုထားနှင့် ဒဏ်ရာပင် ရရှိလိမ့်မည် မဟုတ်ချေ။ မယုံနိုင်စရာ ကောင်းသည်မှာ ဤလူများအားလုံးသည် သူ၏ဓားချီစွမ်းအင်ကို ရှောင်တိမ်းရန် ကြိုးစားနေစဉ်၌ သူတို့၏ ရဲဘော်ရဲဘက်များ၏ တိုက်ခိုက်မှုကြောင့် သေဆုံးသွားကြခြင်းဖြစ်သည်။

​ဤသည်မှာ သူနှင့်အနီးဆုံးရှိ အဖြူရောင်ဝတ်စုံဝတ် အစောင့်တစ်ဦးအလားပင်။ ကျန်းရွှမ်၏ဓားချီစွမ်းအင်သည် သူ၏လက်ဝါးကိုသာ ထွင်းဖောက်သွားခဲ့သော်လည်း သေစေလောက်သော ဒဏ်ရာကမူ သေဆုံးသွားသော အစောင့်တစ်ဦး၏လေထဲမှ ပြုတ်ကျလာသော ဓားတစ်လက်က သူ၏မျက်လုံးကို ထွင်းဖောက်ပြီး နှလုံးနှင့် အဆုတ်ကို ဖောက်ထွက်သွားခြင်းကြောင့်ဖြစ်သည်။

ထိုကဲ့သို့ အခြေအနေများသည် နေရာတိုင်းတွင် ရှိနေပြီး ယုတ္တိမတန်သော ထင်ယောင်ထင်မှား ဖြစ်မှုကို ပေးစွမ်းနေသည်။

"ဒီလူတွေရဲ့ ကံတရားတွေက စုပ်ယူခံထားရတာပဲ..."

ကျန်းရွှမ်က တုံ့ပြန်လိုက်သည်။

"ဒါက အိမ်ရှေ့စံမင်းသား ယွမ်ချင်းပဲ..."

လူတစ်ယောက်တည်းတွင်သာ ဤမျှထိ ကံဆိုးမှုမျိုး ဖြစ်ပေါ်ပါက ထိုလူတွင် ကံဆိုးမှုရှိသည်ဟု ဆိုနိုင်သည်။ သို့ရာတွင် လူအမြောက်အများ၌ ကံဆိုးမှုများ တပြိုင်နက်တည်း ပေါ်ပေါက်လာခြင်းသည် သိသိသာသာ မှားယွင်းနေလေပြီ။

ထို့ပြင် လူအများ၏ကံတရားများကို တပြိုင်နက်တည်း စုပ်ယူနိုင်ပြီး သူတို့ကိုယ်တိုင်လည်း လိုလိုလားလား ရှိနိုင်သူမှာ အိမ်ရှေ့စံမင်းသားမှလွဲ၍ တခြားလူ မရှိနိုင်ချေ။

သူသည် ရွှမ်ကျီးဂိုဏ်းမှ ကံတရား ချေးငှားခဲ့သကဲ့သို့ ဤအိမ်ရှေ့စံမင်းသားသည်လည်း ချေးငှားခဲ့ပုံရသည်။ ထို့ပြင် သူသည် သူကိုယ်တိုင်ပြန်မဆပ်ဘဲ ဤလူများထံမှ ထုတ်ယူခဲ့ခြင်းဖြစ်သည်။

တစ်ဖက်လူ မည်မျှထိ ချေးငှားထားသည်နှင့် သူ့ထက်ပိုများနိုင်မများနိုင် ဆိုသည်ကိုမူ သူ မသိရှိချေ။

"သိမ်းယူစမ်း...."

ယခုအချိန်သည် ထိုကဲ့သို့ အရာများကို စဉ်းစားနေရမည့်အချိန် မဟုတ်ကြောင်း သိသဖြင့် ကျန်းရွှမ်က သူ၏လက်တစ်ဖက်ဖြင့် ဖမ်းဆွဲလိုက်၏။ သူ၏ရှေ့မှ လေဟာနယ် လှိုင်းထသွားပြီး ကျားဖြူအစောင့်တပ်သားသုံးထောင်၏ အလောင်းများနှင့် ပေါက်ကွဲပြီးနောက် ကျန်ရှိသော စွမ်းအားများ လက်နက်များကို ရွှမ်ကမ္ဘာအတွင်းသို့ ချက်ချင်း သိမ်းဆည်းလိုက်သည်။

လူတစ်ယောက်၏ စွမ်းအားသည် အကန့်အသတ်ရှိသော်လည်း လူအမြောက်အများ၏ ပေါင်းစပ်စွမ်းအားသည် ကြာပန်းနီမီးတောက် နတ်ဆိုးအရှင်နှစ်ယောက်နှင့် ယှဉ်ပြိုင်ရန် လုံလောက်သည်။

ဤနည်းလမ်းဖြင့် သူ ယခုလေးတင် အသုံးပြုလိုက်သော စွမ်းအားများကို ပြန်လည်ဖြည့်တင်းနိုင်ရုံသာမက အနည်းငယ် ပိုလျှံနေပေမည်။

တခြားလူများ၏ စွမ်းအားကို ဝါးမြိုပြီး ကိုယ်ပိုင်အဖြစ် အသုံးပြုခြင်းသည် ကောင်းကင်ဘုံကို အလွန်ဆန့်ကျင်သော နည်းလမ်းပင်။ ဤသို့ပြုလုပ်ရန် ရွှမ်ကမ္ဘာနှင့် ထာဝရနှလုံးသား၏ ထူးခြားသောစွမ်းအားများ လိုအပ်သည်။ တခြားလူများသည် ဤစွမ်းရည်ကို ပုံတူကူးလိုလျှင်ပင် မဖြစ်နိုင်ချေ။

"မင်းရဲ့အလှည့်ပဲ..."

ဓားချက်တစ်ချက်တည်းဖြင့် အစောင့်တပ်သားသုံးထောင်ကို သတ်ဖြတ်ပြီးနောက် ကျန်းရွှမ်သည် သူ၏ဓားရှည်ကို လှည့်လိုက်ပြီး ဝမ်းနည်းပူဆွေးမှုထဲတွင် နစ်မြောနေဆဲဖြစ်သော ရန်ချူးယောင်ထံသို့ ထိုးသွင်းလိုက်၏။

အခွင့်အရေးသည် တစ်ကြိမ်သာ ရရှိနိုင်သည်။ အကယ်၍ သူသည် ဤအမျိုးသမီးကို အလျင်အမြန် မသတ်လျှင် သူမ၏ စိတ်အခြေအနေကို ပြန်လည်ထိန်းညှိပြီး ဆက်လက်၍ပုန်းအောင်းကာ အထောက်အကူပြုသူအဖြစ် ရှိနေပါက သူ့အတွက် အန္တရာယ်အဆင့်သည် အနည်းဆုံး နှစ်ဆ တိုးလာပေလိမ့်မည်။

ဝှစ်.....

ဓားချီအလင်းတန်းသည် လျှပ်စီးတန်းတစ်တန်းအလား ရှေ့သို့ ပျံသန်းသွားသည်။

"ရန်ချူးယောင်..."

ထိုအချိန်မှာပင် အိမ်ရှေ့စံမင်းသားယွမ်ချင်းက အရင်ဆုံး တုံ့ပြန်လိုက်ပြီး ဒေါသတကြီး အော်ငေါက်လိုက်သည်။

သူသည် မည်သည့်နည်းလမ်းကို အသုံးပြုလိုက်သည်အား မသိသော်လည်း ဤအသံသည် ကောင်းကင်နှင့်မြေပြင်ကို ဆုတ်ဖြဲနိုင်သော အရှိန်အဝါကို သယ်ဆောင်လာပေ၏။ ဤသည်မှာ မည်သူမျှ မခုခံရဲဘဲ နာခံရမည့် ထင်ယောင်ထင်မှားဖြစ်မှုကို ပေးစွမ်းနိုင်သည်။

ဖူး....

ဤအသံကို ကြားလိုက်ရသဖြင့် ဝမ်းနည်းပူဆွေးသော စိတ်ခံစားမှုများကြားတွင် ပိတ်မိနေသော ရန်ချူးယောင်၏ခန္ဓာကိုယ် တုန်ခါသွားသည်။ သူမသည် လတ်ဆတ်သော သွေးတစ်လုတ်ကို ချက်ချင်းအန်ထုတ်လိုက်၏။

သွေးအန်လိုက်ရသော်လည်း သူမသည် အစောပိုင်းက ကြုံတွေ့ခဲ့ရသော ဝမ်းနည်းပူဆွေးမှုခံစားချက်မှ ရုန်းထွက်နိုင်ခဲ့ပြီး ယခင်က အေးစက်မှုကို ပြန်လည်၍ ရရှိသွားတော့သည်။

"နင်က ငါ့ရဲ့ စိတ်ခံစားချက်တွေကို တကယ်ကြီး လှုံ့ဆော်နိုင်တာလား"

သူမသည် ခေါင်းမော့ပြီး ကျန်းရွှမ်ကို ကြည့်လိုက်ကာ သူမ၏မျက်လုံးများထဲတွင် မယုံကြည်နိုင်မှုများ ဖြတ်ပြေးသွားသည်။

သူမ၏ကျင့်ကြံခြင်းသည် ဤအဆင့်သို့ ရောက်ရှိနေပြီဖြစ်ရာ အနှောင့်အယှက်မရှိနိုင်ဟု မဆိုနိုင်သော်လည်း သူမ၏စိတ်ခံစားချက်များကို လှုပ်ခတ်နိုင်သောအရာဟူ၍ အလွန်နည်းပါးသည်။ သို့ရာတွင် တစ်ဖက်လူနှင့် အသက်သုံးရှိုက်စာခန့် တိုက်ခိုက်ပြီးနောက် သူမသည် အာရုံပျံ့လွင့်သွားရုံသာမက ကျားဖြူအစောင့်တပ်သားသုံးထောင်၏ သေဆုံးမှုကိုလည်း ဖြစ်စေခဲ့သည်။ ဤသည်မှာ မယုံနိုင်စရာကောင်းသော ကိစ္စတစ်ရပ်ပင်။