အခန်း (၁၄၉)

အောင်နိုင်ခြေ မည်မျှပင် နည်းပါးနေပါစေဦးတော့... အချိန်ကတော့ ထပ်မရှိတော့ပေ။

နောက်ထပ် ရက်အနည်းငယ်အကြာတွင် တတိယမြောက် စစ်ရေးစွမ်းရည်စစ်ဆေးမှု စတင်တော့မည် ဖြစ်သည်။ ထို့နောက် စတုတ္ထအဆင့်ဖြစ်သော လက်တွေ့တိုက်ပွဲဝင်ခြင်းနှင့် ပဉ္စမအဆင့်ဖြစ်သော အရိုးတည်ဆောက်ပုံ စစ်ဆေးခြင်းတို့ကို တစ်ဆက်တည်း ပြုလုပ်သွားမည် ဖြစ်သည်။

သူ လုပ်ဆောင်နိုင်သမျှမှာ လူစွမ်းရှိသရွေ့ ကြိုးစားအားထုတ်ပြီး ကျန်ရှိသည်ကိုတော့ ကောင်းကင်ဘုံ၏ အလိုတော်အတိုင်းသာ ပစ်ထားလိုက်ရုံသာ ရှိတော့သည်။

ထို့အပြင်...

ပြီးခဲ့သည့်နေ့ မွန်းလွဲပိုင်းက 'ဗျူဟာဖျက်စီးခြင်း' စစ်ဆေးမှုများ ဆက်လက်ပြုလုပ်ခဲ့ရာ ယနေ့တွင် အရည်အချင်းစစ် စိန်ခေါ်ပွဲရလဒ်များ ထွက်ပေါ်လာခဲ့ပြီ ဖြစ်သည်။

လုရှူဟွာ၊ ချောင်ဖန် နှင့် ယန်ချန်ချင်း တို့ကဲ့သို့ လူနည်းစုသာ 'A' အဆင့် ရရှိခဲ့ကြသည်။ ထိုသူများပင်လျှင် စန္ဒကူးနံ့သာတိုင် ကုန်ဆုံးတော့မည့် အချိန်ရောက်မှသာ ခက်ခဲစွာ ဖြတ်ကျော်နိုင်ခဲ့ကြခြင်း ဖြစ်သည်။ ၎င်းတို့သည်သာ ရှေ့ဆက်မည့် ပြိုင်ပွဲအဆင့်များတွင် ရင်ဆိုင်ရမည့် စစ်မှန်သော ပြိုင်ဘက်ကောင်းများ ဖြစ်ပေလိမ့်မည်။

"သခင်ကြီး... လေ့ကျင့်တာ ပြီးပြီလားရှင့်"

စီချင် တစ်ယောက် တံခါးပြင်ပတွင် အစောကတည်းကထိုင်စောင့်နေခြင်း ဖြစ်သည်။ အခန်းထဲမှ လှုပ်ရှားသံများ ငြိမ်သက်သွားသည်ကို အကဲခတ်ပြီးမှသာ အထဲသို့ ခေါင်းပြူကြည့်လာသည်။ ခွင့်ပြုချက်ရသည်နှင့် ဆေးရည်တစ်ခွက်ကို ကိုင်ဆောင်ကာ အခန်းထဲသို့ ဝင်လာခဲ့၏။

"ဒါက သခင်မကိုယ်တိုင် ကျိုချက်ထားတဲ့ အားဖြည့်စွပ်ပြုတ်ပါ... သခင်ကြီး သောက်ဖြစ်အောင် တိုက်ပါဆိုပြီး မှာလိုက်ပါတယ်"

ကလေးယူရန် ဆုံးဖြတ်ပြီးကတည်းက ဂူရှင်းလန် သည် အားဖြည့်ဆေးမြစ်များကို ဝယ်ယူကာ ထမင်းစားတိုင်း ထည့်သွင်းကျွေးမွေးလေ့ရှိသည်။ ဤဆေးများသည် ကျန်းမာရေးအတွက်သာ ဖြစ်သဖြင့် ဘေးထွက်ဆိုးကျိုး ကြီးကြီးမားမားတော့ မရှိပေ။

"သခင်မကို သွားပြောလိုက်ပါ... ငါ့ကို ဒီထက်ပိုပြီး အားဆေးတွေ ထပ်ကျွေးနေရင် သူကိုယ်တိုင်ပဲ တောင့်ခံနိုင်မှာ မဟုတ်တော့ဘူးလို့။ ထားလိုက်ပါတော့... ငါ့ဘာသာပဲ သွားပြောလိုက်တော့မယ်"

ချန်ဆန်းရှီ သည် ဆေးရည်များကို သောက်လိုက်ပြီးနောက် အရှေ့ဘက်ဝန်းရှိ အိပ်ဆောင်မဆီသို့ တန်းတန်းမတ်မတ် လျှောက်လှမ်းသွားတော့သည်။

...

စစ်တပ်မြို့တော်..

လွန်ခဲ့သော ရက်အနည်းငယ်အတွင်းက ဖြစ်ပွားခဲ့သော စာမေးပွဲ မသမာမှု သတင်းအစအနများကို အကုန်အစင် ဖုံးဖိရှင်းလင်းလိုက်ပြီ ဖြစ်သည်။ သိုင်းပညာလေ့ကျင့်ရေးကွင်းအတွင်းရှိ အခြေအနေများမှာလည်း ပုံမှန်အတိုင်း ပြန်လည်လည်ပတ်နေပြီဖြစ်ကာ စာစစ်မှူးတစ်ဦး လျော့နည်းသွားသည်မှအပ အားလုံးမှာ ထူးမခြားနားပင်။

မကြာသေးမီကပင် မြို့တော်ဝန်လျို သည် နာမကျန်းဖြစ်သည်ဟု အကြောင်းပြကာ လူလုံးမပြတော့ပေ။ သူသည် ရာထူးမှ နုတ်ထွက်ခွင့်ပြုရန် အသနားခံစာ တင်ထားပြီး မည်သို့ပင်ဖြစ်စေ ဆက်လက်တာဝန်ယူရန် ငြင်းဆန်နေခဲ့သည်။

နန်းတော်ဘက်မှလည်း အိမ်နီးချင်းပြည်နယ်မှ စစ်နတ်ဘုရား တစ်ဦးကို မြို့တော်ဝန်အသစ်အဖြစ် ခေတ္တပြောင်းရွှေ့ တာဝန်ပေးထားပြီးဖြစ်ကြောင်း သတင်းများ ထွက်ပေါ်နေသည်။

နင်ချန်းချွန် သေဆုံးမှုနှင့် ပတ်သက်၍မူ မည်သူမျှ ထုတ်ဖော်ပြောဆိုခြင်း မရှိကြတော့ပေ။ နန်းတော်ဘက်မှလည်း ဆွန်ဒူရှန် အပေါ် တစ်စုံတစ်ရာ အပြစ်ပေးခြင်း မရှိသည်ကို ကြည့်ခြင်းအားဖြင့် ဤကိစ္စမှာ အမှန်တကယ်ပင် ပြီးဆုံးသွားပြီဟု ယူဆရပေမည်။

လီချန်ကျုံး သည် လူစုံသည်နှင့် တတိယအဆင့် စစ်ဆေးမည့် အကြောင်းအရာကို အသံကျယ်ကျယ်ဖြင့် ကြေညာလိုက်သည်။

"စစ်သူကြီးတို့... မင်းတို့ ဒီကိုလာတဲ့လမ်းမှာ တုန်ယိမြို့ ရဲ့ အခြေအနေကို သတိထားမိကြမယ် ထင်ပါတယ်။ အဲဒါကတော့ မင်းတို့ရဲ့ တတိယမြောက် အဓိက စစ်ဆေးချက်ပဲ ဖြစ်တယ်"

"စစ်မြေပြင်ကို သွားကြ... ရန်သူကို သတ်ဖြတ်ကြ"

"စစ်ဆေးမှုကတော့ ရိုးရှင်းပါတယ် တုန်ယိမြို့ထဲက သစ္စာဖောက်တွေဟာ ဒီညမှာ မြို့ကိုဖောက်ထွက်ပြီး ထွက်ပြေးဖို့ ကြိုးစားကြလိမ့်မယ်။ ဘယ်သူက ရန်သူကို အများဆုံး သတ်နိုင်မလဲဆိုတာပေါ် မူတည်ပြီး အမှတ်ပေးသွားမှာ ဖြစ်တယ်"

"ရန်သူ လေးရာနဲ့ အထက် သတ်နိုင်ရင် 'A' အဆင့်၊ သုံးရာဆိုရင် 'B' အဆင့် သတ်မှတ်မယ်"

"အရိုးဖွဲ့စည်းခြင်းအဆင့် တစ်ယောက်ကို သတ်ရင် သာမန်စစ်သား လေးဆယ်နဲ့ ညီမျှမယ်။ အတွင်းအားသန့်စင်ခြင်းအဆင့် ဆိုရင် လူတစ်ရာနဲ့ ညီမျှမယ်။ ဒီထက် မြင့်တဲ့အဆင့်တွေအတွက်တော့ မင်းတို့ စိတ်ပူစရာမလိုဘူး"

"အားလုံး သဘောပေါက်ကြရဲ့လား"

"ကောင်းပြီ... မင်းတို့ ပြင်ဆင်ဖို့ နှစ်နာရီ အချိန်ရမယ်။ နောက် နှစ်နာရီကြာရင် ငါတို့ ချီတက်ကြမယ်"

"..."

ရန်သူကို သတ်ဖြတ်ရမည်တဲ့လား...။

ချန်ဆန်းရှီ ထင်ထားသည်မှာ စစ်တပ်ကို ဦးဆောင်ပြီး မြို့ကို မည်သို့သိမ်းပိုက်ရမည်ကို စစ်ဆေးမည်ဟု ဖြစ်သည်။ သို့သော် အခုတော့ လူခေါင်းအရေအတွက်ပေါ် မူတည်ပြီး တိုက်ရိုက်ယှဉ်ပြိုင်ရမည့် စစ်ဆေးမှုမျိုး ဖြစ်နေသည်။

ပြန်စဉ်းစားကြည့်လျှင်လည်း ဤစစ်ဆေးမှုက ကျိုးကြောင်းဆီလျော်မှု ရှိပါသည်။ ရွေးချယ်ခံ ဗိုလ်ချုပ်လောင်းများစွာ ရှိနေသည့်အတွက် လူတစ်ဦးစီကို စစ်သည် မည်မျှခွဲပေးရမည်၊ မည်သူက အရင်တိုက်ခိုက်မည်၊ အကျအဆုံးများလျှင် မည်သို့လုပ်မည် စသည့် အရှုပ်အထွေးများကို ဖြေရှင်းရန်မှာ ခက်ခဲလှသည်။ ထို့ကြောင့် ဤကဲ့သို့ တိုက်ရိုက်စစ်ဆေးခြင်းကသာ အမျှတဆုံး ဖြစ်ပေလိမ့်မည်။

သူသည် ပေါင်ခြောက်ထောင်အားရှိသော လေးကြီးတစ်လက်ကို ကောက်ကိုင်လိုက်သည်။

နှစ်နာရီအကြာတွင် လူအားလုံး စုဝေးမိကြပြီး ဗိုလ်မှူးငယ်အချို့၏ ဦးဆောင်မှုဖြင့် မြို့ပြင်သို့ ထွက်ခွာလာခဲ့ကြသည်။

ဤအချိန်တွင် တုန်ယီမြို့ကို အင်အားငါးသောင်းခန့်ရှိသော စစ်သည်တော်များက ဝိုင်းရံပိတ်ဆို့ထားကြသည်။ ထိုအထဲတွင် ရွှမ်ဝူတပ်စခန်းမှ စစ်သည် တစ်သောင်းနှင့် ကျန်ရှိသော စစ်သည်များမှာ လျန်ကျိုးမြို့စောင့်တပ်မှ ဖြစ်ကြသည်။

ရွှမ်ဝူတပ်နှင့် ပျံလွှားသူရဲကောင်း တပ်နှစ်ခုလုံးကို ကွပ်ကဲနေသူမှာ ဗိုလ်ချုပ်ကြီး ကျိီဖြစ်သည်။ သူသည် ဘုရင်ခံ၏ တပည့်များထဲတွင် တစ်ဦးတည်းသော စစ်နတ်ဘုရား ဖြစ်ပြီး နောင်တစ်ချိန်တွင် ဆက်ခံသူဖြစ်လာမည့်သူဟု သတ်မှတ်ခံထားရသူ ဖြစ်သည်။

"ဆွန်ဒူရှန်... မင်း အမေကိုလိုးမယ့် ကောင်"

မြို့ရိုးပေါ်မှနေ၍ ဓားရှည်တစ်လက်ကို ကိုင်ဆောင်ထားသော လူလတ်ပိုင်းတစ်ဦးက ဒေါသတကြီး ဆဲဆိုနေသည်။

"မင်းရဲ့ အသားကို စားပြီး မင်းရဲ့ အရေခွံပေါ်မှာ အိပ်ချင်လှပြီကွာ။ မင်းရဲ့ မျိုးဆက်တွေ အကုန်ပြတ်ပြီး မင်းလည်း အသေဆိုးနဲ့ သေရမှာပါ"

"မင်းမှာ သတ္တိရှိရင် ထွက်လာပြီး ငါနဲ့ အသေအလဲ တိုက်စမ်းပါ။ ငါတို့ကို မြို့ထဲမှာ ပိတ်လှောင်ထားပြီး မင်းကတော့ လိပ်လို ပုန်းနေတယ်... မင်းက ဘယ်လိုသူရဲကောင်းမျိုးလဲ"

"သူက ဘုရင်ခံကို အဲဒီလောက်တောင် မုန်းတာလား"

အဝေးက လှမ်းကြည့်နေရသော်လည်း ချန်ဆန်းရှီ သည် ထိုလူ၏ ပြင်းထန်လှသော အာဃာတကို ခံစားနေရသည်။

"ဒီလူက ခုနစ်သွယ်ဂိုဏ်း ရဲ့ ဂိုဏ်းချုပ် ကျန်းဟွိုင်မင် ပဲ။ သူက မဟာသွေးကြောအဆင့်မှာ ရှိတယ်"

လီချန်ကျုံး က ရှင်းပြသည်။

"လွန်ခဲ့တဲ့ ငါးနှစ်က တပ်စခန်းရှစ်ခု လျန်ကျိုးကို စတင်ရောက်ရှိလာချိန်မှာ အနောက်မြောက် နယ်စပ်ဒေသဟာ တကယ်ကို ပျက်စီးနေခဲ့တာ။ အကျင့်ပျက် ခြစားတဲ့ အရာရှိတွေ များလွန်းသလို နေ့တိုင်းလိုလို မောက်မာရိုင်းစိုင်းတဲ့ လုပ်ရပ်တွေ ရှိခဲ့တယ်။ ဂိုဏ်းတပည့်တွေဆိုရင် လမ်းပေါ်မှာ သူတို့သဘောကျတဲ့ မိန်းကလေးတွေ့ရင် အတင်းအဓမ္မ ဆွဲခေါ်သွားတတ်ကြတယ်။ ညဘက်ဆိုရင်လည်း အိမ်ရှင် ယောက်ျားတွေရဲ့ ရှေ့မှာတင် အိမ်ထဲ ဇွတ်ဝင်စီးနင်းကြတဲ့အထိပဲ..."

"ဘုရင်ခံက စစ်တပ်ကို ပြုပြင်ပြောင်းလဲပြီးတဲ့နောက် မြောက်ပိုင်းပြည်နယ်တွေကို သုံးနှစ်ပတ်လုံး စစ်သည်ထောင်ချီလွှတ်ပြီး ရှင်းလင်းရေးလုပ်ခဲ့တယ်။ ရာဇဝတ်သားမှန်သမျှကို နှိမ်နင်းလိုက်တော့မှပဲ သူတို့တွေ အတန်ငယ် ငြိမ်သွားကြတာ"

"ကျန်းဟွိုင်မင် ကိုယ်တိုင်ကတော့ ကြီးကြီးမားမား အပြစ်မလုပ်ခဲ့ပေမဲ့ သူ့ရဲ့ သားသမီးတွေကတော့ တကယ်ကို ရိုင်းစိုင်းကြတာ။ သူတို့က မကောင်းမှုမျိုးစုံ လုပ်ခဲ့တော့ နောက်ဆုံးမှာ အပြစ်ပေးခံလိုက်ရတာပေါ့"

"အဲဒီကတည်းက ကျန်းဟွိုင်မင်က ရန်ငြိုးဖွဲ့ထားခဲ့တာ။ မကြာသေးခင်က လူရိုင်းတွေနဲ့ တိုက်ပွဲဖြစ်တဲ့အချိန်မှာ အခွင့်ကောင်းယူပြီး သစ္စာဖောက်ခဲ့တာပေါ့... အခုလိုနည်းနဲ့ လက်စားချေဖို့ ကြိုးစားနေတာပဲ"

ချန်ဆန်းရှီ၏ မှတ်ဉာဏ်ထဲတွင်လည်း ထိုအကြောင်းအရာအချို့ကို မှတ်မိနေသည်။ ဘုရင်ခံမရောက်လာခင်က မြောက်ပိုင်းဒေသသည် ဥပဒေမဲ့ ဒေသတစ်ခုကဲ့သို့ ဖြစ်နေခဲ့ပြီး နေ့ခင်းကြောင်တောင် လူသတ်မှုများပင် ရှိခဲ့သည်။

ဩဇာအာဏာရှိသူနှင့် ဆက်နွှယ်မှုရှိလျှင် သို့မဟုတ် လာဘ်ထိုးနိုင်လျှင် အစိုးရရုံးများက ဂရုမစိုက်သည့်အပြင် နစ်နာသူကိုပင် ပြန်လည် စွပ်စွဲအပြစ်ပေးတတ်ကြသဖြင့် လူအများ ဘဝပျက်ခဲ့ကြရသည်။

"စစ်သူကြီး လု... ကျွန်တော်တို့ အခု စတင်လို့ ရပါပြီ"

ရွေးချယ်ခံစစ်သူကြီးများ ရောက်ရှိလာသည်နှင့် ဗိုလ်ချုပ်ကြီး ကျိီက ခေါင်းညိတ်ပြလိုက်သည်။

ဗိုလ်မှူးငယ်တစ်ဦးက အချက်ပြမှုကို နားလည်လိုက်ပြီး အမိန့်များကို ချက်ချင်းပင် ဆင့်ဆိုတော့သည်။

မကြာမီမှာပင် တုန်ယီမြို့ အနောက်ဘက်တံခါးရှိ 'ပျံလွှားသူရဲကောင်း' တပ်သား သုံးထောင်မှအပ ကျန်ရှိသော တပ်ဖွဲ့ဝင်များအားလုံး နောက်ဆုတ်ပေးလိုက်ကြသည်။ ၎င်းမှာ သစ္စာဖောက်များ ထွက်ပြေးရန် လမ်းတစ်ခုတည်းကိုသာ ချန်လှပ်ထားပေးခြင်း ဖြစ်သည်။

မြို့ကို ဝိုင်းရံတိုက်ခိုက်ရာတွင် ထွက်ပြေးပေါက်တစ်ခုကို အမြဲတမ်း ဖွင့်ပေးထားရလေ့ရှိသည်။

မြို့ကို အတင်းဝင်ရောက်စီးနင်းလျှင် မလိုအပ်ဘဲ စစ်သည်များ အကျအဆုံးများနိုင်သဖြင့် ၎င်းတို့ကို မြို့ပြင်သို့ ထွက်လာအောင် ဖျားယောင်းခြင်းကသာ စစ်ဆေးမှုအတွက် အကောင်းဆုံးနည်းလမ်း ဖြစ်ပေသည်။

ထို့အပြင် သူတို့သည် မြို့ပြင်သို့ မထွက်ဘဲ မနေနိုင်ပေ။

အကြောင်းမူကား မြို့ထဲတွင် ရိက္ခာပြတ်တောက်နေသည်မှာ လဝက်ခန့် ရှိနေပြီဖြစ်ကာ မြေပေါ်ရှိ စားသုံး၍ရသမျှကိုလည်း စားသောက်ကုန်ကြပြီ ဖြစ်သည်။ ဆက်လက်ပိတ်မိနေပါက လူသားချင်း ပြန်လည်စားသောက်ရသည့် အခြေအနေသို့ ဆိုက်ရောက်သွားပေလိမ့်မည်။ ထို့ကြောင့် မြို့ထဲတွင် ငတ်သေရမည့်အစား မြို့ပြင်သို့ ဖောက်ထွက်ပြီး တစ်ယောက်စ နှစ်ယောက်စ လွတ်မြောက်နိုင်ခြေရှိသည့် လောင်းကြေးကို ထပ်ခြင်းကသာ ပို၍ကောင်းမွန်ပေလိမ့်မည်။