လျှို့ဝှက်ချက်ကို ခန့်မှန်းခြင်း

တကယ်တမ်းတွင် ထောင်ယွမ်ရွာ Green Freshသစ်သီးနှင့် ဟင်းသီးဟင်းရွက် စူပါမားကတ်သည် ဘာကြောင့် ဒီလောက်ရောင်းကောင်းနေရတာလဲ။ အာဏာရှိ၊ ငွေရှိသော သူဌေးကြီးများပင် မျက်နှာကို ဘေးဖယ်ထားကာ သူမဆိုင်မှ ပစ္စည်းများကို လာရောက်စားသောက်နေကြရတာလဲဆိုသည့် အကြောင်းရင်းကို စုံစမ်းရသည်မှာ အလွန်လွယ်ကူသည်။

အင်တာနက်ပေါ်တွင် ရှာဖွေကြည့်လိုက်လျှင် သို့မဟုတ် စူပါမားကတ်သို့ ဟင်းသီးဟင်းရွက် လာဝယ်သော ဖောက်သည်တစ်ဦးဦးကို မေးမြန်းလိုက်လျှင်ပင် အဖြေကို လျင်မြန်စွာသိရှိနိုင်သည်။

ရလဒ်ကို သိရှိပြီးနောက် လက်အောက်ငယ်သား ဝေါလ်တာ၏အမူအရာမှာ ပြောပြရန် ခက်ခဲနေသည်။

တကယ်ပင် ဤအကြောင်းရင်းကြောင့်သာဆိုပါက သူတို့ ဟွမ်လင်းအုပ်စုအနေဖြင့် ယှဉ်ပြိုင်ရန်အားသာချက် လုံးဝမရှိတော့ပေ။

အာဏာနှင့် ငွေကြေး မည်မျှပင်များပြားပါစေ ခန္ဓာကိုယ်ကျန်းမာရေးလောက် အရေးမကြီးပေ။

ပြောင်းပြန်တွေးကြည့်လျှင် ကျန်းမာသော ခန္ဓာကိုယ်ရှိမှသာ အာဏာနှင့်ငွေကြေးများ ပိုမိုများပြားလာမည် မဟုတ်လား။ ထို့အပြင် ကိုယ်တိုင်လည်း ပိုမိုခံစားစံစားနိုင်မည်။

ပီတာသည် စုံစမ်းစစ်ဆေးရေး အစီရင်ခံစာများကို ကြည့်ရှုပြီး လက်အောက်ငယ်သား၏တင်ပြချက်ကို နားထောင်ရင်း မျက်နှာသေဖြစ်နေသော်လည်း နက်နက်နဲနဲ တွေးတောခြင်းထဲသို့ ကျရောက်နေသည်။

ထို့နောက် ပီတာက လေးနက်သော အမူအရာဖြင့် မေးလိုက်သည်။

"အဲဒီစူပါမားကတ်က ပစ္စည်းတွေက တကယ်ပဲ အဲဒီလို ကုသနိုင်စွမ်း ရှိတာလား။ ဒါမှမဟုတ် ကြော်ငြာ ကောင်းတာလား။ စားသုံးသူတွေကို လှည့်စားပြီး ရောင်းအားမြှင့်တင်တာပဲ ဖြစ်နိုင်တယ်"

ဤဟင်းသီးဟင်းရွက်၊ သစ်သီးဝလံများနှင့် အခြားသော လယ်ယာထွက်ကုန်များသည် လူသားများ၏ ခန္ဓာကိုယ် လုပ်ငန်းစဉ်များကို ထိန်းသိမ်းပေးရုံသာ ဖြစ်ပြီး ဆေးဘက်ဆိုင်ရာ အာနိသင် လုံးဝ မရှိနိုင်ကြောင်း သူ သိသည်။

မဟုတ်ပါက ကမ္ဘာပေါ်တွင် လူနာဟူ၍ ရှိတော့မည် မဟုတ်သကဲ့သို့ ဆေးရုံဟူ၍လည်း ရှိတော့မည် မဟုတ်ပေ။

ဝေါလ်တာက ပြန်ဖြေသည်။

"ဘော့စ် ကျွန်တော်တို့ လူတွေ သွားစုံစမ်းကြည့်တော့ အဲဒီစူပါမားကတ်က ရောင်းတဲ့ ပစ္စည်းတွေမှာ တကယ်ပဲ အဲဒီလိုအာနိသင်ရှိနေပါတယ်။ ကြော်ငြာသက်သက် မဟုတ်ပါဘူး။ အရင်က ကျွန်တော်တို့နဲ့ ပူးပေါင်းဆောင်ရွက်ခဲ့တဲ့ သူဌေးကြီးတချို့ရဲ့အိမ်မှာ ကျန်းမာရေး မကောင်းတဲ့ သက်ကြီးရွယ်အိုတွေ ရှိကြတယ်။ သူတို့က ဟိုဘက်က ပစ္စည်းတွေကိုစားပြီးနောက် ခန္ဓာကိုယ်က တစ်နေ့ထက်တစ်နေ့ ပိုကောင်းလာပြီး ရောဂါဝေဒနာ ခံစားရတာတွေ သက်သာလာကြတယ်။ အတိုချုပ်ပြောရရင် ကျန်းမာတဲ့လူစားရင် ခန္ဓာကိုယ်ကြံ့ခိုင်စေပြီး လူနာတွေ စားရင် ရောဂါ ပျောက်ကင်းစေတဲ့အာနိသင်ရှိပါတယ်"

လွန်ခဲ့သော ရက်အနည်းငယ်က သူ ဈေးကြီးပေး ဝယ်ယူရန် ကြိုးစားခဲ့သော်လည်း မည်သူမျှ သူ့ကို ဂရုမစိုက်ခဲ့ကြခြင်းမှာ ဘာကြောင့်လဲဆိုတာကို ယခု သူ နားလည်သွားပြီဖြစ်သည်။ ဆင်းရဲသားများက ရောဂါကုသရန် လိုအပ်နေခြင်းဖြစ်နိုင်ပြီး ချမ်းသာသူများကမူ ခန္ဓာကိုယ် ကြံ့ခိုင်ရန်အတွက်ဖြစ်သည်။

ထို့အပြင် ထိုစူပါမားကတ်မှ ပစ္စည်းများကို ဝယ်ယူရန်မှာလည်း မလွယ်ကူပေ။ ယနေ့ ကံကောင်း၍ ဝယ်ရသော်လည်း မနက်ဖြန် ဝယ်ရမည်ဟု အာမမခံနိုင်ပေ။

ပီတာ ကြားလိုက်ရသောအခါ မျက်နှာ မည်းမှောင်သွားပြီး လုံးဝမယုံကြည်သည့်ပုံ ပေါ်နေသည်။ သူက အံကြိတ်၍ ပြောလိုက်သည်။

"ငါ လုံးဝ မယုံဘူး။ ဒီကိစ္စမှာ သေချာပေါက် လျှို့ဝှက်ချက်တစ်ခုရှိရမယ်"

လက်အောက်ငယ်သား ဘာမှ မပြောတော့ပေ။

ပီတာသည် ရုံးခန်းထဲတွင် ထိုင်နေပြီး စုံစမ်းစစ်ဆေးရေး အစီရင်ခံစာကိုသာ စောင့်ဆိုင်းနေသူဖြစ်သည်။ ဝေါလ်တာကမူ ကိုယ်တိုင်ပါဝင်စုံစမ်းခဲ့သူဖြစ်ရာ မျက်မြင်ကိုယ်တွေ့ ကြုံတွေ့ခဲ့ရသော ကိစ္စရပ်များက သူ့ကို တုန်လှုပ်စေခဲ့သည်မှာ ပီတာ နားလည်နိုင်မည့် အရာမျိုး မဟုတ်ပေ။

ပီတာက ဆက်ပြောသည်။

"သေချာပေါက် ဒီစူပါမားကတ်က ပစ္စည်းတွေကို စိုက်ပျိုးတဲ့ စိုက်ခင်းတွေမှာ လျှို့ဝှက်ချက် အကြီးကြီးရှိရမယ်။ ငါတို့ အခုလုပ်ရမှာက ဒီလျှို့ဝှက်ချက်တွေကို တူးဖော်ပြီး ငါတို့အတွက် အသုံးပြုရမယ်။ ထောင်ယွမ်ရွာ Green Freshစူပါမားကတ်ကို ဖြိုချပြီး ငါတို့ရဲ့ဈေးကွက်နေရာကို ပြန်လည်သိမ်းပိုက်ရမယ်။ သူတို့ကို ဒီအတိုင်းဆက်ပြီး မောက်မာခွင့်ပေးထားရင် ဟွမ်လင်းအုပ်စု အတွက် နေရာရှိတော့မှာ မဟုတ်ဘူး၊ နောက်ဆို ငါတို့ ဟွာရှဈေးကွက်ကနေ ထွက်ပေးရလိမ့်မယ်"

ဟွာရှဈေးကွက်သည် ရွှေတွင်းကြီး ဖြစ်ရာ ဒီအတိုင်းထွက်ခွာပေးလိုက်ရရင် ဘယ်သူက ကျေနပ်နိုင်မှာလဲ။

ဟဟ... တကယ်တမ်းတွင် F နိုင်ငံနှင့် အခြားအင်အားကြီးနိုင်ငံများ၏အမြင်တွင် ဟွာရှသည် လူအ၊ ငွေပေါသော နေရာတစ်ခုသာဖြစ်သည်။ သူတို့နိုင်ငံမှ အညံ့ဆုံးပစ္စည်းများကို ရောင်းချလျှင်ပင် ဟွာရှသားများ အမြင်တွင် နိုင်ငံခြားမှ တင်သွင်းလာသော ပစ္စည်းကောင်းဖြစ်နေသဖြင့် ဝယ်ယူရန် ငွေအမြောက်အမြား သုံးစွဲကြသည်။

သို့သော် ဆန့်ကျင်ဘက်အနေဖြင့် ဟွာရှသားများ ထုတ်လုပ်သော အကောင်းဆုံး ပစ္စည်းများသည် နိုင်ငံခြားသားများအမြင်တွင် အညံ့ဆုံးပစ္စည်းများဖြစ်နေတတ်သည်။

သို့သော် သူတို့သည် ဤအညံ့ဆုံးဟုခေါ်သောပစ္စည်းများကို ဝယ်ယူသွားကြပြီး မျက်စိတစ်မှိတ် အတွင်းမှာပင် တံဆိပ်ပြောင်းကာ သူတို့ ထုတ်လုပ်သောပစ္စည်းအဖြစ် ပြောင်းလဲလိုက်ကြသည်။ ထို့နောက် ဟွာရှသားများထံသို့ ဈေးကြီးပေး၍ ပြန်လည်ရောင်းချကြသည်။ ထိုအခါ ဟွာရှသားများ အမြင်တွင် နိုင်ငံခြားမှ အဆင့်မြင့်ကုန်ပစ္စည်းဖြစ်သွားပြန်သည်။

ဟဟ... သူတို့က ဟွာရှသားများ၏ပိုက်ဆံကို ဤသို့ ရှာဖွေကြခြင်းဖြစ်သည်။

ဤသည်မှာ မိမိသဘောဆန္ဒအရဖြစ်ပြီး အတင်းအကျပ်ရောင်းချခြင်း မဟုတ်ပေ။ ဟွာရှသားများ ကိုယ်တိုင်က နိုင်ငံခြားအထင်ကြီးသည့် ရေစီးကြောင်းကို နှစ်သက်ပြီး နိုင်ငံခြားမှလမင်းက ပိုဝိုင်းသည်၊ လေထုက ဟွာရှထက် ပိုချိုမြိန်သည်ဟု ထင်မြင်နေကြသောကြောင့်ပင်။

ယခင်က ဟွမ်လင်းအုပ်စု ဟွာရှရုံးခွဲ၏ ရောင်းအားသည် ရုံးချုပ်ရောင်းအားစုစုပေါင်း၏ ၃၀ ရာခိုင်နှုန်းအထိ ရှိခဲ့သည်။

အကယ်၍ ဟွာရှဈေးကွက် ဆုံးရှုံးသွားပါက ဟွမ်လင်းအုပ်စုအတွက် ဆုံးရှုံးမှု မည်မျှကြီးမားမည်ကို သိနိုင်သည်။ ထို့ကြောင့် မည်သို့ပင်ဖြစ်စေ သူတို့ ဟွာရှ ဈေးကွက်ကို အဆုံးရှုံးခံ၍ မဖြစ်ပေ။

ယခု သူတို့လုပ်ရမည်မှာ အခြေအနေကိုပြောင်းပြန်လှန်ပြီး တစ်ဖက်လူကို အနိုင်ယူရန်ဖြစ်သည်။ ထို့ကြောင့် တစ်ဖက်လူ အောင်မြင်မှု၏ လျှို့ဝှက်ချက်ကို သူတို့ ရှာဖွေရပေမည်။

ပီတာက စဉ်းစားပြီးနောက် "ထောင်ယွမ်ရွာ Green Freshစူပါမားကတ်ရဲ့ စိုက်ပျိုးရေးခြံကို လူလွှတ်ပြီး လျှို့ဝှက်ချက်ကို ရအောင် ယူခဲ့"

အကယ်၍မရပါက သူတို့ အခြားနည်းလမ်းကိုအသုံးပြု၍ ထောင်ယွမ်ရွာ Green Freshစူပါမားကတ်ကိုဖိနှိပ်ကာ ဈေးကွက်ကို ပြန်လည်သိမ်းပိုက်ရပေမည်။

ဝေါလ်တာ ချက်ချင်း နားလည်သဖြင့် ပြောလိုက်သည်။

"သဘောပေါက်ပါပြီ ဘော့စ်"

ပြောပြီးသည်နှင့် သူ လှည့်ထွက်ကာ စီစဉ်ရန် ပြင်လိုက်သည်။

"နေဦး" ပီတာက ဝေါလ်တာကို လှမ်းတားပြီး အလေးအနက်ထား မှာကြားလိုက်သည်။ "မှတ်ထား... လွှတ်လိုက်တဲ့ လူက ငါတို့ ဟွမ်လင်းအုပ်စုနဲ့ ပတ်သက်တယ်ဆိုတာကို ဘယ်သူမှ မသိစေနဲ့။ ဖြစ်နိုင်ရင် ဟွာရှသားဖြစ်တာ အကောင်းဆုံးပဲ"

အဘယ်ကြောင့်ဆိုသော် ဟွာရှသားဖြစ်ပါက ထိုလူများ၏သတိထားမှုကို လျှော့ချနိုင်သောကြောင့် ဖြစ်သည်။

"ဟုတ်ကဲ့ ဘော့စ်"

ဝေါလ်တာ ထွက်သွားပြီးနောက် ပီတာသည် ဟင်းသီးဟင်းရွက်ခြင်းတစ်ဝက်ကိုကြည့်ကာ မျက်လုံးများတွင် ယုတ်မာသော အရိပ်အယောင်များ ပေါ်လာသည်။

ထို့နောက် သူသည် မုန်လာဥဖြူတစ်လုံးကို ထုတ်ယူလိုက်သည်။ မုန်လာဥဖြူသည် ဖြူဖွေးပြီး တုတ်ခိုင်ကာ ယောက်ျားတစ်ယောက်၏ လက်မောင်းခန့် တုတ်သည်။ ကြည့်ရုံနှင့် နုဖတ်ပြီး ရေဓာတ်ပြည့်ဝနေပုံ ပေါက်သည်။ သူ လက်ဖြင့် ချိန်ကြည့်လိုက်သည်။

ထို့နောက် မုန်လာဥကို ပါးစပ်ထဲထည့်ကာ ကိုက်လိုက်ရာ မျက်လုံးများ ပြူးကျယ်သွားပြီး ပထမဆုံးအကြိမ် ဖရဲသီး စားလိုက်ရစဉ်ကကဲ့သို့ အံ့သြသွားသည်။

"ဒီမုန်လာဥက မွှေးကြိုင်ချိုမြိန်ပြီး ကြွပ်ရွတဲ့ အရသာ ထွက်နေပါလား။ သစ်သီးတစ်လုံးလို အစိမ်း စားလို့ရနေတာပဲ"

ပီတာ မုန်လာဥကိုကိုက်ရင်း တီးတိုးရေရွတ်လိုက်သည်။

"ဒီအရသာက သိပ်ကောင်းလွန်းနေတယ်"

နိုင်ငံတကာ နံပါတ်တစ် အမှတ်တံဆိပ် ဟွမ်လင်းအုပ်စု ဟွာရှရုံးခွဲ၏တာဝန်ခံတစ်ယောက်အနေဖြင့် ဟွာရှသားများတွင် ဤမျှ အံ့သြဖွယ်ကောင်းသော ပစ္စည်းများ စိုက်ပျိုးနိုင်စွမ်းရှိသည်ကို သူ လုံးဝ မယုံကြည်နိုင်ပေ။

မုန်လာဥ အနည်းငယ်ကိုက်စားပြီးနောက် မုန်ညင်းရွက်ငယ်တစ်ရွက်ကို ဖဲ့ယူကာ ပါးစပ်ထဲထည့်လိုက်သည်။ ဟင်းရွက်စိမ်းသည် ခါးသက်သောအရသာ လုံးဝမရှိဘဲ ဆန့်ကျင်ဘက်အနေဖြင့် ချိုမြိန်မွှေးပျံ့သော အရသာရှိနေကြောင်း တွေ့ရှိလိုက်ရသည်။

ထို့နောက် သူသည် အခြားသော ဟင်းသီးဟင်းရွက်များကို သံသယဖြင့် ကြည့်လိုက်သည်။

"ဒါတွေအားလုံး အစိမ်းစားလို့ရတာများလား"

ဤသည်မှာ မယုံနိုင်စရာ ကောင်းလွန်းပြီး အံ့သြစရာ ကောင်းလွန်းနေသည်။

နောက်ဆုံးတွင် ကြက်ဟင်းခါးသီးနှင့် တူသော ဟင်းသီးဟင်းရွက်တစ်မျိုးကို သူ လှမ်းကြည့်လိုက်ပြီး တွေးလိုက်သည်။

"ဒါ ကြက်ဟင်းခါးသီးဖြစ်မယ်ထင်တယ်။ ဒီကြက်ဟင်းခါးသီးကို အစိမ်းစားရင်ရော သစ်သီးအရသာ ထွက်ဦးမလား"

စိတ်ထဲမှ သံသယကို ဖြေရှင်းရန်အတွက် ပီတာသည် ကြက်ဟင်းခါးသီးကိုယူကာ အစိမ်းကိုက်စားလိုက်သည်။

ခဏအကြာတွင် သူ ကြောင်အသွားသည်။

သူ ကိုက်ထားသော ကြက်ဟင်းခါးသီးကို စိုက်ကြည့်ရင်း...

"ဒီအရသာက အရမ်း ထူးခြားတာပဲ။ ဒီကြက်ဟင်းခါးသီးက မူရင်းခါးသက်တဲ့ အရသာကို ထိန်းသိမ်းထားပေမဲ့ ဒီခါးသက်မှုထဲမှာ ချိုမြိန်မွှေးပျံ့တဲ့အရသာ ပါဝင်နေတယ်။ ကော်ဖီသောက်သလိုပဲ... ပါးစပ်ထဲဝင်စမှာခါးပေမဲ့ မျိုချလိုက်ရင် လည်ချောင်းထဲမှာ မွှေးပျံ့တဲ့အရသာကို ခံစားရတယ်။ ဒါပေမဲ့ ဒီကြက်ဟင်းခါးသီးက ကော်ဖီထက် အများကြီးပိုကောင်းတယ်"

ပီတာ တီးတိုးရေရွတ်လိုက်သည်။

"တကယ် ထူးဆန်းလွန်းတယ်။ ဒီဟင်းသီးဟင်းရွက်နဲ့ သစ်သီးတွေက သူတို့ရဲ့မူရင်း ထူးခြားတဲ့ အရသာကို ထိန်းသိမ်းထားနိုင်ပေမဲ့ အရသာတစ်မျိုးစီတိုင်းမှာ ဆွဲဆောင်မှုရှိတဲ့ ချိုမြိန်မွှေးပျံ့မှု ပါဝင်နေတယ်။ ပြီးတော့ ချိုမြိန်မွှေးပျံ့မှု တစ်ခုစီက မတူညီကြဘဲ မူရင်းအရသာနဲ့ပေါင်းစပ်လိုက်တော့ ပိုပြီး ဆွဲဆောင်မှုရှိတဲ့ အရသာတစ်မျိုး ဖြစ်ပေါ်လာတယ်။ ဒါက သဘာဝတရားရဲ့ မူလသဘောတရားနဲ့ လုံးဝဆန့်ကျင်နေတာပဲ"

"ဖြစ်နိုင်တာက..." ပီတာ မျက်လုံးမှေးကာ တွေးလိုက်သည်။ "ဒီထူးခြားတဲ့ ချိုမြိန်မွှေးပျံ့မှုတွေက ထူးခြားတဲ့ ဒြပ်ပေါင်းတစ်မျိုး ဖြစ်ပြီး အဲဒီ ကုသနိုင်စွမ်းတွေရဲ့ အခြေခံအကြောင်းရင်းများလား"

စဉ်းစားမိသည်နှင့် ပီတာ ချက်ချင်း ဖုန်းခေါ်လိုက်သည်။ မကြာမီ အမျိုးသမီးတစ်ဦး ရုံးခန်းထဲသို့ ဝင်လာသည်။

"ဘော့စ်"

အမျိုးသမီး အတွင်းရေးမှူးက ခေါ်လိုက်သည်။

ပီတာက ဟင်းသီးဟင်းရွက် ခြင်းတစ်ဝက်ကို ညွှန်ပြပြီး ပြောလိုက်သည်။

"ဒီပစ္စည်းတွေကို ဓာတ်ခွဲခန်း ပို့လိုက်၊ ငါ အဖြေကို အမြန်ဆုံးလိုချင်တယ်"

ဟွမ်လင်းအုပ်စုကဲ့သို့ ကုမ္ပဏီကြီး တစ်ခုတွင် ကိုယ်ပိုင်သုတေသနဓာတ်ခွဲခန်းရှိသည်မှာ သေချာပေါက်ပင်။

"ဟုတ်ကဲ့ ဘော့စ်"

အမျိုးသမီး အတွင်းရေးမှူးကပြန်ဖြေပြီး ခြင်းတောင်းကိုဆွဲကာ ထွက်သွားသည်။

မနက်တစ်ပိုင်းကြာပြီးနောက် ဓာတ်ခွဲခန်းမှ အဖြေထွက်လာသည်။ ကုမ္ပဏီကြီးဆိုတော့ မြန်ဆန်သည်ဟု ဝန်ခံရပေမည်။

အမျိုးသမီး အတွင်းရေးမှူးသည် ဓာတ်ခွဲ အစီရင်ခံစာကို ကိုင်ဆောင်ကာ ပီတာထံ ရောက်လာပြီး ပြောလိုက်သည်။

"ဘော့စ် ဒါ ဓာတ်ခွဲခန်း အဖြေပါ"

ပီတာ အစီရင်ခံစာကို ယူကာ ဖွင့်ကြည့်လိုက်ရာ မျက်လုံးအိမ်များ ရုတ်တရက် ကျဉ်းမြောင်းသွားသည်။ ထို့နောက် သူက အတွင်းရေးမှူးကို မှာကြားလိုက်သည်။

"သွား... အောက်စ်ကို ငါ့ဆီခေါ်ခဲ့"

အောက်စ်သည် ဤဓာတ်ခွဲခန်း ရလဒ်အတွက် တာဝန်ရှိသူဖြစ်သည်။

အမျိုးသမီး အတွင်းရေးမှူး ထွက်သွားပြီးနောက် အောက်စ် ရောက်လာသည်။

ပီတာ မြင်သည်နှင့် အစီရင်ခံစာကို ကိုင်ကာ နေရာတစ်နေရာကို လက်ညှိုးထိုးပြပြီး စိတ်လောကြီးစွာ မေးလိုက်သည်။

"အောက်စ်... ဒီ တက်ကြွဒြပ်ပေါင်းက လူသားတွေရဲ့ကျန်းမာရေးအတွက် အကျိုးရှိတယ်ဆိုတာ ဘာအဓိကလဲ"

အောက်စ်ကမူ စိတ်လှုပ်ရှားစွာ ပြောလိုက်သည်။

"ဘော့စ် ခင်ဗျား ဒီဟင်းသီးဟင်းရွက်တွေကို ဘယ်ကရတာလဲ။ ကျွန်တော်တို့ ဟွမ်လင်းက အသစ်ထုတ်လိုက်တာလား။ ခင်ဗျား သိလား... ဒီ တက်ကြွဒြပ်ပေါင်းက ဒြပ်ပေါင်း အမျိုးအစားသစ်တစ်ခုပဲ။ အခုလောလောဆယ် ဘာလဲဆိုတာ ကျွန်တော် သုတေသနမလုပ်ရသေးပေမဲ့ သေချာတာတစ်ခုက ဒီတက်ကြွဒြပ်ပေါင်းတွေက လူသားတွေရဲ့ကျန်းမာရေးအတွက် အကျိုးရှိတယ်..."

အောက်စ်သည် ပညာရပ်ဆိုင်ရာ ဝေါဟာရများကို တရစပ် ပြောဆိုနေတော့သည်။

ပီတာကမူ နောက်ထပ် အတွေးနွံထဲကျရောက်သွားပြန်သည်။

***