ရန်သူ့စခန်းအတွင်းသို့ ထိုးဖောက်ဝင်ရောက်ခြင်း

ရှောင်လင်းယွီ၏ ယခင်အစီအစဉ်အရ Green Freshအုပ်စုကို ကမ္ဘာ့ဈေးကွက်သို့ ထိုးဖောက်ဝင်ရောက်စေရန် အချိန်အနည်းငယ် ယူရဦးမည်ဖြစ်သည်။

သို့သော် ယခုအခါ ဘရူးစ် ဝင်ရောက်လာပြီဖြစ်သဖြင့် ရှောင်လင်းယွီသည် အစီအစဉ်ကို အချိန်စော၍ အကောင်အထည်ဖော်ရန် ဆုံးဖြတ်လိုက်သည်။

မည်သို့ပင်ဖြစ်စေ မည်သို့ လုပ်ဆောင်မည်ဆိုသည်ကို အသေးစိတ်စီမံချက်နှင့် မဟာဗျူဟာရေးဆွဲရဦးမည်ဖြစ်သည်။

ကမ္ဘာ့ဈေးကွက်ကို ပစ်မှတ်ထားရာတွင် ရှောင်လင်းယွီသွားလိုသောလမ်းကြောင်းသည် အဆင့်မြင့် ဇိမ်ခံကုန်ပစ္စည်းဈေးကွက်ဖြစ်ပြီး အဓိကရောင်းချမည့် ဖောက်သည်များမှာ တော်ဝင်မိသားစုဝင်များနှင့် ထိပ်တန်းသူဌေးကြီးများဖြစ်သည်။

ဤသည်မှာ ဟွမ်လင်းအုပ်စု၏ကမ္ဘာ့ဈေးကွက်ကို ဗြောင်ကျကျလုယူမည့်သဘောပင်။

အကယ်၍ ဟွမ်လင်းအုပ်စု၏ CEO မိုက်ကယ်သာ သိသွားပါက ဒေါသထွက်လွန်း၍ သွေးအန်သွားမည်မှာ သေချာသည်။

ဪ... မဟုတ်သေးပါဘူး၊ ဦးဆုံး သူ ပြသလာမည့် သဘောထားမှာ အထင်အမြင်သေးခြင်း၊ စက်ဆုပ်ရွံရှာခြင်းနှင့် ဂရုမစိုက်ခြင်းတို့သာ ဖြစ်ပေလိမ့်မည်။ "ဟွန့်... ဟွာရှသား တစ်ယောက် ထုတ်လုပ်တဲ့ ဟွာရှကုန်ပစ္စည်းက ငါတို့လို နိုင်ငံတကာ နံပါတ်တစ် အမှတ်တံဆိပ်ရဲ့ ကမ္ဘာ့ဈေးကွက်ကို လာယှဉ်ပြိုင်ချင်တာလား၊ ဟာသပဲ" ဟု ဆိုပေလိမ့်မည်။

ကမ္ဘာတစ်ဝန်းရှိ လူများအတွက် ဟွာရှသားများသည် ကောင်းမွန်သော ပစ္စည်းများကို ထုတ်လုပ်နိုင်စွမ်း မရှိကြောင်း ဘယ်သူက မသိလို့လဲ။

သို့သော် သူတို့တွင် ဟွမ်လင်းအုပ်စုနှင့် ကမ္ဘာ့ဈေးကွက်ကိုယှဉ်ပြိုင်ရန် အရည်အချင်းရှိနေပါက ကောင်းစွာဖိနှိပ်ခံရရန် ပြင်ဆင်ထားရပေမည်။

မှန်ပါတယ်... လက်ရှိတွင်တော့ မိုက်ကယ် မသိသေးပေ။

ကမ္ဘာတစ်ဝန်းသို့ ကုန်ပစ္စည်းများ ရောင်းချမည်ဆိုပါက ဆိုင်ခန်းနေရာကောင်းများကို ရှာဖွေရပေမည်။

ဟွာရှကဲ့သို့ပင် ကြိုတင်မှာယူခြင်းနှင့် အိမ်အရောက်ပို့ဆောင်ပေးခြင်း ဝန်ဆောင်မှု ပေးမည်မဟုတ်ဘဲ လိုအပ်ပါက ဆိုင်သို့ လာရောက်ဝယ်ယူရမည်သာဖြစ်သည်။

ဘရူးစ်သည် စီမံကိန်းစာတမ်းကို ကိုင်ဆောင်ထားရင်း မျက်မှောင်ကြုတ်လျက် သံသယဖြင့်ပြောလိုက်သည်။

"ဥက္ကဌ... ကြိုတင်မှာယူခြင်းနဲ့ အိမ်အရောက်ပို့ဆောင်ပေးခြင်း ဝန်ဆောင်မှုမပေးဘူးဆိုတဲ့စည်းကမ်းချက်ကို တော်ဝင်မိသားစုတွေနဲ့ သူဌေးကြီးတွေက လက်ခံနိုင်ပါ့မလား"

စီးပွားရေး လုပ်သည်ဆိုရာတွင် အများအားဖြင့် ဝန်ဆောင်မှုကို ဦးစားပေးရသည် မဟုတ်လား။

ဖောက်သည်သည် ဘုရားသခင်ဖြစ်သည်။ ဤစကားသည် ဟွာရှတွင် စီးပွားရေးလုပ်ရန်သာ သင့်တော်သည် မဟုတ်ဘဲ ကမ္ဘာ့စီးပွားရေးတွင်လည်း အကျုံးဝင်သည်။

သို့သော် ကွာခြားချက်မှာ ဟွာရှတွင် ဝန်ဆောင်မှုပေးသော်လည်း ဧည့်သည်က ဝန်ဆောင်ခပေးလေ့မရှိပေ။ နိုင်ငံခြားတွင်မူ စားသောက်ဆိုင်တွင် ထမင်းတစ်နပ်စားလျှင်ပင် စားပွဲထိုးကို ဘောက်ဆူး ပေးရသည်။

သာမန်လူများပင်လျှင် သူတစ်ပါး၏ ယဉ်ကျေးပြီး လေးစားသမှုရှိသော ဝန်ဆောင်မှုကို လိုအပ်ကြရာ မျက်နှာကို အလွန်အလေးထားသော တော်ဝင်မိသားစုများနှင့် သူဌေးကြီးများဆိုလျှင် ပို၍ကောင်းမွန်သော ဝန်ဆောင်မှုကို လိုအပ်ပေလိမ့်မည်။

ယခု ရှောင်လင်းယွီက နိုင်ငံခြားတွင် စူပါမားကတ် ဖွင့်မည်ဖြစ်ပြီး စည်းကမ်းချက်များသည် ပြည်တွင်းမှ နည်းလမ်းအတိုင်းဖြစ်နေသဖြင့် ဘရူးစ် သဘောမတူနိုင်ဖြစ်နေသည်။

ရှောင်လင်းယွီက အလေးအနက်ထား ပြောလိုက်သည်။

"ကျွန်မရဲ့ဆိုင်ကို ဘယ်နေရာမှာပဲ ဖွင့်ဖွင့် အရောင်းအဝယ်စည်းကမ်းကတော့ တစ်ပြေးညီပဲ။ ကျွန်မတို့ နိုင်ငံခြားမှာသွားရောင်းမှာက အဆင့်မြင့် ဇိမ်ခံလမ်းကြောင်းဖြစ်ပြီး သာမန်လူတွေ ဝယ်နိုင်မှာ မဟုတ်ဘူး။ ဝယ်နိုင်တဲ့ လူတွေကတော့ ကိုယ့်လူကို လွှတ်ပြီး တန်းစီခိုင်းရမှာပဲ။ ဝယ်မဝယ် ဆိုတာကိုတော့ ကျွန်မတို့ စောင့်ကြည့်ကြတာပေါ့"

ဘရူးစ် အသက်ရှူရပ်သွားပြီးနောက် အသက်ပြင်းပြင်းရှူကာပြောလိုက်သည်။

"ဘော့စ်... ဘော့စ်ရဲ့ ကုန်ပစ္စည်းမို့လို့ ဘော့စ်သဘောအတိုင်းလုပ်တယ်ဆိုတာ ကျွန်တော် သိပါတယ်။ ဒါပေမဲ့ နိုင်ငံခြားမှာက ဝန်ဆောင်မှုသဘောထားကို အလေးထားကြတယ်။ ကျွန်တော့်ကို ယုံ၊ ကြိုတင်မှာယူခြင်းနဲ့ အိမ်အရောက် ပို့ဆောင်ပေးခြင်း ဝန်ဆောင်မှုမရှိဘူးဆိုတဲ့အချက်က နိုင်ငံခြားဈေးကွက်နဲ့ တကယ် မကိုက်ညီပါဘူး"

ရှောင်လင်းယွီ ကြားလိုက်ရသောအခါ လက်ကာပြပြီး ပြောလိုက်သည်။

"ဘရူးစ်... ရှင်ကသာ နားလည်ရမှာ။ နိုင်ငံခြားက လက်ခံသည်ဖြစ်စေ၊ လက်မခံသည်ဖြစ်စေ ကျွန်မ ဆိုင်အားလုံးရဲ့ စီးပွားရေး စည်းမျဉ်းတွေက တစ်ပြေးညီဖြစ်ရမယ်။ ပြည်တွင်းမှာ တစ်မျိုး၊ နိုင်ငံခြားမှာ တစ်မျိုး မလုပ်နိုင်ဘူး။ တကယ်လို့ နိုင်ငံခြားဈေးကွက်မှာ ကြိုတင်မှာယူခြင်းနဲ့ အိမ်အရောက်ပို့ဆောင်ပေးခြင်း ဝန်ဆောင်မှုပေးလိုက်မယ်ဆိုရင် ပြည်တွင်းက ဖောက်သည်တွေအတွက် မတရားရာကျလွန်းတယ်။ ဘာလို့ တူညီတဲ့ စီးပွားရေးကို နည်းလမ်းနှစ်မျိုးနဲ့ လုပ်ရမှာလဲ။ ဒါက ခွဲခြားဆက်ဆံရာ ရောက်နေတယ်။ ကျွန်မတို့ ပြည်တွင်းက ဖောက်သည်တွေက နိုင်ငံခြားက လူတွေအောက် နိမ့်ကျနေလို့လား"

ဤနေရာသို့ ရောက်သောအခါ ရှောင်လင်းယွီ ခဏရပ်လိုက်ပြီး ပြတ်သားစွာ ပြောလိုက်သည်။

"ဘရူးစ်... စိတ်ချပါ၊ ကျွန်မတို့ဆီမှာ ကြိုတင်မှာယူခြင်းနဲ့ အိမ်အရောက်ပို့ဆောင်ပေးခြင်း ဝန်ဆောင်မှု မရှိရင်တောင် ကျွန်မတို့ရဲ့ကုန်ပစ္စည်းကို ယုံကြည်ပါ။ ဘုရားသခင်တောင်မှ ကျွန်မတို့ ကုန်ပစ္စည်းကို ငြင်းဆန်နိုင်မှာ မဟုတ်ဘူးလို့ ကျွန်မ ယုံကြည်တယ်၊ ဟုတ်တယ်မလား"

ဘရူးစ် ခဏမျှတိတ်ဆိတ်သွားပြီးနောက် သဘောတူစွာ ခေါင်းညိတ်လိုက်သည်။

"အင်း... ဥက္ကဌရှောင်ပြောတာ မှန်ပါတယ်"

သူသည် ဟွမ်လင်းအုပ်စု၏ အဆင့်မြင့်စီမံခန့်ခွဲသူတစ်ဦးဖြစ်ခဲ့ဖူးသဖြင့် နိုင်ငံခြားဖောက်သည်များနှင့် ပြည်တွင်းဖောက်သည်များအကြား ကွာခြားချက်အချို့ရှိသည်ကို ကောင်းစွာသိသည်။ အကြီးမားဆုံး ကွာခြားချက်မှာ နိုင်ငံခြား ဖောက်သည်များသည် သိသိသာသာ ပို၍မောက်မာကြခြင်းပင်။

သို့သော် ရှောင်လင်းယွီ ပြောသကဲ့သို့ မည်သည့် ဖောက်သည်မဆို Green Freshအုပ်စုမှ ထုတ်လုပ်သော ကုန်ပစ္စည်းများကို ငြင်းဆန်နိုင်မည် မဟုတ်ပေ။

အဘယ်ကြောင့်ဆိုသော် Green Freshအုပ်စုမှ ထုတ်လုပ်သော ကုန်ပစ္စည်းများသည် လှပပြီး အရသာရှိသည်သာမက အကြီးမားဆုံး အာနိသင်တစ်ခုလည်း ရှိနေသောကြောင့်ပင်။ ထိုအရာမှာ လူ့ခန္ဓာကိုယ်အတွက် အလွန်အကျိုးရှိခြင်းဖြစ်သည်။

ကျန်းမာသူများ များများစားလျှင် ခန္ဓာကိုယ်ကြံ့ခိုင်စေသည်။ လူနာများ စားလျှင် ရောဂါဝေဒနာ သက်သာပျောက်ကင်းစေသည်။

မည်သူမဆို 'ကျန်းမာရေး' ကို ငြင်းဆန်နိုင်မည် မဟုတ်ဟု ယုံကြည်သည်။

ဘရူးစ် လိုက်လျောစွာ ပြောလိုက်ရတော့သည်။

"ကောင်းပါပြီ... မူလ စည်းကမ်းအတိုင်းပဲ ရောင်းကြတာပေါ့"

ရှောင်လင်းယွီ ပြုံးလျက် "ဘရူးစ်... ကျွန်မကို ယုံပါ၊ မကြာခင်မှာ ကျွန်မတို့ဆိုင်ရဲ့ရောင်းအားက ပြည်တွင်းရောင်းအားလိုပဲ ဟုန်းဟုန်းတောက် ဖြစ်လာလိမ့်မယ်"

ဘရူးစ် တိတ်ဆိတ်စွာ ခေါင်းညိတ်လိုက်သည်။

ရှောင်လင်းယွီသည် ဘရူးစ်၏ပခုံးကိုပုတ်ကာ ပြောလိုက်သည်။

"ဘရူးစ်... ဆိုင်ခန်း ရှာဖွေတဲ့ ကိစ္စကတော့ ရှင့်အပေါ် မူတည်နေပြီ"

သို့သော် ပြောရင်းနှင့် သူမ ခဏရပ်လိုက်ပြီး မျက်လုံးများလည်သွားကာပြောလိုက်သည်။

"ကျွန်မ အမြင်အရတော့ ကျွန်မတို့ရဲ့ဆိုင်ခန်းနေရာက ဟွမ်လင်းအုပ်စုရဲ့ မျက်နှာချင်းဆိုင်မှာ ဖြစ်တာ အကောင်းဆုံးပဲ။ ဘာပဲပြောပြော ဟွမ်လင်းအုပ်စုက ဒီနယ်ပယ်မှာ နိုင်ငံတကာ အဆင့်အရ ထိပ်သီး ခေါင်းဆောင်လေ။ ကျွန်မတို့ဆိုင်ကို သူတို့ မျက်နှာချင်းဆိုင်မှာဖွင့်လိုက်ရင် လူတွေကို ဆွဲဆောင်နိုင်မယ်မဟုတ်လား"

ဘရူးစ် ကြားလိုက်ရသောအခါ တိတ်ဆိတ်သွားပြန်သည်။

တကယ်တမ်းတွင် အဆင့်မြင့်ဇိမ်ခံဈေးကွက်သည် လူစည်ကားရန် မလိုအပ်ပေ။

ခင်ဗျားက ဟွမ်လင်းအုပ်စုနဲ့ ထိပ်တိုက်တွေ့ချင်နေတာ မဟုတ်လား။

ဘရူးစ် ပြန်ဖြေလိုက်ရတော့သည်။

"ကောင်းပါပြီ... ကျွန်တော် ကြိုးစားပါ့မယ်"

ဟွမ်လင်းအုပ်စု၏ ဝန်ထမ်းဟောင်းတစ်ဦးအနေဖြင့် ယခု ဟွမ်လင်းအုပ်စု၏အုတ်မြစ်ကို တူးဖြိုရတော့မည်ဖြစ်ရာ နယ်ပယ်ထဲမှလူများက သူ့ကို မည်သို့ ဝေဖန်ကြမည်ကို သူ စဉ်းစားကြည့်နိုင်သည်။

ကျေးဇူးကန်းသူ၊ သစ္စာဖောက် စသည်ဖြင့် ပြောဆိုကြမည်မှာ သေချာသည်။

သို့သော် စီးပွားရေးလောကသည် စစ်မြေပြင်ဖြစ်ရာ ကိုယ်ဘယ်ဘက်မှာရှိနေလဲ၊ ရှိနေတဲ့ဘက်အတွက် အကောင်းဆုံးစီမံပေးရမည်ဖြစ်ပြီး အတူတကွ ရင်ဆိုင်ရမည်ဖြစ်သည်။

သူသည် ဟွမ်လင်းအုပ်စုအပေါ် သစ္စာမဖောက်ခဲ့ပေ။ ဆန့်ကျင်ဘက်အနေဖြင့် ဟွမ်လင်းအုပ်စုကသာ သူ့အပေါ် ရက်စက်ခဲ့ခြင်းဖြစ်သည်။

စွမ်းဆောင်ရည် မကောင်းဟုဆိုကာ ဘာမှမပြောဘဲ သူ့ကို အလုပ်ထုတ်ပစ်ခဲ့ပြီးနောက် နယ်ပယ်ထဲတွင် အလုပ်ရှာမရအောင်၊ ရပ်တည်မရအောင် ပိတ်ပင်ခဲ့သည်။

ယခု သူသည် Green Freshအုပ်စုသို့ ရောက်ရှိလာပြီး သူမက သူ့ကို အခွင့်အရေး ပေးထားရာ သူ ကောင်းစွာ တန်ဖိုးထားရပေမည်။

ထို့နောက် ဘရူးစ်နှင့် ရှောင်လင်းယွီတို့သည် ကမ္ဘာ့ဈေးကွက်သို့ ဝင်ရောက်ရေး ကဏ္ဍစုံနှင့် ပတ်သက်၍ အလေးအနက်ဆွေးနွေးကြလေသည်။

.....

"ဘော့စ်... မကောင်းတော့ဘူး"

လက်အောက်ငယ်သားသည် သတင်းတစ်ခုရရှိသည်နှင့် ပီတာထံ ချက်ချင်း အစီရင်ခံသည်။

ပီတာသည် ဟွာရှသို့ရောက်ရှိလာချိန်မှစ၍ ခေါင်းခဲစရာကိစ္စများနှင့် အလုပ်ရှုပ်နေခဲ့သည်။

ပီတာသည် စာရွက်စာတမ်းများ ဖတ်ရှုနေရင်း ခေါင်းမော့လာပြီး အေးစက်စွာ မေးလိုက်သည်။

"ငါ ကောင်းပါတယ်၊ ကျေးဇူးပဲ"

လက်အောက်ငယ်သားက ချက်ချင်း ပြောလိုက်သည်။

"မဟုတ်ပါဘူး ဘော့စ်... စောစောက ကျွန်တော် သတင်းတစ်ခု ကြားလိုက်ရတယ်။ ဘရူးစ်က Green Freshအုပ်စုကို ရောက်သွားပြီတဲ့"

ပီတာ စာဖတ်နေသော လက် ရပ်တန့်သွားပြီး သံသယဖြင့် မေးလိုက်သည်။

"မင်း ဘယ်သူ Green Freshအုပ်စုကို ရောက်သွားတယ် ပြောလိုက်တာ"

ဝေါလ်တာသည် ခေါင်းကို ကုတ်လျက် စိတ်လှုပ်ရှားစွာ ပြောလိုက်သည်။

"ဘရူးစ်လေ၊ ဘော့စ် မလာခင်က ဟွာရှရုံးခွဲဥက္ကဌ လုပ်ခဲ့တဲ့လူ။ လွန်ခဲ့တဲ့ ရက်ပိုင်းက မစ္စတာမိုက်ကယ် အလုပ်ထုတ်လိုက်ပြီး ပိတ်ပင်မိန့်ထုတ်ထားတဲ့လူ"

မစ္စတာမိုက်ကယ် ပိတ်ပင်ထားသော ဘရူးစ်သည် ဟွာရှ Green Freshအုပ်စုသို့ တန်းရောက်သွားလိမ့်မည်ဟု ဝေါလ်တာ ထင်မထားခဲ့ချေ။

ဤရက်ပိုင်းအတွင်း ပီတာသည် Green Freshအုပ်စု ဆိုသော အမည်ကို ကြားဖူးနားဝရှိနေပြီဖြစ်သည်။ ထိုအုပ်စုသည် ထောင်ယွမ်ရွာ Green Freshသစ်သီးနှင့် ဟင်းသီးဟင်းရွက် စူပါမားကတ်၏ မိခင်ကုမ္ပဏီဖြစ်သည်။ လက်အောက်တွင် စူပါမားကတ် ရာပေါင်းများစွာအပြင် ခရီးသွား အပန်းဖြေစခန်း အများအပြားလည်းရှိပြီး ထိုအပန်းဖြေစခန်းများ၏ ဧည့်သည်ဝင်ရောက်မှုနှုန်းသည်လည်း အံ့သြဖွယ်ကောင်းလောက်အောင် များပြားသည်။ တနည်းအားဖြင့်ပြောရလျှင် စီးပွားရေး အလွန်ကောင်းမွန်နေခြင်းဖြစ်သည်။

လုပ်ဖော်ကိုင်ဖက်ဟောင်းတစ်ဦးအနေဖြင့် ပီတာသည် ဘရူးစ်ကို ကောင်းစွာရင်းနှီးသည်။

သို့သော် ဘရူးစ် Green Freshအုပ်စုသို့ ဝင်ရောက်သွားလိမ့်မည်ဟု သူ လုံးဝ ထင်မှတ်မထားခဲ့ချေ။

ပီတာ မျက်မှောင်ကြုတ်လျက် မျက်နှာမကောင်းစွာ ပြောလိုက်သည်။

"သူက Green Freshအုပ်စုမှာ အလုပ်သွားလုပ်တယ် ဟုတ်လား။ သူ ရုံးချုပ်က အထုတ်ခံရတာ Green Freshအုပ်စုက ဟွမ်လင်းရဲ့ စီးပွားရေးကို လုယူသွားလို့ဆိုတာ သူ မမှတ်မိတော့ဘူးလား။ အခု ရန်သူ့စခန်းကို သွားပူးပေါင်းတယ်ဆိုတော့ သူ ဘာလုပ်ချင်တာလဲ။ ဟွမ်လင်းအုပ်စုကို သစ္စာဖောက်ချင်တာလား"

ဝေါလ်တာက ဘေးမှနေ၍ သတိထား ပြောကြားလိုက်သည်။

"ဒါပေမဲ့ ဘော့စ်၊ ဘရူးစ်က ရုံးချုပ်က အထုတ်ခံလိုက်ရပြီလေ။ သူ ပြိုင်ဘက်ကုမ္ပဏီကိုသွားတာ တကယ်တော့ ပုံမှန်ပါပဲ"

ဒါ သစ္စာဖောက်တာ မဟုတ်ဘူးလေ။

ခင်ဗျားတို့က လူကို အလုပ်ထုတ်ပစ်တယ်၊ ပြီးတော့ ပိတ်ပင်ထားသေးတယ်။ လူကို မိသားစု စားဝတ်နေရေးအတွက် အလုပ်ရှာခွင့် မပေးတော့ဘူးလား။

ပီတာက မျက်နှာမည်းမှောင်လျက် ပြောလိုက်သည်။

"ဟွန့်... သူ ပြိုင်ဘက် ကုမ္ပဏီကို သွားတာက ဟွမ်လင်းအုပ်စုကို သစ္စာဖောက်တာပဲ။ သူ ဒီနယ်ပယ်မှာ အလုပ်လုပ်လို့မရရင် တခြားနယ်ပယ်ပြောင်းလုပ်လို့ မရဘူးလား"

ဝေါလ်တာ "..."

ဘော့စ်ရယ်... ခင်ဗျားက သူများကို ဘယ်နယ်ပယ် ပြောင်းလုပ်စေချင်တာလဲ။ ဒါ လူကို အကြပ်ရိုက်အောင်လုပ်နေတာ မဟုတ်ဘူးလား။

ဝေါလ်တာ စဉ်းစားပြီးနောက် အကြံပြုလိုက်သည်။

"ဘော့စ် ကျွန်တော်တို့ အခု ရန်သူ့စခန်းအတွင်းကို ထိုးဖောက်ဝင်ရောက်ဖို့ လိုနေတာ မဟုတ်လား။ ကျွန်တော့်အမြင်တော့ ဘရူးစ်က အသင့်တော်ဆုံးပဲထင်တယ်"

"ဪ... ဘယ်လို ပြောတာလဲ"

ပီတာ သံသယဖြင့် မေးလိုက်သည်။

ဝေါလ်တာက ပြောသည်။

"ဘော့စ် စဉ်းစားကြည့်လေ၊ ဘရူးစ် အခု Green Freshအုပ်စုမှာ အလုပ်လုပ်ခွင့် ရတယ်ဆိုတာ သူတို့အုပ်စုရဲ့အင်တာဗျူးကို အောင်မြင်ပြီးလို့ပဲဖြစ်ရမယ်။ တကယ်လို့ ကျွန်တော်တို့ အခုဘရူးစ်ကိုရှာပြီး အကျိုးအမြတ်တချို့ ပေးမယ်ဆိုရင်..."

ပီတာ မျက်လုံးများ အရောင်တောက်လာပြီး စိတ်လှုပ်ရှားစွာ ပြောလိုက်သည်။

"ကောင်းပြီ... ဒီကိစ္စ မင်းကို တာဝန်ပေးမယ်၊ ဘရူးစ်နဲ့ အမြန်ဆုံး ဆက်သွယ်လိုက်"

"ဟုတ်ကဲ့ ဘော့စ်"

***