ငြင်းပယ်ခြင်း

ရှောင်လင်းယွီနှင့် ဘရူးစ်သည် အစီအစဉ်များကို အတည်ပြုပြီးနောက် စီမံကိန်းရေးဆွဲသူများကို ခေါ်ယူကာ အသေးစိတ်ရေးဆွဲစေပြီး အရှိန်အဟုန်ဖြင့် စတင်အကောင်အထည်ဖော်ကြလေသည်။

ပြည်တွင်းဈေးကွက်သည် အခြေခံအားဖြင့် တည်ငြိမ်နေပြီဖြစ်သဖြင့် အထွေထွေတာဝန်ခံဖြစ်သော ကျန့်ယောင်ကျူသည် ရှောင်လင်းယွီ ခွင့်ပြုလိုက်သော နှစ်လတာ ခွင့်ရက်အတွင်း အိမ်တွင် ဇနီးသည်ကို ပြုစုစောင့်ရှောက်ရင်း စိတ်အေးချမ်းသာစွာ နေထိုင်လေသည်။

ရှောင်ရှင်းရှင်း၏ ကိုယ်ဝန်ဆောင်လက္ခဏာများသည် အလွန်ပြင်းထန်သော်လည်း အချိန်ကြာလာ၍ အသားကျသွားသည်လား၊ ခင်ပွန်းသည် ဘေးတွင်ရှိနေ၍ စိတ်ချမ်းသာသွားသည်လား မသိရသော်လည်း သိသိသာသာ သက်သာလာခဲ့သည်။ အစားအသောက် အနည်းငယ် စားနိုင်လာသကဲ့သို့ ပျို့အန်ခြင်း လက္ခဏာများလည်း သိသိသာသာ လျော့နည်းသွားသည်။

ရှောင်လင်းယွီက ကမ္ဘာ့ဈေးကွက်သို့ ထိုးဖောက်ဝင်ရောက်ရန် ပြင်ဆင်နေကြောင်း ကြားသိလိုက်ရသောအခါ ရှောင်ရှင်းရှင်း၏ ပထမဆုံးတုံ့ပြန်မှုမှာ ခင်ပွန်းဖြစ်သူကျန့်ယောင်ကျူအား ခွင့်ရက်များ ဖျက်သိမ်းပြီး ကုမ္ပဏီသို့ ချက်ချင်းပြန်သွားကာ ရှောင်လင်းယွီကိုကူညီရန် တိုက်တွန်းခြင်း ဖြစ်သည်။

ရှောင်လင်းယွီက ရယ်မောရင်း ပြောလိုက်သည်။

"ရှင်းရှင်း... ငါက ယောင်ကျူကို ခွင့်နှစ်လ ပေးထားတာလေ။ သူ့ခွင့်ရက် ကုန်အောင်တော့ ပေးနေလိုက်ပါဦး။ သူက မင်း ကိုယ်ဝန်ဆောင်နေတာပင်ပန်းလို့ အဖော်လုပ်ပေးဖို့သက်သက်ပြန်လာတာလေ"

ရှောင်ရှင်းရှင်းက ခေါင်းခါလိုက်ပြီး ပြောသည်။

"အစ်မ... အိမ်မှာ အဖေနဲ့အမေ ရှိတယ်။ ပြီးတော့ အဘိုးတို့လည်း ရှိသေးတယ်။ အိမ်အကူတွေလည်း ရှိနေတာပဲ။ သူ တစ်နေ့ကုန် ကျွန်မဘေးမှာ နေစရာမလိုပါဘူး"

ပါးစပ်ကသာ ထိုသို့ပြောနေသော်လည်း လေသံတွင်မူ တွန့်ဆုတ်နေသည့် အရိပ်အယောင်များ ပါဝင်နေသည်။

နှစ်ဦးသား ချစ်သူများဖြစ်လာပြီးနောက် ဆက်ဆံရေး အလွန်ကောင်းမွန်ခဲ့ကြသည်။ ရံဖန်ရံခါ ရှောင်ရှင်းရှင်း စိတ်ကောက်တတ်သော်လည်း ကျန့်ယောင်ကျူက သူမ စိတ်ပျော်သည်အထိ အလိုလိုက်ကာ ချော့မော့လေ့ရှိသည်။

မှန်ပါသည်... အမျိုးသားများ၏နားလည်မှုအရ ဤသည်မှာ ကိုယ့်မိန်းမ ကိုယ့်ရှေ့တွင် ချွဲနွဲ့ခြင်းသာဖြစ်သဖြင့် သေချာပေါက်အလိုလိုက်ကာ ချစ်ပေးရပေမည်။

ရှောင်ရှင်းရှင်းသည် အရွယ်ရောက်ပြီးသူများ တက္ကသိုလ်တက်ပြီးနောက် ဗဟုသုတများ ပိုမိုကျယ်ပြန့်လာခဲ့ပြီး စိတ်နေသဘောထားမှာလည်း ယခင်ကကဲ့သို့ အားငယ်တတ်သူ မဟုတ်တော့ဘဲ ပွင့်လင်းလန်းဆန်းကာ ကိုယ်ပိုင်ဆုံးဖြတ်ချက်ရှိသူ ဖြစ်လာသည်။

တက္ကသိုလ် ဘွဲ့ရပြီးနောက် Green Freshအုပ်စု၏ ပြည်သူ့ဆက်ဆံရေးဌာနသို့ တိုက်ရိုက် ဝင်ရောက် လုပ်ကိုင်ခဲ့ပြီး Green Freshအုပ်စုနှင့် ပတ်သက်သော သတင်းများကို ကောင်းမွန်စွာ ကိုင်တွယ် ဖြေရှင်းနိုင်ခဲ့သည်။

ဇနီးမောင်နှံနှစ်ဦးစလုံး Green Freshအုပ်စုတွင် အလုပ်လုပ်ကြသော်လည်း အလုပ်သဘောသဘာဝမတူညီသောကြောင့် တွေ့ရသည့်အချိန်ထက် ခွဲရသည့်အချိန်က ပိုများသည်။

အဓိကအကြောင်းရင်းမှာ ကျန့်ယောင်ကျူသည် လုပ်ငန်းစု၏ ဈေးကွက်စီးပွားရေးအပိုင်းကို တာဝန်ယူထားသဖြင့် ဒေသအနှံ့အပြားသို့ သွားလာနေရသောကြောင့်ဖြစ်သည်။

ကံကောင်းသည်မှာ ယခုအခါ လမ်းပန်းဆက်သွယ်ရေးကောင်းမွန်လာပြီး ရှောင်ရှင်းရှင်းသည်လည်း ရုံးချုပ်တွင်သာ အဓိကအလုပ်လုပ်နေသည်။ သူမ၏ယောက္ခမများသည်လည်း ထောင်ယွမ်ရွာသို့ ပြောင်းရွှေ့နေထိုင်လာကြသဖြင့် ကျန့်ယောင်ကျူပြန်ရောက်သည်နှင့် မိသားစုနှစ်စု စုံညီစွာ တွေ့ဆုံနိုင်ကြသည်။

ကိုယ်ဝန်ရှိလာပြီးနောက် ရှောင်ရှင်းရှင်းသည် ဆက်လက် အလုပ်လုပ်ရန် ဆန္ဒရှိခဲ့သော်လည်း ခန္ဓာကိုယ် အခြေအနေမပေးဘဲ ကိုယ်ဝန်ဆောင်လက္ခဏာများ ပြင်းထန်လွန်းသဖြင့် အလုပ်ဆက်လုပ်ပါက အလုပ်တွင် နှောင့်နှေးမှုများဖြစ်ပေါ်လာနိုင်သည်။

ထို့ကြောင့် ရှောင်ရှင်းရှင်း မတတ်သာဘဲ ခွင့်ယူလိုက်ပြီး ကိုယ်စားလှယ်နှင့် လုပ်ငန်းလွှဲပြောင်းကာ အိမ်တွင် အေးဆေးစွာကိုယ်ဝန်ဆောင်နေရသည်။

အလုပ်နှင့်လုပ်ငန်းသည် အရေးကြီးသော်လည်း ကလေးက ပို၍ အရေးကြီးသည်။ ဤသည်မှာ သူမနှင့် ခင်ပွန်း ကျန့်ယောင်ကျူတို့၏ ချစ်ခြင်းမေတ္တာ သက်သေဖြစ်သည်။ ထို့အပြင် လက်ရှိတွင် သူမတို့ အိမ်သည် ပိုက်ဆံ လုံးဝမရှားပါးပေ။ လစာကို မပြောနှင့်ဦး၊ နှစ်ဦးပေါင်း လစာသည် တစ်လလျှင် ယွမ် နှစ်သိန်း၊ သုံးသိန်းခန့် ရှိပြီး ကုမ္ပဏီမှ နှစ်စဉ် အမြတ်ဝေစုသည်ပင် ယွမ်ဆယ်သန်းကျော်ရှိလေသည်။

သို့သော် ရှောင်ရှင်းရှင်းအတွက်မူ သူမ အလုပ်နား၍ရသော်လည်း ကျန့်ယောင်ကျူကမူ မရနိုင်ပေ။

သူသည် ရှောင်လင်းယွီနှင့် စတင်လက်တွဲချိန်မှစ၍ ရှောင်လင်းယွီ၏လက်ရုံးဖြစ်လာခဲ့ပြီး ကုမ္ပဏီ၏ကိစ္စရပ်အများအပြားသည် သူ့မပါလျှင် မဖြစ်ပေ။

သူ အလုပ်မဆင်းပါက ကိစ္စရပ်အများအပြားသည် ရှောင်လင်းယွီ ခေါင်းပေါ်သို့ တိုက်ရိုက်ရောက်ရှိလာသည်။

ယခု ရှောင်လင်းယွီက ကမ္ဘာ့ဈေးကွက်သို့ ဝင်ရောက်တော့မည်ဟု ကြားသိလိုက်ရသောအခါ ရှောင်ရှင်းရှင်းသည် တုံ့ဆိုင်းမနေဘဲ သူမ၏ ချစ်လှစွာသောခင်ပွန်းသည်ကို အလုပ်သွားခိုင်းလိုက်သည်။

......

"ဟော... ဖခင်လောင်းကြီး ဘယ်လို ရောက်လာတာလဲ"

ရှောင်လင်းယွီ ရုံးခန်းထဲတွင် စာရွက်စာတမ်းများ ကြည့်ရှုနေစဉ် ကျန့်ယောင်ကျူ ရောက်လာသည်ကို မြင်လိုက်ရသဖြင့် ရယ်မောရင်း စနောက်လိုက်သည်။

"မိခင်လောင်းလေးကို အဖော်မလုပ်ပေးတော့ဘူးလား။ ဒါပေမဲ့ကြည့်ရတာ ရှင် ခဏလောက် အနားယူလိုက်တော့ မျက်နှာက ပိုကြည်လင်လာပြီး သွေးရောင်လွှမ်းနေပါလား"

ကျန့်ယောင်ကျူက အားနာစွာ ပြုံးရင်း ပြောလိုက်သည်။

"ဥက္ကဌရှောင်... ကျွန်တော် ခွင့်ရက် လာဖျက်တာပါ"

ရှောင်လင်းယွီ အနည်းငယ် အံ့သြသွားပြီးနောက် ပြုံးလျက် ပြောလိုက်သည်။

"ခွင့်ရက်ဖျက်တာ ဟုတ်လား။ ဒုဥက္ကဌကျန့်... ကျွန်မ နားကြားမှားတာတော့ မဟုတ်ပါဘူးနော်။ ရှင် မနည်းရထားတဲ့ နှစ်လတာခွင့်ရက်ကို အခုလာဖျက်တာလား"

ကျန့်ယောင်ကျူ ပခုံးတွန့်လိုက်ပြီး အားနာစွာ ပြုံးလျက် ပြောလိုက်သည်။

"ဥက္ကဌ နားကြားမမှားပါဘူး။ ကျွန်တော် ခွင့်ရက်လာဖျက်တာပါ၊ အခုတော့ ဥက္ကဌကြီး ပျော်ပြီမလား"

"ဟဟ..." ရှောင်လင်းယွီ ရယ်မောလိုက်သည်။ "ရှင် ပြန်လာနိုင်တာ ကျွန်မ သေချာပေါက် ဝမ်းသာတာပေါ့။ ဒါပေမဲ့ ရှင်..."

ရှောင်လင်းယွီ မေးငေါ့ပြလိုက်သည်။ ဘာကြောင့် ပြန်လာတာလဲဟု မေးလိုက်ခြင်းဖြစ်သည်။

ကျန့်ယောင်ကျူက ညည်းညူလိုက်သည်။

"ခင်ဗျားကြောင့်လေ။ အရင်တုန်းက Green Freshအုပ်စု ကမ္ဘာ့ဈေးကွက် ဝင်ဖို့ အချိန်လိုသေးတယ်လို့ ပြောခဲ့တယ် မဟုတ်လား။ အခု ကျွန်တော် ခွင့်ယူတာ ရက်ပိုင်းပဲရှိသေးတယ်၊ ခင်ဗျားက ကမ္ဘာ့ဈေးကွက်ဝင်ဖို့ စီစဉ်နေပြီ။ ရှင်းရှင်းကကြားတော့ ခင်ဗျားတစ်ယောက်တည်း အလုပ်ရှုပ်နေမှာ စိုးရိမ်ပြီး ကျွန်တော့်ကို အတင်းပြန်လွှတ်လိုက်တာ"

ရှောင်လင်းယွီ ကြားလိုက်ရသောအခါ လက်နှစ်ဖက်ဖြန့်လိုက်ပြီး အားမနာတမ်း ရယ်မောကာ ပြောလိုက်သည်။

"ဟားဟား... ဒီလိုဆိုရင်တော့ ကျွန်မက ရှင်းရှင်းကို ကျေးဇူးတင်ရမှာပေါ့။ မဟုတ်ရင် ကျွန်မ ကိုယ်တိုင်ခွင့်ပေးထားပြီးမှ ကျွန်မကိုယ်တိုင်ပြန်ခေါ်ရမှာ အားနာစရာကြီး"

ကျန့်ယောင်ကျူ "..."

သူများဒုက္ခ ရောက်တာကို ပျော်နေတဲ့ ပုံစံကြီးက ဘာသဘောလဲ။

သူ ခွင့်ရက်ဖျက်ပြီး ပြန်လာတာ ဘယ်သူ့အတွက်လဲ။ သူမ တစ်ယောက်တည်း အလုပ်မနိုင်မှာ စိုးလို့ မဟုတ်ဘူးလား။ ဪ... မဟုတ်သေးဘူး၊ အခုဆို နှစ်ယောက် ဖြစ်သွားပြီ၊ ဟို ဘရူးစ် ဆိုတဲ့လူလည်း ရှိသေးတယ်။

ကျန့်ယောင်ကျူ ပခုံးတွန့်လိုက်ပြီး နောက်ပြောင် ပြောဆိုလိုက်သည်။

"ဟ... ခင်ဗျား ခွင့်ရက် ဖျက်ပေးဖို့ ဆန္ဒမရှိမှတော့ ကျွန်တော် ဆက်ပြီး ခွင့်ယူလိုက်ပါတော့မယ်"

ပြောပြောဆိုဆိုနှင့် သူ လှည့်ထွက်ရန် ပြင်လိုက်သည်။

"အာ... နေပါဦး"

ရှောင်လင်းယွီ ချက်ချင်း လှမ်းခေါ်လိုက်သည်။

"ပြန်လာမှတော့ ဘယ်လွယ်လွယ်နဲ့ ပြန်သွားလို့ရမလဲ"

ကျန့်ယောင်ကျူ ပြန်လှည့်လာပြီး ပြုံးလျက် ပြောလိုက်သည်။

"ဒီလို ဖြစ်မယ်ဆိုတာ သိပြီးသားပါ"

ဇနီးသည်ကို ထားခဲ့ရန် ဝန်လေးသော်လည်း ကျန့်ယောင်ကျူ ကောင်းကောင်းနားလည်သည်။ Green Freshအုပ်စု ကမ္ဘာ့ဈေးကွက်သို့ ဝင်ရောက်ခြင်းသည် ကိစ္စကြီးတစ်ရပ်ဖြစ်ရာ ရှောင်လင်းယွီ တစ်ယောက်တည်း လုပ်ဆောင်ပါက မည်မျှ အလုပ်ရှုပ်မည်ကို မတွေးရဲပေ။ ထို့ကြောင့် ဦးစွာ ပြန်လာပြီး ကူညီပေးခြင်းက ပိုကောင်းသည်။ လုပ်ငန်းများ လမ်းကြောင်းမှန်ပေါ်ရောက်သွားပါက အချိန်ရလာဦးမည်ဖြစ်သည်။

သူသည် ဈေးကွက်စီးပွားရေးအပိုင်းကို အဓိကတာဝန်ယူထားသော်လည်း ရှောင်လင်းယွီက နိုင်ငံခြား ဈေးကွက်အတွက် အခြားလူတစ်ဦးငှားရမ်းဖွယ်ရှိကြောင်း ပြောခဲ့ဖူးသည်။ အဘယ်ကြောင့်ဆိုသော် သူသည် နိုင်ငံခြားဈေးကွက်လုပ်ငန်းများနှင့် မကိုက်ညီသောကြောင့်ဖြစ်သည်။

ဤအချက်နှင့်ပတ်သက်၍ ရှောင်လင်းယွီ၏စီစဉ်မှုကို သူ အနည်းငယ်မျှ မကျေနပ်ချက် မရှိပေ။ ကိုယ့်အရည်အချင်း မည်မျှရှိသည်ကို သူ ကောင်းစွာ သိရှိသည်။

နိုင်ငံခြားဈေးကွက်အတွက် သူသည် နောက်ခံလည်း မရှိ၊ အဆက်အသွယ်လည်း မရှိပေ။ ထိုးဖောက်ဝင်ရောက်ရန်မှာ မလွယ်ကူလှပေ။

ယခုတွင် အရည်အချင်းပြည့်မီသောသူတစ်ဦးကို ရှာဖွေတွေ့ရှိထားပြီဖြစ်ရာ သူက ဘေးမှနေ၍ ကူညီပေးရုံသာဖြစ်သည်။

နှစ်ဦးသား ခဏတာ စနောက်ပြီးနောက် အလုပ်ကိစ္စများ စတင်ပြောဆိုကြသည်။ ရှောင်လင်းယွီသည် ဘရူးစ်ကိုလည်း ခေါ်လိုက်သည်။

နှစ်ယောက်သား မိတ်ဆက်ပေးပြီးနောက် သုံးဦးသား ကမ္ဘာ့ဈေးကွက်သို့ ဝင်ရောက်ရေး ကိစ္စရပ်များကို ဆွေးနွေးကြသည်။

ဘရူးစ်နှင့် ကျန့်ယောင်ကျူတို့၏ အကြံဉာဏ်များနှင့် တင်ပြချက်များသည် တစ်ဦးနှင့်တစ်ဦး အပြန်အလှန်ဖြည့်ဆည်းပေးနိုင်ကြောင်း ရှောင်လင်းယွီ တွေ့ရှိလိုက်ရသည်။

ဘရူးစ်နှင့် ကျန့်ယောင်ကျူတို့သည် ပြောလေစိတ်လှုပ်ရှားလေဖြစ်လာပြီး တစ်ခါတစ်ရံ စိတ်လှုပ်ရှားလွန်း၍ ခုန်ပေါက်နေကြသလို တစ်ခါတစ်ရံတွင်မူ မျက်နှာနီရဲသည်အထိ အငြင်းပွားနေကြသည်။

ဘေးဖယ်ထားခြင်းခံရသော ရှောင်လင်းယွီ "..."

ကြည့်ရတာ ဆွေးနွေးလို့ ကောင်းနေကြပုံပဲ။

ခဏအကြာတွင် ရှောင်လင်းယွီ မတ်တတ်ရပ်ကာ ပြောလိုက်သည်။

"ကဲ... ရှင်တို့ ဖြည်းဖြည်းချင်း ဆွေးနွေးကြ၊ ရလဒ်ထွက်လာမှ ကျွန်မကို လာပြောပြ။ ကျွန်မ ဖိုင်တချို့ သွားစစ်လိုက်ဦးမယ်"

သို့သော် နှစ်ယောက်သား ခေါင်းမမော့လာကြဘဲ သူမကို ဂရုပင် မစိုက်ကြချေ။

ရှောင်လင်းယွီ "..." ကောင်းပြီလေ... ငါ့ကို မရှိဘူးလို့ပဲ သဘောထားလိုက်ကြပါတော့။

ထို့နောက် ရှောင်လင်းယွီသည် ရုံးခန်းစားပွဲတွင်ထိုင်ကာ စားပွဲပေါ်ရှိ ဖိုင်များကို အမြန် စစ်ဆေးလိုက်သည်။

ကမ္ဘာ့ဈေးကွက်သို့ ဝင်ရောက်သည်နှင့် လုပ်ဆောင်စရာကိစ္စများမှာ ပိုမိုများပြားလာပြီး ပိုအလုပ်ရှုပ်လာတော့သည်။

...

ပီတာသည် ရုံးခန်းထဲတွင် လက်အောက်ငယ်သားကို ဒေါသတကြီး အော်ဟစ်နေသည်။

"မင်း ဘရူးစ်ကို သွားရှာတာ မဟုတ်ဘူးလား။ ဘာလို့ ဒီလောက်ရက်ကြာတာတောင် ဘာသံမှ မကြားရတာလဲ"

ဝေါလ်တာက စိတ်ပျက်လက်ပျက် ပြောလိုက်သည်။

"ဘော့စ် ကျွန်တော် ဘရူးစ်ကို အကြိမ်ကြိမ်ချိန်းပေမဲ့ သူက အမြဲငြင်းနေတယ်"

ဒီဘရူးစ်ဆိုတဲ့လူ ဦးနှောက်ပျက်သွားတာလား၊ ဘာတွေးနေတာလဲ မသိဘူး။ သူက ကိုယ့်သဘောထားကိုလျှော့ပြီး ချိန်းဆိုနေတာတောင် မျက်နှာသာမပေးဘူး။

Green Freshအုပ်စုမှာ သူ ရေရှည်လုပ်နိုင်မယ်ထင်နေတာလား။ ဟွမ်လင်းအုပ်စုက သူတို့ကို ဖိနှိပ်လိုက်တဲ့အခါကျရင် ဟွမ်လင်းအုပ်စုကို သစ္စာဖောက်တဲ့ သူလိုလူမျိုးက ဒီလောကမှာရပ်တည်စရာနေရာရှိတော့မှာမဟုတ်ဘူး။

ဒါကြောင့် ဉာဏ်ရှိတဲ့လူဆိုရင် သူတို့နဲ့ ဆက်ဆံရေးကောင်းအောင် တည်ဆောက်ထားပြီး ကိုယ့်အတွက် လမ်းနောက်ဆုတ်ဖို့ လမ်းရှာထားသင့်တယ်။

အခု သဘောထားတင်းမာနေပုံထောက်ရင် နောင်ကျ ဘယ်လိုသေမလဲဆိုတာ စောင့်ကြည့်ရဦးမယ်။

ပီတာ ကြားလိုက်ရသောအခါ မျက်နှာချက်ချင်းမည်းမှောင်သွားပြီး ဒေါသတကြီး ပြောလိုက်သည်။

"သူ ငြင်းတယ် ဟုတ်လား။ ဘာအကြောင်းပြချက်နဲ့လဲ"

ဘရူးစ်က သူတို့နှင့် တွေ့ဆုံရန် ငြင်းဆန်လိမ့်မည်ဟု သူ ထင်မှတ်မထားခဲ့ချေ။

လက်ရှိတွင် သူတို့၏ဖိတ်ကြားမှုကိုရရှိပါက ကျေးဇူးတင်လွန်း၍ မျက်ရည်ကျရမည် မဟုတ်လား။ ဤသည်မှာ ဟွမ်လင်းအုပ်စုသို့ ပြန်လာရန် အခွင့်အရေးရှိနေသေးကြောင်း ပြသနေခြင်းဖြစ်သည်။

ဘာကြောင့် ငြင်းဆန်ရတာလဲ။ သူ လုံးဝ စဉ်းစားမရ ဖြစ်နေသည်။

ဝေါလ်တာ၏မျက်နှာတွင် ဒေါသအရိပ်အယောင်များပေါ်လာပြီး "သူ အခု အလုပ်သစ်ဝင်နေလို့ အရမ်းအလုပ်ရှုပ်နေတယ်တဲ့၊ လာတွေ့ဖို့ အချိန် လုံးဝ မရှိဘူးတဲ့"

ပီတာ "..."

***