အခြေအနေများ ပိုမို ဆိုးရွားလာခြင်း

မျှော်လင့်ထားသည့်အတိုင်း ရှောင်လင်းယွီနှင့် ကျန့်ယောင်ကျူ ဖုန်းပြောပြီး မကြာမီမှာပင် ရဲများ ရောက်လာကြသည်။

ရဲများ မရောက်မီတွင် ရှောင်လင်းယွီသည် ညနေပိုင်း သတင်းစာရှင်းလင်းပွဲကို ဆက်လက်ကျင်းပရန် ကျန့်ယောင်ကျူအား မှာကြားခဲ့သည်။ ထို့အပြင် သတင်းထောက်များ မေးမြန်းလာနိုင်သည့် မေးခွန်းများနှင့် ဖြေကြားရမည့်ပုံစံများကိုလည်း ဆွေးနွေးခဲ့ကြသည်။

Green Freshအုပ်စု အပြင်ဘက်တွင် သတင်းထောက်များ ဝိုင်းရံနေကြပြီး ရဲများ ရောက်လာသည်ကို မြင်သည်နှင့် ချက်ချင်း မေးခွန်းထုတ်ကြသည်။

"ရဲအရာရှိ၊ ထောင်ယွမ်ရွာ Green Freshစူပါမားကတ်က ရောင်းတဲ့ ပစ္စည်းတွေကြောင့် နေရာအနှံ့မှာ လူတွေ သေဆုံးနေတယ်ဆိုတာ သက်သေခိုင်လုံနေပါပြီ။ ဒီတစ်ခေါက်လာတာ လူဖမ်းမလို့လား"

"ရဲအရာရှိ..."

တားဆီးခံထားရသော ရဲအရာရှိသည် တစ်ခွန်းမျှ ပြန်မပြောဘဲ နေလိုက်သည်။ ထို့နောက် သတင်းထောက်များကို Green Freshအုပ်စု လုံခြုံရေး ဝန်ထမ်းများက တားဆီးလိုက်သည်။

ရဲများ အထဲဝင်သွားသည်နှင့် အပြင်ဘက်မှ လူများသည် "ဒုန်း... ဒုန်း..." ဟူသော အသံများကို ကြားလိုက်ရသည်။

"ဟော... ရဟတ်ယာဉ်ပါလား"

လူတစ်ယောက်က သတိထားမိပြီး ပြောလိုက်သည်။

ထောင်ယွမ်ရွာတွင် ရဟတ်ယာဉ်ရှိသည်မှာ ထူးဆန်းသောကိစ္စမဟုတ်ပေ။

အဘယ်ကြောင့်ဆိုသော် Imperial Palaceအုပ်စု ရုံးချုပ်သည် မြို့တော်တွင်ရှိသော်လည်း Green Freshအုပ်စု ရုံးချုပ်သည် ထောင်ယွမ်ရွာတွင်ရှိကြောင်း လူတိုင်း သိကြသောကြောင့် ဖြစ်သည်။

ဪ... မဟုတ်သေးပါဘူး၊ ပိုမှန်အောင် ပြောရရင် သူတို့အိမ်က ထောင်ယွမ်ရွာမှာ ရှိတာပါ။

ကုန်းထျန်းဟောက်သည် ရှောင်လင်းယွီနှင့် လက်ထပ်ပြီးနောက် အဘိုးကုန်းကိုယ်တိုင်ပင် ထောင်ယွမ်ရွာတွင် နေထိုင်ရသည်ကို နှစ်သက်သည်။ ထို့အပြင် ခမည်းခမက်နှစ်ဖက်ဆက်ဆံရေးမှာလည်း အလွန်ကောင်းမွန်သည်။

ထို့ကြောင့် အလုပ်ကိစ္စများကြောင့် ကုန်းထျန်းဟောက်သည် မြို့တော်နှင့် ထောင်ယွမ်ရွာကြား မကြာခဏ သွားလာနေရသည်။

"ကုန်းထျန်းဟောက် ရောက်လာတာပဲ"

သတင်းထောက်တစ်ဦးက ရဟတ်ယာဉ်ကိုမြင်သည်နှင့် ချက်ချင်း သဘောပေါက်သွားသည်။ ကုန်းထျန်းဟောက် သေချာပေါက်ရောက်လာပြီဖြစ်သည်။

မကြာမီ ရဟတ်ယာဉ်သည် ဝေဟင်တွင် ဝဲပျံနေပြီး ကြိုးလှေကား ချပေးလိုက်ရာ လူတစ်ယောက် ဆင်းလာသည်။ ထိုလူမှာ ကုန်းထျန်းဟောက်ပင် ဖြစ်သည်။

သူ ဆင်းလာသည်နှင့် သတင်းထောက်များ ဝိုင်းရံလာကြသည်။

"မစ္စတာကုန်း၊ ဇနီးဖြစ်သူက ပြဿနာတက်လို့ အလျင်အမြန် ပြန်လာတာလား"

"မစ္စတာကုန်း၊ ဇနီးသည်ရဲ့ ကုမ္ပဏီက အဆိပ်သင့်ပစ္စည်းတွေ ရောင်းချတယ်ဆိုတဲ့ စွပ်စွဲချက်အပေါ် ဘာပြောချင်ပါသလဲ"

...

သတင်းထောက်များ တစ်ယောက်ပြီးတစ်ယောက် တိုးဝှေ့လာကြပြီး ထက်ရှသော မေးခွန်းများကို တစ်ခုပြီးတစ်ခုမေးမြန်းကြသည်။

ကုန်းထျန်းဟောက်သည် အေးစက်သော မျက်နှာထားဖြင့် လုံးဝ ဂရုမစိုက်ဘဲ နေလိုက်သည်။ ဘေးနားမှ သက်တော်စောင့်များက သတင်းထောက်များကို တားဆီးပေးထားသည်။

မကြာမီ ကုန်းထျန်းဟောက်သည် ကုမ္ပဏီ တံခါးဝသို့ ရောက်ရှိသွားသည်။ ထိုအချိန်တွင် ရဲများသည် ရှောင်လင်းယွီကို ခေါ်ထုတ်လာကြသည်။

မျက်စိလျင်သော သတင်းထောက်များက ရှောင်လင်းယွီ၏လက်တွင် လက်ထိပ် ခတ်မထားသည်ကို ချက်ချင်း သတိထားမိကြသည်။

ထို့နောက် ထက်ရှသော မေးခွန်းတစ်ခု ထွက်ပေါ်လာသည်။

"ရဲအရာရှိ၊ ဘာလို့ ရှောင်လင်းယွီကို လက်ထိပ် မခတ်တာလဲ။ ဒီအမှုတွေက သက်သေခိုင်လုံနေပြီလို့ ကြားပါတယ်"

"ရဲအရာရှိ၊ ရှောင်လင်းယွီကို လက်ထိပ်မခတ်တာက သူ့ရဲ့နောက်ခံအင်အားကြောင့် ပြဿနာ တက်မှာ ကြောက်လို့လား"

"ရဲအရာရှိ၊ ပြည်သူ့ဝန်ထမ်းတွေ၊ တရားမျှတမှုကို ဖော်ဆောင်သူတွေအနေနဲ့ အခုလို အာဏာရှိတဲ့ အင်အားစုတွေအောက်မှာ ဒူးထောက်လိုက်ပြီလား"

ဤမေးခွန်းများသည် တစ်ခုထက်တစ်ခု ပိုမိုထက်ရှပြီး ရက်စက်ကြသည်။

ကုန်းထျန်းဟောက်သည် ထိုနေရာတွင်ရပ်နေပြီး အေးစက်စူးရှသော မျက်လုံးများဖြင့် မေးခွန်းမေးသော သတင်းထောက်များကို တစ်ချက်ကြည့်လိုက်သည်။ သူ့ထံမှထွက်ပေါ်နေသော အရှိန်အဝါသည် ထက်မြက်ပြီး သတ်ဖြတ်ချင်စိတ်များပါဝင်နေသဖြင့် ဘေးပတ်ဝန်းကျင်ရှိ လူများကို တုန်လှုပ်သွားစေသည်။

ထို့နောက် သူသည် ရှောင်လင်းယွီ၏ဘေးတွင် ရပ်ကာ အေးစက်စွာ မေးလိုက်သည်။

"သက်သေအထောက်အထားမရှိတဲ့ကိစ္စတွေကို ဘယ်သူက ခင်ဗျားတို့ကို သတင်းပေးလိုက်တာလဲ။ ကျွန်တော် ပြောလိုက်မယ်၊ ခင်ဗျားတို့ရဲ့ ဒီစကားတွေကြောင့် ကျွန်တော်က ဥပဒေအရ အသရေဖျက်မှု၊ ကောလာဟလလွှင့်မှုနဲ့ ဂုဏ်သိက္ခာထိခိုက်စေမှုတို့နဲ့ တရားရုံးမှာ တရားစွဲလို့ ရတယ်"

စောစောက မေးခွန်းမေးသော သတင်းထောက်များသည် ကြားလိုက်ရသောအခါ မျက်နှာပျက်သွားပြီး ဖြူဖပ်ဖြူရော်ဖြစ်သွားကြသည်။

သို့သော် သတင်းထောက်အချို့သည် တရားမျှတမှုရှိသည်ဟု ခံယူထားကြပြီး ကုန်းထျန်းဟောက်ကို ပြန်လည် ချေပရန် ပြင်လိုက်စဉ် ရဲအရာရှိတစ်ဦးက ဝင်ပြောလိုက်သည်။

"Green Freshအုပ်စုက ထုတ်လုပ်တဲ့ ပစ္စည်းတွေမှာ ပြဿနာရှိတယ်ဆိုတာကို သက်သေပြနိုင်မယ့် ခိုင်လုံတဲ့ အထောက်အထား မရှိသေးပါဘူး။ ကျွန်တော်တို့က လုပ်ထုံးလုပ်နည်းအရ မစ္စရှောင်လင်းယွီကို ရဲစခန်းလိုက်ခဲ့ပြီး ထွက်ဆိုချက်ပေးဖို့ ဖိတ်ခေါ်တာပါ"

ရဲအရာရှိ၏စကားကို ကြားသောအခါ သတင်းထောက်တစ်ဦးက မေးလိုက်ပြန်သည်။

"ဒါပေမဲ့ အွန်လိုင်းမှာ ပျံ့နေတာက ဒေသအသီးသီးက စစ်ဆေးချက်အဖြေတွေထွက်လာပြီ။ သေဆုံးသူတွေက ထောင်ယွမ်ရွာ Green Freshစူပါမားကတ်က ပစ္စည်းတွေစားပြီး အဆိပ်သင့်သေဆုံးတာလို့ သက်သေပြနေကြတယ်ဆို။ ဘယ်လိုဖြစ်လို့ အခုခိုင်လုံတဲ့အထောက်အထား မရှိဘူး ဖြစ်သွားရတာလဲ။ ဒါ ရှောင်လင်းယွီနဲ့ Green Freshအုပ်စုကို ဖုံးကွယ်ပေးချင်လို့ မဟုတ်ဘူးလား"

ရဲအရာရှိက ချက်ချင်း လေးနက်စွာ ပြောလိုက်သည်။

"ခင်ဗျားတို့ ပြောနေတာက ကောလာဟလတွေလေ။ ကောလာဟလတွေကို ယုံလို့ ရမလား။ ကျွန်တော်တို့က တရားဥပဒေစိုးမိုးရေးအဖွဲ့အစည်းအနေနဲ့ သက်သေအထောက်အထားနဲ့ပဲ စကားပြောပါတယ်။ လူကောင်းတစ်ယောက်ကို ဘယ်တော့မှမတရားမစွပ်စွဲသလို လူဆိုးတစ်ယောက်ကိုလည်း ဘယ်တော့မှ ဖုံးကွယ်ပေးမှာ မဟုတ်ပါဘူး။ မစ္စရှောင်လင်းယွီက အခု ကျွန်တော်တို့ရဲ့ စုံစမ်းစစ်ဆေးမှုကို ပူးပေါင်းကူညီနေတာပဲ ဖြစ်ပါတယ်။ မလိုလားအပ်တဲ့ ခန့်မှန်းချက်တွေ မလုပ်ကြပါနဲ့"

ရဲအရာရှိ၏စကားကို သတင်းထောက် အများစုက ယုံကြည်သွားကြသည်။

သို့သော် ရဲများက ရှောင်လင်းယွီကို ဖုံးကွယ်ပေးနေသည်ဟု ယူဆနေသော သတင်းထောက် အနည်းငယ် ရှိနေသေးသည်။

နောက်ထပ် မေးခွန်းမေးရန်ပြင်လိုက်စဉ် ရဲအရာရှိက ချက်ချင်း ပြောလိုက်သည်။

"ဒီအမှုရဲ့ တိုးတက်မှု အခြေအနေကို တရားဝင် ထုတ်ပြန်ချက်တွေအတိုင်းသာ အတည်ယူပါ။ ကောလာဟလတွေကို မယုံပါနဲ့။ မဟုတ်ရင် ဥပဒေအရ အရေးယူခံရနိုင်ပါတယ်"

ရဲအရာရှိက ဤသို့ပြောလိုက်ပြီဖြစ်ရာ သတင်းထောက်များ ထပ်မေးနေပါက တမင် ရန်ရှာရာ ရောက်ပေလိမ့်မည်။

Green Freshအုပ်စု၏ အင်အားကြီးမားမှုကို ထားလိုက်ဦး၊ ရှောင်လင်းယွီဘေးနားမှ အမျိုးသားသည် ရှောင်လင်းယွီနှင့် Green Freshအုပ်စု၏ ဂုဏ်သိက္ခာကို တမင်ဖျက်ဆီးနေခြင်းအား ခွင့်ပြုလိမ့်မည် မဟုတ်ပေ။

"ကဲ... အားလုံး ဖယ်ပေးကြပါ၊ ကျွန်တော်တို့ ရဲစခန်းကို ပြန်ရပါမယ်" ရဲအရာရှိက ပြောလိုက်သည်။

ကုန်းထျန်းဟောက်သည် ရှောင်လင်းယွီ၏လက်ကိုဆွဲကာ နဖူးပေါ်မှ ဆံစများကို သပ်တင်ပေးရင်း ပြောလိုက်သည်။

"ယွီအာ၊ မကြောက်နဲ့နော်။ ကိုယ်တို့ ရဲအရာရှိတွေနဲ့ ပူးပေါင်းပြီး အမှုမှန် ပေါ်ပေါက်အောင် လုပ်ကြမယ်"

ရှောင်လင်းယွီ ခေါင်းညိတ်လိုက်သည်။

"အင်း... ရှင့်ကို ယုံပါတယ်"

ထို့နောက် ရှောင်လင်းယွီသည် ဘေးပတ်ဝန်းကျင်မှ သတင်းထောက်များကိုကြည့်ကာ ပြောလိုက်သည်။

"သတင်းထောက် မိတ်ဆွေများ၊ Green Freshအုပ်စုက ဒီနေ့ ညနေ ၃ နာရီမှာ သတင်းစာ ရှင်းလင်းပွဲ ကျင်းပပါမယ်။ ဒုဥက္ကဌ ကျန့်ယောင်ကျူက ဦးဆောင် ကျင်းပမှာပါ။ အဲဒီအချိန်ကျရင် မေးစရာရှိတာ မေးနိုင်ပါတယ်"

သတင်းထောက်အချို့သည် အထက်မှ အကြောင်းကြားစာရရှိထားပြီးဖြစ်ရာ Green Freshအုပ်စု သတင်းစာ ရှင်းလင်းပွဲ ကျင်းပမည်ဖြစ်ကြောင်း သိထားကြသည်။ သတင်းအချက်အလက်များကို အမြန်ဆုံး ပြန်လည်ပေးပို့ရန် ညွှန်ကြားထားသည်။

ရှောင်လင်းယွီ ရဲကားပေါ်တက်ရန် ပြင်လိုက်စဉ် ရှောင်လဲ့ထုန်သည် လူအုပ်ထဲမှ ပြေးထွက်လာသည်။

သူသည် ဦးစွာ ရဲအရာရှိနှစ်ဦးကို ယဉ်ကျေးစွာ နှုတ်ဆက်လိုက်သည်။ "မင်္ဂလာပါ ရဲဦးလေးတို့"

ထို့နောက် သူက ရှောင်လင်းယွီကို နှစ်သိမ့်လိုက်သည်။

"မေမေ... မကြောက်နဲ့နော်၊ စိတ်လည်း မပူနဲ့၊ သား အမှန်တရားကို ဖော်ထုတ်ပေးမယ်"

ရှောင်လင်းယွီ ကြားလိုက်ရသောအခါ ဒူးထောက်ထိုင်ချလိုက်ပြီး သူ့ပါးလေးကိုကိုင်ကာ ပြုံး၍ ပြောလိုက်သည်။

"ကောင်းပြီ... မေမေ မကြောက်ဘူး၊ စိတ်လည်း မပူပါဘူး။ ဒါပေမဲ့ သား၊ မေမေ အိမ်မှာ မရှိတဲ့အချိန် လိမ္မာရမယ်နော်၊ သိလား"

တခြားလူတွေက သူမသားအကြောင်း နားမလည်ရင်တောင် သူမက နားမလည်ဘဲ နေမလား။ မိုးမမြင် လေမမြင် ဘာမှမကြောက်တတ်တဲ့ကောင်လေး။ ပြီးတော့ သတ္တိနဲ့ စွမ်းရည်လည်း ရှိတယ်။ သူ တစ်ခုခုပြောပြီဆိုရင် သေချာပေါက်လုပ်နိုင်တယ်။

ရှောင်လဲ့ထုန် ခေါင်းညိတ်လိုက်သည်။

"ဟုတ်ကဲ့... သား လိမ္မာပါ့မယ်၊ မေမေလည်း မြန်မြန် ပြန်လာနော်"

"ကောင်းပြီ" ရှောင်လင်းယွီ ရှောင်လဲ့ထုန်ကို ပွေ့ဖက်လိုက်သည်။

ဘေးနားမှ လူများ မြင်လိုက်ရသောအခါ စိတ်ထိခိုက်သွားကြသည်။

ဒီကလေးက တကယ် လိမ္မာတာပဲ။ လိမ္မာလွန်းလို့ လူကြီးတစ်ယောက်လို့တောင် ထင်ရတယ်။

နောက်ဆုံးတွင် ရှောင်လင်းယွီ ရဲကားပေါ် တက်လိုက်သည်။

ကုန်းထျန်းဟောက်နှင့် ရှောင်လဲ့ထုန် သားအဖနှစ်ယောက်သည် ထွက်ခွာသွားသော ကားကို ကြည့်ရင်း တည်ငြိမ်လေးနက်သော မျက်နှာထားဖြင့် လက်သီးဆုပ်ထားကြသည်။

ကားကို မမြင်ရတော့သည့်အခါ ကုန်းထျန်းဟောက်သည် သားဖြစ်သူ၏လက်ကိုဆွဲကာ သတင်းထောက်များကို စူးရှစွာကြည့်လျက် အေးစက်စွာ ပြောလိုက်သည်။

"မင်းတို့ ဘယ်သတင်းဌာန၊ ဘယ်တိုက်ကပဲ ဖြစ်ဖြစ်၊ သတင်းမှားတွေ ရေးသားတာ၊ အဖြစ်မှန်ကို လိုရာဆွဲတာ၊ ပြည်သူကို အထင်မှားအောင် လုပ်တာတွေလုပ်ရင် တရားရုံးက ဆင့်ခေါ်စာကို စောင့်နေကြ၊ ပြီးရင် မင်းတို့ ကုမ္ပဏီပိတ်သိမ်းဖို့ ပြင်ထားကြ။ ငါ ကုန်းထျန်းဟောက် ဒီမှာ ပြောထားခဲ့မယ်၊ စမ်းကြည့်ချင်ရင် စမ်းကြည့်လိုက်"

သတင်းထောက်များ ကြားလိုက်ရသောအခါ ကုန်းထျန်းဟောက်ထံမှ ထွက်ပေါ်လာသော အရှိန်အဝါကြောင့် တုန်လှုပ်သွားကြသည်။

စီးပွားရေးလောကတွင် ကုန်းထျန်းဟောက်၌ 'စီးပွားရေး ဧကရာဇ်' ဟူသော ဘွဲ့တစ်ဘွဲ့ ရှိသည်ကို သူတို့ မမေ့ကြပေ။

ဧကရာဇ် အမျက်ဒေါသထွက်လျှင် သွေးချောင်းစီးတတ်သည် မဟုတ်လား။

***