သိုင်းကမ္ဘာ့ သက်ရှိသတ္တဝါအပေါင်းတို့…ငါဟာ သိုင်းကမ္ဘာ့ သခင်ပဲ (၃)

~ဤအခြင်းအရာမှာ အခြားသူများ၏ စိတ်ထဲတွင်လည်း တွေးတောနေကြသော အရာဖြစ်ပေသည်။

နင်ချီသည် ပတ်ဝန်းကျင်ကို တစ်ချက် မျက်စ်ိကစားလိုက်ပြီးနောက် ပြောလိုက်၏။

"ခင်ဗျားတို့အတွက် နောက်ထပ် တာဝန်တစ်ခု ရှိပါသေးတယ်"

ထိုစကားကို ကြားသောအခါ လူတိုင်း၏ မျက်လုံးများ အရောင်လက်သွားကြ၏။

"ကမ္ဘာ့လမ်းကြောင်းကို သွားဖျက်ဆီးပစ်ကြပါ.."

နင်ချီ၏ လေးနက်သော စကားကို ကြားလိုက်ရချိန်တွင် လူတိုင်း၏ အသက်ရှူသံများ မြန်ဆန်လာကြ၏။ ဤတာဝန်သည် အလွန် ခက်ခဲမည်ကို သူတို့ ကောင်းစွာ သိရှိကြ၏။

သို့သော် တစ်ဦးတစ်ယောက်မျှ နောက်မတွန့်ခဲ့ကြချေ။ သေရမည် ဆိုလျှင်ပင် နောင်တရမည့်သူ မရှိပေ။

ထိုအခါ နင်ချီက ခပ်ရေးရေး..

ပြုံးလိုက်သည်။

"သေမင်းဆီ သွားမယ့်.. ပုံစံတွေ လုပ်မနေကြပါနဲ့ဗျာ။ အသက်အန္တရာယ် ရှိမယ်ဆိုရင် ကျွန်တော်က ခင်ဗျားတို့ကို ဘယ်လွှတ်ပါ့မလဲ"

သူသည် နယ်မြေ အရှင်သခင် တစ်ပါး ဖြစ်သော်လည်း သူ့တွင် မျက်နှာလိုက်မှုများ ရှိနေသေး၏။ လော့ဝမ်ထျန်းနှင့် အခြားသူများကို သေလမ်းသို့ မပို့နိုင်ပေ။

နင်ချီက သူ၏ ရည်ရွယ်ချက် အမှန်ကို ဖွင့်ဟလိုက်၏။

"အဲဒီအချိန်ကျရင် ကျွန်တော်က ခင်ဗျားတို့ကို ကမ္ဘာ့လမ်းကြောင်း အပြင်ဘက်ကို ပို့ပေးမယ်။ ခင်ဗျားတို့က လမ်းကြောင်းကို ဖျက်ဆီးဖို့ပဲ အစွမ်းကုန် ကြိုးစားကြ။ တကယ်လို့ လာတားတဲ့ သူ ရှိရင် ကျွန်တော်.. ရှင်းမယ်"

နင်ချီသည် သူတို့ကို ရန်သူကို မျှားခေါ်စေလိုခြင်းသာ ဖြစ်သည်။

သူ စောင့်ကြည့်နေသမျှ ကာလပတ်လုံး အန္တရာယ် ရှိမည် မဟုတ်ချေ။

ထို့ပြင် သူတို့အနေဖြင့် တိုက်ပွဲ အတွေ့အကြုံများကို ရယူနိုင်ပြီး၊ လျင်မြန်စွာ ရရှိထားသော အခြေခံအုတ်မြစ်ကို တည်ငြိမ်အောင် ပြုလုပ်နိုင်ပေလိမ့်မည်။

စိတ်လှုပ်ရှားစွာဖြင့်ပင် လူတိုင်းက သဘောတူညီကြောင်း တုံ့ပြန်လိုက်ကြ၏။

လူတိုင်း ပြင်ဆင်ရန် ထွက်ခွာသွားကြသည်ကို ကြည့်ရင်း နင်ချီ ပြုံးလိုက်၏။ သူ၏ ရင်ထဲတွင်လည်း တိုက်ခိုက်လိုစိတ်များ တဖြည်းဖြည်း မြင့်တက်လာတော့၏။

'မူလဝိညာဉ် နယ်ပယ် အစစ်အမှန် ဧကရာဇ်... ဘယ်လောက်တောင် စွမ်းမလဲဆိုတာ သိချင်စမ်းပါရဲ့။ ဒီတစ်ခါတော့ စမ်းသပ်ခွင့် ရတော့မှာပါ'

လွန်ခဲ့သော ရက်များအတွင်း သူ၏ စိတ်အာရုံအားလုံးကို အစီအမံများ ချမှတ်ခြင်းနှင့် နယ်မြေ အရှင်သခင် အဆင့်၏ စွမ်းအားများကို ရင်းနှီးကျွမ်းဝင်အောင် လုပ်ဆောင်ခြင်းတို့၌သာ အသုံးပြုခဲ့ရ၏။ ရှေ့ဆက်ရမည့် လမ်းစဉ်ကို တွက်ချက်ရန်ပင် အချိန်မရခဲ့ချေ။ လမ်းစဉ်ကို အာရုံစိုက် ကျင့်ကြံနိုင်ရန်အတွက် ပြဿနာ အားလုံးကို အမြန်ဆုံး ဖြေရှင်းပစ်ချင်နေမိသည်။

လာကြစမ်း... တိုက်ကြတာပေါ့။

...

အချိန်များကား ဖြည်းညှင်းစွာ ကုန်ဆုံးသွားလေ၏။

သိုင်းကမ္ဘာမှ သက်ရှိများ စစ်ပွဲအတွက် ပြင်ဆင်နေကြချိန်၌ တောင်နှင့် ပင်လယ် နယ်မြေ၊ မိစ္ဆာနက် ဂိုဏ်းတွင်လည်း အခြေအနေများ တက်ကြွ လှုပ်ရှားနေ၏။

ကျားဇီ အမှတ် ၁၆၇၃ ကမ္ဘာသို့ စစ်ချီမည့် အချိန်ကို လွန်ခဲ့သော တစ်လကတည်းက သတ်မှတ်ထားခဲ့ပြီး ဖြစ်သည်။ ထိုကာလအတွင်း မိစ္ဆာနက်ဂိုဏ်း၏ လေထုမှာ အထွတ်အထိပ်သို့ ရောက်ရှိနေခဲ့၏။ ပါရမီရှင် တပည့်ကျော်များမှာမူ အဆက်အသွယ် ကောင်းကြသဖြင့် စစ်ချီမည့် လူစာရင်းအတွက် ပူပန်ရန် မလိုသော်လည်း၊ သာမန် တပည့်များမှာမူ ဤအခွင့်အရေးကို ရရှိရန် အစွမ်းကုန် ယှဉ်ပြိုင်ခဲ့ကြရ၏။

မိစ္ဆာနက်ဂိုဏ်းတွင် စွမ်းအားရှိသူသာလျှင် အရာရာကို ရယူပိုင်ဆိုင်နိုင်ပေသည်။

ထို့ကြောင့် တိုက်ပွဲပေါင်းများစွာ ဖြစ်ပွားခဲ့ပြီး ဉာဏ်နီဉာဏ်နက် ကစားမှုများလည်း များပြားခဲ့လေ၏။

ထို့အပြင် တစ်ခါသုံး မန္တန်စာရွက်များနှင့် မှော်စွမ်းအင် ဖြည့်ဆေးလုံးများမှာ အရောင်းသွက်နေခဲ့၏။

ဝယ်လိုအား များပြားမှုကြောင့် ပတ်ဝန်းကျင် ဒေသများတွင် ကုန်ဈေးနှုန်းများပင် သိသိသာသာ မြင့်တက်သွားခဲ့ရသည်။

အခြား ဂိုဏ်းအချို့သည် ထိုထူးခြားမှုကို သတိထားမိကြပြီး မိစ္ဆာနက်ဂိုဏ်းသည် ကမ္ဘာငယ် တစ်ခုဆီသို့ စစ်ချီတော့မည်ကို ရိပ်မိသွားကြ၏။ ထို့ကြောင့် ရေအောက်လှိုင်းတံပိုးများလည်း ဖြစ်ပေါ်လာခဲ့၏။ မည်သို့ပင်ဆိုစေ မိစ္ဆာနက်ဂိုဏ်းသည် ဤဒေသတွင် ထိပ်တန်းအဆင့် ဖြစ်လေရာ၊ ဤအသားတုံးကြီးကိုသာ မျိုချနိုင်ခဲ့လျှင် အလွန် ကြွယ်ဝ ချမ်းသာသွားပေလိမ့်မည်။

သို့သော် မိစ္ဆာနက်ဂိုဏ်းက ပြင်းထန်စွာ တုံ့ပြန်ခဲ့ပြီး၊ စံပြအနေဖြင့် မူလဝိညာဉ် နယ်ပယ် အစစ်အမှန် ဧကရာဇ်များကိုပင် စေလွှတ်ခဲ့၏။

ယနေ့တွင်မူ...

ဂိုဏ်းစောင့် အခင်းအကျင်းကြီးကို ဖွင့်လှစ်လိုက်ပြီ ဖြစ်ရာ စစ်ချီခွင့် ရရှိထားသော တပည့်များသည် စိတ်လှုပ်ရှားစွာဖြင့် မတ်တတ်ရပ်လိုက်ကြ၏။

မိစ္ဆာနက် အစစ်အမှန် ဧကရာဇ်၏ အာဏာစက် ပြင်းထန်သော အသံကြီးသည် မိစ္ဆာနက် တောင်တန်းထက်တွင် ဟိန်းထွက်လာတော့သည်။

"မိစ္ဆာနက် စစ်ချီတပ်ဖွဲ့ ဘယ်မှာလဲ"

အလင်းတန်းများစွာ လက်သွားပြီးနောက် စွမ်းအားကြီးမားသော ပုဂ္ဂိုလ်များသည် ကောင်းကင်ယံကို ဖြတ်သန်းလျက် မိစ္ဆာနက် ကမ်းပါးရှေ့သို့ ဆင်းသက်လာကြပြီး ရိုသေစွာ ဦးညွှတ်လိုက်ကြ၏။

"ဂိုဏ်းချုပ်ကြီးအတွက် ရှေ့ကနေ သွားရောက် တိုက်ခိုက်ပေးပါ့မယ်"

မိစ္ဆာနက် ကမ်းပါး၏ ရှေ့တွင်...

မူလဝိညာဉ် နယ်ပယ် အဆင့်ရှိကြသော အစစ်အမှန် ဧကရာဇ် မီးတောက်နက် နှင့် အစစ်အမှန် ဧကရာဇ် ဇီယွင် တို့က ဦးဆောင်ကာ၊ ခရမ်းရောင် နန်းတော် နယ်ပယ် အဆင့်ရှိသော တပည့်အရင်း သုံးထောင်က နောက်မှ ကပ်လိုက်လာကြ၏။ ထို့နောက်တွင်မူ ခရမ်းရောင် နန်းတော် နယ်ပယ် အတွင်းစည်း တပည့် ငါးထောင်ခန့်သည် ပိတ်သိပ် တိုးဝှေ့လျက် ပါလာကြ၏။ ၎င်းတို့သည် ဝိညာဉ် ချပ်ဝတ်များကို ဝတ်ဆင်ထားကြပြီး လက်နက်ကိုယ်စီ ကိုင်ဆောင်ထားကြ၏။

သူတို့၏ မျက်လုံးများတွင် စိတ်အားထက်သန်မှုနှင့် လိုအင်ဆန္ဒများ ပြည့်နှက်နေကြ၏။

ဤစစ်ချီခြင်း၏ တစ်ခုတည်းသော ရည်ရွယ်ချက်မှာ ကမ္ဘာငယ်များကို ဖျက်ဆီးပြီး တောင်နှင့် ပင်လယ် နယ်မြေ၏ ကမ္ဘာ့ဆန္ဒ မျက်နှာသာပေးမှုကို ရယူရန်ပင် ဖြစ်သည်။

မိစ္ဆာနက် အစစ်အမှန် ဧကရာဇ်သည် လူအုပ်ကြီးကို ကြည့်ရှုရင်း အားပါးတရ ရယ်မောလိုက်၏။

"ကောင်းတယ်... သိပ်ကောင်းတယ်"

သူ၏ အကြည့်က အစစ်အမှန် ဧကရာဇ် မီးတောက်နက် နှင့် ဇီယွင် တို့ထံ ရောက်ရှိသွားရာ သူတို့နှစ်ဦး ပြိုင်တူ ဦးညွှတ်လိုက်ကြ၏။

"ဂိုဏ်းချုပ် အစ်ကိုကြီး... ကျွန်တော်တို့ရဲ့ ခန္ဓာကိုယ်တွေကို စောင့်ရှောက်ပေးပါဦး ခင်ဗျာ"

မူလဝိညာဉ်ကို ထုတ်လွှတ်ပြီး ကမ္ဘာငယ်များဆီသို့ သွားရောက်ခြင်း ဖြစ်သောကြောင့် သူတို့၏ မူလခန္ဓာကိုယ်များကို တောင်နှင့် ပင်လယ် နယ်မြေတွင် ထားခဲ့ရမည် ဖြစ်ပေသည်။

စကားဆုံးသည်နှင့် တစ်ပြိုင်နက်...

သူတို့နှစ်ဦးသည် ဟင်းလင်းပြင်ထဲတွင် တင်ပျဉ်ခွေ ထိုင်လိုက်ကြရာ ခန္ဓာကိုယ်များ တဖြည်းဖြည်း ငြိမ်သက်သွား၏။ နောက်အခိုက်အတန့်တွင် အလွန် အားကောင်းသော အရှိန်အဝါ နှစ်ခု ထွက်ပေါ်လာပြီး၊ အစစ်အမှန် ဧကရာဇ် မီးတောက်နက် နှင့် ဇီယွင် တို့၏ ပုံသဏ္ဌာန်အတိုင်း လူရိပ်သေးသေးလေး နှစ်ခုသည် သူတို့၏ ခန္ဓာကိုယ်ထဲမှ ထွက်ပေါ်လာကြ၏။

၎င်းသည်ကား မူလဝိညာဉ် နယ်ပယ် အစစ်အမှန် ဧကရာဇ်တို့၏ အနှစ်သာရ ကျင့်ကြံခြင်းဖြစ်သော "မူလဝိညာဉ်" ပင် ဖြစ်ချေသည်။

ဤအခြေအနေတွင် သူတို့သည် မူလဝိညာဉ် စွမ်းအားများကို အကန့်အသတ်မရှိ သုံးစွဲနိုင်ကြပြီး၊ ဓာတ်ကြီးငါးပါးနှင့် သက်ဆိုင်သော နတ်ဘုရား နည်းစနစ်များကို လွတ်လပ်စွာ ထိန်းချုပ်နိုင်ကြသည်။ ကမ္ဘာငယ်လေးများ၏ ဖိနှိပ်မှုကို ခံရ၍ အထွတ်အထိပ်သို့ မရောက်နိုင်လျှင်ပင် ခရမ်းရောင် နန်းတော် နယ်ပယ်ထက် သာလွန်သော စွမ်းအားကို ထုတ်ဖော်နိုင်ပေသည်။ အနည်းဆုံးတော့ ခရမ်းရောင် နန်းတော် နယ်ပယ် အထွတ်အထိပ် စွမ်းအားကို ရရှိနိုင်ပေလိမ့်မည်။

ယေဘုယျအားဖြင့် ဆိုရသော် ကမ္ဘာငယ်လေးများထဲ၌ သူတို့သည် ပြိုင်ဘက်ကင်းများ ဖြစ်ကြပေသည်။

သို့သော် ခြွင်းချက်များတော့ ရှိတတ်သည်။ အချို့သော ကမ္ဘာငယ်လေးများတွင် မူလဝိညာဉ်ကို ဖိနှိပ်နိုင်သော ထူးခြားသည့် အခြေအနေများ ရှိတတ်ရာ၊ ထိုအရာမျိုးနှင့် ကြုံတွေ့ရပါက ပြန်လမ်းမရှိ ဖြစ်သွားတတ်သည်။ ထို့ကြောင့် မူလဝိညာဉ် နယ်ပယ် အစစ်အမှန် ဧကရာဇ်များသည် ကမ္ဘာငယ်များဆီသို့ ကိုယ်တိုင် သွားရောက်လေ့ မရှိကြပေ။

သူတို့သည် တပည့်များကိုသာ စေလွှတ်၍ သိမ်းပိုက်ခိုင်းပြီး နောက်ဆုံး အောင်ပွဲရလဒ်ကိုသာ စံစားလေ့ ရှိကြသည်။

သို့သော် ယခုအကြိမ်တွင်မူ...

မိစ္ဆာနက်ဂိုဏ်း၏ အစစ်အမှန် ဧကရာဇ် နှစ်ပါးလုံး ကိုယ်တိုင် သွားရောက်ရန် အသင့် ပြင်ဆင်ထားကြတော့၏။

မိစ္ဆာနက် အစစ်အမှန် ဧကရာဇ်က ငြိမ်သက်နေသော ခန္ဓာကိုယ်နှစ်ခုကို သိုလှောင်လက်စွပ်ထဲသို့ ထည့်လိုက်ရင်း ပြုံး၍ ပြောလိုက်၏။

"ညီလေး မီးတောက်နက်၊ ညီမလေး ဇီယွင်... ဒီတစ်ခေါက် အောင်မြင်ခဲ့ရင် မင်းတို့က မိစ္ဆာနက်ဂိုဏ်းရဲ့ အကျိုးဆောင်ကြီးတွေ ဖြစ်လာကြမှာပါ"

သူတို့နှစ်ဦး၏ မျက်ဝန်းထောင့်များ အနည်းငယ် လှုပ်ရှားသွားပြီး ရိုသေစွာ ပြုံးလိုက်ကြ၏။

"ဂိုဏ်းချုပ် အစ်ကိုကြီးက အစစအရာရာ စီစဉ်ထားပြီးသားပါ... အဓိက စွမ်းဆောင်ရည်က အစ်ကိုကြီး ရဲ့ ဟာပါပဲ"

မိစ္ဆာနက် အစစ်အမှန် ဧကရာဇ်က ဟားတိုက် ရယ်မောလိုက်၏။

"ဟားဟားဟားဟား၊ မင်းတို့ ဒီလို တွေးပေးတာ ငါ့စိတ်ထဲ တော်တော် ကျေနပ်မိတယ်"

သူ၏ ရယ်မောသံသည် အာဏာစက် ပြင်းထန်လွန်းလှသဖြင့် လူတိုင်း ခေါင်းငုံ့ထားလိုက်ကြရသည်။

သူက လက်တစ်ဖက်ကို ဝှေ့ယမ်းလိုက်၏။

မည်းနက်နေသော ရတနာ ကြေးမုံပြင် တစ်ခုသည် လေထဲတွင် ပေါ်လာ၏။ ၎င်းကား မိစ္ဆာနက်ဂိုဏ်း၏ ဂိုဏ်းစောင့် ရတနာများထဲမှ တစ်ခုဖြစ်သော "ကောင်းကင်ထိုး ကြေးမုံ" ပေတည်း။ ဤကြေးမုံပြင်သည် ဟင်းလင်းပြင်ကို တည်ငြိမ်စေနိုင်ပြီး၊ အသက်နှင့် သေခြင်းတရားကို တွက်ချက်နိုင်စွမ်း ရှိ၏။ မူလဝိညာဉ် နယ်ပယ် အကြီးအကဲများသည် ကြေးမုံပြင်ကို လိုချင်တပ်မက်သော မျက်လုံးများဖြင့် ကြည့်လိုက်ကြ၏။

ထိုခဏ၌...

ကောင်းကင်ထိုး ကြေးမုံသည် အသက်အဆိပ်မှ စုစည်းထားသော တာအို အမှတ်အသားကို ချိတ်ဆက်လိုက်ပြီး၊ တွင်းနက်ကြီး တစ်ခုအသွင် ပြောင်းလဲကာ ဆက်တိုက် တည်ဆောက်ထားသော ကမ္ဘာ့လမ်းကြောင်းကို အောင်မြင်စွာ ဖွင့်လှစ်လိုက်၏။

မိစ္ဆာနက် အစစ်အမှန် ဧကရာဇ်က အော်ဟစ်လိုက်၏။

"ရှေ့ပြေး တပ်ဖွဲ့ ဘယ်မှာလဲ"

"ဂိုဏ်းချုပ်ကြီးအတွက် အသက်ပေးဖို့ အဆင်သင့်ပါ"

တပည့်အရင်း သုံးရာနှင့် အတွင်းစည်း တပည့် ငါးထောင်တို့သည် ရှေ့သို့ ထွက်လာကြ၏။ သူတို့၏ မျက်လုံးများတွင် စိတ်အားထက်သန်မှုများ ပြည့်နှက်နေ၏။ ရှေ့ပြေးတပ်ဖွဲ့သည် အန္တရာယ် အများဆုံး ဖြစ်သော်လည်း စွမ်းဆောင်ရည်အများဆုံး ရနိုင်သည့် နေရာလည်း ဖြစ်ပေသည်။

"ဂိုဏ်းချုပ်က မင်းတို့ရဲ့ အောင်ပွဲခံ ပြန်လာမယ့် အချိန်ကို စောင့်နေမယ်"

ဂိုဏ်းချုပ်၏ အမိန့်သံ အဆုံးတွင် ရှေ့ပြေးတပ်သားများသည် တွင်းနက်ကြီးထဲသို့ ညီညာစွာ တိုးဝင် ပျောက်ကွယ်သွားကြလေတော့သည်။

စစ်ပွဲကြီး စတင်တော့၏။