သေရေးရှင်ရေး တိုက်ပွဲ၊ နင်ချီ လှုပ်ရှားလေပြီ (၃)

~"ပြင်ပကမ္ဘာက မိစ္ဆာကောင်တို့... သေဖို့သာ ပြင်ထားလိုက်ကြပေတော့"

"ကောင်းကင်တောင် နှင်းမယ်”သည် သူမ၏ ဓားရှည်ကို ညွှန်လိုက်သည်နှင့် တစ်ပြိုင်နက် ကြယ်တာရာနက်နဲအလင်းတို့ ရစ်ပတ်သွားပြီး၊ ကောင်းကင်ထွင်း ဓားအလင်းအသွင်ပြောင်းကာ အစစ်အမှန် ဧကရာဇ်မ ဇီယွင်ထံသို့ ခုတ်ပိုင်းချလိုက်လေသည်။

သူမသည် ယခုအခါ နင်ချီ၏ လက်အောက်ခံ ခေါင်းဆောင်သုံးဦးအနက် တစ်ဦးဖြစ်ပြီး၊ ကမ္ဘာ့စွမ်းအားနှင့် ကြယ်တာရာ အခင်းအကျင်းတို့၏ အထောက်အပံ့ကြောင့် ခရမ်းရောင်နန်းတော်နယ်ပယ် (ပြည့်စုံခြင်းအဆင့်) နှင့် နီးစပ်သော တိုက်ခိုက်ရေးစွမ်းအားကို ပိုင်ဆိုင်ထားသူ ဖြစ်သည်။

ဧကရာဇ် ဇီယွင်သည် သူမ၏ ရင်ဘတ်ကို ပုတ်လိုက်ပြီး ဟန်ဆောင်ထိတ်လန့်သွားသည့် ပုံစံဖြင့် လှောင်ပြောင်လိုက်လေ၏။

"ညီမလေးက သိပ်ကြမ်းတာပဲ... အတော်ပဲ ငါ့မှာ အလောင်းကောင် ရုပ်သေး အရံအစေ လိုနေတာ၊ ညီမလေးနဲ့ဆို ကွက်တိပဲ"

သူမ၏ မျက်နှာတွင် ဖမ်းစားညှို့ယူနိုင်သော အပြုံးတစ်ခု ပေါ်နေသော်လည်း မျက်ဝန်းများကမူ အေးစက်ကြောက်မက်ဖွယ် ကောင်းနေ၏။ လက်တစ်ဖက် ဝှေ့ယမ်းလိုက်သည်နှင့် သူမ၏ မူလဝိညာဉ်စွမ်းအားများက ကြီးမားသော တန်ခိုးစွမ်းအင်များအဖြစ် ပုံပေါ်လာကာ၊ အိပ်မက်ဆန်သော ခရမ်းရောင်အလင်းတန်းများ အလွှာလိုက် သွန်းဖြိုးကျဆင်းလာလေသည်။ ထိုအလှတရားများ၏ အောက်တွင်မူ ကြောက်မက်ဖွယ် ကောင်းလှသော သတ်ဖြတ်လိုစိတ်များ ကိန်းအောင်းနေပေသည်။

မျက်စိတစ်မှိတ်အတွင်း၌ ဓားအလင်းတန်းများ အရည်ပျော်သွားပြီး "ကောင်းကင်တောင် နှင်းမယ်”မှာလည်း နောက်သို့ လွင့်စဉ်သွားရလေသည်။

လိပ်အိုကြီး၏ မူလခန္ဓာကိုယ်က ဝင်ရောက်ကူညီရန် ရွေ့လျားလိုက်သော်လည်း ပြင်းထန်သော မုန်းတီး အရှိန်အဝါ တစ်ခုက သူ့ကို တားဆီးထားလိုက်၏။

"လိပ်ပေါက်စ... မင်းရဲ့ ပြိုင်ဘက်က ဒီအစစ်အမှန် ဧကရာဇ်ကြီးကွ"

အကြောင်းရင်းမသိသော်လည်း မူလဝိညာဉ်နယ်ပယ် ကျင့်ကြံသူတစ်ဦးဖြစ်သည့် ထိုပြိုင်ဘက်၏ အကြည့်က အနည်းငယ် ပူလောင်ပြင်းပြနေသည်ဟု ကွေ့ချန်ချင်း ခံစားလိုက်ရပြီး၊ သူ၏ လိပ်အမြီးတိုလေးမှာ အလိုအလျောက် ရှုံ့ဝင်သွားရသည်အထိ ဖြစ်သွားလေသည်။

စိတ်ပျက်စရာ ကောင်းသော အတိတ်က ဖြစ်ရပ်အချို့ကို ပြန်ပြောင်းသတိရမိသဖြင့် ဒေါသထွက်လာကာ ပါးစပ်ကို ဟလျက် သိပ်သည်းသော အစိမ်းရောင်အလင်းတန်းများကို သက်တံ့ရောင်စဉ်သဖွယ် ထိုးဖောက်တိုက်ခိုက်လိုက်လေ၏။

ထိုမြင်ကွင်းအား ကြည့်ရင်း၊ မီးတောက်နက် ဧကရာဇ်က အူလှိုက်သည်းလှိုက် ရယ်မောလိုက်လေသည်။

သူ၏ မူလဝိညာဉ်စွမ်းအားများ လှိုင်းလုံးသဖွယ် ထွက်ပေါ်လာပြီး မူလက လက်မောင်းလောက်သာ ရှိသော ခန္ဓာကိုယ်သည် ရုတ်တရက် ဖောင်းပွလာကာ တောင်တစ်လုံးမျှ ကြီးမားသော ဧရာမ ဓမ္မရုပ်ပွားတော်ကြီးအဖြစ် ချက်ချင်း ဖြစ်တည်လာလေသည်။ ကြောက်မက်ဖွယ် မီးတောက်နက်များသည် လေထုကို လောင်ကျွမ်းစေပြီး မိုင်တစ်ထောင်ပတ်လည်ရှိ မြေပြင်ကို ပြာကျစေ၏။

သူက လက်ကို ဆန့်ထုတ်ကာ အစိမ်းရောင် သက်တံ့အလင်းတန်းကို ပိတ်ဆို့လိုက်ပြီး တစ်ချိန်တည်းမှာပင် လိပ်အိုကြီးကို ဖမ်းဆုပ်ကာ အမှိုက်သရိုက်ကို လွှင့်ပစ်လိုက်သကဲ့သို့ အဝေးသို့ ပစ်လွှတ်လိုက်ပြီးနောက် ထပ်မံ လိုက်လံတိုက်ခိုက်ပြန်လေသည်။

ထိုမြင်ကွင်းက လူကို ခေါင်းနပန်းကြီးသွားစေ၏။

လီယန်ဝူ၏ မျက်နှာအမူအရာ ပြောင်းလဲသွားလေသည်။ ဤနှစ်ယောက်သည် အလွန်အမင်း ကြောက်မက်ဖွယ် ကောင်းလှပေသည်။ ကမ္ဘာ့စွမ်းအား၏ ဖိနှိပ်မှုသာ မရှိပါက လက်တစ်ဖက် ဝှေ့ယမ်းလိုက်ရုံဖြင့် မည်သူ့ကိုမဆို ဖုန်မှုန့်အဖြစ် ပြောင်းလဲပစ်နိုင်ပေလိမ့်မည်။ သူသည် သွားကို တင်းတင်းကြိတ်ကာ ကောင်းကင်တောင် နှင်းမယ်ကို ကူညီရန် ဆုံးဖြတ်လိုက်လေသည်။ ကွေ့ချန်ချင်း၏ ခံစစ်စွမ်းရည်သည် သိုင်းကမ္ဘာ၌ အကောင်းဆုံးဟု ကျော်ကြားရာ တစ်ဦးတည်း တောင့်ခံထားနိုင်ဦးမည် ဖြစ်သော်လည်း ကောင်းကင်တောင် နှင်းမယ်မှာမူ အန္တရာယ် ပိုများနေပေသည်။

သူသည် မီးကြာပန်းများကို စုစည်းပြီး ထိုအိပ်မက်ဆန်သော ခရမ်းရောင်အလင်းတန်းများထံသို့ ပစ်လွှတ်လိုက်လေ၏။

နှစ်ယောက် တစ်ယောက် တိုက်ခိုက်နေရသော်လည်း သူတို့မှာ ရန်သူ၏ တိုက်စစ်ကို ခက်ခက်ခဲခဲ ခုခံနေရဆဲ ဖြစ်သည်။

စစ်ပွဲကြီးကား ဆိုက်ရောက်လာပြီ ဖြစ်ပေသည်။

ခရမ်းရောင်နန်းတော်နယ်ပယ် အမွေခံတပည့်များစွာ ဦးဆောင်သော မိစ္ဆာနက်တပ်တော်သည် ကြမ်းတမ်းသော ထိုးစစ်ကို စတင်လေတော့သည်။ ပင်မတပ်ဖွဲ့ကြီးထဲတွင် ယန်လော်နှင့် ဆင်တူသော သူ အနည်းဆုံး တစ်ဒါဇင်ခန့် ပါဝင်ပြီး၊ ကျိုင်းကောင်အုပ်ကြီးသဖွယ် များပြားလှသော အရေအတွက်ကြောင့် လေထုတစ်ခုလုံး အက်ကွဲမတတ် ဖြစ်နေလေ၏။

တိုက်ခိုက်မှု အားလှိုင်းများကြောင့် သိုင်းကမ္ဘာတစ်ခုလုံး တုန်ခါသွားပြီး တောင်တန်းများ ပြိုကျကာ နေရာအနှံ့တွင် မြေကွဲအက်မှုများ ဖြစ်ပေါ်နေလေသည်။

သိုင်းကမ္ဘာသည် ဤမျှ ကြောက်မက်ဖွယ် ကောင်းသော စစ်ပွဲဒဏ်ကို မခံနိုင်တော့ပေ။

ပြောရလျှင် ၎င်းသည် ကမ္ဘာငယ်လေး တစ်ခုသာ ဖြစ်ပေသည်။

သိုင်းကမ္ဘာမှ သိုင်းပညာရှင်များသည် နောက်ဆက်တွဲ အကျိုးဆက်များကို ဂရုမစိုက်တော့ဘဲ အသက်နှင့်ရင်းကာ တိုက်ခိုက်နေကြလေ၏။

စစ်ပွဲသည် မှန်းဆ၍ မရနိုင်လောက်အောင် ရက်စက်ကြမ်းကြုတ်လှပေသည်။

အချိန်တိုင်းလိုလိုပင် သိုင်းပညာရှင်များ ကျဆုံးနေကြရသည်။ အချို့မှာ သိုင်းကမ္ဘာမှ ဖြစ်ပြီး အချို့မှာ မိစ္ဆာနက်ဂိုဏ်းမှ ဖြစ်ကြသော်လည်း ယေဘုယျအားဖြင့် သိုင်းကမ္ဘာမှ လူများက ပိုမိုသေဆုံးကြရသည်။ အဘယ်ကြောင့်ဆိုသော် များစွာသော ကောင်းချီးမင်္ဂလာများ ရရှိထားသော်လည်း သူတို့၏ ကျင့်ကြံခြင်းအဆင့်မှာ နိမ့်ပါးလွန်းနေသေးသောကြောင့် ဖြစ်သည်။

အထူးသဖြင့် မူလအမြုတေနယ်ပယ်မှ လူများဆိုလျှင် စစ်ပွဲထဲသို့ အသက်ကို ပဓာနမထားဘဲ ဝင်ရောက်တိုက်ခိုက်နေကြခြင်း ဖြစ်သည်။

နင်ချီသည် ထိုအရာများကို ကြည့်ရင်း သက်ပြင်းရှည် တစ်ချက် ချလိုက်မိ၏။

"တကယ်ကို ခက်ခဲတာတော့ အမှန်ပဲ"

သူ့ရင်ထဲတွင် ကရုဏာစိတ်တို့ ဖြစ်ပေါ်လာရသည်။ သူသည် လက်ကို ဝှေ့ယမ်းလိုက်ပြီး ကမ္ဘာ့စွမ်းအား အစိတ်အပိုင်းတစ်ခုကို အဆီအနှစ်အဖြစ် ပြောင်းလဲကာ သိုင်းကမ္ဘာမှ သက်ရှိများ၊ အထူးသဖြင့် ခေါင်းဆောင်သုံးဦးထံသို့ စီးဆင်းစေလိုက်ပြီး သူတို့၏ စွမ်းအားကို ပိုမိုမြှင့်တင်ပေးလိုက်လေသည်။

နင်ချီ နားလည်ထားသည်မှာ -

သူတို့သည် မူလဝိညာဉ်နယ်ပယ်အဆင့် ဧကရာဇ် နှစ်ဦးကို တောင့်ခံထားနိုင်ရန် လိုအပ်သည်။ သို့မဟုတ်ပါက လုံးဝဥဿုံ ရှုံးနိမ့်သွားရပေလိမ့်မည်။

သို့သော်လည်း သူ ဝင်ရောက်စွက်ဖက်၍ မရသေးပေ။ အကယ်၍ သူသာ ဝင်ပါလိုက်ပါက မိစ္ဆာနက်ဂိုဏ်းမှ အကူအညီများ ပိုမို စေလွှတ်လာနိုင်ပြီး နောက်ဆက်တွဲ အကျိုးဆက်များကို ခန့်မှန်း၍ ရနိုင်မည် မဟုတ်ပေ။ အတွင်းရန်ကို မဖြေရှင်းမီ အရင်ဆုံး ရန်သူ၏ ဆုတ်လမ်းကို ဖြတ်တောက်ရန် လိုအပ်နေသည်။

"ဒါပေမဲ့ ခဏလောက် တောင့်ခံထားဖို့ကတော့ သိပ်ပြဿနာ မရှိလောက်ပါဘူး"

သိုင်းသူတော်စင်များအပြင် စစ်မှန်သော သိုင်းခန်းမဆောင်တွင် ကျန်ရှိနေသော ဝိညာဉ်သားရဲ ဒါဇင်ပေါင်းများစွာသည် ဤကောင်းချီးများအောက်တွင် ခရမ်းရောင်နန်းတော်နယ်ပယ် တိုက်ခိုက်ရေးစွမ်းအားများကို ပိုင်ဆိုင်ထားကြပြီ ဖြစ်သည်။

ကောင်းကင်လူသားနယ်ပယ်မှ လူပေါင်း နှစ်သောင်းနီးပါးသည်လည်း မှော်စွမ်းအား နယ်ပယ် အဆင့် တိုက်ခိုက်ရေးစွမ်းအားများ ရှိနေကြပြီ ဖြစ်သည်။

ထို့ပြင် ကြယ်တာရာ အခင်းအကျင်း၏ ကောင်းချီးပေးမှုနှင့် ကြယ်တာရာ နက်ရှိုင်းခြင်း အလင်းတို့၏ အကာအကွယ်ကြောင့် ရန်သူများအနေဖြင့် အလွယ်တကူ အနိုင်ယူနိုင်မည် မဟုတ်ပေ။

နင်ချီသည် ကမ္ဘာ့ဟင်းလင်းပြင် တံခါးပေါက်များဆီသို့ အကြည့်ပို့လိုက်လေ၏။

ဤအချိန်တွင် -

သိုင်းကမ္ဘာမှ သိုင်းပညာရှင် များစွာသည်လည်း ကမ္ဘာ့တံခါးပေါက်များကို ဖျက်ဆီးရန် ကြိုးစားနေကြသည်။

မိစ္ဆာနက်ဂိုဏ်း တပ်မတော်ကြီး ကမ္ဘာထဲသို့ ဆင်းသက်လာပြီးနောက် နင်ချီသည် စစ်မှန်သော သိုင်းဂိုဏ်းသားများ အဓိက ပါဝင်သည့် သိုင်းကမ္ဘာမှ သိုင်းပညာရှင်များကို ဤနေရာသို့ ပို့ဆောင်ထားခဲ့ခြင်း ဖြစ်သည်။

သိုင်းကမ္ဘာမှ အားကောင်းသော ပုံရိပ်များသည် တစ်ခုပြီးတစ်ခု ကမ္ဘာ့တံခါးပေါက်များကို အသည်းအသန် တိုက်ခိုက်နေကြသည်။ အဘယ်ကြောင့်ဆိုသော် သူတို့သည် အချိန်နှင့်အမျှ လုနေရမှန်း သိထားကြသောကြောင့် ဖြစ်သည်။ သိုင်းကမ္ဘာထဲတွင် ရန်သူများစွာ ရှိနေသေးပြီး သူတို့၏ ရဲဘော်ရဲဘက်များသည် အသက်နှင့်ရင်းကာ အချိန်ဆွဲပေးထားကြခြင်း ဖြစ်ပေသည်။

ကျွမ်ချန်၏ တစ်ကိုယ်လုံးတွင် ပလွေသံကဲ့သို့ ဓားဓာတ်များ ပဲ့တင်ထပ်နေပြီး သူ၏ မွေးရာပါ ဓားသိုင်းအဆီအနှစ် စွမ်းအားကို အပြည့်အဝ ထုတ်ဖော်ကာ တံခါးပေါက်များရှိ ဆက်သွယ်မှုများကို ဖြတ်တောက်နေသည်။

နောက်ထပ် ထူးချွန်ပြောင်မြောက်သူ တစ်ဦးမှာ ယွမ်ထျန်းရှန်း ဖြစ်လေ၏။

သူသည် ပေကိုးရာခန့်မြင့်သော 'ကောင်းကင်ထိ မျောက်ဖြူကြီး' ခန္ဓာကိုယ်ကို ဖန်တီးလိုက်ရာ သွေးမျိုးဆက် အမွေအနှစ်မြင်ကွင်းများတွင် တွေ့ခဲ့ရသော ဘိုးဘေးများထက်ပင် များစွာ သာလွန်နေပေသည်။ သူ၏ မျက်လုံးများတွင် ရွှေရောင်အလင်းများ တောက်ပနေပြီး ကမ္ဘာ့တံခါးပေါက် အပိုင်းအစများကို ဖျက်ဆီးပစ်နိုင်သည့် ဘုရားသခင် အလင်းတန်းများ ထုတ်လွှတ်ကာ တံခါးပေါက်၏ အခြေခံအုတ်မြစ်ကို ယိမ်းယိုင်စေလေသည်။

အခြားသူများသည်လည်း အစွမ်းကုန် ကြိုးစားနေကြ၏။

မိစ္ဆာနက်ဂိုဏ်း၌၊ -

မူလက ဖြည်းညှင်းစွာ လည်ပတ်နေသော နက်ရှိုင်းလှသည့် ဝဲကတော့ကြီးသည် ရုတ်တရက် တုန်ခါသွားပြီး အတွင်းမှ ပေါက်ကွဲသံကြီး ထွက်ပေါ်လာလေသည်။

မျက်လုံးမှိတ်လျက် အနားယူနေသော မိစ္ဆာနက် အစစ်အမှန် ဧကရာဇ် ဘဝင်မကျစွာ မျက်မှောင်ကြုတ်လိုက်မိ၏။ သူသည် ကောင်းကင်ကြည့် ကြေးမုံပြင်ဆီသို့ ကြည့်လိုက်ရာ သူ၏ အကြည့်သည် အဆုံးမဲ့သော ဟင်းလင်းပြင်ကို ထိုးဖောက်သွားပြီး ကမ္ဘာ့တံခါးပေါက်၏ အခြားတစ်ဖက်တွင် အမည်မသိ လူတစ်စုက တံခါးပေါက်ကို ဖျက်ဆီးရန် အစွမ်းကုန် ကြိုးပမ်းနေကြသည်ကို မြင်လိုက်ရလေသည်။

"ဒါက တံတားခင်းပြပြီး ပင်လယ်ဖြတ်ကူးမယ့် အကြံ (နည်းဗျူဟာ) လား"

သူသည် ထိုလူများ၏ ရည်ရွယ်ချက်ကို ချက်ချင်း နားလည်လိုက်ပြီး နှုတ်ခမ်းထောင့်များက အထင်အမြင်သေးစွာဖြင့် တွန့်ကွေးသွားလေသည်။

"ဒေသခံဆိုတာ ဒေသခံပါပဲ... တွင်းအောင်း ဖားသူငယ်တွေပါပဲလား"

အနီးရှိ မူလဝိညာဉ်နယ်ပယ် အကြီးအကဲတစ်ဦးသည်လည်း ထိုရုတ်ရုတ်သဲသဲ ဖြစ်မှုကို သတိပြုမိသွားပြီး နက်ရှိုင်းစွာ ဦးညွှတ်လိုက်လေ၏။

"ဂိုဏ်းချုပ် အစ်ကိုကြီး... ကျွန်တော့်ကို တာဝန်ပေးပါ"

သူ၏ အမည်မှာ ယန်ရွှဲ့ ဖြစ်ပြီး ယန်လော်၏ ဖခင် ဖြစ်သည်။

ယန်လော်၏ ပေါ့ဆမှုအပေါ် ဒေါသထွက်နေသော်လည်း ယန်လော်သည် သူ၏ အထူးချွန်ဆုံး သားသမီးများထဲမှ တစ်ဦး ဖြစ်နေသဖြင့် ကောင်းမှုပြုပြီး အပြစ်ကို ဆေးကြောစေရန် ရည်ရွယ်ကာ ကိုယ်တိုင် ပါဝင်ဆောင်ရွက်ရန် စီစဉ်လိုက်ခြင်း ဖြစ်သည်။

မိစ္ဆာနက် အစစ်အမှန် ဧကရာဇ်သည် နှုတ်ခမ်းထောင့်ကို မြှင့်လိုက်ပြီး လက်ကို ဝှေ့ယမ်းပြလိုက်၏။

"သွားချေ"

ယန်ရွှဲ့သည် လေးစားစွာ ဦးညွှတ်လိုက်ပြီးနောက် သူ၏ မူလဝိညာဉ်ဖြင့် ဝဲကတော့ကြီး အတွင်းသို့ ဝင်ရောက်သွားလေတော့သည်။