အဆောင်လက်ဖွဲ့ ရေးဆွဲခြင်း

~"အသက် ငါးဆယ်... ရာစုနှစ် တစ်ဝက်ကျော်မှ အခြေခံ တည်ဆောက်ခြင်း အဆင့်ကို ရောက်ရှိခဲ့ပြီ"

စုယွီ ပြန်ပြောင်း စဉ်းစားလိုက်သည်။ အစပိုင်းတွင် သူသည် အသက် ၆၀ သို့မဟုတ် ၇၀ ခန့်တွင်မှ အခြေခံ တည်ဆောက်ခြင်း အဆင့်သို့ ရောက်ရှိနိုင်မည်ဟု မျှော်မှန်းထားခဲ့၏။ အစီအစဉ် အတိုင်း ဖြစ်ခဲ့လျှင် သူ၏ နှစ်ရှည်လများ တံခါးပိတ် ကျင့်ကြံခြင်းက ထိုအဆင့်သို့ ပို့ဆောင်ပေးနိုင်မည် ဖြစ်ပေသည်။

သို့သော် ပြီးပြည့်စုံသော အရည်အသွေးရှိသည့် ချီစွမ်းအင် ဆေးလုံးများ၊ ရွှေပုစဉ်းရင်ကွဲ ကျင့်စဉ်နှင့် ထို လျှို့ဝှက်ဆန်းကြယ်သော ဝိညာဉ် သစ်ပင် မျိုးစေ့ အပါအဝင် အခြားသော ထူးဆန်းသည့် အခွင့်အရေးများကြောင့်...

သူ၏ ကျင့်ကြံမှု အရှိန်အဟုန်ကို များစွာ မြှင့်တင်ပေးခဲ့ပြီး ကျင့်ကြံမှု အဆင့်ကို ထိုးတက်စေခဲ့၏။ ထို့ကြောင့် သူသည် မျှော်မှန်းထားသည်ထက် ဆယ်စုနှစ် တစ်ခု၊ နှစ်ခု စော၍ အခြေခံ တည်ဆောက်ခြင်း ပထမ အဆင့်သို့ ရောက်ရှိနိုင်ခဲ့ခြင်း ဖြစ်ပေသည်။

"ဒါဆိုရင် ငါ့ရဲ့ သက်တမ်းက ၁၆၃ နှစ် ကျန်သေးတာပေါ့"

စုယွီ၏ မျက်ဝန်းထဲတွင် ပြတ်သားမှုများ ပေါ်လာသည်။ ဤသက်တမ်းဖြင့် ရွှီဝမ်ရှန်းကို ကျော်ဖြတ်နိုင်ပါမည်လော။ သို့မဟုတ် ပိုင်ယွဲ့ အင်မော်တယ် မြို့တော်ထက် ပိုရှည်ကြာအောင် နေနိုင်ပါမည်လော။

မဖြစ်နိုင်လောက်ပေ။

သက်တမ်းရှည် ဆေးလုံး မသောက်ဘဲ အခြေခံ တည်ဆောက်ခြင်း အဆင့်၏ သက်တမ်း ကန့်သတ်ချက်မှာ နှစ် ၂၃၀ ခန့် ဖြစ်သည်။

သက်တမ်းရှည် ဆေးလုံး မသောက်ဘဲ အမြုတေ ဖွဲ့စည်းခြင်း အဆင့်၏ သက်တမ်း ကန့်သတ်ချက်မှာ နှစ် ၅၀၀ ခန့် ဖြစ်သည်။

ဆရာသခင် ပိုင်ယွဲ့သည် အသက် ၄၀၀ မပြည့်သေးဟု သူ ခန့်မှန်းရ၏။ အကယ်၍ သူ အမြုတေ ဖွဲ့စည်းခြင်း အထွတ်အထိပ် အဆင့်သို့ ရောက်ရှိပါက နောက်ထပ် နှစ် ၁၀၀ ခန့် ဆက်လက် အသက်ရှင်နိုင်ဦးမည် ဖြစ်ပေသည်။

ထို့ပြင် အနာဂတ်တွင် ၊ ဆရာသခင် ပိုင်ယွဲ့ ကလေးဘဝ ပြန်ရောက်အောင် လုပ်နိုင်မလား ဆိုသည်ကို မည်သူ သိနိုင်ပါအံ့နည်း။

သို့သော် ရွှီဝမ်ရှန်းနှင့် ဆရာသခင် ပိုင်ယွဲ့ တို့ သက်တမ်း တိုးနိုင်သကဲ့သို့ သူလည်း ကျင့်ကြံပြီး နယ်ပယ် ချိုးဖြတ်နိုင်သည် မဟုတ်ပါလော။

ထိုသို့သာ ဖြစ်လာခဲ့လျှင် ရွှီဝမ်ရှန်း၏ နောက်ဆုံးထွက်သက်ကို ကျေနပ်စွာ ကြည့်ရှုနိုင်မည် ဖြစ်ပေသည်။

"အစိမ်းရောင် သစ်သား နှစ်ပတ်လည် ကွင်း ကျင့်စဉ်က နယ်ပယ် ချိုးဖြတ်သွားပြီ... ရွှမ်မင် ဆန်းကြယ် မြေကမ္ဘာ သိုင်းကျမ်းကလည်း တိုးတက်ဖို့ နီးစပ်နေပြီ... နောက်ရက် အနည်းငယ် အတွင်း နဝမဆင့်ကို ရောက်ရှိသွားလိမ့်မယ်"

စုယွီ တွေးတောလိုက်သည်။

"ဒါဆိုရင် ငါ နောက်ထပ် ခဏလောက် တံခါးပိတ် ကျင့်ကြံပြီး ရွှမ်မင် ဆန်းကြယ် မြေကမ္ဘာ သိုင်းကျမ်းကို တိုးတက်အောင် လုပ်ရမယ်... ပြီးရင် အခြေခံ တည်ဆောက်ခြင်း အဆင့် မန္တန်တွေကို လေ့ကျင့်ဖို့ ရည်ရွယ်ထားတယ်"

တစ်လ ကုန်ဆုံးသွား၏။

စုယွီသည် လျှို့ဝှက် ခန်းမဆောင် အတွင်း တံခါးပိတ် ကျင့်ကြံနေခဲ့၏။

သုံးရက် အတွင်းမှာပင်...

ရွှမ်မင် ဆန်းကြယ် မြေကမ္ဘာ သိုင်းကျမ်းသည် နဝမ အဆင့်သို့ အောင်မြင်စွာ တက်လှမ်းနိုင်ခဲ့ပြီး မြေဓာတ် ဝိညာဉ် စွမ်းအင်သည် ချီစွမ်းအင် စုစည်းခြင်း နဝမဆင့်သို့ ရောက်ရှိသွားခဲ့လေ၏။

ထို့နောက် စုယွီသည် အစိမ်းရောင် သစ်သား နှစ်ပတ်လည် ကွင်း ကျင့်စဉ်၏ အခြေခံ တည်ဆောက်ခြင်း အဆင့် မန္တန်များကို စတင် လေ့လာခဲ့သည်။ သစ်သားဓာတ် ရှောင်တိမ်းခြင်း နည်းစနစ်၊ အရာရာ အသွင်ပြောင်းလဲခြင်း နည်းစနစ်၊ သမုဒ္ဒရာနှင့် သဲကန္တာရ ပြောင်းလဲခြင်း နည်းစနစ်၊ သစ်သား ရုပ်သေး နည်းစနစ်နှင့် အစိမ်းရောင် အလင်းတန်း နည်းစနစ် တို့ ဖြစ်ကြ၏။

သစ်သားဓာတ် ရှောင်တိမ်းခြင်း နည်းစနစ်ကို စုယွီ ယခင်က မလေ့လာခဲ့ဖူးပေ။ အဘယ်ကြောင့်ဆိုသော် မြေကမ္ဘာ ရှောင်တိမ်းခြင်း နည်းစနစ်နှင့် ရေဓာတ် ရှောင်တိမ်းခြင်း နည်းစနစ် တို့နှင့် မတူဘဲ ၎င်းသည် ဝိညာဉ် စွမ်းအင် ပမာဏ များစွာ လိုအပ်သဖြင့် အခြေခံ တည်ဆောက်ခြင်း အဆင့် ကျင့်ကြံသူများအတွက် ပိုမို သင့်တော်သောကြောင့်ပင်။

အရာရာ အသွင်ပြောင်းလဲခြင်း နည်းစနစ်သည် သစ်သားဓာတ် ပုံရိပ်ယောင် နည်းစနစ် ဖြစ်ပြီး မိမိကိုယ်ကို အပင် အမျိုးမျိုး အဖြစ် ပြောင်းလဲကာ ရန်သူကို ရှုပ်ထွေးစေနိုင်သည်။

သစ်သားဓာတ် ရှောင်တိမ်းခြင်း နည်းစနစ်နှင့် ပေါင်းစပ်လိုက်ပါက ထူထပ်သော တောအုပ် အတွင်း ထွက်ပြေး လွတ်မြောက်ရာတွင် ပြိုင်ဘက်ကင်း ဖြစ်လာပေလိမ့်မည်။

သမုဒ္ဒရာနှင့် သဲကန္တာရ ပြောင်းလဲခြင်း နည်းစနစ်သည် အစိမ်းရောင် သစ်သား နှစ်ပတ်လည် ကွင်း ကျင့်စဉ်၏ ထူးခြားဆန်းပြားသော မန္တန် တစ်ခု ဖြစ်၏။ ပုံရိပ်ယောင် နည်းစနစ် ဟုတ်မဟုတ် မသေချာသော်လည်း လူတစ်ဦးအား သမုဒ္ဒရာနှင့် သဲကန္တာရ အပြောင်းအလဲ အခြေအနေများကို ခဏတာ ခံစားစေနိုင်ပြီး သက်တမ်း ကုန်ဆုံးတော့မည့် အားနည်းမှုကို ကြုံတွေ့စေနိုင်သည်။

အစစ်အမှန် မဟုတ်သော်လည်း ရုတ်တရက် အသုံးပြုလိုက်ပါက ရန်သူကို သေချာပေါက် ထိခိုက်စေနိုင်သည်။

သစ်သား ရုပ်သေး နည်းစနစ်သည် ရုပ်သေး ပညာရပ် မဟုတ်ဘဲ အခြေခံ တည်ဆောက်ခြင်း အဆင့် သစ်သားဓာတ် မန္တန် တစ်ခု ဖြစ်သည်။ ၎င်းကို အသုံးပြုလိုက်ပါက အပင်များကို ရုပ်သေးများ အဖြစ် ပြောင်းလဲပြီး မိမိအတွက် တိုက်ခိုက်ပေးစေနိုင်သည်။

ကောင်းစွာ လေ့ကျင့်ထားပါက အတော်အတန် အစွမ်းထက်ပေလိမ့်မည်။

အစိမ်းရောင် အလင်းတန်း နည်းစနစ်သည် သစ်သားဓာတ် ကုသရေး မန္တန် ဖြစ်၏။

၎င်း၏ လုပ်ဆောင်ချက်မှာ ဒဏ်ရာ အသေးစားများကို ချက်ချင်း ပျောက်ကင်းစေနိုင်ပြီး ဒဏ်ရာ အကြီးစားများကို အတိုင်းအတာ တစ်ခုအထိ သက်သာစေနိုင်ပါသည်။

စုယွီသည် ဤ အခြေခံ တည်ဆောက်ခြင်း အဆင့် မန္တန် ငါးမျိုးကို တစ်ခုပြီးတစ်ခု စတင် လေ့ကျင့်လိုက်လေတော့သည်။

သူ အခြေခံ တည်ဆောက်ခြင်း အဆင့်သို့ ရောက်ရှိသွားပြီ ဖြစ်ကြောင်း သတင်းသည် ယွီခယ်အာ၊ ယွီချန်ချင်းနှင့် အခြားသူများထံ မကြာမီ ရောက်ရှိသွားလေ၏။

တစ်လ ကြာပြီးနောက် စုယွီ တံခါးပိတ် ကျင့်ကြံရာမှ ထွက်လာခဲ့၏။

ညပိုင်းတွင်၊ မူးယစ်နတ်သမီး မျှော်စင်၏ တတိယထပ်ရှိ သီးသန့် အခန်း တစ်ခု၌၊

စုယွီ၊ ယွီခယ်အာ၊ ယွီချန်ချင်း၊ ရှုသယ်ရှန်း၊ ခန်းယွင်နျန်၊ ရှုယင်ရှန်းနှင့် သမီး၊ ထို့အပြင် ဝဝဖိုင့်ဖိုင့် လူလတ်ပိုင်း အမျိုးသား တစ်ဦး တို့သည် စုယွီ၏ အခြေခံ တည်ဆောက်ခြင်း အဆင့်သို့ ရောက်ရှိခြင်းကို ဂုဏ်ပြုနေကြ၏။

လိုက်ကာ နောက်ကွယ်တွင် လန်ရှီနှင့် လန်ကုန်း ညီအစ်မ နှစ်ဦးသည် ဂီတ တီးမှုတ် ဖျော်ဖြေနေကြ၏။

ဂီတ ပညာရှင်များ၏ ဆွဲဆောင်မှု ရှိသော တေးသံများသည် လူတိုင်း၏ နားထဲသို့ စီးဝင်ပြီး စိတ်နှလုံးကို ကြည်နူးစေလျက် ရှိပေသည်။

ယွီခယ်အာက ဝဝဖိုင့်ဖိုင့် အမျိုးသားကို မိတ်ဆက်ပေးလိုက်၏။

"ဒါက လီပင်ချန်း ပါ... ဝူယန် တောင်တန်းက ဆေးပညာရှင် ပိုင်ယန်ရဲ့ တပည့် တစ်ဦး ဖြစ်ပြီး ဒုတိယအဆင့် ကနဦး အဆင့် ဆေးပညာရှင် တစ်ယောက်ပါ"

လီပင်ချန်း၏ ခပ်ဝဝ မျက်နှာ လှုပ်ခါသွားပြီး ခွက်ကို မြှောက်ကာ စုယွီကို ဂုဏ်ပြုလိုက်၏။

"မိတ်ဆွေ စုရဲ့ ဂုဏ်သတင်းကို ကြားတာ ကြာပါပြီ... အခုလို နယ်ပယ် ချိုးဖြတ်သွားတဲ့ အခွင့်အရေးမှာ လာရောက် ဂါရဝပြုတာပါ... ပြီးတော့ လူသား လောကကနေ လုံးဝ လွတ်မြောက်ပြီး အခြေခံ တည်ဆောက်ခြင်း အဆင့်ကို အောင်မြင်စွာ ရောက်ရှိသွားတာကိုလည်း ဂုဏ်ပြုပါတယ်"

စုယွီက ကျေးဇူးတင်ကြောင်း ပြောပြီး ခွက်ကို ပြန်မြှောက်လိုက်သည်။

"ကျေးဇူးတင်ပါတယ် မိတ်ဆွေ လီ"

မကြာမီ လီပင်ချန်းသည် ရင်ဘတ်ထဲမှ နှိုက်ပြီး ကျောက်စိမ်း သေတ္တာ တစ်ခုကို ချန်ခွန်းအိတ်ထဲမှ ထုတ်ယူလိုက်လေ၏။

သူက မြှောက်ပင့်သော လေသံဖြင့် ပြောလာာ၏။

"ဒါက အဖြူရောင် မီးလျှံ ဝိညာဉ် ဂျင်ဆင်း တစ်ပိုင်းပါ... အရမ်း ဈေးမကြီးပေမဲ့ ဆေးလုံး အဖြစ် ဖော်စပ်လိုက်ရင် ဝိညာဉ် စွမ်းအင်ကို သန့်စင်ပေးနိုင်ပြီး အဆင့်တွေကို ပိုမြန်မြန် တည်ငြိမ်စေနိုင်ပါတယ်... မိတ်ဆွေ စုရဲ့ အင်မော်တယ် ခရီးစဉ်မှာ ထာဝရ နုပျိုပါစေကြောင်း ဆုတောင်းရင်း လက်ဆောင် ပေးအပ်ပါတယ်"

စုယွီ လက်ဆောင်ကို လက်ခံပြီး ထပ်မံ ကျေးဇူးတင်စကား ဆိုလိုက်၏။

ထို့နောက် ယွီခယ်အာနှင့် အခြားသူများလည်း လက်ဆောင်များ တစ်ခုပြီးတစ်ခု ပေးအပ်ကြလေ၏။

လိုက်ကာ နောက်ကွယ်မှ လန်ရှီနှင့် လန်ကုန်း တို့သည်ပင် သီချင်းဆိုပြီးနောက် ထွက်လာကြပြီး စုယွီကို ဂုဏ်ပြုရန် ရိုးရှင်းသော လက်ဆောင်များ လေးစားစွာ ပေးအပ်ကြလေတော့သည်။

အခြေခံ တည်ဆောက်ခြင်း အဆင့်သို့ ရောက်ရှိသွားပြီးနောက် လန်ညီအစ်မ တို့၏ မျက်လုံးထဲတွင် စုယွီ၏ အဆင့်အတန်းသည် လုံးဝ ပြောင်းလဲသွားပြီ ဖြစ်ပေသည်။

သူသည် မြှောက်ပင့် နှစ်သိမ့်ပေးရမည့် စီနီယာ ပုဂ္ဂိုလ်ကြီး တစ်ဦး ဖြစ်လာခဲ့လေ၏။

စားသောက် ပြီးနောက်၊

ယွီခယ်အာက စုယွီကို ကြည့်ပြီး ပြောလိုက်၏။

"မိတ်ဆွေ လီ က ပိုင်ယွဲ့ အင်မော်တယ် မြို့တော်ကို ရောက်တာ မကြာသေးပါဘူး... သူက ကျွန်မတို့ ယွီမိသားစုနဲ့ အဆက်အသွယ် တချို့ ရှိပါတယ်... ယုံကြည် စိတ်ချရတဲ့သူပါ... ဒါကြောင့် ဆေးလုံးမျှော်စင်ကို သူ့လက်ထဲ အပ်ထားလို့ ရမယ် ထင်တယ်"

ထိုစဉ်၊ စုယွီသည် သူ့ကို မျှော်လင့်တကြီး၊ မြှောက်ပင့်သော မျက်လုံးများဖြင့် ကြည့်နေသည့် လီပင်ချန်းကို ကြည့်လိုက်သည်။ ဒုတိယအဆင့် ကနဦး အဆင့် ဆေးပညာရှင် တစ်ဦးနှင့် လုံးဝ မတူပေ။

ဆေးပညာရှင်ထက် စကားရောဖောရော ပြောတတ်သော အရောင်းသမား တစ်ယောက်နှင့် ပိုတူနေပေသည်။

ယွီခယ်အာက တိုးတိုးလေး ပြောပြလေ၏။

"လီပင်ချန်းက ဝူယန် တောင်တန်းမှာ ဖောက်သည်တွေကို ကိုင်တွယ်တဲ့သူလေ... သူ့ရဲ့ ဆေးပညာ စွမ်းရည်က သိပ်မကောင်းပေမဲ့ ပိုင်ယန် ဆေးပညာရှင်ရဲ့ အစပိုင်း တပည့် တစ်ယောက်ပါ... ပိုင်ယွဲ့ အင်မော်တယ် မြို့တော်က ဝူထုံ ဆေးလုံးမျှော်စင်ကို စီမံခန့်ခွဲဖို့ အတွက်တော့ လုံလောက်ပါတယ်"

စုယွီက စူးစမ်းလိုစိတ်ဖြင့် မေးလိုက်၏။

"ဒါဆို သူက ဘာလို့ ပိုင်ယွဲ့ အင်မော်တယ် မြို့တော်ကို ရောက်လာတာလဲ"

ယွီခယ်အာက ဖြေလေ၏။

"ကောလာဟလတွေ အရ ဆိုရင် သူက ဆေးဖော်နေတဲ့ အချိန်မှာ ပိုင်ယန် ဆေးပညာရှင်ကို လန့်သွားအောင် လုပ်မိလို့ အထုတ်ခံလိုက်ရတာတဲ့"

ဘာအကြောင်းပြချက်ဖြင့်နည်း။

ဆေးဖော်သည်ကို နှောင့်ယှက်မိရုံနှင့် တပည့်ကို ဂိုဏ်းမှ ထုတ်ပစ်လိုက်သလော။

ကောလာဟလများ ပြောသကဲ့သို့ပင် ပိုင်ယန် ဆေးပညာရှင်၏ စိတ်သဘောထားက အမှန်တကယ် ထူးဆန်းသည်ဟု စုယွီ စိတ်ထဲတွင် တွေးလိုက်မိလေ၏။

သို့သော် ယွီမိသားစုနှင့် ဆက်ဆံရေး ရှိသူ ဆိုလျှင် ယုံကြည် စိတ်ချရပေလိမ့်မည်။ မဟုတ်လျှင်လည်း...

စုယွီသည် အခြေခံ တည်ဆောက်ခြင်း ပထမ အဆင့်သာ ရှိသေးပြီး အရှိန်အဝါ မတည်ငြိမ်သေးသော လီပင်ချန်းကို ကြည့်လိုက်၏။ မျက်နှာပေါ်တွင် အပြုံးတစ်ခု ပေါ်လာပြီး ထောက်ခံလိုက်လေ၏။

"သေချာတာပေါ့... မိတ်ဆွေ လီကို ကျွန်တော် ယုံကြည်ပါတယ်"

နောင်တစ်ချိန် မိမိ မယုံကြည်တော့ပါက သူ့ကို သတ်ပစ်လိုက်ရုံပင်။

ဧည့်ခံပွဲ ပြီးဆုံးသောအခါ လီပင်ချန်းကို နောက်တစ်နေ့ ဆေးလုံးမျှော်စင်သို့ သွားရောက်ပြီး လုပ်ငန်း ကိစ္စများနှင့် ရင်းနှီးကျွမ်းဝင်အောင် လုပ်ရန် စုယွီ မှာကြားလိုက်၏။ ထို့နောက် စုယွီ၊ ယွီခယ်အာနှင့် ယွီချန်ချင်း တို့သည် မူးယစ်နတ်သမီး မျှော်စင်မှ ထွက်ခွာပြီး လမ်းကြားရှိ ခြံဝင်းသို့ အတူတူ ပြန်လာခဲ့ကြလေ၏။

ညကောင်းကင်အောက် ခြံဝင်းထဲရှိ သစ်ပင်အောက် ကျောက်စားပွဲဝိုင်းတွင် သုံးဦးသား ထိုင်နေကြ၏။ မီးဖိုပေါ်တွင် လက်ဖက်ရည် အိုး တည်ထားသည်။

ဖျော့တော့သော မီးအိမ်ရောင်နှင့် လရောင်တို့သည် လေတိုက်ခတ်မှုကြောင့် တဖျပ်ဖျပ် လှုပ်ရှားနေကြပေသည်။

စုယွီက သူတို့ နှစ်ဦးအတွက် ဝိညာဉ် လက်ဖက်ရည် တစ်ခွက်စီ ငှဲ့ပေးရင်း ပြောလိုက်၏။

"ဝိညာဉ် ခန်းမဆောင် လေလံပွဲ ကျင်းပဖို့ သုံးလလောက် လိုသေးတယ်... လေလံပွဲ ပြီးမှ တာ့ယွဲ့ မှောင်ခိုဈေးကို သွားကြတာပေါ့"

"လီပင်ချန်းက စိတ်ချရတယ် ဆိုရင် ပိုင်ယွဲ့ အင်မော်တယ် မြို့တော်က ဝူထုံ ဆေးလုံးမျှော်စင်ကို သူပဲ ဆက်ပြီး စီမံခန့်ခွဲပါစေ"

"တာ့ယွဲ့ မှောင်ခိုဈေးမှာ နောက်ထပ် ဝူထုံ ဆေးလုံးမျှော်စင် တစ်ခု ထပ်ဖွင့်ကြမယ်"

ညဉ့်နက်သောအခါ ယွီခယ်အာနှင့် အခြားသူများသည် ခြံဝင်းထဲရှိ လွတ်နေသော အခန်းများတွင် ဝင်ရောက် အနားယူကြလေတော့သည်။

နောက်တစ်နေ့တွင်၊

လီပင်ချန်း ဝူထုံ ဆေးလုံးမျှော်စင်သို့ ဝင်ရောက်ခြင်း ကိစ္စကို စီစဉ်ပြီးနောက် စုယွီသည် လမ်းကြားရှိ ခြံဝင်း၏ လျှို့ဝှက် ခန်းမဆောင်သို့ ပြန်လာခဲ့၏။ သူသည် တိတ်ဆိတ် တည်ငြိမ်စွာဖြင့် တွေးတောနေမိလေ၏။

"လာမယ့် အချိန်တွေမှာ... သာမန် ဒုတိယအဆင့် ကနဦး အဆင့် ရုပ်သေးသားရဲ တစ်ကောင် ဖန်တီးဖို့ ကြိုးစားရမယ်"

"ပြီးတော့ ဒုတိယအဆင့် အလယ်အလတ် အဆောင်လက်ဖွဲ့ အဆောင် ရေးဆွဲဖို့လည်း ကြိုးစားရမယ်"

"သာမန် ဒုတိယအဆင့် ကနဦး အဆင့် ရုပ်သေးသားရဲ တစ်ကောင် ဖန်တီးနိုင်ခဲ့ရင် ဝိညာဉ် ခန်းမဆောင် လေလံပွဲမှာ အဆင့်နိမ့် ဝိညာဉ်ကျောက်တုံး တစ်သောင်းကျော်နဲ့ လေလံတင် ရောင်းချနိုင်လိမ့်မယ်"

စုယွီ ချန်ခွန်းအိတ်ကို ဖွင့်ပြီး ပစ္စည်းများကို စစ်ဆေးကြည့်လိုက်လေ၏။

ဒုတိယအဆင့် အလယ်အလတ် အဆောင် အတွက် ပစ္စည်းများ အဆင်သင့် ဖြစ်နေပြီ ဖြစ်၏။ သာမန် ဒုတိယအဆင့် ကနဦး အဆင့် ရုပ်သေးသားရဲ အတွက် ပစ္စည်းများ စုဆောင်းရန်မှာ သိပ်မခက်ခဲလှပေ။ ယခင်က သူ ဖန်တီးခဲ့သော ဒုတိယအဆင့် နဂါးမိကျောင်း ရုပ်သေးသားရဲလောက် မခက်ခဲချေ။ တူညီသော အဆင့်ရှိသည့် ကောင်းမွန်စွာ ရွေးချယ်ထားသော ကုန်ကြမ်းပစ္စည်းများကို အသုံးပြုနိုင်သည်။ ၎င်းတို့ကို သူ စုဆောင်းထားပြီး ဖြစ်ပေသည်။

"ကောင်းပြီ... စလိုက်ကြစို့"

စုယွီသည် နေ့စဉ် ကျင့်ကြံခြင်းကို ဆက်လက် ပြုလုပ်လိုက်၏။

ကျင့်ကြံခြင်း ပြီးဆုံးသောအခါ သူသည် ကျောက်စိမ်း စားပွဲတစ်ခု ရှေ့သို့ ရောက်ရှိလာလေ၏။

ထူးကဲ ကောင်းမွန်သော အဆောင်လက်ဖွဲ့ စုတ်တံ တစ်ချောင်း၊ ဒုတိယအဆင့် အလယ်အလတ် သာမန် အဆောင် စက္ကူ ဆယ်ရွက်၊ ဒုတိယအဆင့် အလယ်အလတ် မိစ္ဆာသားရဲ၏ အဆီအနှစ်နှင့် အခြား ပစ္စည်းများကို ထုတ်ယူလိုက်၏။

စိတ်ကို စုစည်းပြီး အဆောင်လက်ဖွဲ့ ရေးဆွဲရန် ပြင်ဆင်လိုက်လေတော့သည်။