ယွီမိသားစု (၂)

~"ဦးလေးကတော့ တော်တော်မူးနေပြီ... အဒေါ်.. ဦးလေးကို အိမ်ပြန်ပို့ပေးလိုက်ဦးမယ်..."

"မောင်ရင်လည်း စောစော အနားယူတော့လေ..."

ယွီခယ်အာ၏ မိခင် လော့ချင်းယာသည် တည်ငြိမ်၍ ကျက်သရေရှိသော အမူအရာဖြင့် ပြောလိုက်ပြီး ယွီပိုင်ဟယ်ကို တွဲထူကာ ထွက်ခွာသွားလေ၏။ စုယွီ၊ ယွီခယ်အာနှင့် ယွီချန်ချင်းတို့ သုံးဦးစလုံးသည် မတ်တပ်ရပ်ပြီး နှုတ်ဆက်လိုက်ကြ၏။

'ဒါနဲ့တင်ပဲ... ခုန်းလင် ဝိညာဉ်သစ်သီးကို ရသွားတာလား...'

စုယွီသည် မယုံနိုင်အောင် ဖြစ်နေမိလေ၏။ ယွီမိသားစုသို့ မလာမီက သူသည် အကြောင်းပြချက် အမျိုးမျိုးကို စဉ်းစားထားခဲ့၏။ အခြေခံ တည်ဆောက်ခြင်း ဆေးလုံးကို ဘယ်လို ခွဲဝေမလဲ၊ ဆေးဖော်စပ်ရေး ပူးပေါင်းမှုအတွက် ဘယ်လို စည်းကမ်းချက်တွေ ထားမလဲ ဆိုတာတွေကို အသေးစိတ် ပြင်ဆင်လာခဲ့သည်။

ဒါပေမဲ့ ဒီလောက်ကြီး လွယ်ကူသွားလိမ့်မယ်လို့ ဘယ်သူ ထင်ထားမှာလဲ။

စုယွီသည် သူ့ဘေးနားတွင် ရှိနေသော ယွီခယ်အာကို လှည့်ကြည့်လိုက်လေ၏။ ဝိညာဉ် ဝိုင်၏ အရှိန်ကြောင့် အနည်းငယ် မူးနောက်နောက် ဖြစ်နေသော သူသည် ရုတ်တရက် ပါးစပ်မှ လွှတ်ခနဲ ပြောထွက်သွားမိ၏။

"ခယ်အာ... မင်းက အဒေါ့်ရဲ့ မျိုးရိုးဗီဇကို အကုန် ဆက်ခံထားတာပဲနော်..."

လော့ချင်းယာသည် အသက်အရွယ်ကြီးရင့်နေပြီ ဖြစ်သော်လည်း ရုပ်ရည်ထိန်းသိမ်းဆေးလုံးများ သုံးစွဲထားသဖြင့် ငယ်ရွယ်နုပျိုနေဆဲ ဖြစ်လေ၏။ ထို့ပြင် သူမသည် အခြေခံ တည်ဆောက်ခြင်း အဆင့် ကျင့်ကြံသူ တစ်ဦးလည်း ဖြစ်သည်။

သူမ၏ ရုပ်ရည်သွင်ပြင်သည် ယွီခယ်အာ၏ အစ်မတစ်ယောက်အလား ထင်မှတ်ရသော်လည်း၊ သူမ၏ ကိုယ်ခန္ဓာ အချိုးအစားနှင့် ကျက်သရေရှိမှုမှာမူ ရင့်ကျက်သော အမျိုးသမီးတစ်ဦး၏ ဆွဲဆောင်မှုမျိုး ပိုင်ဆိုင်ထားလေ၏။

သို့သော် စုယွီသည် လော့ချင်းယာ၏ မျက်နှာကို ပြန်လည် မြင်ယောင်ကြည့်မိသောအခါ... သူမ၏ မျက်နှာပေါက်သည် ယွင်ကျန်းဂိုဏ်း ပထမအကြီးအကဲ၏ တပည့်မလေး လော့ချန်ယွီနှင့် ဆင်တူနေသလားဟုပင် တွေးမိလိုက်သည်။

ယွီခယ်အာ စီစဉ်ပေးထားသော ဧည့်ရိပ်သာသို့ ပြန်ရောက်သောအခါ ယွီခယ်အာသည် ပြန်မသွားဘဲ အခန်းထဲသို့ လိုက်ဝင်လာခဲ့လေ၏။

တံခါးကို ပိတ်လိုက်ပြီးနောက် သူမသည် စုယွီကို လှည့်ကြည့်ကာ နူးညံ့စွာ ပြုံးလိုက်၏။

"အရင်တုန်းက အဖေက အမေ့ကို ဒီဝိညာဉ် ဝိုင်နဲ့ပဲ ဖမ်းခဲ့တာလေ..."

"အခုတော့ နင်က အဖေ့ကို ဒီဝိညာဉ် ဝိုင်တစ်အိုးလုံး ကုန်အောင် တိုက်လိုက်ပြီဆိုတော့... လွယ်တော့ မလွယ်ကူဘူးပေါ့..."

တကယ်လည်း မလွယ်ကူပါပေ။

အခြားတစ်ဖက်တွင်မူ ယွီပိုင်ဟယ်ခမျာ ဝိညာဉ် ဝိုင်၏ အရှိန်ကြောင့် တကိုယ်လုံး ပူလောင်နေရှာလေ၏။ ဒါက နှစ်ချို့ ဝိုင် ဖြစ်သဖြင့် ခွက်ငယ်လေး တစ်ခွက် သောက်လိုက်ရုံနှင့် လူတစ်ယောက်ကို မူးလဲသွားစေနိုင်သည်။

စုယွီကတော့ ရွှေပုစဉ်းရင်ကွဲ ကျင့်စဉ် ရှိနေသဖြင့် အသိစိတ် ကောင်းကောင်း ကပ်နေဆဲ ဖြစ်လေ၏။ သို့သော် သူ၏ ခန္ဓာကိုယ်မှာလည်း ပူနွေးနေပြီး ယွီခယ်အာကို ကြည့်ကာ ပြန်မေးလိုက်မိ၏။

"ဟုတ်လား..."

"ဒါပေါ့... နင် နားတော့မလား... မီးငြိမ်းပေးရမလား..."

ပြောရင်းဆိုရင်း သူမသည် စုယွီ၏ အနားသို့ တိုးကပ်လာခဲ့လေ၏။

နောက်တစ်နေ့ နံနက် မိုးလင်းသောအခါ၊

စုယွီသည် သူ၏ အခန်းအောက်ရှိ မြေအောက်ခန်းထဲသို့ ဝင်ရောက်ပြီး ဆေးဖော်စပ်ရန်အတွက် တံခါးပိတ် ကျင့်ကြံလိုက်တော့သည်။

မစတင်မီ သူသည် ကာကွယ်ရေး အခင်းအကျင်းများ၊ သတိပေး အခင်းအကျင်းများနှင့် အကာအကွယ် အခင်းအကျင်း အမျိုးမျိုးကို ခင်းကျင်းလိုက်၏။ ယွီမိသားစုမှ အခြေခံ တည်ဆောက်ခြင်း အဆင့် ကျင့်ကြံသူများ သူ၏ ဆေးဖော်စပ်မှုကို မချောင်းမြောင်းနိုင်စေရန် သေချာ ပြင်ဆင်လိုက်ခြင်း ဖြစ်သည်။

အခြေခံ တည်ဆောက်ခြင်း ဆေးလုံး ဖော်စပ်ရခြင်းသည် အလွန် ခက်ခဲလှပေသည်။ သာမန် ဒုတိယအဆင့် ကနဦး အဆင့် ဆေးလုံးများကို တစ်ရက်လျှင် သုံးလေးအိုးခန့် ဖော်စပ်နိုင်သော်လည်း...

အခြေခံ တည်ဆောက်ခြင်း ဆေးလုံးအတွက်မူ ရက်ပေါင်းများစွာ ဆက်တိုက် အချိန်ပေးရပြီး ရှုပ်ထွေးသော ကုန်ကြမ်းပစ္စည်းများကို စီမံခန့်ခွဲရသဖြင့် ဆေးပညာနှင့် ဝိညာဉ်စွမ်းအင် လိုအပ်ချက်မှာ အလွန် မြင့်မားလှ၏။

သို့သော် ဤအကြိမ်သည် စုယွီအတွက် ဒုတိယအကြိမ်မြောက် အတွေ့အကြုံ ဖြစ်သော်လည်း၊ သူ၏ ဆေးပညာ စွမ်းရည်သည် ပြီးပြည့်စုံသော အရည်အသွေး (Perfect Qualit ရှိသည့် ဒုတိယအဆင့် ကနဦး အဆင့် ဆေးလုံး ဒါဇင်နှင့်ချီ ဖော်စပ်နိုင်သည့် အဆင့်သို့ ရောက်ရှိနေပြီ ဖြစ်လေ၏။

သူ၏ ဆေးပညာ စွမ်းရည်သည် ယခင်ကထက် များစွာ တိုးတက်လာခဲ့ပြီ။

အကယ်၍ သူသာ ဒုတိယအဆင့် အလယ်အလတ် ဆေးလုံးများကို ဖော်စပ်ချင်လျှင် နောက်ထပ် လဝက်ခန့် ကြိုးစားလိုက်ရုံဖြင့် ဒုတိယအဆင့် အလယ်အလတ် ဆေးပညာရှင် အဆင့်သို့ တက်လှမ်းနိုင်တော့မည် ဖြစ်သည်။

အချိန်များ ဖြည်းညှင်းစွာ ကုန်ဆုံးသွားခဲ့၏။

ရက်အနည်းငယ် ကြာမြင့်ပြီးနောက်၊

ပြင်းထန်သော ဆေးနံ့သင်းသင်းလေး ထွက်ပေါ်လာသောအခါ စုယွီသည် လေးနက်သော မျက်နှာထားဖြင့် ဆေးလုံးများကို သိမ်းဆည်းရန် ပြင်ဆင်လိုက်လေ၏။

ဆေးပေါင်းအိုး၏ အဖုံးကို ဖွင့်လိုက်ရာ လုံးဝန်းပြီး နူးညံ့သော အလင်းရောင်များ ထုတ်လွှတ်နေသည့် ဆေးလုံးများသည် အိုးထဲမှ ပျံဝဲ ထွက်လာကြတော့သည်။

ဆေးလုံး (၅) လုံးတိတိ ထွက်လာသည်ကို တွေ့လိုက်ရ၏။

ထိုအထဲမှ (၃) လုံးသည် ကျောက်စိမ်းသားကဲ့သို့ ကြည်လင်နေပြီး သဘာဝအတိုင်း ထိပ်တန်း အရည်အသွေး ရှိသော အခြေခံ တည်ဆောက်ခြင်း ဆေးလုံးများ ဖြစ်ကြလေ၏။ ကျန်သည့် (၂) လုံးမှာမူ အနည်းငယ် အပြစ်အနာအဆာ ပါရှိပြီး သာမန် အရည်အသွေး သာ ရှိကြသဖြင့် နှမြောစရာ ကောင်းလှပေသည်။

ဒါကို မြင်လိုက်ရသောအခါ စုယွီ၏ တင်းမာနေသော မျက်နှာထား လျော့ကျသွားပြီး အပြုံးတစ်ခု ပေါ်လာတော့သည်။

"မဆိုးပါဘူး... ဆေးလုံး (၅ ) လုံးတောင် ရတာပဲ..."

ကုန်ကြမ်းပစ္စည်း ပမာဏ ကန့်သတ်ချက် ရှိသည်ကို သိထားရမည်။ ယေဘုယျအားဖြင့် တစ်အိုးလျှင် အများဆုံး (၅) လုံးခန့်သာ ထွက်လေ့ရှိ၏။

ကုန်ကြမ်း အရည်အသွေး သိပ်မကောင်းလျှင် (၄) လုံး ရသည်ကပင် အကန့်အသတ် ဖြစ်နေတတ်သည်။

လူအများစုအတွက်မူ (၃) လုံး ရလျှင် ပုံမှန်ဟု သတ်မှတ်ကြပြီး၊ (၄) လုံး ရလျှင် ဆေးပညာ စွမ်းရည် ကောင်းမွန်သည်ဟု ယူဆကြလေ၏။

ယခုကဲ့သို့ (၅) လုံး ရရှိခြင်းမှာ ဤအဆင့်အတန်းအတွက် 'ဆရာသခင် အဆင့် ဆေးပညာရှင်' ဟု ခေါ်ဆိုထိုက်ပေသည်။

စုယွီသည် အခြေခံ တည်ဆောက်ခြင်း ဆေးလုံး (၅) လုံးကို ခွဲခြားပြီး ကျောက်စိမ်း ပုလင်းများထဲသို့ ထည့်လိုက်၏။ သူသည် ခေတ္တမျှ စဉ်းစားလိုက်ပြီးနောက် ထိပ်တန်း အရည်အသွေး ဆေးလုံး (၂) လုံးကို သူ၏ သိုလှောင်အိတ်ထဲသို့ ထည့်လိုက်သည်။ ကျန်ရှိသော ထိပ်တန်း အရည်အသွေး (၁) လုံးနှင့် သာမန် အရည်အသွေး (၂) လုံးကိုမူ သီးခြား ကျောက်စိမ်းသေတ္တာ တစ်ခုထဲသို့ ထည့်လိုက်လေ၏။

ထို့နောက်မှသာ စုယွီသည် အခန်းထဲမှ ထွက်ခွာလာခဲ့တော့သည်။

ခြံဝင်းထဲ၌၊

ယွီခယ်အာနှင့် ယွီချန်ချင်းတို့သည် စုယွီအတွက် စောင့်ကြပ်ပေးနေကြလေ၏။ စုယွီ ထွက်လာသည်ကို မြင်လိုက်ရသောအခါ အမျိုးသမီး နှစ်ဦးစလုံး အလျင်အမြန်ပင် ပြေးလာကြ၏။

ယွီချန်ချင်းသည် အနည်းငယ် စိတ်လှုပ်ရှားနေပုံ ရပြီး မေးလိုက်လေ၏။

"မျှော်စင်သခင်... ဘယ်လိုလဲဟင်... အောင်မြင်ရဲ့လား..."

ယွီခယ်အာကတော့ စုယွီကို ပြုံးပြီး ကြည့်နေရုံသာ ကြည့်နေ၏။ စကားမပြောသော်လည်း စုယွီ အောင်မြင်မည်ဟု သူမ ယုံကြည်ထားပုံ ရလေ၏။

စုယွီသည် ခေါင်းကို တည်ငြိမ်စွာ ညိတ်ပြလိုက်ပြီး လက်ကို ဝှေ့ယမ်းကာ ကျောက်စိမ်းသေတ္တာကို ထုတ်ယူလိုက်သည်။

"မဆိုးပါဘူး... လက်ရာ မကျသေးဘူးပဲ... ဆေးလုံး (၃) လုံး ရတယ်... တစ်လုံးက ထိပ်တန်း အရည်အသွေး ဖြစ်ပြီး... ကျန်တဲ့ နှစ်လုံးကတော့ အပြစ်အနာအဆာ နည်းနည်းပါလို့ သာမန် အရည်အသွေးပဲ သတ်မှတ်ရမှာပေါ့..."

ထိုစကားကို ကြားလိုက်ရသောအခါ ယွီချန်ချင်း၏ မျက်လုံးများ ပြူးကျယ်သွားတော့သည်။

သူမ နားကို မယုံနိုင်အောင် ဖြစ်နေမိ၏။

တကယ်ကြီး အောင်မြင်သွားတာလား။

ပြီးတော့ ထိပ်တန်း အရည်အသွေး တစ်လုံးတောင် ပါသေးတာလား။

ဘေးနားတွင် ရပ်နေသော ခယ်အာသည်လည်း အံ့အားသင့်သွားပြီး စုယွီကို ကြည့်ကာ ဝမ်းသာအားရ ပြုံးလိုက်မိလေ၏။

—--------

မကြာမီ အချိန်၌၊

ပင်မ ခန်းမဆောင် အတွင်းတွင်၊

ယွီပိုင်ဟယ်၊ လော့ချင်းယာနှင့် တတိယ မျိုးဆက်မှ မိသားစု အကြီးအကဲ အများအပြား စုရုံးရောက်ရှိနေကြလေ၏။

အသစ်စက်စက် ဖော်စပ်ထားသော အခြေခံ တည်ဆောက်ခြင်း ဆေးလုံး (၃) လုံးကို ကြည့်ပြီး သူတို့၏ မျက်နှာများတွင် ကျေနပ်မှုများ ပေါ်လွင်နေကြ၏။ သို့သော် အကြီးအကဲ တစ်ဦးမှာမူ မျက်မှောင်ကြုတ်နေလေ၏။

ခဏအကြာတွင် ယွီပိုင်ဟယ်သည် စုယွီကို မော့ကြည့်လိုက်ပြီး စိတ်ထဲတွင် တွေးလိုက်မိသည်။

'မဆိုးဘူး... ထိပ်တန်း အရည်အသွေး အခြေခံ တည်ဆောက်ခြင်း ဆေးလုံးကိုတောင် ဖော်စပ်နိုင်တယ် ဆိုတော့... ခယ်အာနဲ့ တကယ်ကို ထိုက်တန်ပါတယ်...'

လွန်ခဲ့သော ရက်အနည်းငယ်က စုမိသားစုမှ ပါရမီရှင် ဆေးပညာရှင် အကြောင်း ကြားဖူးသည်ဟု သူ ပြောခဲ့ခြင်းမှာ ယဉ်ကျေးမှု အရ ပြောဆိုခဲ့ခြင်း သက်သက်သာ ဖြစ်၏။

အမှန်တကယ်တော့ သူသည် သမီးဖြစ်သူ ခယ်အာ ဆီမှ စုယွီ အကြောင်း ကြားဖူးထားသဖြင့် သမီးမျက်နှာကို ထောက်ပြီး ဟန်လုပ် ပြောဆိုခဲ့ခြင်းသာ ဖြစ်သည်။

သို့သော်ငြား၊ ယနေ့တော့...

ဤမျှ အရည်အသွေး ကောင်းမွန်သော ဆေးလုံး (၃) လုံးကို ကိုယ်တိုင် မြင်လိုက်ရသည့် အခါမှာတော့...

စုယွီမှာ ဆေးပညာ ပါရမီ တကယ် ရှိကြောင်း ယွီပိုင်ဟယ် ဝန်ခံလိုက်ရတော့သည်။

တစ်ခုတည်းသော ပြဿနာမှာ စုယွီ၏ ဝိညာဉ်အမြစ်သည် အဆင့်နိမ့် ဖြစ်နေခြင်းပင်။

အကယ်၍သာ စုယွီသည် အခြေခံ တည်ဆောက်ခြင်း အဆင့်သို့ မရောက်ရှိခဲ့ပါက ယွီပိုင်ဟယ် အနေဖြင့် စုယွီကို တွေ့ဆုံရန်ပင် စိတ်ကူးရှိလိမ့်မည် မဟုတ်ချေ။